oṃ namaś cidbhairavāya |

citibhūmisamāśrayaṇāś citibhūtiṃ śrayata mā mudhā bhramata |
prathayann iti bhaktimatāṃ jayati śivo 'nugrahapravaṇaḥ ||
cidbhairavam eva paraṃ paramāmṛtarūpam ekam atidīptam |
ullasitakaraṇacakragrastasamastaṃ śivaṃ vande ||
stutyaḥ stotā stutir iti yad api vibhinnaṃ na kiṃcid astīha |
mṛṣati yathā yad rūpaṃ cidrūpatayā tathā bhavaty etat ||
vigalitasarvavibhedaṃ sarvavibhedātma cidghanānandam |
yat tava tattvaṃ bhagavaṃs tasyānukṛtiṃ tvadākṛtiṃ vande ||
rekhāpuruṣaḥ puruṣaṃ varṇalipir varṇasaṃcayaṃ yadvat |
tadvat vicitrarūpaṃ tvām ākāro vyanakti paramātman ||
tatrāvikalpam eva tvāṃ cidrūpaṃ samāviśya |
vimṛśāmaḥ kim api manāṅ na hi tattvaṃ kalpanāviṣayaḥ ||
svātmaprabhāṃ vidhāya vāgdevīṃ viṣayakusumakḷptārcaḥ |
prathamonmeṣaṃ gurum atha vanditvā hṛdayam āviśya ||
staumi vimṛśan maheśvaram ātmānaṃ svaṃ cidekaghanam |
srāvitapāśakadambakam etasmin dehadevagṛhe ||
cityānandecchāvitkaraṇākhyāḥ śaktayo jayanti vibho |
sūkṣmasthūlabhidāptā vaktratvaṃ brahmamuṇḍabhidhā ||
sarvajñatādiviṣayaṃ hṛdayādikam aṅgaṣaṭkaṃ te |
sakalaṃ sadāśivāntaṃ pretātmatayā tavāsanaṃ svāmin ||
paramaprakāśavapuṣo vimarśaśaktiḥ prabho parā devī |
asyā eva prasaraḥ sarvā brāhmyādikā devyaḥ ||
dahanajalāmṛtalekhāviṣādi bibhrat tvam ādiśasy etat |
viśvaṃ viruddham api saccidrūpe mayi virudhyate naitat ||
saṃvitsūtranilīno niḥsāro mātṛnivaho 'yam |
karaṇamuṇḍamālabhārin darśayasītīva naḥ svāmin ||
paśyata paśyata pāśā viṣamās ta ime bahiṣkṛtāḥ śaśvat |
ity antradhāraṇamiṣat kathayaṃs tvaṃ naḥ samābhāsi ||
māyāpaṭaḥ sarāgo vyomni pare 'smin sa eṣa nikṣiptaḥ |
iti gajacarma saraktaṃ mūrdhni vahan kathayasīśa ||
antaḥśaktikṛpāṇīm vyanakṣi saṃsṛtivibhedinīm asinā |
nijaśaktimahimasvīkṛtasamastaviśvā hi vīravarāḥ ||
bhavabhayahantā so 'ham sānāthye 'vasthito 'smi mā bhaiṣṭa |
ity āsphoṭitakheṭakadarśanato diśasi naḥ svāmin ||
nijaśaktipāśavalitaś cidvapuṣā kalyate mayā kālaḥ |
iti pāśadhāraṇavaśāt prathayasi naḥ kālakālas tvam ||
bhedamayam akhilam etan nijaśaktyaivākṣipāmi saṃhartum |
ity aṅkuśadhāraṇataḥ sphuṭayati parabhairavo 'smākam ||
kodaṇḍārūdhaśarapradarśanād brahmaviṣṇurudreśān |
sasadākhyaśivāñ chaktyā kāraṇahariṇaṃ bhinatsi mṛgavat tvam ||
varadena pāṇinā tvaṃ viśvavibhūtipradatvam abhinayasi |
na khalu paratattvaniṣṭho vibhavamalaiḥ spṛśyate jātu ||
abhayena ca bhavabhayāni unmūlayatā prakāśyate satatam |
viśvānugrahakāraṇasvabhāvatā tava karatalena ||
akhyātirūpam asamaṃ māyāyāḥ śakalitaṃ śiro 'traitat |
parabodhamayena mayā muṇḍaṃ bibhrat prakāśayasy evam ||
niḥśeṣahṛtasārā mayy eva jagatsthitiś cidekaghane |
iti khaṭvāṅgakaraṅkodvahanacchalato dadāsy ājñām ||
vīṇāghaṇtāḍamarūn uḍḍāmara vādayann idaṃ diśasi |
vṛttitribhedabhinnaṃ nādaṃ śṛṇvan sthito 'smīti ||
kiṃ ca parādikaśaktitritayārāsundarām mahāśaktim |
devānukaroṣi bahis triśūladhāraṇamiṣeṇa nityaṃ tvam ||
icchādikanijaśaktiprakāśitādhaḥsthagocaratritayām |
svām eva parāṃ śaktiṃ vajramayīṃ vahasi ṣaḍarāṃ tvam ||
jagad akhilaṃ macchaktyā damitaṃ sarvavyāvasthitīr dhatte |
iti daṇḍadhāraṇavaśād vyanakṣi cidbhairavāsmākam ||
mudgaraparaśū bibhrad baindavanādānukārarūpau tvam |
bhedavibhedanaśakalanaparatvam īśāna nirdiśasi ||
darśanabhedāt svāminn anyānyām āhṛtiṃ dadhānas tvam |
bhairavaparabodhamayaṃ prathayasi nijadhāma sarvatra ||
śāktāṇḍakhaṇḍamadhye viśvarasāḥ sarvam ahaṃ pibāmi sadā |
vyañjayasi narakapālagarudhiramiṣād etad iva me 'ntaḥ ||
abhimānahṛdayabandhānutkhātau tāv imau saśikhau |
mūrtāv iva muṇdābjau prathayan dhatse mahākālaḥ ||
akhilajagadbījabhuvaṃ prathamasthām anukaroṣi bodhanidhe |
karatalagabījapūrakadarśanalīlāyitād deva ||
bhairavarūpo 'py asi yat tatrāpi kare 'kṣamālikāṃ dhatse |
tat sarvākṣavikāsād viśvaṃ parivartayasy antaḥ ||
asthikaramuṇḍamālābhasmābharaṇo nṛraktaruciḥ |
viśvaṃ brahmamayatvāc chuddham itīśaḥ samādiśasi ||
svātmārāmamayānāṃ viṣamā api viṣayabudbudhāḥ kim amī |
smaradahanam alikanayanam prathayan paramāgnirūpam ādiśasi ||
antarnibaddhalakṣyaḥ pravikāsikaraṇo 'pi yat sadā bhavasi |
tat prathayasi sarvadaśaṃ gatamohakalaṅkam ātmānam ||
deva digambaratā te vadati nirāvaraṇam ātmano rūpam |
paramabrahmamayārkān māyāvaraṇam kathaṃ vṛṇuyāt ||
saṃhartā sarveṣām arkādīnām ahaṃ tamobhūmiḥ |
nirmalaśāradagaganaprabheṇa vapuṣeti darśayasi ||
paramabrahmamayas tvaṃ deva yadāśrayasi bhairavākāram |
tat prathayasi tattvajñaḥ saty api bhede vimukta iti ||
vividhaśmaśānamālāvetālāvṛtaḥ prakāśayase |
saṃvittiviṣayakalanāmadhyaś citibhairavo 'smīti ||
tvayy evāmṛtalekhā paraśaktimayī parapramātātaḥ |
nātha tvam eva jagatām jīvanam iti bhāsi no hṛdaye ||
tava śabdarāśivapuṣaḥ pratyaṣṭakam eva bāhyaparivāraḥ |
parasūkṣmādivibhedād bhairava lokeśvarapramukhāḥ ||
mudrayati nikhilam etan niḥśeṣasvasvarūpasaṃkramaṇāt |
modayati bhaktavargaṃ gatimudaṃ pūrṇatāprathanāt ||
mocayati pāśajālaṃ drāvayati vibhedam īśa te mūrtiḥ |
mudrayati vividhasaṃviddraviṇaṃ mudrā tataḥ kathitā ||
jayati paratattvabhūmipravare {nipāyabhūtaiṣa} |
sphuṭam adhivasatu satattvaprathayā hṛdayasya meyamalam ||
pratikalam udeti saṃvid yā kila tatra sphuraty adho viśvam |
śivaśaktivibhavarūpaṃ jānanti maheśa yāgasthāḥ ||
itthaṃ sphurasi sadā me cidbhairava sarvabhūtātma |
tad yāgādijapāntaṃ sampannam ayatnataḥ sarvam ||
iti śrīmahāmāheśvarācāryaśrīkṣemarājaviracitaṃ bhairavānukaraṇastotraṃ samāptam ||

This e-text was provided to GRETIL in good faith that no copyright rights have been infringed. If anyone wishes to assert copyright over this file, please contact the GRETIL management at
gretil(at)sub(dot)uni-goettingen(dot)de. The file will be immediately removed pending resolution of the claim.

Distributed under a Creative Commons Attribution-NonCommercial-ShareAlike 4.0 International License.
Notes
Distributed under a Creative Commons Attribution-NonCommercial-ShareAlike 4.0 International License (https://creativecommons.org/licenses/by-nc-sa/4.0/)
Holder of rights
Göttingen Register of Electronic Texts in Indian Languages (GRETIL), SUB Göttingen
Citation Suggestion for this Object
TextGrid Repository (2022). 1_sanskr. tei. sa_kSemarAja-bhairavAnukaraNastotra. GRETIL. Göttingen Register of Electronic Texts in Indian Languages (GRETIL), SUB Göttingen. https://hdl.handle.net/21.T11991/0000-001C-9458-8