vīṇāśikhatantra
oṃ namo mahābhairavāya
kailāsaśikhare ramye nānāratnopaśobhite
nānādrumalatākīrṇe siddhacāraṇasevite //
tatra devaḥ suraśreṣṭhaḥ krīḍate umayā saha
stūyamāno mahāsiddhair mahākālādibhir gaṇaiḥ //
ṛṣibhiś ca mahābhāgair bhṛgvādyaiḥ surasattamaiḥ
teṣāṃ madhye samutthāya devī vacanam abravīt //
śrutaṃ sammohanaṃ tantraṃ tathā nayottaraṃ mahat
śiraśchedaṃ ca deveśa tvatprasādāt sudurlabham //
vratasādhyāni caitāni yāgasādhyāni vai punaḥ
anyasārā yato loke prāyo draviṇavarjitāḥ //
ebhyo 'pi cottaraṃ yasmāt kevalaṃ jñānasiddhidam
sarvakāmapradaṃ deva yathāvad bījapañcakaṃ //
uttaraṃ hṛdayaṃ hy eṣāṃ bhaktāya dātum arhasi //
yan na kasyacid ākhyātaṃ śukrādīnāṃ ca yoginām
subhaktasya vinītasya gopitaṃ vai guhasya ca //
catuḥṣaṣṭiḥ samākhyātāḥ śiṣyās tantreṣu ye mayā
teṣām api na cākhyātaṃ brahmaviṣṇupuraḥsaraiḥ //
tad ahaṃ sampravakṣyāmi cintāratnam ivāparam
tantraṃ vīṇāśikhaṃ nāma nirvyājenāśusiddhidam //
devītumburusaṃyuktaṃ vīṇādhārasusaṃsthitam
śikhāyogena iṣyante tena vīṇāśikhā smṛtā //
yāgam ādau pravakṣyāmi tantrasāraṃ sudurlabham
tenaiva varadā devyo nityaṃ devi bhavanti hi //
gṛhayāgam idaṃ devi yo jānātīha sādhakaḥ
vratahomād ṛte cāsmin susiddhiṃ labhate param //
śiṣyāṇām āditaḥ kuryād yāgaṃ kṛtvā parigraham
nānyathā darśayet tantraṃ na cāsau siddhim āpnuyāt //
caturthyām atha pañcamyāṃ navamyām ekādaśīṣu ca
grahaṇe vāpi kartavyā sarvadā cārkasomayoḥ //
caturthyāṃ yajanaṃ śreṣṭhaṃ saubhāgyakaraṇaṃ mahat
śrīkāmo yajanaṃ kuryāt pañcamyāṃ susamāhitaḥ //
saṃgrāme vijayārthī vā pararāṣṭravimardanam
navamyāṃ pārthivaṃ yāgaṃ kurvīta bhaginīpriyam //
ekādaśyāṃ yajed yas tu śivaloke mahīyate
sugupte nirjane deśe saridvāpītaṭe 'pi vā //
kṛtvādau bhūmisaṃśuddhiṃ sāvitryā deśikottamaḥ
kṛtvā pūjāṃ prakurvīta śiṣyāṇām adhivāsanam //
carukaṃ sādhane paścāt sāvitryā dāpayed budhaḥ
śiṣyāṇāṃ dantakāṣṭhaṃ ca sakṣīraṃdvādaśāṅgulam //
ācamya śiṣyam āhūya pañcatattvapariṣkṛtam
sāvitryā prokṣayed bhūyas tattvajaptaṃ yathoditam //
pramārjayetkuśāgreṇa tasyāṅgāni samālabhet
ālabhyaiva tu sāvitryā kṣālayet sakalaṃ kramāt //
yāgabhūmau svaśiṣyāṃs tu svapec ca kuśasaṃstare
rakṣāṃ sadā śatair bījaiḥ kṛtvā dhyātvā ca tāḥ kramāt //
tataḥ prabhāte vimale mukhaṃ prakṣālya sādhakaḥ
iṣṭāniṣṭāṃ gurau ceṣṭāṃ praṇipatya nivedayet //
iṣṭāniṣṭān viditvā tu deśikaḥ sādhakasya tu
ādau deśe same bhūmau vivikte śalyavarjite //
maṇḍalaṃ saṃlikhet prājño yathāvad vidhipūrvakam
caturhastaṃ caturdvāram athavā caikahastakam //
maṇḍalam saṃlikhed divyam śālicūrṇena sūjjvalam
tatra madhye likhet padmaṃ catuḥpattraṃ sakarṇikam //
śvetāsṛ kpītakṛ ṣṇāni kamalasya dalāni tu
prāg ārabhya yathānyāyaṃ saumyeśāntāni lekhayet //
karṇikāṃ ca tathā madhye śabalāṃ deśikottamaḥ
caturmūrtiṃ caturvarṇaṃ svena bijena tumburum //
caturvarṇam īśvaraṃ dhyāyen niviṣṭam karṇikodare
tataḥ sitāṃ svabījena jayāṃ prāgdale vinyaset //
bandhūkakusumaprakhyāṃ vijayāṃ dakṣiṇe dale
svacchacāmīkaraprakhyām ajitāṃ paścime dale //
bhinnāñjanacayaprakhyām uttare cāparājitām
vinyasya pūjāṃ kurvīta svaiḥ svair bījair yathākramam //
puṣpadhūpaiś ca balibhir yathākālāntaraiḥ śubhaiḥ
sadvitānapatākāḍhyaṃ sragmālālaṃkṛtaṃ puram //
pradīptadīpakair dikṣu samantād avabhāsitam
nānābhakṣyānnapānaiś ca svādubhir vyañjanais tathā //
phalair nānāvidhaiś caiva paritaḥ paryavasthitaiḥ
kalaśair vāripūrṇaiś ca daśadikṣu vyavasthitaiḥ //
cūtapallavasaṃvītaiḥ sragmālālaṃkṛtaiḥ śubhaiḥ
evaṃ yaṣṭvā yathānyāyaṃ śiṣyān āprokṣya vāriṇā //
sāvitryā mukham āsādya vāsasā sakalīkṛtān
svaiḥ svair bījair nyaset puṣpān śiṣyāṇāṃ karayor dvayoḥ //
jayāt praveśayen māyāṃ maṇḍalaṃ deśikottamaḥ
praveśya tatra śiṣyaṃ tu dvitricatuḥpañca eva vā //
tato 'gnikāryaṃ kurvīta maṇḍalāt paścime bahiḥ
ullikhyoddhṛtya sāvitryā kuśān saṃstīrya sarvataḥ //
astrabījena cābhyukṣya gandhatoyena deśikaḥ
vahnim ādāya tenaiva sāvitryā pūjayet tataḥ //
tatas tattvatrayaṃ nyasya vahner eva yathākramam
niruddhamāyātasmāttam aṅkuśena nirodhayet //
māyayācchādayet paścād astreṇaiva prabodhayet
homadravyasya sarvasya kuryāt tenaiva śodhanam //
tataś ca sarpiṣo homaṃ vidhivat kārayed budhaḥ
svabījair eva tad dhutvā dīkṣāṃ śiṣyasya kārayet //
saṃyojya vidhivad bījair mahābhūteṣu pañcasu
sakale tattvaṃ saṃyojya pariṣṭhāpya pare 'dhvani //
niyoktavyaṃ tatas tatra yatrāsavāṃsvaraparam?
eṣā dīkṣā ya thānyāyaṃ bhuktimuktiphalapradā //
tair eva pañcabhis tattvaṃ sakale sakalātmikā
niṣkale niṣkalā proktā sādhikārādhvanaḥ purā //
dīkṣayitvā tataḥ śiṣyān sādhikārapare sthitān
abhiṣicya svabījais tu bījān tebhyaḥ pradāpayet //
nivedya samayān tasya hṛnmudrāṅgulidarśanāt
anujñāṃ sādhakendrasya tasya dadyān mahātmanā //
tataḥ svavidyānaivedyaṃ bhakṣayet sādhakottamaḥ
devyaḥ prītā bhavanty eva avaśiṣṭaṃ jale kṣipet //
ācāryaṃ pūjayed bhaktyā sarvasvenāpare vidhā?
praṇāmaiḥ śaktidānaiś ca yena vā tuṣyate guruḥ //
sragvī sitoṣṇīṣī caiva sarvālaṃkārabhūṣitaḥ
uccāsanasthaḥ prāgvaktraḥ kalpayet koṣamaṇḍale //
gośakṛdbhasmaliptas tu śucau janavivarjite
susame bhūmideśe tu prastāraṃ prastarec chuciḥ //
caturasram ataḥ kṛtvā prastārarekham ujjvalam
kuryād ekonapañcāśat koṣṭhakān tu samān śubhān //
śatārdhārdhāsanāsīnaṃ pañcavargāntabindukam
śikhāsambhinnamūrdhāntaṃ kaṣākhyaṃ madhyakoṣṭhake //
vidigdikṣaṃsthakoṣṭheṣu tatpārśve bahir aṣṭasu
yaśavargān nyased devi aiśānyādiṣu tatkramāt //
āgneyādiṣu koṣṭheṣu napuṃsakacatuṣṭayam
aiśānyādikramād devi bījadvādaśakaṃ nyaset //
tṛtīyapaṭktikoṣṭheṣu caturthe pañcaviṃśakam
aiśānyādiṣu koṣṭheṣu bījāni kramaśo nyaset //
prastāram evaṃ prastārya svaravarṇaṃ ca śobhane
bījaṣoḍaśakaṃ caiva proddharet tu yathākramam //
kādipaṭktiṃ purākṛtya kramād vyastasamastakam
koṣṭhaikādaśabījena saṃyuktaṃ pañcaviṃśakam //
ātmatattvam iti khyātaṃ vidyākhyaṃ catustriṃśakam
śivatattvaṃ tu deveśi triṃśakoṣṭheṣu saṃyutam //
tattvatritayam etad dhi nyāsaṃ ca samudāhṛtam
binduyuktāny aśesāṇi nyastavyāni yathākramam //
atra-siddhiḥ sthitā devi vijñeyā sādhakottamaiḥ
pañcaviṃśatikoṣṭhasthaṃ prathamaṃ bījam ucyate //
dvisaptakoṣṭhakaṃ bījaṃ dvitīyaṃ samudāhṛtam
tṛtīyam aṣṭakoṣṭhasthaṃ binduyoniḥ caturthakam //
caturviṃśatikoṣṭhasthaṃ pañcamaṃ bījam ucyate
bījāni devadevīnāṃ nirṇītāni yathākramam //
kālabaddhānilair bījaiḥ kalāyatheṣṭhayā yutam
Note: em. Sanderson: kālavahnyanilair bījaiḥ kalayā ṣaṣṭhayā yutamardhendu binduśikhayā saṃnibhāni krameṇa tu //
Note: em. Sanderson: ardhendubinduśikhayā saṃbhinnāni yathākramambījapañcakam uddhṛtya kathitaṃ devi te kramāt
kūṭasthās tu smṛtā bījāḥ pañca caiva varānane //
bījapañcakam abhyasya sarvakāmaphalapradam
yajanaṃ sampravakṣyāmi sarvasiddhipradāyakam //
karasaṃskāram ādau tu kṛtvānena krameṇa tu
vakṣyamāṇena cānena digbandhaśodhyam eva hi //
saṃhārāstreṇa digbandhaḥ prāṇāyāmapuraḥsaraḥ
prāṇāyāmais tribhir devi ātmānaṃ tu viśodhayet //
niṣkramya recayed vāyuṃ navaṃ cākṛṣya pūrayet
nirodhe kumbhakaḥ proktaḥ prāṇāyāmaṃ prakīrtitam //
dhyātvā kālāgnibījaṃ tu yugāntānalasaprabham
nyaset pādatale mantrī jvālāmālākulaṃ mahat //
nirdahec cātmadehaṃ tu vāriṇāplāvayet tataḥ
dagdhvā tu prākṛtaṃdehaṃ bhasmakūṭam iva sthitam //
tataś cāmṛtadhārābhir vidyādehaṃ vicintayet
sravantaṃ mūrdhni paramaṃ praṇavaṃ ca adhomukham //
vāruṇāmṛtasaṃyuktaṃ śuddhasphaṭikanirmalam
kaṣākhyaṃ yat smṛtaṃ bījaṃ rephadvayasamāyutam //
adha oṃkārasaṃyuktaṃ ūrdhvaṃ bindukabhūṣitam
anenaiva tu bījena śikhayā bhinnamastakam //
dhāraṇāyogamārgeṇa nirdahet sādhakottamaḥ
dehaṃ saṃśodhayen mantrī ghorapāpaṃ tu kalmaṣam //
nyāsam ālabhanaṃ kuryād bhaven mantrātmavigrahaḥ
digbandhabhūmiṃ saṃśodhya cakraśuddhyartham eva ca //
saṃhārāstreṇa kurvīta vighnoccāṭanam eva ca
hastau saṃśodhayet paścād vidhir eṣa prakīrtitaḥ //
kṛtvā tu vidhivan mantrī tataḥ karma samārabhet
āmaṇibandhanāt pūrvaṃ bharamākhāś ? ca vinyaset //
aṭguṣṭhādikaniṣṭhāntaṃ nyased vai bījapañcakam
aṭguṣṭhād ye tu ye parvā karayor ubhayor api //
ātmatattvaṃ nyasenmūrdhni vidyātattvaṃ dvitīyake
śivaṃ dadyāt tṛtīyeṣu sarvasiddhiṣu bhāmini //
adhastād ātmatattvaṃ tu vidyātattvaṃ tu madhyataḥ
śivatattvaṃ nyasen mūrdhni haste dehe punaḥ kramāt //
evaṃ tattvatrayaṃ nyasya tathā kūṭākṣarāṇi tu
bhūyaś cottarabījāni vinyaset tu varānane //
astraṃ caiva tu vinyasya visphuliṭgasamaprabham
māyayācchādayitvā tu aṭkuśena nirodhayet //
yonimudrāṃ tato baddhvā kuryāt [tu] sakalāṃ tanum
etad ālabhanaṃ caiva tava devi prakīrtitam //
aṭguṣṭhau grathitau kṛtvā karayor ubhayor api
tarjanīṃ vāmahaste tu prasāryākuñcayed budhaḥ //
eṣā nirodhanī proktā mudreyam aṭkuśasya tu
vaśyākarṣaṇakāryeṣu prayojyā sādhakottamaiḥ //
tarjanī madhyamā caiva anāmā dakṣiṇasya tu
vāme trīṇi samākramya aṭguṣṭhau ca susaṃsthitau //
adhastāt sarvataḥ proktā dakṣiṇā tu kaniṣṭhikā
tarjanyaṭguṣṭhayor madhye yonimudrā prakīrtitā //
ādyaṃ mūrdhni tato bījaṃ dvitīyaṃ mukhamaṇḍale
kaṭyūrdhve ca tataś cānyaṃ caturthaṃ jānutaḥ kaṭim //
āpādajānunī cānyaṃ prasṛtaiś ca karaiḥ kramāt
evaṃ bījena dehas tu mucyate nātra saṃśayaḥ //
vajropalamahāvarṣaṃ coradaṃṣṭrībhayāvaham
mucyate ca sadā rogair mṛtyurūpair durāsadaiḥ //
ahigaraviṣaśastrajvarakuṣṭhakṣayādibhiḥ
mucyate nātra saṃdeho yo 'pi syāt pātakī naraḥ //
upalipya śubhe deśe pracchanne janavarjite
pūrvavad dhastamātraṃ tu likhitvā maṇḍalaṃ śubham //
catuḥpattraṃ tu tatrābjaṃ sarvavarṇitakarṇikām
sitaraktapītakṛṣṇāṃ pūrvādidalasaṃsthitām //
jayādyaṃ vinyasen mantrī tumburuṃ karṇikopari
padmāsanopaviṣṭaṃ tu varadānodyatakaram //
caturvaktramaṣṭabhujaṃ catuṣkāyaṃ trilocanam
nāgayajñopavītaṃtu śūlapāṇiṃ gadādharam //
mukuṭena vicitreṇa śaśāṅkadhṛtaśekharam
śaktīnāṃ tu priyaṃ devaṃ pāśāṅkuśakaraprabham //
divyāmbarātapatreṇa divyasragbandhalepanam
devadevaṃ sadā dhyāyet sūryakoṭisamaprabham //
kṣīrodaphalasaṃkāśāṃ vyāghrayajñopavītinīm
pretārūḍhāṃ caturvaktrāṃ gadākheṭakadhāriṇīm //
divyāmbarātapatreṇa hārakeyūrabhūṣitām
devadevīṃ jayāṃ dhyāyed dīpyamānāṃ svatejasā //
devasyābhimukho mantrī sasmitotphullalocanām
dāḍimīkusumaprakhyāṃ suragopakasaprabhām //
cāpodyatakarāṃ ghorāṃ matsyamāṃsasurāpriyām
ulūke saṃsthitāṃ devīṃ hārakeyūrabhūṣitām //
raktāmbarātapatreṇa vijayāṃ siddhidāṃ smaret
dhātucāmīkaraprakhyāṃ pītamālyāmbarapriyām //
ghaṇṭākhaṭvāṅgadharīṃ devīm aśvārūḍhāṃ mahābalām
sūryāyutapratīkāśīṃ sarvābharaṇabhūṣitām //
jayantīṃ dhyāyati kṣipraṃ siddhim āpnoti puṣkalām
bhinnāñjanasamaprakhyāṃ śarvarītimiraprabhām //
kṛṣṇakauśeyasaṃvītāṃ muktikāmaṇibhūṣitām
divyaṃ vimānam ārūḍhāṃ gadākheṭakadhāriṇīm //
mahārāvādinirghoṣaiś cintayed aparājitām
gāyatrīṃ vā japantīṃ ca sphāṭikamaṇibhūṣitām //
ṛgyajussāmātharvākhyaṃ gāyantīṃ vā tathaiva ca
sāvitrīṃ divyarūpāṃ tūpaniṣadgāyane ratām //
devīnām agrasaṃsthaṃ kṛtabhṛkuṭimukhaṃ cintayed aṅkuśākhyaṃ
sampṛṣṭhe cāstrarājaṃ prakaṭitasumahāsṛkvaṇīlelihānam
sampṛṣṭhe cāstrarājaṃ prakaṭitasumahāsṛkvaṇīlelihānam
saṃkruddhaṃ bhīṣayantaṃ nararudhiravasādigdhadāntākalālaṃ
....... ....... ....... //
....... ....... ....... //
evaṃ dhyātvā viśālākṣi tataḥ pūjā pravartate
bhakṣyabhojyavidhānaiś ca gandhapuṣpādibhiḥ kramāt //
pūjayet kūṭamadhyasthaṃ tatra madhye vidhānataḥ
bhūr evāyaṃ pādapadmair hṛdi vāmakare 'thavā //
manasā pūjayen nityaṃ siddhikāmaḥ samāhitaḥ
mahāśaṅkhamayaṃ kuryād athavā kacchapasya tu //
sauvarṇaṃ rajataṃ tāmraṃ kulaṃ bhavati siddhidam
gandhamaṇḍalake vāpi athavā bhasmamaṇḍale //
siddhārthamaṇḍale vāpi athavā hṛdi maṇḍale
kusumbhamaṇḍale vāpi puṣpamaṇḍalake 'pi vā //
nāgakeśarajobhir vā likhitvā maṇḍalaṃ śubham
muktidā siddhidā hy evaṃ bhavantīty avicāraṇāt //
sampūjya ca yathānyāyaṃ gandhapuṣpādi yojayet
darśayed yonimudrāṃ tu kāle karmāṇi kārayet //
samutpanneṣu kāryeṣu prāṇadraviṇahāriṣu
pūjitāḥ sādhakaṃ devyaḥ parirakṣanti putravat //
atrāpi yāgam evoktaṃ viśeṣaḥ ko 'paraḥ prabho
yathā tu abhyāsamātreṇa siddhir bhavati kāmadā //
kevalaṃ smaraṇād eva tathā tvaṃ vaktum arhasi
praṇayasva prasādaś ca yadi cāsti maheśvara //
śṛṇuṣvaikamanā bhadre prākṛtaṃ tapasaḥ phalam
praṇayād atulaṃ vāpi rahasyaṃ paramaṃ padam //
uttarottarayogena tantraṃ te kathitaṃ mayā
atrāntaram idaṃ jñānaṃ śrutvā bhavati nirvṛtiḥ //
prastārya pūrvavad varṇaṃ proddhared bījapañcakam
pūrvavat kramayogena sarvakāmaprasiddhaye //
ādau dvātriṃśakaṃ bījaṃ yuktam ekonaviṃśati
catustriṃśaṃ tato 'dhastād devadevaṃ prakalpayet //
jayā saptadaśaṃ bījaṃ yuktam ekādaśena tu
tad eva vijayākhyātā kiṃ tu yuktaṃ na kena cit //
pañcaviṃśac chikhābhāji yuktam ekādaśena tu
ajitāyāḥ samuddiṣṭaṃ caturthyāḥ śṛṇu sāmpratam //
varṇaikādaśasaṃyuktaṃ śambhusthaṃ pañcaviṃśakam
guhyam etat samuddiṣṭaṃ praṣṭavyaṃ nānyataḥ param //
sarvakāmapradaṃ devi etad vai bījapañcakam
uttaraṃ hṛdayaṃ hyetat sarvatantreṣu cottaram //
yāni kāni ca karmāṇi sarvāṇy etais tu kārayet
pañcaviṃśatikoṣasthaṃ yuktaṃ vai ṣoḍaśena tu //
astram etat samuddiṣṭam asmiṃs tantre ca suvrate
punar etadbījayuktaṃ viṃśakena samanvitam //
māyā hy eṣā samuddiṣṭā śivasyānantarūpiṇī
ādikoṣṭhakabījaṃ tu adhastāṣṭādaśasaṃyutam //
aṣṭatriṃśatikoṣasthaṃ tasyopari niyojayet
aṅkuśoddharaṇaṃ hy etad devīnāṃ saṃnirodhane //
bindupuñjasametā hi nyastavyā tu yathākramam
pañcaviṃśatikoṣasthaṃ tad eva paramākṣaram //
navatriṃśasamāyuktaṃ bījaṃ gāyatrisaṃjñakam
etad bījavaraṃ divyaṃ yojyam ālabhanādike //
catustriṃśatikoṣasthaṃ pañcaviṃśatiyojitam
sarvakarmasamuddiṣṭaṃ bījaṃ sāvitrisaṃjñitam //
ardhenduśikhayā devi lāñchitāni tu pūrvavat
prayogaṃ cāsya vakṣyāmi siddhir yenāśu jāyate //
prayogaṃ kāraṇaṃ devi granthaśāstram akāraṇam
sarvatra sulabhaṃ śāstraṃ prayogaṃ tu sudurlabham //
prayogarahitā mantrā naiva siddhipradāḥ smṛtāḥ
hṛtpadme yogavinyāsaṃ dhyātvā vai bījapañcakam
gatiṃ devaṃ tu vijñāya tataḥ karma samārabhet //
kīdṛśaḥ sa bhaved devo gatis tasya tu kīdṛśī
dehasthaṃ tu kathaṃ vidyād vaktum arhasi śaṅkara //
meḍhranābhyantare devi kandamūlākṛtir bhavet
dvāsaptatisahasrāṇi nāḍīr ādhārasaṃsthitāḥ //
nābhideśe sthito granthis tatra padmaṃ vyavasthitam
karṇikā padmamadhyasya tatra sādhyaṃ vyavasthitam //
karṇikāsuṣirānte tu yā kalā cordhvagāminī
tasyā madhye sthito devaḥ sa tu dīpaśikhopamaḥ //
śuddhasphaṭikasaṃkāśaṃ visphuliṅgārkasaṃnibham
vārimārutasaṃkīrṇaṃ vālāgraśatabhāgakam //
vāyuvāhanam ārūḍhaṃ śabdātītam anāmayam
sampratyayaṃ tu gamyo 'sau vahate dehamadhyataḥ //
iḍāmadhyagato vāpi piṅgalāntargato 'pi vā
suṣumnāntargataś caiva viṣuvaṃ samudāhṛtam //
iḍā tu vāmajā proktā dakṣiṇe piṅgalā smṛtā
anayor madhye suṣumnā tu sṛṣṭisaṃhārakārikā //
iḍā śāntikapuṣṭyarthe mṛtyūccāṭana piṅgalā
suṣumnā mokṣadā caiva jīvamārgānusāriṇī //
piṅgalāntargataṃ dhyātvā raktavarṇaṃ vicintayet
māraṇoccāṭanādīni tataḥ karmāṇi kārayet //
amṛtāntargataṃ jñātvā dhyāyet tuhinasaṃnibham
śāntipuṣṭivaśākarṣaṃ tadā karmāṇi kārayet //
vratayogādisaṃsiddhiṃ mūlamantreṣu kārayet
tad atra japamātreṇa mantrī sādhayate kṣaṇāt //
aprasūtā mṛtā yoṣit prāptayauvanam eva ca
tasyāḥ pāṃśulikāṃ gṛhya vāmabhāge vicakṣaṇaḥ //
likhen nāmākṣaraṃ tatra devīnām kūṭasaṃsthitam
vāmāṅgojjvalaraktena sādhakaḥ saṃyatavrataḥ //
striyaṃ caiva likhet tatra gavāṃ rocanayā punaḥ
anulomair vihanyas tu vāmapādena cākramet //
tatkṣaṇād ānayec chīghraṃ yā strī dvādaśayojanāt
puruṣasya tathā proktaṃ dakṣiṇāṅge tu kārayet //
athābhicārakaṃ kuryāt samidhānāṃ tathāsthibhiḥ
rājikāviṣaraktāktaṃ śmaśāne homam ārabhet //
nagno muktaśikho bhūtvā kapālatrayasaṃsthitaḥ
samidhāṣṭaśataṃ homaṃ rātrau kuryād vicakṣaṇaḥ //
homānte tu tataḥ śakraṃ kṛṣṇavarṇam vicintayet
triśūlena vinirbhinnaṃ daṇḍena tāḍitaṃ śiraḥ //
sādhako ghorarūpeṇa kruddhaḥ saṃraktalocanaḥ
saptāhān nāśayed indraṃ kiṃ punar mānuṣādikam //
tyaktena tu kusumbhena śatenāṣṭottareṇa tu
trisandhyaṃ dhārayed rātrau agnikāryaṃ tu kārayet //
sādhyaṃ tu sādhakaś caiva raktavarṇaṃ vicintayet
homānte tu dhyāyet sādhyaṃ vihvalaṃ ca sammūrchitam //
aṅkuśena hato mūrdhni māyāpāśena veṣṭitam
rājānaṃ rājapatnīṃ vā saptāhād vaśam ānayet //
gṛhītvā tu mahāmāṃsaṃ dadhimadhvājyasaṃyutam
āhutyaṣṭasahasreṇa sadyotkarṣaṇam uttamam //
ātmanaḥ sādhyabījaṃ ca pañcadevyā catuṣṭayam
nāḍīmadhyagataṃ dhyātvā ekīkṛtya vicakṣaṇaḥ //
nāḍīmārgānusāreṇa praveśya sādhyavigraham
anenaiva prayogeṇa trailokyaṃ vaśam ānayet //
ata uccāṭanaṃ kuryāc chatrūṇāṃ baladarpitām
śuṣkāṇi nimbapattrāṇi dhvajāgrāṇi tathaiva ca //
nṛvālaṃ citibhasmaṃ ca kākapakṣāgrapicchakam
kaṭutailaviṣaṃ raktaṃ tenāloḍya tu homayet //
caṇḍālāgniṃ samāhṛtya citikāṣṭhaṃ samindhayet
uccāṭayet trirātreṇa tyaktabandhusuhṛjjanān //
vāmahastatale candraṃ dhyātvā sampūrṇamaṇḍalam
bījapañcakasaṃyuktaṃ yasya taṃ darśayet karam //
darśanād vaśam āyānti ye 'pi hantuṃ samudyatāḥ
yaṃ yaṃ spṛśati hastena dāsatvam upagacchati //
dakṣiṇe 'py eva vai haste vinyased ravimaṇḍalam
yaṃ spṛśed darśayed yaṃ tu vidviṣṭāḥ suhṛdāny api //
nimbasthavāyasaṃ gṛhya śvapākenāvatāritam
bījair etair viparyastais tailābhyaktaṃ citāhutam //
tad bhasma viṣaraktāktaṃ kṛṣṇānte raktavāsasaḥ
parijapya sahasraṃ tu vilomair bījapañcakaiḥ //
yaṃ spṛśed bhasmanā tena kākavad bhramate mahīm
vidviṣṭaḥ sarvalokānāṃ yadi śakrasamo bhavet //
yathātmani tathā sādhye bījaṣoḍaśakaṃ nyaset
javāpuṣpasamaprakhyau dvāv etau paricintayet //
jātīhiṅgulakapakṣau lākṣārasasamaprabhau
padmasampuṭamadhyasthau ubhau tau sādhyasādhakau //
aṅkuśaṃ sādhyaguhye tu daṇḍaṃ cātmani guhyataḥ
kusumbharaktasaṃkāśau māyātantvabhiveṣṭitau //
pañcarātraṃ trirātraṃ vā niḥśabdo dhyānapāragaḥ
vaśam ānayate kṣipraṃ nṛpatiṃ mānagarvitam //
dvijayoṣin mṛtā yā tu tasyā gṛhyaṃ tu karpaṭam
kṛṣṇacaturdaśyāṃ gṛhītvā cityaṅgārais tadudbhavaiḥ //
bījair vidarbhitaṃ nāma yasya yasya ca veśmani
nikhanyate sa vai kṣipraṃ prayāti yamasādanam //
tato vidyāvrataślāghī kīrtyādibhir alaṃkṛtaḥ
sādhyate 'nena prayogeṇa mriyate cāvikalpataḥ //
gavāṃ rocanayā caiva yasya nāma vidarbhitam
bījair etaiḥ samāyuktair ālikhya prakṣiped budhaḥ //
pātraṃ madhvājyasampūrṇaṃ śatam āvartayed drutam
mumukṣor api tasyāstraṃ śāntipuṣṭiś ca jāyate //
śatajapto jalenāpi tato vā mucyate sadā
vyādhighātasamidbhis tu vyādhinātyantapīḍitaḥ //
aṣṭottaraśatenaiva āhutīnāṃ na saṃśayaḥ
kṣīrāktena tu deveśi rogī rogād vimucyate //
juhoti yas tu satataṃ dravyaṃ tasya gṛhe tu yat
kurvanto 'pi vyayaṃ nityam akṣayatvaṃ ca gacchati //
nityaṃ kālajapenāpi sarveṣāṃ jāyate priyaḥ
tejasvī balasampanno nāpy asau pīḍyate bhayaiḥ //
śrīkāmaḥ śrīphalaṃ juhyāt padmaṃ cājyamadhuplutam
lakṣaikena mahāvitto mantrī lakṣadvayena tu //
lakṣatrayeṇa pṛthvīśo nirjitārir bhaved dhruvam
sarvakāmas tilaṃ juhyāt prāpnuyāt tu na saṃśayaḥ //
lakṣeṇaikena deveśi sādhakaḥ sa jitendriyaḥ
tyaktena naramāṃsena chāgasya piśitena vā //
lakṣamātrahutenāśu yad iṣṭaṃ tad avāpnuyāt
kṛṣṇāgopayasā sārdhaṃ nṛmāṃsaṃ taṇḍulānvitam //
pāyasaṃ śavavaktre tu juhuyāt tāvatandritaḥ
yāvad uttiṣthate pretaḥ kiṃ karomīti so 'bravīt //
mārgitavyaṃ yad iṣtaṃ tu labhanīyaṃ yaśasvini
guḍikāñjanapādukaṃ khanyaṃ vā rājyam eva ca //
Note: em.: guḍikāñcanapādūṃ ? ca Ed
vidhānaṃ śakranāśaṃ ca pādaleparasāyanam
eteṣāṃ prārthitaṃ caikaṃ dattvāgacchati nānyathā //
uddhatā yā mṛtā yoṣit tasyā gṛhyāṅgulīyakam
abhimantrya imair bījair anulomaiḥ śatena tu //
aṣtādhikena mantrajñaḥ sādhyanāma vidarbhayet
yasyā dadāti tadvad āste striyāyāḥ sādhakottamaḥ //
ākarṣyati tāṃ kṣipraṃ yadi syād urvaśīsamā
yojanānāṃ śatasyāpi dūreṇāpi samarpitam //
puruṣasya bhaved devi uddhatasya yaśasvini
kākamāṃsaṃ gṛhītvā tu nimbatailasamāyutam //
śmaśānāgniṃ samādhāya śigrukāṣṭhena sādhayet
juhuyāt saptarātraṃ tu yasya nāmnā tu sādhakaḥ //
vidviṣto dṛśyate loke eṣa vidveṣaṇaṃ param
ato 'nyat sampravakṣyāmi rahasyam idam adbhutam //
yad viditvā maheśāni siddhim āpnoti puṣkalām
svakāle samprayogeṇa siddhis tantreṣu kīrtitā //
tataḥ svakālaṃ kurvīta svāni karmāṇi sādhakaḥ
sādhyahṛtpadmasaṃsthaṃ tu dhyātvādau bījapañcakam //
kurvīta manasā pūjām itāyāpravato ? padā
māyayācchādayet paścāt sādhyam antobahiryutam //
māyākamalanālena sādhyam āveṣtam ānayet
tataḥ svātmīkam ānīya māyātattvaślathīkṛtam //
pun as tat sthāpayitvā tu sammukhaḥ sādhakottamaḥ
nyastavyaṃ tu yad ādau tu ? sādhye vai bījapañcakam //
māyāveṣtitaṃ tan mantrī japed aṣṭaśataṃ tataḥ
sādhyanāmākṣaropetaṃ tatprabuddhāsane sthitam //
evaṃ devi tataḥ śīghraṃ dhvastajānuśiroruhaḥ
ākṛṣto vidhinānena sādhyaḥ kiṃkarito mahān //
ataḥ paraṃ pravakṣyāmi baddhe ruddhe 'pi mokṣaṇam
yathā saṃharate śakraṃ tatprayogam idaṃ śṛṇu //
sādhyahṛtkamalāntaḥsthaṃ dhyātvaivaṃ bījapañcakam
kurvīta pūrvavat pūjāṃ suṣumnāyāganirgadā ? //
saṃhārāstraṃ tato mantrī tumburuṃ mūrdhni vinyaset
devīnāṃ ca tatas tena sādhyam āvṛtya yogavit //
tatra yo mūrdhni tenaiva jvalitānalavarcasā
dṛṣtvā taṃ manasā bhūyo mūrcchitaṃ bhuvi vihvalam //
hṛdi baddhvāṅkuśenaiva ānayed ātmano 'ntikam
tatas tvadhomukhaṃ sthāpya pīḍitaṃ chardayed asṛk //
paścāt tu hṛdaye tasya nyastavyaṃ bījapañcakam
proddhṛtya sādhyanāmaivaṃ saṃhārāstravidarbhitam //
evaṃ vigatarakṣaṃ tu syāpyudgataṃ tu ? tataḥ
japed aṣṭasahasraṃ tu jvālāmālābhir āvṛtam //
tatas tu karmaṇānena tenaiva tu vidhānataḥ
sādhyaḥ prayāti nidhanaṃ mṛtyur āntima ? kampayet //
ity etat kathitaṃ devi samāsādyaṃ tu pūrvaśaḥ
yathā saṃharate śakraṃ baddhe ruddhe 'tha mokṣaṇāt //
krodhena mahatā dīptaḥ prayogam idam ārabhet
suṣumnāyāṃ yadā devaḥ svayaṃcāreṇa vartate //
suṣumnāntargataṃ dhyātvā raktavarṇaṃ vicintayet
vidveṣoccāṭanādīni tataḥ karmāṇi kārayet //
bījapañcakadevasya vargāntarayutasya ca
varṇāntayāgam ekānte sadā gopitaṃ tan mayā //
tadā tu sarvakāryāṇāṃ siddhaye śṛṇu suvrate
kusumbharajasāloḍyaṃ śālīnāṃ piṣṭakena ca //
bhasmanā candanenāpi nāgakeśarajena vā
sugandhaiś ca vicitraiś ca likhec ca susamāhitaḥ //
vargātītasya garbhe tu nyaset padmaṃ caturdalam
tatra sabhrātṛkā devyaḥ pūjayed bījapañcake //
evaṃ pūjitamātrās tu sarvadāsarvakāmadāḥ
bhavanti niyataṃ[nityaṃ] dharmakāmārthamokṣadāḥ //
yāgam evaṃ ca kṛtvānte tato lakṣatrayaṃ japet
tataḥ siddhim avāpnoti brahmaghno 'pi hi nānyathā //
manasā cintitaṃ kāmaṃ tadā prabhṛtim āpnuyāt
ataḥ paraṃ pravakṣyāmi japasya vidhim uttamam //
ekāsanasthito mantrī yāgaṃ kṛtvā vidhānavit
ekacittaḥ prasannātmā vāmahastākṣasūtradhṛk //
japakarma sadākuryād viśeṣam aparaṃ śṛṇu
vaśyakāmo japaṃ kuryād anulomair vidarbhitam //
bījair etair yathānyāyaṃ sādhyanāmākṣarānvitaiḥ
kālaṃ tatra vijānīyāt kālasiddhiḥ pravartate //
māraṇe pratilomais tu sādhyanāma tu pūrvataḥ
vidveṣe 'pi vilomais tu phaṭkārāntaṃ prayojayet //
māraṇe pratilomais tu hūṃphatkārānta dyan ? takaiḥ
oṃ svāhā namo 'ntais tu vaśyākarṣaṇakarmasu //
homayed evam evaṃ tu sarvaṃ kuryād vicakṣaṇaḥ
namaskāro japasyānte svāhā home prakīrtitam //
svaśoṇitāktaṃ laśunaṃ māraṇe pratihomayet
uccātane kākapakṣaṃ vaśye jātiṃ tu homayet //
vidveṣe śleṣa śigruṃ ca homayed avicāraṇāt
ākarṣaṇe bakulapuṣpaṃ homayec ca vicakṣaṇaḥ //
sarve yāgasamuddiṣtāḥ kālajñasya yaśasvini
yena kālaṃ ca vai jñātaṃ tena jñātaḥ sadāśivaḥ //
sadāśive parijñāte siddhiṃ śāmyanti sādhakāḥ
kālatattvaṃ ca vijñeyaṃ tattvātsiddhiḥ pravartate //
tattvahīnā na sidhyanti prayatnenāpi sādhakāḥ
tasmāt sarvaprayatnena kālatattvaṃ vidur budhāḥ //
kriyākālaṃ ca vai śūnyaṃ na sidhyantīha sādhakāḥ
tasmāt kriyāṃ ca kālaṃ ca asaṃjñeyaṃ prayatnataḥ //
sa kālaś ca kathaṃ jñeyo yo 'sāv uktas tvayā prabho
kālahīnānṛtaṃ manye sarvam eva ca śaṅkara //
śṛṇu devi paraṃ guhyaṃ kālatattvātmavigraham
yaj jñātvā tu sukhenaiva siddhir bhavati mantriṇām //
ayutaṃ dve ca vijñeyāḥ ṣoḍaśaiva śatāni ca
caturviṃśatisaṃkrāntyā dvādaśāṅgulagatāgate //
śarīre tu yathā devi sthitaṃ sakalaniṣkalam
tathā haṃsaṃ pravakṣyāmi sādhakānāṃ hitāya vai //
pādau pāyur upastham ca hastau vāgindriyas tathā
śrotratvakcakṣuṣā jihvā nāsikā ca tathāparā //
pṛthvy āpas tathā tejo vāyur ākāśam eva ca
śabdaḥ sparśaś ca rūpaṃ ca raso gandhas tathaiva ca //
mano buddhir ahaṃkāro avyaktam puruṣas tathā
pañcaviṃśatitattvāni śarīre tu vidur budhāḥ //
ebhir ādhārabhūtais tu ādheyo dhyāyate sadā
ādhāraṃ puram ity uktaṃ puruṣaś cādheya ucyate //
hṛtpadme karṇikāvastha ūrdhvagāmī sadātmakaḥ
niṣkalasya tu devasya punar ādhārasaṃsthitiḥ //
tatpuruṣam ādhārādheyaṃ niṣkalaṃ paramaṃ śivam
ṣatkauśikaśarīraṃ tu tattvānāṃ pañcaviṃśatiḥ //
daśavāyusamāyuktaṃ nāḍībhir vyāpitaṃ puram
śarīraṃ triguṇaṃ caiva sarvadaivatasaṃyutam //
anenādhiṣthitaṃ devi cakravat parivartate
yathā tāragaṇaṃ sarvaṃ grahanakṣatramaṇḍalam //
dhruvādhiṣthitaṃ tat sarvam acalaṃ parivartate
tadvac charīraṃ devasya sarvabījagaṇaṃ hi yat //
śivenādhiṣthitaṃ jñātvā tantre siddhim avāpnuyāt
trikubjikutilākārā ṣaṣṭhasvarasamanvitā //
śaktir binduvinirbhinnā dehasthā sakalātmakā
asyās tejaḥśikhā sūkṣmā mṛṇālatantusaṃnibhā //
jyotirūpā ca sā jñeyā tasyānte tu punaḥ śivaḥ
akārādikṣakārāntam ābrahmabhuvanaṃ jagat //
asmiṃś codpadyate sarvaṃ tatraiva pralayaṃ bhavet
eṣa devaḥ paraḥ sūkṣma ādhārādheyasaṃsthitaḥ //
ayane viṣuve caiva āgneyāmṛtakāraṇam
yadā vāruṇamārgastha iḍāmadhyagato bhavet //
himakundendusaṃkāśo vijñeyaḥ śucikarmaṇi
dvādaśādityasaṃkāśaḥ piṅgalāntargato yadā //
aruṇānalasaṃkāśaṃ raudrakarmaṇi yojayet
suṣumnāyāṃ yadā deva upaśānto vahaty asau //
mokṣamārgam idaṃ devi jyotīrūpaṃ parāparam
eṣa devo gatiś caiva kālatattvātmavigrahaḥ //
sādhakasya hitārthāya paramārtham udāhṛtam
etatsarvaṃ samākhyātaṃ kālatattvātmavigraham //
trisaṃsthe tu samāsena sarvatantreṣu siddhidam
nāḍīsaṃsthaṃ yathā karma kurute mantriṇaḥ sadā //
tad ahaṃ sampravakṣyāmi śṛṇu tvaṃ ca varānane
iḍā ca piṅgalā caiva nāḍyau dve samudāhṛte //
yato nityaṃ cared devaḥ kramaśaś ca nivartate
tāny ātmavatakarmāṇi prayuktaṃ kurute prabhuḥ //
sa eva kurute karma bījanāḍīprayogataḥ
ayaṃ kālaḥ samākhyātas tṛtvedaya ? samanvitaḥ //
dehastham kathitaṃ devi ṛtuyuktas tu sādhakaḥ
jñātvā kālaṃ ca tattvaṃ tu tataḥ karma samārabhet //
śāntikaṃ pauṣtikaṃ cāpi vidveṣoccāṭanaṃ tathā
vaśyākarṣaṇakaṃ kuryād yadi kālaṃ vijānate //
saumyāni saumyakāle tu raudre raudrāṇi kārayet
anyakālakṛtaṃ karma vṛthā bhavati sādhake //
tasmāt sarvaprayatnena kāle karmāṇi kārayet
svaraktaṃ gocanaṃ caiva tathā sindūram eva ca //
kusumbharajaḥsammiśraṃ dadhimadhvājyasaṃyutam
khadirai raktasamidhair athavā raktacandanaiḥ //
atra digdhvā hunen mantrī saptāhād vaśam ānayet
pratimāṃ lavaṇamayīṃ kṛtvā śatābhimantritāṃ budhaḥ //
pādau prabhṛti hotavyaṃ yāvad aṣṭaśataṃ bhavet
trisandhyām ekacittas tu amoghavaśyatāṃ nayet //
saikthīṃ tu pratimāṃ kṛtvā tryūṣaṇena tu lepayet
pratimāsu susampūrṇaṃ kaṇṭakair madanodbhavaiḥ //
vidarbhya pādau guhyaṃ ca lalātaṃ ca vicakṣaṇaḥ
kucayugme ca devīnām agrato nikhaneta tu //
adhomukhāṃ viliptāṅgāṃ rājikālavaṇena tu
vāmanāsikaraktena nāmamantrair vidarbhitām //
likhitvā hṛdaye kuryād vahniṃ prajvālya copari
rājikālavaṇaṃ caiva hotavyāṣtaśataṃ budhaḥ //
trisandhyām eva saptāhāt trailokyaṃ vaśam ānayet
kulālakaranirmuktamṛdā pratimayīkṛtā //
tenaiva kaṇtakair viddhvā svasthānasthais tu mantriṇaḥ
bhage vā athavā liṅge sanmantrāṇy aṣṭaśatāni tu //
sūtrayed guhyadeśe tu gṛṇan mantraṃ tu sarvadā
saptāhād ānayed vaśyaṃ striyaṃ vā puruṣam api vā //
mānuṣāsthimayaṃ kīlaṃ kṛtvā tu caturaṅgulam
kṣīravṛkṣaṃ bhage likhya liṅgaṃ vā kīlayet tataḥ //
ṣaṇḍilas tu bhavet sādhya ārdrayogo na saṃśayaḥ
uddhṛtena bhaven mokṣaṃ nātra kāryā vicāraṇā //
madhūkā śvetapadmaṃ ca rocanā nāgakeśaram
tagaraṃ caiva sūkṣmelam añjanaṃ samabhāgikam //
kanyayā piṣitaṃ kṛtvā yāgaṃ kṛtvā yathoditam
sahasrāṣtādhikaṃ japtvā japena yajane tataḥ //
sarvalokeṣu dṛśyante kāmadevasamo 'pi tat
vicareta mahīṃ kṛtsnāṃ nātra kāryā vicāraṇā //
mañjiṣthā kunduruś caiva haridre dve tu pīṣayet
piṣtvā pūrvavidhānena tato guhyaṃ pralepayet //
pravṛtte maithune kāle patir dāsaṃ kariṣyati
meṣalocanamūlaṃ tu kambalyā kṣīrasādhitam //
śmaśāne sādhayen mantrī rātrau kāṣṭhais tadudbhavaiḥ
kapālair guṇḍayed aṅgaṃ raktavāsoparicchadam //
udvartano 'bhayo hy eṣa vajravat syāṅkuśopamaḥ
bhakṣayed deśayet kaṃcit kāmāṅkuśavinirgataḥ //
puruṣo vaśam āyāti strī vā madanagarvitā
vālmīkamṛttikāṃ gṛhya balīvardaṃ tu kārayet //
kanyākartitasūtreṇa tasya nāsāṃ pravedhayet
athavā padmasūtreṇa raktacandanalepitam //
raktapuṣpaiḥ samabhyarcya sarvārṇavaṃ samānayet
sādhyasya vilikhen nāma svaraktena vṛṣodare //
śrīvṛkṣakotare sthāpya sādhyam evaṃ vaśīkuru
anenaiva mṛdā meṣaṃ kārayen mantravit sadā //
meṣasūtreṇa vai nāsāṃ vedhayet pūrvavac chuciḥ
devīnām agrataḥ sthāpya tasya nāsāṃ pracālayet //
yaṃ yaṃ vijñāpayet kāmaṃ taṃ taṃ prāpnoti sādhakaḥ
ete yogavarā devi mayā tava udāhṛtāḥ //
varṇānām udare yāgaṃ sarvakāmaprasiddhidam
evam eva magarbhasthaṃ māraṇe samprayojayet //
gavāṃ rocanayā likhya evam eva prayojayet
sodaremūkatāṃ kuryād vāgīśam api mūkayet //
nit yam ākarṣayet proktam ākārodare pūjitā
mahāpuruṣavarastrīṇāṃ japamānā tu kīrtanāt //
jñānāṅkuśagatā pūjā kṣipraṃ prāyeṣu vastuṣu
unmaneṣv atha ghoreṣu sākāreṇa tu sādhayet //
ekārodarayāgena bhavaty arthapradāyikā
vakāramadhyagā caiva vaśīkaraṇakarmaṇi //
dharmārthamokṣadā caiva puṣṭitejovivardhanī
bhavati niyatā devi haṃsamadhyeṣu pūjitam //
bhañjane yadi sainyānāṃ bhakārajathare sthitam
bhavati niyatā kṣipraṃ kṣemanābhigarīyasī //
māraṇe tu prayoktavyaṃ phatkārānte vyavasthitā
vidveṣaṃ tu prayacchanti jakārajatharesthitā //
śatrukulocchādaṃ kuryāt hūṃ phatkārānte vyavasthitā
svalpaprāyeṣu kāryeṣu yakārajatharodare //
dehanyāsaṃ punar vakṣye abhedyaṃ parameśvari
vinyasya karaṇān sākṣān mahābhūteṣu pañcasu //
dehe tattvatrayaṃ nyasya prāṇāyāmapuraḥsaraḥ
śarīre vinyased devi pūrvam uktakrameṇa tu //
māyayācchādayitvā tu aṅkuśena nirodhayet
yoniṃ baddhvā tataḥ paścāt sādhakaḥ susamāhitaḥ //
svadehe namasā mantrī kalpoktena tu karmaṇā
kuryāt sarvāṇi kāryāṇi tataḥ siddhir na saṃśayaḥ //
nayottarāditantreṣu kalpoktaṃ karma kārayet
athavādaśalakṣāṇi japed yas tu vidhānataḥ //
tataḥ sabhrātṛkā devyaḥ sādhakasyāgrataḥ sthitāḥ
varam iṣtaṃ prayacchanti trayātītaṃ padaṃ hi yat //
bījapañcakam etad dhi na deyaṃ yasya kasyacit
vargāntanirguṇākrāntaṃ samyag vai bījapañcakam //
evam eva purā kṛtvā jñātvaivaṃ hi vidhānataḥ
bījāni bījayet prājñaḥ tataḥ karma samārabhet //
evaṃ vidhānavid yas tu hīno vā sarvalakṣaṇaiḥ
api pātakasaṃyuktaḥ sa siddhiphalabhāg bhavet //
vargāntanirguṇākhyasya asyāpi paramaṃ smṛtam
hṛdayaṃ devadevīnām ekākṣaram ataḥ param //
yatra sabhrātṛkā devyaḥ kūṭadehā vyavasthitāḥ
nātaḥ parataro mantras triṣu lokeṣu vidyate //
gopitavyaṃ prayatnena tantrasāraṃ sudurlabham
mamāpi gopitaṃ devi sarvajñenāpi sarvadā //
niścayaṃ mama baddhvānta ? yac ca devena bhāṣitam
tvayāpi caivam evaṃ hi rakṣaṇīyaṃ prayatnataḥ //
cintāratnam idaṃ guhyaṃ vratasādhanavarjitam
anusmaraṇāmātreṇa samyagjñāya krameṇa tu //
varṇayāgakrameṇaiva pūrvoktena yathākramam
sidhyate nātra saṃdehaḥ sarvakāmas tu mantriṇām //
śāntikaṃ pauṣtikaṃ caiva vidveṣoccāṭanaṃ tathā
vaśyākarṣas tathā nāśaṃ sarvaṃ sidhyati sādhake //
śukreṇa sarvatobhadre mahāsammohane tathā
nirmathya kathito devi dadhno ghṛtam ivoddhṛtam //
parīkṣya guruṇā śiṣyaṃ gurudevāgnipūjakam
tasya deyam idaṃ tantraṃ na ca nāstikanindake //
na dīkṣitā na sidhyanti sthitāḥ kalpaśatair api
svayaṃgṛhītamantrāś ca nāstikā vedanindakāḥ //
samayebhyaḥ paribhraṣtās tathā tantravidūṣakāḥ
gurūṇāṃ viheṭhanaparās tantrasāravilopakāḥ //
yoginībhiḥ sadā bhraṣṭāḥ kathyante dharmalopakāḥ
iti tathyaṃ mahādevi surāsuranamaskṛtam //
sāram etad dhi tantrasya tasya tatsthaṃ mahānaye
ājñā bhagavataś caiva śivasya paramātmanaḥ //
śrutaṃ mayā mahādeva vīṇāsadbhāvam uttamam
tantraṃ vīṇāśikhaṃ nāma durlabhaṃ tridaśeṣv api //
vargāntanirguṇākhyasya asyāpi paramaṃ ca yat
ekākṣaraṃ paraṃ guhyaṃ bhuktimuktipradāyakam //
gopitaṃ tu tvayā deva sārabhūtaṃ maheśvara
tapasā durdharāllabdhaṃ yac ca jñānaṃ śivodbhavam //
prasādaṃ kuru deveśa yatra siddhir dhruvaṃ sthitā
prāpte kaliyuge ghore saṃkate bahupātake //
sarvasrotaḥprapannānām āśu siddhir yathā nṛṇām
prasādaṃ kuru deveśa kaḥ parampārate mama //
alpaprajñāḥ kumatayo bahuvyākulacetasā
tantraṃ naivādhigacchanti na caiva bahudhā śrutam //
iti deva tvayā pūrvaṃ kathitaṃ guruṇātmanā
asmākam api saṃkṣepāt kathayasva maheśvara //
aho svabhāvaprakṛte kimpraśnāsi punaḥ 'punaḥ
yan mayā kathitaṃ pūrvaṃ tad gṛhāṇa subhāṣitam //
na bhūyaḥ paripṛcchāmi praśnam ekā garīyasī
vāram ekaṃ kuru vyaktaṃ prasādaṃ sūkṣmagocaram //
śṛṇu devi prayatnena sūkṣmāt sūkṣmataraṃ mahat
prayogaṃ sarvatantrāṇām uttaraṃ sarvasiddhaye //
yena saṃsmṛtamātreṇa siddhir hastatale sthitā
nāyāso na vrataś caiva na tapaś ca maheśvari //
nāgnikarma na caivārcā smaraṇāt siddhidaḥ smṛtaḥ
śṛṇuṣvaikākṣaraṃ devi sadbhāvaparasaṃhitam //
śarīraṃ tattvarājānaṃ jātavedasi saṃsthitam
śikhāyāṃ saṃsthito devo bindudevī jayā smṛtā //
yaścātrordhvaṃ bhaved devi saukaraḥ parikīrtitaḥ
tantudevaṃ vijānīyān makāraṃ bindudevatām //
evaṃ tu pañcadhā devi tattvarājaṃ tu kīrtitam
caturviṃśatikoṣthe tu yo mantranāyakaḥ smṛtaḥ //
tattvarāja iti khyāta ūnaviṃśaty adhaḥ smṛtaḥ
viṃśakena svareṇaiva bindumūrdhnā tu pīḍitam //
eṣa ekākṣaraḥ proktas tvatpriyārthaṃ varānane
suṣiraṃ tattvarājānaṃ jātavedasi saṃsthitam //
viṣṇor upari dīptena japel lakṣatrayaṃ budhaḥ
ākarṣayed drumāṇy eṣa mṛgapakṣisarīsṛpān //
mānuṣāṇāṃ tu kā cintā ākarṣaṇavidhiṃ prati
ekādaśamaḥ saṃyuktas tattvarājena śobhane //
śirasā bindubhinnena hṛdi caiṣa nigadyate
saptaviṃśa śiraḥ proktaṃ triṃśamas tu śikhā bhavet //
ūnacatvāriṃśatir devi tattvo 'yaṃ kavacaḥ smṛtaḥ
ṣoḍaśasvarasaṃyuktam etad astraṃ prakīrtitam //
netraṃ tu kathitaṃ devi viṃśatyakṣarayojitam
eṣa ekākṣaro devi ṣaḍaṅgaḥ samudāhṛtaḥ //
haṃso māyāyukto devi nārācāstravidarbhitaḥ
savisarganayapadaṃ bījāntasthaṃ(?) ū ī siddhikarī nṛṇām(?) //
ha ra tra vṛddhiṃ karoti .... ....
māyāṅkuśanirodhās te sarvamantragaṇādayaḥ //
kramaśo yojayen mantri yadīcched dīrgham ātmani
sarvam etat parityajya kuryān mantraparigraham //
ātmātīndriyādhārāṇāṃ kṛtvā kartavyaṃ muhur muhuḥ
padārthavidhisaṃyuktaṃ yan mayā gaditaṃ purā //
tad anena prayogeṇa kartavyaṃ siddhim icchatā
dhyāyet sindūrasadṛśaṃ vaśyākarṣaṇakarmaṇi //
māraṇe kṛṣṇavarṇaṃ tu vidveṣe vāmarūpakam
uccāte dhūmravarṇaṃ tu śvetaṃ caiva puṣṭyarthinā //
mayūragrīvasadṛśaṃ stambhane cintayet sadā
sarvavarṇadharaṃ caiva sarvakāmikam eva ca //
sarvendriyāṇāṃ kurvīta upahāre mahādhipe
hṛtpadmakarṇikordhvaṃ tu suṣiraṃ tatra cintayet //
sphuliṅgaṃ karṇikārūpaṃ nirdhūmatejarūpiṇam
dhūmajvālāvinirmuktaṃ sūryakoṭisamaprabham //
tasyordhve tu śikhā sūkṣmā nirmalā sphātikopamā
nityaṃ sā sevyate yuktair yogibhir niṣkalā parā //
ūrṇātantusamākārā ūrdhvasrotā nirupamā
tatra madhye gataṃ paśyed devyā guhyottarambhavā //
vālāgraśatabhāgākhyāvīṇādhārāsusaṃsthitā
dhyāyeta nityaṃ yogīndraḥ sūkṣmaguhyasamudbhavām //
kṛtvā pūrvaṃ tu vinyāsaṃ sakalābāhyasaṃsthitam
evaṃ varṇavibhāgaṃ tu jñātvā siddhim avāpnuyāt //
vaśyākarṣaṇakarmāṇi vācayā sa kariṣyati
vīṇāśikhāyāḥ sarvasvaṃ cintāratnam ivāparam //
etad bījavaraṃ prāpya yathepsasi tathā kuru
ājñā bhagavataś caiṣā sarvadāvyabhicāriṇī //
dhyātavyā sā prayatnena yadīcchet siddhim ātmanaḥ
yajanaṃ yājanaṃ caiva saṃyogaṃ ca layaṃ tathā //
samayākṣarabījaṃ ca akṣarākṣarayojitam
rakṣaṇīyaṃ tvayā bhadre prayatnena suniścalam //
etad guhyaṃ samākhyātaṃ tava snehād vicakṣaṇi
etaj jñātvā tu mantrajñaḥ śivasāyujyatāṃ vrajet //
Note: em: #sāyojyatāṃ Ed
evaṃ vilayatāṃ yāti vidhinānena yoṣitām
amalīkṛtadehas tu vidhinānena sādhakaḥ //
amalīkṛtaṃ tanmantraṃ hṛccakre viniyojayet
somamaṇḍalamadhyasthaṃ dhyāyet kundendusaprabham //
amṛtena tu siñcanti lāntīsagatilitena ? tu
evam āpyāyito mantraḥ sarvasiddhiprado bhavet //
evam āpyāyanaṃ kṛtvā bindumadhyevicakṣaṇaḥ
aṣṭottarasahasraṃ tu mantrāṇāṃ mantravij japet //
paramīkaraṇaṃ hy etan mantrasyāpyāyanaṃ smṛtam
śivībhūtas tu mantro vai sādhayed akhilaṃ jagat //
sūryacakraniruddhaṃ tu śirasi samavasthitam
japet hūṃkārasahitaṃ bodhanaṃ parikīrtitam //
ādityacakramadhyasthaṃ vahninā saṃnirodhitam
nirdahate mantraṃ devi yadā karma na kurvati //
śikhāmadhyagataṃ dhyātvā sahasraṃ parivartayet
mantram evaṃ samuddiṣtaṃ guhyaśaktipradīpanam //
dahanaṃ cāgninā kāryaṃ hūṃkāreṇa prabodhayet
dīpanaṃ tu śikhāmadhye mantrāṇāṃ mantravādinām //
amalīkurutesūryaś candreṇāpyāyanaṃ smṛtam
śivīkurvīta bindusthaṃ mantrī mantraṃ tu yogavit //
evaṃ mantraviśuddhas tu candrasūryasamanvitam
dīpanaṃ śaktinā nityaṃ japen mantrī samāhitaḥ //
amṛtodbhavakāle tu mantrī yatnena niścayāt
vaśam ānayate kṣipraṃ viśvaṃ manata ? saṃśayaḥ //
yāvatī māyā mantrāṇāṃ sarveṣāṃ kathitā mayā
vidhir atra krame cāyaṃ paścād vakṣye jape vidhim //
yajanakāle samprāpte ekacittaḥ samāhitaḥ
hṛtpadme karṇikāsīnadevatārpitamānasaḥ //
śikhābinduṃ vinirdhārya tanmantraṃ hṛdi saṃsthitam
putavarṇavidhānaṃ syād akṛtoccāranisvanam //
svasthacitto hy asammūḍha alākūrdhvasthitātmanaḥ
avicchinnaṃ drutaṃ caiva avilambitam eva ca //
tāvan mantrī japen mantraṃ yāvac cittaṃ na khidyate
alabhya mama mantraṃ syād drutaṃ kālasya sidhyati //
japaṃ kṛtvā tu medhāvī nānyam etat samarpayet
mantrī kurvīta yatnena yathārthatvaṃ nibodhata //
prathame vāyavī proktā dvitīyā tv analā smṛtā
tṛtīyā caiva māhendrī vāruṇī tu tathāpare //
oṃkārapūrvato mantraṃ namaskārāntayojitam
bījapiṇḍaṃ tu madhyasthaṃ mudrāyuktaṃ sadā yajet //
kṣipram arthas tathā karma bhuktibhogaṃ sudurlabham
sādhayen manasā sarvaṃ bījamudrāprayogataḥ //
hūṃkāram adito nyastam namaskārāntavyavasthitam
uccātayet sarvaduṣtān daityabhūtagrahāṃs tathā //
oṃkārayojitasyādau svāhākārāvasānataḥ
agnikāryaprayogo 'yaṃ kṣipram arthaṃ prasādhayet //
oṃkārasamputaṃ piṇḍaṃ rakāreṇa tu dīpakam
sādhayen manasā dhyātvā kāmārthaś ca yathepsitam //
suptaṃ bodhayate mantrī śīghraṃ siddhim avāpnuyāt
oṃkāraś ca rakāraś ca phaṭkāraś caiva madhyataḥ //
madhye vargāntapiṇḍas tu karma kuryād yathepsitam
hūṃkāram ādau ante ca hakāraś cādimadhyataḥ //
japan tu bodhayen mantrī api suptam acetanam
hūṃkāraś ca rakāraś ca phaṭkāram ādimadhyataḥ //
kruddhas tu jāpayen mantrī yadākarma na kurvati
oṃkārasamputaṃ kṛtvā namaskārāntayojitam //
japet piṇḍākṣaraṃ mantrī sarvasiddhikaraṃ param
śāntikapauṣtikaṃ karma śubheṣu aśubheṣu ca //
kṣipram āvāhane siddhir homabījaprayogataḥ
homayet phalabījāni dhānyabījatṛṇāni ca //
payasā vāpi śuddhena homakarma hy udāhṛtam
madhunā ghṛtasaṃyuktaṃ tilaṃ juhyād vicakṣaṇi //
sādhayet sarvakarmāṇi vaṣatkṛtaṃ japiṣyati
sarveṣāṃ guhyamantrāṇāṃ bījamudrāṃ prayojayet //
aprakāśyam idaṃ guhyaṃ śivavaktrād viniḥsṛtam
yas tv idaṃ dhyāyate nityaṃ pūjayen manasā japet //
sa bhuṅkte vipulān bhogān īśānāntapadaṃ labhet //
vīṇāśikhā sārdhaśatatrayaṃ yāmalatantraṃ samāptam iti
Note: Verse 375 in Ed. has only 2 pādas
Appendices :
A: hūṃkārādau svāhānte ākarṣaṇe oṃkārādau vauṣat ante śāntike oṃkārādau su vaṣaḍ ante pauṣtike oṃkārādau vaṣaḍante 'mṛtīkaraṇe phat phat māraṇe oṃ kṣraṃ saṃhārāstra B: kṣa puruṣa/prakṛti buddhi/ahaṅkāra manaḥ ja śabdasparśarasarūpagandha tanmātraṃ bha pṛthivī āpa teja vāyu ākāśa pañcamahābhūta /ma/śrotratvaccakṣurjihvāghrāṇa buddhīndriya ha/vākpāṇipādapāyūpastha karmendriya C: jaya brāhmani bhūmi vijaya kṣatrāṇi / āpa ajita / vaisani / teja aparājita sūdrani / vāyu tumburu akāśa śūnya nirguṇa D: kṣakāraḥ puruṣaḥ sākṣāt makāraḥ prakṛtiḥ smṛtā mahān hakāram ity āhur ahaṃkāras tu ya smṛtaḥ oṃkāras tu manaḥ proktaṃ kathitaṃ devi te kramāt Colophon : vīṇāśikhaṃ vāmatantraṃ sampūrṇam śubham astu- Notes
- Distributed under a Creative Commons Attribution-NonCommercial-ShareAlike 4.0 International License (https://creativecommons.org/licenses/by-nc-sa/4.0/)
- Holder of rights
- Göttingen Register of Electronic Texts in Indian Languages (GRETIL), SUB Göttingen
- Citation Suggestion for this Object
- TextGrid Repository (2022). 1_sanskr. tei. sa_vINAzikhatantra. GRETIL. Göttingen Register of Electronic Texts in Indian Languages (GRETIL), SUB Göttingen. https://hdl.handle.net/21.T11991/0000-001C-934E-5