Die langsam zürnen / zürnen lang.

Nachrew / wirt all tag new. Ein zornig man ist nit bei jhm selbs / sonder er raset / vnd hat sein sinn biß an fünff. Seneca spricht / Es sei kein vnderscheydt vnder eim zornigen vnd vnsinnigen / dann daß der vnsinnig allzeit tobt / der zornig zu zeiten. Er spricht auch /Eim zornigen mann sol mann nit glauben / dann der affect hat jhn überwunden / was er redt vnd thůt / ist affect. Plato gefragt / Waran mann einn weisen man kennet / antwort: So er gescholten nit zürnet / gelobt nit geschwilt. Der seinen zorn zämen kan / daß er sich den nit laßt übergehn / der ist fürwar ein weiser man. Cassiodorus spricht / Der sich selbs überwinde / vnnd verursacht / nicht zürne / sei stärcker dann der ein statt gewinne. Alle bitterkeyt vnd grimm / zorn vnd vnwirse / sei ferr von euch / Die Sonn sol nicht vndergehen über ewerm zorn / Ephe. iiij. Dauon vil in Prouerbijs Salomonis.