• GRETIL
• 1_sanskr
• tei
• transformations
• plaintext
• sa_zivopaniSad

          Śivopaniṣad


# Header

  This file is a plain text transformation of http://gretil.sub.uni-goettingen.de/gretil/corpustei/sa_zivopaniSad.xml
  with a rudimentary header. For a more extensive header please refer to the source file.

## Data entry: Reinhold Grünendahl
## Contribution: Reinhold Grünendahl
## Date of this version: 2020-07-31

## Source: 
   - included in: Un-published Upanisads / ed. by the Pandits of Adyar Library under the supervision of C. Kunhan Raja Adyar 1933 (The Adyar Library Series ; 14).

## Publisher: Göttingen Register of Electronic Texts in Indian Languages (GRETIL), SUB Göttingen

## Licence:
   This e-text was provided to GRETIL in good faith that no copyright rights have been infringed. If anyone wishes to assert copyright over this file, please contact the GRETIL management at gretil(at)sub(dot)uni-goettingen(dot)de. The file will be immediately removed pending resolution of the claim.
   Distributed under a Creative Commons Attribution-NonCommercial-ShareAlike 4.0 International License.

## Structure of references:
   A reference is assembled consisting of
   - a pragmatic abbreviation of the title: Śivopaniṣad = SU,
   - the number of the  in arabic numerals,
   - the number of the verse in arabic numerals.

## Notes:
   This file has been created by mass conversion of GRETIL's Sanskrit corpus from sivup_au.htm. Due to the heterogeneity of the sources the header markup might be suboptimal. For the sake of transparency the header of the legacy file is documented in the note element below:

   
	 Siva-Upanisad
	 Based on the edition included in:
	 Un-published Upanisads / ed. by the Pandits of Adyar Library
	 under the supervision of C. Kunhan Raja
	 Adyar 1933 (The Adyar Library Series ; 14)
	 Input by Reinhold Gruenendahl
	 Text analysis according to BHELA conventions:
	 Sandhi markers:
	 (. =short vowel, - =long vowel)
	 in word-sandhi:
	 1: . . e.g.: veda+anta = vedā1nta
	 2: - .
	 3: . -
	 4: - -
	 in sentence-sandhi:
	 7: . . e.g.: ca+api = cā7pi
	 8: . -
	 9: - .
	 0: - -
	 PADA MARKERS
	 For a four-pada verse:
	 ........ $ ........ &
	 ........ % ........ //
	 For a six-pada verse:
	


## Revisions:
   - 2020-07-31: TEI encoding by mass conversion of GRETIL's Sanskrit corpus


# Text


śivopaniṣad

kailāsaśikharāsīnam aśeṣāmarapūjitam 
kālaghnaṃ śrīmahākālam īśvaraṃ jñānapāragam // SU_1.1

saṃpūjya vidhivad bhaktyā ṛṣyātreyaḥ susaṃyataḥ 
sarvabhūtahitārthāya papracchedaṃ mahāmuniḥ // SU_1.2

jñānayogaṃ na vindanti ye narā mandabuddhayaḥ 
te mucyante kathaṃ ghorād bhagavan bhavasāgarāt // SU_1.3

evaṃ pṛṣṭaḥ prasannātmā ṛṣy ātreyeṇa dhīmatā 
mandabuddhivimuktyarthaṃ mahākālaḥ prabhāṣate // SU_1.4

purā rudreṇa gaditāḥ śivadharmāḥ sanātanāḥ 
devyāḥ sarvagaṇānāṃ ca saṃkṣepād granthakoṭibhiḥ // SU_1.5

āyuḥ prajñāṃ tathā śaktiṃ prasamīkṣya nṝṇām iha 
tāpatrayaprapīḍāṃ ca bhogatṛṣṇāvimohinīm // SU_1.6

te dharmāḥ skandanandibhyām anyaiś ca munisattamaiḥ 
sāramādāya nirdiṣṭāḥ samyakprakaraṇāntaraiḥ // SU_1.7

sārād api mahāsāraṃ śivopaniṣadaṃ param 
alpagranthaṃ mahārthaṃ ca pravakṣyāmi jagaddhitam // SU_1.8

śivaḥ śiva ime śāntanāma cādyaṃ muhurmuhuḥ 
uccārayanti tad bhaktyā te śivā nātra saṃśayaḥ // SU_1.9

aśivāḥ pāśasaṃyuktāḥ paśavaḥ sarvacetanāḥ 
yasmād vilakṣaṇās tebhyas tasmād īśaḥ śivaḥ smṛtaḥ // SU_1.10

guṇo buddhir ahaṃkāras tanmātrāṇīndriyāni ca 
bhūtāni ca caturviṃśad iti pāśāḥ prakīrtitāḥ // SU_1.11

pañcaviṃśakam ajñānaṃ sahajaṃ sarvadehinām 
pāśājālasya tan mūlaṃ prakṛtiḥ kāraṇāya naḥ // SU_1.12

satyajñāne nibadhyante puruṣāḥ pāśabandhanaiḥ 
madbhāvāc ca vimucyante jñāninaḥ pāśapañjarāt // SU_1.13

ṣaḍviṃśakaś ca puruṣaḥ paśur ajñaḥ śivāgame 
saptaviṃśa iti proktaḥ śivaḥ sarvajagatpatiḥ // SU_1.14

yasmāc chivaḥ susaṃpūrṇaḥ sarvajñaḥ sarvagaḥ prabhuḥ 
tasmāt sa pāśaharitaḥ sa viśuddhaḥ svabhāvataḥ // SU_1.15

paśupāśaparaḥ śāntaḥ paramajñānadeśikaḥ 
śivaḥ śivāya bhūtānāṃ taṃ vijñāya vimucyate // SU_1.16

etad eva paraṃ jñānaṃ śiva ity akṣaradvayam 
vicārād yāti vistāraṃ tailabindur ivāmbhasi // SU_1.17

sakṛd uccāritaṃ yena śiva ity akṣaradvayam 
baddhaḥ parikaras tena mokṣopagamanaṃ prati // SU_1.18

dvyakṣaraḥ śivamantro 'yaṃ śivopaniṣadi smṛtaḥ 
ekākṣaraḥ punaś cāyam om ity evaṃ vyavasthitaḥ // SU_1.19

nāmasaṃkīrtaṇād eva śivasyāśeṣapātakaiḥ 
yataḥ pramucyate kṣipraṃ mantro 'yaṃ dvyakṣaraḥ paraḥ // SU_1.20

yaḥ śivaṃ śivam ity evaṃ dvyakṣaraṃ mantram abhyaset 
ekākṣaraṃ vā satataṃ sa yāti paramaṃ padam // SU_1.21

mitrasvajanabandhūnāṃ kuryān nāma śivātmakam 
api tat kīrtanād yāti pāpamuktaḥ śivaṃ puram // SU_1.22

vijñeyaḥ sa śivaḥ śānto naras tadbhāvabhāvitaḥ 
āste sadā nirudvignaḥ sa dehānte vimucyate // SU_1.23

hṛdy antaḥkaraṇaṃ jñeyaṃ śivasya āyatanaṃ param 
hṛtpadmaṃ vedikā tatra liṅgam oṃkāram iṣyate // SU_1.24

puruṣaḥ sthāpako jñeyaḥ satyaṃ saṃmārjanaṃ smṛtam 
ahiṃsā gomayaṃ proktaṃ śāntiś ca salilaṃ param // SU_1.25

kuryāt saṃmārjanaṃ prājño vairāgyaṃ candanaṃ smṛtam 
pūjayed dhyānayogena saṃtoṣaiḥ kusumaiḥ sitaiḥ // SU_1.26

dhūpaś ca guggulur deyaḥ prāṇāyāmasamudbhavaḥ 
pratyāhāraś ca naivedyam asteyaṃ ca pradakṣiṇam // SU_1.27

iti divyopacāraiś ca saṃpūjya paramaṃ śivam 
japed dhyāyec ca muktyarthaṃ sarvasaṅgavivarjitaḥ // SU_1.28

jñānayogavinirmuktaḥ karmayogasamāvṛttaḥ 
mṛtaḥ śivapuraṃ gacchet sa tena śivakarmaṇā // SU_1.29

tatra bhuktvā mahābhogān pralaye sarvadehinām 
śivadharmāc chivajñānaṃ prāpya muktim avāpnuyāt // SU_1.30

jñānayogena mucyante dehapātād anantaram 
bhogān bhuktvā ca mucyante pralaye karmayoginaḥ // SU_1.31

tasmāj jñānavido yogāt tathājñāḥ karmayoginaḥ 
sarva eva vimucyante ye narāḥ śivam āśritāḥ // SU_1.32

sa bhogaḥ śivavidyārthaṃ yeṣāṃ karmāsti nirmalam 
te bhogān prāpya mucyante pralaye śivavidyayā // SU_1.33

vidyā saṃkīrtanīyā hi yeṣāṃ karma na vidyate 
te cāvartya vimucyante yāvat karma na tad bhavet // SU_1.34

śivajñānavidaṃ tasmāt pūjayed vibhavair gurum 
vidyādānaṃ ca kurvīta bhogamokṣajigīṣayā // SU_1.35

śivayogī śivajñānī śivajāpī tapo'dhikaḥ 
kramaśaḥ karmayogī ca pañcaite muktibhājanāḥ // SU_1.36

karmayogasya yan mūlaṃ tad vakṣyāmi samāsataḥ 
liṅgam āyatanaṃ ceti tatra karma pravartate // SU_1.37

// iti śivopaniṣadi muktinirdeśādhyāyaḥ prathamaḥ //

atha pūrvasthito liṅge garbhaḥ sa triguṇo bhavet 
garbhād vāpi vibhāgena sthāpya liṅgaṃ śivālaye // SU_2.1

yāval liṅgasya dairghyaṃ syāt tāvad vedyāś ca vistaraḥ 
liṅgatṛtīyabhāgena bhaved vedyāḥ samucchrayaḥ // SU_2.2

bhāgam ekaṃ nyased bhūmau dvitīyaṃ vedimadhyataḥ 
tṛtīyabhāge pūjā svād iti liṅgaṃ tridhā sthitam // SU_2.3

bhūmisthaṃ caturaśraṃ svād aṣṭāśraṃ vedimadhyataḥ 
pūjārthaṃ vartulaṃ kāryaṃ dairghyāt triguṇavistaram // SU_2.4

adhobhāge sthitaḥ skandaḥ sthitā devī ca madhyataḥ 
ūrdhvaṃ rudraḥ kramād vāpi brahmaviṣṇumaheśvarāḥ // SU_2.5

eta eva trayo lokā eta eva trayo guṇāḥ 
eta eva trayo vedā etac cānyat sthitaṃ tridhā // SU_2.6

navahastaḥ smṛto jyeṣṭhaḥ ṣaḍḍhastaś cāpi madhyamaḥ 
vidyāt kanīyas traihastaṃ liṅgamānam idaṃ smṛtam // SU_2.7

garbhasyānataḥ pravistāras tadūnaś ca na śasyate 
garbhasyānataḥ pravistārād tadupary api saṃsthitam // SU_2.8

prāsādaṃ kalpayec chrīmān vibhajeta tridhā punaḥ 
bhāga eko bhavej jaṅghā dvau bhāgau mañjarī smṛtā // SU_2.9

mañjaryā ardhabhāgasthaṃ śukanāsaṃ prakalpayet 
garbhād ardhena vistāram āyāmaṃ ca suśobhanam // SU_2.10

garbhād vāpi tribhāgena śukanāsaṃ prakalpayet 
garbhād ardhena vistīrṇā garbhāc ca dviguṇāyatā // SU_2.11

jaṅghābhiś ca bhavet kāryā mañjaryaṅgularāśinā 
prāsādārdhena vijñeyo maṇḍapas tasya vāmataḥ // SU_2.12

maṇḍapāt pādavistīrṇā jagatī tāvaducchritā 
prāsādasya pramāṇena jagatyā sārdham aṅgaṇam // SU_2.13

prākāraṃ tatsamantāc ca gupurād ālabhūṣitam 
prākārāntaḥ sthitaṃ kāryaṃ vṛṣasthānaṃ samucchritam // SU_2.14

nandīśvaramahākālau dvāraśākhāvyavasthitau 
prākārād dakṣiṇe kāryaṃ sarvopakaraṇānvitam // SU_2.15

pañcabhaumaṃ tribhaumaṃ vā yogīndrāvasathaṃ mahat 
prākāraguptaṃ tat kāryaṃ maitrasthānasamanvitam // SU_2.16

sthānād daśasamāyuktaṃ bhavyavṛkṣajalānvitam 
tan mahānasam āgneyyāṃ pūrvataḥ sattramaṇḍapam // SU_2.17

sthānaṃ caṇḍeśam aiśānyāṃ puṣpārāmaṃ tathottaram 
koṣṭhāgāraṃ ca vāyavyāṃ vāruṇyāṃ varuṇālayam // SU_2.18

śamīndhanakuśasthānam āyudhānāṃ ca nairṛtam 
sarvalokopakārāya nagarasthaṃ prakalpayet // SU_2.19

śrīmadāyatanaṃ śambhor yogināṃ vijane vane 
śivasyāyatane yāvat sametāḥ paramāṇavaḥ // SU_2.20

manvantarāṇi tāvanti kartur bhogāḥ śive pure 
mahāpratimaliṅgāni mahānty āyatanāni ca // SU_2.21

kṛtvāpnoti mahābhogān ante muktiṃ ca śāśvatīm 
liṅgapratiṣṭhāṃ kurvīta yadā tallakṣaṇaṃ kṛtī // SU_2.22

pañcagavyena saṃśodhya pūjayitvādhivāsayet 
pālāśodumbarāśvatthapṛṣadājyatilair yavaiḥ // SU_2.23

agnikāryaṃ prakurvīta dadyāt pūrṇāhutitrayam 
śivasyāṣṭaśataṃ hutvā liṅgamūlaṃ spṛśed budhaḥ // SU_2.24

evaṃ madhye 'vasāne tan mūrtimantraiś ca mūrtiṣu 
aṣṭau mūrtīśvarāḥ kāryāḥ navamaḥ sthāpakaḥ smṛtaḥ // SU_2.25

prātaḥ saṃsthāpayel liṅgaṃ mantrais tu navabhiḥ kramāt 
mahāsnāpanapūjāṃ ca sthāpya liṅgaṃ prapūjayet // SU_2.26

guror mūrtidharāṇāṃ ca dadyād uttamadakṣiṇām 
yatīnāṃ ca samastānāṃ dadyān madhyamadakṣiṇām // SU_2.27

dīnāndhakṛpaṇebhyaś ca sarvāsām upakalpayet 
sarvabhakṣyānnapānādyair aniṣiddhaṃ ca bhojanam // SU_2.28

kalpayed āgatānāṃ ca bhūtebhyaś ca baliṃ haret 
rātrau mātṛgaṇānāṃ ca baliṃ dadyād viśeṣataḥ // SU_2.29

evaṃ yaḥ sthāpayel liṅgaṃ tasya puṇyaphalaṃ śṛṇu 
kulatriṃśakam uddhṛtya bhṛtyaiś ca parivāritaḥ // SU_2.30

kalatraputramitrādyaiḥ sahitaḥ sarvabāndhavaiḥ 
vimucya pāpakalilaṃ śivalokaṃ vrajen naraḥ 
tatra bhuktvā mahābhogān pralaye muktim āpnuyāt // SU_2.31

// iti śivopaniṣadi liṅgāyatanādhyāyo dvitīyaḥ //

athānyair alpavittaiś ca nṛpaiś ca śivabhāvitaiḥ 
śaktitaḥ svāśrame kāryaṃ śivaśāntigṛhadvayam // SU_3.1

gṛhasyeśānadigbhāge kāryam uttarato 'pi vā 
khātvā bhūmiṃ samuddhṛtya śalyān ākoṭya yatnataḥ // SU_3.2

śivadevagṛhaṃ kāryam aṣṭahastapramāṇataḥ 
dakṣiṇottaradigbhāge kiṃcic dīrghaṃ prakalpayet // SU_3.3

hastamātrapramāṇaṃ ca dṛḍhapaṭṭacatuṣṭayam 
catuṣkoṇeṣu saṃyojyam arghyapātrādisaṃśrayam // SU_3.4

garbhamadhye prakurvīta śivavediṃ suśobhanām 
udagarvāk cchritāṃ(?) kiṃcic catuḥśīrṣakasaṃyutām // SU_3.5

trihastāyām avistārām ṣoḍaśāṅgulam ucchritām 
tacchīrṣāṇīva hastārdham āyāmād vistareṇa ca // SU_3.6

śivasthaṇḍilam ity etac caturhastaṃ samaṃ śiraḥ 
mūrtinaivedyadīpānāṃ vinyāsārthaṃ prakalpayet // SU_3.7

śaivaliṅgena kāryaṃ syāt kāryaṃ maṇijapārthivaiḥ 
sthaṇḍilārdhe ca kurvanti vedim anyāṃ savartulām // SU_3.8

ṣoḍaśāṅgulam utsedhāṃ vistīrṇāṃ dviguṇena ca 
gṛhe na sthāpayec chailaṃ liṅgaṃ maṇijam arcayet // SU_3.9

trisaṃdhyaṃ pārthivaṃ vāpi kuryād anyad dinedine 
sarveṣām eva varṇānāṃ sphāṭikaṃ sarvakāmadam // SU_3.10

sarvadoṣavinirmuktam anyathā doṣam āvahet 
āyuṣmān balavāñ śrīmān putravān dhanavān sukhī // SU_3.11

varam iṣṭaṃ ca labhate liṅgaṃ pārthivam arcayan 
tasmād dhi pārthivaṃ liṅgaṃ jñeyaṃ sarvārthasādhakam // SU_3.12

nirdoṣaṃ sulabhaṃ caiva pūjayet satataṃ budhaḥ 
yathā yathā mahāliṅgaṃ pūjā śraddhā yathā yathā // SU_3.13

tathā tathā mahat puṇyaṃ vijñeyam anurūpataḥ 
pratimāliṅgavedīṣu yāvantaḥ paramāṇavaḥ 
tāvatkalpān mahābhogas tatkartāste śive pure // SU_3.14

// iti śivopaniṣadi śivagṛhādhyāyas tṛtīyaḥ //

athaikabhinnāvicchinnaṃ purataḥ śāntimaṇḍapam 
pūrvāparāṣṭahastaṃ syād dvādaśottaradakṣiṇe // SU_4.1

tad dvārabhittisaṃbaddhaṃ kapicchukasamāvṛtam 
paṭadvayaṃ bhavet sthāpya sruvādyāvārahetunā // SU_4.2

dvāraṃ triśākhaṃ vijñeyaṃ navatyaṅgulam ucchritam 
tadardhena ca vistīrṇaṃ satkavāṭaṃ śivālaye // SU_4.3

dīrghaṃ pañcanavatyā ca pañcaśākhāsuśobhitam 
satkavāṭadvayopetaṃ śrīmad vāhanamaṇṭapam // SU_4.4

dvāraṃ paścānmukhaṃ jñeyam aśeṣārthaprasādhakam 
abhāve prāṅmukhaṃ kāryam udagdakṣiṇato na ca // SU_4.5

gavākṣakadvayaṃ kāryam apidhānaṃ suśobhanam 
dhūmanirgamanārthāya dakṣiṇottarakuḍyayoḥ // SU_4.6

āgneyabhāgāt paritaḥ kāryā jālagavākṣakāḥ 
ūrdhvastūpikayā yuktā īṣacchidrapidhānayā // SU_4.7

śivāgnihotrakuṇḍaṃ ca vṛttaṃ hastapramāṇataḥ 
caturaśravedi(kā) śrīman mekhalātrayabhūṣitam // SU_4.8

kuḍyaṃ dvihastavistīṛṇaṃ pañcahastasamucchritam 
śivāgnihotraśaraṇaṃ kartavyam atiśobhanam // SU_4.9

jagatīstambhapaṭṭādyaṃ saptasaṃkhyaṃ ca kalpayet 
bandhayogavinirmuktaṃ tulyasthānapadāntaram // SU_4.10

aiṣṭakaṃ kalpayed yatnāc chivāgnyāyatanaṃ mahat 
catuḥpregīvakopetam(?) ekapregīvakena vā(?) // SU_4.11

sudhāpraliptaṃ kartavyaṃ pañcāṇḍakabibhūṣitam 
śivāgnihotraśaraṇaṃ caturaṇḍakasaṃyutam // SU_4.12

bahis tad eva jagatī trihastā vā sukuṭṭimā 
tāvad eva ca vistīrṇā mekhalādivibhūṣitā // SU_4.13

kartavyā cātra jagatī tasyāś cādhaḥ samantataḥ 
dvihastamātravistīrṇā tadardhārdhasamucchritā // SU_4.14

anyā vṛttā prakartavyā rudravedī suśobhanā 
daśahastapramāṇā ca caturaṅgulam ucchritā // SU_4.15

rudramātṛgaṇānāṃ ca dikpatīnāṃ ca sarvadā 
sarvāgrapākasaṃyuktaṃ tāsu nityabaliṃ haret // SU_4.16

vedy anyā sarvabhūtānāṃ bahiḥ kāryā dvihastikā 
vṛṣasthānaṃ ca kartavyaṃ śivālokanasaṃmukham // SU_4.17

agrārṣasavitur vyoma vṛṣaḥ kāryaś ca paścime 
vyomnaś cādhas trigarbhaṃ syāt pitṛtarpaṇavedikā // SU_4.18

prākārāntarbahiḥ kāryaṃ śrīmad gopurabhūṣitam 
puṣpārāmajalopetaṃ prākārāntaṃ ca kārayet // SU_4.19

mṛddārujaṃ tṛṇacchannaṃ prakurvīta śivālayam 
bhūmikādvayavinyāsād utkṣiptaṃ kalpayed budhaḥ // SU_4.20

śivadakṣiṇataḥ kāryaṃ tabhukter yogyam ālayam 
śayyāsanasamāyuktaṃ vāstuvidyāvinirmitam // SU_4.21

dhvajasiṃhau vṛṣagajau catvāraḥ śobhanāḥ smṛtāḥ 
dhūmaśvagardabhadhvāṅkṣāś catvāraś cārthanāśakāḥ // SU_4.22

gṛhasyāyāmavistāraṃ kṛtvā triguṇam āditaḥ 
aṣṭabhiḥ śodhayed āpaiḥ śeṣaś ca gṛham ādiśet // SU_4.23

iti śāntigṛhaṃ kṛtvā rudrāgniṃ yaḥ pravartayet 
apy ekaṃ divasaṃ bhaktyā tasya puṇyaphalaṃ śṛṇu // SU_4.24

kalatraputramitrādyaiḥ sa bhṛtyaiḥ parivāritaḥ 
kulaikaviṃśad uttārya devalokam avāpnuyāt // SU_4.25

nīlotpaladalaśyāmāḥ pīnavṛttapayodharāḥ 
hemavarṇāḥ striyaś cānyāḥ sundaryaḥ priyadarśanāḥ // SU_4.26

tābhiḥ sārdhaṃ mahābhogair vimānaiḥ sārvakāmikaiḥ 
icchayā krīḍate tāvad yāvad ābhūtasaṃplavam // SU_4.27

tataḥ kalpāgninā sārdhaṃ dahyamānaṃ suvihvalam 
dṛṣṭvā virajyate bhūyo bhavabhogamahārṇavāt // SU_4.28

tataḥ saṃpṛcchate rudrāṃs tatrasthān jñānapāragān 
tebhyaḥ prāpya śivajñānaṃ śāntaṃ nirvāṇam āpnuyāt // SU_4.29

aviraktaś ca bhogebhyaḥ sapta janmāni jāyate 
pṛthivyadhipatiḥ śrīmān icchayā vā dvijottamaḥ // SU_4.30

saptamāj janmanaś cānte śivajñānam anāpnuyāt 
jñānād viraktaḥ saṃsārāc chuddhaḥ khāny adhitiṣṭhati // SU_4.31

ity etad akhilaṃ kāryaṃ phalam uktaṃ samāsataḥ 
utsave ca punar brūmaḥ pratyekaṃ dravyajaṃ phalam // SU_4.32

sadgandhaguṭikām ekāṃ lākṣāṃ prāṇyaṅgavarjitām 
karpāsāsthipramāṇaṃ ca hutvāgnau śṛṇuyāt phalam // SU_4.33

yāvat satgandhaguṭikā śivāgnau saṃkhyayā hutā 
tāvatkoṭyas tu varṣāṇi bhogān bhuṅkte śive pure // SU_4.34

ekāṅgulapramāṇena hutvāgnau candanāhutim 
varṣakoṭidvayaṃ bhogair divyaiḥ śivapure vaset // SU_4.35

yāvatkesarasaṃkhyānaṃ kusumasyānale hutam 
tāvadyugasahasrāṇi śivaloke mahīyate // SU_4.36

nāgakesarapuṣpaṃ tu kuṅkumārdhena kīrtitam 
yat phalaṃ candanasyoktam uśīrasya tadardhakam // SU_4.37

yat puṣpadhūpabhaṣyānnadadhikṣīraghṛtādibhiḥ 
puṇyaliṅgārcane proktaṃ tad dhomasya daśādhikam // SU_4.38

hutvāgnau samidhas tisrau śivomāskandanāmabhiḥ 
paścād dadyāt tilānnāni homayīta yathākramam // SU_4.39

palāśāaṅkurajāriṣṭapālālyaḥ(?) samidhaḥ śubhāḥ 
pṛṣadājyaplutā hutvā śṛṇu yat phalam āpnuyāt // SU_4.40

palāśāṅkurasaṃkhyānāṃ yāvad agnau hutaṃ bhavet 
tāvatkalpān mahābhogaiḥ śivaloke mahīyate // SU_4.41

tallakṣyamadhyasaṃbhūtaṃ hutvāgnau samidhaḥ śubhāḥ 
kalpārdhasaṃmitaṃ kālaṃ bhogān bhuṅkte śive pure // SU_4.42

śamīsamitphalaṃ deyam abdān api ca lakṣakam 
śamyardhaphalavaccheṣāḥ samidhaḥ kṣīravṛkṣajāḥ // SU_4.43

tilasaṃkhyāṃs tilān hutvā hy ājyāktā(?) yāvatī bhavet 
tāvat sa varṣalakṣāṃs tu bhogān bhuṅkte śive pure // SU_4.44

yāvat surauṣadhīrajñas(?) tilatulyaphalaṃ smṛtam 
itarebhyas tilebhyaś ca kṛṣṇānāṃ dviguṇaṃ phalam // SU_4.45

lājākṣatāḥ sagodhūmāḥ varṣalakṣaphalapradāḥ 
daśasāhasrikā jñeyāḥ śeṣāḥ syur bījajātayaḥ // SU_4.46

palāśendhanaje vahnau homasya dviguṇaṃ phalam 
kṣīravṛkṣasamṛddhe 'gnau phalaṃ sārdhārdhikaṃ bhavet // SU_4.47

asamiddhe sadhūme ca homakarma nirarthakam 
andhaś ca jāyamānaḥ syād dāridryopahatas tathā // SU_4.48

na ca kaṇṭakibhir vṛkṣair agniṃ prajvālya homayet 
śuṣkair navaiḥ praśastaiś ca kāṣṭhair agniṃ samindhayet // SU_4.49

evam ājyāhutiṃ hutvā śivalokam avāpnuyāt 
tatra kalpaśataṃ bhogān bhuṅkte divyān yathepsitān // SU_4.50

srucaikāhitamātreṇa vratasyāpūritena ca 
yāhutir dīyate vahnau sā pūrṇāhutir ucyate // SU_4.51

ekāṃ pūrṇāhutiṃ hutvā śivena śivabhāvitaḥ 
sarvakāmam avāpnoti śivaloke vyavasthitaḥ // SU_4.52

aśeṣakulajair sārdhaṃ sa bhṛtyaiḥ parivāritaḥ 
ābhūtasaṃplavaṃ yāvad bhogān bhuṅkte yathepsitān // SU_4.53

tataś ca pralaye prāpte saṃprāpya jñānam uttamam 
prasādād īśvarasyaiva mucyate bhavasāgarāt // SU_4.54

śivapūrṇāhutiṃ vahnau patantīṃ yaḥ prapaśyati 
so 'pi pāpari naraḥ sarvair muktaḥ śivapuraṃ vrajet // SU_4.55

śivāgnidhūmasaṃspṛṣṭā jīvāḥ sarve carācarāḥ 
te 'pi pāpavinirmuktāḥ svargaṃ yānti na saṃśayaḥ // SU_4.56

śivayajñamahāvedyā jāyate ye na santi vā 
te 'pi yānti śivasthānaṃ jīvāḥ sthāvarajaṅgamāḥ // SU_4.57

pūrṇāhutiṃ ghṛtābhāve kṣīratailena kalpayet 
homayed atasītailaṃ tilatailaṃ vinā naraḥ // SU_4.58

sarṣapeṅguḍikāśāmrakarañjamadhukākṣajam 
priyaṅgubilvapaippalyanālikerasamudbhavam(?) // SU_4.59

ity evam ādikaṃ tailam ājyābhāve prakalpayet 
dūrvayā bilvapattrair vā samidhaḥ saṃprakīrtitāḥ // SU_4.60

annārthaṃ homayet kṣīraṃ dadhi mūlaphalāni vā 
tilārthaṃ taṇḍulaiḥ kuryād darbhārthaṃ haritais tṛṇaiḥ // SU_4.61

paridhīnām abhāvena śarair vaṃśaiś ca kalpayet 
indhanānām abhāvena dīpayet tṛṇagomayaiḥ // SU_4.62

gomayānām abhāvena mahaty ambhasi homayet 
apām asaṃbhave homaṃ bhūmibhāge manohare // SU_4.63

viprasya dakṣiṇe pāṇāv aśvatthe tadabhāvataḥ 
chāgasya dakṣiṇe karṇe kuśamūle ca homayet // SU_4.64

svātmāgnau homayet prājñaḥ sarvāgnīnām asaṃbhave 
abhāve na tyajet karma karmayogavidhau sthitaḥ // SU_4.65

āpatkāle 'pi yaḥ kuryāc chivāgner manasārcanam 
sa mohakañcukaṃ tyaktvā parāṃ śāntim avāpnuyāt // SU_4.66

prāṇāgnihotraṃ kurvanti paramaṃ śivayoginaḥ 
bāhyakarmavinirmuktā jñānadhyānasamākulāḥ // SU_4.67

// iti śivopaniṣadi śāntigṛhāgnikāryādhyāyaś caturthaḥ //

athāgneyaṃ mahāsnānam alakṣmīmalanāśanam 
sarvapāpaharaṃ divyaṃ tapaḥ śrīkīrtivardhanam // SU_5.1

agnirūpeṇa rudreṇa svatejaḥ paramaṃ balam 
bhūtirūpaṃ samudgīrṇaṃ viśuddhaṃ duritāpaham // SU_5.2

yakṣarakṣaḥpiśācānāṃ dhvaṃsanaṃ mantrasatkṛtam 
rakṣārthaṃ bālarūpāṇāṃ sūtikānāṃ gṛheṣu ca // SU_5.3

yaś ca bhuṅkte dvijaḥ kṛtvā [a]nnasya vā paridhitrayam(?) 
api śūdrasya paṅktisthaḥ paṅktidoṣair na lipyate // SU_5.4

āhāram ardhabhuktaṃ ca kīṭakeśādidūṣitam 
tāvanmātraṃ samuddhṛtya bhūtispṛṣṭaṃ viśuddhyati // SU_5.5

āraṇyaṃ gomayakṛtaṃ karīṣaṃ vā praśasyate 
śarkarāpāṃsunirmuktam abhāve kāṣṭhabhasmanā // SU_5.6

svagṛhāśramavallibhyaḥ kulālālayabhasmanā 
gomayeṣu ca dagdheṣu hīṣṭakāni ca yeṣu ca // SU_5.7

sarvatra vidyate bhasma duḥkhāpārjanarakṣaṇam (duḥkhopār) 
śaṅkhakundenduvarṇābham ādadyāj jantuvarjitam // SU_5.8

bhasmānīya prayatnena tad rakṣed yatnavāṃs tathā 
mārjāramūṣikādyaiś ca nopahanyeta tad yathā // SU_5.9

pañcadoṣavinirmuktaṃ guṇapañcakasaṃyutam 
śivaikādaśikājaptaṃ śivabhasma prakīrtitam // SU_5.10

jātikārukavākkāyasthānaduṣṭaṃ ca pañcamam 
pāpaghnaṃ śāṃkaraṃ rakṣāpavitraṃ yogadaṃ guṇāḥ(?) // SU_5.11

śivavratasya śāntasya bhāsakatvāc chubhasya ca 
bhakṣaṇāt sarvapāpānāṃ bhasmeti parikīrtitam // SU_5.12

bhasmasnānaṃ śivasnānaṃ vāruṇād adhikaṃ smṛtam 
jantuśaivālanirmuktam āgneyaṃ paṅkavarjitam // SU_5.13

apavitraṃ bhavet toyaṃ niśi pūrvam anāhṛtam 
nadītaḍāgavāpiṣu giriprasravaṇeṣu ca // SU_5.14

snānaṃ sādhāraṇaṃ proktaṃ vāruṇaṃ sarvadehinām 
asādhāraṇam evoktaṃ bhasmasnānaṃ dvijanmanām // SU_5.15

trikālaṃ vāruṇasnānād anārogyaṃ prajāyate 
āgneyaṃ rogaśamanam etasmād sārvakāmikam // SU_5.16

saṃdhyātraye 'rdharātre ca bhuktvā cānnavirecane 
śivayogy ācaret snānam uccārādikriyāsu ca // SU_5.17

bhasmāstṛte mahībhāge same jantuvivarjite 
dhyāyamānaḥ śivaṃ yogī rajanyantaṃ śayīta ca // SU_5.18

ekarātroṣitasyāpi yā gatir bhasmaśāyinaḥ 
na sā śakyā gṛhasthena prāptuṃ yajñaśatair api // SU_5.19

gṛhasthas tryāyuṣoṃkāraiḥ snānaṃ kuryāt tripuṇḍrakaiḥ 
yatiḥ sārvāṅgikaṃ snānam āpādatalamastakāt // SU_5.20

śivabhaktas tridhā vedyāṃ bhasmasnānaphalaṃ labhet 
hṛdi mūrdhni lalāṭe ca śūdraḥ śivagṛhāśramī // SU_5.21

gaṇāḥ pravrajitāḥ śāntāḥ bhūtim ālabhya pañcadhā 
śirolalāṭe hṛdbāhvor bhasmasnānaphalaṃ labhet // SU_5.22

saṃvatsaraṃ tadardhaṃ vā caturdaśyaṣṭamīṣu ca 
yaḥ kuryād bhasmanā snānaṃ tasya puṇyaphalaṃ śṛnu // SU_5.23

śivabhasmani yāvantaḥ sametāḥ paramāṇavaḥ 
tāvadvarṣasahasrāṇi śivaloke mahīyate // SU_5.24

ekaviṃśakulopetaḥ patnīputrādisaṃyutaḥ 
mitrasvajanabhṛtyaiś ca samastaiḥ parivāritaḥ // SU_5.25

tatra bhuktvā mahābhogān icchayā sārvakāmikān 
jñānayogaṃ samāsādya pralaye muktim āpnuyāt // SU_5.26

bhasma bhasmāntikaṃ yena gṛhītaṃ naiṣṭhikavratam(?) 
anena vai sa dehena rudraś caṅkramate kṣitau // SU_5.27

bhasmasnānarataṃ śāntaṃ ye namanti dine dine 
te sarvapāpanirmuktā narā yānti śivaṃ puram // SU_5.28

ity etat paramaṃ snānam āgneyaṃ śivanirmitam 
trisaṃdhyam ācaren nityaṃ jāpī yogam avāpnuyāt // SU_5.29

bhasmānīya pradadyād yaḥ snānārthaṃ śivayogine 
kalpaṃ śivapure bhogān bhuktvānte syād dvijottamaḥ // SU_5.30

āgneyaṃ vāruṇaṃ māntraṃ vāyavyaṃ tv aindrapañcamam 
mānasaṃ śāntitoyaṃ ca jñānasnānaṃ tathāṣṭamam // SU_5.31

āgneyaṃ rudramantreṇa bhasmasnānam anuttamam 
ambhasā vāruṇaṃ snānam kāryaṃ vāruṇamūrtinā // SU_5.32

mūrdhānaṃ pāṇinālabhya śivaikādaśikāṃ japet 
dhyāyamānaḥ śivaṃ śāntam mantrasnānaṃ paraṃ smṛtam // SU_5.33

gavāṃ khurapuṭotkhātapavanoddhūtareṇunā 
kāryaṃ vāyavyakaṃ snānam mantreṇa marudātmanā // SU_5.34

vyabhre 'rke varṣati snānaṃ kuryād aindrīṃ diśaṃ sthitaḥ 
ākāśamūrtimantreṇa tad aindram iti kīrtitam // SU_5.35

udakaṃ pāṇinā gṛhya sarvatīrthāni saṃsmaret 
abhyukṣayec chiras tena snānaṃ mānasam ucyate // SU_5.36

pṛthivyāṃ yāni tīrthāni sarāṃsy āyatanāni ca 
teṣu snātasya yat puṇyaṃ tat puṇyaṃ kṣāntivāriṇā // SU_5.37

na tathā śudhyate tīrthais tapobhir vā mahādhvaraiḥ 
puruṣaḥ sarvadānaiś ca yathā kṣāntyā viśuddhyati // SU_5.38

ākruṣṭas tāḍitas tasmād adhikṣiptas tiraskṛta 
kṣamed akṣamamānānāṃ svargamokṣajigīṣayā // SU_5.39

yaiva brahmavidāṃ prāptir yaiva prāptis tapasvinām 
yaiva yogābhiyuktānāṃ gatiḥ saiva kṣamāvatām // SU_5.40

jñānāmalāmbhasā snātaḥ sarvadaiva muniḥ śuciḥ 
nirmalaḥ suviśuddhaś ca vijñeyaḥ sūryaraśmivat // SU_5.41

medhyāmedhyarasaṃ yadvad api vatsa vinā karaiḥ 
naiva lipyati tad doṣais tadvaj jñānī sunirmalaḥ // SU_5.42

eṣām ekatame snātaḥ śuddhabhāvaḥ śivaṃ vrajet 
aśuddhabhāvaḥ snāto 'pi pūjayann āpnuyāt phalam // SU_5.43

jalaṃ mantraṃ dayā dānaṃ satyam indriyasaṃyamaḥ 
jñānaṃ bhāvātmaśuddhiś ca śaucam aṣṭavidhaṃ śrutam // SU_5.44

aṅguṣṭhatalamūle ca brāhmaṃ tīrtham avasthitam 
tenācamya bhavec chuddhaḥ śivamantreṇa bhāvitaḥ // SU_5.45

yad adhaḥ kanyakāyāś ca tat tīrthaṃ daivam ucyate 
tīrthaṃ pradeśinīmūle pitryaṃ pitṛvidhodayam(?) // SU_5.46

madhyamāṅgulimadhyena tīrtham āriṣam ucyate 
karapuṣkaramadhye tu śivatīrthaṃ pratiṣṭhitam // SU_5.47

vāmapāṇitale tīrtham aumam nāma prakīrtitam 
śivomātīrthasaṃyogāt kuryāt snānābhiṣecanam // SU_5.48

devān daivena tīrthena tarpayed akṛtāmbhasā 
uddhṛtya dakṣiṇaṃ pāṇim upavītī sadā budhaḥ // SU_5.49

prācīnāvītinā kāryaṃ pitṝṇāṃ tilavāriṇā 
tarpaṇaṃ sarvabhūtānām āriṣeṇa nivītinā // SU_5.50

savyaskandhe yadā sūtram upavīty ucyate tadā 
prācīnāvīty asavyena nivītī kaṇṭhasaṃsthite // SU_5.51

pitṝṇāṃ tarpaṇaṃ kṛtvā sūryāyārghyaṃ prakalpayet 
upasthāya tataḥ sūryaṃ yajec chivam anantaram // SU_5.52

// iti śivopaniṣadi śiva-bhasma-snānādhyāyaḥ pañcamaḥ //

atha bhaktyā śivaṃ pūjya naivedyam upakalpayet 
yad annam ātmanāśnīyāt tasyāgre vinivedayet // SU_6.1

yaḥ kṛtvā bhakṣyabhojyāni yatnena vinivedayet 
śivāya sa śive loke kalpakoṭiṃ pramodate // SU_6.2

yaḥ pakvaṃ śrīphalaṃ dadyāc chivāya vinivedayet 
guror vā homayed vāpi tasya puṇyaphalaṃ śṛṇu // SU_6.3

śrīmadbhiḥ sa mahāyānair bhogān bhuṅkte śive pure 
varṣāṇām ayutaṃ sāgraṃ tadante śrīpatir bhavet // SU_6.4

kapittham ekaṃ yaḥ pakvam īśvarāya nivedayet 
varṣalakṣaṃ mahābhogaiḥ śivaloke mahīyate // SU_6.5

ekam āmraphalaṃ pakvaṃ yaḥ śambhor vinivedayet 
varṣāṇām yutaṃ bhogaiḥ krīḍate sa śive pure // SU_6.6

ekaṃ vaṭaphalaṃ pakvaṃ yaḥ śivāya nivedayet 
varṣalakṣaṃ mahābhogaiḥ śivaloke mahīyate // SU_6.7

yaḥ pakvaṃ dāḍimaṃ caikaṃ dadyād vikasitaṃ navam 
śivāya gurave vāpi tasya puṇyaphalaṃ śṛṇu // SU_6.8

yāvat tadbījasaṃkhyānaṃ śobhanaṃ parikīrtitam 
tāvadaṣṭāyutāny uccaiḥ śivaloke mahīyate // SU_6.9

drākṣāphalāni pakvāni yaḥ śivāya nivedayet 
bhaktyā vā śivayogibhyas tasya puṇyaphalaṃ śṛṇu // SU_6.10

yāvat tatphalasaṃkhyānam ubhayor viniveditam 
tāvadyugasahasrāṇi rudraloke mahīyate // SU_6.11

drākṣāphaleṣu yat puṇyaṃ tat kharjūraphaleṣu ca 
tad eva rājavṛkṣeṣu pārāvataphaleṣu ca // SU_6.12

yo nāraṅgaphalaṃ pakvaṃ vinivedya maheśvare 
aṣṭalakṣaṃ mahābhogaiḥ kṛḍate sa śive pure // SU_6.13

bījapūreṣu tasyārdhaṃ tadardhaṃ likuceṣu ca 
jambūphaleṣu yat puṇyaṃ tat puṇyaṃ tindukeṣu ca // SU_6.14

panasaṃ nārikelaṃ vā śivāya vinivedayet 
varṣalakṣaṃ mahābhogaiḥ śivaloke mahīyate // SU_6.15

puruṣaṃ ca priyālaṃ ca madhūkakusumāni ca 
jambūphalāni pakvāni vaikaṅkataphalāni ca // SU_6.16

nivedya bhaktyā śarvāya pratyekaṃ tu phale phale 
daśavarṣasahasrāṇi rudraloke mahīyate // SU_6.17

kṣīrikāyāḥ phalaṃ pakvaṃ yaḥ śivāya nivedayet 
varṣalakṣaṃ mahābhogair modate sa śive pure // SU_6.18

vālukātrapusādīni yaḥ phalāni nivedayet 
śivāya gurave vāpi pakvaṃ ca karamardakam // SU_6.19

daśavarṣasahasrāṇi rudraloke mahīyate 
badarāṇi supakvāni tintiḍīkaphalāni ca // SU_6.20

darśanīyāni pakvāni hy āmalakyāḥ phalāni ca 
evam ādīni cānyāni śākamūlaphalāni ca // SU_6.21

nivedayati śarvāya śṛṇu yat phalam āpnuyāt 
ekaikasmin phale bhogān prāpnuyād anupūrvaśaḥ // SU_6.22

pañcavarṣasahasrāṇi rudraloke mahīyate 
godhūmacandakādyāni sukṛtaṃ saktubharjitam // SU_6.23

nivedayīta śarvāya tasya puṇyaphalaṃ śṛṇu 
yāvat tadbījasaṃkhyānaṃ śubhaṃ bhraṣṭaṃ nivedayet // SU_6.24

tāvadvarṣasahasrāṇi rudraloke mahīyate 
yaḥ pakvānīkṣudaṇḍāni śivāya vinivedayet // SU_6.25

gurave vāpi tad bhaktyā tasya puṇyaphalaṃ śṛṇu 
ikṣuparṇāni caikaikaṃ varṣalokaṃ pramodate // SU_6.26

sākaṃ śivapure bhogaiḥ pauṇḍraṃ pañcaguṇaṃ phalam 
nivedya parameśāya śuktimātrarasasya tu // SU_6.27

varṣakoṭiṃ mahābhogaiḥ śivaloke mahīyate 
nivedya phāṇitaṃ śuddhaṃ śivāya gurave 'pi vā // SU_6.28

rasāt sahasraguṇitaṃ phalaṃ prāpnoti mānavaḥ 
guḍasya phalam ekaṃ yaḥ śivāya vinivedayet // SU_6.29

ambakoṭiṃ śive loke mahābhogaiḥ pramodate 
khaṇḍasya palanaivedyaṃ guḍāc chataguṇaṃ phalam // SU_6.30

khaṇḍāt sahasraguṇitaṃ śarkarāyā nivedane 
matsaṇḍikāṃ mahāśuddhāṃ śaṃkarāya nivedayet // SU_6.31

kalpakoṭiṃ naraḥ sāgraṃ śivaloke mahīyate 
pariśuddhaṃ bhṛṣṭam ājyaṃ siddhaṃ caiva susaṃskṛtam // SU_6.32

māsaṃ nivedya śarvāya śṛṇu yat phalam āpnuyāt 
aśeṣaphaladānena yat puṇyaṃ parikīrtitam // SU_6.33

tat puṇyaṃ prāpnuyāt sarvaṃ mahādānanivedane 
panasāni ca divyāni svādūni surabhīṇi ca // SU_6.34

nivedayet tu śarvāya tasya puṇyaphalaṃ śṛṇu 
kalpakoṭiṃ naraḥ sāgraṃ śivaloke vyavasthitaḥ // SU_6.35

piban śivāmṛtaṃ divyaṃ mahābhogaiḥ pramodate 
dine dine ca yas tv āpaṃ vastrapūtaṃ samācaret // SU_6.36

sukhāya śivabhaktebhyas tasya puṇyaphalaṃ śṛṇu 
mahāsarāṃsi yaḥ kuryād bhavet puṇyaṃ śivāgrataḥ // SU_6.37

tat puṇyaṃ sakalaṃ prāpya śivaloke mahīyate 
yad iṣṭam ātmanaḥ kiṃcid annapānaphalādikam // SU_6.38

tat tac chivāya deyaṃ syād uttamaṃ bhogam icchatā 
na śivaḥ paripūrṇatvāt kiṃcid aśnāti kasyacit // SU_6.39

kintv īśvaranibhaṃ kṛtvā sarvam ātmani dīyate 
na rohati yathā bījaṃ svastham āśrayavarjitam // SU_6.40

puṇyabījaṃ tathā sūkṣmaṃ niṣphalaṃ syān nirāśrayam 
sukṣetreṣu yathā bījam uptaṃ bhavati satphalam // SU_6.41

alpam apy akṣayaṃ tadvat puṇyaṃ śivasamāśrayāt 
tasmād īśvaram uddiśya yad yad ātmani rocate // SU_6.42

tat tad īśvarabhaktebhyaḥ pradātavyaṃ phalārthinā 
yaḥ śivāya guror vāpi racayen maṇibhūmikam // SU_6.43

naivedya bhojanārthaṃ yaḥ pattraiḥ puṣpaiś ca śobhanam 
yāvat tat pattrapuṣpāṇāṃ parisaṃkhyā vidhīyate // SU_6.44

tāvadvarṣasahasrāṇi suraloke mahīyate 
palāśakadalīpadmapattrāṇi ca viśeṣataḥ // SU_6.45

dattvā śivāya gurave śṛṇu yat phalam āpnuyāt 
yāvat tatpattrasaṃkhyānam īśvarāya niveditam // SU_6.46

tāvadabdāyutānāṃ sa loke bhogān avāpnuyāt 
yāvat tāmbulapattrāṇi pūgāṃś ca vinivedayet // SU_6.47

tāvanti varṣalakṣāṇi śivaloke mahīyate 
yac chuddhaṃ śaṅkhacūrṇaṃ vā gurave vinivedayet // SU_6.48

tāmbūlayogasiddhyarthaṃ tasya puṇyaphalaṃ śṛṇu 
yāvat tāmbūlapattrāṇi cūrṇamānena bhakṣayet // SU_6.49

tāvadvarṣasahasrāṇi rudraloke mahīyate 
jātīphalaṃ sakaṅkolaṃ latākastūrikotpalam // SU_6.50

ity etāni sugandhīni phalāni vinivedayet 
phale phale mahābhogair varṣalakṣaṃ tu yatnataḥ // SU_6.51

kāmikena vimānena krīḍate sa śive pure 
truṭimātrapramāṇena karpūrasya śive gurau // SU_6.52

varṣakoṭiṃ mahābhogaiḥ śivaloke mahīyate 
pūgatāmbūlapattrāṇām ādhāraṃ yo nivedayet // SU_6.53

varṣakoṭyaṣṭakaṃ bhogaiḥ śivaloke mahīyate 
yaś cūeṇādhārasatpātraṃ kasyāpi vinivedayet // SU_6.54

modate sa śive loke varṣakoṭīś caturdaśa 
mṛtkāṣṭhavaṃśakhaṇḍāni yaḥ pradadyāc chivāśrame // SU_6.55

prāpnuyād vipulān bhogān divyāñ chivapure naraḥ 
māṇikyaṃ kalaśaṃ pātrīṃ sthālyādīn bhāṇḍasaṃpuṭān // SU_6.56

dattvā śivāgrajas tebhyaḥ śivaloke mahīyate 
toyādhārapidhānāni mṛdvastratarujāni vā // SU_6.57

vaṃśālābusamutthāni dattvāpnoti śivaṃ puram 
pañcasaṃmārjanītoyaṃ gomayāñjanakarpaṭān // SU_6.58

mṛtkumbhapīṭikāṃ dadyād bhogāñ chivapure labhet 
yaḥ puṣpadhūpagandhānāṃ dadhikṣīraghṛtāmbhasām // SU_6.59

dadyād ādhārapātrāṇi śivaloke sa gacchati 
vaṃśatālādisaṃbhūtaṃ puṣpādhārakaraṇḍakam // SU_6.60

ity evamādyān yo dadyāc chivalokam avāpnuyāt 
yaḥ sruksruvādipātrāṇi homārthaṃ vinivedayet // SU_6.61

varṣakoṭiṃ mahābhāgaiḥ śivaloke mahīyate 
yaḥ sarvadhātusaṃyuktaṃ dadyāl lavaṇaparvatam // SU_6.62

śivāya gurave vāpi tasya puṇyaphalaṃ śṛṇu 
kalpakoṭisahasrāṇi kalpakoṭiśatāni ca // SU_6.63

sa gotrabhṛtyasaṃyukto vasec chivapure naraḥ 
vimānayānaiḥ śrīmadbhiḥ sarvakāmasamanvitaiḥ // SU_6.64

bhogān bhuktvā tu vipulāṃs tadante sa mahīpatiḥ 
manaḥśilāṃ harītālaṃ rājapaṭṭaṃ ca hiṅgulam // SU_6.65

gairikaṃ maṇidantaṃ ca hematoyaṃ tathāṣṭamam 
yaś ca taṃ parvatavaraṃ śālitaṇḍulakalpitam // SU_6.66

śivāyagurave vāpi tasya puṇyaphalaṃ śṛṇu 
kalpakoṭiśataṃ sāgraṃ bhogān bhuṅkte śive pure // SU_6.67

yaḥ sarvadhānyaśikharair upetaṃ yavaparvatam 
ghṛtatailanadīyuktaṃ tasya puṇyaphalaṃ śṛṇu // SU_6.68

kalpakoṭiśataṃ sāgraṃ bhogān bhuṅkte śive pure 
samastakulajaiḥ sārdhaṃ tasyānte sa mahīpatiḥ // SU_6.69

tiladhenuṃ pradadyād yaḥ kṛtvā kṛṣṇājine naraḥ 
kapilāyāḥ pradānasya yat phalaṃ tad avāpnuyāt // SU_6.70

ghṛtadhenuṃ naraḥ kṛtvā kāṃsyapātre sakāñcanān 
nivedya gopradānasya samagraṃ phalam āpnuyāt // SU_6.71

dvīpicarmaṇi yaḥ sthāpya pradadyāl lavaṇāḍhakam 
aśeṣarasadānasya yat puṇyaṃ tad avāpnuyāt // SU_6.72

maricāḍhena kurvīta(?) mārīcaṃ nāma parvatam 
dadyād yaj jīrakaṃ pūrvam āgneyaṃ hiṅgum uttamam // SU_6.73

dakṣiṇe guḍaśuṇṭhīṃ ca nairṛte nāgakesaram 
pippalīṃ paścime dadyād vāyavye kṛṣṇajīrakam // SU_6.74

kauberyām ajamodaṃ ca tvagelāś ceśadaivate 
kustumbaryāḥ pradeyāḥ syur bahiḥ prākārataḥ sthitāḥ // SU_6.75

kakubhām antarāleṣu samantāt saindhavaṃ nyaset 
sapuṣpākṣatatoyena śivāya vinivedayet // SU_6.76

yāvat taddīpasaṃkhyānaṃ sarvam ekatra parvate 
tāvadvarṣaśatād ūrdhvaṃ bhogān bhuṅkte śive pure // SU_6.77

kūśmāṇḍaṃ madhyataḥ sthāpya kāliṅgaṃ pūrvato nyaset 
dakṣiṇe kṣīratumbīṃ tu vṛntākaṃ paścime nyaset // SU_6.78

paṭīsāny uttare sthāpya karkaṭīm īśadaivate 
nyased gajapaṭolāṃś ca madhurān vahnidaivate // SU_6.79

kāravellāṃś ca nairṛtyāṃ vāyavyāṃ nimbakaṃ phalam 
uccāvacāni cānyāni phalāni sthāpayed bahiḥ // SU_6.80

abhyarcya puṣpadhūpaiś ca samantāt phalaparvatam 
śivāya gurave vāpi praṇipatya nivedayet // SU_6.81

yāvat tatphalasaṃkhyānaṃ taddīpānāṃ ca madhyataḥ 
tāvadvarṣasahasrāṇi rudraloke mahīyate // SU_6.82

mūlakaṃ madhyataḥ sthāpya tatpūrve vālamūlakam 
āgneyyāṃ vāstukaṃ sthāpya yāmyāyāṃ kṣāravāstukam // SU_6.83

pālakyaṃ nairṛte sthāpya sumukhaṃ paścime nyaset 
kuhadrakaṃ ca vāyavyām uttare vāpi tālikīm // SU_6.84

kusumbhaśākam aiśānyāṃ sarvaśākāni tadbahiḥ 
pūrvakrameṇa vinyasya śivāya vinivedayet // SU_6.85

yāvat tanmūlanālānāṃ pattrasaṃkhyā ca kīrtitā 
tāvadvarṣasahasrāṇi rudraloke mahīyate // SU_6.86

dattvā labhen mahābhogān guggulvadreḥ paladvayam 
varṣakoṭidvayaṃ svarge dviguṇaṃ guḍamiśritaiḥ // SU_6.87

guḍārdrakaṃ salavaṇam āmramañjarisaṃyutam 
nivedya gurave bhaktyā saubhāgyaṃ paramaṃ labhet // SU_6.88

hastāropyeṇa vā kṛtvā mahāratnānvitāṃ mahīm 
nivedayitvā śarvāya śivatulyaḥ prajāyate // SU_6.89

vajrendranīlavaiḍūryapadmarāgaṃ samauktikam 
kīṭapakṣaṃ suvarṇaṃ ca mahāratnāni sapta vai // SU_6.90

yaś ca siṃhāsanaṃ dadyān mahāratnānvitaṃ nṛpaḥ 
kṣudraratnaiś ca vividhais tasya puṇyaphalaṃ śṛṇu // SU_6.91

kulatriṃśakasaṃyuktaḥ sāntaḥpuraparicchadaḥ 
samastabhṛtyasaṃyuktaḥ śivaloke mahīyate // SU_6.92

tatra bhuktvā mahābhogān śivatulyaparākramaḥ 
āmahāpralayaṃ yāvat tadante muktim āpnuyāt // SU_6.93

yadi ced rājyam ākaṅkṣet tataḥ sarvasamāhitaḥ 
saptadvīpasamudrāyāḥ kṣiter adhipatir bhavet // SU_6.94

janmakoṭisahasrāṇi janmakoṭiśatāni ca 
rājyaṃ kṛtvā tataś cānte punaḥ śivapuraṃ vrajet // SU_6.95

etad eva phalaṃ jñeyaṃ makuṭābharaṇādiṣu 
ratnāsanapradānena pāduke vinivedayet // SU_6.96

dadyād yaḥ kevalaṃ vajraṃ śuddhaṃ godhūmamātrakam 
śivāya sa śive loke tiṣṭhed āpralayaṃ sukhī // SU_6.97

indranīlapradānena sa vaiḍūryapradānataḥ 
modate vividhair bhogaiḥ kalpakoṭiṃ śive pure // SU_6.98

masūramātram api yaḥ padmarāgaṃ suśobhanam 
nivedayitvā śarvāya modate kālam akṣayam // SU_6.99

nivedya mauktikaṃ svaccham ekabhāgaikamātrakam 
bhogaiḥ śivapure divyaiḥ kalpakoṭiṃ pramodate // SU_6.100

kīṭapakṣaṃ mahāśuddhaṃ nivedya yavamātrakam 
śivāyādyaḥ śive loke modate kālam akṣayam // SU_6.101

hemnā kṛtvā ca yaḥ puṣpam api māṣakamātrakam 
nivedayitvā śarvāya varṣakoṭiṃ vased divi // SU_6.102

kṣudraratnāni yo dadyād dhemni baddhāni śambhave 
modate sa śive loke kalpakoṭyayutaṃ naraḥ // SU_6.103

yathā yathā mahāratnaṃ śobhanaṃ ca yathā yathā 
tathā tathā mahat puṇyaṃ jñeyaṃ tac chivadānataḥ // SU_6.104

bhūmibhāge sa()vistīṛṇe jambūdvīpaṃ prakalpayet 
aṣṭāvaraṇasaṃyuktaṃ nagendrāṣṭakabhūṣitam // SU_6.105

tanmadhye kārayed divyaṃ meruprāsādam uttamam 
anekaśikharākīrṇam aśeṣāmarasaṃyutam // SU_6.106

bahiḥ suvarṇanicitaṃ sarvaratnopaśobhitam 
catuḥpragrīvakopetaṃ cakṣurliṅgasamāyutam // SU_6.107

caturdikṣu vanopetaṃ caturbhiḥ saṃyutaiḥ śaraiḥ 
caturṇāṃ purayuktena prākāreṇa ca saṃyutam // SU_6.108

meruprāsādam ity evaṃ hemaratnavibhūṣitam 
yaḥ kārayed vanopetaṃ so 'nantaphalam āpnuyāt // SU_6.109

bhūmyambhaḥparamāṇūnāṃ yathā saṃkhyā na vidyate 
śivāyatanapuṇyasya tathā saṃkhyā na vidyate // SU_6.110

kulatriṃśakasaṃyuktaḥ sarvabhṛtyasamanvitaḥ 
kalatraputramitraiś ca sarvasvajanasaṃyutaḥ // SU_6.111

āśrtitopāśritaiḥ sarvair aśeṣagaṇasaṃyutaḥ 
yathā śivas tathaivāyaṃ śarvaloke sa pūjyate // SU_6.112

na ca mānuṣyakaṃ lokam āgacchet kṛpaṇaṃ punaḥ 
sarvajñaḥ paripūrṇaś ca muktaḥ svātmani tiṣṭhati // SU_6.113

yaḥ śivāya vanaṃ kṛtvā mudābdasalilotthitam(?) 
tad daṇḍakopaśobhaṃ ca haste kurvīta sarvadā // SU_6.114

śobhayed bhūtanāthaṃ vā candraśālāṃ kvacit kvacit 
vedīṃ vāthābhyapadyanta pronnatāḥ stambhapaṅktayaḥ // SU_6.115

śātakumbhamayīṃ vāpi sarvalakṣaṇasaṃyutām 
īśvarapratimāṃ saumyāṃ kārayet puruṣocchritām // SU_6.116

triśūlasavyahastāṃ ca varadābhayadāyikāṃ 
savyahastākṣamālāṃ ca jaṭākusumabhūṣitām // SU_6.117

padmasiṃhāsanāsīnāṃ vṛṣasthāṃ vā samucchritām 
vimānasthāṃ rathasthāṃ vā vedisthāṃ vā prabhānvitām // SU_6.118

saumyavaktrāṃ karālāṃ vā mahābhairavarūpiṇīm 
atyucchritāṃ suvistīrṇāṃ nṛtyasthāṃ yogasaṃsthitām // SU_6.119

kuryād asaṃbhave hemnas tāreṇa vimalena ca 
ārakūṭamayīṃ vāpi tāmramṛcchailadārujām // SU_6.120

aśeṣakaiḥ sarūpaiś ca varṇakair vā paṭe likhet 
kuḍye vā phalake vāpi bhaktyā vittānusārataḥ // SU_6.121

ekāṃ saparivārāṃ vā pārvatīṃ gaṇasaṃyutām 
pratīhārasamopetāṃ(?) kuryād evāvikalpataḥ // SU_6.122

pīṭhaṃ vā kārayed raupyaṃ tāmraṃ pittalasaṃbhavam 
caturmukhaikavaktraṃ vā bahiḥ kāñcanasaṃskṛtam // SU_6.123

pṛthakpṛthaganekāni kārayitvā mukhāni tu 
saumyabhairavarūpāṇi śivasya bahurūpiṇaḥ // SU_6.124

nānābharaṇayuktāni hemaraupyakṛtāni ca 
śivasya rathayātrāyāṃ tāni lokasya darśayet // SU_6.125

uktāni yāni puṇyāni saṃkṣepeṇa pṛthak pṛthak 
kṛtvaikena mamaiteṣām akṣayaṃ phalam āpnuyāt // SU_6.126

mātuḥ pituḥ sahopāyair(?) daśabhir daśabhiḥ kulaiḥ 
kalatraputramitrādyair bhṛtyair yuktaḥ sa bāndhavaiḥ // SU_6.127

ayutena vimānānāṃ sarvakāmayutena ca 
bhuṅkte svayaṃ mahābhogān ante muktim avāpnuyāt // SU_6.128

maṇḍapastambhaparyante kīlayed darpaṇānvitam 
abhiṣicya janā yasmin pujāṃ kuvanti bilvakaiḥ // SU_6.129

kālakālakṛtiṃ kṛtvā kīlayed yaḥ śivāśrame 
sarvalokopakārāya pūjayec ca dine dine // SU_6.130

dhūpavelāpramāṇārthaṃ kalpayed yaḥ śivāśrame 
kṣarantīṃ pūryamāṇāṃ vā sadāyāme ghaṭīṃ nṛpaḥ // SU_6.131

eṣām ekatamaṃ puṇyaṃ kṛtvā pāpavivarjitaḥ 
śivaloke naraḥ prāpya sarvajñaḥ sa sukhī bhavet // SU_6.132

rathayātrāṃ pravakṣyāmi śivasya paramātmanaḥ 
sarvalokahitārthāya mahāśilpivinirmitām // SU_6.133

rathamadhye samāveśya yathā yaṣṭiṃ tu kīlayet 
yaṣṭer madhye sthitaṃ kāryaṃ vimānam atiśobhitam // SU_6.134

pañcabhaumaṃ tribhaumaṃ vā dṛḍhavaṃśaprakalpitam 
karmaṇā sunibaddhaṃ ca rajjubhiś ca susaṃyutam // SU_6.135

pañcaśālāṇḍikair yuktaṃ nānābhaktisamanvitam 
citravarṇaparicchannaṃ paṭair vā varṇakānvitaiḥ // SU_6.136

lambakaiḥ sūtradāmnā ca ghaṇṭācāmarabhūṣitam 
budbudair ardhacandraiś ca darpaṇaiś ca samujjvalam // SU_6.137

kadalyardhadhvajair yuktaṃ mahācchattraṃ mahādhvajam 
puṣpamālāparikṣiptaṃ sarvaśobhāsamanvitam // SU_6.138

mahārathavimāne 'smin sthāpayed gaṇasaṃyutam 
īśvarapratimāṃ hemni prathame puramaṇḍape // SU_6.139

mukhatrayaṃ ca badhnīyād bahiḥ kuryāt tathāśritam 
pure pure bahir dikṣu gṛhakeṣu samāśritam // SU_6.140

catuṣkaṃ śivavaktrāṇāṃ saṃsthāpya pratipūjayet 
dinatrayaṃ prakurvīta snānam arcanabhojanam // SU_6.141

nṛtyakrīḍāprayogeṇa geyamaṅgalapāṭhakaiḥ 
mahāvāditranirghoṣaiḥ pauṣapūrṇimaparvaṇi // SU_6.142

bhrāmayed rājamārgeṇa caturthe 'hani tadratham 
tataḥ svasthānam ānīya taccheṣam api vardhayet // SU_6.143

avadhārya jagaddhātrī pratimām avatārayet 
mahāvimānayātraiṣā kartavyā paṭṭake 'pi vā // SU_6.144

vaṃśair navaiḥ supakvaiś ca kaṭaṃ kuryād bharakṣamam(?) 
vṛttaṃ dviguṇadīrghaṃ ca caturaśram adhaḥ samam // SU_6.145

sarvatra carmaṇā baddhaṃ mahāyaṣṭisamāśritam 
mukhaṃ baddhaṃ ca kurvīta vaṃśamaṇḍalinā dṛḍham // SU_6.146

kaṭe 'smiṃs tāni vastrāṇi sthāpya badhnīta yatnataḥ 
upary upari sarvāṇi tanmadhye pratimāṃ nyaset // SU_6.147

varṇakaiḥ kuṅkumādyaiś ca citrapuṣpaiś ca pūjayet 
nānābharaṇapūjābhir muktāhārapralambibhiḥ // SU_6.148

rathasya mahato madhye sthāpya paṭṭadvayaṃ dṛḍham 
adharottarabhāgena madhye chidrasamanvitam // SU_6.149

kaṭiyaṣṭer adhobhāgaṃ sthāpya chidramayaṃ śubhaiḥ 
ābaddhya kīlayed yatnād yaṣṭyardhaṃ ca dhvajāṣṭakam // SU_6.150

kaṭasya pṛṣṭaṃ sarvatra kārayet paṭasaṃvṛtam 
tatpaṭe ca likhet somaṃ sagaṇaṃ savṛṣaṃ śivam // SU_6.151

vicitrapuṣpasragdāmnā samantād bhūṣayet kaṭam 
ravakaiḥ kiṅkiṇījālair ghaṇṭācāmarabhūṣitaiḥ // SU_6.152

mahāpūjāviśeṣaiś ca kautūhalasamanvitam 
vādyārambhopacāreṇa mārgaśobhāṃ prakalpayet // SU_6.153

tad rathaṃ bhrāmayed yatnād rājamārgeṇa sarvataḥ 
tataḥ svāśramam ānīya sthāpayet tatsamīpataḥ // SU_6.154

mahāśabdaṃ tataḥ kuryāt tālatrayasamanvitam 
tatas tuṣṇīṃ sthite loke tacchāntim iha dhārayet // SU_6.155

śivaṃ tu sarvajagataḥ śivaṃ gobrāhmaṇasya ca 
śivam astu nṛpāṇāṃ ca tadbhaktānāṃ janasya ca // SU_6.156

rājā vijayam āpnoti putrapautraiś ca vardhatām 
dharmaniṣṭhaś ca bhavatu prajānāṃ ca hite rataḥ // SU_6.157

kālavarṣī tu parjanyaḥ sasyasaṃpattir uttamā 
subhikṣāt kṣemam āpnoti kāryasiddhiś ca jāyatām // SU_6.158

doṣāḥ prayāntu nāśaṃ ca guṇāḥ sthairyaṃ bhajantu vaḥ 
bahukṣīrayutā gāvo hṛṣṭapuṣṭā bhavantu vaḥ // SU_6.159

evaṃ śivamahāśāntim uccārya jagataḥ kramāt 
abhivardhya tataḥ śeṣam aiśvarīṃ sārvakāmikīm // SU_6.160

śivamālāṃ samādāya sadāsīparicārikaḥ 
phalair bhakṣaiś ca saṃyuktāṃ gṛhya pātrīṃ niveśayet // SU_6.161

pātrīṃ ca dhārayen mūrdhnā soṣṇīṣāṃ devaputrakaḥ 
alaṃkṛtaḥ śuklavāsā dhārmikaḥ satataṃ śuciḥ // SU_6.162

tataś ca tāṃ samutkṣipya pāṇinā dhārayed budhaḥ 
prabrūyād aparaś cātra śivadharmasya bhājakaḥ // SU_6.163

toyaṃ yathā ghaṭīsaṃstham ajasraṃ kṣarate tathā 
kṣarate sarvalokānāṃ tadvad āyur aharniśam // SU_6.164

yadā sarvaṃ parityajya gantavyam avaśair dhruvam 
tadā na dīyate kasmāt pātheyārtham idaṃ dhanam // SU_6.165

kalatraputramitrāṇi pitā mātā ca bāndhavāḥ 
tiṣṭhanti na mṛtasyārthe paraloke dhanāni ca // SU_6.166

nāsti dharmasamaṃ mitraṃ nāsti dharmasamaḥ sakhā 
yataḥ sarvaiḥ parityaktaṃ naraṃ dharmo 'nugacchati // SU_6.167

tasmād dharmaṃ samuddiśya yaḥ śeṣām abhivardhayet 
samastapāpanirmuktaḥ śivalokaṃ sa gacchati // SU_6.168

upary upari vittena yaḥ śeṣām abhivardhayet 
tasyeyam uttamā deyā yataś cānyā na vardhate // SU_6.169

ity evaṃ madhyamāṃ śeṣāṃ vardhayed vā kanīyasīm 
tatas teṣāṃ pradātavyā sarvaśokasya śāntaye // SU_6.170

yenottamā gṛhītā syāc śivaśeṣā mahīyasī 
prāpaṇīyā gṛhaṃ tasya tathaiva śirasā vṛtā // SU_6.171

dhvajacchattravimānādyair mahāvāditraniḥsvanaiḥ 
gṛhadvāraṃ tataḥ prāptam arcayitvā niveśayet // SU_6.172

dadyād gotrakalatrāṇāṃ bhṛtyānāṃ svajanasya ca 
tarpayec cānatān(?) bhaktyā vāditradhvajavāhakān // SU_6.173

evam ādīyate bhaktyā yaḥ śivasyottamā gṛhe 
śobhayā rājamārgeṇa tasya dharmaphalaṃ śṛṇu // SU_6.174

samastapāpanirmuktaḥ samastakulasaṃyutaḥ 
śivalokam avāpnoti sabhṛtyaparicārakaḥ // SU_6.175

tatra divyair mahābhogair vimānaiḥ sārvakāmikaiḥ 
kalpānāṃ krīḍate koṭim ante nirvāṇam āpnuyāt // SU_6.176

rathasya yātrāṃ yaḥ kuryād ity evam upaśobhayā 
bhakṣabhojyapradānaiś ca tatphalaṃ śṛnu yatnataḥ // SU_6.177

aśeṣapāpanirmuktaḥ sarvabhṛtyasamanvitaḥ 
kulatriṃśakam uddhṛtya suhṛdbhiḥ svajanaiḥ saha // SU_6.178

sarvakāmayutair divyaiḥ svacchandagamanālayaiḥ 
mahāvimānaiḥ śrīmadbhir divyastrīparivāritaḥ // SU_6.179

icchayā krīḍate bhogaiḥ kalpakoṭiṃ śive pure 
jñānayogaṃ tataḥ prāpya saṃsārād avamucyate // SU_6.180

śivasya rathayātrāyām upavāsaparaḥ kṣamī 
purataḥ pṛṣṭhato vāpi gacchaṃs tasya phalaṃ śṛṇu // SU_6.181

aśeṣapāpanirmuktaḥ śuddhaḥ śivapuraṃ gataḥ 
mahārathopamair yānaiḥ kalpāśītiṃ pramodateä // SU_6.182

dhvajacchattrapatākābhir dīpadarpaṇacāmaraiḥ 
dhūpair vitānakalaśair upaśobhā sahasraśaḥ // SU_6.183

gṛhītvā yāti purataḥ svecchayā vā parecchayā 
saṃparkāt kautukāl lābhāc chivaloke vrajante te // SU_6.184

śivasya rathayātrāṃ tu yaḥ prapaśyati bhaktitaḥ 
prasaṅgāt kautukād vāpi te 'pi yānti śivaṃ puram // SU_6.185

nānāyatnādiśeṣānte nānāprekṣaṇakāni ca 
kurvīta rathayātrāyāṃ ramate ca vibhūṣitā // SU_6.186

te bhogair vividhair divyaiḥ śivāsannā gaṇeśvarāḥ 
krīḍanti rudrabhavane kalpānāṃ viṃśatīr narāḥ // SU_6.187

mahatā jñānasaṅghena tasmāc chivarathena ca 
pṛthakjīvā mṛtā yānti śivalokaṃ na saṃśayaḥ // SU_6.188

śrīparvate mahākāle vārāṇasyāṃ mahālaye 
jalpeśvare kurukṣetre kedāre maṇḍaleśvare // SU_6.189

gokarṇe bhadrakarṇe ca śaṅkukarṇe sthaleśvare 
bhīmeśvare suvarṇākṣe kālañjaravane tathā // SU_6.190

evam ādiṣu cānyeṣu śivakṣetreṣu ye mṛtāḥ 
jīvāś carācarāḥ sarve śivalokaṃ vrajanti te // SU_6.191

prayāgaṃ kāmikaṃ tīrtham avimuktaṃ tu naiṣṭhikam 
śrīparvataṃ ca vijñeyam ihāmutra ca siddhidam // SU_6.192

prasaṅgenāpi yaḥ paśyed anyatra prasthitaḥ kvacit 
śrīparvataṃ mahāpuṇyaṃ so 'pi yāti śivaṃ puram // SU_6.193

vrajed yaḥ śivatīrthāni sarvapāpaiḥ pramucyate 
pāpayuktaḥ śivajñānaṃ prāpya nirvāṇam āpnuyāt // SU_6.194

tīrthasthāneṣu yaḥ śrāddhaṃ śivarātre prayatnataḥ 
kalpayitvānusāreṇa kālasya viṣuvasya ca // SU_6.195

tīrthayātrāgataṃ śāntaṃ hāhābhūtam acetanam 
kṣutpipāsāturaṃ loke pāṃsupādaṃ tvarānvitam // SU_6.196

saṃtarpayitvā yatnena mlānalakṣmīm ivāmbubhiḥ 
pādyāsanapradānena kas tena puruṣaḥ samaḥ // SU_6.197

aśnanti yāvat tatpiṇḍaṃ tīrthanirdhūtakalmaṣāḥ 
tāvadvarṣasahasrāṇi taddātās te śive pure // SU_6.198

dadyād yaḥ śivasattrārthaṃ mahiṣīṃ supayasvinīm 
modate sa śive loke yugakoṭiśataṃ naraḥ // SU_6.199

ārtāya śivabhaktāya dadyād yaḥ supayasvinīm 
ajām ekāṃ supuṣṭāṅgīṃ tasya puṇyaphalaṃ śṛṇu // SU_6.200

yāvat tadromasaṃkhyānaṃ tatprasūtikuleṣu ca 
tāvadvarṣasahasrāṇi rudraloke mahīyate // SU_6.201

mṛduromāñcitāṃ kṛṣṇāṃ nivedya gurave naraḥ 
romṇi romṇi suvarṇasya dattasya phalam āpnuyāt // SU_6.202

gajāśvarathasaṃyuktair vimānaiḥ sārvakāmikaiḥ 
sānugaḥ krīḍate bhogaiḥ kalpakoṭiṃ śive pure // SU_6.203

nivedyāśvataraṃ puṣṭam aduṣṭaṃ gurave naraḥ 
saṃgatiṃ sopakaraṇaṃ bhogān bhuṅkte śive pure // SU_6.204

divyāśvayuktaiḥ śrīmadbhir vimānaiḥ sārvakāmikaiḥ 
koṭiṃ koṭiṃ ca kalpānāṃ tadante syān mahīpatiḥ // SU_6.205

api yojanamātrāya śibikāṃ parikalpayet 
guroḥ śāntasya dāntasya tasya puṇyaphalaṃ śṛṇu // SU_6.206

vimānānāṃ sahasreṇa sarvakāmayutena ca 
kalpakoṭyayutaṃ sāgraṃ bhogān bhuṅkte śive pure // SU_6.207

chāgaṃ meṣaṃ mayūraṃ ca kukkuṭaṃ śārikāṃ śukam 
bālakrīḍanakān etān ity ādyān aparān api // SU_6.208

nivedayitvā skandāya tatsāyujyam avāpnuyāt 
bhuktvā tu vipulān bhogāṃs tadante syād dvijottamaḥ // SU_6.209

musalolūkhalādyāni gṛhopakaraṇāni ca 
dadyāc chivagṛhasthebhyas tasya pūṇyaphalaṃ śṛṇu // SU_6.210

pratyekaṃ kalpam ekaikaṃ gṛhopakaraṇair naraḥ 
ante divi vased bhogais tadante ca gṛhī bhavet // SU_6.211

kharjūratālapattrair vā carmaṇā vā sukalpitam 
dattvā koṭyāsanaṃ vṛttaṃ śivalokam avāpnuyāt // SU_6.212

prātarnīhāravelāyāṃ hemante śivayoginām 
kṛtvā pratāpanāyāgniṃ śivaloke mahīyate // SU_6.213

sūryāyutaprabhādīptair vimānaiḥ sārvakāmikaiḥ 
kalpakoṭiśataṃ bhogān bhuktvā sa tu mahīpatiḥ // SU_6.214

yaḥ prāntaraṃ videśaṃ vā gacchantaṃ śivayoginam 
bhojayīta yathāśaktyā śivaloke mahīyate // SU_6.215

yaś chattraṃ dhārayed grīṣme gacchate śivayogine 
sa mṛtaḥ pṛthivīṃ kṛtsnām ekacchattrām avāpnuyāt // SU_6.216

yaḥ samuddharate mārge mātropakaraṇāsanam 
śivayogapravṛttasya tasya puṇyaphalaṃ śṛṇu // SU_6.217

kalpāyutaṃ naraḥ sāgraṃ bhuktvā bhogāñ chive pure 
tadante prāpnuyād rājyaṃ sarvaiśvaryasamanvitam // SU_6.218

abhyaṅgodvartanaṃ snānam ārtasya śivayoginaḥ 
kṛtvāpnoti mahābhogān kalpāñ chivapure naraḥ // SU_6.219

apanīya samucchiṣṭaṃ bhaktitaḥ śivayoginām 
daśadhenupradānasya phalam āpnoti mānavaḥ // SU_6.220

pañcagavyasamaṃ jñeyam ucchiṣṭaṃ śivayoginām 
tad bhuktvā labhate śuddhiṃ mahataḥ pātakād api // SU_6.221

nārī ca bhuktvā satputraṃ kulādhāraṃ guṇānvitam 
rājyayogyaṃ dhanāḍhyaṃ ca prāpnuyād dharmatatparam // SU_6.222

yaś ca yāṃ śivayajñāya gṛhasthaḥ parikalpayet 
śivabhakto 'sya mahataḥ paramaṃ phalam āpnuyāt // SU_6.223

śivomāṃ ca prayatnena bhaktyābdaṃ yo 'nupālayet 
gavāṃ lakṣapradānasya saṃpūrṇaṃ phalam āpnuyāt // SU_6.224

prātaḥ pradadyāt saghṛtaṃ sukṛtaṃ bālapiṇḍakam 
dūrvāṃ ca bālavatsānāṃ(?) tasya puṇyaphalaṃ śṛṇu // SU_6.225

yāvat tadbālavatsānāṃ pānāhāraṃ prakalpayet 
tāvadaṣṭāyutān pūrvair bhogān bhuṅkte śive pure // SU_6.226

vidhavānāthavṛddhānāṃ pradadyād yaḥ prajīvanam 
ābhūtassaṃplavaṃ yāvac chivaloke mahīyate // SU_6.227

dadyād yaḥ sarvajantūnām āhāram anuyatnataḥ 
triḥ pṛthvīṃ ratnasaṃpūrṇāṃ yad dattvā tat phalaṃ labhet // SU_6.228

vinayavratadānāni yāni siddhāni lokataḥ 
tāni tenaiva vidhinā śivamantreṇa kalpayet // SU_6.229

nivedayīta rudrāya rudrāṇyāḥ ṣaṇmukhasya ca 
prāpnuyād vipulān bhogān divyāñ chivapure naraḥ // SU_6.230

punar yaḥ kartarīṃ dadyāt keśakleśāpanuttaye 
sarvakleśavinirmuktaḥ śivaloke sukhī bhavet // SU_6.231

nāsikāśodhanaṃ dadyāt saṃdaṃśaṃ śivayogine 
varṣakoṭiṃ mahābhogaiḥ śivaloke mahīyate // SU_6.232

nakhacchedanakaṃ dattvā śivaloke mahīyate 
varṣalakṣaṃ mahābhogaiḥ śivaloke mahīyate // SU_6.233

dattvāñjanaśalākāṃ vā lohādyāṃ śivayogine 
bhogāñ chivapure prāpya jñānacakṣur avāpnuyāt // SU_6.234

karṇaśodhanakaṃ dattvā lohādyaṃ śivayogine 
varṣakoṭiṃ mahābhogaiḥ śivaloke mahīyate // SU_6.235

dadyād yaḥ śivabhaktāya sūcīṃ kaupīnaśodhanīm 
varṣalakṣaṃ sa lakṣārdhaṃ śivaloke mahīyate // SU_6.236

nivedya śivayogibhyaḥ sūcikaṃ sūtrasaṃyutam 
varṣalakṣaṃ mahābhogaiḥ krīḍate sa śive pure // SU_6.237

dadyād yaḥ śivayogibhyaḥ sukṛtāṃ patravedhanīm 
varṣalakṣaṃ mahābhogaiḥ śivaloke mahīyate // SU_6.238

dadyād yaḥ pustakādīnāṃ sarvakāryārthakartṛkām 
pañcalakṣaṃ mahābhogair modate sa śive pure // SU_6.239

śamīndhanatṛṇādīnāṃ dadyāt tacchedanaṃ ca yaḥ 
krīḍate sa śive loke varṣalakṣacatuṣṭayam // SU_6.240

śivāśramopabhogāya lohopakaraṇaṃ mahat 
yaḥ pradadyāg kuṭhārādyaṃ tasya puṇyaphalaṃ śṛṇu // SU_6.241

yāvat tatphalasaṃkhyānaṃ lohopakaraṇe bhavet 
tāvanti varṣalakṣāṇi śivaloke mahīyate // SU_6.242

śivāyatanavittānāṃ rakṣārthaṃ yaḥ prayacchati 
dhanuḥkhaḍgāyudhādīni tasya puṇyaphalaṃ śṛṇu // SU_6.243

ekaikasmin parijñeyam āyudhe cāpi vai phalam 
varṣakoṭyaṣṭakaṃ bhogaiḥ śivaloke mahīyate // SU_6.244

yaḥ svātmabhogabhṛtyarthaṃ kusumāni nivedayet 
śivāya gurave vāpi tasya puṇyaphalaṃ śṛṇu // SU_6.245

yāvad anyo'nyasaṃbandhās tasyāṃśāḥ parikīrtitāḥ 
varṣalakṣaṃ sa tāvac ca śivaloke pramodate // SU_6.246

naṣṭāpahṛtam anviṣya punar vittaṃ nivedayet 
śivātmakaṃ śivāyaiva tasya puṇyaphalaṃ śṛṇu // SU_6.247

yāvac chivāya tadvittaṃ prāṅ nivedya phalaṃ smṛtam 
naṣṭam ānīya tad bhūyaḥ puṇyaṃ śataguṇaṃ labhet // SU_6.248

devadravyaṃ hṛtaṃ naṣṭam anveṣyam api yatnataḥ 
na prāpnoti tadā tasya prāpnuyād dviguṇaṃ phalam // SU_6.249

tāmrakumbhakaṭāhādyaṃ yaḥ śivāya nivedayet 
śivātmakaṃ śivāyaiva tasya puṇyaphalaṃ śṛṇu // SU_6.250

yāvac chivāya tad vittaṃ prāṅ nivedya phalaṃ smṛtam 
naṣṭam ānīya tad bhūyaḥ puṇyaṃ śataguṇaṃ labhet // SU_6.251

snānasattropabhogāya tasya puṇyaphalaṃ śṛṇu 
yāvat tatphalasaṃkhyānaṃ tāmropakaraṇe sthitam // SU_6.252

pale pale varṣakoṭiṃ modate sa śive pure 
yaḥ pattrapuṣpavastūnāṃ dadyād ādhārabhājanam // SU_6.253

tadvastudātur yat puṇyaṃ tat puṇyaṃ sakalaṃ bhavet 
dattvopakaraṇaṃ kiṃcid api yo vittam arthinām // SU_6.254

yad vastu kurute tena tatpradānaphalaṃ labhet 
yaḥ śaucapītavastrāṇi kṣārādyaiḥ śivayoginām // SU_6.255

sa pāpamalanirmuktaḥ śivalokam avāpnuyāt 
yaḥ puṣpapaṭṭasaṃyuktaṃ paṭagarbhaṃ ca kambalam // SU_6.256

pradadyāc chivayogibhyas tasya puṇyaphalaṃ śṛṇu 
teṣāṃ ca vastratantūnāṃ yāvatsaṃkhyā vidhīyate // SU_6.257

tāvadvarṣasahasrāṇi bhogān bhuṅkte śive pure 
ślakṣṇavastrāṇi śuklāni dadyād yaḥ śivayogine // SU_6.258

citravastrāṇi tadbhaktyā tasya puṇyaphalaṃ śṛṇu 
yāvat tatsūkṣmavastrāṇāṃ tantusaṃkhyā vidhīyate // SU_6.259

tāvadyugāni saṃbhogaiḥ śivaloke mahīyate 
śaṅkhapātraṃ tu vistīrṇaṃ bhāṇḍaṃ vāpi suśobhanam // SU_6.260

pradadyāc chivayogibhyas tasya puṇyaphalaṃ śṛṇu 
divyaṃ vimānam ārūḍhaḥ sarvakāmasamanvitam // SU_6.261

kalpakoṭyayutaṃ sāgraṃ śivaloke mahīyate 
śuktyādīni ca pātrāṇi śobhanāny amalāni ca // SU_6.262

nivedya śivayogibhyaḥ śaṅkhārdhena phalaṃ labhet 
sphāṭikānāṃ ca pātrāṇāṃ śaṅkhatulyaphalaṃ smṛtam // SU_6.263

śailajānāṃ tadardhena pātrāṇāṃ ca tadardhakam 
tālakharjūrapātrāṇāṃ vaṃśajānāṃ nivedane // SU_6.264

anyeṣām evam ādīnāṃ puṇyaṃ vārkṣyārdhasaṃmitam 
vaṃśajārdhasamaṃ puṇyaṃ phalapātranivedane // SU_6.265

nānāparṇapuṭāṇāṃ ca sārāṇāṃ vā phalārdhakam 
yas tāmrakāṃsyapātrāṇi śovhanāny amalāni ca // SU_6.266

snānabhojanapānārthaṃ dadyād yaḥ śivayogine 
tāmrāṃ kāṃsīṃ trilohīṃ vā yaḥ pradadyāt tripādikām // SU_6.267

bhojane bhojanādhāraṃ gurave tatphalaṃ śṛṇu 
yāvat tatpalasaṃkhyānaṃ tripādyā bhojaneṣu ca // SU_6.268

tāvadyugasahasrāṇi bhogān bhuṅkte śive pure 
lohaṃ tripādikaṃ dattvā satkṛtvā śivayogine // SU_6.269

daśakalpān mahābhogair naraḥ śivapure vaset 
yaḥ pradadyāt triviṣṭambhaṃ bhikṣāpātrasamāśrayam // SU_6.270

vaṃśajaṃ dārujaṃ vāpi tasya puṇyaphalaṃ śṛṇu 
divyastrībhogasaṃpanno vimāne mahati sthitaḥ // SU_6.271

caturyugasahasraṃ tu bhogān bhuṅkte śive pure 
bhikṣāpātramukhācchādam vastraparṇādikalpitam // SU_6.272

dattvā śivapure bhogān kalpam ekaṃ vasen naraḥ 
saṃśrayaṃ yaḥ pradadyāc ca bhikṣāpātre kamaṇḍalau // SU_6.273

kalpitaṃ vastrasūtrādyais tasya puṇyaphalaṃ śṛṇu 
tadvastrapūtatantūnāṃ saṃkhyā yāvad vidhīyate // SU_6.274

tāvadvarṣasahasrāṇi rudraloke mahīyate 
sūtravalkalavālair vā śikyabhāṇḍasamāśrayam // SU_6.275

yaḥ kṛtvā dāmanīyoktraṃ pragrahaṃ rajjum eva vā 
evam ādīni cānyāni vastūni vinivedayet // SU_6.276

śivagoṣṭhopayogārthaṃ tasya puṇyaphalaṃ śṛṇu 
yāvat tadrajjusaṃkhyānaṃ pradadyāc chivagokule // SU_6.277

tāvac caturyugaṃ dehī śivaloke mahīyate 
yathā yathā priyaṃ vastraṃ śobhanaṃ ca yathā yathā // SU_6.278

tathā tathā mahāpuṇyaṃ taddānād uttarottaram 
yaḥ panthānaṃ diśet pṛṣṭaṃ praṇaṣṭaṃ ca gavādikaṃ // SU_6.279

sa godānasamaṃ puṇyaṃ prajñāsaukhyaṃ ca vindati 
kṛtvopakāram ārtānāṃ svargaṃ yāti na saṃśayaḥ // SU_6.280

api kaṇṭakam uddhṛtya kimutānyaṃ mahāguṇam(?) 
annapānauṣadhīnāṃ ca yaḥ pradātāram uddiśet // SU_6.281

ārtānāṃ tasya vijñeyaṃ dātus tatsadṛśaṃ phalam 
śivāya tasya saṃruddhaṃ karma tiṣṭhati yad vinā // SU_6.282

tad alpam api yajñāṅgaṃ dattvā yajñaphalaṃ labhet 
api kāśakuśaṃ sūtraṃ gomayaṃ samidindhanam // SU_6.283

śivayajñopayogārthaṃ pravakṣyāmi samāsataḥ 
sarveṣāṃ śivabhaktānāṃ dadyād yat kiṃcid ādarāt 
dattvā yajñaphalaṃ vidyāt kimu tadvastudānataḥ // SU_6.284

// iti śivopaniṣadi phalopakaraṇapradānādhyāyaḥ ṣaṣṭhaḥ //

atha svargāpavargārthe pravakṣyāmi samāsataḥ 
sarveṣāṃ śivabhaktānāṃ śivācāram anuttamam // SU_7.1

śivaḥ śivāya bhūtānāṃ yasmād dānaṃ prayacchati 
gurumūrtiḥ sthitas tasmāt pūjayet satataṃ gurum // SU_7.2

nālakṣaṇe yathā liṅge sāṃnidhyaṃ kalpayec chivaḥ 
alpāgame gurau tadvat sāṃnidhyaṃ na prakalpayet // SU_7.3

śivajñānārthatattvajñaḥ prasannamanasaṃ gurum 
śivaḥ śivaṃ samāsthāya jñānaṃ vakti na hītaraḥ // SU_7.4

guruṃ ca śivavad bhaktyā namaskāreṇa pūjayet 
kṛtāñjalis trisaṃdhyaṃ ca bhūmivinyastamastakaḥ // SU_7.5

na viviktam anācāntam(?) caṅkramantaṃ tathākulam 
samādhisthaṃ vrajantaṃ ca namaskuryād guruṃ budhaḥ // SU_7.6

vyākhyāne tatsamāptau ca saṃpraśne snānabhojane 
bhuktvā ca śayane svapne namaskuryāt sadā gurum // SU_7.7

grāmāntaram abhiprepsur guroḥ kuryāt pradakṣiṇam 
sārvāṅgikapraṇāmaṃ ca punaḥ kuryāt tadāgataḥ // SU_7.8

parvotsaveṣu sarveṣu dadyād gandhapavitrakam 
śivajñānasya cārambhe pravāsagamanāgatau // SU_7.9

śivadharmavratārambhe tatsamāptau ca kalpayet 
prasādanāya kupito vijitya ca ripuṃ tathā // SU_7.10

puṇyāhe grahaśāntau ca dīkṣāyāṃ ca sadakṣiṇam 
āvārya padasaṃprāptau pavitre copavigrahe // SU_7.11

upānacchattraśayanaṃ vastram āsanabhūṣaṇam 
pātradaṇḍākṣasūtraṃ vā gurusaktaṃ na dhārayet // SU_7.12

hāsyaniṣṭhīvanāsphoṭam uccabhāṣyavijṛmbhaṇam 
pādaprasāraṇaṃ gatiṃ na kuryād gurusaṃnidhau // SU_7.13

hīnānnapānavastraḥ syān nīcaśayyāsano guroḥ 
na yatheṣṭaś ca saṃtiṣṭhet kalahaṃ ca vivarjayet // SU_7.14

prativāte 'nuvāte vā na tiṣṭhed guruṇā saha 
asaṃśraye ca satataṃ na kiṃcit kīrtayed guroḥ // SU_7.15

anyāsakto na bhuñjāno na tiṣṭhann aparāṅmukhaḥ 
na śayano na cāsīnaḥ saṃbhāsyed guruṇā saha // SU_7.16

dṛṣṭvaiva gurum āyāntam uttiṣṭhed dūratas tvaram 
anujñātaś ca guruṇā saṃviśec cānupṛṣṭhataḥ // SU_7.17

na kaṇṭhaṃ prāvṛtaṃ kuryān na ca tatrāvasaktikām 
na pādadhāvanasnānaṃ yatra paśyed guruḥ sthitaḥ // SU_7.18

na dantadhāvanābhyaṅgam āyāmodvartanakriyāḥ 
utsargaparidhānaṃ ca guroḥ kurvīta paśyataḥ // SU_7.19

gurur yad arpayet kiṃcid gṛhāsannaṃ tadañjalau 
pātre vā purataḥ śiṣyas tad vaktram abhivīkṣayan // SU_7.20

yad arpayed guruḥ kiṃci tan namraḥ purataḥ sthitaḥ 
pāṇidvayena gṛhṇīyat sthāpayet tac ca susthitam // SU_7.21

na guroḥ kīrtayen nāma paro'kṣam api kevalam 
samānasaṃjñam anyaṃ vā nāhvayīta tadākhyayā // SU_7.22

svagurus tadguruś caiva yadi syātāṃ samaṃ kvacit 
guror gurus tayoḥ pūjyaḥ svaguruś ca tadājñayā // SU_7.23

anivedya na bhuñjīta bhuktvā cāsya nivedayet 
nāvijñāpya guruṃ gacched bahiḥ kāryeṇa kenacit // SU_7.24

gurvājñayā karma kṛtvā tatsamāptau nivedayet 
kṛtvā ca naityakaṃ sarvam adhīyītājñayā guroḥ // SU_7.25

mṛdbhasmagomayajalaṃ pattrapuṣpendhanaṃ samit 
paryāptam aṣṭakaṃ hy etad gurvarthaṃ tu samāharet // SU_7.26

bhaiṣajyāhārapātrāṇi vastraśayyāsanaṃ guroḥ 
ānayet sarvayatnena prārthayitvā dhaneśvarān // SU_7.27

guror na khaṇḍayed ājñām api prāṇān parityajet 
kṛtvājñāṃ prāpnuyān muktiṃ laṅghayan narakaṃ vrajet // SU_7.28

paryaṭet pṛthivīṃ kṛtsnāṃ saśailavanakānanām 
gurubhaiṣajyasiddhyartham api gacched rasātalam // SU_7.29

yad ādiśed guruḥ kiṃcit tat kuryād avicārataḥ 
amīmāṃsyā hi guravaḥ sarvakāryeṣu sarvathā // SU_7.30

notthāpayet sukhāsīnaṃ śayānaṃ na prabodhayet 
āsīno gurum āsīnam abhigacchet pratiṣṭhitam // SU_7.31

pathi prayāntaṃ yāntaṃ ca yatnād viśramayed gurum 
kṣitpipāsāturaṃ snātaṃ jñātvā śaktaṃ ca bhojayet // SU_7.32

abhyaṅgodvartanaṃ snānaṃ bhojanaṣṭhīvamārjanam 
gātrasaṃvāhanaṃ rātrau pādābhyaṅgaṃ ca yatnataḥ // SU_7.33

prātaḥ prasādhanaṃ dattvā kāryaṃ saṃmārjanāñjanam 
nānāpuṣpaprakaraṇaṃ śrīmadvyākhyānamaṇḍape // SU_7.34

sthāpyāsanaṃ guroḥ pūjyaṃ śivajñānasya pustakam 
tatra tiṣṭhet pratīkṣaṃs tad guror āgamanaṃ kramāt // SU_7.35

guror nindāpavādaṃ ca śrutvā karṇau pidhāpayet 
anyatra caiva sarpet tu nigṛhṇīyād upāyataḥ // SU_7.36

na guror apriyaṃ kuryāt pīḍitas tārito 'pi vā 
noccārayec ca tadvākyam uccārya narakaṃ vrajet // SU_7.37

gurur eva pitā mātā gurur eva paraḥ śivaḥ 
yasyaiva niścito bhāvas tasya muktir na dūrataḥ // SU_7.38

āhārācāradharmāṇāṃ yat kuryād gurur īśvaraḥ 
tathaiva cānukurvīta nānuyuñjīta kāraṇam // SU_7.39

yajñas tapāṃsi niyamāt tāni vai vividhāni ca 
guruvākye tu sarvāṇi saṃpadyante na saṃśayaḥ // SU_7.40

ajñānapaṅkanirmagnaṃ yaḥ samuddharate janam 
śivajñānātmahastena kas taṃ na pratipūjayet // SU_7.41

iti yaḥ pūjayen nityaṃ gurumūrtistham īśvaram 
sarvapāpavinirmuktaḥ prāpnoti paramaṃ padam // SU_7.42

snātvāmbhasā bhasmanā vā śuklavastropavītavān 
dūrvāgarbhasthitaṃ puṣpaṃ guruḥ śirasi dhārayet // SU_7.43

rocanālabhanaṃ kuryād dhūyayed ātmanas tanum 
aṅgulīyākṣasūtraṃ ca karṇamātre ca dhārayet // SU_7.44

gurur evaṃvidhaḥ śrīmān nityaṃ tiṣṭhet samāhitaḥ 
yasmāj jñānopadeśārthaṃ gurur āste sadāśivaḥ // SU_7.45

dhārayet pāduke nityaṃ mṛduvarmaprakalpite 
pragṛhya daṇḍaṃ chattraṃ vā paryaṭed āśramād bahiḥ // SU_7.46

na bhūmau vinyaset pādam antardhānaṃ vinā guruḥ 
kuśapādakam ākramya tarpaṇārthaṃ prakalpayet // SU_7.47

pādasthānāni pattrādyaiḥ kṛtvā devagṛhaṃ viśet 
pātrāstaritapādaś ca(?) nityaṃ bhuñjīta vāgyataḥ // SU_7.48

na pādau dhāvayet kāṃsye lohe vā parikalpite 
śaucayet tṛṇagarbhāyāṃ dvitīyāyāṃ tathācamet // SU_7.49

na raktam ulbaṇaṃ vastraṃ dhārayet kusumāni ca 
na bahir gandhamālyāni vāsāṃsi malināni ca // SU_7.50

keśāsthīni kapālāni kārpāsāsthituṣāṇi ca 
amedhyāṅgārabhasmāni nādhitiṣṭhed rajāṃsi ca // SU_7.51

na ca loṣṭaṃ vimṛdnīyān na ca chindyān nakhais tṛṇam 
na pattrapuṣpamūlyāni vaṃśamaṅgalakāṣṭhitām // SU_7.52

evam ādīni cānyāni pāṇibhyāṃ na ca mardayet 
na dantakhādanaṃ kuryād romāṇy utpāṭayen na ca // SU_7.53

na padbhyām ullikhed bhūmiṃ loṣṭakāṣṭhaiḥ kareṇa vā 
na nakhāṃś ca nakhair vidhyān na kaṇḍūyen nakhais tanum // SU_7.54

muhurmuhuḥ śiraḥ śmaśru na spṛśet karajair budhaḥ 
na likṣākarṣaṇaṃ kuryād ātmano vā parasya vā // SU_7.55

sauvarṇyaraupyatāmraiś ca śṛṅgadantaśalākayā 
dehakaṇḍūyanaṃ kāryaṃ vaṃśakāṣṭhīkavīraṇaiḥ(?) // SU_7.56

na vicittaṃ prakurvīta diśaś caivāvalokayan 
na śokārtaś ca saṃtiṣṭhed dhūtvā pāṇau kapolakam // SU_7.57

na pāṇipādavākcakṣuḥśrotraśiśnagudodaraiḥ 
cāpalāni na kurvīta sa sarvārtham avāpnuyāt // SU_7.58

na kuryāt kenacid vairam adhruve jīvite sati 
lokakautūhalaṃ pāpaṃ saṃdhyāṃ ca parivarjayet // SU_7.59

na kudvāreṇa veśmāni nagaraṃ grāmam āviśet 
na divā prāvṛtaśirā rātrau prāvṛtya paryaṭet // SU_7.60

nātibhramaṇaśīlaḥ syān na viśec ca gṛhād gṛham 
na cājñānam adhīyīta śivajñānaṃ samabhyaset // SU_7.61

śivajñānaṃ paraṃ brahma tad ārabhya na saṃtyajet 
brahmāsādhya ca yo gacched brahmahā sa prakīrtitaḥ // SU_7.62

kṛtāñjaliḥ sthitaḥ śiṣyo laghuvastram udaṅmukhaḥ 
śivamantraṃ samuccārya prāṅmukho 'dhyāpayed guruḥ // SU_7.63

nāgadantādisaṃbhūtaṃ caturaśraṃ suśobhanam 
hemaratnacitaṃ vāpi guror āsanam uttamam // SU_7.64

na śuśrūṣārthakāmāś ca na ca dharmaḥ pradṛśyate 
na bhaktir na yaśaḥ krauryaṃ na tam adhyāpayed guruḥ // SU_7.65

devāgnigurugoṣṭhīṣu vyākhyādhyayanasaṃsadi 
praśne vāde 'nṛte 'śauce dakṣiṇaṃ bāhum uddharet // SU_7.66

vaśe satatanamraḥ syāt saṃhṛtyāṅgāni kūrmavat 
tatsaṃmukhaṃ ca nirgacchen namaskārapurassaraḥ // SU_7.67

devāgniguruviprāṇāṃ na vrajed antareṇa tu 
nārpayen na ca gṛhṇīyāt kiṃcid vastu tadantarā // SU_7.68

na mukhena dhamed agniṃ nādhaḥkuryān na laṅghayet 
na kṣiped aśuciṃ vahnau na ca pādau pratāpayet // SU_7.69

tṛṇakāṣṭhādigahane jantubhiś ca samākule 
sthāne na dīpayed agniṃ dīptaṃ cāpi tataḥ kṣipet // SU_7.70

agniṃ yugapad ānīya dhārayeta prayatnataḥ 
jvalantaṃ na pradīpaṃ ca svayaṃ nirvāpayed budhaḥ // SU_7.71

śivavratadharaṃ dṛṣṭvā samutthāya sadā drutam 
śivo 'yam iti saṃkalpya harṣitaḥ praṇamet tataḥ // SU_7.72

bhogān dadāti vipulān liṅge saṃpūjitaḥ śivaḥ 
agnau ca vividhāṃ siddhiṃ gurau muktiṃ prayacchati // SU_7.73

mokṣārthaṃ pūjayet tasmād gurumūrtistham īśvaram 
gurubhaktyā labhej jñānaṃ jñānān muktim avāpnuyāt // SU_7.74

sarvaparvasu yatnena hy eṣu saṃpūjayec chivam 
kuryād āyatane śobhāṃ gurusthāneṣu sarvataḥ // SU_7.75

naradvayocchrite pīṭhe sarvaśobhāsamanvite 
saṃsthāpya maṇijaṃ liṅgaṃ sthāne kuryāj jagaddhitam // SU_7.76

annapānaviśeṣaiś ca naivedyam upakalpayet 
bhojayed vratinaś cātra svaguruṃ ca viśeṣataḥ // SU_7.77

pūjayec ca śivajñānaṃ vācayīta ca parvasu 
darśayec chivabhaktebhyaḥ satpūjāṃ parikalpitām // SU_7.78

priyaṃ brūyāt sadā tebhyaḥ pradeyaṃ cāpi śaktitaḥ 
evaṃ kṛte viśeṣeṇa prasīdati maheśvaraḥ // SU_7.79

chinnaṃ bhinnaṃ mṛtaṃ naṣṭaṃ vardhate nāsti kevalam 
ity ādyān na vadec chabdān sākṣād brūyāt tu maṅgalam // SU_7.80

adhenuṃ dhenum ity eva brūyād bhadram abhadrakam 
kapālaṃ ca bhagālaṃ syāt paramaṃ maṅgalaṃ vadet // SU_7.81

aindraṃ dhanur maṇidhanur dāhakāṣṭhādi candanam 
svaryātaṃ ca mṛtaṃ brūyāc chivībhūtaṃ ca yoginam // SU_7.82

dvidhābhūtaṃ vadec chinnaṃ bhinnaṃ ca bahudhā sthitam 
naṣṭam anveṣaṇīyaṃ ca riktaṃ pūrṇābhivardhitam // SU_7.83

nāstīti śobhanaṃ sarvam ādyam aṅgābhivardhanam 
siddhimad brūhi gacchantaṃ suptaṃ brūyāt pravardhitam // SU_7.84

na mlecchamūrkhapatitaiḥ krūraiḥ saṃtāpavedibhiḥ 
durjanair avaliptaiś ca kṣudraiḥ saha na saṃvadet // SU_7.85

nādhārmikanṛpākrānte na daṃśamaśakāvṛte 
nātiśītajalākīrṇe deśe rogaprade vaset // SU_7.86

nāsanaṃ śayanaṃ pānaṃ namaskārābhivādanam 
sopānatkaḥ prakurvīta śivapustakavācanam // SU_7.87

ācāryaṃ daivataṃ tīrtham uddhūtodaṃ mṛdaṃ dadhi 
vaṭam aśvatthakapilāṃ dīkṣitodadhisaṃgamam // SU_7.88

yāni caiṣāṃ prakārāṇi maṅgalānīha kānicit 
śivāyeti namaskṛtvā proktam etat pradakṣiṇam // SU_7.89

upānacchattravastrāṇi pavitraṃ karakaṃ srajam 
āsanaṃ śayanaṃ pānaṃ dhṛtam anyair na dhārayet // SU_7.90

pālāśam āsanaṃ śayyāṃ pāduke dantadhāvanam 
varjayec cāpi niryāsaṃ raktaṃ na tu samudbhavam // SU_7.91

saṃdhyām upāsya kurvīta nityaṃ dehaprasādhanam 
spṛśed vandec ca kapilāṃ pradadyāc ca gavāṃ hitam // SU_7.92

yaḥ pradadyād gavāṃ samyak phalāni ca viśeṣataḥ 
kṣetram uddāmayec cāpi tasya puṇyaphalaṃ śṛṇu // SU_7.93

yāvat tatpattrakusumakandamūlaphalāni ca 
tāvadvarṣasahasrāṇi śivaloke mahīyate // SU_7.94

kṛśarogārtavṛddhānāṃ tyaktānāṃ nirjane vane 
kṣutpipāsāturāṇāṃ ca gavāṃ vihvalacetasām // SU_7.95

nītvā yas tṛṇatoyāni vane yatnāt prayacchati 
karoti ca paritrāṇaṃ tasya puṇyaphalaṃ śṛṇu // SU_7.96

kulaikaviṃśakopetaḥ patnīputrādisaṃyutaḥ 
mitrabhṛtyair upetaś ca śrīmacchivapuraṃ vrajet // SU_7.97

tatra bhuktvā mahābhogān vimānaiḥ sārvakāmikaiḥ 
sa mahāpralayaṃ yāvat tadante muktim āpnuyāt // SU_7.98

gobrāhmaṇaparitrāṇaṃ sakṛt kṛtvā prayatnataḥ 
mucyate pañcabhir ghorair mahadbhiḥ pātakair drutam // SU_7.99

ahiṃsā satyam asteyaṃ brahmacaryam akalkatā 
akrodho guruśuśrūṣā śaucaṃ saṃtoṣam ārjavam // SU_7.100

ahiṃsādyā yamāḥ pañca yatīnāṃ parikīrtitāḥ 
akrodhādyāś ca niyamāḥ siddhivṛddhikarāḥ smṛtāḥ // SU_7.101

daśalākṣaṇiko dharmaḥ śivācāraḥ prakīrtitaḥ 
yogīndrāṇāṃ viśeṣeṇa śivayogaprasiddhaye // SU_7.102

na vindati naro yogaṃ putradārādisaṃgataḥ 
nibaddhaḥ snehapāśena mohastambhabalīyasā // SU_7.103

mohāt kuṭumbasaṃsaktas tṛṣṇayā śṛṅkhalīkṛtaḥ 
bālair baddhas tu loko 'yaṃ musalenābhihanyate // SU_7.104

ime bālāḥ kathaṃ tyājyā jīviṣyanti mayā vinā 
mohād dhi cintayaty evaṃ paramārthau na paśyati // SU_7.105

saṃparkād udare nyastaḥ śukrabindur acetanaḥ 
sa pitrā kena yatnena garbhasthaḥ paripālitaḥ // SU_7.106

karkaśāḥ kaṭhinā bhakṣā jīryante yatra bhakṣitāḥ 
tasminn evodare śukraṃ kiṃ na jīryati bhakṣyavat // SU_7.107

yenaitad yojitaṃ garbhe yena caiva vivardhitam 
tenaiva nirgatṃ bhūyaḥ karmaṇā svena pālyate // SU_7.108

na kaścit kasyacit putraḥ pitā mātā na kasyacit 
yat svayaṃ prāktanaṃ karma pitā māteti tat smṛtam // SU_7.109

yena yatra kṛtaṃ karma sa tatraiva prajāyate 
pitarau cāsya dāsatvaṃ kurutas tatpracoditau // SU_7.110

na kaścit kasyacic chaktaḥ kartuṃ duḥkhaṃ sukhāni ca 
karoti prāktanaṃ karma mohāl lokasya kevalam // SU_7.111

karmadāyādasaṃbandhād upakāraḥ parasparam 
dṛśyate nāpakāraś ca mohenātmani manyate // SU_7.112

īśvarādhiṣṭhitaṃ karma phalatīha śubhāśubham 
grāmasvāmiprasādena sukṛtaṃ karṣaṇaṃ yathā // SU_7.113

dvayaṃ devatvamokṣāya mameti na mameti ca 
mameti badhyate jantur na mameti vimucyate // SU_7.114

dvyakṣaraṃ ca bhaven mṛtyus tryakṣaraṃ brahma śāśvatam 
mameti dvyakṣaraṃ mṛtyus tryakṣaraṃ na mameti ca // SU_7.115

tasmād ātmany ahaṃkāram utsṛjya pravicārataḥ 
vidhūyāśeṣasaṅgāṃś ca mokṣopāyaṃ vicintayet // SU_7.116

jñānād yogaparikleśaṃ kuprāvaraṇabhojanam 
kucaryāṃ kunivāsaṃ ca mokṣārthī na vicintayet // SU_7.117

na duḥkhena vinā saukhyaṃ dṛśyate sarvadehinām 
duḥkhaṃ tanmātrakaṃ jñeyaṃ sukham ānantyam uttamam // SU_7.118

sevāyāṃ pāśupālye ca vānijye kṛṣikarmaṇi 
tulye sati parikleśe varaṃ kleśo vimuktaye // SU_7.119

svargāpavargayor ekaṃ yaḥ śīghraṃ na prasādhayet 
yāti tenaiva dehena sa mṛtas tapyate ciram // SU_7.120

yad avaśyaṃ parādhīnais tyajanīyaṃ śarīrakam 
kasmāt tena vimūḍhātmā na sādhayati śāśvatam // SU_7.121

yauvanasthā gṛhasthāś ca prāsādasthāś ca ye nṛpāḥ 
sarva eva viśīryante śuṣkasnigdhānnabhojanāḥ // SU_7.122

anekadoṣaduṣṭasya dehasyaiko mahān guṇah 
yāṃ yām avasthām āpnoti tāṃ tām evānuvartate // SU_7.123

mandaṃ pariharan karma svadeham anupālayet 
varṣāsu jīrṇakaṭavat tiṣṭhann apy avasīdati // SU_7.124

na te 'tra dehinaḥ santi ye tiṣṭhanti suniścalāḥ 
sarve kurvanti karmāṇi vikṛśāḥ pūrvakarmabhiḥ // SU_7.125

tulye saty api kartavye varaṃ karma kṛtaṃ param 
yaḥ kṛtvā na punaḥ kuryān nānākarma śubhāśubham // SU_7.126

tasmād antarbahiścintām anekākārasaṃsthitām 
saṃtyajyātmahitārthāya svādhyāyadhyānam abhyaset // SU_7.127

vivikte vijane ramye puṣpāśramavibhūṣite 
sthānaṃ kṛtvā śivasthāne dhyāyec chāntaṃ paraṃ śivam // SU_7.128

ye 'tiramyāṇy araṇyāni sujalāni śivāni tu 
vihāyābhiratā grāme prāyas te daivamohitāḥ // SU_7.129

vivekinaḥ praśāntasya yat sukhaṃ dhyāyataḥ śivam 
na tat sukhaṃ mahendrasya brahmaṇaḥ keśavasya vā // SU_7.130

iti nāmāmṛtaṃ divyaṃ mahākālād avāptavān 
vistareṇānupūrvāc ca ṛṣyātreyaḥ(?) suniścitam // SU_7.131

prajñām athā vinirmathya(?) śivajñānamahodadhim 
ṛṣyātreyaḥ samuddhṛtya prāhedam aṇumātrakam // SU_7.132

śivadharme mahāśāstre śivadharmasya cottare 
yad anuktaṃ bhavet kiṃcit tad atra parikīrtitam // SU_7.133

tridaivatyam idaṃ śāstraṃ munīndrātreyabhāṣitam 
tiryaṅmanujadevānāṃ sarveṣāṃ ca vimuktidam // SU_7.134

nandiskandamahākālās trayo devāḥ prakīrtitāḥ 
candrātreyas tathātriś ca ṛṣy ātreyo munitrayam // SU_7.135

etair mahātmabiḥ proktāḥ śivadharmāḥ samāsataḥ 
sarvalokopakārārthaṃ namas tebhyaḥ sadā namaḥ // SU_7.136

teṣāṃ śiṣyapraśiṣyaiś ca śivadharmapravaktṛbhiḥ 
vyāptaṃ jñānasaraḥ śārvaṃ vikacair iva paṅkajaiḥ // SU_7.137

ye śrāvayanti satataṃ śivadharmaṃ śivārthinām 
te rudrās te munīndrāś ca te namasyāḥ svabhaktitaḥ // SU_7.138

ye samutthāya śṛṇvanti śivadharmaṃ dine dine 
te rudrā rudralokeśā na te prakṛtimānuṣāḥ // SU_7.139

śivopaniṣadaṃ hy etad adhyāyaiḥ saptabhiḥ smṛtam 
ṛṣyātreyasagotreṇa muninā hitakāmyayā // SU_7.140

// iti śivopaniṣadi śivācārādhyāyaḥ saptamaḥ //

// iti śivopaniṣat samāptā //