67. Der Traam.
Von F.v. Kobell. – Sage vomBirkenstein, Wallfahrt bei Fischbachau in Oberb.
Es hat amal an' Diendl traamt,
Sie hätt' si' in an' Wald verganga,
Und is ihr da, hat nie g'wißt wie,
A Graus'n kemma und a Banga;
Und wie se si' so g'forcht'n hat,
Da hört s' in Laabern 'was rebell'n,
Und kimmt a Wolf nett auf sie her,
Als wollt er ihr n' Weg verstell'n.
Und in der Angst da hat sie g'lobt,
Zu'n Birkastoa' a Wallfahrt z'macha,
Da is der Wolf gar g'schwind davo'
Sie hat scho' gmoa't, er hätt' s' in Racha', –
Und wacht na' auf und hat wohl g'schnauft
Und hat lang denkt an ihra Traama
Und an den Wolf, und wie's wohl waar,
Wann s' ebber amal so 'zammakaama.
Und ob s' die Wallfahrt macha sollt',
Hätt s' freili grad in Traam versprocha,
In selli Sach'n aber moant s',
Da waar halt leichtli' 'was verbrocha.
[69]Sie fragt an' Holzknecht, der hat oft
Der ab'r is gwest a Teufisstrick
Koa Freund von Bett'n und von' Bitt'n.
»Jetzt roas' mit deiner Wallfahrt da,
So sagt er, is da' ja nix g'schegn,
Was werst denn bett'n weg'n an Wolf,
Hast deiner Lebta' no' koan g'segn. –«
Dees Diendl aber, woltern frumm,
Hat denkt, es kunnt' ja nie nix schad'n,
Wann s' ebber gaang, sie kaam so mehr
Bei unsrer lieb'n Frau in Gnad'n.
So geht s' halt hi' gon Birkastoa'
Und thuat ihr Andacht wohl verricht'n,
Und fröhli' na' geht s' wieder hoam,
Hat denkt an manchi Wunderg'schicht'n.
Und wie s' am Kuhzack auffi kimmt,
Da thuat der Holzknecht Baam ausstocka,
Der lacht s' wohl aus und sagt dazu:
»Host oan dawischt an' Wunderbrocka? –«
Kaam aber, daß dees Wort heraus,
So rühr'n si' die nächst'n Bosch'n,
Und wüethi' rumpit her a Wolf,
Da ist den oan der Mueth verlosch'n,
Da san s' wohl g'loffa alli zwee,
A Wolf kann aber besser laaffa,
Den kimmst nit aus, wann er grad mag,
Hilft a koa' Wihr'n und koa Raaffa.
Und schau den' Diendl thuat er nix,
Dees so viel frumm gwest in sein G'wiss'n,
Den Holzknecht aber hat er packt
Und hat 'n grausamli' zerriss'n –.
No' heutig's Tags, wie Alles g'scheg'n,
Ko'st auf an g'molt'n Taferl seg'n,
Dees hängt dort, in den heiling' Haus
Am Birkastoa' in Gang heraus.
Fußnoten
1 Eine Mehlspeise.