• GRETIL
• 1_sanskr
• tei
• transformations
• plaintext
• sa_vINAzikhatantra

          Vīṇāśikhatantra


# Header

  This file is a plain text transformation of http://gretil.sub.uni-goettingen.de/gretil/corpustei/sa_vINAzikhatantra.xml
  with a rudimentary header. For a more extensive header please refer to the source file.

## Data entry: Somadeva Vasudeva
## Contribution: Somadeva Vasudeva
## Date of this version: 2020-07-31

## Source: 
   - T. Goudriaan, Delhi 1985.

## Publisher: Göttingen Register of Electronic Texts in Indian Languages (GRETIL), SUB Göttingen

## Licence:
   This e-text was provided to GRETIL in good faith that no copyright rights have been infringed. If anyone wishes to assert copyright over this file, please contact the GRETIL management at gretil(at)sub(dot)uni-goettingen(dot)de. The file will be immediately removed pending resolution of the claim.
   Distributed under a Creative Commons Attribution-NonCommercial-ShareAlike 4.0 International License.

## Structure of references:
   A reference is assembled consisting of
   - a pragmatic abbreviation of the title: Vīṇāśikhatantra = VT,
   - the number of the  in arabic numerals,
   - the number of the verse in arabic numerals.

## Notes:
   This file has been created by mass conversion of GRETIL's Sanskrit corpus from vinst_au.htm. Due to the heterogeneity of the sources the header markup might be suboptimal. For the sake of transparency the header of the legacy file is documented in the note element below:

   
	 Vinasikhatantra
Based on the edition by T. Goudriaan, Delhi 1985.
Input by Somadeva Vasudeva
TEXT WITH PADA MARKERS:
For a four-pada verse:
........ $ ........ &
........ % ........ //
For a six-pada verse:
	


## Revisions:
   - 2020-07-31: TEI encoding by mass conversion of GRETIL's Sanskrit corpus


# Text


vīṇāśikhatantra

oṃ namo mahābhairavāya

kailāsaśikhare ramye nānāratnopaśobhite 
nānādrumalatākīrṇe siddhacāraṇasevite // VT_1

tatra devaḥ suraśreṣṭhaḥ krīḍate umayā saha 
stūyamāno mahāsiddhair mahākālādibhir gaṇaiḥ // VT_2

ṛṣibhiś ca mahābhāgair bhṛgvādyaiḥ surasattamaiḥ 
teṣāṃ madhye samutthāya devī vacanam abravīt // VT_3

śrutaṃ sammohanaṃ tantraṃ tathā nayottaraṃ mahat 
śiraśchedaṃ ca deveśa tvatprasādāt sudurlabham // VT_4

vratasādhyāni caitāni yāgasādhyāni vai punaḥ 
anyasārā yato loke prāyo draviṇavarjitāḥ // VT_5

ebhyo 'pi cottaraṃ yasmāt kevalaṃ jñānasiddhidam 
sarvakāmapradaṃ deva yathāvad bījapañcakaṃ // VT_6

uttaraṃ hṛdayaṃ hy eṣāṃ bhaktāya dātum arhasi // VT_7

yan na kasyacid ākhyātaṃ śukrādīnāṃ ca yoginām 
subhaktasya vinītasya gopitaṃ vai guhasya ca // VT_8

catuḥṣaṣṭiḥ samākhyātāḥ śiṣyās tantreṣu ye mayā 
teṣām api na cākhyātaṃ brahmaviṣṇupuraḥsaraiḥ // VT_9

tad ahaṃ sampravakṣyāmi cintāratnam ivāparam 
tantraṃ vīṇāśikhaṃ nāma nirvyājenāśusiddhidam // VT_10

devītumburusaṃyuktaṃ vīṇādhārasusaṃsthitam 
śikhāyogena iṣyante tena vīṇāśikhā smṛtā // VT_11

yāgam ādau pravakṣyāmi tantrasāraṃ sudurlabham 
tenaiva varadā devyo nityaṃ devi bhavanti hi // VT_12

gṛhayāgam idaṃ devi yo jānātīha sādhakaḥ 
vratahomād ṛte cāsmin susiddhiṃ labhate param // VT_13

śiṣyāṇām āditaḥ kuryād yāgaṃ kṛtvā parigraham 
nānyathā darśayet tantraṃ na cāsau siddhim āpnuyāt // VT_14

caturthyām atha pañcamyāṃ navamyām ekādaśīṣu ca 
grahaṇe vāpi kartavyā sarvadā cārkasomayoḥ // VT_15

caturthyāṃ yajanaṃ śreṣṭhaṃ saubhāgyakaraṇaṃ mahat 
śrīkāmo yajanaṃ kuryāt pañcamyāṃ susamāhitaḥ // VT_16

saṃgrāme vijayārthī vā pararāṣṭravimardanam 
navamyāṃ pārthivaṃ yāgaṃ kurvīta bhaginīpriyam // VT_17

ekādaśyāṃ yajed yas tu śivaloke mahīyate 
sugupte nirjane deśe saridvāpītaṭe 'pi vā // VT_18

kṛtvādau bhūmisaṃśuddhiṃ sāvitryā deśikottamaḥ 
kṛtvā pūjāṃ prakurvīta śiṣyāṇām adhivāsanam // VT_19

carukaṃ sādhane paścāt sāvitryā dāpayed budhaḥ 
śiṣyāṇāṃ dantakāṣṭhaṃ ca sakṣīraṃdvādaśāṅgulam // VT_20

ācamya śiṣyam āhūya pañcatattvapariṣkṛtam 
sāvitryā prokṣayed bhūyas tattvajaptaṃ yathoditam // VT_21

pramārjayetkuśāgreṇa tasyāṅgāni samālabhet 
ālabhyaiva tu sāvitryā kṣālayet sakalaṃ kramāt // VT_22

yāgabhūmau svaśiṣyāṃs tu svapec ca kuśasaṃstare 
rakṣāṃ sadā śatair bījaiḥ kṛtvā dhyātvā ca tāḥ kramāt // VT_23

tataḥ prabhāte vimale mukhaṃ prakṣālya sādhakaḥ 
iṣṭāniṣṭāṃ gurau ceṣṭāṃ praṇipatya nivedayet // VT_24

iṣṭāniṣṭān viditvā tu deśikaḥ sādhakasya tu 
ādau deśe same bhūmau vivikte śalyavarjite // VT_25

maṇḍalaṃ saṃlikhet prājño yathāvad vidhipūrvakam 
caturhastaṃ caturdvāram athavā caikahastakam // VT_26

maṇḍalam saṃlikhed divyam śālicūrṇena sūjjvalam 
tatra madhye likhet padmaṃ catuḥpattraṃ sakarṇikam // VT_27

śvetāsṛ kpītakṛ ṣṇāni kamalasya dalāni tu 
prāg ārabhya yathānyāyaṃ saumyeśāntāni lekhayet // VT_28

karṇikāṃ ca tathā madhye śabalāṃ deśikottamaḥ 
caturmūrtiṃ caturvarṇaṃ svena bijena tumburum // VT_29

caturvarṇam īśvaraṃ dhyāyen niviṣṭam karṇikodare 
tataḥ sitāṃ svabījena jayāṃ prāgdale vinyaset // VT_30

bandhūkakusumaprakhyāṃ vijayāṃ dakṣiṇe dale 
svacchacāmīkaraprakhyām ajitāṃ paścime dale // VT_31

bhinnāñjanacayaprakhyām uttare cāparājitām 
vinyasya pūjāṃ kurvīta svaiḥ svair bījair yathākramam // VT_32

puṣpadhūpaiś ca balibhir yathākālāntaraiḥ śubhaiḥ 
sadvitānapatākāḍhyaṃ sragmālālaṃkṛtaṃ puram // VT_33

pradīptadīpakair dikṣu samantād avabhāsitam 
nānābhakṣyānnapānaiś ca svādubhir vyañjanais tathā // VT_34

phalair nānāvidhaiś caiva paritaḥ paryavasthitaiḥ 
kalaśair vāripūrṇaiś ca daśadikṣu vyavasthitaiḥ // VT_35

cūtapallavasaṃvītaiḥ sragmālālaṃkṛtaiḥ śubhaiḥ 
evaṃ yaṣṭvā yathānyāyaṃ śiṣyān āprokṣya vāriṇā // VT_36

sāvitryā mukham āsādya vāsasā sakalīkṛtān 
svaiḥ svair bījair nyaset puṣpān śiṣyāṇāṃ karayor dvayoḥ // VT_37

jayāt praveśayen māyāṃ maṇḍalaṃ deśikottamaḥ 
praveśya tatra śiṣyaṃ tu dvitricatuḥpañca eva vā // VT_38

tato 'gnikāryaṃ kurvīta maṇḍalāt paścime bahiḥ 
ullikhyoddhṛtya sāvitryā kuśān saṃstīrya sarvataḥ // VT_39

astrabījena cābhyukṣya gandhatoyena deśikaḥ 
vahnim ādāya tenaiva sāvitryā pūjayet tataḥ // VT_40

tatas tattvatrayaṃ nyasya vahner eva yathākramam 
niruddhamāyātasmāttam aṅkuśena nirodhayet // VT_41

māyayācchādayet paścād astreṇaiva prabodhayet 
homadravyasya sarvasya kuryāt tenaiva śodhanam // VT_42

tataś ca sarpiṣo homaṃ vidhivat kārayed budhaḥ 
svabījair eva tad dhutvā dīkṣāṃ śiṣyasya kārayet // VT_43

saṃyojya vidhivad bījair mahābhūteṣu pañcasu 
sakale tattvaṃ saṃyojya pariṣṭhāpya pare 'dhvani // VT_44

niyoktavyaṃ tatas tatra yatrāsavāṃsvaraparam? 
eṣā dīkṣā ya thānyāyaṃ bhuktimuktiphalapradā // VT_45

tair eva pañcabhis tattvaṃ sakale sakalātmikā 
niṣkale niṣkalā proktā sādhikārādhvanaḥ purā // VT_46

dīkṣayitvā tataḥ śiṣyān sādhikārapare sthitān 
abhiṣicya svabījais tu bījān tebhyaḥ pradāpayet // VT_47

nivedya samayān tasya hṛnmudrāṅgulidarśanāt 
anujñāṃ sādhakendrasya tasya dadyān mahātmanā // VT_48

tataḥ svavidyānaivedyaṃ bhakṣayet sādhakottamaḥ 
devyaḥ prītā bhavanty eva avaśiṣṭaṃ jale kṣipet // VT_49

ācāryaṃ pūjayed bhaktyā sarvasvenāpare vidhā? 
praṇāmaiḥ śaktidānaiś ca yena vā tuṣyate guruḥ // VT_50

sragvī sitoṣṇīṣī caiva sarvālaṃkārabhūṣitaḥ 
uccāsanasthaḥ prāgvaktraḥ kalpayet koṣamaṇḍale // VT_51

gośakṛdbhasmaliptas tu śucau janavivarjite 
susame bhūmideśe tu prastāraṃ prastarec chuciḥ // VT_52

caturasram ataḥ kṛtvā prastārarekham ujjvalam 
kuryād ekonapañcāśat koṣṭhakān tu samān śubhān // VT_53

śatārdhārdhāsanāsīnaṃ pañcavargāntabindukam 
śikhāsambhinnamūrdhāntaṃ kaṣākhyaṃ madhyakoṣṭhake // VT_54

vidigdikṣaṃsthakoṣṭheṣu tatpārśve bahir aṣṭasu 
yaśavargān nyased devi aiśānyādiṣu tatkramāt // VT_55

āgneyādiṣu koṣṭheṣu napuṃsakacatuṣṭayam 
aiśānyādikramād devi bījadvādaśakaṃ nyaset // VT_56

tṛtīyapaṭktikoṣṭheṣu caturthe pañcaviṃśakam 
aiśānyādiṣu koṣṭheṣu bījāni kramaśo nyaset // VT_57

prastāram evaṃ prastārya svaravarṇaṃ ca śobhane 
bījaṣoḍaśakaṃ caiva proddharet tu yathākramam // VT_58

kādipaṭktiṃ purākṛtya kramād vyastasamastakam 
koṣṭhaikādaśabījena saṃyuktaṃ pañcaviṃśakam // VT_59

ātmatattvam iti khyātaṃ vidyākhyaṃ catustriṃśakam 
śivatattvaṃ tu deveśi triṃśakoṣṭheṣu saṃyutam // VT_60

tattvatritayam etad dhi nyāsaṃ ca samudāhṛtam 
binduyuktāny aśesāṇi nyastavyāni yathākramam // VT_61

atra-siddhiḥ sthitā devi vijñeyā sādhakottamaiḥ 
pañcaviṃśatikoṣṭhasthaṃ prathamaṃ bījam ucyate // VT_62

dvisaptakoṣṭhakaṃ bījaṃ dvitīyaṃ samudāhṛtam 
tṛtīyam aṣṭakoṣṭhasthaṃ binduyoniḥ caturthakam // VT_63

caturviṃśatikoṣṭhasthaṃ pañcamaṃ bījam ucyate 
bījāni devadevīnāṃ nirṇītāni yathākramam // VT_64

kālabaddhānilair bījaiḥ kalāyatheṣṭhayā yutam 
ardhendu binduśikhayā saṃnibhāni krameṇa tu // VT_65

bījapañcakam uddhṛtya kathitaṃ devi te kramāt 
kūṭasthās tu smṛtā bījāḥ pañca caiva varānane // VT_66

bījapañcakam abhyasya sarvakāmaphalapradam 
yajanaṃ sampravakṣyāmi sarvasiddhipradāyakam // VT_67

karasaṃskāram ādau tu kṛtvānena krameṇa tu 
vakṣyamāṇena cānena digbandhaśodhyam eva hi // VT_68

saṃhārāstreṇa digbandhaḥ prāṇāyāmapuraḥsaraḥ 
prāṇāyāmais tribhir devi ātmānaṃ tu viśodhayet // VT_69

niṣkramya recayed vāyuṃ navaṃ cākṛṣya pūrayet 
nirodhe kumbhakaḥ proktaḥ prāṇāyāmaṃ prakīrtitam // VT_70

dhyātvā kālāgnibījaṃ tu yugāntānalasaprabham 
nyaset pādatale mantrī jvālāmālākulaṃ mahat // VT_71

nirdahec cātmadehaṃ tu vāriṇāplāvayet tataḥ 
dagdhvā tu prākṛtaṃdehaṃ bhasmakūṭam iva sthitam // VT_72

tataś cāmṛtadhārābhir vidyādehaṃ vicintayet 
sravantaṃ mūrdhni paramaṃ praṇavaṃ ca adhomukham // VT_73

vāruṇāmṛtasaṃyuktaṃ śuddhasphaṭikanirmalam 
kaṣākhyaṃ yat smṛtaṃ bījaṃ rephadvayasamāyutam // VT_74

adha oṃkārasaṃyuktaṃ ūrdhvaṃ bindukabhūṣitam 
anenaiva tu bījena śikhayā bhinnamastakam // VT_75

dhāraṇāyogamārgeṇa nirdahet sādhakottamaḥ 
dehaṃ saṃśodhayen mantrī ghorapāpaṃ tu kalmaṣam // VT_76

nyāsam ālabhanaṃ kuryād bhaven mantrātmavigrahaḥ 
digbandhabhūmiṃ saṃśodhya cakraśuddhyartham eva ca // VT_77

saṃhārāstreṇa kurvīta vighnoccāṭanam eva ca 
hastau saṃśodhayet paścād vidhir eṣa prakīrtitaḥ // VT_78

kṛtvā tu vidhivan mantrī tataḥ karma samārabhet 
āmaṇibandhanāt pūrvaṃ bharamākhāś ? ca vinyaset // VT_79

aṭguṣṭhādikaniṣṭhāntaṃ nyased vai bījapañcakam 
aṭguṣṭhād ye tu ye parvā karayor ubhayor api // VT_80

ātmatattvaṃ nyasenmūrdhni vidyātattvaṃ dvitīyake 
śivaṃ dadyāt tṛtīyeṣu sarvasiddhiṣu bhāmini // VT_81

adhastād ātmatattvaṃ tu vidyātattvaṃ tu madhyataḥ 
śivatattvaṃ nyasen mūrdhni haste dehe punaḥ kramāt // VT_82

evaṃ tattvatrayaṃ nyasya tathā kūṭākṣarāṇi tu 
bhūyaś cottarabījāni vinyaset tu varānane // VT_83

astraṃ caiva tu vinyasya visphuliṭgasamaprabham 
māyayācchādayitvā tu aṭkuśena nirodhayet // VT_84

yonimudrāṃ tato baddhvā kuryāt [tu] sakalāṃ tanum 
etad ālabhanaṃ caiva tava devi prakīrtitam // VT_85

aṭguṣṭhau grathitau kṛtvā karayor ubhayor api 
tarjanīṃ vāmahaste tu prasāryākuñcayed budhaḥ // VT_86

eṣā nirodhanī proktā mudreyam aṭkuśasya tu 
vaśyākarṣaṇakāryeṣu prayojyā sādhakottamaiḥ // VT_87

tarjanī madhyamā caiva anāmā dakṣiṇasya tu 
vāme trīṇi samākramya aṭguṣṭhau ca susaṃsthitau // VT_88

adhastāt sarvataḥ proktā dakṣiṇā tu kaniṣṭhikā 
tarjanyaṭguṣṭhayor madhye yonimudrā prakīrtitā // VT_89

ādyaṃ mūrdhni tato bījaṃ dvitīyaṃ mukhamaṇḍale 
kaṭyūrdhve ca tataś cānyaṃ caturthaṃ jānutaḥ kaṭim // VT_90

āpādajānunī cānyaṃ prasṛtaiś ca karaiḥ kramāt 
evaṃ bījena dehas tu mucyate nātra saṃśayaḥ // VT_91

vajropalamahāvarṣaṃ coradaṃṣṭrībhayāvaham 
mucyate ca sadā rogair mṛtyurūpair durāsadaiḥ // VT_92

ahigaraviṣaśastrajvarakuṣṭhakṣayādibhiḥ 
mucyate nātra saṃdeho yo 'pi syāt pātakī naraḥ // VT_93

upalipya śubhe deśe pracchanne janavarjite 
pūrvavad dhastamātraṃ tu likhitvā maṇḍalaṃ śubham // VT_94

catuḥpattraṃ tu tatrābjaṃ sarvavarṇitakarṇikām 
sitaraktapītakṛṣṇāṃ pūrvādidalasaṃsthitām // VT_95

jayādyaṃ vinyasen mantrī tumburuṃ karṇikopari 
padmāsanopaviṣṭaṃ tu varadānodyatakaram // VT_96

caturvaktramaṣṭabhujaṃ catuṣkāyaṃ trilocanam 
nāgayajñopavītaṃtu śūlapāṇiṃ gadādharam // VT_97

mukuṭena vicitreṇa śaśāṅkadhṛtaśekharam 
śaktīnāṃ tu priyaṃ devaṃ pāśāṅkuśakaraprabham // VT_98

divyāmbarātapatreṇa divyasragbandhalepanam 
devadevaṃ sadā dhyāyet sūryakoṭisamaprabham // VT_99

kṣīrodaphalasaṃkāśāṃ vyāghrayajñopavītinīm 
pretārūḍhāṃ caturvaktrāṃ gadākheṭakadhāriṇīm // VT_100

divyāmbarātapatreṇa hārakeyūrabhūṣitām 
devadevīṃ jayāṃ dhyāyed dīpyamānāṃ svatejasā // VT_101

devasyābhimukho mantrī sasmitotphullalocanām 
dāḍimīkusumaprakhyāṃ suragopakasaprabhām // VT_102

cāpodyatakarāṃ ghorāṃ matsyamāṃsasurāpriyām 
ulūke saṃsthitāṃ devīṃ hārakeyūrabhūṣitām // VT_103

raktāmbarātapatreṇa vijayāṃ siddhidāṃ smaret 
dhātucāmīkaraprakhyāṃ pītamālyāmbarapriyām // VT_104

ghaṇṭākhaṭvāṅgadharīṃ devīm aśvārūḍhāṃ mahābalām 
sūryāyutapratīkāśīṃ sarvābharaṇabhūṣitām // VT_105

jayantīṃ dhyāyati kṣipraṃ siddhim āpnoti puṣkalām 
bhinnāñjanasamaprakhyāṃ śarvarītimiraprabhām // VT_106

kṛṣṇakauśeyasaṃvītāṃ muktikāmaṇibhūṣitām 
divyaṃ vimānam ārūḍhāṃ gadākheṭakadhāriṇīm // VT_107

mahārāvādinirghoṣaiś cintayed aparājitām 
gāyatrīṃ vā japantīṃ ca sphāṭikamaṇibhūṣitām // VT_108

ṛgyajussāmātharvākhyaṃ gāyantīṃ vā tathaiva ca 
sāvitrīṃ divyarūpāṃ tūpaniṣadgāyane ratām // VT_109

devīnām agrasaṃsthaṃ kṛtabhṛkuṭimukhaṃ cintayed aṅkuśākhyaṃ sampṛṣṭhe cāstrarājaṃ prakaṭitasumahāsṛkvaṇīlelihānam 
saṃkruddhaṃ bhīṣayantaṃ nararudhiravasādigdhadāntākalālaṃ ....... ....... ....... // VT_110

evaṃ dhyātvā viśālākṣi tataḥ pūjā pravartate 
bhakṣyabhojyavidhānaiś ca gandhapuṣpādibhiḥ kramāt // VT_111

pūjayet kūṭamadhyasthaṃ tatra madhye vidhānataḥ 
bhūr evāyaṃ pādapadmair hṛdi vāmakare 'thavā // VT_112

manasā pūjayen nityaṃ siddhikāmaḥ samāhitaḥ 
mahāśaṅkhamayaṃ kuryād athavā kacchapasya tu // VT_113

sauvarṇaṃ rajataṃ tāmraṃ kulaṃ bhavati siddhidam 
gandhamaṇḍalake vāpi athavā bhasmamaṇḍale // VT_114

siddhārthamaṇḍale vāpi athavā hṛdi maṇḍale 
kusumbhamaṇḍale vāpi puṣpamaṇḍalake 'pi vā // VT_115

nāgakeśarajobhir vā likhitvā maṇḍalaṃ śubham 
muktidā siddhidā hy evaṃ bhavantīty avicāraṇāt // VT_116

sampūjya ca yathānyāyaṃ gandhapuṣpādi yojayet 
darśayed yonimudrāṃ tu kāle karmāṇi kārayet // VT_117

samutpanneṣu kāryeṣu prāṇadraviṇahāriṣu 
pūjitāḥ sādhakaṃ devyaḥ parirakṣanti putravat // VT_118

atrāpi yāgam evoktaṃ viśeṣaḥ ko 'paraḥ prabho 
yathā tu abhyāsamātreṇa siddhir bhavati kāmadā // VT_119

kevalaṃ smaraṇād eva tathā tvaṃ vaktum arhasi 
praṇayasva prasādaś ca yadi cāsti maheśvara // VT_120

śṛṇuṣvaikamanā bhadre prākṛtaṃ tapasaḥ phalam 
praṇayād atulaṃ vāpi rahasyaṃ paramaṃ padam // VT_121

uttarottarayogena tantraṃ te kathitaṃ mayā 
atrāntaram idaṃ jñānaṃ śrutvā bhavati nirvṛtiḥ // VT_122

prastārya pūrvavad varṇaṃ proddhared bījapañcakam 
pūrvavat kramayogena sarvakāmaprasiddhaye // VT_123

ādau dvātriṃśakaṃ bījaṃ yuktam ekonaviṃśati 
catustriṃśaṃ tato 'dhastād devadevaṃ prakalpayet // VT_124

jayā saptadaśaṃ bījaṃ yuktam ekādaśena tu 
tad eva vijayākhyātā kiṃ tu yuktaṃ na kena cit // VT_125

pañcaviṃśac chikhābhāji yuktam ekādaśena tu 
ajitāyāḥ samuddiṣṭaṃ caturthyāḥ śṛṇu sāmpratam // VT_126

varṇaikādaśasaṃyuktaṃ śambhusthaṃ pañcaviṃśakam 
guhyam etat samuddiṣṭaṃ praṣṭavyaṃ nānyataḥ param // VT_127

sarvakāmapradaṃ devi etad vai bījapañcakam 
uttaraṃ hṛdayaṃ hyetat sarvatantreṣu cottaram // VT_128

yāni kāni ca karmāṇi sarvāṇy etais tu kārayet 
pañcaviṃśatikoṣasthaṃ yuktaṃ vai ṣoḍaśena tu // VT_129

astram etat samuddiṣṭam asmiṃs tantre ca suvrate 
punar etadbījayuktaṃ viṃśakena samanvitam // VT_130

māyā hy eṣā samuddiṣṭā śivasyānantarūpiṇī 
ādikoṣṭhakabījaṃ tu adhastāṣṭādaśasaṃyutam // VT_131

aṣṭatriṃśatikoṣasthaṃ tasyopari niyojayet 
aṅkuśoddharaṇaṃ hy etad devīnāṃ saṃnirodhane // VT_132

bindupuñjasametā hi nyastavyā tu yathākramam 
pañcaviṃśatikoṣasthaṃ tad eva paramākṣaram // VT_133

navatriṃśasamāyuktaṃ bījaṃ gāyatrisaṃjñakam 
etad bījavaraṃ divyaṃ yojyam ālabhanādike // VT_134

catustriṃśatikoṣasthaṃ pañcaviṃśatiyojitam 
sarvakarmasamuddiṣṭaṃ bījaṃ sāvitrisaṃjñitam // VT_135

ardhenduśikhayā devi lāñchitāni tu pūrvavat 
prayogaṃ cāsya vakṣyāmi siddhir yenāśu jāyate // VT_136

prayogaṃ kāraṇaṃ devi granthaśāstram akāraṇam 
sarvatra sulabhaṃ śāstraṃ prayogaṃ tu sudurlabham // VT_137

prayogarahitā mantrā naiva siddhipradāḥ smṛtāḥ 
hṛtpadme yogavinyāsaṃ dhyātvā vai bījapañcakam 
gatiṃ devaṃ tu vijñāya tataḥ karma samārabhet // VT_138

kīdṛśaḥ sa bhaved devo gatis tasya tu kīdṛśī 
dehasthaṃ tu kathaṃ vidyād vaktum arhasi śaṅkara // VT_139

meḍhranābhyantare devi kandamūlākṛtir bhavet 
dvāsaptatisahasrāṇi nāḍīr ādhārasaṃsthitāḥ // VT_140

nābhideśe sthito granthis tatra padmaṃ vyavasthitam 
karṇikā padmamadhyasya tatra sādhyaṃ vyavasthitam // VT_141

karṇikāsuṣirānte tu yā kalā cordhvagāminī 
tasyā madhye sthito devaḥ sa tu dīpaśikhopamaḥ // VT_142

śuddhasphaṭikasaṃkāśaṃ visphuliṅgārkasaṃnibham 
vārimārutasaṃkīrṇaṃ vālāgraśatabhāgakam // VT_143

vāyuvāhanam ārūḍhaṃ śabdātītam anāmayam 
sampratyayaṃ tu gamyo 'sau vahate dehamadhyataḥ // VT_144

iḍāmadhyagato vāpi piṅgalāntargato 'pi vā 
suṣumnāntargataś caiva viṣuvaṃ samudāhṛtam // VT_145

iḍā tu vāmajā proktā dakṣiṇe piṅgalā smṛtā 
anayor madhye suṣumnā tu sṛṣṭisaṃhārakārikā // VT_146

iḍā śāntikapuṣṭyarthe mṛtyūccāṭana piṅgalā 
suṣumnā mokṣadā caiva jīvamārgānusāriṇī // VT_147

piṅgalāntargataṃ dhyātvā raktavarṇaṃ vicintayet 
māraṇoccāṭanādīni tataḥ karmāṇi kārayet // VT_148

amṛtāntargataṃ jñātvā dhyāyet tuhinasaṃnibham 
śāntipuṣṭivaśākarṣaṃ tadā karmāṇi kārayet // VT_149

vratayogādisaṃsiddhiṃ mūlamantreṣu kārayet 
tad atra japamātreṇa mantrī sādhayate kṣaṇāt // VT_150

aprasūtā mṛtā yoṣit prāptayauvanam eva ca 
tasyāḥ pāṃśulikāṃ gṛhya vāmabhāge vicakṣaṇaḥ // VT_151

likhen nāmākṣaraṃ tatra devīnām kūṭasaṃsthitam 
vāmāṅgojjvalaraktena sādhakaḥ saṃyatavrataḥ // VT_152

striyaṃ caiva likhet tatra gavāṃ rocanayā punaḥ 
anulomair vihanyas tu vāmapādena cākramet // VT_153

tatkṣaṇād ānayec chīghraṃ yā strī dvādaśayojanāt 
puruṣasya tathā proktaṃ dakṣiṇāṅge tu kārayet // VT_154

athābhicārakaṃ kuryāt samidhānāṃ tathāsthibhiḥ 
rājikāviṣaraktāktaṃ śmaśāne homam ārabhet // VT_155

nagno muktaśikho bhūtvā kapālatrayasaṃsthitaḥ 
samidhāṣṭaśataṃ homaṃ rātrau kuryād vicakṣaṇaḥ // VT_156

homānte tu tataḥ śakraṃ kṛṣṇavarṇam vicintayet 
triśūlena vinirbhinnaṃ daṇḍena tāḍitaṃ śiraḥ // VT_157

sādhako ghorarūpeṇa kruddhaḥ saṃraktalocanaḥ 
saptāhān nāśayed indraṃ kiṃ punar mānuṣādikam // VT_158

tyaktena tu kusumbhena śatenāṣṭottareṇa tu 
trisandhyaṃ dhārayed rātrau agnikāryaṃ tu kārayet // VT_159

sādhyaṃ tu sādhakaś caiva raktavarṇaṃ vicintayet 
homānte tu dhyāyet sādhyaṃ vihvalaṃ ca sammūrchitam // VT_160

aṅkuśena hato mūrdhni māyāpāśena veṣṭitam 
rājānaṃ rājapatnīṃ vā saptāhād vaśam ānayet // VT_161

gṛhītvā tu mahāmāṃsaṃ dadhimadhvājyasaṃyutam 
āhutyaṣṭasahasreṇa sadyotkarṣaṇam uttamam // VT_162

ātmanaḥ sādhyabījaṃ ca pañcadevyā catuṣṭayam 
nāḍīmadhyagataṃ dhyātvā ekīkṛtya vicakṣaṇaḥ // VT_163

nāḍīmārgānusāreṇa praveśya sādhyavigraham 
anenaiva prayogeṇa trailokyaṃ vaśam ānayet // VT_164

ata uccāṭanaṃ kuryāc chatrūṇāṃ baladarpitām 
śuṣkāṇi nimbapattrāṇi dhvajāgrāṇi tathaiva ca // VT_165

nṛvālaṃ citibhasmaṃ ca kākapakṣāgrapicchakam 
kaṭutailaviṣaṃ raktaṃ tenāloḍya tu homayet // VT_166

caṇḍālāgniṃ samāhṛtya citikāṣṭhaṃ samindhayet 
uccāṭayet trirātreṇa tyaktabandhusuhṛjjanān // VT_167

vāmahastatale candraṃ dhyātvā sampūrṇamaṇḍalam 
bījapañcakasaṃyuktaṃ yasya taṃ darśayet karam // VT_168

darśanād vaśam āyānti ye 'pi hantuṃ samudyatāḥ 
yaṃ yaṃ spṛśati hastena dāsatvam upagacchati // VT_169

dakṣiṇe 'py eva vai haste vinyased ravimaṇḍalam 
yaṃ spṛśed darśayed yaṃ tu vidviṣṭāḥ suhṛdāny api // VT_170

nimbasthavāyasaṃ gṛhya śvapākenāvatāritam 
bījair etair viparyastais tailābhyaktaṃ citāhutam // VT_171

tad bhasma viṣaraktāktaṃ kṛṣṇānte raktavāsasaḥ 
parijapya sahasraṃ tu vilomair bījapañcakaiḥ // VT_172

yaṃ spṛśed bhasmanā tena kākavad bhramate mahīm 
vidviṣṭaḥ sarvalokānāṃ yadi śakrasamo bhavet // VT_173

yathātmani tathā sādhye bījaṣoḍaśakaṃ nyaset 
javāpuṣpasamaprakhyau dvāv etau paricintayet // VT_174

jātīhiṅgulakapakṣau lākṣārasasamaprabhau 
padmasampuṭamadhyasthau ubhau tau sādhyasādhakau // VT_175

aṅkuśaṃ sādhyaguhye tu daṇḍaṃ cātmani guhyataḥ 
kusumbharaktasaṃkāśau māyātantvabhiveṣṭitau // VT_176

pañcarātraṃ trirātraṃ vā niḥśabdo dhyānapāragaḥ 
vaśam ānayate kṣipraṃ nṛpatiṃ mānagarvitam // VT_177

dvijayoṣin mṛtā yā tu tasyā gṛhyaṃ tu karpaṭam 
kṛṣṇacaturdaśyāṃ gṛhītvā cityaṅgārais tadudbhavaiḥ // VT_178

bījair vidarbhitaṃ nāma yasya yasya ca veśmani 
nikhanyate sa vai kṣipraṃ prayāti yamasādanam // VT_179

tato vidyāvrataślāghī kīrtyādibhir alaṃkṛtaḥ 
sādhyate 'nena prayogeṇa mriyate cāvikalpataḥ // VT_180

gavāṃ rocanayā caiva yasya nāma vidarbhitam 
bījair etaiḥ samāyuktair ālikhya prakṣiped budhaḥ // VT_181

pātraṃ madhvājyasampūrṇaṃ śatam āvartayed drutam 
mumukṣor api tasyāstraṃ śāntipuṣṭiś ca jāyate // VT_182

śatajapto jalenāpi tato vā mucyate sadā 
vyādhighātasamidbhis tu vyādhinātyantapīḍitaḥ // VT_183

aṣṭottaraśatenaiva āhutīnāṃ na saṃśayaḥ 
kṣīrāktena tu deveśi rogī rogād vimucyate // VT_184

juhoti yas tu satataṃ dravyaṃ tasya gṛhe tu yat 
kurvanto 'pi vyayaṃ nityam akṣayatvaṃ ca gacchati // VT_185

nityaṃ kālajapenāpi sarveṣāṃ jāyate priyaḥ 
tejasvī balasampanno nāpy asau pīḍyate bhayaiḥ // VT_186

śrīkāmaḥ śrīphalaṃ juhyāt padmaṃ cājyamadhuplutam 
lakṣaikena mahāvitto mantrī lakṣadvayena tu // VT_187

lakṣatrayeṇa pṛthvīśo nirjitārir bhaved dhruvam 
sarvakāmas tilaṃ juhyāt prāpnuyāt tu na saṃśayaḥ // VT_188

lakṣeṇaikena deveśi sādhakaḥ sa jitendriyaḥ 
tyaktena naramāṃsena chāgasya piśitena vā // VT_189

lakṣamātrahutenāśu yad iṣṭaṃ tad avāpnuyāt 
kṛṣṇāgopayasā sārdhaṃ nṛmāṃsaṃ taṇḍulānvitam // VT_190

pāyasaṃ śavavaktre tu juhuyāt tāvatandritaḥ 
yāvad uttiṣthate pretaḥ kiṃ karomīti so 'bravīt // VT_191

mārgitavyaṃ yad iṣtaṃ tu labhanīyaṃ yaśasvini 
guḍikāñjanapādukaṃ khanyaṃ vā rājyam eva ca // VT_192

vidhānaṃ śakranāśaṃ ca pādaleparasāyanam 
eteṣāṃ prārthitaṃ caikaṃ dattvāgacchati nānyathā // VT_193

uddhatā yā mṛtā yoṣit tasyā gṛhyāṅgulīyakam 
abhimantrya imair bījair anulomaiḥ śatena tu // VT_194

aṣtādhikena mantrajñaḥ sādhyanāma vidarbhayet 
yasyā dadāti tadvad āste striyāyāḥ sādhakottamaḥ // VT_195

ākarṣyati tāṃ kṣipraṃ yadi syād urvaśīsamā 
yojanānāṃ śatasyāpi dūreṇāpi samarpitam // VT_196

puruṣasya bhaved devi uddhatasya yaśasvini 
kākamāṃsaṃ gṛhītvā tu nimbatailasamāyutam // VT_197

śmaśānāgniṃ samādhāya śigrukāṣṭhena sādhayet 
juhuyāt saptarātraṃ tu yasya nāmnā tu sādhakaḥ // VT_198

vidviṣto dṛśyate loke eṣa vidveṣaṇaṃ param 
ato 'nyat sampravakṣyāmi rahasyam idam adbhutam // VT_199

yad viditvā maheśāni siddhim āpnoti puṣkalām 
svakāle samprayogeṇa siddhis tantreṣu kīrtitā // VT_200

tataḥ svakālaṃ kurvīta svāni karmāṇi sādhakaḥ 
sādhyahṛtpadmasaṃsthaṃ tu dhyātvādau bījapañcakam // VT_201

kurvīta manasā pūjām itāyāpravato ? padā 
māyayācchādayet paścāt sādhyam antobahiryutam // VT_202

māyākamalanālena sādhyam āveṣtam ānayet 
tataḥ svātmīkam ānīya māyātattvaślathīkṛtam // VT_203

pun as tat sthāpayitvā tu sammukhaḥ sādhakottamaḥ 
nyastavyaṃ tu yad ādau tu ? sādhye vai bījapañcakam // VT_204

māyāveṣtitaṃ tan mantrī japed aṣṭaśataṃ tataḥ 
sādhyanāmākṣaropetaṃ tatprabuddhāsane sthitam // VT_205

evaṃ devi tataḥ śīghraṃ dhvastajānuśiroruhaḥ 
ākṛṣto vidhinānena sādhyaḥ kiṃkarito mahān // VT_206

ataḥ paraṃ pravakṣyāmi baddhe ruddhe 'pi mokṣaṇam 
yathā saṃharate śakraṃ tatprayogam idaṃ śṛṇu // VT_207

sādhyahṛtkamalāntaḥsthaṃ dhyātvaivaṃ bījapañcakam 
kurvīta pūrvavat pūjāṃ suṣumnāyāganirgadā ? // VT_208

saṃhārāstraṃ tato mantrī tumburuṃ mūrdhni vinyaset 
devīnāṃ ca tatas tena sādhyam āvṛtya yogavit // VT_209

tatra yo mūrdhni tenaiva jvalitānalavarcasā 
dṛṣtvā taṃ manasā bhūyo mūrcchitaṃ bhuvi vihvalam // VT_210

hṛdi baddhvāṅkuśenaiva ānayed ātmano 'ntikam 
tatas tvadhomukhaṃ sthāpya pīḍitaṃ chardayed asṛk // VT_211

paścāt tu hṛdaye tasya nyastavyaṃ bījapañcakam 
proddhṛtya sādhyanāmaivaṃ saṃhārāstravidarbhitam // VT_212

evaṃ vigatarakṣaṃ tu syāpyudgataṃ tu ? tataḥ 
japed aṣṭasahasraṃ tu jvālāmālābhir āvṛtam // VT_213

tatas tu karmaṇānena tenaiva tu vidhānataḥ 
sādhyaḥ prayāti nidhanaṃ mṛtyur āntima ? kampayet // VT_214

ity etat kathitaṃ devi samāsādyaṃ tu pūrvaśaḥ 
yathā saṃharate śakraṃ baddhe ruddhe 'tha mokṣaṇāt // VT_215

krodhena mahatā dīptaḥ prayogam idam ārabhet 
suṣumnāyāṃ yadā devaḥ svayaṃcāreṇa vartate // VT_216

suṣumnāntargataṃ dhyātvā raktavarṇaṃ vicintayet 
vidveṣoccāṭanādīni tataḥ karmāṇi kārayet // VT_217

bījapañcakadevasya vargāntarayutasya ca 
varṇāntayāgam ekānte sadā gopitaṃ tan mayā // VT_218

tadā tu sarvakāryāṇāṃ siddhaye śṛṇu suvrate 
kusumbharajasāloḍyaṃ śālīnāṃ piṣṭakena ca // VT_219

bhasmanā candanenāpi nāgakeśarajena vā 
sugandhaiś ca vicitraiś ca likhec ca susamāhitaḥ // VT_220

vargātītasya garbhe tu nyaset padmaṃ caturdalam 
tatra sabhrātṛkā devyaḥ pūjayed bījapañcake // VT_221

evaṃ pūjitamātrās tu sarvadāsarvakāmadāḥ 
bhavanti niyataṃ[nityaṃ] dharmakāmārthamokṣadāḥ // VT_222

yāgam evaṃ ca kṛtvānte tato lakṣatrayaṃ japet 
tataḥ siddhim avāpnoti brahmaghno 'pi hi nānyathā // VT_223

manasā cintitaṃ kāmaṃ tadā prabhṛtim āpnuyāt 
ataḥ paraṃ pravakṣyāmi japasya vidhim uttamam // VT_224

ekāsanasthito mantrī yāgaṃ kṛtvā vidhānavit 
ekacittaḥ prasannātmā vāmahastākṣasūtradhṛk // VT_225

japakarma sadākuryād viśeṣam aparaṃ śṛṇu 
vaśyakāmo japaṃ kuryād anulomair vidarbhitam // VT_226

bījair etair yathānyāyaṃ sādhyanāmākṣarānvitaiḥ 
kālaṃ tatra vijānīyāt kālasiddhiḥ pravartate // VT_227

māraṇe pratilomais tu sādhyanāma tu pūrvataḥ 
vidveṣe 'pi vilomais tu phaṭkārāntaṃ prayojayet // VT_228

māraṇe pratilomais tu hūṃphatkārānta dyan ? takaiḥ 
oṃ svāhā namo 'ntais tu vaśyākarṣaṇakarmasu // VT_229

homayed evam evaṃ tu sarvaṃ kuryād vicakṣaṇaḥ 
namaskāro japasyānte svāhā home prakīrtitam // VT_230

svaśoṇitāktaṃ laśunaṃ māraṇe pratihomayet 
uccātane kākapakṣaṃ vaśye jātiṃ tu homayet // VT_231

vidveṣe śleṣa śigruṃ ca homayed avicāraṇāt 
ākarṣaṇe bakulapuṣpaṃ homayec ca vicakṣaṇaḥ // VT_232

sarve yāgasamuddiṣtāḥ kālajñasya yaśasvini 
yena kālaṃ ca vai jñātaṃ tena jñātaḥ sadāśivaḥ // VT_233

sadāśive parijñāte siddhiṃ śāmyanti sādhakāḥ 
kālatattvaṃ ca vijñeyaṃ tattvātsiddhiḥ pravartate // VT_234

tattvahīnā na sidhyanti prayatnenāpi sādhakāḥ 
tasmāt sarvaprayatnena kālatattvaṃ vidur budhāḥ // VT_235

kriyākālaṃ ca vai śūnyaṃ na sidhyantīha sādhakāḥ 
tasmāt kriyāṃ ca kālaṃ ca asaṃjñeyaṃ prayatnataḥ // VT_236

sa kālaś ca kathaṃ jñeyo yo 'sāv uktas tvayā prabho 
kālahīnānṛtaṃ manye sarvam eva ca śaṅkara // VT_237

śṛṇu devi paraṃ guhyaṃ kālatattvātmavigraham 
yaj jñātvā tu sukhenaiva siddhir bhavati mantriṇām // VT_238

ayutaṃ dve ca vijñeyāḥ ṣoḍaśaiva śatāni ca 
caturviṃśatisaṃkrāntyā dvādaśāṅgulagatāgate // VT_239

śarīre tu yathā devi sthitaṃ sakalaniṣkalam 
tathā haṃsaṃ pravakṣyāmi sādhakānāṃ hitāya vai // VT_240

pādau pāyur upastham ca hastau vāgindriyas tathā 
śrotratvakcakṣuṣā jihvā nāsikā ca tathāparā // VT_241

pṛthvy āpas tathā tejo vāyur ākāśam eva ca 
śabdaḥ sparśaś ca rūpaṃ ca raso gandhas tathaiva ca // VT_242

mano buddhir ahaṃkāro avyaktam puruṣas tathā 
pañcaviṃśatitattvāni śarīre tu vidur budhāḥ // VT_243

ebhir ādhārabhūtais tu ādheyo dhyāyate sadā 
ādhāraṃ puram ity uktaṃ puruṣaś cādheya ucyate // VT_244

hṛtpadme karṇikāvastha ūrdhvagāmī sadātmakaḥ 
niṣkalasya tu devasya punar ādhārasaṃsthitiḥ // VT_245

tatpuruṣam ādhārādheyaṃ niṣkalaṃ paramaṃ śivam 
ṣatkauśikaśarīraṃ tu tattvānāṃ pañcaviṃśatiḥ // VT_246

daśavāyusamāyuktaṃ nāḍībhir vyāpitaṃ puram 
śarīraṃ triguṇaṃ caiva sarvadaivatasaṃyutam // VT_247

anenādhiṣthitaṃ devi cakravat parivartate 
yathā tāragaṇaṃ sarvaṃ grahanakṣatramaṇḍalam // VT_248

dhruvādhiṣthitaṃ tat sarvam acalaṃ parivartate 
tadvac charīraṃ devasya sarvabījagaṇaṃ hi yat // VT_249

śivenādhiṣthitaṃ jñātvā tantre siddhim avāpnuyāt 
trikubjikutilākārā ṣaṣṭhasvarasamanvitā // VT_250

śaktir binduvinirbhinnā dehasthā sakalātmakā 
asyās tejaḥśikhā sūkṣmā mṛṇālatantusaṃnibhā // VT_251

jyotirūpā ca sā jñeyā tasyānte tu punaḥ śivaḥ 
akārādikṣakārāntam ābrahmabhuvanaṃ jagat // VT_252

asmiṃś codpadyate sarvaṃ tatraiva pralayaṃ bhavet 
eṣa devaḥ paraḥ sūkṣma ādhārādheyasaṃsthitaḥ // VT_253

ayane viṣuve caiva āgneyāmṛtakāraṇam 
yadā vāruṇamārgastha iḍāmadhyagato bhavet // VT_254

himakundendusaṃkāśo vijñeyaḥ śucikarmaṇi 
dvādaśādityasaṃkāśaḥ piṅgalāntargato yadā // VT_255

aruṇānalasaṃkāśaṃ raudrakarmaṇi yojayet 
suṣumnāyāṃ yadā deva upaśānto vahaty asau // VT_256

mokṣamārgam idaṃ devi jyotīrūpaṃ parāparam 
eṣa devo gatiś caiva kālatattvātmavigrahaḥ // VT_257

sādhakasya hitārthāya paramārtham udāhṛtam 
etatsarvaṃ samākhyātaṃ kālatattvātmavigraham // VT_258

trisaṃsthe tu samāsena sarvatantreṣu siddhidam 
nāḍīsaṃsthaṃ yathā karma kurute mantriṇaḥ sadā // VT_259

tad ahaṃ sampravakṣyāmi śṛṇu tvaṃ ca varānane 
iḍā ca piṅgalā caiva nāḍyau dve samudāhṛte // VT_260

yato nityaṃ cared devaḥ kramaśaś ca nivartate 
tāny ātmavatakarmāṇi prayuktaṃ kurute prabhuḥ // VT_261

sa eva kurute karma bījanāḍīprayogataḥ 
ayaṃ kālaḥ samākhyātas tṛtvedaya ? samanvitaḥ // VT_262

dehastham kathitaṃ devi ṛtuyuktas tu sādhakaḥ 
jñātvā kālaṃ ca tattvaṃ tu tataḥ karma samārabhet // VT_263

śāntikaṃ pauṣtikaṃ cāpi vidveṣoccāṭanaṃ tathā 
vaśyākarṣaṇakaṃ kuryād yadi kālaṃ vijānate // VT_264

saumyāni saumyakāle tu raudre raudrāṇi kārayet 
anyakālakṛtaṃ karma vṛthā bhavati sādhake // VT_265

tasmāt sarvaprayatnena kāle karmāṇi kārayet 
svaraktaṃ gocanaṃ caiva tathā sindūram eva ca // VT_266

kusumbharajaḥsammiśraṃ dadhimadhvājyasaṃyutam 
khadirai raktasamidhair athavā raktacandanaiḥ // VT_267

atra digdhvā hunen mantrī saptāhād vaśam ānayet 
pratimāṃ lavaṇamayīṃ kṛtvā śatābhimantritāṃ budhaḥ // VT_268

pādau prabhṛti hotavyaṃ yāvad aṣṭaśataṃ bhavet 
trisandhyām ekacittas tu amoghavaśyatāṃ nayet // VT_269

saikthīṃ tu pratimāṃ kṛtvā tryūṣaṇena tu lepayet 
pratimāsu susampūrṇaṃ kaṇṭakair madanodbhavaiḥ // VT_270

vidarbhya pādau guhyaṃ ca lalātaṃ ca vicakṣaṇaḥ 
kucayugme ca devīnām agrato nikhaneta tu // VT_271

adhomukhāṃ viliptāṅgāṃ rājikālavaṇena tu 
vāmanāsikaraktena nāmamantrair vidarbhitām // VT_272

likhitvā hṛdaye kuryād vahniṃ prajvālya copari 
rājikālavaṇaṃ caiva hotavyāṣtaśataṃ budhaḥ // VT_273

trisandhyām eva saptāhāt trailokyaṃ vaśam ānayet 
kulālakaranirmuktamṛdā pratimayīkṛtā // VT_274

tenaiva kaṇtakair viddhvā svasthānasthais tu mantriṇaḥ 
bhage vā athavā liṅge sanmantrāṇy aṣṭaśatāni tu // VT_275

sūtrayed guhyadeśe tu gṛṇan mantraṃ tu sarvadā 
saptāhād ānayed vaśyaṃ striyaṃ vā puruṣam api vā // VT_276

mānuṣāsthimayaṃ kīlaṃ kṛtvā tu caturaṅgulam 
kṣīravṛkṣaṃ bhage likhya liṅgaṃ vā kīlayet tataḥ // VT_277

ṣaṇḍilas tu bhavet sādhya ārdrayogo na saṃśayaḥ 
uddhṛtena bhaven mokṣaṃ nātra kāryā vicāraṇā // VT_278

madhūkā śvetapadmaṃ ca rocanā nāgakeśaram 
tagaraṃ caiva sūkṣmelam añjanaṃ samabhāgikam // VT_279

kanyayā piṣitaṃ kṛtvā yāgaṃ kṛtvā yathoditam 
sahasrāṣtādhikaṃ japtvā japena yajane tataḥ // VT_280

sarvalokeṣu dṛśyante kāmadevasamo 'pi tat 
vicareta mahīṃ kṛtsnāṃ nātra kāryā vicāraṇā // VT_281

mañjiṣthā kunduruś caiva haridre dve tu pīṣayet 
piṣtvā pūrvavidhānena tato guhyaṃ pralepayet // VT_282

pravṛtte maithune kāle patir dāsaṃ kariṣyati 
meṣalocanamūlaṃ tu kambalyā kṣīrasādhitam // VT_283

śmaśāne sādhayen mantrī rātrau kāṣṭhais tadudbhavaiḥ 
kapālair guṇḍayed aṅgaṃ raktavāsoparicchadam // VT_284

udvartano 'bhayo hy eṣa vajravat syāṅkuśopamaḥ 
bhakṣayed deśayet kaṃcit kāmāṅkuśavinirgataḥ // VT_285

puruṣo vaśam āyāti strī vā madanagarvitā 
vālmīkamṛttikāṃ gṛhya balīvardaṃ tu kārayet // VT_286

kanyākartitasūtreṇa tasya nāsāṃ pravedhayet 
athavā padmasūtreṇa raktacandanalepitam // VT_287

raktapuṣpaiḥ samabhyarcya sarvārṇavaṃ samānayet 
sādhyasya vilikhen nāma svaraktena vṛṣodare // VT_288

śrīvṛkṣakotare sthāpya sādhyam evaṃ vaśīkuru 
anenaiva mṛdā meṣaṃ kārayen mantravit sadā // VT_289

meṣasūtreṇa vai nāsāṃ vedhayet pūrvavac chuciḥ 
devīnām agrataḥ sthāpya tasya nāsāṃ pracālayet // VT_290

yaṃ yaṃ vijñāpayet kāmaṃ taṃ taṃ prāpnoti sādhakaḥ 
ete yogavarā devi mayā tava udāhṛtāḥ // VT_291

varṇānām udare yāgaṃ sarvakāmaprasiddhidam 
evam eva magarbhasthaṃ māraṇe samprayojayet // VT_292

gavāṃ rocanayā likhya evam eva prayojayet 
sodaremūkatāṃ kuryād vāgīśam api mūkayet // VT_293

nit yam ākarṣayet proktam ākārodare pūjitā 
mahāpuruṣavarastrīṇāṃ japamānā tu kīrtanāt // VT_294

jñānāṅkuśagatā pūjā kṣipraṃ prāyeṣu vastuṣu 
unmaneṣv atha ghoreṣu sākāreṇa tu sādhayet // VT_295

ekārodarayāgena bhavaty arthapradāyikā 
vakāramadhyagā caiva vaśīkaraṇakarmaṇi // VT_296

dharmārthamokṣadā caiva puṣṭitejovivardhanī 
bhavati niyatā devi haṃsamadhyeṣu pūjitam // VT_297

bhañjane yadi sainyānāṃ bhakārajathare sthitam 
bhavati niyatā kṣipraṃ kṣemanābhigarīyasī // VT_298

māraṇe tu prayoktavyaṃ phatkārānte vyavasthitā 
vidveṣaṃ tu prayacchanti jakārajatharesthitā // VT_299

śatrukulocchādaṃ kuryāt hūṃ phatkārānte vyavasthitā 
svalpaprāyeṣu kāryeṣu yakārajatharodare // VT_300

dehanyāsaṃ punar vakṣye abhedyaṃ parameśvari 
vinyasya karaṇān sākṣān mahābhūteṣu pañcasu // VT_301

dehe tattvatrayaṃ nyasya prāṇāyāmapuraḥsaraḥ 
śarīre vinyased devi pūrvam uktakrameṇa tu // VT_302

māyayācchādayitvā tu aṅkuśena nirodhayet 
yoniṃ baddhvā tataḥ paścāt sādhakaḥ susamāhitaḥ // VT_303

svadehe namasā mantrī kalpoktena tu karmaṇā 
kuryāt sarvāṇi kāryāṇi tataḥ siddhir na saṃśayaḥ // VT_304

nayottarāditantreṣu kalpoktaṃ karma kārayet 
athavādaśalakṣāṇi japed yas tu vidhānataḥ // VT_305

tataḥ sabhrātṛkā devyaḥ sādhakasyāgrataḥ sthitāḥ 
varam iṣtaṃ prayacchanti trayātītaṃ padaṃ hi yat // VT_306

bījapañcakam etad dhi na deyaṃ yasya kasyacit 
vargāntanirguṇākrāntaṃ samyag vai bījapañcakam // VT_307

evam eva purā kṛtvā jñātvaivaṃ hi vidhānataḥ 
bījāni bījayet prājñaḥ tataḥ karma samārabhet // VT_308

evaṃ vidhānavid yas tu hīno vā sarvalakṣaṇaiḥ 
api pātakasaṃyuktaḥ sa siddhiphalabhāg bhavet // VT_309

vargāntanirguṇākhyasya asyāpi paramaṃ smṛtam 
hṛdayaṃ devadevīnām ekākṣaram ataḥ param // VT_310

yatra sabhrātṛkā devyaḥ kūṭadehā vyavasthitāḥ 
nātaḥ parataro mantras triṣu lokeṣu vidyate // VT_311

gopitavyaṃ prayatnena tantrasāraṃ sudurlabham 
mamāpi gopitaṃ devi sarvajñenāpi sarvadā // VT_312

niścayaṃ mama baddhvānta ? yac ca devena bhāṣitam 
tvayāpi caivam evaṃ hi rakṣaṇīyaṃ prayatnataḥ // VT_313

cintāratnam idaṃ guhyaṃ vratasādhanavarjitam 
anusmaraṇāmātreṇa samyagjñāya krameṇa tu // VT_314

varṇayāgakrameṇaiva pūrvoktena yathākramam 
sidhyate nātra saṃdehaḥ sarvakāmas tu mantriṇām // VT_315

śāntikaṃ pauṣtikaṃ caiva vidveṣoccāṭanaṃ tathā 
vaśyākarṣas tathā nāśaṃ sarvaṃ sidhyati sādhake // VT_316

śukreṇa sarvatobhadre mahāsammohane tathā 
nirmathya kathito devi dadhno ghṛtam ivoddhṛtam // VT_317

parīkṣya guruṇā śiṣyaṃ gurudevāgnipūjakam 
tasya deyam idaṃ tantraṃ na ca nāstikanindake // VT_318

na dīkṣitā na sidhyanti sthitāḥ kalpaśatair api 
svayaṃgṛhītamantrāś ca nāstikā vedanindakāḥ // VT_319

samayebhyaḥ paribhraṣtās tathā tantravidūṣakāḥ 
gurūṇāṃ viheṭhanaparās tantrasāravilopakāḥ // VT_320

yoginībhiḥ sadā bhraṣṭāḥ kathyante dharmalopakāḥ 
iti tathyaṃ mahādevi surāsuranamaskṛtam // VT_321

sāram etad dhi tantrasya tasya tatsthaṃ mahānaye 
ājñā bhagavataś caiva śivasya paramātmanaḥ // VT_322

śrutaṃ mayā mahādeva vīṇāsadbhāvam uttamam 
tantraṃ vīṇāśikhaṃ nāma durlabhaṃ tridaśeṣv api // VT_323

vargāntanirguṇākhyasya asyāpi paramaṃ ca yat 
ekākṣaraṃ paraṃ guhyaṃ bhuktimuktipradāyakam // VT_324

gopitaṃ tu tvayā deva sārabhūtaṃ maheśvara 
tapasā durdharāllabdhaṃ yac ca jñānaṃ śivodbhavam // VT_325

prasādaṃ kuru deveśa yatra siddhir dhruvaṃ sthitā 
prāpte kaliyuge ghore saṃkate bahupātake // VT_326

sarvasrotaḥprapannānām āśu siddhir yathā nṛṇām 
prasādaṃ kuru deveśa kaḥ parampārate mama // VT_327

alpaprajñāḥ kumatayo bahuvyākulacetasā 
tantraṃ naivādhigacchanti na caiva bahudhā śrutam // VT_328

iti deva tvayā pūrvaṃ kathitaṃ guruṇātmanā 
asmākam api saṃkṣepāt kathayasva maheśvara // VT_329

aho svabhāvaprakṛte kimpraśnāsi punaḥ 'punaḥ 
yan mayā kathitaṃ pūrvaṃ tad gṛhāṇa subhāṣitam // VT_330

na bhūyaḥ paripṛcchāmi praśnam ekā garīyasī 
vāram ekaṃ kuru vyaktaṃ prasādaṃ sūkṣmagocaram // VT_331

śṛṇu devi prayatnena sūkṣmāt sūkṣmataraṃ mahat 
prayogaṃ sarvatantrāṇām uttaraṃ sarvasiddhaye // VT_332

yena saṃsmṛtamātreṇa siddhir hastatale sthitā 
nāyāso na vrataś caiva na tapaś ca maheśvari // VT_333

nāgnikarma na caivārcā smaraṇāt siddhidaḥ smṛtaḥ 
śṛṇuṣvaikākṣaraṃ devi sadbhāvaparasaṃhitam // VT_334

śarīraṃ tattvarājānaṃ jātavedasi saṃsthitam 
śikhāyāṃ saṃsthito devo bindudevī jayā smṛtā // VT_335

yaścātrordhvaṃ bhaved devi saukaraḥ parikīrtitaḥ 
tantudevaṃ vijānīyān makāraṃ bindudevatām // VT_336

evaṃ tu pañcadhā devi tattvarājaṃ tu kīrtitam 
caturviṃśatikoṣthe tu yo mantranāyakaḥ smṛtaḥ // VT_337

tattvarāja iti khyāta ūnaviṃśaty adhaḥ smṛtaḥ 
viṃśakena svareṇaiva bindumūrdhnā tu pīḍitam // VT_338

eṣa ekākṣaraḥ proktas tvatpriyārthaṃ varānane 
suṣiraṃ tattvarājānaṃ jātavedasi saṃsthitam // VT_339

viṣṇor upari dīptena japel lakṣatrayaṃ budhaḥ 
ākarṣayed drumāṇy eṣa mṛgapakṣisarīsṛpān // VT_340

mānuṣāṇāṃ tu kā cintā ākarṣaṇavidhiṃ prati 
ekādaśamaḥ saṃyuktas tattvarājena śobhane // VT_341

śirasā bindubhinnena hṛdi caiṣa nigadyate 
saptaviṃśa śiraḥ proktaṃ triṃśamas tu śikhā bhavet // VT_342

ūnacatvāriṃśatir devi tattvo 'yaṃ kavacaḥ smṛtaḥ 
ṣoḍaśasvarasaṃyuktam etad astraṃ prakīrtitam // VT_343

netraṃ tu kathitaṃ devi viṃśatyakṣarayojitam 
eṣa ekākṣaro devi ṣaḍaṅgaḥ samudāhṛtaḥ // VT_344

haṃso māyāyukto devi nārācāstravidarbhitaḥ 
savisarganayapadaṃ bījāntasthaṃ(?) ū ī siddhikarī nṛṇām(?) // VT_345

ha ra tra vṛddhiṃ karoti .... .... 
māyāṅkuśanirodhās te sarvamantragaṇādayaḥ // VT_346

kramaśo yojayen mantri yadīcched dīrgham ātmani 
sarvam etat parityajya kuryān mantraparigraham // VT_347

ātmātīndriyādhārāṇāṃ kṛtvā kartavyaṃ muhur muhuḥ 
padārthavidhisaṃyuktaṃ yan mayā gaditaṃ purā // VT_348

tad anena prayogeṇa kartavyaṃ siddhim icchatā 
dhyāyet sindūrasadṛśaṃ vaśyākarṣaṇakarmaṇi // VT_349

māraṇe kṛṣṇavarṇaṃ tu vidveṣe vāmarūpakam 
uccāte dhūmravarṇaṃ tu śvetaṃ caiva puṣṭyarthinā // VT_350

mayūragrīvasadṛśaṃ stambhane cintayet sadā 
sarvavarṇadharaṃ caiva sarvakāmikam eva ca // VT_351

sarvendriyāṇāṃ kurvīta upahāre mahādhipe 
hṛtpadmakarṇikordhvaṃ tu suṣiraṃ tatra cintayet // VT_352

sphuliṅgaṃ karṇikārūpaṃ nirdhūmatejarūpiṇam 
dhūmajvālāvinirmuktaṃ sūryakoṭisamaprabham // VT_353

tasyordhve tu śikhā sūkṣmā nirmalā sphātikopamā 
nityaṃ sā sevyate yuktair yogibhir niṣkalā parā // VT_354

ūrṇātantusamākārā ūrdhvasrotā nirupamā 
tatra madhye gataṃ paśyed devyā guhyottarambhavā // VT_355

vālāgraśatabhāgākhyāvīṇādhārāsusaṃsthitā 
dhyāyeta nityaṃ yogīndraḥ sūkṣmaguhyasamudbhavām // VT_356

kṛtvā pūrvaṃ tu vinyāsaṃ sakalābāhyasaṃsthitam 
evaṃ varṇavibhāgaṃ tu jñātvā siddhim avāpnuyāt // VT_357

vaśyākarṣaṇakarmāṇi vācayā sa kariṣyati 
vīṇāśikhāyāḥ sarvasvaṃ cintāratnam ivāparam // VT_358

etad bījavaraṃ prāpya yathepsasi tathā kuru 
ājñā bhagavataś caiṣā sarvadāvyabhicāriṇī // VT_359

dhyātavyā sā prayatnena yadīcchet siddhim ātmanaḥ 
yajanaṃ yājanaṃ caiva saṃyogaṃ ca layaṃ tathā // VT_360

samayākṣarabījaṃ ca akṣarākṣarayojitam 
rakṣaṇīyaṃ tvayā bhadre prayatnena suniścalam // VT_361

etad guhyaṃ samākhyātaṃ tava snehād vicakṣaṇi 
etaj jñātvā tu mantrajñaḥ śivasāyujyatāṃ vrajet // VT_362

evaṃ vilayatāṃ yāti vidhinānena yoṣitām 
amalīkṛtadehas tu vidhinānena sādhakaḥ // VT_363

amalīkṛtaṃ tanmantraṃ hṛccakre viniyojayet 
somamaṇḍalamadhyasthaṃ dhyāyet kundendusaprabham // VT_364

amṛtena tu siñcanti lāntīsagatilitena ? tu 
evam āpyāyito mantraḥ sarvasiddhiprado bhavet // VT_365

evam āpyāyanaṃ kṛtvā bindumadhyevicakṣaṇaḥ 
aṣṭottarasahasraṃ tu mantrāṇāṃ mantravij japet // VT_366

paramīkaraṇaṃ hy etan mantrasyāpyāyanaṃ smṛtam 
śivībhūtas tu mantro vai sādhayed akhilaṃ jagat // VT_367

sūryacakraniruddhaṃ tu śirasi samavasthitam 
japet hūṃkārasahitaṃ bodhanaṃ parikīrtitam // VT_368

ādityacakramadhyasthaṃ vahninā saṃnirodhitam 
nirdahate mantraṃ devi yadā karma na kurvati // VT_369

śikhāmadhyagataṃ dhyātvā sahasraṃ parivartayet 
mantram evaṃ samuddiṣtaṃ guhyaśaktipradīpanam // VT_370

dahanaṃ cāgninā kāryaṃ hūṃkāreṇa prabodhayet 
dīpanaṃ tu śikhāmadhye mantrāṇāṃ mantravādinām // VT_371

amalīkurutesūryaś candreṇāpyāyanaṃ smṛtam 
śivīkurvīta bindusthaṃ mantrī mantraṃ tu yogavit // VT_372

evaṃ mantraviśuddhas tu candrasūryasamanvitam 
dīpanaṃ śaktinā nityaṃ japen mantrī samāhitaḥ // VT_373

amṛtodbhavakāle tu mantrī yatnena niścayāt 
vaśam ānayate kṣipraṃ viśvaṃ manata ? saṃśayaḥ // VT_374

yāvatī māyā mantrāṇāṃ sarveṣāṃ kathitā mayā 
vidhir atra krame cāyaṃ paścād vakṣye jape vidhim // VT_375

yajanakāle samprāpte ekacittaḥ samāhitaḥ 
hṛtpadme karṇikāsīnadevatārpitamānasaḥ // VT_376

śikhābinduṃ vinirdhārya tanmantraṃ hṛdi saṃsthitam 
putavarṇavidhānaṃ syād akṛtoccāranisvanam // VT_377

svasthacitto hy asammūḍha alākūrdhvasthitātmanaḥ 
avicchinnaṃ drutaṃ caiva avilambitam eva ca // VT_378

tāvan mantrī japen mantraṃ yāvac cittaṃ na khidyate 
alabhya mama mantraṃ syād drutaṃ kālasya sidhyati // VT_379

japaṃ kṛtvā tu medhāvī nānyam etat samarpayet 
mantrī kurvīta yatnena yathārthatvaṃ nibodhata // VT_380

prathame vāyavī proktā dvitīyā tv analā smṛtā 
tṛtīyā caiva māhendrī vāruṇī tu tathāpare // VT_381

oṃkārapūrvato mantraṃ namaskārāntayojitam 
bījapiṇḍaṃ tu madhyasthaṃ mudrāyuktaṃ sadā yajet // VT_382

kṣipram arthas tathā karma bhuktibhogaṃ sudurlabham 
sādhayen manasā sarvaṃ bījamudrāprayogataḥ // VT_383

hūṃkāram adito nyastam namaskārāntavyavasthitam 
uccātayet sarvaduṣtān daityabhūtagrahāṃs tathā // VT_384

oṃkārayojitasyādau svāhākārāvasānataḥ 
agnikāryaprayogo 'yaṃ kṣipram arthaṃ prasādhayet // VT_385

oṃkārasamputaṃ piṇḍaṃ rakāreṇa tu dīpakam 
sādhayen manasā dhyātvā kāmārthaś ca yathepsitam // VT_386

suptaṃ bodhayate mantrī śīghraṃ siddhim avāpnuyāt 
oṃkāraś ca rakāraś ca phaṭkāraś caiva madhyataḥ // VT_387

madhye vargāntapiṇḍas tu karma kuryād yathepsitam 
hūṃkāram ādau ante ca hakāraś cādimadhyataḥ // VT_388

japan tu bodhayen mantrī api suptam acetanam 
hūṃkāraś ca rakāraś ca phaṭkāram ādimadhyataḥ // VT_389

kruddhas tu jāpayen mantrī yadākarma na kurvati 
oṃkārasamputaṃ kṛtvā namaskārāntayojitam // VT_390

japet piṇḍākṣaraṃ mantrī sarvasiddhikaraṃ param 
śāntikapauṣtikaṃ karma śubheṣu aśubheṣu ca // VT_391

kṣipram āvāhane siddhir homabījaprayogataḥ 
homayet phalabījāni dhānyabījatṛṇāni ca // VT_392

payasā vāpi śuddhena homakarma hy udāhṛtam 
madhunā ghṛtasaṃyuktaṃ tilaṃ juhyād vicakṣaṇi // VT_393

sādhayet sarvakarmāṇi vaṣatkṛtaṃ japiṣyati 
sarveṣāṃ guhyamantrāṇāṃ bījamudrāṃ prayojayet // VT_394

aprakāśyam idaṃ guhyaṃ śivavaktrād viniḥsṛtam 
yas tv idaṃ dhyāyate nityaṃ pūjayen manasā japet // VT_395

sa bhuṅkte vipulān bhogān īśānāntapadaṃ labhet // VT_396

vīṇāśikhā sārdhaśatatrayaṃ yāmalatantraṃ samāptam iti


appendices :
 a: hūṃkārādau svāhānte ākarṣaṇe oṃkārādau vauṣat ante śāntike oṃkārādau su vaṣaḍ ante pauṣtike oṃkārādau vaṣaḍante 'mṛtīkaraṇe phat phat māraṇe oṃ kṣraṃ saṃhārāstra b: kṣa puruṣa/prakṛti buddhi/ahaṅkāra manaḥ ja śabdasparśarasarūpagandha tanmātraṃ bha pṛthivī āpa teja vāyu ākāśa pañcamahābhūta /ma/śrotratvaccakṣurjihvāghrāṇa buddhīndriya ha/vākpāṇipādapāyūpastha karmendriya c: jaya brāhmani bhūmi vijaya kṣatrāṇi / āpa ajita / vaisani / teja aparājita sūdrani / vāyu tumburu akāśa śūnya nirguṇa d: kṣakāraḥ puruṣaḥ sākṣāt makāraḥ prakṛtiḥ smṛtā mahān hakāram ity āhur ahaṃkāras tu ya smṛtaḥ oṃkāras tu manaḥ proktaṃ kathitaṃ devi te kramāt colophon : vīṇāśikhaṃ vāmatantraṃ sampūrṇam śubham astu