Wer da ligt / über den laufft jederman.
Arbore deiecto, quiuis colligit ligna.
Mann der hund vnden ligt / so beissen alle hund in jn / oder fliehen von im. Wann der baum fellt / so klaubt jederman holtz. Ligt er / so gibt er / leg er nit / so geb er nit. Wer da ligt / dem hilfft niemandt auff. Es ist die art der welt / dz sie sich nur wie kat ans rad / ans hoch / reich / edel / ehrlich / vnd herrlich henckt / darinn sich selbs auß eygner angepflantzter teuflischer lieb sůchende / damit sie des lust vnd nutz hab / Wo sie sich aber selbs nit weyß zufinden / erlieben / erlustigen / vnd dauon sie weder lust noch nutz schöpffen mag / als võ armen / krancken / gefallen / ellenden nidern / vnedeln etc. so fleuchts daß sie die schůch möcht verzetten / vnnd nimpt mit alles was der gefallen noch übrig hat. Vnd wo das creutz züfellt / da fliehen nicht allein die verwandten / sonder auch vatter /můtter / weib vnn kind / nach dem sprich wort: Mendicus etiam parentibus odiosus. Oder sihe es an Christo / da erfindt sich nit allein / daß in der not lxxvij freund gehn auff ein lot / sonder die not mag so groß sein / es gehen tausent auff ein quintlein / vnder den al en der best steht dir bei / wie der hase bei der bauckeln. Ligstu so geht iederman fürüber / henckts maul / vnd thůt als sehe mann dich nimmer.
Der dir vor grossen Titel zůschrieb / vnnd mit grosser reuerentz ansprach / gebt ehe ein andere gassen ein / ehe er dir einn gůten morgen gebe / vnnd fielen sich also hinden fein gemach daruon / wie die Jünger von vnserm Herrgott / sonderlich wenn die not so groß ist / vnnd der baum also vmbgehawen gesallen ligt / dz kein hoffnung eynicher auffrichtũg mehr vorhanden ist / da verschwinden die freund all zumal wie quecksilber.
Ligt der baum / so bricht iederman holtz da uon /auch die in vor pflantzten. Nimmer nutz / nimmer gůts. Wo die stigel nider ist / da hupffen die hund all über. Des hohen vnd reichen verschonet iederman. Es gieng ein hũd ehe ein ackerleng weg den zaun ab boß er ein lucken fünde / da er zerbrochen oder nider were / da hupfft er über. Item / wie die hund all in den der vnden ligt / heissen / oder weit vonn [48] jm fliehen / also die menschen fliehen alle vffs wenigst in der not /Vnd das ist gleich etwas ein freundtschafft / vonn dem baum fliehen / so er fellt / wann sie jn nicht erst gefallen zerhawen / zerklopffen / stümmlen / schenden /schmähen / vnd alles was er übrig hat / nemen / vnd nackend außziehen.
Wie soll jhm aber der gefallen baum vnnd gebissen hundt thůn / kompt er für den Richter / der ist auch ein mensch / der armůt feindt / der laßt dir im kat kein recht gehen / sond spott dein / sitzt auch auff dich /vnd beißt in dich / vnn hupffet auch da die stigel nider ist / überhin / vnd helt es mit dem hohen zaun / vnd Cederbäumen / die in allen ehren vnd lust daher blüen / den gibt er recht vnd gewunnen / vnd gibt bald ein argument / Wie könnt der zerbissen hundt / dem iederman so feind ist / vnnd ob jm ligt. Item der gefallen baum vnd zerbrochen zaun / dauon jederman holtz tregt vnd hawet / recht haben: Gott ließ es nit vngerochen / so weren jm die leut auch nit so feind / het er einn gůten auffrichtigen handel. Nun er aber ligt / von Gott vnd der welt gestrafft vnd verlassen wirdt / můß er je vnrecht haben / oder wie möcht er einn gůten handel haben: Darumb wil ich im gleich auch feind sein / so jm jederman feind ist / Vnd gibt als ein jeder huß zů / daß der vnden ligt in nöten / je mehr võ jeder man verlassen / vnd als Gott vnd der welt ein grewel /gehaßt wirr.