[224] Der tod im stock
In frau Eren ton des Erenboten.
20. januar 1547.
1.
Ein einsidel der fand in einem walde
ein großen schatz in einem stock,
von dem so floch er balde,
loff wider dar und hinein gutzt,
nach dem floch darvon wider.
Drei mörder hetten dise ding ersehen,
kamen, fragten in, was er flöch?
er sprach: »ich hab gesehen
in genem stock sitzen den tot.«
in schlugens totlich nider;
Meinten, er spottet ir darmit.
zum holen stock kamens selb drit,
das sie den schatz ersahen.
sie namen golt und schickten in die stat
den ein, das er brecht brot und wein;
der loff hinein gar spat.
balt er hin kam, die andren zwen
ein weil zusamen jahen:
2.
»Wan unser gsel hat brot und wein zutragen,
so wöllen wir in alle bed
heimlich zu tode schlagen,
so bleibet uns beiden das golt
zu teilen miteinander.«
Darmit die zwen beschloßen iren rate.
[225]als nun der drit mit wein und brot
gieng wider aus der state,
da tet er in die flaschen gift,
das die zwen beidesander
Stürben, balt einer trünk den wein,
auf das der schatz im blieb allein.
mit dem kam er gen walde,
da in die zwen mordischer weis erschlugen
und in ein wenig von der straß
hin in ein gruben zugen
und deckten in mit reisig zu;
nachdem sie giengen balde
3.
Und zu dem stock ins gras zusamen saßen,
namen zu handen brot und wein,
frolich tranken und aßen
das sie darnach teilten das golt,
wan ir mal het ein ende.
So balt sie beide aus den flaschen trunken,
da wirkt in in das herbe gift,
das sie beid nider sunken
und starben auch, e sie den schatz
entpfiengen in ir hende.
Also was es ie gar kein spot,
das in dem stock wonet der tot,
darob all vier sie sturben.
darum spricht Salomo der reichtum gnaden
oft irem eigen herren reicht
zu verderblichem schaden;
dem reichtum stelt vil unglücks nach,
darab ir vil verdurben.