TextGrid Repository

Bhk_1

abhūn nṛpo vibudha-sakhaḥ paraṃ-tapaḥ śrutā'nvito daśa-ratha ityudāhṛtaḥ,

guṇair varaṃ bhuvana-hitac-chalena yaṃ sanā-tanaḥ pitaramupāgamat svayam.

so'dhyaiṣṭa vedāṃs, tri-daśānayaṣṭa, pit npārīt, samamaṃsta bandhūn,

vyajeṣṭa ṣaḍ-vargamaraṃsta nītau, sa-mūla-ghātaṃ nyavadhīdarīṃś ca.

vasūni toyaṃ ghana-vad vyakārīt, sahā''sanaṃ gotra-bhidā'dhyavātsīt,

na tryambakādanyamupāsthitā'sau, yaśāṃsi sarveṣu-bhṛtāṃ nirāstat.

puṇyo mahā-brahma-samūha-juṣṭaḥ saṃtarpaṇo nāka-sadāṃ vareṇyaḥ

jajvāla loka-sthitaye sa rājā yathā'dhvare vahnirabhipraṇītaḥ.

sa puṇya-kīrtiḥ śata-manyu-kalpo mahendra-loka-pratimāṃ samṛddhyā

adhyāsta sarvartu-sukhāmayodhyā- madhyāsitāṃ brahmabhiriddha-bodhaiḥ.

nirmāṇa-dakṣasya samīhiteṣu sīmeva padmā''sana-kauśalasya

ūrdhva-sphurad-ratna-gabhastibhir yā sthitā'vahasyeva puraṃ maghonaḥ.

sad-ratna-muktā-phala-vajra-bhāñji vicitra-dhātūni sa-kānanāni

strībhir yutānyapsarasāmivaughair meroḥ śirāṃsīva gṛhāṇi yasyām.

antar-niviṣṭojjvala-ratna-bhāso gavākṣa-jālairabhiniṣpatantyaḥ

himā'dri-ṭaṅkādiva bhānti yasyāṃ gaṅgā'mbu-pāta-pratimā gṛhebhyaḥ

dharmyāsu kāmā'rtha-yaśas-karīṣu matāsu loke'dhigatāsu kāle

vidyāsu vidvāniva so'bhireme patnīṣu rājā tisṛṣūttamāsu.

putrīyatā tena varā'ṅganābhi- rānāyi vidvān kratuṣu kriyāvān

vipaktrima-jñāna-gatir manasvī mānyo muniḥ svāṃ puramṛṣya śṛṅgaḥ

aihiṣṭa taṃ kārayituṃ kṛtā''tmā kratuṃ nṛpaḥ putra-phalaṃ munīndram,

jñānā''śayas tasya tato vyatānīt sa karmaṭhaḥ karma sutā'nubandham.

rakṣāṃsi vedīṃ parito nirāstha- daṅgānyayākṣīdbhitaḥ pradhānam,

śeṣāṇyahauṣīt suta-saṃpade ca, varaṃ vareṇyo nṛpateramārgīt.

niṣṭāṃ gate daktrima-sabhaya-toṣe vihitrime karmaṇi rāja-patnyaḥ

prāśur hutocchiṣṭamudāra-vaṃśyās tisraḥ prasotuṃ caturaḥ su-putrān.

kausalyayā'sāvi sukhena rāmaḥ prāk, kekayī-to bharatas tato'bhūt,

prāsoṣṭa śatru-ghnamudāra-ceṣṭa- mekā sumitrā saha lakṣmaṇena.

ārcīd dvi-jātīn paramā'rtha-vindā- nudejayān bhūta-gaṇān nyaṣedhīt,

vidvānupāneṣṭa ca tān sva-kāle yatir vaśiṣṭo yamināṃ variṣṭhaḥ.

vedo'ṅgavāṃstaurakhilo'dhyagāyi śastrāṇyupāyaṃsata jitvarāṇi,

te bhinna-vṛttīnyapi mānasāni samaṃ janānāṃ guṇino'dhyavātsuḥ,

tato-bhyagād gādhi-sutaḥ kṣitīndraṃ rakṣobhirabhyāhata-karma-vṛttiḥ

rāmaṃ varītuṃ parirakṣaṇā-rthaṃ, rājā''jihat taṃ madhuparka-pāṇiḥ.

aiṣīḥ punar-janma-jayāya yat tvaṃ, rūpā''di-bodhān nyavṛtac ca yat te,

tattvānyabuddhāḥ pratinūni yena, dhyānaṃ nṛpas tacchivamityavādīt.

ākhyan munis tasya śivaṃ samādher, vighnanti rakṣāṃsi vane kratūṃśca,

tāni dviṣad-vīrya-nirākariṣṇus tṛṇeḍhu rāmaḥ saha lakṣmaṇena.

sa śuśruvāṃstad-vacanaṃ mumoha rājā'sahiṣṇuḥ suta-viprayogam,

ahaṃyunā'tha kṣiti-paḥ śubhaṃyu- rūce vacas tāpasa-kuñjareṇa.

mayā tvamāpthāḥ śaraṇaṃ bhayeṣu, vayaṃ tvayā'pyāpsmahi dharma-vṛddhyai,

kṣatraṃ dvija-tvaṃ ca parasparā'rthaṃ, śaṅkāṃ kṛthā mā, prahiṇu-sva-sūnum.

ghāniṣyate tena mahān vipakṣaḥ, sthāyiṣyate yena raṇe purastāt,

mā māṃ mahā''tman paribhūr-yogye na mad-vidho nyasyati bhāramagryam.

krudhyan kulaṃ dhakṣyati vipra-vahnir, yāsyan sutas tapsyati māṃ sa-manyum,

itthaṃ nṛpaḥ pūrvamavāluloce, tato'nujajñe gamanaṃ sutasya.

āśīrbhirabhyarcya muniḥ kṣitīndraṃ prītaḥ pratasthe punarāśramāya,

taṃ pṛṣṭha-taḥ praṣṭhamiyāya namro hiṃsreṣu-dīptā''pta-dhanuḥ kumāraḥ.

prayāsyataḥ puṇya-vanāya jiṣṇo- rāmasya rociṣṇu-mukhasya ghṛṣṇuḥ

trai-māturaḥ kṛtsna-jitā'stra-śastraḥ sadhryaṅ rataḥ śreyasi lakṣmaṇo'bhūt.

iṣu-mati raghu-siṃhe dandaśūkāñ jighāṃsau dhanuraribhira-sahyaṃ muṣṭi-pīḍaṃ dadhāne

vrajati, pura-taruṇyo baddha-citrā'ṅgulitre kathamapi guru-śokān mā rudan māṅgalikyaḥ

atha jagaduranīcai-rāśiṣas tasya viprās, tumula-kala-ninādaṃ tūryamājaghnuranye,

abhimata-phala-śaṃsī cāru pusphora bāhus, taruṣu cukuvuruccaiḥ pakṣiṇaś cā'nukūlāḥ.

Bhk_2

vanaspatīnāṃ sarasāṃ nadīnāṃ tejasvināṃ kāntibhṛtāṃ diśāṃ ca

niryāya tasyāḥ sa puraḥ samantā cchriyaṃ dadhānāṃ śaradaṃ dadarśa.

taraṅga-saṅgāc capalaiḥ palāśair jvālā-śriyaṃ sā'tiśayāṃ dadhanti

sa-dhūma-dīptā'gni-rucīni rejus tāmrotpalānyākula-ṣaṭ-padāni.

bimbā''gatais tīra-vanaiḥ samṛddhiṃ nijāṃ vilokyā'pahṛtāṃ payobhiḥ

kūlāni sā''marṣatayeva tenuḥ saroja-lakṣmīṃ sthala-padma-hāsaiḥ.

niśā-tuṣārair nayanā'mbu-kalpaiḥ patrā-'nta-paryāgaladaccha-binduḥ

upārurodeva nadat-pataṅgaḥ kumudvatīṃ tīra-tarur dinā''dau.

vanāni toyāni ca netra-kalpaiḥ puṣpaiḥ sarojaiś ca nilīna-bhṛṅgaiḥ

parasparāṃ vismayavanti lakṣmī- mālokayāñcakrurivā''dareṇa.

prabhāta-vātāha''ti-kampitā''kṛtiḥ kumudvatī-reṇu-piśaṅga-vigraham

nirāsa bhṛṅgaṃ kupiteva padminī, na māninī saṃsahate 'nya-saṅgamam.

dattā'vadhānaṃ madhu-lehi-gītau praśānta-ceṣṭaṃ hariṇaṃ jighāṃsuḥ

ākarṇayannutsuka-haṃsa-nādān lakṣye samādhiṃ na dadhe mṛgāvit.

girer nitambe marutā vibhinnaṃ toyā'vaśeṣeṇa himā''bhamabhram

sarin-mukhā'bhyuccayamādadhānaṃ śailā'dhipasyā'nucakāra lakṣmīm.

garjan hariḥ sā'mbhasi śaila-kuñje pratidhvanīnātma-kṛtān niśamya

kramaṃ babandha kramituṃ sa-kopaḥ pratarkayannanya-mṛgendra-nādān.

adṛkṣatā 'mbhāṃsi navotpalāni, rutāni cā 'śroṣata ṣaṭ-padānām,

āghrāyi vān gandha-vahaḥ su-gandhas tenā'ravinda-vyatiṣaṅga-vāṃś ca.

latā'nupātaṃ kusumānyagṛhṇāt sa, nadyavaskandamupāspṛśac ca,

kutūhalāc, cāru-śilopaveśaṃ kākutstha īṣat smayamāna āsta.

tigmāṃśu-raśmic-churitānya-dūrāt prāñci prabhāte salilānyapaśyat

gabhasti-dhārābhiriva drutāni tejāṃsi bhānor bhuvi saṃbhṛtāni.

dig-vyāpinīr locana-lobhanīyā mṛjā'nvayāḥ snehamiva sravantīḥ

ṛjvā''yatāḥ śasya-viśeṣa-paṅktīs tutoṣa paśyan vitṛṇā'ntarālāḥ.

viyoga-duḥkhā'nubhavā'nabhijñaiḥ kāle nṛpāṃ'śaṃ vihitaṃ dadadbhiḥ

āhārya-śobhā-rahitairamāyai- raikṣiṣṭa pumbhiḥ pracitān sa goṣṭhān

strī-bhūṣaṇaṃ ceṣṭitama-pragalbhaṃ cārūṇya-vakrāṇyapi vīkṣitāni

ṛjūṃśca viśvāsa-kṛtaḥ svabhāvān gopā'ṅganānāṃ mumude vilokya.

vivṛtta-pārśvaṃ rucirā'ṅgahāraṃ samudvahac-cāru-nitamba-ramyam

āmandra-mantha-dhvani-datta-tālaṃ gopā'ṅganā-nṛtyamanandayat tam.

vicitramuccaiḥ plavamānamārāt kutūhalaṃ trasnu tatāna tasya

meghā'tyayopātta-vanopaśobhaṃ kadambakaṃ vātamajaṃ mṛgāṇām.

sitā'ravinda-pracayeṣu ca līnāḥ saṃsakta-peṇeṣu ca saikateṣu

kundā'vadātāḥ kalahaṃsa-mālāḥ pratīyīre śrotra-sukhair ninādaiḥ.

na taj jalaṃ, yan na su-cāru-paṅkajaṃ, na paṅkajaṃ tad, yada-līna-ṣaṭ-padam,

na ṣaṭ-pado'sau, na juguñja yaḥ kalaṃ; na guñjitaṃ tan, na jahāra yan manaḥ.

taṃ yāyajūkāḥ saha bhikṣu-mukhyais tapaḥ-kṛśāḥ śāntyudakumbha-hastāḥ,

yāyāvarāḥ puṣpa-phalena cā 'nye prāṇarcurarcyā jagadarcanīyam.

vidyāmathainaṃ vijayāṃ jayāṃ ca rakṣo-gaṇaṃ kṣipnuma-vikṣatā''tmā

adhyāpipad gādhi-suto yathāvan nighātayiṣyan yudhi yātudhānān.

āyodhane sthāyukamastrajāta- mamoghamabhyarṇa-mahā''havāya

dadau vadhāya kṣaṇadācarāṇāṃ tasmai muniḥ śreyasi jāgarūkaḥ

taṃ vipra-darśaṃ kṛta-ghāta-yatnā yāntaṃ vane rātricarī ḍuḍhauke,

jighāṃsu-vedaṃ dhṛta-bhāsurā'stram tāṃ tāḍakā''khyāṃ nijaghāna rāmaḥ.

athā ''luloke huta-dhūma-ketu- śikhā'ñjana-snigdha-samṛddha-śākham

tapovanaṃ prādhyayanā'bhibhūta- samuccarac-cāru-pataktri-śiñjam.

kṣudrān na jakṣur hariṇān mṛgendrā, viśaśvase pakṣi-gaṇaiḥ samantāt,

nannamyamānāḥ phala-ditsayeva cakāśire tatra latā vilolāḥ.

apūpujan viṣṭara-pādya-mālyai- rātithya-niṣṇā vana-vāsi-mukhyāḥ,

pratyagrahīṣṭāṃ madhuparka-miśraṃ tāvāsanā''di kṣiti-pālaputrau.

daityā'bhibhūtasya yuvāmavoḍhaṃ magnasya dorbhir bhuvanasya bhāram,

havīṃṣi saṃpratyapi rakṣataṃ, tau tapodhanairitthamabhāṣiṣātām.

tān pratyavādīdatha rāghvo'pi--, yathepsitaṃ prastuta karma dharmyam,

tapo-maruddhir bhavatāṃ śarā'gniḥ saṃdhukṣyatāṃ no'ri-samindhaneṣu.

pratuṣṭuvuḥ karma tataḥ prakwxlqqptais te yajñiyair dravya-gaṇair yathāvat,

dakṣiṇya-diṣṭaṃ kṛtamārtvijīnais tad yātudhānaiś cicite prasarpat.

āpiṅga-rūkṣordhva-śirasya-bālaiḥ śirāla-jaṅghair giri-kūṭa-daghnaiḥ

tataḥ kṣapā'ṭaiḥ pṛthu-piṅgalā'kṣaiḥ khaṃ prāvṛṣeṇyairiva cā''naśe'bdaiḥ.

adhijya-cāpaḥ sthira-bāhu-muṣṭi- rudañcitā'kṣo'ñcita-dakṣiṇoruḥ

tān lakṣmaṇaḥ sannata-vāma-jaṅgho jaghāna śuddheṣura-manda-karṣī.

gādheya-diṣṭaṃ virasaṃ rasantaṃ rāmo 'pi māyācaṇamastracuñcuḥ

sthāsnuṃ raṇe smera-mukho jagāda mārīcamuccair vacanaṃ mahā'rtham.

ātmaṃbharis tvaṃpiśitair narāṇāṃ phalegrahīn haṃsi vanaspatīnām,

śauvastikatvaṃ vibhavā na yeṣāṃ vrajanti, teṣāṃ dayase na kasmāt.

admo dvijān, devayajīn nihanmaḥ, kurmaḥ puraṃ preta-narā'dhivāsam,

dharmo hyayaṃ dāśarathe ! nijo no, naivā'dhyakāriṣmahi veda-vṛtte.

dharmo'sti satyaṃ tava rākṣasā'ya- manyo vyatiste tu mamā'pi dharmaḥ,

brahma-dviṣas te praṇihanmi yena, rājanya-vṛttir dhṛta-kārmukeṣuḥ.

itthaṃ-pravādaṃ yudhi saṃprahāraṃ pracakratū rāma-niśā-vihārau,

tṛṇāya matvā raghu-nandano 'tha bāṇena rakṣaḥ pradhanān nirāsthat.

jagmuḥ prasādaṃ dvija-mānasāni, dyaur varṣukā puṣpa-cayaṃ babhūva,

nir-vyājamijyā vavṛte. vacaś ca bhūyo babhāṣe muninā kumāraḥ

mahīyyamānā bhavatā 'timātraṃ surā'dhvare ghasmara-jitvareṇa

divo'pi vajrā''yudha-bhūṣaṇāyā hriṇīyate vīra-vatī na bhūmiḥ.

balir babandhe, jaladhir mamanthe, jahre'mṛtaṃ, daitya-kulaṃ vijigyo,

kalpā'nta-duḥsthā vasudhā tathohe yenaiṣa bhāro'ti-gurur na tasya.

iti bruvāṇo madhuraṃ hitaṃ ca tamāñjihan maithila-yajña-bhūmim

rāmaṃ muniḥ prīta-manā makhā'nte yaśāṃsi rājñāṃ nijighṛkṣayiṣyan.

etau sma mitrā-varuṇau kimetau, kimaśvinau soma-rasaṃ pipāsū,

janaṃ samastaṃ janakā''śrama-sthaṃ rūpeṇa tāvaujihatāṃ nṛ-siṃhau.

ajigrahat taṃ janako dhanus tad "yenā'rdidad daitya-puraṃ pinākī",

jijñāsamāno balamasya bāhvor. hasannabhāṅkṣvīd raghu-nandanas tat.

tato nadī-ṣṇān pathikān giri-jñā- nāhvāyakān bhūmi-paterayodhyām

ditsuḥ sutāṃ yodha-harais turaṅgair vyasarjayan maithila-martya-mukhyaḥ.

kṣipraṃ tato 'dhvanya-turaṅga-yāyī yaviṣṭha-vad vṛddha-tamo 'pi rājā

ākhyāyakebhyaḥ śruta-sūnu-vṛtti- ra-glāna-yāno mithilāmagacchat.

vṛndiṣṭhamārcīd vasudhā-dhipānāṃ taṃ preṣṭhametaṃ guru-vad gariṣṭham

sadṛṅ-mahāntaṃ sukṛtā'dhivāsaṃ baṃhiṣṭha-kīrtiṃ yaśasā variṣṭham.

tri-varga-pārīṇamasau bhavanta- madhyāsayannāsanamekamindraḥ

viveka-dṛśva-tvamagāt surāṇāṃ, taṃ maithilo vākyamidaṃ babhāṣe.

hiraṇmayī sāla-lateva jaṅgamā cyutā divaḥ sthāsnurivā'cira-prabhā

śaśāṅkaṃ-kānteradhidevatā''kṛtiḥ sutā dade tasya sutāya maithilī.

labdhā tato viśvajanīna-vṛttis- tāmātmanīnāmudavoḍha rāmaḥ

sad-ratna-muktā-phala-bharma-śobhāṃ saṃbaṃhayantīm raghu-vargya-lakṣmīm.

su-prātamāsādita-saṃmadaṃ tad vandārubhiḥ saṃstutamabhyayodhyam

aśvīya-rājanyaka-hāstikā''ḍhya- magāt sa-rājaṃ balamadhvanīnam.

viśaṅkaṭo vakṣasi bāṇa-pāṇiḥ saṃpanna-tāla-dvayasaḥ purastāt

bhīṣmo dhanuṣmānupajānvaratni- raiti sma rāmaḥ pathi jāmadagnyaḥ.

uccairasau rāghavamāhvatedaṃ dhanuḥ sa-bāṇaṃ kuru, sā'tiyāsīḥ.

parākrama-jñaḥ priya-santatis taṃ namraḥ kṣitīndro 'nuninīṣurūce.

aneka-śo nirjita-rājakas tvaṃ, pit natārpsīr nṛpa-rakta-toyaiḥ,

saṃkṣipya saṃrambhama-sadū-vipakṣaṃ, kā ''sthā 'rbhake 'smiṃstava rāma ! rāme.

ajīgaṇad daśarathaṃ na vākyaṃ yadā sa darpeṇa, tadā kumāraḥ

dhanur vyakārkṣīd guru-bāṇa-garbhaṃ, lokānalāvīd vijitāṃśca tasya.

jite nṛpā'rau, sumanībhavanti śabdāyamānānya-śanair-śaṅkam

vṛddhasya rājño 'numate balāni jagāhire 'neka-mukhāni mārgān.

atha puru-java-yogān nedayad dūra-saṃsthaṃ davayadati-rayeṇa prāptamurvī-vibhāgam

klama-rahitamacetan nīrajīkārita-kṣmāṃ, balamupahita-śobhāṃ tūrṇamāyādayodhyām.

Bhk_3

vadhena saṃkhye piśitā'śanānāṃ kṣatrā'ntakasyā 'bhibhavena caiva

āḍhyaṃbhaviṣṇur yaśasā kumāraḥ priyaṃbhaviṣṇur na sa yasya nā''sīt.

tataḥ sucetīkṛta-paura-bhṛtyo "rājye 'bhiṣekṣye sutamitya-nīcaiḥ

āghoṣayan bhūmi-patiḥ samastaṃ bhūyo'pi lokaṃ sumanīcakāra.

ādikṣadādīpta-kṛśānu-kalpaṃ siṃhāsanaṃ tasya sa-pāda-pīṭham

santapta-cāmīkara-valgu-vajraṃ vibhāga-vinyasta-mahārgha-ratnam.

prāsthāpayat pūga-kṛtān sva-poṣaṃ pṛṣṭān prayatnād dṛḍha-gātra-bandhān

sa-bharma-kumbhān puruṣān samantāt patkāṣiṇas tīrtha-jalā'rthamāśu.

ukṣān pracakrur nagarasya mārgān, dhvajān babandhur, mumucuḥ kha-dhūpān,

diśaśca puṣpaiścakarur vicitrai- rartheṣu rājñā nipuṇā niyuktāḥ

mātāmahā''vāsamupeyivāṃsaṃ mohāda-pṛṣṭvā bharataṃ tadānīm

tat kekayī soḍhuma-śaknuvānā vavāra rāmasya vana-prayāṇam.

karṇe-japairāhita-rājya-lobhā straiṇena nītā vikṛtiṃ laghimnā

rāma-pravāse vyamṛśan na doṣaṃ janā'pavādaṃ sa-narendra-mṛtyum

vasūni deśāṃśca nivartayiṣyan rāmaṃ nṛpaḥ saṃgiramāṇa eva

tayā 'vajajñe, bharatā'bhiśeko viṣāda-śaṅkuśca matau nicakhne.

tataḥ pravivrājayiṣuḥ kumāra- mādikṣadasyā 'bhigamaṃ vanāya

saumitri-sītā'nucarasya rājā sumantra-netreṇa rathena śocan.

kecin ninindur nṛpama-praśāntaṃ, vicukruśuḥ kecana sā'sramuccaiḥ,

ūcus tathā 'nye bharatasya māyāṃ, dhik kekayīmityaparo jagāda.

"gato vanaṃ śvo bhaviteti rāmaḥ," śokena dehe janatā 'timātram,

dhīrās tu tatra cyuta-manyavo 'nye dadhuḥ kumārā'nugame manāṃsi.

prasthāsyamānāvupaseduṣas tau śośucyamānānidamūcatus tān,

"kiṃ śocatehā 'bhyudaye batā 'smān niyoga-lābhena pituḥ kṛtā'rthān,

asṛṣṭa yo, yaśca bhayeṣvarakṣīd, yaḥ sarvadā 'smānapuṣat sva-poṣam,

mahopakārasya kimasti tasya tucchena yānena vanasya mokṣaḥ,

vidyut-praṇāśaṃ sa varaṃ pranaṣṭo, yadvordhva-śoṣaṃ tṛṇa-vad viśuṣkaḥ,

arthe durāpe kimuta pravāse na śāsane 'vāsthita yo gurūṇām.

paurā ! nivartadhvamiti nyagādīt, "tātasya śokā'panudā bhaveta,

mā darśatā'nyaṃ bharataṃ ca matto," nivartayetyāha rathaṃ sma sūtam

jñātveṅgitair gatvaratāṃ janānā- mekāṃ śayitvā rajanīṃ sa-pauraḥ

rakṣan vane-vāsa-kṛtād bhayāt tān prātaś chalenā 'pajagāma rāmaḥ

asrākṣurasraṃ karuṇaṃ ruvanto, muhurmuhur nyaśvasiṣuḥ kapoṣṇam,

hā rāma ! hā kaṣṭamiti brunvataḥ parāṅ-mukhais te nyavṛtan manobhiḥ

sūto 'pi gaṅgā-salilaiḥ pavitvā sahā''śvamātmānamanalpa-manyuḥ

sa-sītayo rāghavayoradhīyan śvasan kaduṣṇaṃ puramāviveśa.

pratīya sā pūr dadṛśe janena dyaur bhānu-śītāṃśu-vinākṛteva

rājanya-nakṣatra-samanvitā 'pi śokā'ndhakāra-kṣata-sarva-ceṣṭā.

vilokya rāmeṇa vinā sumantra- macyoṣṭa satvān nṛ-patiś cyutā''śaḥ

madhūni naiṣīd vyalipan na gandhair, mano-rame na vyavasiṣṭa vastre.

āsiṣṭa naikatra śucā, vyaraṃsīt kṛtā'kṛtebhyaḥ kṣiti-pāla-bhāg-bhyaḥ,

sa candanośīra-mṛṇāla-digdhaḥ śokā-gninā 'gād dyu-nivāsa-bhūyam.

vicukruśur bhūmi-pater mahiṣyaḥ, keśāṃl luluñcuḥ, sva-vapūṃṣi jaghnuḥ,

vibhūṣaṇānyunmumucuḥ, kṣamāyā petur, babhañjur valayāni caiva.

tāḥ sāntvayantī bharata-pratīkṣā taṃ bandhu-tā nyakṣipadāśu taile,

dūtāṃśca rājā''tmajamāninīṣūn prāsthāpayan mantri-matena yūnaḥ.

"supto nabhastaḥ patitaṃ nirīkṣāṃ- cakre vivasvantamadhaḥ sphurantam,"

ākhyad vasan mātṛ-kule sakhibhyaḥ paśyan pramādaṃ bharato 'pi rājñaḥ.

aśiśravannātyayikaṃ tametya dūtā yadā 'rthaṃ prayiyāsayantaḥ,

āṃhiṣṭa jātā'ñjihiṣas tadā 'sā- vutkaṇṭhamāno bharato gurūṇām.

bandhūnaśāṅkiṣṭa samākulutvā- dāseduṣaḥ sneha-vaśādapāyam,

gomāyu-sāraṅga-gaṇāś ca samyaṅ nā 'yāsiṣur, bhīmamarāsiṣuśca.

sa proṣivānetya puraṃ pravekṣyan śuśrāva ghoṣaṃ na janaugha-janyam,

ākarṇayāmāsa na veda-nādān, na copalebhe vaṇijāṃ paṇā'yān.

cakranduruccair nṛ-patiṃ sametya taṃ mātaro 'bhyarṇamupāgatā'srāḥ,

purohitā'mātya-mukhāś ca yodhā vivṛddha-manyu-pratipūrṇa-manyā.

didṛkṣamāṇaḥ paritaḥ sa-sītaṃ rāmaṃ yadā naikṣata lakṣmaṇaṃ ca,

rorudyamānaḥ sa tadā'bhyapṛcchad, yathāvadākhyannatha vṛttamasmai.

ābaddha-bhīma-bhrukuṭī-vibhaṅgaḥ śeśvīyamānā'ruṇa-raudra-netraḥ

uccairupālabdha sa kekayīṃ ca, śoke muhuś cāvirataṃ nyamāṅkṣīt.

nṛpā''tmajau cikliśatuḥ sa-sītau, mamāra rājā, vi-dhavā bhavatyaḥ,

śocyā vayaṃ, bhūra-nṛpā, laghutvaṃ kekayyupajñaṃ bata bahvanartham.

naitan mataṃ matkamiti bruvāṇaḥ sahasra-śo 'sau śapathānaśapyat

udvāśyamānaḥ pitaraṃ sa-rāmaṃ luṭhyan sa-śoko bhuvi rorudā-vān.

taṃ susthayantaḥ sacivā narendraṃ didhakṣayantaḥ samudūhurārāt

antyā''hutiṃ hāvayituṃ sa-viprāś cicīṣayanto'dhvara-pātra-jātam.

udakṣipan paṭṭa-dukūla-ketū- navādayan veṇu-mṛdaṅga-kāṃsyam,

kambūṃś ca tārānadhaman samantāt, tathā''nayan kuṅkuma-candanāni.

śrotrā'kṣi-nāsā-vadanaṃ sa-rukmaṃ kṛtvā'jine prāk-śirasaṃ nidhāya

sañcitya pātrāṇi yathā-vidhāna- mṛtvig juhāva jvalitaṃ citā'gnim

kṛteṣu piṇḍodaka-sañcayeṣu, hitvā'bhiṣekaṃ prakṛtaṃ prajābhiḥ

pratyāninīṣur vinayena rāmaṃ prāyādaraṇyaṃ bharataḥ sa-pauraḥ.

śīghrāyamāṇaiḥ kakubho'śnuvānair janaira-panthānamupetya sṛptaiḥ

śokāda-bhūṣairapi bhūś cakāsā- ñcakāra nāgendra-rathā'śva-miśraiḥ.

uccikyire puṣpa-phalaṃ vanāni, sasnuḥ pit n pipriyurāpagāsu,

āreṭuritvā pulinānyaśaṅkaṃ, chāyāṃ samāśritya viśaśramuśca.

saṃprāpya tīraṃ tamasā''pagāyā gaṅgā'mbu-samparka-viśuddhi-bhājaḥ

vigāhituṃ yāmunamabmu puṇyaṃ yayur niruddha-śramavṛttayas te.

īyur bharadvāja-muner niketaṃ, yasmin viśaśrāma sametya rāmaḥ

cyutā'śanāyaḥ phalavad-vibhūtyā vysyannudanyāṃ śiśiraiḥ payobhiḥ.

vācaṃ-yamān sthaṇḍila-śāyinaś ca yuyukṣamāṇānaniśaṃ mumukṣūn

adhyāpayantaṃ vinayāt praṇemuḥ padgā bharadvāja-muniḥ sa-śiṣyaṃ.

ātithyamebhyaḥ parinirvivapsoḥ kalpa-drumā yoga-balena pheluḥ,

dhāma-prathimno mradimā'nvitāni vāsāṃsi ca drāghima-vantyudūhuḥ

ājñāṃ pratīṣur, vinayādupāsthur, jaguḥ sarāgaṃ, nanṛtuḥ sa-hāvam,

sa-vibhramaṃ nemurudāramucus tilottamā''dyā vanitāśca tasmin.

vastrā'nna-pānaṃ śayanaṃ ca nānā kṛtvā'vakāśe ruci-saṃprakwxlqqptam

tān prīti-mānāha munis tataḥ sma "nivadhvamādhvaṃ, pibatā'tta śedhvam.

te bhuktavantaḥ su-sukhaṃ vasitvā vāsāṃsyuṣitvā rajanīṃ prabhāte

drutaṃ samadhvā ratha-vāji-nāgair mandākinīṃ ramya-vanāṃ samīyuḥ.

vaikhānasebhyaḥ śruta-rāma-vārtās tato viśiñjāna-pataktri-saṅgham

abhraṃ-lihā'graṃ ravi-mārga-bhaṅgam ānaṃhire 'driṃ prati citra-kūṭam.

dṛṣṭvorṇuvānān kakubho balaughān vitatya śārṅgaṃ kavacaṃ pinahya

tasthau sisaṃgrāmayiṣuḥ śiteṣuḥ saumitrirakṣi-bhruvamujjihānaḥ

śuklottarāsaṅga-bhṛto vi-śastrān pādaiḥ śanairāpatataḥ pra-manyūn

auhiṣṭa tān vīta-viruddha-buddhīn vivandiṣūn dāśarathiḥ sva-vargyān

sa-mūla-kāṣaṃ cakaṣū rudanto rāmā'ntikaṃ bṛṃhita-manyu-vegāḥ

āvedayantaḥ kṣiti-pālamuccaiḥ- kāraṃ mṛtaṃ rāma-viyoga-śokāt

ciraṃ ruditvā karuṇaṃ sa-śabdaṃ gotrā'bhidhāyaṃ saritaṃ sametya

madhye-jalād rāghava-lakṣmaṇābhyāṃ prattaṃ jalaṃ dvyañjalamantike'pām.

"araṇya-yāne su-kare pitā mā prāyuṅkta, rājye bata duṣ-kare tvām,

mā gāḥ śucaṃ vīra !, bharaṃ vahā 'mum," ābhāṣi rāmeṇa vacaḥ kanīyān.

"kṛtī śrutī vṛddha-mateṣu dhīmāṃs tvaṃ paitṛkaṃ ced vacanaṃ na kuryāḥ,

vicchidyamāne 'pi kule parasya puṃsaḥ kathaṃ syādiha putra-kāmyā.

asmākamuktaṃ bahu manyase ced, yadīśiṣe tvaṃ na mayi sthite ca,

jihreṣya-tiṣṭhan yadi tāta-vākye, jahīhi śaṅkāṃ, vraja, śādhi pṛthvīm."

"vṛddhaurasāṃ rājya-dhurāṃ pravoḍhuṃ kathaṃ kanīyānahamutsaheya,

mā māṃ prayukthāḥ kula-kīrti-lope," prāha sma rāmaṃ bharato'pi dharymam.

"ūrjas-valaṃ hasti-turaṅgametad, amūni ratnāni ca rāja-bhāñji,

rājanyakaṃ caitadahaṃ kṣitīndras tvayi sthite syāmiti śāntamaitat."

iti nigaditavantaṃ rāghavas taṃ jagāda "vraja bharata ! gṛhītvā pāduke tvaṃ madīye,

cyuta-nikhila-viśaṅkaḥ pūjyamāno janaughaiḥ sakala-bhuvana-rājyaṃ kārayā 'sman-matena"

Bhk_4

nivṛtte bharate dhī-mānatre rāmas tapo-vanam

prapede, pūjitas tasmin daṇḍakāraṇyamīyivān.

aṭāṭyamāno 'raṇyānīṃ sa-sītaḥ saha-lakṣmaṇaḥ

balād bubhukṣuṇotkṣipya jahre bhīmena rakṣasā.

avāk-śirasamut-pādaṃ kṛtāntenā 'pi dur-damam

bhaṅktvā bhujau virādhā''khyaṃ taṃ tau bhuvi nicakhnatuḥ.

āṃhiṣātāṃ raghu-vyāghrau śarabhaṅgā''śramaṃ tataḥ

adhyāsitaṃ śriyā brāhmyā śaraṇyaṃ śaraṇaiṣiṇām.

puro rāmasya juhavāñcakāra jvalane vapuḥ

śarabhaṅgaḥ pradiśyā''rāt sutīkṣṇa-muniḥ-ketanam

"yūyaṃ samaiṣyathetyasmi nnāsiṣmahi vayaṃ vane,

dṛṣṭāḥ stha, svasti vo, yāmaḥ sva-puṇya-vijitāṃ gatim"

tasmin kṛśānu-sād-bhūte sutīkṣṇa-muni-sannidhau

uvāsa parṇa-śālāyāṃ bhramannaniśamā''śramān,

vaneṣu vāsateyeṣu nivasan parṇa-saṃstaraḥ

śayyotthāyaṃ mṛgān vidhyannātitheyo vicakrame

ṛg-yajuṣamadhīyānān sāmānyāṃśca samarcayan

bubhuje deva-sāt-kṛtvā śūlyamukhyaṃ ca hema-vān.

vasānas tantraka-nibhe sarvāṅgīṇe taru-tvacau

kāṇḍīraḥ khāḍgakaḥ śārṅgī rakṣan viprāṃstanutra-vān

hitvā''śitaṅgavīnāni phalair yeṣvāśitambhavam,

teṣvasau dandaśūkā'rir vaneśvānabhra nir-bhayaḥ.

vrātīna-vyāla-dīprā'straḥ sutvanaḥ paripūjayan

parṣadvalān mahā-brahmairāṭa naikaṭikā''śramān.

paredyavyadya pūrvedyuranyedyuś cā'pi cintayan

vṛddhi-kṣayau munīndrāṇāṃ priyaṃ-bhāvuka-tāmagāt.

ā-tiṣṭhad-gu japan sandhyā prakrāntāmāyatīgavam

prātastarāṃ patatribhyaḥ prabuddhaḥ praṇaman ravim.

dadṛśe parṇa-śālāyāṃ rākṣasyā 'bhīkayā 'tha saḥ,

bhāryoḍhaṃ tamavajñāya tasthe saumitraye'sakau.

dadhānā vali-bhaṃ madhyaṃ karṇa-jāha-vilocanā

vāka-tvacenā'ti-sarveṇa candra-lekheva pakṣatau

su-pād dvi-rad-nāsorūr mṛdu-pāṇi-talā'ṅguliḥ

prathimānaṃ dadhānena jaghanena ghanena sā

un-nasaṃ dadhatī vaktraṃ śuddha-dal-lola-kuṇḍalam

kurvāṇā paśyataḥ śaṃyūn sragviṇī su-hasā''nanā

prāpya cañcūryamāṇā patīyantī raghūttamam

anukā prārthayāñcakre priyā-kartuṃ priyaṃ-vadā.

"saumitre ! māmupāyaṃsthāḥ kamrāmicchur vaśaṃ-vadām

tvad-bhogīnāṃ saha-carīma-śaṅkaḥ puruṣā''yuṣam."

tāmuvāca sa-"gauṣṭhīne vane strī-puṃsa-bhīṣaṇe

a-sūryaṃ-paśya-rūpā tvaṃ kima-bhīrurarāryase.

mānuṣānabhilaṣyantī rociṣṇur divya-dharmiṇī

tvamapsarāyamāṇeha sva-tantrā kathamañcasi.

ugraṃ-paśyā''kulo 'raṇye śālīna-tva-vivarjitā

kāmuka-prārthanā-paṭvī pativatnī kathaṃ na vā.

rāghavaṃ parṇa-śālāyāmicchā 'nurahasaṃ patim,

yaḥ svāmī mama kāntā-vānaupakarṇika-locanaḥ

vapuś cāndanikaṃ yasya, kārṇaveṣṭakikaṃ mukham,

saṃgrāme sarva-karmīṇau pāṇī yasyaupajānukau.

baddho dur-bala-rakṣā'rthamasir yenopanīvikaḥ,

yaś cāpamāśmana-prakhyaṃ seṣuṃ dhatte'nya-dur-vaham.

jetā yajña-druhāṃ saṃkhye dharma-santāna-sūr vane

prāpya dāra-gavānāṃ yaḥ munīnāma-bhayaṃ sadā"

tato vāvṛtyamānā 'sau rāma-śālāṃ nyavikṣata,

"māmupāyaṃsta rāme"ti vadantī sā''daraṃ vacaḥ

"a-strīko 'sāvahaṃ strī-mān, sa puṣyati-tarāṃ tava

patir"ityabravīd rāmas"tameva vraja, mā mucaḥ."

lakṣmaṇaṃ 'sā vṛṣasyantī mahokṣaṃ gaurivā 'gamat

manmathā''yudha-sampāta-vyathyamāna-matiḥ punaḥ.

tasyāḥ sāsadyamānāyā lolūyā-vān raghūttamaḥ

asiṃ kaukṣeyamudyamya cakārā'pa-nasaṃ mukham.

"ahaṃ śūrpa-ṇakhā nāmnā nūnaṃ nā 'jñāyiṣi tvayā,

daṇḍo 'yaṃ kṣetriyo yena mayyapātī"ti sā 'bravīt.

paryaśāpsīd divi-ṣṭhā 'sau saṃdarśya bhaya-daṃ vapuḥ

apisphavac ca bandhūnāṃ ninaṅkṣur vikramaṃ muhuḥ

khara-dūṣaṇayor bhrātroḥ paryadeviṣṭa sā puraḥ,

vijigrāhayiṣū rāmaṃ daṇḍakāraṇya-vāsinoḥ

"kṛte saubhāgineyasya bharatasya vivāsitau

pitrā daurbhāgineyau yau, paśyataṃ ceṣṭitaṃ tayoḥ.

mama rāvaṇa-nāthāyā bhaginyā yuvayoḥ punaḥ

ayaṃ tāpasakād dhvaṃsaḥ, kṣamadhvaṃ, yadi vaḥ kṣamam.

a-saṃskṛtrima-saṃvyānāvanuptrima-phalāśinau

a-bhṛtrima-parīvārau paryabhūtāṃ tathāpi mām."

"śvaḥśreyasamavāptāsi" bhrātṛbhyāṃ pratyabhāṇi sā

prāṇivas tava mānā'rthaṃ, vrajā''śvasihi, mā rudaḥ.

jakṣimo 'naparādhe'pi narān naktaṃ-divaṃ vayam,

kutas-tyaṃ bhīru ! yat tebhyo druhyadbhyo 'pi kṣamāmahe."

tau caturdaśa-sāhasrabalau niryayatus tataḥ

pāraśvadhika-dhānuṣka-śāktika-prāsikā'nvitau.

atha sampatato bhīmān viśikhai rāma-lakṣmaṇau

bahu-mūrdhno dvi-mūrdhāṃśca tri-mūrdhāś cā 'hatāṃ mṛdhe.

tair vṛkṇa-rugṇa-sambhugna-kṣuṇṇa-bhinna-vipanna-kaiḥ.

nimagnodvigna-saṃhrīṇaiḥ papre dīnaiś ca medinī.

ke-cid vepathumāseduranye davathumuttamam,

sa-raktaṃ vamathuṃ kecid, bhrājathuṃ na ca ke-cana.

mṛgayumiva mṛgo 'tha dakṣiṇermā, diśamiva dāha-vatīṃ marāvudanyan,

raghu-tanayamupāyayau tri-mūrdho, viśabhṛdivogra-mukhaṃ patatri-rājam,

śita-viśikha-nikṛttakṛtsna-vaktraḥ kṣiti-bhṛdiva kṣiti-kampa-kīrṇa-śṛṅgaḥ

bhayamupanidadhe sa rākṣasānām a-khila-kula-kṣaya-pūrva-liṅga-tulyaḥ.

Bhk_5

nirākariṣṇū vartiṣṇū vardhiṣṇū parato raṇam

utpatiṣṇū sahiṣṇū ca ceratuḥ khara-dūṣaṇau.

tau khaḍga-musala-prāsa-cakra-bāṇa-gadā-karau

akārṣṭāmāyudha-cchāyaṃ rajaḥ-santamase raṇe.

atha tīkṣṇā''yasair bānairadhi-marma raghūttamau

vyādhaṃ vyādhama-mūḍhau tau yama-sāc-cakratur dviṣau.

hata-bandhur jagāmā 'sau tataḥ śūrpa-ṇakhā vanāt

pāre-samudraṃ laṅkāyāṃ vasantaṃ rāvaṇāṃ patim.

saṃprāpya rākṣasa-sabhaṃ cakranda krodha-vihvalā,

nāma-grāmamarodīt sā bhrātarau rāvaṇā'ntike.

"daṇḍakānadhyavāttāṃ yau vīra ! rakṣaḥ-prakāṇḍakau,

nṛbhyāṃ saṃkhye'kṛśātāṃ tau sa-bhṛtyau bhūmi-vardhnau.

vigrahas tava śakreṇa bṛhaspati-purodhasā

sārdhaṃ kumāra-senānyā, śūnyaś cā'sīti ko nayaḥ

yadyahaṃ nātha ! nā 'yāsyaṃ vi-nāsā hata-bāndhavā,

nā 'jñāsyas tvamidaṃ sarvaṃ pramādyaṃś cāra-dur-balaḥ.

kariṣyamāṇaṃ vijñeyaṃ kāryaṃ, kiṃ nu kṛtaṃ paraiḥ,

apakāre kṛte 'pyajño vijigīṣur na vā bhavān.

vṛtas tvaṃ pātre-samitaiḥ khaṭvā''rūḍhaḥ pramāda-vān

pāna-śauṇḍaḥ śriyaṃ netā nā 'tyantīna-tvamunmanāḥ

adhvareṣvagnicitvatsu somasutvata āśramān

attuṃ mahendriyaṃ bhāgameti duścyavano 'dhunā,

āmikṣīyaṃ dadhi-kṣīraṃ puroḍāśyaṃ tathauṣadham

havir haiyaṅgavīnaṃ ca nā'pyupaghnanti rākṣasāḥ

yuva-jānir dhanuś-pāṇir bhūmi-ṣṭhaḥ kha-vicāriṇaḥ

rāmo yajña-druho hanti kāla-kalpa-śilīmukhaḥ

māṃsānyoṣṭhā'valopyāni sādhanīyāni devatāḥ

aśnanti, rāmād rakṣāṃsi bibhyaśruvate diśaḥ

kuru buddhiṃ kuśā'griyāmanukāmīna-tāṃ tyaja,

lakṣmīṃ paramparīṇāṃ tvaṃ putra-pautrīṇa-tāṃ naya.

sahāya-vanta udyuktā bahavo nipuṇāś ca yām

śriyamāśāsate, lolāṃ tāṃ haste-kṛtya mā śvasīḥ

lakṣmīḥ puṃ-yogamāśaṃsuḥ kulaṭeva kutūhalāt

antike 'pi sthitā patyuś chalenā'nyaṃ nirīkṣate.

yoṣid-vṛndārikā tasya dayitā haṃsa-gāminī

dūrvā-kāṇḍamiva śyāmā nyagrodha-parimaṇḍalā.

nā''syaṃ paśyati yas tasyā, niṃste danta-cchadaṃ na vā,

saṃśṛṇoti na coktāni, mithyā''sau nihitendriyaḥ.

sāro 'sāvindriyā'rthānāṃ, yasyā 'sau tasya nandathuḥ,

talpe kāntā'ntaraiḥ sārdhaṃ manye 'haṃ dhiṅ nimajjathum.

na taṃ paśyāmi, yasyā 'sau bhaven nodejayā mateḥ

trailokyenā'pi vindas tvaṃ tāṃ krītvā sukṛtī bhava.

naivendrāṇī, na rudrāṇī, na mānavī na rohiṇī,

varuṇānī na, nā 'gnāyī tasyāḥ sīmantinī samā."

pratyūce rākṣasendras tām "āśvasihi, bibheṣi kim,

tyaja naktañcari ! kṣobhaṃ, vācāṭe ! rāvaṇo hyaham.

māmupāsta didṛkṣā-vān yāṣṭīka-vyāhato hariḥ

ājñā-lābhonmukho dūrāt kākṣeṇā 'nādarekṣitaḥ

virugṇo-dagra-ghārā'gnaḥ kuliśo mama vakṣasi

a-bhinnaṃ śata-dhā ''tmānaṃ manyate balinaṃ balī.

kṛtvā laṅkādrumā''lānamahamairāvataṃ gajam

bandhane 'nupayogi-tvān nataṃ tṛṇa-vadatyajam.

āhopuruṣikāṃ paśya mama, sad-ratna-kānti-bhiḥ

dhvastā'ndhakāre 'pi pure pūrṇendoḥ sannidhiḥ sadā.

hṛta-ratnaś cyutodyogo rakṣobhyaḥ kara-do divi

pūtakratāyīmabhyeti sa-trapaḥ kiṃ na gotra-bhit.

a-tulya-mahasā sārdhaṃ rāmeṇa mama vigrahaḥ

trapā-karas, tathāpyeṣa yatiṣye tad-vinigrahe."

utpatya khaṃ daśa-grīvo mano-yāyī śitā'stra-bhṛt

samudra-savidhā''vāsaṃ mārīcaṃ prati cakrame.

sampatya tat-sanīḍe-sau taṃ vṛttāntamaṣiṣravat,

trasnunā'tha śrutā'rthena tenā'gādi daśā''nanaḥ.

"antardhatsva raghu-vyāghrāt tasmāt tvaṃ rākṣaseśvara !,

yo raṇne durupasthāno hasta-rodhaṃ dadhad dhanuḥ,

bhavantaṃ kārtavīryo yo hīna-sandhimacīkarat,

jigāya tasya hantāraṃ sa rāmaḥ sārvalaukikam.

yamā''sya-dṛśvarī tasya tāḍakā vetti vikramam.

śūraṃ-manyo raṇāc cā'haṃ nirastaḥ siṃha-nardinā.

na tvaṃ tenā 'nvabhāviṣṭhā, nā 'nvabhāvi tvayā 'pyasau,

anubhūto mayā cā 'sau, tena cā 'nvabhaviṣyaham,

adhyaṅ śastra-bhṛtāṃ rāmo, nyañcas taṃ prāpya mad-vidhāḥ,

sa kanyā-śulkamabhanaṅ mithilāyāṃ makhe dhanuḥ

saṃ-vittaḥ saha-yudhvānau tac-chaktiṃ khara-dūṣaṇau,

yajvānaś ca sa-sutvāno, yānagopīn makheṣu saḥ.

sukha-jātaḥ surā-pīto nṛ-jagdho mālya-dhārayaḥ

adhi-laṅkaṃ striyo dīvya, mā ''rabdhā bali-vigraham."

taṃbhītaṃ-kāramākruśya rāvaṇaḥ pratyabhāṣata

"yāta-yāmaṃ vijitavān sa rāmaṃ yadi, kiṃ tataḥ

aghāni tāḍakā tena lajjā-bhaya-vibhūṣaṇā,

strī-jane yadi tac chlāghyaṃ, dhig lokaṃ kṣudra-mānasam.

yad gehe-nardinamasau śarair bhīrumabhāyayat

ku-brahma-yajña-ke rāmo bhavantaṃ, pauruṣaṃ na tat.

cira-kāloṣitaṃ jīrṇaṃ kīṭa-niṣkuṣitaṃ dhanuḥ

kiṃ citraṃ yadi rāmeṇa bhagnaṃ kṣatriya-kā'ntike.

vana-tāpasa-ke vīrau vipakṣe galitā''darau

kiṃ citraṃ yadi sā'vajñau mamratuḥ khara-dūṣaṇau.

tvaṃ ca bhīruḥ su-durbuddhe ! nityaṃ śaraṇa-kāmyasi,

guṇāṃś cā'pahnuṣe'smākaṃ, stauṣi śatrūṃś ca naḥ sadā.

śīrṣac-chedyamato'haṃ tvā karomi kṣiti-vardhanam,

kārayiṣyāmi vā kṛtyaṃ vijighṛkṣur vanaukasau.

tamudyata-niṣātā'siṃ pratyuvāca jijīviṣuḥ

mārīco 'nunayaṃs trāsād "abhyamitryo bhavāmi te.

harāmi rāma-saumitrī mṛgo bhūtvā mṛga-dyuvau,

udyogamabhyamitrīṇo yatheṣṭaṃ tvaṃ ca saṃ-tanu."

tataś citrīyamāṇo 'sau hema-ratna-mayo mṛgaḥ

yathāmukhīnaḥ sītāyāḥ pupluve bahu lobhayan.

tenā 'dudyūṣayad rāmaṃ mṛgeṇa mṛga-locanā

maithilī vipuloraskaṃ prāvuvūrṣur mṛgā'jinam.

yoga-kṣema-karaṃ kṛtvā sītāyā lakṣmaṇaṃ tataḥ

mṛgasyā'nupadī rāmo jagāma gaja-vikramaḥ

sthāyaṃ sthāyaṃ kvacid yāntaṃ krāntvā krāntvā sthitaṃ kvacit

vīkṣamāṇo mṛgaṃ rāmaś citra-vṛttiṃ visiṣmiye.

ciraṃ kliśitvā marmā-vid rāmo vilubhita-plavam

śabdāyamānamavyātsīt bhaya-daṃ kṣaṇadā-caram.

śrutvā visphūrjathu-prakhyaṃ ninādaṃ paridevinī

matvā kaṣṭa-śritaṃ rāmaṃ saumitriṃ gantumaijihat.

"eṣa prāvṛṣi-jā'mbho-da- nādī bhrātā virauti te,

jñāteyaṃ kuru saumitre ! bhayāt trāyasva rāghavam."

"rāma-saṃghuṣitaṃ naitan, mṛgasyaiva vivañciṣoḥ

rāma-svanita-saṅkāśaḥ svān", ityavadat sa tām.

"āpyāna-skandha-kaṇṭhāṃ'saṃ ruṣitaṃ sahituṃ raṇe

prorṇuvantaṃ diśo bāṇaiḥ kākutsthaṃ bhīru ! kaḥ kṣamaḥ

dehaṃ bibhnakṣura-strā'gnau mṛgaḥ prāṇair dideviṣan

jyā-ghṛṣṭa-kaṭhinā'ṅguṣṭhaṃ rāmamāyān mumūrṣayā.

śatrūn bhīṣayamāṇaṃ taṃ rāmaṃ vismāpayeta kaḥ,

mā sma bhaiṣīs, tvayā 'dyaiva kṛtā'rtho drakṣyate patiḥ"

"yāyās tvamiti kāmo me, gantumutsahase na ca,

icchuḥ kāmayituṃ tvaṃ mām", ityasau jagade tayā.

mṛṣodyaṃ pravadantīṃ tāṃ satya-vadyo raghūttamaḥ

niragāt "śatru-hastaṃ tvaṃ yāsyasī"ti śapan vaśī.

gate tasmin, jala-śuciḥ śuddha-dan rāvaṇaḥ śikhī

jañjapūko 'kṣa-mālā-vān dhārayo mṛdalābunaḥ

kamaṇḍalu-kapālena śirasā ca mṛjā-vatā

saṃvastrya lākṣike vastre mātrāḥ saṃbhāṇḍya daṇḍa-vān

adhīyannātma-vid vidyāṃ dhārayan maskari-vratam

vadan bahvaṅguli-sphoṭaṃ bhrū-kṣepaṃ ca vilokayan

saṃdidarśayiṣuḥ sāma nijuhnūṣuḥ kṣapāṭa-tām

caṃkramā-vān samāgatya sītāmūce"sukhābhava."

sāyaṃ-tanīṃ tithi-praṇyaḥ paṅkajānāṃ divā-tanīm

kāntiṃ kāntyā sadā-tanyā hrepayantī śuci-smitā.

kā tvamekākinī bhīru ! niranvaya-jane vane,

kṣudhyanto 'pyaghasan vyālās tvāma-pālāṃ kathaṃ na vā.

hṛdayaṃ-gama-mūrtis tvaṃ subhagaṃ-bhāvukaṃ vanam

kurvāṇā bhīmamapyetad vadā 'bhyaiḥ kena hetunā.

sukṛtaṃ priya-kārī tvaṃ kaṃ harasyupatiṣṭhase,

puṇya-kṛc cāṭu-kāras te kiṅkaraḥ surateṣu kaḥ.

pari-paryudadhe rūpamā-dyu-lokāc ca dur-labham.

bhāvatkaṃ dṛṣṭavatsvetadasmāsvadhi su-jīvitam.

āpīta-madhukā bhṛṅgaiḥ sudivevā'ravindinī

sat-parimala-lakṣmīkā nā '-puṃskā'sīti me matiḥ.

mithyaiva śrīḥ śriyaṃ-manyā, śrīman-manyo mṛṣā hariḥ,

sākṣāt-kṛtyā'bhimanye'haṃ tvāṃ harantīṃ śriyaṃ śriyaḥ

nodakaṇṭhiṣyatā 'tyarthaṃ, tvāmaikṣiṣyata cet smaraḥ,

khelāyannaniśaṃ nāpi sajūḥ-kṛtya ratiṃ vaset,

valgūyantīṃ vilokya tvāṃ strī na mantūyatīha kā,

kāntiṃ nā'bhimanāyeta ko vā sthāṇu-samo 'pi te.

duḥkhāyate janaḥ sarvāh, sa evaikaḥ sukhāyate,

yasyotsukāyamānā tvaṃ na pratīpāyase'ntike.

kaḥ. paṇḍitāyamānas tvā- mādāyā''miṣa-sannibhām

trasyan vairāyamāṇebhyaḥ śūnyamanvavasad vanam."

ojāyamānā tasyā 'rdhyaṃ praṇīya janakā''tmajā

uvāca daśamūrdhānaṃ sā''darā gadgadaṃ vacaḥ

"mahā-kulīna aikṣvāke vaṃśe dāśarathir mama

pituḥ priyaṃ-karo bhartā kṣemaṃ-kāras tapasvinām.

nihantā vaira-kārāṇāṃ satāṃ bahu-karaḥ sadā

pāraśvadhika-rāmasya śakteranta-karo raṇe

adhvareṣviṣṭināṃ pātā pūrtī karmasu sarvadā

pitur niyogād rāja-tvaṃ hitvā yo'bhyāgamad vanam

pitatri-kroṣṭu-juṣṭāni rakṣāṃsi bhaya-de vane

yasya bāṇa-nikṛttāni śreṇī-bhūtāni śerate.

dīvyamānaṃ śitān bāṇānasyamānaṃ mahā-gadāḥ

nighnānaṃ śātravān rāmaṃ kathaṃ tvaṃ nā'vagacchasi.

bhrātari nyasya yāto māṃ mṛgāvin mṛgayāmasau,

eṣituṃ preṣito yāto mayā tasyā 'nu-jo vanam

athā ''yasyan kaṣāyā'kṣaḥ syanna-sveda-kaṇolbaṇaḥ

saṃdarṣitā''ntarākūtas tāmavādīd daśānanaḥ,

"kṛte kāniṣṭhineyasya jyaiṣṭhineyaṃ vivāsitam

ko nagna-muṣita-prakhyaṃ bahu manyeta rāghavam.

rākṣasān baṭu-yajñeṣu piṇḍī-śūrān nirastavān

yadyasau kūpa-māṇḍūki ! tavaitāvati kaḥ smayaḥ

mat-parākrama-saṃkṣipta-rājya-bhoga-paricchadaḥ

yuktaṃ mamaiva kiṃ vaktuṃ daridrāti yathā hariḥ

nir-laṅko vimadaḥ svāmī dhanānāṃ hṛta-puṣpakaḥ

adhyāste 'ntar-giraṃ yasmāt, kas tan nā 'vaiti kāraṇam.

bhinna-nauka iva dhyāyan mat-to bibhyad yamaḥ svayam

kṛṣṇi-mānaṃ dadhānena mukhenā ''ste nirudyatiḥ

samudropatyakā haimī parvatā'dhityakā purī

ratna-pārāyaṇaṃ nāmnā laṅketi mama maithili !

āvāse sikta-saṃmṛṣṭe gandhais tvaṃ lipta-vāsitā

ārpitoru-sugandhi-srak tasyāṃ vasa mayā saha.

saṃgaccha pauṃsni ! straiṇaṃ māṃ yuvānaṃ taruṇī śubhe !

rāghavaḥ proṣya-pāpīyān, jahīhi tama-kiṃ-canam.

aśnīta-pibatīyantī prasitā smara-karmaṇi

vaśe-kṛtya daśa-grīvaṃ modasva vara-mandire.

mā sma bhūr grāhiṇī bhīru ! gantumutsāhinī bhava,

udbhāsinī ca bhūtvā me vakṣaḥsaṃmārdinī bhava."

tāṃ prātikūlikīṃ matvā jihīrṣur bhīma-vigrahaḥ

bāhūpapīḍamāśliṣya jagāhe dyāṃ niśā-caraḥ

trasyantīṃ tāṃ samādāya yato rātriṃ-carā''layam

tūṣṇīṃ-bhūya bhayādāsāṃcakrire mṛgapakṣiṇaḥ

uccai rārasyamānāṃ tāṃ kṛpaṇāṃ rāma-lakṣmaṇau

jaṭāyuḥ prāpa pakṣīndraḥ paruṣaṃ rāvaṇaṃ vadan.

iti prakīrṇa-kāṇḍaḥ prathamaḥ samāptaḥ

ataḥ paramadhikāra-kāṇḍam

"dviṣan ! vane-carā'gryāṇāṃ tvamādāya-caro vane

agre-saro jaghanyānāṃ mā bhūḥ pūrva-saro mama.

yaśas-kara-samācāraṃ khyātaṃ bhūvi dayā-karam

piturvākya-karaṃ rāmaṃ dhik tvāṃ dunvantama-trapam

ahamanta-karo nūnaṃ dhvāntasyeva divā-karaḥ

tava rākṣasa ! rāmasya neyaḥ karma-karopamaḥ

satāmaruṣ-karaṃ pakṣī vaira-kāraṃ narā'śinam

hantuṃ kalaha-kāro'sau śabda-kāraḥ papāta kham.

ataḥ paraṃ prakīrṇakāḥ

dhunvan sarva-pathīnaṃ khe vitānaṃ pakṣayorasau

māṃsa-śoṇita-saṃdarśaṃ tuṇḍa-ghātamayudhyata.

na bibhāya, na jihrāya, na caklāma, na vivyathe

āghnāno vidhyamāno vā raṇān nivavṛte na ca.

piśāca-mukha-dhaureyaṃ sa-cchatra-kavacaṃ ratham

yudhi kad-ratha-vad bhīmaṃbabhañja dhvaja-śālinam

ataḥ paraṃ āmadhikāraḥ

saṃtrāsayāṃcakārā'riṃ, surān piprāya paśyataḥ,

sa tyājayāṃcakārā'riṃ sītāṃ viṃśati-bāhunā.

a-sīto rāvaṇaḥ kāsāṃcakre śastrair nirākulaḥ,

bhūyas taṃ bhedikāṃcakre nakha-tuṇḍā''yudhaḥ kha-gaḥ.

hantuṃ krodha-vaśādīhāṃcakrāte tau paraspasam,

na vā palāyāṃcakre vir dayāṃcakre na rākṣasaḥ.

upāsāṃcakrire draṣṭuṃ deva-gandharva-kinnarāḥ,

chalena pakṣau lolūyāṃcakre kravyāt patatriṇaḥ

praluṭhitamavanau vilokya kṛttaṃ daśa-vadanaḥ kha-carottamaṃ prahṛṣyan

ratha-varamadhiruhya bhīma-dhuryaṃ sva-puramagāt parigṛhya rāma-kāntām.

Bhk_6

oṣāṃcakāra kāmā'gnir daśā-vaktramahar-niśam.

vidāṃcakāra vaidehīṃ rāmādanya-nirutsukām.

prajāgarāṃcakārārerīhāsvaniśamādarāt,

prabibhayāṃcakārā 'sau kākutsthādabhiśaṅkitaḥ.

na jihrayāṃcakārā 'tha sītāmabhyartha tarjitaḥ.

nāpyūrjāṃ bibharāmāsa vaidehyāṃ prasito bhṛśam.

vidāṃkurvantu rāmasya vṛttamityavadat svakān,

rakṣāṃsi rakṣituṃ sītāmāśiṣac ca prayatnavān.

atha prakīrṇakāḥ

rāmo 'pi hata-mārīco nivartsyan khara-nādinaḥ

kroṣṭūn samaśṛṇot krūrān rasato 'śubha-śaṃsinaḥ

āśaṅkamāno vaidehīṃ khāditāṃ nihatāṃ mṛtām

sa śatru-ghnasya sodaryaṃ dūrādāyāntamaikṣata.

sītāṃ saumitriṇā tyaktāṃ sadhrīcīṃ trasnumekikāṃ

vijñāyā 'maṃsta kākutsthaḥ"kṣaye kṣemaṃ sadurlabham."

ataḥ paraṃ duhādiḥ

so'pṛcchal lakṣmaṇaṃ sītāṃ yācamānaḥ śivaṃ surān,

rāmaṃ yathāsthitaṃ sarvaṃ brātā brūte sma vihvalaḥ

saṃdṛśya śaraṇaṃ śūnyaṃ bhikṣamāṇo vanaṃ priyām

prāṇān duhannivā ''tmānaṃ śokaṃ cittamavārudhat.

"gatā syādavacinvānā kusumānyāśrama-drumān.

ā yatra tāpasān dharmaṃ sutīkṣṇaḥ śāsti, tatra sā.

ataḥ paraṃ prakīrṇakāḥ

āḥ, kaṣṭaṃ, bata, hī-citraṃ, hūṃ, mātar, daivatāni dhik,

hā pitaḥ !, kvā 'si he su-bhru !," bahvevaṃ vilalāpa saḥ,

ihā ''siṣṭhā 'śayiṣṭeha sā, sa-khelamito 'gamat,

aglāsīt saṃsmarannitthaṃ maithilyā bharatā'grajaḥ.

"idaṃ naktaṃ-tanaṃ dāma pauṣpametad divā-tanam,

śucevodbadhya śākhāyāṃ praglāyati tayā vinā,

aikṣiṣmahi muhuḥ suptāṃ yāṃ mṛtā ''śaṅkayā vayam,

a-kāle durmaramaho, yaj jīvāmas tayā vinā,

a-kṣemaḥ parihāso 'yaṃ. parīkṣāṃ mā kṛthā mama,

matto mā 'ntirdhathāḥ sīte ! mā raṃsthā jīvitena naḥ,

ataḥ paraṃ sijadhikāraḥ

ahaṃ nyavadhiṣaṃ bhīmaṃ rākṣasaṃ krūra vikramam,

mā ghukṣaḥ patyurātmānaṃ, mā na ślikṣaḥ priyaṃ priye.

mā sma drākṣīr mṛṣā doṣaṃ, bhaktaṃ mā māticikliśaḥ,

śailaṃ nyaśiśriyad vāmā, nadīṃ, nu pratyadudruvat.

ai vācaṃ dehi. dhairyaṃ nas tava hetorasusruvat.

tvaṃ no matimivā 'ghāsīr naṣṭā, prāṇānivā'dadhaḥ.

rudato 'śiśvayac cakṣu rāsyaṃ hetos tavā 'śvayīt,

mriye 'haṃ, māṃ nirāsthaś cen, mā na vocaś cikīrṣitam.

lakṣmaṇā ''cakṣva, yadyākhyat sā kiñcit kopa-kāraṇam,

doṣe pratisamādhāna majñāte kriyatāṃ katham.

iha sā vyalipad gandhaiḥ, snāntīhā'bhyaṣicaj jalaiḥ,

ihā 'haṃ draṣṭumāhvaṃ tāṃ," smarannevaṃ mumoha saḥ

tasyā 'lipata śokā'gniḥ svāntaṃ kāṣṭhamiva jvalan,

aliptevā 'nilaḥ śīto vane taṃ, na tvajihladat.

snānabhyaṣicatā 'mbho 'sau rudan dayitayā vinā

tathā 'bhyaṣikta vārīṇi pitṛbhyaḥ śoka-mūrcchitaḥ

tathā '' rto 'pi kriyāṃ dharmyāṃ sa kāle nā 'mucat kvacit,

mahatāṃ hi kriyā nityā chidre naivā 'vasīdati.

āhvāsta sa muhuḥ śūrān, muhurāhvata rākṣasān,

"eta sītādruhaḥ saṃkhye, pratyartayata rāghavam,

sva-poṣamapuṣad yuṣmān yā pakṣi-mṛga-śāvakāḥ !

adyutac cendunā sārdhaṃ, tāṃ prabrūta, gatā yataḥ."

girimanvasṛpad rāmo lipsur janaka-saṃbhavām,

tasminnāyodhanaṃ vṛttaṃ lakṣmaṇāyā'śiṣan mahat

"sītāṃ jighāṃsū saumitre ! rākṣasāvāratāṃ dhruvam,

idaṃ śoṇitamabhyagraṃ saprahāre 'cyutat tayoḥ.

idaṃ kavacamacyotīt, sā'śvo 'yaṃ cūrṇīto rathaḥ,

ehyamuṃ girimanveṣṭumavagāhāvahe drutam

manyur manye mamā 'stambhīd, viṣādo 'stabhadudyatim,

ajārīdiva ca prajñā, balaṃ śokāt tathājarat.

gṛdhrasyehāśvatāṃ pakṣau kṛtau, vīkṣasva lakṣmaṇa !

jighatsor nūnamāpādi dhvaṃso 'yaṃ tāṃ niśā-carāt."

kruddho 'dīpi raghu-vyāghro, rakta-netro 'jani kṣaṇāt,

ubodhi duḥsthaṃ trailokyaṃ, dīptairāpūri bhānu-vat.

atāyyasyottamaṃ satvamapyāyi kṛta-kṛtya-vat,

upācāyiṣṭa sāmarthyaṃ tasya saṃrambhiṇo mahat.

adohīva viṣādo 'sya, samaruddheva vikramaḥ,

samabhāvi ca kopena, nyaśvasīc cā''yataṃ muhuḥ.

athā ''lambya dhanū rāmo jagarja gaja-vikramaḥ,

"ruṇadhmi savitur mārgaṃ, bhinadmi kula-parvatān.

riṇacmi jaladhes toyaṃ, vivinacmi divaḥ surān,

kṣuṇadmi sarpān pātāle, chinadmi kṣaṇadā-carān.

yamaṃ yunajmi kālena samindhāno 'stra-kauśalam,

śuṣka-peṣaṃ pinaṣmyurvīmakhindānaḥ sva-tejasā

bhūtiṃ tṛṇadmi yakṣāṇāṃ, hinasmīndrasya vikramam,

bhanajmi sarva-maryādās, tanacmi vyoma vistṛtam

na tṛṇehmīti loko 'yaṃ māṃ vinte niṣ-parākram,"

evaṃ vadan dāśarathirapṛṇag dhanuśā śaraṃ.

nyavartayat sumitrā-bhūs taṃ cikīrṣuṃ jagat-kṣayam,

aikṣetāmāśramādārād girikalpaṃ patatriṇam

taṃ sītā-ghātinaṃ matvā hantuṃ rāmo 'bhyadhāvata,

"mā vadhiṣṭhā jaṭāyuṃ māṃ sītāṃ rāmā 'hamaikṣiṣi."

upāsthitaivamukte taṃ sakhāyaṃ rāghavaḥ pituḥ,

papraccha jānakī-vārtāṃ saṃgrāmaṃ ca patatriṇam.

tato rāvaṇamākhyāya dviṣantaṃ patatāṃ varaḥ

vraṇa-vedanayā glāyan mamāra giri-kandare,

tasyāgnyambu-kriyāṃ kṛtvā pratasthāte punar vanam.

satvānajasraṃ ghoreṇa balā'pakarṣamaśnatā

kṣudhyatā jagṛhāte tau rakṣasā dīrgha-bāhunā.

bhujau cakṛtatus tasya nistriṃśābhyāṃ raghūttmau,

sa chinna-bāhurapatad vihvalo hvalayan bhuvam.

iti prakīrṇakāḥ

atha kṛtyā'dhikāraḥ

praṣṭavyaṃ pṛcchatas tasya kathanīyamavīvacat

ātmānaṃ vana-vāsaṃ ca jeyaṃ cā 'riṃ raghūttamaḥ

"labhyā kathaṃ nu vaidehī, śakyo draṣṭuṃ kathaṃ ripuḥ,

sahyaḥ kathaṃ viyogaś ca, gadyametat tvayā mama."

"ahaṃ rāma ! śriyaḥ putro madya-pīta iva bhraman,

pāpa-caryo muneḥ śāpāj jāta" ityavadat sa tam.

"prayātas tava yamyatvaṃ śastra-pūto bravīmi te,

rāvaṇena hṛtā sītā laṅkāṃ nītā surāriṇā.

ṛṣyamūke 'navadyo 'sti paṇya-bhrātṛ-vadhaḥ kapiḥ

sugrīvo nāma, varyo 'sau bhavatā cāru-vikramaḥ.

tena vahyena hantāsi tvamaryaṃ puruṣā'śinām

rākṣasaṃ krūra-karmāṇaṃ śakrā'riṃ dūra-vāsinam.

āste smaran sa kāntāyā hṛtāyā vālinā kapiḥ

vṛṣo yathopasaryāyā goṣṭhe gor daṇḍa-tāḍitaḥ.

tena saṅgatamāryeṇa rāmā 'jaryaṃ kuru drutam.

laṅkāṃ prāpya tataḥ pāpaṃ daśa-grīvaṃ haniṣyasi.

anṛtodyaṃ na tatrāsti, satya-vadyaṃ bravīmyaham.

mitra-bhūyaṃ gatas tasya ripu-hatyāṃ kariṣyasi.

ādṛtyas tena vṛtyena stutyo juṣyeṇa saṃgataḥ

ityaḥ śiṣyeṇa guruvad gṛdhyamarthamavāpsyasi.

nā'kheyaḥ sāgaro 'pyanyas tasya sad-bhṛtya-śālinaḥ,

manyus tasya tvayā mārgyo, mṛjyaḥ śokaś ca tena te."

sa rājasūyayājīva tejasā sūrya-sannibhaḥ

a-mṛṣodyaṃ vadan rucyo jagāhe dyāṃ niśā-caraḥ

a-kṛṣṭa-pacyāḥ paśyantau tato dāśarathī latāḥ

ratnā'nna-pāna-kupyānāmāṭatur naṣṭasaṃsmṛtī.

samuttarantāva-vyathyau nadān bhidyoddhya-sannibhān

sidhya-tārāmiva khyātāṃ śabarīmāpatur vane.

vasānāṃ valkale śūddhe vipūyaiḥ kṛta-mekhalām

kṣāmāmañjana-piṇḍā''bhā daṇdinīmajinā ''starām

pragṛhya-pada-vat sādhvīṃ spaṣṭa-rūpāma-vikriyām

a-gṛhyāṃ vīta-kāma-tvād deva-gṛhyāma-ninditām

dharma-kṛtya-ratāṃ nityama-kṛṣya-phala-bhojanām

dṛṣṭvā tāmamucad rāmo yugyā''yāta iva śramam.

sa tāmūce 'tha-"kaccit tvamamāvāsyā-samanvaye

pit ṇāṃ kuruṣe kāryama-pākyaiḥ svādubhiḥ phalaiḥ

avaśya-pāvyaṃ pavase kaccit tvaṃ deva-bhāgghviḥ,

āsāvyamadhvare somaṃ dvijaiḥ kaccin namasyasi.

ācāmyaṃ saṃdhyayoḥ kaccit satyak te na prahīyate,

kaccidagnimivā ''nāyyaṃ kāle saṃmanyase 'tithim.

na praṇāyyo janaḥ kaccin nikāyyaṃ te 'dhitiṣṭhati

deva-kārya-vighātāya dharmadrohī mahodaye !

kuṇḍa-pāyya-vatāṃ kaccidagnicityā-vatāṃ tathā

kathābhī ramase nityamupacāyya-vatāṃ śubhe !

atha prakīrṇakāḥ

vardhate te tapo bhīru ! vyajeṣṭhā vighna-nāyakān,

ajaiṣīḥ kāmasaṃmohau, saṃprāpthā vinayena vā.

nā ''yasyasi tapasyantī, gurūn samyagatūtuṣaḥ

yamān nodavijiṣṭhās tvaṃ, nijāya tapase 'tuṣaḥ"

athā'rdhyaṃ madhuparkā''dyamupanīyā ''darādasau

arcayitvā phalairarcyau sarvatrā ''khyadanāmayam.

ataḥ paraṃ kṛdadhikāraḥ

"sakhyasya tava sugrīvaḥ kārakaḥ kapi-nandanaḥ,

drutaṃ draṣṭāsi maithilpāḥ," saivamuktvā tiro 'bhavat.

nandanāni munīndrāṇāṃ ramaṇāni vanaukasām

vanāni bhejatur vīrau tataḥ pāmpāni rāghavau.

"bhṛṅgā''lī-kokila-kruṅbhir vāśanaiḥ paśya lakṣmaṇa !

rocanair bhūṣitāṃ pampā- masmākaṃ hṛdayāvidham

paribhāvīṇi tārāṇāṃ paśya manthīni cetasām

udbhāsīni jale-jāni dunvanty-adayitaṃ janam

sarvatra dayitā'dhīnaṃ su-vyaktaṃ rāmaṇīyakam

yena jātaṃ priyā'pāye kad-vadaṃ haṃsa-kokilam.

pakṣibhir vitṛdair yūnā śākhibhiḥ kusumotkiraiḥ

a-jño yo, yasya vā nā 'sti priyaḥ, praglo bhaven na saḥ.

dhvanīnāmuddhamairebhir madhūnāmuddhayair bhṛśam

ājighraiḥ puṣpa-gandhānāṃ patagair glapitā vayam.

dhārayaiḥ kusumormīṇāṃ pārayair bādhituṃ janān

śākhibhir hā hatā bhūyo hṛdayānāmudejayaiḥ

dadair duḥkhasya mādṛgbhyo dhāyairāmodamuttamam

limpairiva tanor vātaiś cetayaḥ syāj jvalo na kaḥ.

avaśyāya-kaṇā''srāvāś cāru-muktā-phala-tviṣaḥ

kurvanti citta-saṃsrāvaṃ calat-parṇā'gra-saṃbhṛtāḥ

avasāyo bhaviṣyāmi duḥkhasyā 'sya kadā nvaham,

na jīvasyā 'vahāro māṃ karoti sukhinaṃ yamaḥ

dahye 'haṃ madhuno lehair dāvairugrair yathā giriḥ,

nāyaḥ ko'tra sa, yena syāṃ batā 'haṃ vigata-jvaraḥ

samāviṣṭaṃ graheṇeva grāheṇevā ''ttamarṇave

dṛṣṭvā gṛhān smarasyeva vanā'ntān mama mānasam

vātā''hati-calac-chākhā nartakā iva śākhinaḥ

duḥsahā hī parikṣiptāḥ kvaṇadbhirali-gāthakaiḥ.

eka-hāyana-sāraṅga-gatī raghu-kulottamau

lavakau śatru-śaktīnāmṛṣyamūkamagacchatām.

tau vāli-praṇidhī matvā sugrīvo 'cintayat kapiḥ,

"bandhunā vigṛhīto'haṃ bhūyāsaṃ jīvakaḥ katham."

sa śatru-lāvau manvāno rāghavau malayaṃ girim

jagāma sa-parīvāro vyoma-māyamivotthitam.

śarma-daṃ mārutiṃ dūtaṃ viṣama-sthaḥ kapi-dvipam

śokā'panudama-vyagraṃ prāyuṅkta kapi-kuñjaraḥ.

viśvāsa-prada-veṣo 'sau pathi-prajñaḥ samāhitaḥ

citta-saṃkhyo jigīṣūṇāmutpapāta nabhas-talam

surā-pairiva ghūrṇadbhiḥ śākhibhiḥ pavanā''hataiḥ

ṛṣyamūkamagād bhṛṅgaiḥ pragītaṃ sāma-gairiva.

taṃ mano-haramāgatya giriṃ varma-harau kapiḥ

vīrau sukhā ''haro 'vocad bhikṣur bhikṣārha-vigrahaḥ.

"balināvamūmadrīndraṃ yuvāṃ stambe-ramāviva

ācakṣāthāṃ mithaḥ kasmācchaṅkareṇā 'pi durgamam

vyāptaṃ guhā-śayaiḥ krūraiḥ kravyādbhiḥ sa-niśācaraiḥ

tuṅga-śaila-taru-channaṃ mānuṣāṇāma-gocaram.

satvamejaya-siṃhā''ḍhyān stanaṃ-dhāya-sama-tviṣau

kathaṃ nāḍiṃdhamān mārgānāgatau viṣamopalān.

attīrṇau vā kathaṃ bhīmāḥ saritaḥ kūlamudvahāḥ,,

āsāditau kathaṃ brūtaṃ na gajaiḥ kūlamudrujaiḥ.

rāmo 'vocaddhanūmantam "āvāmabhraṃ-lihaṃ girim

aiva vidvan! pituḥ kāmāt pāntāvalpaṃ-pacān munīn.

a-mitaṃ-pacamīśānaṃ sarva-bhogīṇamuttamam

āvayoḥ pitaraṃ viddhi khyātaṃ daśarthaṃ bhuvi.

chalena dayitā 'raṇyād rakṣasā 'ruṃ-tudena naḥ

a-sūryaṃ-paśyayā mūrtyā hṛtā, tāṃ mṛgayāvahe."

pratyūce māruti rāmam "asti vālīti vānaraḥ"

śamayedapi saṃgrāme yo lalāṭaṃ-tapaṃ ravim.

ugraṃ-paśyena sugrīvas tena bhrātā nirākṛtaḥ,

tasya mitrīyato dūtaḥ saṃprāpto 'smi vaśaṃ-vadaḥ

priyaṃ-vado 'pi naivā 'haṃ bruve mithyā paraṃ-tapa !,

sakhyā tena daśa-grīvaṃ nihantāsi dviṣaṃ-tapam.

vācaṃ-yamo'hamanṛte satyametad bravīmi te,

ehi, sarvaṃ-sahaṃ mitraṃ sugrīvaṃ kuru vānaram."

sarvaṃ-kaṣa-yaśaḥ-śākhaṃ rāma-kalpa-taruṃ kapiḥ

ādāyā' bhraṃ-kaṣaṃ prāyān malayaṃ phala-śālinam.

meghaṃ-karamivāyāntamṛtuṃ rāmaṃ klamānvitāḥ

dṛṣṭvā mene nasugrīvo vāli-bhānuṃ bhayaṃ-karam.

upāgnyakurutāṃ sakhyamanyonyasya priyaṃ-karau,

kṣemaṃ-karāṇi kāryāṇi paryālocayatāṃ tataḥ.

āśitaṃ-bhavamutkruṣṭaṃ valgitaṃ śayitaṃ sthitam

bahvamanyata kākutsthaḥ kapīnāṃ svecchayā kṛtam

tato baliṃ-dama-prakhyaṃ kapi-viśvaṃ-bharā'dhipam

sugrīvaḥ prābravīd rāmaṃ vālino yudhi vikramam

"vasuṃ-dharāyāṃ kṛtsnāyāṃ nā'sti vāli-samo balī,

hṛdayaṃ-gamametat tvāṃ bravīmi, na parābhavam.

dūra-gairanta-gair bāṇair bhavānatyanta-gaḥ śriyaḥ

api saṃkrandanasya syāt kruddhaḥ, kimuta vālinaḥ

vareṇa tu muner vālī saṃjāto dasyuho raṇe

a-vārya-prasaraḥ prātarudyanniva tamo'pahaḥ

atipriyatvān na hi me kātaraṃ pratipadyate

ceto vāli-vadhaṃ rāma ! kleśāpahamupasthitam.

śīrṣa-ghātinamāyātamarīṇāṃ tvāṃ vilokayan

patighnī-lakṣmaṇopatāṃ manye'haṃ vālinaḥ śriyam.

śatrughnān yudhi hastighno girīn kṣipyanna-kṛtrimān

śilpibhiḥ pāṇighaiḥ kruddhas tvayā jayyo 'bhyupāya-vān.

āḍhyaṃ-karaṇa-vikrānto mahiṣasya suradviṣaḥ

priyaṃ-karaṇamindrasya duṣkaraṃ kṛtavān vadham.

priyaṃbhāvukatāṃ yātas taṃ kṣipan yojanaṃ mṛtam

svarge priyaṃ-bhaviṣṇuś ca krtsnaṃ śakto 'pyabādhayan",

jijñāsoḥ śaktimastrāṇāṃ rāmo nyūna-dhiyaḥ kapeḥ

abhīnat pratipattyarthaṃ sapta vyoma spṛśas tarūn.

tato vāli-paśau vadhye rāma-rtvig-jita-sādhvasaḥ

abhyabhūn nilayaṃ bhrātuḥ sugrīvo ninadan dadhṛk.

guhāyā niragād vālī siṃho mṛgamiva dyuvan

bhrātaraṃ yuṅ bhiyaḥ saṃkhye ghoṣeṇā ''pūrayan diśaḥ

vyāyacchamānayor mūḍho bhede sadṛśayos tayoḥ

bāṇamudyatamāyaṃsīdikṣvāku-kula-nandanaḥ.

ṛṣyamūkamagāt klantaḥ kapir mṛga-sadṛg drutam

kiṣkindhā'drisadā''tyarthaṃ niṣpiṣṭaḥ koṣṇamucchvasan.

kṛtvā vāli-druhaṃ rāmo mālayā sa-viśeṣaṇam.

aṅgada-svaṃ punar hantuṃ kapighnā''hvāyayad raṇe.

tayor vānara-senānyoḥ saṃprahāre tanucchidam

vālino dūra-bhāg rāmo bāṇaṃ prāṇā'damatyajat

vālinaṃ patitaṃ dṛṣṭvā vānarā ripu-ghātinam

bāndhavā''krośino bhejuranāthāḥ kakubho daśa

dhig dāśarathimityūcur munayo vana-vartinaḥ.

upeyur madhu-pāyinyaḥ krośantyas taṃ kapi-striyaḥ.

rāmamuccairupālabdha śūra-mānī kapi-prabhuḥ

vraṇa-vedanayā glāyansādhuṃ-manyama-sādhuvat.

"mṛṣā 'si tvaṃ havir-yājī rāghava ! chadma-tāpasaḥ

anya-vyāsakta-ghātitvād brahmaghnāṃ pāpa-saṃmitaḥ.

pāpa-kṛt sukṛtāṃ madhye rājñaḥ puṇyakṛtaḥ sutaḥ

māmapāpaṃ durācāra ! kiṃ nihatyā 'bhidhāsyasi.

agni-cit soma-sud rājā ratha-cakra-cidā''diṣu

analeṣviṣṭavān kasmān na tvayā 'pekṣitaḥ pitā.

māṃsa-vikrayiṇaḥ karma vyādhasyā 'pi vigarhitam

māṃ ghnatā bhavatā 'kāri niḥṣaṅkaṃ pāpa-dṛṣvanā.

buddhipūrvaṃ dhruvan na tvā rāja-kṛtvā pitā khalam

sahayudhvānamanyena yo 'hino māmanāgasam

pañca pañcanakhā bhakṣyā ye proktāḥ kṛta-jair dvijaiḥ,

kauśalyā-ja ! śaśā''dīnāṃ teṣāṃ naiko 'pyahaṃ kapiḥ.

kathaṃ duṣṭhuḥ svayaṃ dharme prajās tvaṃ pālayiṣyasi,

ātmā'nujasya jihreṣi saumitres tvaṃ kathaṃ na vā.

manye kiṃ-jamahaṃ ghnantaṃ tvāma-kṣattriya-je raṇe

lakṣmaṇā 'dhija ! durvṛtta ! prayuktamanujena naḥ".

pratyūce vālinaṃ rāmo"nā 'kṛtaṃ kṛtavānaham

yajvabhiḥ sutvabhiḥ pūvair jaradbhiś ca kapīṣvara !

te hi jālair gale pāśais tiraścāmupaseduṣām

ūṣuṣāṃ para-dāraiś ca sārdhaṃ nidhanamaiṣiṣuḥ.

ahaṃ tu ṣuṣruvānbhrātrā striyaṃ bhuktāṃ kanīyasā

upeyivānanūcānair ninditas-tvaṃ latā-mṛga !

anvanaiṣīt tato vālī trapā-vāniva rāghavam.

nyakṣipac cā'ṅgadaṃ yatnāt kākutsthe tanayaṃ priyaṃ

mriyamāṇaḥ sa sugrīvaṃ proce sad-bhāvamāgataḥ

"saṃbhāviṣyāva ekasyāmabhijānāsi mātari.

avasāva nagendreṣu, yat pāsyāvo madhūni ca,

abhijānīhi tat sarvaṃ, bandhūnāṃ samayo hyayam.

daivaṃ na vidadhe nūnaṃ yugapat sukhamāvayoḥ,

śaśvad bahūva tad duḥsthaṃ yato na" itihā 'karot.

dadau sa dayitāṃ bhrātre mālāṃ cā'gryāṃ hiraṇmayīm,

rājyaṃ saṃdiśya bhogāmś ca mamāra vraṇa-pīḍitaḥ

tasya nirvartya kartavyaṃ sugrīvo rāghavā''jñayā

kiṣkindhā'dri-guhāṃ gantuṃ manaḥ praṇidadhe drutam

nāma-grāhaṃ kapibhiraśanaiḥ stūyamānaḥ samantā- danvag-bhāvaṃ raghu-vṛṣabhayor vānarendro virājan

abhyarṇe 'mbhaḥ-patana-samaye parṇalībhūta-sānuṃ kiṣkindhādriṃ nyaviśata madhu-kṣība-guñjad-dvirepham.

Bhk_7

tataḥ kartā vanā''kampaṃ vavau varṣā-prabhañjanaḥ,

nabhaḥ pūrayitāraś ca samunnemuḥ payo-dharāḥ.

tarpaṇaṃ prajaniṣṇūnāṃ ṣasyānāma-malaṃ payaḥ

rociṣṇavaḥ sa-visphūrjā mumucur bhinna-vad ghanāḥ

nirākariṣṇavo bhānuṃ divaṃ vartiṣṇavo 'bhitaḥ

alaṃkariṣṇavo bhāntas taḍitvantaś cariṣṇavaḥ

tān vilokyā 'sahiṣṇuḥ san vilalānponmadiṣṇu-vat

vasan mālyavati glāsnū rāmo jiṣṇura-dhṛṣṇu-vat

"bhramī kadamba-saṃbhinnaḥ pavanaḥ śamināmapi

klami-tvaṃ kurute'tyarthaṃ megha-śīkara-śītalaḥ.

saṃjvāriṇeva manasā dhvāntamāyāsinā mayā

drohi khadyota-saṃparki nayanā'moṣi duḥsaham.

kurvanti parisāriṇyo vidyutaḥ paridevinam

abhyāghātibhirāmiśrāś cātakaiḥ parirāṭibhiḥ.

saṃsargī paridāhīva śīto 'pyābhāti śīkaraḥ,

soḍhumākrīḍino 'śakyāḥ śikhinaḥ parivādinaḥ.

etā devānurodhinyo dveṣiṇya iva rāgiṇam

pīḍayanti janaṃ dhārāḥ patantyo 'napakāriṇam.

kūryād yoginamapyeṣa sphūrjā-vān parimohinam

tyāginaṃ sukha-duḥkhasya parikṣepyambhasāmṛtuḥ.

vikatthī yācate prattama-viśrambhī muhur jalam

parjanyaṃ cātakaḥ pakṣī nikṛntanniva mānasam.

pralāpino bhaviṣyanti kadā nvete 'palāṣiṇaḥ."

pramāthino viyuktānāṃ hiṃsakāḥ pāpa-dardurāḥ.

nindako rajaniṃmanyaṃ divasaṃ kleśako niśām

prāvṛṣyanaiṣīt kākutsthaḥ kathaṃcit paridevakaḥ

athopaśarade 'paśyat krauñcānāṃ ceṣṭanaiḥ kulaiḥ

utkaṇṭhā-vardhanaiḥ śubhraṃ ravaṇairambaraṃ tatam.

vilokya dyotanaṃ candraṃ lakṣmaṇaṃ śocano 'vadat

"paśya dandramaṇān haṃsānaravindasamutsukān.

kapiś caṅkramaṇo 'dyāpi nā 'sau bhavati gardhanaḥ,

kurvanti kopanaṃ tārā maṇḍanā gaganasya mām.

nā 'vaityāpyāyitāraṃ kiṃ kamalāni raviṃ kapiḥ

dīpitāraṃ dinā''rambhe nirasta-dhvānta-saṃcayam.

atīte varṣuke kāle, pramattaḥ sthāyuko gṛhe

gāmuko dhruvamadhvānaṃ sugrīvo vālinā gatam.

jalpākībhiḥ sahā ''sīnaḥ strībhiḥ prajavinā tvayā

gatvā lakṣmaṇa ! vaktavyo jayinā niṣṭhuraṃ vacaḥ

śaile viśrayiṇaṃ kṣipramanādariṇamabhyamī

nyāyaṃ paribhavī brūhi pāpama-vyathinaṃ kapim.

spṛhayāluṃ kapiṃ strībhyo nidrāluma-dayālu-vat

śraddhāluṃ bhrāmaraṃ dhāruṃ sadrumadrau vada drutam."

sṛmaro bhaṅgura-prajño gṛhītvā bhāsuraṃ dhanuḥ

viduro jitvaraḥ prāpa lakṣmaṇo gatvarān kapīn.

taṃ jāgarūkaḥ kāryeṣu dandaśūka-ripuṃ kapiḥ

a-kampraṃ mārutir dīpraṃ namraḥ prāveśayad guhām

kamrābhirāvṛtaḥ strībhirāśaṃsuḥ kṣemamātmanaḥ

icchuḥ prasādaṃ praṇayan sugrīvaḥ prāvadan nṛpam.

"ahaṃ svapnak prasādena tava vandārubhiḥ saha

a-bhīruravasaṃ strībhir bhāsurābhirīheśvaraḥ.

vidyan-nāśaṃ raver bhāsaṃ vibhrājaṃ śaśa-lāñchanam

rāma-pratteṣu bhogeṣu nāhamajñāsiṣaṃ rataḥ

eṣa śoka-cchido vīrān prabho ! samprati vānarān

dharā-śaila-samudrāṇāmanta-gān prahiṇomyaham.

atha niradhikārakṛt

rāghavasya tataḥ kāryaṃ kārur vānara-puṅgavaḥ

sarva-vānara-senānāmāśvāgamanamādiśat.

"vayamadyaiva gacchāmo rāmaṃ draṣṭuṃ tvarā'nvitāḥ

kārakā mitra-kāryāṇi sītā-lābhāya", so 'bravīt."

tataḥ kapīnāṃ saṃghātā harṣād rāghava-bhūtaye

pūrayantaḥ samājagmur bhaya-dāyā diśo daśa.

sugrīvā'ntikamāseduḥ sādayiṣyāma ityarim

kariṣyanta ivā'kasmād bhuvanaṃ nir-daśānanam.

kartā 'smi kāryamāyātairebhirityavagamya saḥ

kākutstha-pādapa-cchāyāṃ sīta-sparśāmupāgamat.

kāryaṃ sāra-nibhaṃ dṛṣṭvā vānarāṇāṃ samāgamam

avain nāśaṃ daśā''syasya nirvṛttamiva rāghavaḥ.

tataḥ kapi-samāhārame'kaniścāyamāgatam

upādhyāya'ivā''yāmaṃ sugrīvo'dhyāpipad diśām

sa-jalā'mbho-da-saṃrāvaṃ hanu-mantaṃ sahā'ṅgadam

jāmbavaṃ nīla-sahitaṃ cāru-sandrāvamabravīt

"yāta yūyaṃ yama-śrāyaṃ diśaṃ nāyena dikṣaṇām

vikṣāvas toya-viśrāvaṃ tarjayanto mahodadheḥ

unnāyānadhigacchantaḥ pradrāvair vasudhā-bhṛtām

vanā'bhilāvān kurvantaḥ svecchayā cāru-vikramāḥ

sadodgāra-sugandhīnāṃ phalānāmalamāśitāḥ

utkāreṣu ca dhānyānāmanabhīṣṭa-parigrahāḥ

saṃstāvamiva śṛṇvantaś chandogānāṃ mahādhvare

śiñjitaṃ madhu-lehānāṃ puṣpa-prastāra-śāyinām

ālocayanto vistāramambhasāṃ dakṣiṇodadheḥ

svādayantaḥ phala-rasaṃ muṣṭi-saṃgrāha-pīḍitam.

nyāyyaṃ yad yatra, tat kāryaṃ paryāyeṇā 'virodhibhiḥ,

niśopaśāyaḥ kartavyaḥ phaloccāyaś ca saṃhataiḥ

sītā rakṣo-nikāyeṣu stoka-kāyaiś chalena ca

mṛgyā śatru-nikāyānāṃ vyāvahāsīmanāśritaiḥ

sāṃrāviṇaṃ na kartavyaṃ, yāvan nā''yāti darśanam,

saṃdṛṣṭāyāṃ tu vaidehyāṃ nigrāho vo'rthavānareḥ.

pragrāhairiva pātrāṇāmanveṣyā maithilī kṛtaiḥ

jñātavyā ceṅgitair dhyāyantī rāghavā''gamam.

vedi-vat sa-parigrāhā yajñayaiḥ saṃskṛtā dvijaiḥ

dṛśyā māsa-tamāgahnaḥ prāga-nindita-veśa-bhṛt

nīvāra-phala-mūlā'śānṛṣīnapyatiśerate

yasya guṇā niruddrāvās tāṃ drutaṃ yāta, paśyata.

ucchrāya-vān ghanā''rāvo vānaraṃ jaladā'ravam

dūrā''plāvaṃ hanū-mantaṃ rāmaḥ proce gajā''plavaḥ

"avagrāhe yathā vṛṣṭiṃ prārthayante kṛṣīvalāḥ,

prarthayadhvaṃ tathā sītāṃ, yāta sugrīva-śāsanam

vaṇik pragrāha-vān yadvat kāle carati siddhaye,

deśā'pekṣās tathā yūyaṃ yātā ''dāyā'ṅgulīyakam."

abhijñānaṃ gṛhītvā te samutpetur nabhas-talam

vājinaḥ syandane bhānor vimukta-pragrahā iva.

udak śatavaliṃ koṭyā, suṣeṇaṃ pakṣimāṃ tathā

diśaṃ prāsthāpayad rājā vānarāṇāṃ kṛta-tvaraḥ

prācīṃ tāvadbhira-vyagraḥ kapibhir vinato yayau

a-pragrāhairivā''dityo vājibhir-dūra-pātibhiḥ.

yayur vindhyaṃ śaran-meghaiḥ prāvāraiḥ pravarairiva

pracchannaṃ māruti-praṣṭhāḥ sītāṃ draṣṭuṃ plavaṅgamāḥ

paribhāvaṃ mṛgendrāṇāṃ kurvanto naga-mūrdhasu

vindhye tigmāṃśu-mārgasya ceruḥ paribhavopame.

bhremuḥ śiloccayāṃs tuṅgānutteruratarān nadān

āśaṃsavo lavaṃ śatroḥ sītāyāś ca viniścayam

ādareṇa gamaṃ cakrur viṣamesvapya-saṅghasāḥ

vyāpnuvanto diśo 'nyādān kurvantaḥ sa-vyadhān harīn.

saṃceruḥ sa-hasāḥ kecida,-svanāḥ kecidāṭiṣuḥ

saṃyāma-vanto yati-van, nigadānapare 'mucan.

atha klamāda-niḥkvāṇā narāḥ kṣīṇa-paṇā iva

a-madāḥ sedurekasmin nitambe nikhilā gireḥ.

tataḥ sa-saṃmadās tatra niraikṣanta patatriṇaḥ

guhā-dvāreṇa niryātaḥ samajena paśūniva.

vīnāmupasaraṃ dṛṣṭvā te 'nyonyāpahavā guhām

prāviśannāhava-prajñā āhāvamupalipsavaḥ.

kurvanto havamāptānāṃ pipāsā-vadha-kāṅkṣiṇaḥ

dvāraṃ tamo-ghana-prakhyaṃ guhāyāḥ prāviśan drutam.

tasminnantarghaṇe 'paśyan praghāṇe saudha-sadmanaḥ.

lauhodghana-ghana-skandhā lalitā'paghanāṃ striyam

sā stambaghna-pada-nyāsān vighanendu-sama-dyutiḥ

parighoru-bhujānāha hasantī svāgataṃ kapīn.

piprāyā 'dri-guhopaghnānudghān saṃghasamāgatān

phalair nānā-rasaiś citraiḥ svādu-śītaiś-ca vāribhiḥ

nighā'nigha-taru-cchanne tasmiṃs te labdhrimaiḥ phalaiḥ

tṛptās tāṃ bhrājathu-matīṃ papracchuḥ-"kasya pūriyam."

"rakṣṇaṃ karoṣi kasmāt tvaṃ, yatnenā ''khyāyatāṃ śubhe !

svapne nidhi-vadābhāti tava saṃdarśanaṃ hi naḥ.

tato jaladhi-gambhīrān vānarān pratyavāca sā

"iyaṃ dānava-rājasya pūḥ sṛṣṭir viśvakarmaṇaḥ

jihataś ca sthitiṃ bhindan dānavo'sau jala-dviṣā,

duhitā merusāvarṇerahaṃ nāmnā svayaṃ-prabhā.

jūtimicchatha cet tūrṇaṃ, kīrtiṃ vā pātumātmanaḥ

karomi vā bahir-yūtīn, pidhadhvaṃ pāṇibhirdṛśaḥ"

prajyā-yatī niruddhā'kṣān vidyevā'nuṣṭhita-kriyān

niracikramadicchā-to vānarāṃś caṅkramā-vataḥ.

niṣkramya śikṣayā tasyās trapā-vanto rasā-talāt

jñātvā māsumatikrāntaṃ vyathāmavalalambire.

cintā-vantaḥ kathāṃ cakrurupadhā-bheda-bhīravaḥ

"a-kṛtvā nṛ-pateḥ kāryaṃ pūjāṃ lapsyāmahe katham.

prāyopāsanayā śāntiṃ manvāno vāli-saṃbhavaḥ

yuktvā yogaṃ sthitaḥ śaile vivṛṇvaṃścitta-vedanām

praskandikāmiva prāpto dhyātvā brūte sma jāmbavān

"dhik śālabhañjikā-prakhyān viśayān kalpanā-rucīn,

yāṃ kāriṃ rāja-putro, 'yamanutiṣṭhati, tāṃ kriyām

ahamapyanutiṣṭhāmi" so 'pyuktvaivamupāviśat.

uvāca mārutir vṛddhe saṃnyāsinyatra vānarāt

"ahaṃ paryāyasaṃprāptāṃ kurve prāyopaveśikām

a-bhāve bhavatāṃ yo 'smin jīvet, tasyā'stva-jīvaniḥ,"

ityuktvā sarva evā 'sthur baddhvā yogā''sanāni te.

a-kleśyamasinā 'gnyantaṃ kabandha-vadhamabhyadhuḥ,

dhiṅ naḥ prapatanaṃ ghoraṃ kledā'ntatvama-nātha-vat.

tato manda-gataḥ pakṣī teṣāṃ prāyopaveśanam

aśanīyamivāśaṃsur mahānāyāda-śobhanaḥ

deha-vraścana-tuṇḍā'graṃ taṃ vilokyā 'śubhā''karam

pāpa-gocaramātmānamaśocan vānarā muhuḥ

"jaṭāyuḥ puṇya-kṛt pakṣī daṇḍakāraṇya-sañcaraḥ

kṛtvā rāghava-kāryaṃ yaḥ svarā''rūḍho 'gni-saṃskṛtaḥ

narakasyā 'vatāro 'yaṃ pratyakṣo 'smākamāgataḥ,

a-ceṣṭā yadihā 'nyāyādanenā 'tsyāmahe vayaṃ

hṛdayodaṅka-saṃsthānaṃ kṛtāntā''nāya-sannibham

śarīrā''khana-tuṇḍā'graṃ prāpyā-'muṃ śarma durlabham.

īṣadāḍhyaṅkaro 'pyeṣa na paratrā 'śubha-kriyā,

asmānattumito 'bhyeti pariglāno bubhukṣayā."

saṃprāpya vānarān pakṣī jagāda madhuraṃ vacaḥ

"ke yūyaṃ durupasthāne manasā 'pyadri-mūrdhani.

atha prakīrṇakāḥ

ātmanaḥ paridevadhve kurvanto rāma-saṃkathām,

samānodaryamasmākaṃ jaṭāyuṃ ca sthuthā ''darāt.

śaṅkā-dhavitra-vacanaṃ pratyūcur vānarāḥ khagam

"vayaṃ śatru-lavitreṣor dūtā rāmasya bhū-pateḥ.

kenā 'pi dauṣkuleyena kulyāṃ māhākulīṃ priyām

hṛtāṃ māhākulīnasya tasya lipsāmahe vayam.

triṃśattamamahar yātaṃ matvā pratyāgamā'vadhim

a-kṛtā'rthā viśīdantaḥ para-lokamupāsmahe.

mriyāmahe, na gacchāmaḥ kauśalyāyani-vallabhām

upalambhyāma-paśyantaḥ kaumārīṃ patatāṃ vara !"

jagāda vānarān pakṣī-"nādhyagīḍhvaṃ dhruvaṃ smṛtim

yūyaṃ saṃkuṭiyuṃ yasmāt kāle 'sminnadhyavasyatha.

nā'yamudvijituṃ kālaḥ svāmi-kāryād bhavādṛśām

hṛta-bhārye cyute rājyād rāmo paryutsuke bhṛśam.

yatnaṃ prorṇavituṃ tūrṇaṃ diśaṃ kuruta dakṣiṇām,

prorṇuvitrīṃ divas tatra purīṃ drakṣyatha kāñcanīm.

laṅkāṃ nāmnā girer mūrdhni rākṣasendreṇa pālitām

nirjitya śakramānītā dadṛśur yāṃ sura-striyaḥ

babhūva yā 'dhiśailendraṃ mṛditvevendra-gocaram

kuṣitvā jagatāṃ sāraṃ saikā śaṅke kṛtā bhuvi.

a-mṛḍitvā sahasrā'kṣaṃ kliśitvā kauśalair nijaiḥ

uditvā 'laṃ ciraṃ yatnāt saikā dhātrā vinirmitā.

muṣitvā dhana-daṃ pāpo yāṃ gṛhītvā ''vasad dviṣan,

tāṃ ruditveva śakreṇa yāta laṅkāmupekṣitām.

viditvā śaktimātmīyāṃ rāvaṇaṃ vijighṛkṣavaḥ

uktaṃ pipṛcchiṣūṇāṃ vo mā sma bhūta suṣupsavaḥ.

nā 'vividiṣumbhyeti sampad rurudiṣuṃ naram,

kiṃ mumuṣiṣu-vad yāta dviṣo nā 'pacikīrṣayā.

bubhutsavo drutaṃ sītāṃ bhutsīdhvaṃ, prabravīmi vaḥ,

mā ca bhuddhvaṃ mṛṣoktaṃ naḥ, kṛṣīḍhvaṃ svāmine hitaṃ

samagadhvaṃ puraḥ śatror, modayadhvaṃ raghūttamam,

nopāyadhvaṃ bhayaṃ, sītāṃ nopāyaṃsta daśānanaḥ.

tataḥ prāsthiṣatā 'drīndraṃ mahendraṃ vānarā drutam

sarve kilakilāyanto, dhairyaṃ cā''dhiṣatā 'dhikam.

nikuñje tasya vartitvā ramye prakṣveditāḥ param

maṇi-ratnā'dhiśayitaṃ pratyudaikṣanta toya-dhim

a-marṣitamiva ghnantaṃ taṭā'drīn malilormibhiḥ

śriyā samagraṃ dyutitaṃ madeneva praloṭhitam

pūtaṃ śītair nabhasvadbhir granthitveva sthitaṃ rucaḥ

gumphitveva nirasyantaṃ taraṅgān sarvato muhuḥ

vañcitvā 'pyambaraṃ dūraṃ svasmiṃs tiṣṭhantamātmani

tṛṣitvevā 'niśaṃ svādu pibantaṃ saritāṃ payaḥ

dyutitvā śaśinā naktaṃ raśmibhiḥ parivardhitam

meror jetumivā ''bhogamuccair didyotiṣuṃ muhuḥ.

vilokya saliloccayānadhi-samudramabhraṃlihān bhraman-makara bhīṣaṇaṃ samadhigamya cā 'dhaḥ payaḥ

gamā''gama-sahaṃ drutaṃ kapi-vṛṣāḥ paripraiṣayan gajendra-guru-vikramaṃ taru-mṛgottamaṃ mārutim.

Bhk_8

āgādhata tato vyoma hanūmānuru-vigrahaḥ,

atyaśerata tad-vegaṃ na suparṇā'rka-mārutāḥ

abhāyata yathā'rkeṇa suprātena śaran-mukhe,

gamyamānaṃ na tenā''sīdagataṃ krāmatā puraḥ.

viyati vyatyatanvātāṃ mūrtī hari-payonidhī,

vyatyaitāṃ cottamaṃ mārgamarkendrendu-niṣevitam.

vyatijigye samudro'pi na dhairyaṃ tasya gacchataḥ

vyatyagacchan na ca gataṃ pracaṇḍo'pi prabhañjanaḥ.

vyatighnantīṃ vyatighnantāṃ rākṣasīṃ pavanā''tmajaḥ

jaghānā''viśya vadanaṃ niryāt bhittvodaraṃ drutam

anyonyaṃ sma vyatiyutaḥ śabdān śabdais tu bhīṣaṇān

udanvāṃś cāniloddhūto mriyamāṇā ca rākṣasī.

nyavikṣata mahā-grāha-saṃkulaṃ makarā''layam

saikā bahūnāṃ kurvāṇā nakrāṇāṃ svā''śitambhavam

kṛtenopakṛtaṃ vāyoḥ parikrīṇānamutthitam

pitrā saṃrakṣitaṃ śakrāt sa mainākā'drimaikṣata.

khaṃ parājayamāno'sāvunnatya pavanā'tmajam

jagādā'drir "vijeṣīṣṭhā mayi viśramya vairiṇam.

phalānyādatsva citrāṇi, parikrīḍasva sānuṣu,

sādhvanukrīḍamānāni paśya vṛndāni pakṣiṇām.

kṣaṇaṃ bhadrā'vatiṣṭhasva, tataḥ prasthāsyase punaḥ

na tat saṃsthāsyate kāryaṃ dakṣeṇorīkṛtaṃ tvayā.

tvayi nas tiṣṭhate prītis tubhyaṃ tiṣṭhāmahe vayam,

uttiṣṭhamānaṃ mitrā'rthe kas tvāṃ na bahu manyate.

ye sūryamupatiṣṭhante mantraiḥ saṃdhyā-trayaṃ dvijāḥ,

rakṣobhis tāpitās te'pi siddhiṃ dyāyanti te'dhunā.

a-vyagramupatiṣṭhasva vīra ! vāyorahaṃ suhṛt,

ravir vitapate'tyarthamāśvasya mayi gamyatām.

tīvramuttapamāno 'yama-śakyaḥ soḍhumātapaḥ,

āghnāna iva saṃdīptairalātaiḥ sarvato muhuḥ.

saṃśṛṇuṣva kape ! matkaiḥ saṃgacchasva vanaiḥ śubhaiḥ,

samāranta mamā 'bhīṣṭāḥ saṃkalpās tvayyupāgate.

ke na saṃvidrate, vāyor mainākā'drir yathā sakhā,

yatnādupāhvaye pratītaḥ, saṃhvayasva vivakṣitam.

dyāmivāvayamānaṃ tamavocad bhūdharaṃ kapiḥ

upakurvantamatyarthaṃ prakurvāṇo'nujīvi-vat.

"kula-bhāryāṃ prakurvāṇamahaṃ draṣṭuṃ daśānanam

yāmi tvarā-vān śailendra !, mā kasyacidupaskṛthāḥ.

yo'pacakre vanāt sītāmadhicakre na yaṃ hariḥ,

vikurvāṇaḥ svarānadya balaṃ tasya nihanmyaham.

vikurve nagare tasya pāpasyā 'dya raghu-dviṣaḥ,

vineṣye vā priyān prāṇānudāneṣye'thavā yaśaḥ.

vineṣye krodhamathavā kramamāṇo'ri-saṃsadi"

ityuktvā khe parākraṃsta tūrṇaṃ sūnur nabhasvataḥ.

parīkṣitumupākraṃsta rākṣasī tasya vikramam

divamākramamāṇeva ketu-tārā bhaya-pradā.

jale vikramamāṇāyā hanūmān śata-yojanam

āsyaṃ praviśya nirayādaṇūbhūyā 'pracetitaḥ.

draṣṭuṃ prakramamāṇo 'sau sītāmambhonidhes taṭam,

upākraṃstā ''kulaṃ ghoraiḥ kramamāṇair niśācaraiḥ

ātmānamapajānānaḥ śaśa-mātro 'nayad dinam,

jñāsye rātrāviti prājñaḥ pratyajñāsta kriyā-paṭuḥ.

saṃjānānān paridharan rāvaṇā'nucarān bahūn

laṅkāṃ samāviśad rātrau vadamāno'ri-durgamām.

kiṃcin nopāvadiṣṭā 'sau, kenacid vyavadiṣṭa na,

śṛṇvan saṃpravadamānād rāvaṇasya guṇān janāt.

jalpitotkruṣṭa-saṃgīta-pranṛtta-smita-valgitaiḥ

ghoṣasyānvavadiṣṭeva laṅkā putā-kratoḥ puraḥ

aid vipravadamānais tāṃ saṃyuktāṃ brahma-rākṣasaiḥ

tathā'vagiramāṇaiś ca piśācair māmsa-śoṇitam.

yathā-svaṃ saṃgirante sma goṣṭhīṣu svāmino guṇān,

pāna-śauṇḍāḥ pathaḥ kṣībā vṛndairudacaranta ca.

yānaiḥ samacarantā 'nye kuñjarā'śva-rathā''dibhiḥ,

saṃprāyacchanta bandībhiranye puṣpa-phalaṃ śubham.

kopāt kāścit priyaiḥ prattamupāyaṃsata nā''savam,

prema jijñāsamānābhyas tābhyo''śapsata kāminaḥ

prādidṛkṣata no nṛtyaṃ, nā 'śuśrūṣata gāyanān

rāmaṃ susmūrṣamāṇo'sau kapir viraha-duḥkhitam.

anujijñāsatevā'tha laṅkā-darṣanamindunā

tamo'pahavimuktāṃ'śu pūrvasyāṃ diśyudaiyata.

āśuśrūṣan sa maithilyā vārtāṃ harmyeṣu rakṣasām

śīyamāna'ndhakāreṣu samacārīda-śaṅkitaḥ.

śata-sāhasramārakṣaṃ madhyagaṃ rakṣasāṃ kapiḥ

dadarśa, yaṃ kṛtānto'pi mriyetā''sādya bhīṣaṇam,

adhyāsisiṣamāṇe 'tha viyan-madhyaṃ niśā-kare

kāsāṃcakre purī saughairatīvodbhāsibhiḥ sitaiḥ

induṃ caṣaka-saṃkrāntamupāyuṅkta yathā'mṛtam,

payuñjānaḥ priyā vācaḥ samājā'nurato janaḥ

saṃkṣṇuvāna ivotkaṇṭhāmupābhuṅkta surāmalam

jyotsnāyāṃ vigalan-mānas taruṇo rakṣasāṃ gaṇaḥ

madhvapāyayata svacchaṃ sotpalaṃ dayitā'ntike

ātmānaṃ suratā''bhoga-viśrambhotpādanaṃ muhuḥ

abhīṣayanta ye śakraṃ rākṣasā raṇa-paṇḍitāḥ

avismāpayamānas tān kapiroṭīd gṛhād gṛham,

sītāṃ didṛkṣuḥ pracchannaḥ so 'gardhayata rākṣasān,

avañcayata māyāś ca sva-māyābhir naradviṣām,

apalāpayamānasya śatrūṃs tasyā'bhavan matiḥ

"mithyā kārayate cārair ghoṣaṇāṃ rākṣasā'dhipaḥ"

gūhamānaḥ sva-māhātmyamaṭitvā mantri-saṃsadaḥ

nṛbhyo 'pavadamānasya rāvaṇasya gṛhaṃ yayau,

diśo dyotayamānābhir divya-nārībhirākulam

śriyamāyacchamānābhiruttamābhiranuttamām

nityamudyacchamānābhiḥ smarasaṃbhoga-karmasu

jānānābhiralaṃ līlā-kila kiṃcita-vibhramān

svaṃ karma kārayannāste niścinto yā jhaṣa-dhvajaḥ,

svārthaṃ kārayamāṇābhir yūno mada-vimohitān

kāntiṃ svāṃ vahamānābhir yajantībhiḥ sva-vigrahān

netrairiva pibantībhiḥ paśyatāṃ citta-saṃhatīḥ

tā hanūmān parākurvannagamat puṣpakaṃ prati

vimānaṃ mandarasyādreranukurvadiva śriyam.

tasmin kailāsa-saṃkāśāṃ śiraḥ-śṛṅgaṃ bhaja-drumam

abhikṣipantamaikṣiṣṭa rāvaṇaṃ parvata-śriyam

pravahantaṃ sadāmodaṃ suptaṃ parijanā'nvitam

maghone parimṛṣyantamārabhantaṃ paraṃ smare

vyaramat pradhanād yasmāt paritrastaḥ sahasra-dṛk,

kṣaṇaṃ paryaramat tasya darśanān mārutā''tmajaḥ.

upāraṃsīc ca saṃpaśyan vānaras taṃ cikīrṣitāt

ramyaṃ merumivā''dhūta-kānanaṃ śvasanormibhiḥ

dṛṣṭvā dayitayā sākaṃ rahībhūtaṃ daśānanam

nā 'tra sītetyupāraṃsta durmanā vāyu-saṃbhavaḥ.

tataḥ prākāramārohat kṣapāṭānavibodhayan,

nā'yodhayat samartho'pi sītā-darśana-lālasaḥ.

adhyāsīd, "rāghavasyā 'haṃ nāśayeyaṃ kathaṃ śucam,

vaidehyā janayeyaṃ vā kathamānandamuttamam.

dṛṣṭvā rāghava-kāntāṃ tāṃ drāvayiṣyāmi rākṣasān,

tasyā hi darśanāt pūrvaṃ vikramaḥ kārya-nāśa-kṛt.

cintayannitthamuttuṅgaiḥ prāvayantīṃ divaṃ vanaiḥ

aśoka-vanikāmārādapaśyat stabakā''citām.

tāṃ prāviśat kapi-vyāghras tarūna-calayan śanaiḥ

a-trāsayan vana-śayān suptān śākhāsu pakṣiṇaḥ.

avād vāyuḥ śanair yasyāṃ latāṃ nartayamāna-vat

nā''yāsayanta saṃtrastā ṛtavo'nyonya-saṃpadaḥ.

jyotsnā 'mṛtaṃ śaśī vasyāṃ vāpīr vikasitotpalāḥ

apāyayata saṃpūrṇaḥ sadā daśa-mukhā''jñayā.

prādamayanta puṣpeṣuṃ yasyāṃ bandyaḥ samāhṛtāḥ

parimohayamāṇābhī rākṣasībhiḥ samāvṛtāḥ.

yasyāṃ vāsayate sītāṃ kevalaṃ sma ripuḥ smarāt

na tvarocayatā ''tmānaṃ caturo vṛddhi-mānapi

mandāyamāna-gamano haritāyat-taruṃ kapiḥ,

drumaiḥ śakaśakāyadbhir mārutenā ''ṭa sarvataḥ.

asyandannindu-maṇayato, vyarucan kumudā''karāḥ,

aloṭhiṣata vātena prakīrṇaḥ stabakoccayāḥ.

sītā'ntike vivṛtsantaṃ vartsyat-siddhiṃ plavaṅgamam

patatriṇaḥ śubhā mandramānuvānās tvajihladan.

vartiṣyamāṇamātmānaṃ sītā patyurivā 'ntike

udapaśyat tadā tathyair nimittairiṣṭa-darśanaiḥ.

"niravartsyan na ced vārtā sītāyā, vitathaiva naḥ

akalpsyadudyatiḥ sarvā", hanūmānityacintayat.

ityātmanepadādhikāraḥ

vṛkṣād vṛkṣaṃ parikrāman rāvaṇād bibhyatīṃ bhṛśam

śatros trāṇama-paśyantīma-dṛśyo janakā''tmajām

tāṃ parājayamānāṃ sa prīte rakṣyāṃ daśā''nanāt

antardadhānāṃ rakṣobhyo malināṃ mlāna-mūrdhajām

rāmādadhīta-saṃdeśo vāyor jātaś cyuta-smitām

prabhavantīmivādityādapaśyat kapi-kuñjaraḥ.

rocamānaḥ ku-dṛṣṭibhyo rakṣobhyaḥ prattavān śriyam

ślāghamānaḥ para-strībhyas tatra''gād rākṣasā'dhipaḥ.

aśapta nihnuvāno 'sau sītāyau smara-mohitaḥ,

dhārayānniva caitasyai vasūni pratyapadyata.

tasyai spṛhayamāṇo 'sau bahu priyamabhāṣata,

sānunītiś ca sītāyai na 'krudhyan, nāpyasūyata.

"saṃkrudhyasi mṛśā kiṃ tvaṃ didṛkṣuṃ māṃ mṛgekṣaṇe !,

īkṣitavyaṃ para-strībhyaḥ sva-dharmo rakṣasāmayam.

śṛṇvadbhyaḥ pratiśṛṇvanti madhyamā bhīru ! nottamāḥ,

gṛṇadbhyo 'nugṛṇantyanye 'kṛtā'rthā, naiva mad-vidhāḥ.

iccha snehena dīvyantī viṣayān bhuvaneśvaram,

saṃbhogāya parikrītaḥ kartāsmi tava nā 'priyam.

āssva sākaṃ mayā saudhe, mā'dhiṣṭhā nir-janaṃ vanam

mā 'dhivātsīr bhuvaṃ, śayyāmadhiśeṣva smarotsukā.

abhinyavikṣathās tvaṃ me yathaivā'vyāhatā manaḥ,

tavā'pyadhyāvasantaṃ māṃ mā rautsīr hṛdayaṃ tathā.

mā 'vamaṃsthā nāmasyantam-kārya-jñe ! jagat-patim,

saṃdṛṣṭe mayi kākutsthama-dhanyaṃ kāmayeta ? kā.

yaḥ payo dogdhi pāṣāṇaṃ, sa rāmād bhūtimāpnuyāt,

rāvaṇaṃ gamaya prītiṃ bodhayantaṃ hitā'hitaṃ.

prīto 'haṃ bhojayiṣyāmi bhavatīṃ bhuvana-trayam,

kiṃ vilāpayase'tyarthaṃ, pārśve śāyaya rāvaṇam.

ājñāṃ kāraya rakṣobhir, mā priyāṇyupahāraya,

kaḥ śakreṇa kṛtaṃ necchedadhimurdhānamañjalim.

iti kārakādhikāraḥ

vacanaṃ rakṣasāṃ patyuranu kruddhā pati-priyā

pāpā'nuvāsitaṃ sītā rāvaṇaṃ prābravīd vacaḥ

"na bhavānanu rāmaṃ cedupa śūreṣu vā, tataḥ

apavāhya cchalād vīrau kimarthaṃ māmihā 'haraḥ,

"upa-śūraṃ na te vṛttaṃ kathaṃ rātriṃcarā'dhama !

yat saṃpratyapalokebhyo laṅkāyāṃ vasatir bhayāt

ā rāma-darśanāt pāpa ! vidyotasva striyaḥ prati

sad-vṛttānanu dur-vṛttaḥ parastrīṃ jāta-manmathaḥ

abhi dyotiṣyate rāmo bhavantama-cirādiha,

udgūrṇa-bāṇaḥ saṃgrāme yo nārāyaṇataḥ prati.

kuto 'dhiyāsyasi krūra ! nihatas tena patribhiḥ

na sūktaṃ bhavatā 'tyugramatirāmaṃ madoddhata !

pariśeṣaṃ na nāmā 'pi sthāpayiṣyati te vibhuḥ,

api sthāṇuṃ jayed rāmo, bhavato grahaṇaṃ kiyat.

api stūhyapisedhā 'smāṃs tathyamuktaṃ narā'śan !,

api siñceḥ kṛśānau tvaṃ darpaṃ, mayyapi yo 'bhikaḥ.

adhirāme parākrāntamadhikartā sa te kṣayam,"

ityuktvā maithilī tūṣṇīmāsāṃcakre daśānanam.

tataḥ khaḍgaṃ samudyamya rāvaṇaḥ krūra-vigrahaḥ

vaidehīmantarā kruddhaḥ kṣaṇamūce viniśvasan.

"cireṇā 'nuguṇaṃ proktā pratipatti-parāṅmukhī

na māse pratipattāse māṃ cen, martāsi maithili !"

prāyuṅkta rākṣasīr bhīmā mandirāya prativrajan

"bhayāni datta sītāyai sarvā yūyaṃ kṛte mama."

gate tasmin samājagmur bhayāya prati maithilīm

rākṣasyo, rāvaṇa-prītyai krūraṃ cocuralaṃ muhuḥ

"rāvaṇāya namaskuyāḥ, syāt sīte ! svasti te dhruvam

anyathā prātarāśāya kuryāma tvāmalaṃ vayam.

tṛṇāya matvā tāḥ sarvā vadantīs trijaṭā 'vadat

"ātmānaṃ hata durvṛttāḥ ! sva-māṃsaiḥ kurutā 'śanam.

adya sītā mayā dṛṣṭā sūryaṃ candramasā saha

svapne spṛśantī madhyena tanuḥ śyāmā sulocanā.

tās tayā tarjitāḥ sarvā mukhair bhīmā yathā''gatam

yayuḥ suṣupsavas talpaṃ bhīmair vacana-karmabhiḥ

gatāsu tāsu maithilyā saṃjānāno 'nilā''tmajaḥ

āyātena daśā''syasya saṃsthito 'ntarhitaś ciram

ṛṇād baddha ivānmukto viyogena kratu-dviṣaḥ

hetor bodhasya maithilyāḥ prāstāvīd rāma-saṃkathām.

taṃ dṛṣṭvā 'cintayat sītā-"hetoḥ kasyaiṣa rāvaṇaḥ

avaruhya tarorārādaiti vānara-vigrahaḥ

pūrvasmādanya-vad bhāti bhāvād dāśarathiṃ stūvan,

ṛte krauryāt samāyāto māṃ viśvāsayituṃ nu kim ?

itaro rāvaṇādeṣa rāghavā'nucaro yadi,

sa-phalāni nimittāni prāk prabhātāt tato mama.

uttarāhi vasan rāmaḥ samudrād rakṣasāṃ puram

avail lavaṇa-toyasya sthitāṃ dakṣiṇataḥ katham.

daṇḍakān dakṣiṇenā 'haṃ sarito 'drīn vanāni ca

atikramyā 'mbudhiṃ caiva puṃsāmagamamāhṛtā.

pṛthaṅ nabhasvataś caṇḍād vainateyena vā vinā

gantumutsahate neha kaścit kimuta vānaraḥ.

iti cintā-vatīṃ kṛcchrāt samāsādya kapi-dvipaḥ

muktāṃ stokena rakṣobhiḥ proce"'haṃ rāma-kiṅkaraḥ

viprakṛṣṭaṃ mahendrasya na dūraṃ vindhya-parvatāt

nā 'nabhyāśe samudrasya tava mālyavati priyaḥ.

a-saṃprāpte daśa-grīve praviṣṭo 'hamidaṃ vanam

tasmin pratigate draṣṭuṃ tvāmupākraṃsyacetitaḥ

tasmin vadati ruṣṭo 'pi nā 'kārṣaṃ devi ! vikramam

a-vināśāya kāryasya vicinvānaḥ parāparam.

vānareṣu kapiḥ svāmī nareṣvadhipateḥ sakhā

jāto rāmasya sugrīvas tato dūto 'hamāgataḥ

īśvarasya niśāṭānāṃ vilokya nikhilāṃ purīm

kuśalo 'nveṣaṇasyā'hamāyukto dūta-karmaṇi

darśanīya-tamāḥ paśyan strīṣu divyāsvapi striyaḥ

prāpto vyāla-tamān vyasyan bhūjaṅgebhyo 'pi rākṣasān

bhavatyāmutsuko rāmaḥ prasitaḥ saṃgamena te

maghāsu kṛta-nirvāpaḥ pitṛbhyo māṃ vyasarjayat.

ayaṃ maithilyabhijñānaṃ kākutsthasyā 'ṅgulīyakaḥ

bhavatyā smaratā 'tyarthamarpitaḥ sādaraṃ mama.

rāmasya dayamāno 'sāvadhyeti tava lakṣmaṇaḥ,

upāskṛṣātāṃ rājendrāvāgamasyeha, mā trasīḥ.

rāvaṇasyeha rokṣyanti kapayo bhīma-vikramāḥ,

dhṛtyā nāthasva vaidehi !, manyorujjāsayā''tmanaḥ.

rākṣasānāṃ mayi gate rāmaḥ praṇihaniṣyati

prāṇānāmapaṇiṣṭā'yaṃ rāvaṇas tvāmihānayan.

adevīd bandhu-bhogānāṃ, prādevīdātma-saṃpadam,

śata-kṛtvas tavaikasyāḥ smaratyahno raghūttamaḥ.

tavopaśāyikā yāvad rākṣasyaś cetayanti na,

pratisaṃdiśyatāṃ tāvad bhartuḥ śārṅgasya maithili !

puraḥ praveśamāścaryaṃ buddhvā śākhā-mṛgeṇa sā

cūḍā-māṇimabhijñānaṃ dadau rāmasya saṃmatam.

rāmasya śayitaṃ bhuktaṃ jalpitaṃ hasitaṃ sthitam

prakrāntaṃ ca muhuḥ pṛṣṭvā hanūmantaṃ vyasarjayat.

asau dadhadabhijñānaṃ cikīrṣuḥ karma dāruṇam

gāmuko 'pyantikaṃ bhartur manasā 'cintayat kṣaṇam.

"kṛtvā karma yathā''diṣṭaṃ pūrva-kāryā'virodhi yaḥ

karotyabhyadhikaṃ kṛtyaṃ, tamāhur dūtamuttamam.

vaidehīṃ dṛṣṭavān karma kṛtvā 'nyairapi duṣkaram

yaśo yāsyāmyupādātā vārtāmākhyāyakaḥ prabhoḥ.

rākṣasendrasya saṃrakṣyaṃ mayā lavyamidaṃ vanam,"

iti saṃcitya sadṛśaṃ nandanasyā 'bhavak kapiḥ.

rāghavābhyāṃ śivaṃ, dūtas tayorahamiti bruvan

hito bhanajmi rāmasya, kaḥ kiṃ brūte 'tra rākṣasaḥ,

vilulita-puṣpa-reṇu-kapiśaṃ praśānta-kalikā-palāśa-kusumaṃ kusuma-nipāta-vicitra-vasudhaṃ sa-śabda-nipatad drumotka-śakunam

śakuna-nināda-nādi-kakub vilola-vipalāyamāna-hariṇaṃ hariṇa-vilocanā'dhivasatiṃ babhañja pavanā''tmajo ripu-vanam.

Bhk_9

dru-bhaṅga-dhvani-saṃvignāḥ kuvad-pakṣi-kulā ''kulāḥ

akārṣuḥ kṣaṇadā-caryo rāvaṇasya nivedanam.

"yadatāpsīc chanair bhānur, yatrā'vāsīn mitaṃ marut

yadāpyānaṃ himosreṇa, bhanaktyupavanaṃ kapiḥ."

tato 'śīti-sahasrāṇi kiṅkarāṇāṃ samādiśat

indrajit-sūr vināśāya māruteḥ krodha-mūrcchitaḥ.

śaktyṛṣṭi-parigha-prāsa-gadā-mudgara-pāṇayaḥ

vyaśnuvānā diśaḥ prāpur vanaṃ dṛṣṭi-viṣopamāḥ

dadhvāna megha-vad bhīmamādāya parighaṃ kapiḥ

nedur dīptāyudhās te'pi taḍitvanta ivā'mbudāḥ.

kapinā 'mbhodhi-dhīreṇa samagaṃsata rākṣasāḥ

varṣāsūddhata-toyaughāḥ samudreṇeva sindhavaḥ.

lāṅgūlamuddhataṃ dhunvannudvahan parighaṃ gurum

tasthau toraṇamāruhya, pūrvaṃ na prajahāra saḥ.

akṣāriṣuḥ śarāmbhāṃsi tasmin rakṣaḥ-payodharāḥ,

na cā 'hvālīn, na cā'vrājīt trāsaṃ kapi-mahīdharaḥ

avādīt tiṣṭhatetyuccaiḥ, prādevīt parighaṃ kapiḥ

tathā, yathā raṇe prāṇān bahūnāmagrahīd dviṣām.

vraṇairavamiṣū raktaṃ, dehaiḥ prāṛnāviṣur bhuvam,

diśaḥ praurṇāviṣuś cā'nye yātudhānā bhavad-bhiyaḥ

arāsiṣuś cyutotsāhā bhinna-dehāḥ priyā'savaḥ

kaperatrāsiṣur nādān mṛgāḥ siṃha-dhvaneriva

iti sicivṛddhyadhikāraḥ

māyānāmīśvarās te 'pi śastra-hastā rathaiḥ kapim

pratyāvavṛtire hantuṃ hantavyā māruteḥ punaḥ

tāṃś cetavyān kṣitau śritvā vānaras toraṇaṃ yutān

jaghānā''dhūya parighaṃ vijighṛkṣūn samāgatān.

saṃjughukṣava āyūṃṣi tataḥ pratirurūṣavaḥ

rāvaṇā'ntikamājagmur hata-śeṣā niśā-carāḥ

"ekena bahavaḥ śūrāḥ sā''viṣkārāḥ pramatta-vat

vaimukhyaṃ cakṛme" tyuccairūcur daśa-mukhā'ntike.

māṃsopabhoga-saṃśūnānudvignāṃs tānavetya saḥ

udvṛttā-nayano mitrān mantriṇaḥ svān vyasarjayat

prameditāḥ sa-putrās te su-svāntā bāḍha-vikramāḥ

a-mliṣṭa-nādā niraguḥ phāṇṭacitrā'stra-pāṇayaḥ

tān dṛṣṭvā 'tidṛḍhān dhṛṣṭān prāptān parivṛḍhā''jñayā

kaṣṭaṃ vinardataḥ krūrān śastra-ghuṣṭa-karān kapiḥ

a-vyarṇo giri-kūṭābhānabhyarṇānārdidad drutam

vṛtta-śastrān mahā'rambhyān-dāntāṃs tridaśairapi

damitā'riḥ praśāntaujā nādā''pūrita-diṅmukhaḥ

jaghāna ruṣito ruṣṭāṃs tvaritas tūrṇamāgatān.

teṣāṃ nihanyamānānāṃ saṃghuṣṭaiḥ karṇa-bhedibhiḥ

abhūdabhyamita-trāsamāsvāntā'śeṣa-dig jagat.

bhaya-saṃhṛṣṭa-romāṇas tatas te 'pacita-dviṣaḥ

kṣaṇena kṣīṇa-vikrāntāḥ kapinā 'neṣata kṣayam

hatvā rakṣāṃsi lavitumakramīn mārutiḥ punaḥ

aśokavanikāmeva nigṛhītā'ri-śāsanaḥ.

āvarītumivā ''kāśaṃ varituṃ vīnivotthitam

vanaṃ prabhañjana-suto nā 'dayiṣṭa vināśayan.

variṣīṣṭa śivaṃ kṣipyan maithilyāḥ kalpa-śākhinaḥ,

prāvāriṣuriva kṣoṇīṃ kṣiptā vṛkṣāḥ samantataḥ.

saṃvuvūrṣuḥ svamākūtamājñāṃ vivariṣur drutam

avariṣṭākṣama-kṣamyaṃ kapiṃ hantuṃ daṣānanaḥ

ūce-"saṃvariṣīṣṭhās tvaṃ gaccha śatroḥ parākramam,

dhvṛṣīṣṭhā yudhi māyābhiḥ svaritā śatru-sammukham

drutaṃ saṃsvariṣīṣṭhās tvaṃ nir-bhayaḥ pradhanottame"

sa māyānāmagāt sotā kaper vidhavituṃ dyutim

vigāḍhā 'raṃ vanasyā 'sau śatrūṇāṃ gāhitā kapiḥ

akṣaṃ radhitumārebhe raddhā laṅkā'nivāsinām.

niṣkoṣitavyān niṣkoṣṭuṃ prāṇān daśamukhā''tmajāt

ādāya parighaṃ tasthau vanān niṣkuṣita-drumaḥ

eṣṭārameṣitā saṃkhye soḍhāraṃ sahitā bhṛśam

reṣṭāraṃ reṣitaṃ vyāsyad roṣṭā 'kṣaḥ śastra-saṃhatīḥ

śastrair dideviṣuṃ saṃkhye dudyūṣuḥ parighaṃ kapiḥ

ardidhiṣur yaśaḥ kīrtimīrtsuṃ vṛkṣairatāḍayat.

bhūyas taṃ dhipsumāhūya rāja-putraṃ didambhiṣuḥ

ahaṃs tataḥ sa mūrcchā-vān saṃśiśrīṣurabhūd dhvajam

āśvasyā 'kṣaḥ kṣaṇāl lokān bibhrakṣuriva tejasā

ruṣā bibhrajjiṣu-prakhyaṃ kapiṃ bāṇairavākirat.

saṃyuyūṣuṃ diśo bāṇairakṣaṃ yiyaviṣur drumaiḥ

kapir māyāmivā 'kārṣīd darśayan vikramaṃ raṇe.

vānaraṃ prorṇunaviṣuḥ śastrairakṣo vididyute,

taṃ prorṇunūṣurupalaiḥ sa-vṛkṣairābabhau kapiḥ,

svāṃ jijñāpayiṣū śaktiṃ bubhūrṣū nu jaganti kim

śastrairityakṛṣātāṃ tau paśyatāṃ buddhimāhave.

māyābhiḥ su-ciraṃ kliṣṭvā rākṣaso 'kliśita-kriyam

saṃprāpya vānaraṃ bhūmau papāta parighā''hataḥ.

pavito 'nuguṇair vātaiḥ śītaiḥ pūtvā payo-nidhau

babhañjā'dhyuṣitaṃ bhuyaḥ kṣudhitvā patribhir vanam

uccairañcita-lāṅgūlaḥ śiro 'ñcitveva saṃvahan

dadhad vilubhitaṃ vātaiḥ keśaraṃ vahni-piṅgalam

jaritveva javenā 'nye nipetus tasya śākhinaḥ,

vraścitvā vivaśānanyān balenā 'pātayat tarūn.

damitvā'pyari-saṃghātānaśrāntvā kapi-keśarī

vanaṃ cacāra kartiṣyan nartsyanniva niraṅkuśaḥ.

pāraṃ jigamiṣan so 'tha punarāvartsyatāṃ dviṣām

matta-dvirada-vad reme vane laṅkā-nivāsinām.

"yadyakalpsyadabhiprāyo yoddhuṃ rakṣaḥ-pateḥ svayam,

tamapyakartsyamadyā 'haṃ" vadannityacarat kapiḥ.

"hate tasmin priyaṃ śrutvā kalptā prītiṃ parāṃ prabhuḥ,

toṣo 'dyaiva ca sītāyāḥ paraś cetasi kalpsyati."

āhūya rāvaṇo 'vocadathendrajitamantikāt

"vane matta iva kruddho gajendraḥ pradhaneṣvaṭan

yayātha tvaṃ dviṣāmantaṃ, bhūyo yātāsi cā 'sakṛt

śaśaktha jetuṃ tvaṃ devān, māyāḥ sasmartha saṃyati.

tvaṃ sasarjitha śastrāṇi, dadraṣṭhā 'rīṃś ca duḥsahān,

śastrairāditha śastrāṇi tvameva mahatāmapi.

sa tvaṃ haniṣyan dur-buddhiṃ kapiṃ vraja mamā ''jñayā,

mā nā 'ñjī rākṣasīr māyāḥ, prastāvīr mā na vikramam.

mā na sāvīr mahā'strāṇi, mā na dhāvīrariṃ raṇe,

vānaraṃ mā na saṃyaṃsīr, vraja tūrṇamaśaṅkitaḥ."

anaṃsīc caraṇau tasya mandirādindrajid vrajan,

avāpya cā''śiṣas tasmādāyāsīt prītimuttamām

gate tasminnupāraṃsīt saṃrambhād rakṣasāṃ patiḥ

indrajid vikramā'bhijño manvāno vānaraṃ jitam.

saṃsismayiṣamāṇo 'gān māyāṃ vyañjijiṣur dviṣaḥ

jagat pipaviṣur vāyuḥ kalpānta iva durdharaḥ

lokānāśiśiṣos tulyaḥ kṛtāntasya viparyaye

vane cikariṣor vṛkṣān balaṃ jigariṣuḥ kapeḥ

roditi smeva cā ''yāti tasmin pakṣi-gaṇaḥ śucā

mukta-kaṇṭhaṃ hatān vṛkṣān bandhūn bandhorivā ''game

āśvasīdiva cā ''yāti tad vega-pavanā''hatam

vicitra-stabakodbhāsi vanaṃ lulita-pallavam

"na prāṇiṣi durācāra !, māyānāmīśiṣe na ca.

neḍiṣe yadi kākutsthaṃ" tamūce vānaro vacaḥ

itīḍadhikāraḥ

sa-sainyaś chādayan saṃkhye prāvartiṣṭa tamindrijit

śaraiḥ kṣuraprair māyābhiḥ śataśaḥ sarvato muhuḥ

vānaraḥ kula-śailā''bhaḥ prasahyā ''yudha-śīkaram

rakṣas-pāśān yaśas-kāmyaṃs tamas-kalpānadudruvat.

dhanuṣ-pāśabhṛtaḥ saṃkhye jyotiṣ-kalporu-keśaraḥ

dudhāva nir namas-kārān rākṣasendra-puras-kṛtān.

svāmino niṣ-krayaṃ gantumāviṣ-kṛta-balaḥ kapiḥ

rarāja samare śatrūn ghnan duṣ-kṛta-bahiṣ-kṛtaḥ.

catuṣ-kāṣṭhaṃ kṣipan vṛkṣān tiras-kurvannarīn raṇe

tiras-kṛta-digābhogo dadṛśo bahudhā bhraman.

dviṣ-kurvatāṃ catuṣ-kurvannabhighātaṃ narair dviṣām

bahiṣ-kariṣyan saṃgrāmād ripūn jvalana-piṅgalaḥ

jyotiṣ-kurvannivaiko 'sāvāṭīt saṃkhye parārdhya-vat,

tamarāyuṣ-karaṃ prāpa śakra-śatrur dhanuṣ-karaḥ.

asyannaruṣ-karān bāṇān jyotiṣ-kara-sama-dyutiḥ

yaśas-karo-yaśas-kāmaṃ kapiṃ bāṇairtāḍayat.

cakārā 'dhas-padaṃ nā 'sau caran viyati mārutiḥ

marmā-vidbhis tamas-kāṇḍair vidhyamāno'pyanekadhā

iti satvādhikāraḥ

puruhūta-dviṣo dhūrṣu yuktān yānasya vājinaḥ

āyūṃṣi tvakṣu nirbhidya prābhañjaniramocayat.

suṣupus te yadā bhūmau, rāvaṇiḥ sārathiṃ tadā

āhartumanyānaśiṣat proṣita-trāsa-karkaśaḥ.

pratuṣṭūṣuḥ punar yuddhamāsiṣañjayiṣur bhayam

ātasthau rathamātmīyānutsisāhayiṣanniva.

balānyabhiṣiṣikṣantaṃ tarubhiḥ kapi-vāridam

vijigīṣuḥ punaś cakre vyūhaṃ dur-jayamindrajit.

abhiṣyantaḥ kapiṃ krodhādabhyaṣiñcannivā ''tmanaḥ

saṃprahāra-samudbhūtai raktaiḥ koṣṇairaruś-cyutaiḥ.

saṃgrāme tānadhiṣṭhāsyan niṣadya pura-toraṇam

aviṣīdannavaṣṭabdhān vyaṣṭabhnān nara-viṣvaṇān

viṣahya rākṣasāḥ kruddhāḥ śastra-jālamavākiran,

yan na vyaṣahatendro 'pi; kapiḥ paryaṣahiṣṭa tat.

viṣyandamāna-rudhiro rakta-visyanda-pāṭalān

viṣkant n parigheṇā 'hannaviskantā kapir dviṣaḥ.

megha-nādaḥ pariskandan pariṣkandantamāśvarim

abadhnādapariskandaṃ brahma-pāśena visphuran.

visphuladbhir gṛhīto 'sau niṣphulaḥ puruṣā'śanaiḥ

viṣkambhituṃ samartho 'pi nā'calad brahma-gauravāt.

kṛṣīḍhvaṃ bharturānandaṃ, mā na proḍhvaṃ drutaṃ viyat

vānaraṃ netumityuccairindra-jit prāvadat svakān.

"gatamaṅguli-ṣaṅgaṃ tvāṃ bhīru-ṣṭhānādihā ''gatam

khādiṣyāma" iti procur nayanto mārutiṃ dviṣaḥ.

"agniṣṭomādi-saṃstheṣu jyotiṣṭomā''diṣu dvijān

yo 'rakṣīt, tasya dūto 'yaṃ mānuṣasyeti cā'vadan.

"nāsāṃ mātṛ-ṣvaseyyāś ca rāvaṇasya lulāva yaḥ,

mātuḥ svasuś ca tanayān kharā''dīn vijaghāna yaḥ

prāduḥṣanti na saṃtrāsā yasya rakṣaḥ-samāgame,

tasya kṣatriya-duḥṣūterayaṃ praṇidhirāgataḥ.

dṛṣṭvā su-ṣuptaṃ rājendraṃ pāpo 'yaṃ viṣamā'śayaḥ

cāra-karmaṇi niṣṇātaḥ praviṣṭaḥ pramadā-vanam.

supratiṣṇāta-sūtrāṇā kapiṣṭhala-sama-tviṣām

sthitāṃ vṛtte dvijātīnāṃ rātrāvaikṣata maithilīm

sarva-nārī-guṇaiḥ praṣṭhāṃ viṣṭara-sthāṃ gavi-ṣṭhirām

śayānāṃ ku-ṣṭhale tārāṃ divi-ṣṭhāmiva nir-malām

su-ṣāmnīṃ sarva-tejassu tanvīṃ jyotiṣṭamāṃ śubhām

niṣṭapantīmivā ''tmānaṃ jyotiḥsāt-kurvatīṃ vanam

madhusād-bhūta-kiñjalka-piñjara-bhramarā''kulām

ullasat-kusumāṃ puṇyāṃ hema-ratna-latāmiva

vilocanā'mbu muñcantīṃ-kurvāṇāṃ pari-sesicām

hṛdayasyeva śokā'gni-saṃtaptasyottama-vratām

dṛṣṭvā tāmabhanag vṛkṣān dviṣo ghnan parisedhataḥ

paritas tān vicikṣepa kruddhaḥ svayamivā 'nilaḥ

a-pratistabdha-vikrāntama-nistabdho mahā''have,

visoḍhavantamastrāṇi vyatastambhad ghana-dhvaniḥ"

te vijñāyā 'bhisoṣyanataṃ raktai rakṣāṃsi sa-vyathāḥ

anyairapyāyataṃ nehur varatrā-śṛṅkhalā''dibhiḥ

viṣasādendrajid buddhvā bandhe bandhā'ntarakriyām

divya-bandho viṣahate nā 'paraṃ bandhanaṃ yataḥ

iti ṣatvādhikāraḥ

muṣṇantamiva tejāṃsi vistīrṇoras-sthalaṃ puraḥ

upasedur daśa-grīvaṃ gṛhītvā rākṣasāḥ kapim.

bahudhā bhinna-marmāṇo bhīmāḥ kharaṇasā''dayaḥ

agre-vaṇaṃ vartamāne pratīcyāṃ candra-maṇḍale

"nirvaṇaṃ kṛtamudyānamanenā ''mravaṇā''dibhiḥ

devadāru-vanāmiśrai" rityūcur vānara-dviṣaḥ.

upāsthiṣata saṃprītāḥ pūrvāhṇe roṣa-vāhaṇam

rākṣasāḥ kapimādāya patiṃ rudhira-pāyiṇām.

surā-pāṇa-parikṣībaṃ ripu-darpa-harodayam

para-strī-vāhinaṃ prāyuḥ sā''viṣkāraṃ surā-piṇaḥ.

saṃgharṣa-yogiṇaḥ padau praṇemus tridaśa-dviṣaḥ

prahiṇvanto hanūmantaṃ pramīṇantaṃ dviṣan-matīḥ.

"pravapāṇi śiro bhūmau vānarasya vanacchidaḥ"

āmantrayata saṃkruddhaḥ samitiṃ rakṣasāṃ patiḥ

praṇyagādīt praṇighnantaṃ ghanaḥ praṇinadanniva

tataḥ praṇihitaḥ svā'rthe rākṣasendraṃ vibhīṣaṇaḥ.

"praṇiśāmya daśā-grīva !, praṇiyātumalaṃ ruṣam,

praṇijānīhi, hanyante dūtā doṣe na satyapi."

prāṇayantamariṃ proce rākṣasendro vibhīṣaṇam

"prāṇiṇiṣur na pāpo 'yaṃ, yo 'bhāṅkṣīt pramadā-vanam.

prāghāniṣata rakṣāṃsi yenā ''ptāni vane mama,

na prahaṇmaḥ kathaṃ pāpaṃ vada pūrvā'pakāriṇam.

veśmā'ntar-haṇanaṃ kopān mama śatroḥ kariṣyataḥ

mā kārṣīra'ntarayaṇaṃ, prayāṇā'rhamavehyamum.

prahīṇa-jīvitaṃ kuryur ye na śatrumupasthitam

nyāyyāyā api te lakṣmyāḥ kurvantyāśu prahāpaṇam

kaḥ kṛtvā rāvaṇā''marṣa-prakopaṇamavadya-dhīḥ

śakto jagati śākro 'pi kartumāyuḥ-pragopaṇam.

vanā'nta-preṅkhaṇaḥ pāpaḥ phalānāṃ pariṇiṃsakaḥ

praṇikṣiṣyati no bhūyaḥ praṇindyā 'smān madhūnyayam

hareḥ pragamanaṃ nā 'sti, na prabhānaṃ hima-druhaḥ,

nā 'ti-pravepanaṃ vāyor mayā gopāyite vane.

duṣpānaḥ punaretena kapinā bhṛṅga-saṃbhṛtaḥ

pranaṣṭa-vinayenā 'gryaḥ svāduḥ puṣpā''savo vane"

roṣa-bhīma-mukhenaivaṃ kṣubhnatokte, plavaṅgamaḥ

proce sā''nunayaṃ vākyaṃ rāvaṇaṃ svā'rtha-siddhaye

iti ṇatvā'dhikāraḥ

"dūtamekaṃ kapiṃ baddhamānītaṃ veśma paśyataḥ

loka-traya-pateḥ krodhaḥ kathaṃ tṛṇa-laghus tava.

agnyāhita-jana-prahve vijigīṣā-parāṅmukhe.

kasmād vā nīti-niṣṇasya saṃrambhas tava tāpase.

na sarva-rātra-kalyānyaḥ striyo vā ratna-bhūmayaḥ

yaṃ vinirjitya labhyante, kaḥ kuryāt tena vigraham.

saṃgaccha rāma-sugrīvau bhuvanasya samṛddhaye

ratna-pūrṇāvivā 'mbhodhī himavān pūrva-paścimau.

suhṛdau rāma-sugrīvau, kiṃkarāḥ kapi-yūtha-pāḥ,

para-dārā'rpaṇenaiva-labhyante, muñca maithilīm.

dharmaṃ pratyarpayan sītāmarthaṃ rāmeṇa mitratām

kāmaṃ viśvāsa-vāsena sītāṃ dattvā ''pnuhi trayam.

virādha-tāḍakā-vāli-kabandha-khara-dūṣaṇaiḥ

na ca na jñāpito yādṛḍ mārīcenā 'pi te ripuḥ

kharā''di-nidhanaṃ cā 'pi mā maṃsthā vaira-kāraṇam,

ātmānaṃ rakṣituṃ yasmāt kṛtaṃ tan na jigīṣayā".

tataḥ krodhā'nilā''pāta- kamprā''syā'mbhoja-saṃhatiḥ

mahā-hrada iva kṣubhyan kapimāha sma rāvaṇaḥ.

"hata-rākṣasa-yodhasya virugṇodyāna-śākhinaḥ

dūto'smīti bruvāṇasya kiṃ ? dūta-sadṛśaṃ tava.

paṅgu-bāla-striyo nighnan kabandha khara-tāḍakāḥ

tapasvī yadi kākutsthaḥ, kīdṛk ? kathaya pātakī.

abhimāna-phalaṃ jānan mahattvaṃ kathamuktavān

ratnā''di-lābha-śūnya-tvān niṣphalaṃ rāma-vigraham

para-strī-bhoga-haraṇaṃ dharma eva narā'śinām,

mukhamastītyabhāṣiṣṭhāḥ, kā ? mesā''śaṅkatā tvayi.

brūhi dūra-vibhinnānāmṛddhi-śīla-kriyā'nvayaiḥ.

hanūman ! kīdṛśaṃ ? sakhyaṃ nara-vānara-rakṣasām.

eko dvābhyāṃ virādhas tu jitābhyāma-vivakṣitaḥ

hataś chalena mūḍho'yaṃ, tenā 'pi tava kaḥ ? smayaḥ

man-niyogāc ca mārīcaḥ palāyana-parāyaṇaḥ

yuyutsā-rahito rāmaṃ mamārā 'paharan vane.

nijaghānā 'nya-saṃsaktaṃ satyaṃ rāmo latā-mṛgam

tvameva brūhi saṃcintya, yuktaṃ tan mahatāṃ yadi.

puṃsā bhakṣyeṇa bandhūnāmātmānaṃ rakṣituṃ vadhaḥ

kṣamiṣyate daśā''syena, kva-tyeyaṃ tava dur-matiḥ."

kapir jagāda-"dūto 'hamupāyaṃ tava darśane

druma-rākṣasa-vidhvaṃsamakārṣaṃ buddhi-pūrvakam.

ā-trikūṭamakārṣur ye tvat-kā nir-jaṅgamaṃ jagat,

daśagrīva ! kathaṃ brūṣe ? tāna-vadhyām mahī-pateḥ.

abhimāna-phalaṃ proktaṃ yat tvayā rāma-vigrahe,

vineśus tena śata-śaḥ kulānyasura-rakṣasām.

yat sva-dharmama-dharmaṃ tvaṃ dur-balaṃ pratyapadyathāḥ

ripau rāme ca niḥ-śaṅko, naitat kṣemaṃkaraṃ ciram

anvayā''di-vibhinnānāṃ yathā sakhyamanīpsitam

naiṣīr, virodhamapyevaṃ sārdhaṃ puruṣa-vānaraiḥ.

virādhaṃ tapasāṃ vighnaṃ jaghāna vijito yadi

varo dhanur-bhṛtāṃ rāmaḥ, sa kathaṃ na vivakṣitaḥ ?

praṇaśyannapi nā 'śaknodatyetuṃ bāṇa-gocaram

tvayaivoktaṃ mahā-māyo mārīco rāma-hastinaḥ.

anyā''saktasya yad vīryaṃ na tvaṃ smarasi vālinaḥ

mūrcchā-vān namataḥ saṃdhyāṃ dhruvaṃ tad bāhu-pīḍitaḥ.

a-sad-bandhu-vidhopajñaṃ vimuñca bali-vigraham,

sītāmarpaya nantavye kośa-daṇḍā''tma-bhūmibhiḥ."

sphuṭa-paruṣama-sahyamitthamuccaiḥ sadasi marut-tanayena bhāṣyamāṇaḥ

parijanamabhito vilokya dāhaṃ daśa-vadanaḥ pradideśa vānarasya.

Bhk_10

atha sa valka-dukūla-kuthā''dibhiḥ parigato jvaladuddhata-vāladhiḥ

udapatad divamākula-locanair nṛ-ripubhiḥ sa-bhyairabhivīkṣitaḥ.

raṇa-paṇḍito 'grya-vibudhā'ri-pure kalahaṃ sa rāma-mahitaḥ kṛtavān,

jvaladagni rāvaṇa-gṛhaṃ ca balāt balahaṃs-rāmama-hitaḥ kṛtavān.

pādā'nta-yamakam

nikhilā 'bhavan na sa-hasā sahasā jvalanena pūḥ prabhavatā bhavatā

vanitā-janena viyatā viyatā tri-purā'padaṃ nagamitā gamitā.

padā''di-yamakam

sarasāṃ sa-rasāṃ parimucya tanuṃ patatāṃ patatāṃ kakubho bahuśaḥ

sa-kalaiḥ sakalaiḥ paritaḥ karuṇai- ruditai ruditairiva khaṃ nicitam.

pāda-madhya-yamakam

na ca kāṃcana kāñcana-sadma-citiṃ na kapiḥ śikhinā śikhinā samayaut,

na ca na dravatā dravatā parito hima-hāna-kṛtā na kṛtā kva ca na.

cakravāla-yamakam

avasitaṃ hasitaṃ prasitaṃ, mudā vilasitaṃ hrasitaṃ smara-bhāsitam,

na sa-madāḥ pramadā hata-saṃmadāḥ, pura-hitaṃ vihitaṃ na samīhitam.

samudra-yamakam

samiddha-śaraṇā dīptā dehe laṅkā mateśvarā

samid-dha-śaraṇā''dīp-tā dehe'laṃ-kāma-teśvarā

kāñcī-yamakam

piśitā'śināmanu-daśaṃ sphuṭatāṃ sphuṭatāṃ jagāma parivihvala-tā,

halatā janena bahudhā caritaṃ caritaṃ mahattva-rahitaṃ mahatā.

na gajā naga-jā dayitā dayitā, vi-gataṃ vigataṃ, lalitaṃ lalitam,

pramadā pra-madā ''ma-hatā, mahatā- ma-raṇaṃ maraṇaṃ samayāt samayāt.

na vānaraiḥ parākrāntāṃ mahadbhir bhīma-vikramaiḥ

na vā naraiḥ parākrāntāṃ dadahā nagarīṃ kapiḥ.

drutaṃ drutaṃ vahni-samāgataṃ gataṃ mahīmahīna-dyuti-rocitaṃ citam

samaṃ samantādapa-gopuraṃ puraṃ paraiḥ parairapyanirākṛtaṃ kṛtam

naśyanti dadarśa vṛndāni kapīndraḥ

hārīṇyā-balānāṃ hārīṇyā-balānām.

nārīṇāmapanunudur na deha-khedān nā ''rīṇā'mala-salilā hiraṇya-vāpyaḥ,

nā ''rīṇāmanala-parīta-patra-puṣpān nā 'rīṇāmabhavadupetya śarma vṛkṣān.

atha lulita-patatri-mālaṃ rugṇā'sana-bāṇa-keśara-tamālam

sa vanaṃ vivikta-mālaṃ sītāṃ draṣṭuṃ jagāmā'lam.

ghana-girīndra-vilaṅghana-śālinā vana-gatā vana-ja-dyuti-locanā

jana-matā dadṛśe janakā''tmajā taru-mṛgeṇa taru-sthala-śāyinī

vi-patha-yamakam

kāntā mahamānā duḥkhaṃ cyuta-bhūṣā

rāmasya viyuktā kāntā saha-mānā.

madhyā-'nta-yamakam

mitamavadadudāraṃ tāṃ hanūmān mudā 'raṃ raghu-vṛṣabha-sakāśaṃ yāmi devi ! prakāśam

tava vidita-viṣādo dṛṣṭa-kṛtsnā''miṣādaḥ śriyamaniśamavantaṃ parvataṃ mālyavantam.

garbha-yamakam

udapatad viyada-pragamaḥ parai rucitamunnati-mat-pṛthu-sattva-vat

rucita-mun nati-mat pṛthu-sattva-vat pratividhāya vaṇur bhaya-daṃ dviṣām.

sarva-yamakam

babhau marutvān vi-kṛtaḥ sa-mudro, babhau marutvān vikṛtaḥ sa-mudraḥ,

babhau marutvān vikṛtaḥ samudro, babhau marutvān vikṛtaḥ sa mudraḥ.

mahā-yamakam

abhiyātā varaṃ tuṅgaṃ bhū-bhṛtaṃ ruciraṃ puraḥ karkaśaṃ prathitaṃ dhāma sa-satvaṃ puṣkarekṣaṇam.

abhiyā 'tā''varaṃ tuṅgaṃ bhū-bhṛtaṃ ruciraṃ puraḥ karkaśaṃ prasthitaṃ dhāma sa-satvaṃ puṣkare kṣaṇam.

ādyanta-yamakam

citraṃ citramivā ''yāto vicitraṃ tasya bhū-bhṛtam

harayo vegamāsādya saṃtrastā mumuhur muhuḥ.

ādi-dīpakam

gacchan sa vārīṇyakirat pāyodheḥ, kūla-sthitāṃs tāni-tarūnadhunvan,

puṣpā''starāṃs te 'ṅga-sūkhānatanvan, tān kinnarā manmathino 'dhyatiṣṭhan.

anta-dīpakam

sa giriṃ taru-khaṇḍa-maṇḍitaṃ samavāpya tvarayā latā-mṛgaḥ

smita-darśita-kārya-niścayaḥ kapi-sainyair muditairamaṇḍayat.

madhya-dīpakam

garuḍā'nila-tigma-raśmayaḥ patatāṃ yadhapi saṃmatā jave,

a-cireṇa kṛtā'rthamāgataṃ tamamanyanta tathāpyatīva te.

rūpakam

vraṇa-kandara-līna-śastra-sarpaḥ pṛthu-vakṣaḥ-sthala-karkaśoru-bhittiḥ

cyuta-śoṇita-baddha-dhātu-rāgaḥ śuśubhe vānara-bhū-dharas tadā 'sau.

asyaiva bhedā apare catvāraḥ etad viśiṣṭopamā-yuktaṃ rūpakam

cala-piṅga-keśara-hiraṇya-latāḥ sthuṭa-netra-paṅkti-maṇi-saṃhatayaḥ

kaladhaita-sānava ivā 'tha gireḥ kapayo bahūḥ pavana-jā''gamane.

etaccheṣā'rthā'nvavasitamavataṃsakam

kapi-toya-nidhīn plavaṅgamendur madayitvā madhureṇa darśanena

vacanā'mṛta-dīdhitīr vitanva- nnakṛtā ''nanda-parīta-netra-vārīn.

ardha-rūpakam

parikhedita-vindhya-vīrudhaḥ paripītā'mala-nirjharā'mbhasaḥ

dudhuvur madhu-kānanaṃ tataḥ kapi-nāgā muditā'ṅgadā''jñayā.

etadanvarthopamā-yuktaṃ lalāmakam

viṭapi-mṛga-viṣāda-dhvānta-nud vānarā'rkaḥ priya-vacanama-yukhair bodhitā'rthā'ravindaḥ,

udaya-girimivā 'driṃ saṃpramucyā 'bhyagāt khaṃ nṛpa-hṛdaya-guhā-khaṃ ghnan pra-mohā'ndhakāram.

ivopamā

raghu-tanayamagāt tapo-vana-khaṃ vidhṛta-jaṭā'jina-valkalaṃ hanūmān

paramiva puruṣaṃ nareṇa yuktaṃ sama-śama-veśa-samādhinā 'nujena,

yathopamā

kara-puṭa-nihitaṃ dadhat sa ratnaṃ pariviralā'ṅguli nirgatā'lpa-dīpti

tanu-kapila-ghana-sthitaṃ yathenduṃ nṛpamanamat paribhugna-jānu-mūrdhā.

sahopamā

rucironnata-ratna-gauravaḥ paripūrṇā-'mṛta-raśmi-maṇḍalaḥ

samadṛśyata jīvitā''śayā saha rāmeṇa vadhū-śiro-maṇiḥ.

taddhitopamā

avasanna-ruciṃ vanā''gataṃ tamanā''mṛṣṭarajo-vidhūsaram

samapaśyadapeta-maithiliṃ dadhataṃ gaurava-mātramātma-vat.

luptopamā

sāmarthya-saṃpādita-vāñchitā'rthaś cintā-maṇiḥ syān na kathaṃ hanūmān,

sa-lakṣmaṇo bhūmi-patis tadānīṃ śākhā-mṛgā'nīka-patiś ca mene.

samopamā

"yuśmāna-cetan kṣaya-vāyu-kalpān sītā-sphuliṅgaṃ parigṛhya jālmaḥ

laṅkā-vanaṃ siṃha-samo 'dhiśete martuṃ dviṣannityavadaddhanūmān

arthā'ntara-nyāsaḥ

"ahṛta dhaneśvarasya yudhi yaḥ sameta-māyo dhanaṃ, tamahamito vilokya vibudhaiḥ kṛtottamā''yodhanam

vibhava-madena nihnuta-hriyā 'timātra-saṃpannakaṃ, vyathayati sat-pathādadhigatā 'thaveha saṃpan na kam.

ākṣepaḥ

ṛddhi-mān rākṣaso mūḍhaś, citraṃ nā'sau yaddudhataḥ,

ko vā heturanāryāṇāṃ dharmye vartmani vartitum.

ākṣepa eva

tasyā 'dhivāse tanurutsukā 'sau dṛṣṭā mayā rāma-patiḥ pra-manyuḥ,

kāryasya sāro 'yamudīrito vaḥ, proktena śeṣeṇa kimuddhatena.

vyatirekaḥ

samatāṃ śaśi-lekhayopayāyā- davadātā pra-tanuḥ kṣayeṇa sītā,

yadi nāma kalaṅka indu-lekhā- mativṛtto laghayen na cā 'pi bhāvī.

vibhāvanā

a-parīkṣita-kāriṇā gṛhītāṃ tvamanāsevita-vṛddha-paṇḍitena

a-virodhita-niṣṭhureṇa sādhvīṃ dayitāṃ trātumalaṃ ghaṭasva rājan !"

samāsoktiḥ

sa ca vihvala-sattva-saṃkulaḥ pariśuṣyannabhavan mahā-hradaḥ

paritaḥ paritāpa-mūrcchitaḥ, patitaṃ cā 'mbu nirabhramīpsitam.

atiśayoktiḥ

atha lakṣmaṇa-tulya-rūpa-veśaṃ gamanā''deśa-vinirgatā'gra-hastam

kapayo 'nuyayuḥ sametya rāmaṃ nata-sugrīva-gṛhīta-sā''darājñam.

yathā-saṃkhyam

kapi-pṛṣṭha-gatau tato narendrau. kapayaś ca jvalitā'gni-piṅgalā'kṣāḥ

mumucuḥ, prayayur, drutaṃ samīyur, vasudhāṃ, vyoma, mahīdharaṃ mahendram

utprekṣā

sthitamiva parirakṣituṃ samantā- dudadhi-jalaugha-pariplavād dharitrīm

gagana-tala-vasundhrā'ntarāle jala-nidhivega-sahaṃ prasārya deham

vārtā

viṣa-dhara-nilaye niviṣṭa-mūlaṃ śikhara-śataiḥ parimṛṣṭa-deva-lokam

ghana-vipula-nitamba-pūritāśaṃ phala-kusumā''cita-vṛkṣa-ramya-kuñjam

preyaḥ

madhu-kara-virutaiḥ priyādhvanīnāṃ sarasi-ruhair dayitā''sya-hāsya-lakṣmyāḥ

sphuṭamanuharamāṇamādadhānaṃ puruṣa-pateḥ sahasā paraṃpramodam

rasavat

graha-maṇi-rasanaṃ divo nitambaṃ vipulamanuttama-labdha-kānti-yogam

cyuta-ghana-vasanaṃ mano'bhirāmaṃ śikhara-karair madanādiva spṛśantam

ūrjasvī-

pracapalama-guruṃ bharā'sahiṣṇuṃ janamasamānamanūrjitaṃ vivarjya

kṛta-vasatimivā'rṇavopakaṇṭhe sthirama-tulonnatimūḍha-tuṅga-megham.

paryāyoktiḥ

sphaṭhika-maṇi-gṛhaiḥ sa-ratna-dīpaiḥ prataruṇa-kinnara-gīta-nisvanaiś ca

amara-pura-matiṃ surā'ṅganānāṃ dadhatama-duḥkhamanalpa-kalpa-vṛkṣam.

samāhitam

atha dadṛśurudīrṇa-dhūma-dhūmrāṃ diśamudadhi-vyavadhiṃ sameta-sītām

saha-raghutanayāḥ plavaṅga-senāḥ pavana-sutā'ṅguli-darśitāmudakṣāḥ.

udāram

jala-nidhimagaman mahendra-kuñjāt pracaya-tirohita-tigma-raśmi-bhāsaḥ

salila-samudayair mahā-taraṅgair bhuvana-bhara-kṣamamapya-bhinna-velam

udārameva

pṛthu-guru-maṇi-śukti-garbha-bhāsā glapita-rasā-tala-saṃbhṛtā'ndhakāram

upahata-ravi-raśmi-vṛttimuccaiḥ pralaghu-pariplavamāna-vajra-jālaiḥ

udārameva

samupacita-jalaṃ vivardhamānai- ra-mala-sarit-salilair vibhāvarīṣu

sphuṭamavagamayantamūḍha-vārīn śaśa-dhara-ratna-mayān mahendra-sānūn

śliṣṭam

bhuvana-bhara-sahāna-laṅghya-dhāmnaḥ puru-ruci-ratna-bhṛto gurūru-dehān

śrama-vidhura-vilīna-kūrma-nakrān dadhatamudūḍha-bhuvo girīnahīṃś ca

śliṣṭameva

pradadṛśururu-mukta-śīkaraughān vimala-maṇi-dyuti-saṃbhṛtendra-cāpān

jala-muca iva dhīra-mandra-ghoṣān kṣiti-paritāpa-hṛto mahā-taraṅgān

hetu-śliṣṭam

vidruma-maṇi-kṛta-bhūṣā muktā-phala-nikara-rañjitā''tmānaḥ

babhurudaka-nāga-bhagnā velā-taṭa-śikhariṇo yatra,

apahnutiḥ

bhṛta-nikhila-rasā-talaḥ sa-ratnaḥ śikhari-samormi-tirohitā'ntarīkṣaḥ

kuta iha paramā'rthato jalaugho jala-nidhimīyurataḥ sametya māyām

viśeṣoktiḥ

śaśi-rahitamapi prabhūta-kāntiṃ vibudha-hṛta-śriyamapya-naṣṭa-śobham

mathitamapi surair divaṃ jalaughaiḥ samabhibhavantama-vikṣata-prabhāvam

vyāja-stutiḥ

kṣiti-kula-giri-śeṣa-dig-gajendrān salila-gatāmiva nāvamudvahantam

dhṛta-vidhura-dharaṃ mahā-varāhaṃ giri-guru-potramapīhitair jayantam

upamā-rūpakam

giri-parigata-cañcalā''pagā'ntaṃ jala-nivahaṃ dadhataṃ mano'bhirāmam

galitamiva bhuvo vilokya rāmaṃ dharaṇi-dhara-stana-śukla-cīna-paṭṭam.

tulyayogitā

a-parimita-mahā'dbhutair vicitraś cyuta-malinaḥ śucibhir mahāna-laṅghyaiḥ

taru-mṛga-pati-lakṣmaṇa-kṣitīndraiḥ samadhigato jaladhiḥ paraṃ babhāse.

nidarśanam

na bhavati mahimā vinā vipatte- ravagamayanniva paśyataḥ payodhiḥ

a-viratamabhavat kṣaṇe kṣaṇe 'sau śikhari-pṛthu-prathita-praśānta-vīciḥ.

virodhaḥ

mṛdubhirapi bibheda puṣpa-bāṇaiś calaśiśirairapi mārutair dadāha

raghu-tanayamanartha-paṇḍito 'sau, na ca madanaḥ kṣatamātatān, nā 'rciḥ

upameyopamā

atha mṛdu-malina-prabhau dinā'nte jaladhi-samīpa-gatāvatīta-lokau

anukṛtimitaretarasya mūrtyor dina-kara-rāghava-nandanāvakārṣṭām.

sahoktiḥ

apaharadiva sarvato vinodān dayita-gataṃ dadhadekadhā samādhim

ghana-ruci vavṛdhe tato 'ndhakāraṃ saha raghu-nandana-manmathodayena.

parivṛttiḥ

adhi-jaladhi tamaḥ kṣipan himāṃśuḥ paridadṛśe 'tha dṛśāṃ kṛtā'vakāśaḥ

vidadhadiva jagat punaḥ pralīnam. bhavati mahān hi parā'rtha eva sarvaḥ.

sa-sandehaḥ

aśanirayamasau, kuto nirabhre. śita-śara-varṣama-sat tadapya-śārṅgam.

iti madana-vaśo muhuḥ śaśā'ṅke raghu-tanayo, na ca niścikāya candram.

ananvayaḥ

kumuda-vana-cayeṣu kīrṇa-raśmiḥ kṣata-timireśu ca dig-vadhū-mukheṣu

viyati ca vilalāsa tad-vadindur, vilasati candramaso na yad-vadanyaḥ.

utprekṣā''vayavaḥ

śaraṇamiva gataṃ tamo nikuñje viṭapi-nirākṛta-candra-raśmyarātau

pṛthu-viṣama-śilā'ntarāla-saṃsthaṃ sa-jala-ghana-dyuti bhīta-vat sasāda.

saṃsṛṣṭiḥ

atha nayana-mano-haro 'bhirāmaḥ smara iva citta-bhavo 'pya-vāma-śīlaḥ

raghu-sutamanujo jagāda vācaṃ sa-jala-ghana-stanayitnu-tulya-ghoṣaḥ

āśīḥ

"pati-vadha-parilupta-lola-keśīr nayana-jalā'pahṛtā'ñjanauṣṭha-rāgāḥ

kuru ripu-vanitā, jahīhi śokaṃ, kva ca śaraṇaṃ jagatāṃ bhavān, kva mohaḥ

hetuḥ

adhigata-mahimā manuśya-loke vata sutarāmavasīdati pramādī,

gaja-patiruru-śaila-śṛṅga-varṣmā gururavamajjati paṅka-bhāṅ, na dāru.

nipuṇam

boddhavyaṃ kimiva hi, yat tvayā na buddhaṃ, kiṃ vā te nimiṣitamapya-buddhi-pūrvam,

labdhā''tmā tava sukṛtairaniṣṭa-śaṅkī snehaugho ghaṭayati māṃ tathāpi vaktum."

saumitreriti vacanaṃ niśamya rāmo jṛmbhā-vān bhuja-yugalaṃ vibhajya nidrān

adhyaṣṭhāc chiśayiṣayā pravāla-talpaṃ rakṣāyai prati-diśamādiśan plavaṅgān.

Bhk_11

athā 'stamāseduṣi manda-kāntau puṇya-kṣayeṇeva nidhau kalānām

samālalambe ripu-mitra-kalpaiḥ padmaiḥ prahāsaḥ kumudair viṣādaḥ

dūraṃ samāruhya divaḥ patantaṃ bhṛgorivenduṃ vihitopakāram

baddhā 'nurāgo 'nupapāta tūrṇaṃ tārā-gaṇaḥ saṃbhṛta-śubhra-kīrtiḥ.

kva te kaṭākṣāḥ, kva vilāsavanti proktāni vā tāni mameti matvā

laṅkā'ṅganānāmavabodha-kāle lulāmanāruhya gato 'staminduḥ.

mānena talpeṣva-yathā-mukhīnā mithyā-prasuptair gamita-triyāmāḥ

strībhir niśā'tikrama-vihvalābhir dṛṣṭe 'pi doṣe patayo 'nunītāḥ.

īrśyā-virugṇāḥ sthira-baddha-mūlā nirasta-niḥśeṣa-śubha-pratānāḥ

āpyāyitā netra-jala-prasekaiḥ prema-drumāḥ saṃruruhuḥ priyāṇām.

tataḥ samāśaṅkita-viprayogaḥ punar-navībhūta-raso 'vitṛṣṇaḥ

smarasya santaṃ punarukta-bhāvaṃ nā ''vartamānasya viveda lokaḥ.

vṛttau prakāśaṃ hṛdaye kṛtāyāṃ sukhena sarvendriya-saṃbhavena

saṃkocamevā 'sahamānamasthā- da-śakta-vad vañcita-māni cakṣuḥ

pīne bhaṭasyorasi vīkṣya bhugnāṃs tanu-tvacaḥ pāṇi-ruhān su-madhyā

icchā-vibhaṅgā''kula-mānasatvād bhartre nakhebhyaś ca ciraṃ jujūre.

srastā'ṅga-ceṣṭo vinimīlitā'kṣaḥ svedā'mbu-romodgama-gamya-jīvaḥ

a-śeṣa-naṣṭa-pratibhā-paṭutvo gāḍhopagūḍho dayitair jano 'bhūt.

tamaḥ, prasuptaṃ maraṇaṃ, sukhaṃ nu, mūrcchā nu, māyā nu manobhavasya,

kiṃ tat kathaṃ vetyupalabdha-saṃjñā vikalpayanto 'pi na saṃpratīyuḥ.

vakṣaḥ stanābhyāṃ, sukhamānanena gātrāṇi gātrair ghaṭayanna-mandam

smarā'turo naiva tutoṣa lokaḥ, paryāptatā premṇi kuto viruddhā.

srastā'ṅga-yaṣṭiḥ parirabhyamāṇā saṃdṛśyamānā'pyupasaṃhṛtā'kṣī

anūḍhamānā śayane navoḍhā paropakāraika-rasaiva tasthau.

āliṅgitāyāḥ sahasā trapā-vāṃs trāsā'bhilāṣā'nugato ratā''dau

viśvāsitāyā ramaṇena vadhvā vimarda-ramyo-madano babhūva.

sāmonmukhenā ''cchuritā priyeṇa datte 'tha kācit pulakena bhede

antaḥ-prakopā'pagamād vilolā vaśīkṛtā kevala-vikrameṇa.

gurur dadhānā paruṣa-tvamanyā kāntā 'pi kāntendu-karā'bhimṛṣṭā

prahlāditā candra-śileva tūrṇaṃ kṣobhāt sravat-svedajalā babhūva.

śaśāṅka-nāthā'pagamena dhūmrāṃ mūrcchā-parītāmiva nir-vivekām

tataḥ sakhīva prathitā'nurāgā prābodhayat dyāṃ madhurā'ruṇaśrīḥ

a-vīta-tṛṣṇo 'tha paraspareṇa kṣaṇādivā''yāta-niśā'vasānaḥ

duḥkhena lokaḥ paravānivā 'gāt samutsukaḥ svapna-niketanebhyaḥ

ardhotthitā''liṅgita-sannimagno ruddhaḥ punar yān gamane 'nabhīpsuḥ

vyājena niryāya punar nivṛttas tyaktā'nya-kāryaḥ sthita eva kaścit.

tālena saṃpādita-sāmya-śobhaṃ śubhā'vadhānaṃ svara-baddha-rāgam

padair gatā'rthaṃ nṛpa-mandireṣu prātar jagur maṅgala-vat taruṇyaḥ.

duruttare paṅka ivā 'ndhakāre magnaṃ jagat santata-raśmi-rajjuḥ

pranaṣṭa-mūrti-pravibhāgamudyan pratyujjahāreva tato vivasvān.

pītauṣṭha-rāgāṇi hṛtā'ñjanāni bhāsvanti lolairalakair mukhāni

prātaḥ kṛtā'rthāni yathā virejus tathā na pūrvedyuralaṃkṛtāni.

prajāgarā''tāmra-vilocanā'ntā nirañjanā'laktaka-patra-lekhāḥ

tulyā ivā ''san parikheda-tanvyo vāsa-cyutāḥ sevita-manmathābhiḥ

ābaddha-netrā'ñjana-paṅka-leśas tāmbūla-rāgaṃ bahulaṃ dadhānaḥ

cakāra kānto 'pyadharo 'ṅganānāṃ sahoṣitānāṃ patibhir laghutvam.

cakṣūṃṣi kāntānyapi sā'ñjanāni tāmbūla-raktaṃ ca sa-rāgamoṣṭham

kurvan sa-vāsaṃ ca su-gandhi vaktraṃ cakre janaḥ kevala-pakṣa-pātam.

kṣatairasaṃcetita-danta-labdhaiḥ saṃbhoga-kāle 'vagataiḥ prabhāte

a-śaṅkatā 'nyonya-kṛtaṃ vyalīkaṃ viyoga-bāhyo 'pi jano 'tirāgāt

netreṣubhiḥ saṃyuta-pakṣma-patraiḥ karṇā'nta-kṛṣṭairuru-keśa-śūlāḥ

stanoru-cakrās tata-karṇa-pāśāḥ strī-yoddha-mukhyā jayino viceruḥ

payo-dharāṃś candana-paṅka-digdhān vāsāṃsi cā 'mṛṣṭa-mṛjāni dṛṣṭvā

strīṇāṃ sa-patnyo jahṛṣuḥ prabhāte mandāyamānā'nuśayair manobhiḥ

smarā''ture cetasi labdha-janmā rarāja lolo'pi guṇā'pahāryaḥ

kutūhalān netra-gavākṣa-saṃsthaḥ paśyannivā 'nyonya-mukhāni rāgaḥ

gate 'tibhūmiṃ praṇaye prayuktā- na-buddhi-pūrvaṃ pariluptasaṃjñaḥ

ātmā'nubhūtānapi nopacārān smarā''turaḥ saṃsmarati sma lokaḥ

vastrairanatyulbaṇa-ramya-varṇair vilepanaiḥ saurabha-lakṣmaṇīyaiḥ

āsyaiś ca lokaḥ paritoṣa-kāntai- rasūcayal labdha-padaṃ rahasyam.

prātastarāṃ candana-lipta-gātrāḥ pracchādya hastairadharān vadantaḥ

śāmyan-nimeṣāḥ sutarāṃ yuvānaḥ prakāśayanti sma nigūhanīyam.

sāmnaiva loke vijite 'pi vāme ! kimudyataṃ bhrū-dhanur-prasahyam,

hantuṃ kṣamo vā vada locaneṣur digdho viṣeṇeva kimañjanena.

dantacchade prajvalitā'gni-kalpe tāmbūla-rāgas tṛṇa-bhāra-tulyaḥ

nyastaḥ kimityūcurupeta-bhāvā goṣṭhīṣu nārīs taruṇīr yuvānaḥ.

sukhā'vagāhāni yutāni lakṣmyā śucīni saṃtāpa-harāṇyurūṇi

prabuddha-nārī-mukha-paṅka-jāni prātaḥ sarāṃsīva gṛhāṇi rejuḥ.

saṃmṛṣṭa-siktā'rcita-cāru-puṣpai- rāmoda-vad-dravya-sugandha-bhāgaiḥ

lakṣmīr vijigye bhavanaiḥ sa-bhṛṅgaiḥ sevyasya devairapi nandanasya.

akṣṇoḥ patan nīla-saro-ja-lobhād bhṛṅgaḥ kareṇā 'lpa-dhiyā nirastaḥ

dadaṃśa tāmrā'mbu-ruhā'bhisandhis trṇā''turaḥ pāṇi-tale 'pi dhṛṣṇuḥ.

vilola-tāṃ cakṣuṣi hasta-vepathuṃ bhruvor vibhaṅgaṃ stana-yugma-valgitam

vibhūṣaṇānāṃ kvaṇitaṃ ca ṣaṭ-pado gurur yathā nṛtya-vidhau samādadhe.

athā 'nukūlān kula-dharma-saṃpado vidhāya veśān su-divaḥ purī-janaḥ.

prabodha-kāle śāta-manyu-vidviṣaḥ pracakrame rāja-niketanaṃ prati.

śailendra-śṛṅgebhya iva pravṛttā vegāj jalaughāḥ pura-mandirebhyaḥ

āpūrya rathyāḥ sarito janaughā rājā'ṅganā'mbhodhimapūrayanta.

prabodha-kālāt tridaśendra-śatroḥ prāgūrdhva-śoṣaṃ pariśuṣyamāṇāḥ

hīnā mahāntaś ca sama-tvamīyur dvāsa-sthairavajñā-puruṣā'kṣi-dṛṣtāḥ.

gurūru-cañcat-kara-karṇa-jihvai- ravajñayā 'grā'ṅguli-saṃgṛhītaiḥ

rakṣāmsyanāyāsa-hṛtairupāsthuḥ kapola-līnā'li-kulair gajendraiḥ.

nikṛtta-matta-dvipa-kumbha-māṃsaiḥ saṃpṛkta-muktair harayo'gra-pādaiḥ

āninyire śreṇikṛtās tathā 'nyaiḥ parasparaṃ vāladhi-sannibaddhāḥ

upekṣitā deva-gaṇais trasadbhir niṣā-carair vīta-bhayair nikṛttāḥ

tasminnadṛśyanta sura-drumāṇāṃ sa-jāla-puṣpa-stabakāḥ prakīrṇāḥ.

nirākariṣṇur dvija-kuñjarāṇāṃ tṛṇīkṛtā'śeṣa-guṇo'ti-mohāt

pāpā'śayānabhyudayā'rthamārcīt prāg brahma-rakṣaḥ-pravarān daśā''syaḥ

māyāvibhis trāsa-karair janānā- māptairupādāna-parairupetaḥ

satāṃ vighātaika-rasairavikṣat sadaḥ parikṣobhita-bhūmi-bhāgam.

vighṛta-niśita-śastrais tad yutaṃ yātudhānai- ruru-jaṭhara-mukhībhiḥ saṃkulaṃ rākṣasībhiḥ

śvagaṇi-śata-vikīrṇaṃ vāgurā-van mṛgībhir vanamiva sa-bhayābhir deva-bandībhirāsīt.

jalada iva taḍitvān prājya-ratna-prabhābhiḥ prati-kakubhamudasyan nisvanaṃ dhīra-mandram

śikharamiva sumerorāsanaṃ haimamuccair vividha-maṇi-vicitraṃ pronnataṃ so 'dhyatiṣthat

Bhk_12

tato vi-nidraṃ kṛta-devatā'rcaṃ dṛṣṭyaiva citta-praśamaṃ kirantam

āviṣkṛtā'ṅga-pratikarma-ramyaṃ vibhīṣaṇaṃ vācamuvāca mātā

"prabādhamānasya jaganti dhīmaṃs ! tvaṃ sodarasyā'timadoddhatasya

ānandano nāka-sadāṃ praśāntiṃ tūrṇaṃ viṣasyā'mṛta-vat kuruṣva.

kuryās tathā, yena jahāti sītāṃ viṣāda-nīhāra-parīta-mūrtim

sthitāṃ kṣitau śānta-śikhā-pratānāṃ tārāmiva trāsa-karīṃ janasya.

yāvan na saṃtrāsita-deva-saṃghaḥ piṇḍo viṣasyeva hareṇa bhīṣmaḥ

saṃgrasyate 'sau puruṣā'dhipena, drutaṃ kulā''nanda ! yatasva tāvat.

hatā janasthāna sado nikāyāḥ, kṛtā jitotkhāta-bhaṭa-drumā pūḥ,

sadāṃsi dagdhāni, vidheyamasmin yad bandhunā, tad ghaṭayasva tasmin."

cikīrṣite pūrva-taraṃ sa tasmin, kṣemaṃ-kare 'rthe muhurīryamāṇaḥ

mātrā 'timātraṃ śubhayaiva buddhyā ciraṃ sudhīrabhyadhikaṃ samādhāt.

dauvārikā'bhyāhata-śakra-dūtaṃ sopāyanopasthita-loka-pālam

sā''śaṅka-bhīṣmā''pta-viśan-niśāṭaṃ dvāraṃ yayau rāvaṇa-mandrirasya.

dūrāt pratīhāra-nataḥ sa vārtāṃ pṛcchannanāvedita-saṃpraviṣṭaḥ

sa-gauravaṃ datta-patho niśāṭai- raikṣiṣṭa śailā'gramivendraśatrum

kṛśānu-varṣmaṇyadhirūḍhamuccaiḥ siṃhāsane saṃkṣaya-megha-bhīmam

nisarga-tīkṣṇaṃ nayana-sphuliṅgaṃ yugānta-vahneriva dhūma-rāśim

prītyā 'pi dattekṣaṇa-sannipātaṃ bhayaṃ bhūjaṅgā'dhipa-vad dadhānam

tamaḥ-samūhā''kṛtimapyaśeṣā- nūrjā jayantaṃ prathita-prakāśān.

taṃ ratna-dāyaṃ jita-mṛtyu-lokā rātriṃ-carāḥ kānti-bhṛto 'nvasarpan

pramukta-muktā-phalamambu-vāhaṃ saṃjāta-tṛṣṇā iva deva-mukhyāḥ.

sa kiṅkaraiḥ kalpitamiṅgita-jñaiḥ saṃbādhakaṃ pūrva-samāgatānām

siṃhāsanopāśrita-cāru-bāhu- radhyāsta pīṭhaṃ vihita-praṇāmaḥ.

tato daśā''syaḥ kṣubhitā'hi-kalpaṃ dīprā'ṅgulīyopalamūḍha-ratnam

aneka-cañcan-nakha-kānti-jihvaṃ prasārya pāṇiṃ samitiṃ babhāṣe

"śaktaiḥ suhṛdbhiḥ paridṛṣṭa-kāryai- rāmnātibhir nītiṣu buddhi-madbhiḥ

yuṣmad-vidhaiḥ sārdhamupāya-vidbhiḥ sadhyanti kāryāṇi su-mantritāni.

upekṣite vāli-kharā''di-nāśe, dagdhe pure, 'kṣe nihate sa-bhṛtye,

sainye dviṣāṃ sāgaramuttitīrṣā- va-nantaraṃ brūta, yadatra yuktam."

bhujāṃ'sa-vakṣaḥ-sthala-kārmukā'sīn gadāś ca śūlāni ca yātudhānāḥ

parāmṛśantaḥ prathitā'bhimānāḥ procuḥ prahasta-pramukhā daśā''syam.

"a-khaṇḍya-mānaṃ parikhaṇḍya śakraṃ tvaṃ paṇḍitaṃ-manyamudīrṇa-daṇḍaḥ

narā''bhiyogaṃ nṛ-bhujāṃ pradhāna ! mantronmukhaḥ kiṃ nayase gurutvam.

niryat-sphuliṅgā''kula-dhūma-rāśiṃ kiṃ brūhi bhūmau pinaṣāma bhānum,

ā danta-niṣpīḍita-pītaminduṃ ṣṭhīvāma śuṣkekṣu-latā'sthi-kalpam.

sa-rāghavaiḥ kiṃ bata vānarais tair yaiḥ prātarāśo 'pi na kasyacin naḥ

sa-sthāṇu-kailāsa-dhāra 'bhidhatsva, kiṃ dyauradho 'stu, kṣitirantarīkṣe.

cāpalya-yuktasya hareḥ kṛśānuḥ samedhito vāladhi-bhāk tvadīyaiḥ

śastreṇa vadhyasya galannadhākṣīd rājan ! pramādena nijena laṅkām."

athā 'ñcitoraskamudīrṇa-dṛṣṭiḥ kṛtvā vivakṣā-pravaṇaṃ śarīram

vivṛtta-pāṇir vihitottarā'rthaṃ vibhīṣaṇo 'bhāṣata yātudhānān.

"yuddhāya rājṇā subhṛtair bhavadbhiḥ saṃbhāvanāyāḥ sadṛśaṃ yaduktam,

tat prāṇa-paṇyair vacanīyameva, prajñā tu mantre 'dhikṛtā, na śauryam.

yac cāpi yatnā-''dṛta-mantra-vṛttir guru-tvamāyāti narā'bhiyogaḥ

vaśīkṛtendrasya, kṛtottaro 'smin vidhvaṃsitā'śeṣa-puro hanūmān.

agniḥ pramādena dadāha laṅkāṃ vadhyasya dehe svayamedhitaś cet,

vimṛśya tad deva-dhiyā 'bhidhatta brahmā'stra-bandho'pi yadi pramādaḥ

jagantyameyā'dbhuta-bhāva-bhāñji, jitā'bhimānāś ca janā vicitrāḥ,

kārye tu yatnaṃ kuruta prakṛṣṭaṃ, mā nīti-garbhān su-dhiyo 'vamandhvam.

vṛddhi-kṣaya-sthāna-gatāmajasraṃ vṛttiṃ jigīṣuḥ prasamīkṣamāṇaḥ

ghaṭeta sandhyā''diṣu yo guṇeṣu, lakṣmīr na taṃ muñcati cañcalā 'pi.

upekṣaṇīyaiva parasya vṛddhiḥ pranaṣṭa-nīterajitendrayasya

madā''di-yuktasya virāga-hetuḥ, sa-mūla-ghātaṃ vinihanti yā 'nte.

janā'nurāgeṇa yuto 'vasādaḥ phalā'nubandhaḥ sudhiyā ''tmano 'pi

upekṣaṇīyo 'bhyupagamya saṃdhiṃ kāmā''di-ṣaḍ-varga-jitā 'dhipena.

yadā vigṛhṇan na ca saṃdadhāno vṛddhiṃ kṣayaṃ cā 'nuguṇaṃ prapaśyet,

āsīta rājā 'vasara-pratīkṣas tadā prayāsaṃ vitathaṃ na kuryāt.

saṃdhau sthito vā janayet sva-vṛddhiṃ hanyāt paraṃ vopaniṣatprayogaiḥ

āśrāvayedasya janaṃ parair vā vigrāhya kuryādavahīna-saṃdhim.

saṃdarśita-sneha-guṇaḥ sva-śatrūn vidveṣayan maṇḍalamasya bhindyāt

ityevamādi pravidhāya saṃdhir vṛddher vidheyo 'dhigamābhyupāyaḥ.

matvā sahiṣṇūnaparopajapyān svakānadhiṣṭhāya jalā'nta-durgān

drumā'dri-durlaṅghya-jalāpradhṛṣyān vardheta rājā ripu-vigraheṇa.

śaknoti yo na dviṣato nihantuṃ, vihanyate nā 'pya-balair dviṣadbhiḥ,

sa śvā-varāhaṃ kalahaṃ vidadhyā- dāsīta durgā''di vivardhayaṃś ca.

prayāṇa-mātreṇa pare prasādye varteta yānena kṛtā'bhirakṣaḥ,

a-śaknuvan kartumarer vighātaṃ sva-karma-rakṣāṃ ca paraṃ ṣrayeta.

ekena saṃdhiḥ, kalaho 'pareṇa kāryo 'bhito vā prasamīkṣya vṛddhim,

evaṃ prayuñjīta jigīṣuretā nītīr vijānannahitā''tma-sāram.

tvayā tu loke janito virāgaḥ, prakopitaṃ maṇḍalamindra-mukhyam,

rāme tu rājan, viparītametat paśyāmi, tenā 'bhyadhikaṃ vipakṣam.

ekena vālī nihataḥ śareṇa suhṛt-tamas te, racitaś ca rājā

yadaiva sugrīva-kapiḥ pareṇa, tadaiva kāryaṃ bhavato vinaṣṭam.

prākāra-mātrā''varaṇaḥ prabhāvaḥ kharā''dibhir yo nihatais tavā'bhūt,

laṅkāpradāhā'kṣa-vadha-dru-bhaṅgaiḥ klāmyatyasāvapyadhunā 'timātram.

ṣaḍvarga-vaśyaḥ parimūḍha-bandhu- rucchinna-mitro viguṇairupetaḥ

mā pāda-yuddhaṃ dvi-radena kārṣīr nama kṣitīndraṃ praṇatopabhogyam.

rāmo 'pi dārā''haraṇena tapto, vayaṃ hatair bandhubhirātma-tulyaiḥ,

taptasya taptena yathā ''yaso naḥ saṃdhiḥ pareṇā 'stu, vimuñca sītām.

saṃdhukṣitaṃ maṇḍala-caṇḍa-vātai- ramarṣa-tīkṣṇaṃ kṣiti-pāla-tejaḥ

sāmā'mbhasā śāntimupaitu rājan ! prasīda, jīvāma sa-bandhu-bhṛtyāḥ.

a-pakva-kumbhāviva bhaṅga-bhājau rājanniyātāṃ maraṇaṃ samānau,

vīrye sthitaḥ kiṃtu kṛtā'nurāgo rāmo bhavaṃś cottama-bhūri-vairī.

daṇḍena kośena ca manyase cet prakṛṣṭamātmānamares tathāpi

riktasya pūrṇena vṛthā vināśaḥ pūrṇasya bhaṅge bahu hīyate tu.

kliṣṭā''tma-bhṛtyaḥ parimṛgya-sampan mānī yatetā 'pi sa-saṃśaye 'rthe,

saṃdehamārohati yaḥ kṛtā'rtho, nūnaṃ ratiṃ tasya karoti na śrīḥ.

śakyānya-doṣāṇi mahā-phalāni samārabhetopanayan samāptim

karmāṇi rājā vihitā'nurāgo, viparyaye syād vitathaḥ prayāsaḥ.

jetuṃ na śakyo nṛ-patiḥ su-nītir doṣaḥ kṣayā''diḥ kalahe dhruvaś, ca

phalaṃ na kiṃcin na śubhā samāptiḥ, kṛtā'nurāgaṃ bhūvi saṃtyajā 'rim.

tvan-mitra-nāśo, nija-mitra-lābhaḥ, sameta-sainyaḥ sa ca mitra-kṛcchre

bhogyo vaśaḥ paśya śareṇa śatroḥ prasādhito vāli-vadhe na ko 'rthaḥ

lobhād bhayād vā 'bhigataḥ kapīndro na rāghavaṃ, yena bhaved vibhedyaḥ,

sthitaḥ satāṃ vartmani labdha-rājyaḥ prati-priyaṃ so 'bhyagamac cikīrṣuḥ.

phalāśino nirjhara-kuñja-bhājo divyā'ṅganā'naṅgarasā'nabhijñāḥ

nyag-jātayo ratna-varairalabhyā mukhyāḥ kapīnāmapi nopajapyāḥ.

kṛtā'bhiṣeko yuvarāja-rājye sugrīva-rājena sutā'viśeṣam

tārā-vidheyena kathaṃ vikāraṃ tārā-suto yāsyati rākṣasā'rtham.

paśyāmi rāmādadhikaṃ samaṃ vā nā 'nyaṃ, virodhe yamupāśrayema,

dattvā varaṃ sā'nuśayaḥ svayambhū- rindrā''dayaḥ pūrva-taraṃ viruddhāḥ.

durgā''śritānāṃ bahunā 'pi rājan ! kālena pārṣṇigrahaṇā''di-hetuḥ

durgoparodhaṃ na ca kurvato 'sti śatroś cireṇā 'pi daśā''sya ! hāniḥ

śastraṃ tarūrvī-dharamambu pānaṃ vṛttiḥ phalair, no gaja-vāji-nāryaḥ

rāṣṭraṃ na paścān, na jano'bhirakṣyaḥ, kiṃ duḥsthamācakṣva bhavet pareṣām.

saṃdhānamevā 'stu pareṇa tasmān, nā'nyo 'bhyupāyo 'sti nirūpyamāṇaḥ,

nūnaṃ vi-saṃdhau tvayi sarvametan neṣyanti nāśaṃ kapayo 'cireṇa."

vibhīṣaṇoktaṃ bahu manyamānaḥ pronnamya dehaṃ pariṇāma-namram

skhalad-valir vārdhaka-kampra-mūrdhā mātāmaho rāvaṇamityuvāca.

"ekaḥ padātiḥ puruṣo dhanuṣmān yo 'neka-māyāni viyad-gatāni

rakṣaḥ-sahasrāṇi caturdaśā ''rdīt, kā tatra vo mānuṣa-mātra-śaṅkā.

brahmarṣibhir nūnamayaṃ sa-devaiḥ saṃtāpitau rātricara-kṣayāya

narā''kṛtir vānara-sainyaśālī jagatya-jayyo vihito 'bhyupāyaḥ.

vajrā'bhighātaira-virugṇa-mūrteḥ pheṇair jalānāmasurasya mūrdhnaḥ

cakāra bhedaṃ mṛdubhir mahendro yathā, tathaitat kimapīti bodhyam.

kva strī-viṣahyāḥ karajāḥ, kva vakṣo daityasya śailendra-śilā-viśālam,

saṃpaśyataitad dyusadāṃ sunītaṃ, bibheda tais tan nara-siṃha-mūrtiḥ.

pramāda-vāṃs tvaṃ kṣata-dharma-vartmā gato munīnāmapi śatru-bhāvam,

kulasya śāntiṃ bahu manyase cet kuruṣva rājendra ! vibhīṣaṇoktam."

ghoṣeṇa tena pratilabdha-saṃjño nidrā''vilā'kṣaḥ ṣruta-kārya-sāraḥ

sphurad-ghanaḥ sā'mburivā 'ntarīkṣe vākyaṃ tato 'bhāṣata kumbhakarṇaḥ

"kriyā-samārambha-gato 'bhyupāyo, nṛ-dravya-sampat saha-deśa-kalā,

vipat-pratīkāra-yutā 'rtha-siddhir mantrā'ṅgametāni vadanti pañca.

na niścitā'rthaṃ samayaṃ ca deśaṃ kriyā'bhyupāyā''diṣu yo 'tiyāyāt,

sa prāpnuyān mantra-phalaṃ na mānī kāle vipanne kṣaṇadā-carendra !

auṣṇyaṃ tyajen madhya-gato 'pi bhānuḥ, śaityaṃ niśāyāmathavā hi-māṃśuḥ

anartha-mūlaṃ bhuvanā'vamānī manye na mānaṃ piśitāśi-nātha !

tathā 'pi vaktuṃ prasabhaṃ yatante yan mad-vidhāḥ siddhimabhīpsavas tvām

viloma-ceṣṭaṃ vihitā'vahāsāḥ parair hi tat sneha-mayais tamobhiḥ

krūrāḥ kriyāḥ, grāmya-sukheṣu saṅgaḥ, puṇyasya yaḥ saṃkṣaya-heturuktaḥ,

niṣevito 'sau bhavatā 'timātraṃ phalatya-valgu dhruvameva rājan !

dattaṃ na kiṃ, ke viṣayā na bhuktāḥ, sthito 'smi vā kaṃ paribhūya noccaiḥ,

itthaṃ kṛtā'rthasya mama dhruvaṃ syān mutyus tvadarthe yadi, kiṃ na labdham.

kiṃ durnayais tvayyuditair mṛṣā'rthair vīryeṇa vaktā 'smi raṇe samādhim."

tasmin prasupte punaritthamuktvā vibhīṣaṇo 'bhāṣata rākṣasendram.

"nimitta-śūnyaiḥ sthagitā rajobhir diśo, marudbhir vikṛtair vilolaiḥ

svabhāva-hīnair mṛga-pakṣi-ghoṣaiḥ krandanti bhartāramivā 'bhipannam

utpāta-jaṃ chidramasau vivasvān vyādāya vaktrā''kṛti loka-bhīṣmam

attuṃ janān dhūsara-raśmi-rāśiḥ siṃho yathā kīrṇa-saṭo 'bhyudeti.

mārgaṃ gato gotra-gurur bhṛgūṇā- magastinā 'dhyāsita-vindhya-śṛṅgam,

saṃdṛśyate śakra-purohito 'hni, kṣmāṃ kampayantyo nipatanti colkāḥ

māṃsaṃ hatānāmiva rākṣasānā- māśaṃsavaḥ krūra-giro ruvantaḥ

kravyā'śino dīpta-kṛśānu-vaktrā bhrāmyantya-bhītāḥ paritaḥ puraṃ naḥ

payo ghaṭodhnīrapi gā duhanti mandaṃ vi-varṇaṃ vi-rasaṃ ca gopāḥ,

havyeṣu kīṭopajanaḥ sa-keśo na dīpyate 'gniḥ su-samindhano 'pi.

tasmāt kuru tvaṃ pratikāramasmin snehān mayā rāvaṇa ! bhāṣyamāṇaḥ,

vadanti duḥkhaṃ hyanujīvi-vṛtte sthitāḥ padasthaṃ pariṇāma-pathyam.

virugṇa-saṃkīrṇa-vipanna-bhinnaiḥ pakṣuṇṇa-saṃhrīṇa-śitā'stra-vṛkṇaiḥ

yāvan narā'śair na ripuḥ śava'śān saṃtarpayatyānama tāvadasmai."

bhrū-bhaṅgamādhāya vihāya dhairyaṃ vibhīṣaṇaṃ bhīṣaṇa-rūkṣa-cakṣuḥ

giraṃ jagādogra-padāmudagraḥ svaṃ sphāvayan śakra-ripuḥ prabhāvam.

"śilā tariṣyatyudake na parṇaṃ, dhvāntaṃ raveḥ syantsyati, vahnirindoḥ,

jetā paro 'haṃ yudhi jeṣyamāṇas tulyāni manyasva pulastya-naptaḥ !

a-nirvṛtaṃ bhūtiṣu gūḍha-vairaṃ satkāra-kāle 'pi kṛtā 'bhyasūyam

vibhinna-karmā''śaya-vāk kule no mā jñāti-celaṃ, bhuvi kasyacid bhūt

icchantyabhīkṣṇaṃ kṣayamātmano 'pi na jñātayas tulya-kulasya lakṣmīm

namanti śatrūn, na ca bandhu-vṛddhiṃ saṃtapyamānair hṛdayaiḥ sahante.

tvayā'dya laṅkā'bhibhave 'ti-harṣād duṣṭo 'ti-mātraṃ vivṛto 'ntarātmā,

dhik tvāṃ, mṛṣā te mayi dustha-buddhir" vadannidaṃ tasya dadau sa pārṣṇim.

tataḥ sa kopaṃ kṣamayā nigrhṇan, dhairyeṇa manyuṃ, vinayena garvam,

mohaṃ dhiyotsāha-vaśādaśaktiṃ, samaṃ caturbhiḥ sacivairudasthāt.

uvāca cainaṃ kṣaṇadā-carendraṃ "sukhaṃ mahā-rāja ! vinā mayā ''ssva.

mūrkhā''turaḥ pathya-kaṭūnanaśnan yat sā''mayo''sau, bhiṣajāṃ na doṣaḥ

karoti vairaṃ sphuṭamucyamānaḥ, pratuṣyati śrotra-sukhaira-pathyaiḥ

viveka-śūnyaḥ prabhurātma-mānī, mahānanarthaḥ suhṛdāṃ batā 'yam.

krīḍan bhujaṅgena gṛhā'nupātaṃ kaścid yathā jīvati saṃśaya-sthaḥ,

saṃsevamāno nṛ-patiṃ pra-mūḍhaṃ tathaiva yaj jīvati, so 'sya lābhaḥ.

dattaḥ sva-doṣair bhavatā prahāraḥ pādena dharmye pathi me sthitasya,

sa cintanīyaḥ saha mantri-mukhyaiḥ kasyā ''vayor lāghavamādadhātu.

iti vacanamasau rajani-cara-patiṃ bahu-guṇamasakṛt prasabhamabhidadhat

niragamada-bhayaḥ puruṣa-ripu-purān nara-pati-caraṇau navitumari-nutau.

atha tamupagataṃ vidita-sucaritaṃ pavana-suta-girā giri-guru-hṛdayaḥ

nṛ-patiramadayan mudita-parijanaṃ sva-pura-pati-karaiḥ salila-samudayaiḥ.

Bhk_13

cāru-samīraṇa-ramaṇe hariṇa-kalaṅka-kiraṇā''valī-sa-vilāsā

ābaddha-rāma-mohā velā-mūle vibhāvarī parihīṇā.

baddho vāsara-saṅge bhīmo rāmeṇa lavaṇa-salilā''vāse

sahasā saṃrambha-raso dūrā''rūḍha-ravi-maṇḍala-samo lole.

gāḍha-guru-puṅkha-pīḍā- sa-dhūma-salilā'ri-saṃbhava-mahā-bāṇe

āruḍhā saṃdehaṃ rāme sa-mahī-dhāra mahī sa-phaṇi-sabhā.

ghora-jala-danti-saṃkula- maṭṭa-mahāpaṅka-kāhala-jalā''vāsam

ārīṇaṃ lavaṇa-jalaṃ samiddha-phala-bāṇa-viddhi-ghora-phaṇi-varam

sa-bhayaṃ pariharamāṇo mahā'hi-saṃcāra-bhāsuraṃ salila-gaṇam

ārūḍho lavaṇa-jalo jala-tīraṃ hari-balā''gama-vilola-guham

cañcala-taru-hariṇa-gaṇaṃ bahu-kusumā''bandha-baddha-rāmā''vāsam

hari-pallava-taru-jālaṃ tuṅgoru-samiddha-taru-vara-hima-cchāyam

vara-vāranaṃ salila-bhareṇa giri-mahī-maṇḍala-saṃvara-vāraṇam

vasudhāryaṃ tuṅga-taraṅga-saṅga-parihīṇa-lola-vasudhā-rayam

kulakam etāni sapta saṃkīrṇāni

praṇipatya tato vacanaṃ jagāda hitamāyato patir vārīṇām

gaṅgā'valambi-bāhū rāmaṃ bahaloru-hari-tamāla-cchāyam.

pūrvā'rdhaṃ niravadyam

"tuṅgā giri-vara-dehā, a-gamaṃ salilaṃ, samīraṇo rasa-hārī,

a-himo ravi-kiraṇa-gaṇo, māyā saṃsāra-kāraṇaṃ te paramā.

āyāsa-saṃbhavāruṇa ! saṃhara saṃhāra-hima-hara-sama-cchāyam

bāṇaṃ, vāri-samūhaṃ saṃgaccha purāṇa-cāru-dehā''vāsam.

a-sulabha-hari-saṃcāraṃ jala-mūlaṃ bahala-paṅka-ruddhā''yāmam

bhaṇa kiṃ jala-parihīṇaṃ su-gamaṃ timi-kambu-vāri-vāraṇa-bhīmam.

gantuṃ laṅkā-tīraṃ baddha-mahāsalila-saṃcareṇa sa-helam

taru-hariṇā giri-jālaṃ vahantu giri-bhāra-saṃsahā guru-deham.

hara-hāsa-ruddha-vigamaṃ para-kaṇṭha-gaṇaṃ mahā''hava-samārambhe

chindantu rāma-bāṇā gambhīre me jale mahā-giri-baddhe.

gacchantu cāru-hāsā vīra-rasā''bandha-ruddha-bhaya-saṃbandham

hantuṃ bahu-bāhu-balaṃ hari-kariṇo giri-varoru-dehaṃ sahasā.

etāni ṣaṭ saṃkīrṇāni

jigamiṣayā saṃyuktā bahūva kapi-vāhinī mate dāśaratheḥ

buddha-jalā''laya-cittā giri-haraṇā''rambha-saṃbhava-samālolā.

pūrvā'rdhaṃ niravadyam

guru-giri-vara-haraṇa-sahaṃ saṃhāra-himāri-piṅgalaṃ rāma-balam

ārūḍhaṃ sahasā khaṃ varuṇā''laya-vimala-salila-gaṇa-gambhīram

avagāḍhaṃ giri-jālaṃ tuṅga-mahā-bhitti-ruddha-sura-saṃcāram

a-bhayahari-rāsa-bhīmaṃ kari-parimala-cāru-bahala-kandara-salilam.

ali-gaṇa-vilola-kusumaṃ sa-kamala-jala-matta-kurara-kāraṇḍava-gaṇam

phaṇi-saṃkula-bhīma-guhaṃ kari-danta-samūḍha-sa-rasa-vasudhā-khaṇḍam

aravinda-reṇu-piñjara- sārasa-rava-hāri-vimala-bahu-cāru-jalam

ravi-maṇi-saṃbhava-hima-hara- samāgamā''baddha-bahula-sura-taru-dhūpam

hari-rava-vilola-vāraṇa- gambhīrā''baddha-sa-rasa-puru-saṃrāvam

ghoṇā-saṃgama-paṅkā''- vila-subala-bhara-mahoru-varāham.

etāni pañca saṃkīrnāni

uccakhnuḥ parirabdhān kapi-saṅghā bāhubhis tato bhūmi-bhṛtaḥ

niṣpaṣṭa-śeṣa-mūrdhnaḥ śṛṅga-vikīrṇoṣṇa-raśmi-nakṣatra-gaṇān.

sarvaṃ niravadyam

tuṅga-mahā-giri-subharā bāhu-samāruddha-bhidura-ṭaṅkā bahudhā

lavaṇa-jala-bandha-kāmā ārūḍhā ambaraṃ mahā-pariṇāham

bahu-dhavala-vāri-vāhaṃ vimalā''yasa-mahā'si-deha-cchāyam

baddha-vihaṅgama-mālaṃ hima-girimiva matta-kurara-rava-saṃbaddham

cāru-kalahaṃs-saṃkula- sa-caṇḍa-saṃcāra-sārasā''baddha-ravam

sa-kusuma-kaṇa-gandha-vahaṃ samayā''gama-vāri-saṅga-vimalā''yāmam.

sahasā te taru-hariṇā giri-subharā lavaṇa-salila-bandhā''rambhe

tīra-girimārūḍhā rāmā''gama-ruddha-sa-bhaya-ripu-saṃcāram.

etāni catvāri saṃkīrṇāni

tataḥ prāṇītāḥ kapi-yūtha-mukhyair nyastāḥ kṛśānos tanayena samyak

a-kampra-brādhnā'gra-nitamba-bhāgā mahā'rṇavaṃ bhūmi-bhṛto 'vagāḍhāḥ

nirākhyātaṃ niravadyaṃ ca

tene 'dri-bandhyo, vavṛdhe payodhis, tutoṣa rāmo, mumude kapīndraḥ,

tatrāsa śatrur, dadṛśe suvelaḥ, prāpe jalānto, juhṛṣuḥ plavaṅgāḥ.

ekāntarākhyātaṃ niravadyaṃ ca

bhremur, vavalgur, nanṛtur, jajakṣur, juguḥ, samutpupluvire, niṣeduḥ,

āsphoṭayāṃcakrurabhipraṇedū, rejur, nanandur, viyayuḥ, samīyuḥ.

ākhyāta-mālā

giri-paṅka-cāru-dehaṃ kakkola-lavaṅga-badha-surabhi-parimalam

bahu-bahaloru-taraṅgaṃ parisarasārūḍhamuddharaṃ lavaṇa-jalam.

lolaṃ kūlā'bhigame khe tuṅgā-mala-nibaddha-puru-pariṇāham

sura-gaṅgā-bharaṇa-sahaṃ giri-bandha-vareṇa lavaṇa-salilaṃ ruddham.

ārūḍhaṃ ca suvelaṃ taru-mālā''bandha-hāri-giri-vara-jālam

rāvaṇa-citta-bhayaṅkara- māpiṅgala-lola-kesaraṃ rāma-balam

laṅkā''laya-tumulā''rava- subhara-gabhīroru-kuñja-kandara-vivaram

vīṇā-rava-rasa-saṅgama- sura-gaṇa-saṃkula-mahā-tamāla-cchāyam

sa-rasa-bahu-pallavā''vila- kesara-hintāla-baddha-bahala-cchāyam

airāvaṇa-mada-parimala- gandhavahā''baddha-danti-saṃrambha-rasam

tuṅga-taru-cchāyā-ruha- komala-hari-hāri-lola-pallava-jālam

hariṇa-bhayaṃkara-sa-kusuma- dāva-sama-cchavi-vilola-dāḍima-kuñjam

kala-hari-kaṇṭha-virāvaṃ salila-mahā-bandha-saṃkula-mahā-sālam

cala-kisalaya-saṃbaddhaṃ maṇi-jālaṃ salila-kaṇa-mayaṃ-vivahantam

tuṅga-maṇi-kiraṇa-jālaṃ giri-jala-saṃghaṭṭa-baddha-gambhīra-ravam

cāru-guhā-vivara-sabhaṃ sura-pura-samamamara-cāraṇa-susaṃrāvam

vimala-mahā-maṇi-ṭaṅkaṃ sindūra-kalaṅka-piñjara-sahā-bhittim

vīra-hari-danti-saṅgama- bhaya-ruddha-vibhāvarī-vihāra-samīham

sa-mahā-phaṇi-bhīma-bilaṃ bhūri-vihaṅgama-tumuloru-ghora-virāvam

vāraṇa-varāha-hari-vara- go-gaṇa-sāraṅga-saṃkula-mahā-sālam

cala-kisalaya-sa-vilāsaṃ cāru-mahī-kamala-reṇu-piñjara-vasudham

sa-kusuma-kesara-bāṇaṃ lavaṅga-taru-taruṇa-vallarī-vara-hāsam

a-mala-maṇi-hema-ṭaṅkaṃ tuṅga-mahā-bhitti-ruddha-ruru-paṅka-gamam

amarā''rūḍha-parisara merumivā ''vila-sa-rasa-mandāra-tarum

phala-bhara-manthara-taru-vara- ma-vidūra-virūḍha-hāri-kusumā''pīḍam

hariṇa-kalaṅka-maṇi-saṃbhava- bahu-vāri-bhara-sugambhīra-guham.

jala-kāma-danti-saṃkula- sa-hema-rasa-cāru-dhavala-kandara-deham

aṅkura-toha-sama-cchavi- ruru-gaṇa-saṃlīḍha-tarala-hari-maṇi-kiraṇam

gāḍha-samīraṇa-susahaṃ bhīma-ravottuṅga-vāri-dhara-saṃghaṭṭam

dhavala-jala-vāha-mālā- saṃbandhā''baddha-hima-dharā-dhara-līlam.

lavaṇa-jala-bandha-sa-rasaṃ taru-phala-saṃpatti-ruddha-dehā''yāsam

laṅkā-toraṇa-vāraṇa- mārūḍhaṃ samara-lālasaṃ-rāma-balam.

guru-paṇava-veṇu-guñjā- bherī-peloru-jhallarī-bhīma-ravam

ḍhakkā-ghaṇṭā-tumulaṃ sannaddhaṃ para-balaṃ raṇā''yāsa-saham

ārūḍha-bāṇa-ghoraṃ vi-malā''yasa-jāla-gūḍha-pīvara-deham

cañcala-turaṅga-vāraṇa- saṃghaṭṭā''baddha-cāru-pariṇāha-guṇam

asi-tomara-kunta-mahā- paṭṭiśa-bhalla-vara-bāṇa-guru-puru-musalam

vīra-rasā'laṅkāraṃ guru-saṃcāra-haya-danti-sa-mahī-kampam

te rāmeṇa sa-rabhasaṃ paritaralā hari-gaṇā raṇa-samārambhe

ruddhā laṅkā-parisara- bhū-dhara-paribhaṅga-lālasā dhīra-ravam.

yugmakam jala-tīra-tuṅga-taru-vara- kangara-giri-bhitti-kuñja-vivarā''vāsam

bhīmaṃ taru-hariṇa-balaṃ su-samiddha-himāri-kiraṇa-mālā-lolam.

rāvaṇa-balamavagantuṃ jala-bhara-guru-salila-vāha-gaṇa-sama-cchāyam

aṭṭa-taru-mañca-mandrira- toraṇa-mālā-sabhāsu samārūḍham.

Bhk_14

tato daśā''syaḥ smara-vihvalā''tmā cāra-prakāśīkṛta-śatru-śaktiḥ

vimohya māyā-maya-rāma-mūrdhnā sītāmanīkaṃ prajighāya yoddhum.

kambūnatha samādadhmuḥ, koṇair bheryo nijaghnire,

veṇūn pupūrire, guñjā juguñjuḥ kara-ghaṭṭitāḥ

vādayāṃcakrire ḍhakkāḥ, paṇavā dadhvanur hatāḥ,

kāhalāḥ pūrayāṃcakruḥ, pūrṇāḥ peraś ca sasvanuḥ

mṛdaṅgā dhīramāsvenur, hatair svene ca gomukhaiḥ

ghaṇṭāḥ śiśiñjire dīrghaṃ, jahrāde paṭahair bhṛśam.

hayā jiheṣire harṣād, gambhīraṃ jagajur gajāḥ,

saṃtrastāḥ karabhā reṭuś, cukuvuḥ patti-paṅktayaḥ

turaṅgā-pusphuṭur bhītāḥ, pusphurur vṛṣabhāḥ param

nāryaś cukṣubhire mamlur mumuhuḥ śuśucuḥ patīn.

jagarjur, jahṛṣuḥ, śurā rejus tuṣṭuvire paraiḥ,

babandhuraṅguli-trāṇi, sannehuḥ pariniryayuḥ.

dhanūṣyāropayāṃcakrurāruruhū rathā''diṣu,

asīnudvavṛhur dīptān, gurvīruccikṣipur gadāḥ

śūlāni bhramayāṃcakrur, bāṇānādadire śubhān,

bhremuś, cukurdire, resur vavalguś ca padātayaḥ

amutpetuḥ kaśā-ghātai, raśmyākarṣair mamaṅgire

aśvāḥ, pradudruvur mokṣe raktaṃ nijagaruḥ śrame.

gajānāṃ pradaduḥ śārīn, kambalān paritastaruḥ,

tenuḥ kakṣāṃ, dhvajāṃś caiva samucchiśriyurucchikhān.

viśiśvāsayiṣāṃcakrurāliliṅguś ca yoṣitaḥ,

ājaghnur mūrdhni bālāṃś ca cucumbuś ca suta-priyāḥ.

gambhīra-vedinaḥ saṃjñā gajā jagṛhurakṣatāḥ,

vavṛdhe śuśubhe caiṣāṃ mado, hṛṣṭaiś ca pupluve.

mṛgāḥ pradakṣiṇaṃ sasruḥ, śivāḥ samyag vavāśire,

a-vāmaiḥ pusphure dehaiḥ, prasede citta-vṛttibhiḥ.

prājyamāñjihiṣāṃcakre prahasto rāvaṇā''jñayā

dvāraṃ raraṅghatur yāmyṃ mahāpārśva-mahodarau.

prayayāvindra-jit pratyagiyāya svayamuttaram.

sahadhyāsisiṣāṃcakre virūpā'kṣaḥ purodaram.

śuśrāva rāmas tat sarvaṃ, pratasthe ca sa-sainikaḥ

visphārayāṃcakārā'straṃ babandhā'tha ca bāṇadhī.

īkṣāṃcakre 'tha saumitrimanujajñe balāni ca,

namaścakāra devebhyaḥ parṇa-talpaṃ mumoca ca.

cakāsāṃcakruruttasthur, nedurānaśire diśaḥ

vānarā, bhūdharān, redhur, babhañjuś, ca tatas tarūn.

dadāla bhūr, nabho raktaṃ goṣpadapraṃ vavarṣa ca,

mṛgāḥ prasasṛpur vāmaṃ, khagāś cukuvire'śubham.

ulkā dadṛśire dīptā, ruruvuś cā'śivaṃ śivāḥ,

cakṣmāye ca mahī, rāmaḥ śaśaṅke cā'śubhā'gamam.

rāvaṇaḥ śuśruvān śatrūn rākṣasānabhyupeyuṣaḥ,

svayaṃ yuyutsayāṃcakre prākārā'gre niṣedivān.

nirāsū rākṣasā bāṇān, prajahuḥ śūla-paṭṭiśān

asīṃś ca vāhayāṃcakruḥ pāśaiś cā''cakṛṣus tataiḥ

bhallaiś ca bibhidus tīkṣṇair vividhus tomarais tathā.

gadābhiś cūrṇayāṃcakruḥ, śitaiś cakraiś ca cicchiduḥ.

vānarā muṣṭibhir jaghnur dadaṃśur daśanais tathā,

nirāsuś ca girīṃs tuṅgān, drumān vicakarus tathā.

lāṅgūlair loṭhayāṃcakrus, talair, ninyuś ca saṃkṣayam,

nakhaiś cakṛtatuḥ, kruddhāḥ pipiṣuś ca kṣitau balāt.

saṃbabhūvuḥ kabandhāni, prohuḥ śoṇita-toya-gāḥ,

terur bhaṭā''sya-padmāni, dhvajaiḥ pheṇairivā''babhe,

rakta-paṅke gajāḥ sedur, na pracakramire rathāḥ,

nimamajjus turaṅgāś ca, gantuṃ notsehire bhaṭāḥ.

koṭyā koṭyā pura-dvāramekaikaṃ rurughe dviṣām,

ṣaṭ-triṃśaddhari-koṭyaś ca nivavrur vānarā''dhipam,

tastanur, jahvalur, mamlur, jaglur, luluṭhire kṣatāḥ,

mumūrcchur, vavamū raktaṃ, tatṛṣuś cobhaye bhaṭāḥ

sampātinā prajaṅghas tu yuyudhe, 'sau drumāhataḥ

cakampe, tīva cukrośa, jīvanāśaṃ nanāśa ca.

uccakhnāte nalenā ''jau sphurat-pratapanā'kṣiṇī,

jambumālī jahau prāṇān grāvṇā mārutinā hataḥ.

mitrighnasya pracukṣoda gadayā 'ṅgaṃ vibhīṣaṇaḥ.

sugrīvaḥ praghasaṃ nebhe, bahūn rāmas tatarda ca.

vajramuṣṭer viśiśleṣa maindenā 'bhihataṃ śiraḥ,

nīlaś cakarta cakreṇa nikumbhasya śiraḥ sphurat.

virūpākṣo jahe prāṇais tṛḍhaḥ saumitri-patribhiḥ,

pramocayāṃcakārā'sūn dvividas tvaśani-prabham.

gadā śatru-jitā jighye, tāṃ pratīyeṣa vāli-jaḥ

rathaṃ mamantha sa-hayaṃ śākhinā 'sya tato 'ṅgadaḥ.

tat karma vāli-putrasya dṛṣṭvā viśvaṃ visiṣmiye,

saṃtresū rākṣasāḥ sarve, bahu mene ca rāghavaḥ.

sugrīvo mumude, devāḥ sādhvityūcuḥ savismayāḥ,

vibhīṣaṇo 'bhituṣṭāva, praśaśaṃsuḥ plavaṅgamāḥ.

hī citraṃ lakṣmaṇenode, rāvaṇiś ca tirodadhe

vicakāra tato rāmaḥ śarān, saṃtatrasur dviṣaḥ

vibhinnā jughurur ghoraṃ, jakṣuḥ kravyā'śino hatān,

cuṣcyota vraṇināṃ raktaṃ, chinnāś celuḥ kṣaṇaṃ bhujāḥ

kṛttairapi dṛḍha-krodho vīra-vaktrair na tatyaje,

palāyāṃcakrire śeṣā, jihriyuḥ śūra-māninaḥ.

rāghavo na dayāṃcakre, dadhur dhairyaṃ na kecana,

mamre pataṅgavad vīrair hāheti ca vicukruśe.

tirobabhūve sūryeṇa, prāpe ca niśayā ''spadam,

jagrase kāla-rātrīva vānarān rākṣasāmś ca sā.

cukopendrajidatyugraṃ sarpā'straṃ cā ''juhāva, saḥ

ājuhuve tirobhūtaḥ parānīkaṃ, jahāsa ca.

babādhe ca balaṃ kṛtsnaṃ, nijagrāha ca sāyakaiḥ

utsasarja śarāṃs, te'sya sarpa-sāc ca prapedire.

ācicāya sa taiḥ senāmācikāya ca rāghavau,

babhāṇa ca, "na me māyāṃ jigāyendro'pi, kiṃ nṛbhiḥ".

ācikyāte ca bhūyo 'pi rāghavau tena pannagaiḥ

tau mumuhaturudvignau, vasudhāyāṃ ca petatuḥ

tato rāmeti cakrandus, tresuḥ parididevire

niśaśvasuś ca senānyaḥ, procur dhigiti cā''tmanaḥ.

manyuṃ śekur na te roddhuṃ, nā 'sraṃ saṃrurudhuḥ patat,

vividur nendrajin-mārgaṃ, parīyuś ca plavaṅgamāḥ.

dadhāvā 'dbhis tataś cakṣuḥ sugrīvasya vibhīṣaṇaḥ

vidāṃcakāra dhautā'kṣaḥ sa ripuṃ khe, nanarda ca.

ujjugūre tataḥ śailaṃ hantumindrajitaṃ kapiḥ

vihāya rāvaṇis tasmādānaṃhe cā 'ntikaṃ pituḥ.

ācacakṣe ca vṛttāntaṃ, prajaharṣa ca rāvanaḥ

gāḍhaṃ copajugūhainaṃ, śirasyupaśiśiṅgha ca.

dhvajānuddudhuvus tuṅgān, māṃsaṃ cemur, jaguḥ, papuḥ,

kāmayāṃcakrire kāntās, tatas tuṣṭā niśācarāḥ.

darśayāṃcakrire rāmaṃ sītāṃ rājñaś ca śāsanāt,

tasyā mimīlatur netre, luluṭhe puṣpakodare.

prāṇā dadhvaṃsire, gātraṃ tastambhe ca priye hate,

ucchaśvāsa cirād dīnā, rurodā 'sau rarāsa ca.

"lauha-bandhair babandhe nu, vajreṇa kiṃ vinirmame

mano me, na vinā rāmād yat pusphoṭa sahasra-dhā.

utteritha samudraṃ tvaṃ madarthe, 'rīn jihiṃsitha,

mamartha cā'tighorāṃ māṃ dhig jīvita-laghūkṛtām.

na jijīvā 'sukhī tātaḥ prāṇatā rahitas tvayā,

mṛte'pi tvayi jīvantyā kiṃ mayā 'ṇakabhāryayā."

sā jugupsān pracakre 'sūn, jagarhe lakṣaṇāni ca

dehabhāñji, tataḥ keśān luluñca, luluṭhe muhuḥ.

jaglau, dadhyau, vitastāna, kṣaṇaṃ prāṇa na, vivyathe,

daivaṃ nininda, cakranda, dehe cā 'tīva manyunā.

āśvāsayāṃcakārā 'tha trijaṭā tāṃ, nināya ca.

tataḥ prajāgarāṃcakrur vānarāḥ sa-vibhīṣaṇāḥ

ciceta rāgas tat kṛcchramoṣāṃcakre śucā 'tha saḥ,

manyuś cā 'sya samāpipye, virurāva ca lakṣmaṇam.

samīhe martumānarce tena vācā 'khilaṃ balam,

āpapṛcche ca sugrīvaṃ svaṃ deśaṃ visasarja ca.

ādideśa sa kiṣkindhāṃ rāghavau netumaṅgadam,

pratijajñe svayaṃ caiva sugrīvo rakṣasā vadham.

"nāgā'stramidametasya vipakṣas tārkṣya-saṃsmṛtiḥ"

vibhīṣaṇāditi śrutvā taṃ nidadhyau raghūttamaḥ.

tato vijaghaṭe śailairudvelaṃ pupluve 'mbudhiḥ

vṛkṣebhyaś cucyute puṣpair, virejur bhāsurā diśaḥ

jagāhire 'mbudhiṃ nāgā, vavau vāyur mano-ramaḥ

tejāṃsi śaṃśamāṃcakruḥ, śara-bandhā viśiśliṣuḥ.

bhrejire 'kṣata-vad yodhā, lebhe saṃjñāṃ ca lakṣmaṇaḥ,

vibhīṣaṇo 'pi babhrāje, garutmān prāpa cā 'ntikam

saṃpasparśā 'tha kākutsthau, jajñāte tau gata-vyathau

tayorātmānamācakhyau, yayau cā 'tha yathā-gatam.

svenus, titviṣurudyemuraccakhnuḥ parvatāṃs tarūn,

vānarā dadramuś cā 'tha saṃgrāmaṃ cā''śaśāśire.

ḍuḍhaukire punar laṅkāṃ, bubudhe tān daśānanaḥ

jīvataś ca vivedā 'rīn, babhraṃśe 'sau dhṛtes tataḥ.

sasraṃse śara-bandhena divyeneti bubunda saḥ,

babhājā 'tha paraṃ mohamūhāṃcakre jayaṃ na ca.

ghūmrākṣo 'tha pratiṣṭhāsāṃcakre rāvaṇa-saṃmataḥ

siṃhā''syair yuyuje tasya vṛkā''syaiś ca rathaḥ khagaiḥ.

tvak-traiḥ saṃvivyayur dehān, vāhanānyadhiśiśyire,

ānarjur nṛ-bhujo'strāṇi, vavañcuś cā''hava-kṣitim.

adhyuvāsa rathaṃ, teye purāc, cukṣāva cā 'śubham,

saṃśrāvayāṃcakārā ''khyāṃ dhūmrākṣas tatvare tathā.

nililye mūrdhni gṛdhro'sya, krūrā dhvāṅkṣā vivāśire,

śiśīke śoṇitaṃ vyoma, cacāla kṣmā-talaṃ tathā.

tataḥ prajaghaṭe yuddhaṃ, śastrāṇyāsuḥ parasparam,

vavraścurājughūrṇuś, ca syemuś, cukūrdire tathā.

rurujur, bhrejire, pheṇur, bahudhā hari-rākṣasāḥ,

vīrā na bibhayāṃcakrur, bhīṣayāṃcakrire parān.

rattaṃ pracuścutuḥ kṣaṇṇāḥ, śiśviyur bāṇa-vikṣatāḥ,

asyatāṃ śuśuvur bāṇān bhujāḥ sā'ṅguṣṭha-muṣṭayaḥ.

raṇe cikrīḍa dhūmrākṣas, taṃ tatarjā'nilā''tmajaḥ,

ādade ca śilāṃ, sā'śvaṃ pipeṣā 'sya rathaṃ tayā.

papāta rākṣaso bhūmau, rarāṭa ca bhayaṃkaram,

tutoda gadayā cā'riṃ, taṃ dudhrāvā 'driṇā kapiḥ.

akampanas tato yoddhuṃ cakame rāvaṇā'jñayā,

sa rathenā 'bhidudrāva, jughure cā'tibhairavam.

paspande tasya vāmā'kṣi, sasyamuś cā'śivāḥ khagāḥ,

tān vavrājā 'vamatyā 'sau, babhāse ca raṇe śaraiḥ.

khamūyur, vasudhāmūvuḥ sāyakā rajju-vat tatāḥ

tasmād balairapatrepe, puprothā 'smai na kaścana.

sa bhasma-sāc cakārā'rīn, dudāva ca kṛtānta-vat,

cukrodha mārutis, tāla- muccakhne ca mahā-śikham.

yamāyā 'kampanaṃ tena niruvāpa mahā-paśum,

babhrajja nihate tasmin śoko rāvaṇamagnivat.

sa bibhreṣa, pracukṣoda, dantairoṣṭhaṃ cakhāda ca,

pragopāyāṃcakārā ''śu yatnena paritaḥ puram.

prahastamarthayāṃcakre yoddhumadbhuta-vikramam.

"kiṃ vicāreṇa, rajendra ! yuddhā'rthā vayamitysau"

cakvāṇā 'śaṅkito yoddhumutsehe ca mahā-rathaḥ,

niryemire 'sya yoddhāraś, cakwxlqqpe cā'śva-kuñjaram.

yuyujuḥ syandanānaśvairījur devān purohitāḥ

ānarcur brāhmaṇān samyagāśiṣaś cā''śaśaṃsire.

ūhire mūrdhni siddhārthā, gāvaś cā ''lebhire bhaṭaiḥ,

pracukṣṇuvur mahā 'strāṇi, jijñāsāṃcakrire hayān.

laluḥ khaḍgān, mamārjuś ca, mamṛjuś ca paraśvadhān

"alaṃcakre, samālebhe vavase, bubhuje, pape,

jahase ca kṣaṇaṃ, yānair nirjagme yoddhṛbhis tataḥ

viprān prahasta ānarca, juhāva ca vibhāvasum.

saṃvargayāṃcakārā ''ptān, candanena lilepa ca,

cacāma madhu mārdvīkaṃ, tvak-traṃ cā''cakace varam.

uṣṇīṣaṃ mumuce cāru, rathaṃ, ca jujuṣe śubham,

ālalambe mahā'strāṇi, gantuṃ pravavṛte tataḥ.

ājaghnus tūrya-jātāni, tuṣṭuvuś cā 'nujīvinaḥ,

rajaḥ pravavṛdhe ghoraṃ, ghoṣaś ca vyānaśe diśaḥ.

taṃ yāntaṃ dudruvur gṛdhrāḥ, kravyādaś ca siṣevire

āvavur vāyavo ghorāḥ, khādulkāś ca pracakṣaruḥ.

sasyande śoṇitaṃ vyoma, raṇā'ṅgāni prajajvaluḥ,

rathāḥ pracaskhaluḥ sā'śvā, na, raraṃhā'-śvakuñjaram.

pratodā jagalur, vāmamānañcur yajñiyā mṛgāḥ

dadāla bhūḥ, pupūre dyauḥ, kapīnāmapi niḥsvanaiḥ

mimeha raktaṃ hastyaśvaṃ, rākṣasāś ca nitiṣṭhivuḥ,

tataḥ śuśubhatuḥ sene, nir-dayaṃ ca prajahratuḥ

didviśur, dudyuvuś, cacchuś, caklamuḥ, suṣupur, hatāḥ

cakhādire cakhāduś ca, vilepuś ca raṇe bhaṭāḥ

prahastasya puro-mātyān jihiṃsur, dadhṛṣus tathā

vānarāḥ, karma senānī rakṣasāṃ cakṣame ne tat.

ūrṇunāva sa śastraughair vānarāṇāmanīkinīm,

śaśāsa ca bahūn, yodhān, jīvitena viveca ca,

āsasañja bhayaṃ teṣāṃ, didyute ca yathā raviḥ,

nā''yayāsa, dviṣad-dehair jagāhe ca diśo daśa.

kecit saṃcukuṭur bhītā, lejire 'nye parājitāḥ,

saṃgrāmād babhraśuḥ kecid yayācuś cā 'pare 'bhayam.

evaṃ vijigye tāṃ senāṃ prahasto, 'tidadarpa ca,

śaśāma na ca saṃkruddho, nirjugopa niśācarān.

cukrudhe tatra nīlena, taruś coccikṣipe mahān,

prahasto 'bhihatas tena bāṇān visasṛje bahūn,

sehe kapī, rathā'śvāṃś ca ripos tatarha śākhinā,

dharitrīṃ musalī teye prahastaś, cikhide na ca,

saṃdudhukṣe tayoḥ kopaḥ, pasphāye śastra-lāghavam,

nunoda śākhinaṃ nīla, āvavre musalī tarum,

viyatyānabhratur, bhūmau maṇḍalāni viceratuḥ,

pradudruvaturanyonyaṃ vīrau, śaśramatur na ca ,

samīrayāṃcakārā 'tha rākṣasasya kapiḥ śilām,

kṣatas tayā mamārā 'sāvāśiśrāya ca bhū-talam.

tutuṣur vānarāḥ sarve, neśuś citrā niśā-carāḥ,

jerurāśā daśāsyasya, sainyaṃ nīlaṃ nunāva ca,

yadā na pheluḥ kṣaṇadā-carāṇāṃ manorathā rāma-balā'bhiyoge,

laṅkāṃ tadā bhejurudīrṇa-dainyā, vyācakhyuruccaiś ca hataṃ prahastam,

Bhk_15

rākṣasendras tato 'bhaiṣīdaikṣiṣṭa paritaḥ puram,

prātiṣṭhipac ca bodhā'rthaṃ kumbhakarṇasya rākṣasān,

te 'bhyagur bhavanaṃ tasya, suptaṃ caikṣiṣatā 'tha tam,

vyāhārṣus tumulān śabdān, daṇḍaiś cā 'vadhiṣur drutam

keśānaluñciṣus, tasya gajān gātreṣvacikraman,

śītairabhyaṣicaṃs toyairalātaiś cā'pyadambhiṣuḥ.

nakhairakartiṣus tīkṣṇairadāṅkṣur daśanais tathā,

śitairatautsuḥ śūlaiś ca, bherīś cā'vīvadan śubhāḥ.

sa tān nā 'jīgaṇat sarvā- nicchayā 'buddha ca svayam,

abūbudhata kasmān mā- maprākṣīc ca niśā-carān.

te 'bhāṣiṣata "rājā tvāṃ didṛkṣuḥ kṣaṇadā-cara !"

so'snāsīd, vyalipan, māṃsamapsāsīd, vāruṇīmapāt

nyavasiṣṭa tato draṣṭuṃ rāvaṇaṃ, prāvṛtat gṛhāt.

rājā yāntaṃ tamadrākṣīdudasthāc ceṣadāsanāt.

atuṣat, pīṭhamāsanne niradikṣac ca kāñcanam.

asmeṣṭa kumbhakarṇo'lpamupāvikṣadathā 'ntike.

avādīn "māṃ kimityāhvo" rājñā ca pratyavādi saḥ

"mājñāsīs tvaṃ sukhī, rāmo yadakārṣīt sa rakṣasām.

udatārīdudanvantaṃ, puraṃ naḥ parito 'rudhat,

vyadyotiṣṭa raṇe śastrairanaiṣīd rākṣasān kṣayam.

na prāvocamahaṃ kiṃcit priyaṃ, yāvadajīviṣam,

bandhus tvamarcitaḥ snehān mādviṣo na vadhīr mama

vīryaṃ mā na dadarśas tvaṃ, mā na trāsthāḥ kṣatāṃ puram,

tavā 'drākṣma vayaṃ vīryaṃ, tvamajaiṣīḥ purā surān"

avocat kumbhakarṇas taṃ, "vayaṃ mantre'bhyadhāma yat

na tvaṃ sarvaṃ tadaśrauṣīḥ, phalaṃ tasyedamāgamat.

prājña-vākyānyavāmaṃsthā, mūrkha-vākyeṣvavā'sthithāḥ

adhyagīṣṭhāś ca śāstrāṇi, pratyapatthā hitaṃ na ca

mūrkhās tvāmavavañcanta, ye vigrahamacīkaran,

abhāṇīn mālyavān yuktamakṣaṃsthās tvaṃ na tan madāt

rāghavasyā 'muṣaḥ kāntāmāptairukto na cā'rpipaḥ,

mā nā'nubhūḥ svakān doṣān, mā muho mā ruṣo'dhunā.

tasyā'pyatyakramīt kālo, yat tadā'hamavādiṣam

aghāniṣata rakṣāsi paraiḥ, kośāṃs tvamavyayīḥ

sandhāna-kāraṇaṃ tejo nyagabhūt te, kṛthās tathā,

yat tvaṃ vairāṇi kośaṃ ca saha-daṇḍamajiglapaḥ."

akrudhac cā'bhyadhād vākyaṃ kumbhakarṇaṃ daśānanaḥ

"kiṃ tvaṃ māmajugupsiṣṭhā, naididhaḥ sva-parākramam.

mojjigrahaḥ su-nītāni, mā sma kraṃsthā na saṃyuge,

mopālabdhāh kṛtair doṣair mā na vākṣīr hitaṃ param."

kumbhakarṇas tato 'garjīd, bhaṭāṃś cā 'nyān nyavīvṛtat.

upāyaṃsta mahā'strāṇi, niragāc ca drutaṃ puraḥ.

mūrdhnā divamivā 'lekhīt, khaṃ vyāpad vapuṣoruṇā,

pādābhyāṃ kṣmāmivā 'bhaistīt, dṛṣṭyā 'dhākṣīdiva dviśaḥ

dagdha-śaila ivā 'bhāsīt, prākraṃsta kṣaya-megha-vat,

prācakampadudanvantaṃ, rākṣasānapyatitrasat.

sa-pakṣo 'dririvā 'cālīn, nyaśvasīt kalpa-vāyu-vat,

abhārṣīd dhvaninā lokā- nabhrājiṣṭa kṣayā'gni-vat.

anaṃsīd bhūr bhareṇā 'sya, raṃhasā śākhino 'luṭhan,

siṃhāḥ prādudruvan bhītāḥ, prākṣubhan kula-parvatāḥ

utpātāḥ prāvṛtaṃs tasya, dyauraśīkiṣṭa śoṇitam,

vāyavo'vāsiṣur bhīmāḥ, krūrāś cā'kuṣata dvijāḥ.

aspandiṣṭā 'kṣi vāmaṃ ca, ghorāś cā 'rāṭiṣuḥ śivāḥ,

nyapaptan musale gṛdhrā, dīptayā 'pāti colkayā.

āṃhiṣṭa tāna-saṃmānya darpāt sa pradhana-kṣitim,

tato'nardīdanandīc ca, śatrūnāhvāsta cā''have.

prāśīn, na cā 'tṛpat krūraḥ, kṣuc cā'syā'vṛdhadaśnataḥ,

adhād vasāmadhāsīc ca rudhiraṃ vana-vāsinām.

māmsenā 'syā 'śvatāṃ kukṣī, jaṭharaṃ cā 'pyaśiśviyat,

bahūnāmaglucat prāṇā- naglocīc ca raṇe yaśaḥ.

sāmarthyaṃ cā 'pi so 'stambhīd vikramaṃ cā'sya nā 'stabhan,

śākhinaḥ kecidadhyaṣṭhur nyamāṅkṣurapare 'mbu-dhau.

anye tvalaṅghiṣuḥ, śailān, guhāsvanye nyaleṣata,

kecidāsiṣata stabdhā, bhayāt kecidaghūrṇiṣuḥ.

udatāriṣurambho-dhiṃ vānarāḥ setunā 'pare,

alajjiṣṭā'ṅgadas tatra, pratyavāsthita corjitam.

sattvaṃ samadudhukṣac ca vānarāṇāmayuddha ca,

tataḥ śailānudakṣaipsurudagūriṣata drumān.

anardiṣuḥ kapi-vyāghrāḥ, samyak cā 'yutsatā''have,

tānamardīdakhādīc ca, nirāsthac ca talā''hatān,

prācucūrṇac ca pādābhyāmabibhīṣata ca drutam,

atarhīc caiva śūlena kumbhakarṇaḥ plavaṅgamān.

atautsīd gadayā gāḍhamapiṣac copagūhanaiḥ,

janubhyāmadamīc cā'nyān, hasta-vartamavīvṛtat,

adāliṣuḥ śilā dehe, cūrṇyabhūvan mahā-drumāḥ,

kṣiptās tasya na cā 'cetīt tānasau, nā 'pi cā 'kṣubhat.

adrāṣṭāṃ taṃ raghu-vyāghrau ākhyac cainaṃ vibhīṣaṇaḥ

"eṣa vyajeṣṭa devendraṃ, nā'śaṅkiṣṭa vivasvataḥ.

yakṣendra-śaktimacchāsīn, nā 'prothīdasya kaścana,

kumbhakarṇān na bhaiṣṭaṃ mā yuvāmasmān nṛpā''tmajau.

ghnantaṃ mopekṣiṣāthāṃ ca, mā na kārṣṭamihā''daram.,

"amuṃ mā na vadhiṣṭe"ti rāmo'vādīt tataḥ kapīn.

te vyarāsiṣurāhvanta rākṣasaṃ cā 'pyapiplavan,

ababhāsan svakāḥ śaktīr, druma-śailaṃ vyakāriṣuḥ

te taṃ vyāśiṣatā 'kṣautsuḥ pādair, dantais tathā 'cchidan.

ārjijat śarabho vṛkṣaṃ, nīlas tvā ''dita parvatam.

ṛṣabho 'drīnudakṣaipsīt, te tairarimatardiṣuḥ.

asphūrjīd, giri-śṛṅgaṃ ca vyasrākṣīd gandhamādanaḥ,

akūrdiṣṭa, vyakārīc ca gavākṣo bhū-dharān bahūn.

sa tān nā'jīgaṇad vīraḥ kumbhakarṇo'vyathiṣṭa na.

amanthīc ca parā'nīkamaploṣṭa ca niraṅkuśaḥ,

nihantuṃ cā'tvariṣṭā'rīnajakṣīc cā'ṅkamāgatān.

vyakrukṣad vānarā'nīkaṃ, saṃpalāyiṣṭa cā''yati,

hastābhyāṃ naśyadakrākṣīd, bhīme copādhitā''nane.

raktenā 'ciklidad bhūmiṃ, sainyaiś cā 'tastaraddhataiḥ,

nā 'tārpsīd bhakṣayan krūro, nā 'śramad ghnan plavaṅgamān,

na yoddhumaśakan kecin, nā 'ḍhaukiṣata kecana,

prāṇaśan nāsikābhyāṃ ca, vaktreṇa ca vanaukasaḥ.

udare cā 'jarannanye tasya pātāla-sannibhe,

ākrandiṣuḥ, sakhīnāhvan, prapalāyiṣatā'svidan.

raktamaścyotiṣuḥ kṣuṇṇāḥ, kṣatāś ca kapayo'tṛṣan,

upāsthāyi nṛpo bhagnairasau sugrīvamaijihat.

yoddhuṃ so pyaruṣacchatrorairirac ca mahā-drumam.

taṃ prāptaṃ prāsahiṣṭā'riḥ, śaktiṃ cogrāmudagrahīt.

sa tāmabibhramad bhīmāṃ, vānarendrasya cā 'mucat.

prāpaptan mārutis tatra tāṃ cā 'lāsīd viyad-gatām.

aśobhiṣṭā'cakhaṇḍac ca śaktiṃ vīro, na cā 'yasat.

lauha-bhāra-sahasreṇa nirmitā nirakāri me

śaktiratyakupad rakṣo, giriṃ codakhanīd gurum,

vyasṛṣṭa taṃ kapī-ndrasya, tenā'mūrcchīdasau kṣataḥ.

aloṭhiṣṭa ca bhū-pṛṣṭhe, śoṇitaṃ cā 'pyasusruvat,

tamādāyā'palāyiṣṭa, vyarociṣṭa ca rākṣasaḥ.

abhaiṣuḥ kapayo, 'nvārat kumbhukarṇaṃ marut-sutaḥ,

śanairabodhi sugrīvaḥ, so'luñcīt karṇa-nāsikam

rākṣasasya, na cā 'trāsīt, pranaṣṭumayatiṣṭa ca.

akrodhi kumbhakarṇena, peṣṭumārambhi ca kṣitau.

sugrīvo 'syā 'bhraśaddhastāt, samagāhiṣṭa cā 'mbaram,

tūrṇamanvasṛpad rāma- mānanandac ca vānarān.

atatvarac ca tān yoddhumaciceṣṭac ca rāghavau.

kumbhakarṇo nyavartiṣṭa, raṇe'yutsanta vānarāḥ.

aviveṣṭan nṛpā''deśādārukṣaṃś cā''śu rākṣasam

tānadhāvīt samārūḍhāṃs te 'pyusraṃsiṣatā ''kulāḥ.

agrasiṣṭa, vyadhāviṣṭa, samāślikṣac ca nir-dayam.

te cā 'pyaghoriṣur ghoraṃ, raktaṃ cā 'vamiṣur mukhaiḥ.

sa cā'pi rudhirair mattaḥ sveṣāmapyadayiṣṭa na,

agrahīc cā ''yuranyeṣāmaruddha ca parākramam.

saṃtrastānāṃapāhāri sattvaṃ ca vana-vāsinām,

acchedi lakṣmaṇenā'sya kirīṭaṃ kavacaṃ tathā.

abhedi ca śarair dehaḥ prāśaṃsīt taṃ niśā-caraḥ.

aspardhiṣṭa ca rāmeṇa tenā 'syā 'kṣipsateṣavaḥ,

yairaghāni kharo, vālī, mārīco, dūṣaṇas tathā.

avāmaṃsta sa tān darpāt, prodayaṃsīc ca mudgaram.

vāyavyā'streṇa taṃ pāṇiṃ rāmo 'cchaitsīt sahā''yudham,

ādīpi taru-hasto 'sā- vadhāvīc cā 'ri-saṃmukham.

sa-vṛkṣamacchidat tasya śakrā'streṇa karaṃ nṛpaḥ,

jaṅghe cā 'śīśatad bāṇairaprāsīdiṣubhir mukham.

aindreṇa hṛdaye 'vyātsīt, so 'dhyavātsīc ca gāṃ hataḥ.

apikṣātāṃ sahasre dve tad-dehena vanaukasām.

astāviṣuḥ surā rāmaṃ, diśaḥ prāpan niśā-carāḥ,

bhūrakampiṣṭa sā'drīndrā, vyacālīdambhasāṃ patiḥ.

hataṃ rakṣāṃsi rājānaṃ kumbhakarṇamaśiśravan,

arodīd rāvaṇo 'śocīn, mohaṃ cā 'śiśriyat param.

apaprathad guṇān bhrāturacikīrtac ca vikramam,

"kruddhena kumbhakarṇena ye 'dirṣiśata śatravaḥ

kathaṃ nvajīviṣus te ca, sa cā 'mṛta mahā-balaḥ."

ayuyutsiṣatā ''śvāsya kumārā rāvaṇaṃ tataḥ

devāntako 'tikāyaś ca triśirāḥ sa narāntakaḥ

te cāṃ''hiṣata saṃgrāmaṃ balino rāvaṇā''tmajāḥ.

yuddhonmattaṃ ca mattaṃ ca rājā rakṣārthamāñjihat

sutānāṃ, niragātāṃ tau rākṣasau raṇa-paṇḍitau.

tairajeṣata sainyāni, dviṣo 'kāriṣatā ''kulāḥ

parvatāniva te bhūmāvacaiṣur vānarottamān.

aṅgadena samaṃ yoddhumaghaṭiṣṭa narāntakaḥ,

praiṣiṣad rākṣasaḥ prāsaṃ, so 'sphoṭīdaṅgadorasi.

aśvān vāli-suto 'hiṃsīdatatāḍac ca muṣṭinā.

rāvaṇiś cā 'vyatho yoddhumārabdha ca mahīṃ gataḥ.

tasyā 'hāriṣata prāṇā muṣṭinā vāli-sūnunā.

prādudruvaṃs tataḥ kruddhāḥ sarve rāvaṇayo'ṅgadam.

tato nīla-hanūmantau rāvaṇīnavaveṣṭatām,

akāriṣṭāṃ girīṃs tuṅgānarautsīt triśirāḥ śaraiḥ

parigheṇā 'vadhiṣṭā 'tha raṇe devāntako balī,

muṣṭinā 'dadarat tasya mūrdhānaṃ mārutā''tmajaḥ.

adīdipat tato vīryaṃ, nīlaṃ cā'pīpiḍac charaiḥ

yuddhonmattas, tu nīlena giriṇā'nāyi saṃkṣayam.

ababhrājat tataḥ śaktiṃ triśirāḥ pavanā''tmaje,

hanūmatā kṣatās tasya raṇe 'mṛṣata vājinaḥ.

asrasac cā''hato mūrdhni, khaḍgaṃ cā 'jīharad dviṣā,

prāṇānaujjhīc ca khaḍgena chinnais tenaiva mūrdhabhiḥ.

mattenā 'māri saṃprāpya śarabhā'stāṃ mahā-gadām,

sahasra-hariṇā 'krīḍīdatikāyas tato raṇe.

rathenā 'vivyathac cā'rīn, vyacārīc ca ni-raṅkuśaḥ,

vibhīṣaṇena so 'khyāyi rāghavasya mahā-rathaḥ.

"atastambhadayaṃ vajraṃ, svayambhuvamatūtuṣat,

aśikṣiṣṭa mahā'strāṇi, raṇe 'rakṣīc ca rākṣasān.

adyagīṣṭā 'rtha-śāstrāṇi, yamasyā 'hnoṣṭa vikramam,

devā''haveṣvadīpiṣṭa, nā 'janiṣṭā 'sya sādhvasam.

eṣa rāvaṇirāpādi vānarāṇāṃ bhayaṅkaraḥ"

āhvatā 'tha sa kākutsthaṃ dhanuś cā 'pusphurad guru.

saumitriḥ sarpa-vat siṃhamārdidat taṃ mahā''have.

tau prāvīvṛtatāṃ jetuṃ śara-jālānyanekaśaḥ.

acchaittāṃ ca mahā''tmānau, ciramaśramatāṃ na ca,

tathā tāvāsthatāṃ bāṇānatāniṣṭāṃ tamo yathā.

sauryā''gneye vyakāriṣṭāmastre rākṣasa-lakṣmaṇau,

te copāgamatā nāśaṃ samāsādya parasparam

abibhrajat tataḥ śastramaiṣīkaṃ rākṣaso raṇe,

tadapyadhvasadāsādya māhendraṃ lakṣmaṇeritam.

tataḥ saumitrirasmārṣīdadeviṣṭa ca dur-jayam

brahmā'straṃ, tena mūrdhānamadadhvaṃsan nara-dviṣaḥ.

tato 'krandīd daśagrīvas tamāśiśvasadindrajit,

nirayāsīc ca saṃkruddhaḥ, prārcicac ca svayambhuvam.

ahauṣīt kṛṣṇavartmānaṃ, samayaṣṭā 'stra-maṇḍalam,

so 'labdha brahmaṇaḥ śastraṃ syandanaṃ ca jayā''vaham.

tamadhyāsiṣṭa dīprā'gramamodiṣṭa ca rāvaṇiḥ

channa-rūpas tato 'kartīd dehān rāvaṇa-vidviṣām.

sapta-ṣaṣṭiṃ plavaṅgānāṃ koṭīr bāṇairasūṣupat.

niśā'nte rāvaṇiḥ kruddho rāghavau ca vyamūmuhat.

apisphavat sva-sāmarthyamagūhīt sāyakair diśaḥ,

aghorīc ca mahā-ghoraṃ, gatvā, praiṣīc ca rāvaṇam.

vibhīṣaṇas tato 'bodhi sa-sphurau rāma-lakṣmaṇau,

apārīt sa gṛhītolko hata-śeṣān plavaṅgamān.

"mā śociṣṭa, raghu-vyāghrau nā'mṛṣātāmiti bruvan

avābuddha sa nīlā''dīn nihatān kapi-yūtha-pān.

tatraiṣaj jāmbavān prāṇīdudamīlīc ca locane,

paulastyaṃ cā'gadīt "kaccidajīvīn mārutā''tmajaḥ."

tasya kṣeme mahā-rāja ! nā 'mṛṣmahyakhilā vayam.

paulastyo 'śiśravat taṃ ca jīvantaṃ pavanā''tmajam.

āyiṣṭa mārutis tatra, tau cā 'pyahṛṣatāṃ tataḥ,

prāhaiṣṭāṃ himavat-pṛṣṭhe sarvauṣadhi-giriṃ tataḥ

tau hanūmantamānetumoṣadhīṃ mṛta-jīvinīm

sandhāna-karaṇīṃ cā'nyāṃ vi-śalya-karaṇīṃ tathā.

prodapāti nabhas tena, sa ca prāpi mahā-giriḥ,

yasminnajvaliṣū rātrau mahauṣadhyaḥ sahasra-śaḥ

niracāyi yadā bhedo nauṣadhīnāṃ hanū-matā,

sarva eva samāhāri tadā śailaḥ mahauṣadhiḥ.

prāṇiṣur nihatāḥ kecit, kecit tu prodamīliṣuḥ

tamo 'nye 'hāsiṣur yodhā, vyajṛmbhiṣata cā'pare.

ajighrapaṃs tathaivā'nyānoṣadhīrālipaṃs tathā,

evaṃ te'cetiṣuḥ sarve, vīryaṃ cā'dhiṣatā'dhikam.

ajihladat sa kākutsthau, śeṣāṃś cā 'jījivat kapīn

hanūmānatha te laṅkā- magninā 'dīdipan drutam.

samanātsīt tataḥ sainyamamārjīd bhalla-tomaram,

amārkṣīc cā 'sipatrā''dīnababhāsat paraśvadhān.

kumbhakarṇa-sutau tatra samanaddhāṃ mahā-balau

nikumbhaś caiva kumbhaś ca, prāpatāṃ tau plavaṅgamān.

agopiṣṭāṃ purīṃ laṅkāmagauptāṃ rakṣasāṃ balam,

atyāktāmāyudhā'nīkamanaiṣṭāṃ ca kṣayaṃ dviṣaḥ.

akokūyiṣṭa tat sainyaṃ, prapalāyiṣṭa cā''kulam,

acyutac ca kṣataṃ raktaṃ, hataṃ cā 'dhyaśayiṣṭa gām.

aṅgadenā 'hasātāṃ tau yudhyakampana-kampanau,

abhyārdīd vālinaḥ putraṃ prajaṅgho 'pi sa-matsaraḥ.

tasyā 'pyabebhidiṣṭā 'sau mūrdhānaṃ muṣṭinā 'ṅgadaḥ,

ahārṣīc ca śiraḥ kṣipraṃ yūpākṣasya nirākulaḥ.

śarīraṃ lohitākṣasya nyabhāṅkṣīd dvividas tadā,

kruddhaḥ kumbhas tato 'bhaitsīn maindaṃ sa-dvividaṃ śaraiḥ

āghūrṇiṣṭāṃ kṣatau, kṣmāṃ ca tāvāśiśriyatāmubhau.

mātulau vihvalau dṛṣṭvā kumbhaṃ vāli-suto nagaiḥ

praurṇāvīc, chara-varṣeṇa tānaprauhīn niśā-caraḥ.

vānarānaijihad rāmasya tūrṇaṃ rakṣitumaṅgadam.

drutamatrāsta sugrīvo bhrātṛvyaṃ ṣatru-saṃkaṭāt,

muṣṭinā kaumbhakarṇiṃ ca kruddhaḥ prāṇairatityajat.

nikumbho vānarendrasya prāhaiṣīt parighaṃ tataḥ,

hanūmāṃś cā ''patantaṃ tamabhāṅkṣīd bhogi-bhīṣaṇam.

praurṇuvīt tejasā'rātimarāsīc ca bhayaṃkaram,

grīvāṃ cā 'sya tathākrākṣīdajijīvad yathā na tam.

samagatakapi-sainyaṃ sammadenā 'timātraṃ, viṭapa-hariṇa-nāthaḥ siddhimauhiṣṭa nityām,

nṛ-pati-matiraraṃsta prāpta-kāmeva harṣāt, rajani-cara-patīnāṃ santato 'tāyi śokaḥ.

Bhk_16

tataḥ prarudito rājā rakṣasāṃ hata-bāndhavaḥ

"kiṃ kariṣyāmi rājyena, sītayā kiṃ kariṣyate

atikāye hate vīre protsahiṣye na jīvitum.

hrepayiṣyati kaḥ śatrūn, kena jāyiṣyate yamaḥ.

atikāyād vinā pāśyaṃ ko vā chetsyati vāruṇam,

rāvaṇaṃ maṃsyate ko vā, svayambhūḥ kasya tokṣyati.

ślāghiṣye kena, ko bandhūn neṣyatyunnatimunnataḥ,

kaḥ preṣyati pit n kāle, kṛtvā kitthaṣyate na kaḥ.

udyaṃsyati harir vajraṃ, vicariṣyati nir-bhayaḥ,

bhokṣyate yajña-bhāgāṃś ca śūra-mānaṃ ca vakṣyati.

ravis tapsyati niḥ-śaṅkaṃ, vāsyatyaniyataṃ marut,

nirvartsyatyṛtu-saṃghātaḥ, svecchayendurudeṣyati.

tīvraṃ syandiṣyate meghairugraṃ vartiṣyate yamaḥ,

atikāyasya maraṇe kiṃ kariṣyanti nā'nyathā.

anmīliṣyati cakṣur me vṛthā, yad vinayā''gatam

ājñā-lābhonmukhaṃ namraṃ na drakṣyati narāntakam.

dhiṅ māṃ, triśirasā nā 'haṃ sandarśiṣye 'dya yat punaḥ,

ghāniṣyante dviṣaḥ kena tasmin pañcatvamāgate.

śatrubhir nihate matte drakṣye 'haṃ saṃyuge sukham,

yuddhonmattād vinā śatrūn samāskantsyati ko raṇe.

āhvāsyate vi-śaṅko māṃ yotsyamānaḥ śata-kratuḥ,

prakalpsyati ca tasyā 'rtho nikumbe dur haṇe hate

kalpiṣyate hareḥ prītir, laṅkā copahaniṣyate,

devāntaka ! tvayā tyakto ripor yāsyāmi vaśyatām.

mariṣyāmi, vijeṣye vā, hatāś cet tanayā mama,

haniṣyāmi ripūṃs tūrṇaṃ, na jīviṣyāmi duḥkhitaḥ

smeṣyante munayo, devāḥ kathayiṣyanti cā'niśam

"daśa-grīvasya dur-nīter vinaṣṭaṃ rakṣasāṃ kulam."

kena sambhāvitaṃ tātakumbhakarṇasya rāghavaḥ

raṇe kartsyati gātrāṇi marmāṇi ca vitartsyati.

patiṣyati kṣitau bhānuḥ, pṛthivī tolayiṣyate.

nabhasvān bhaṅkṣyate vyoma muṣṭibhis tāḍayiṣyate.

indroḥ syandiṣyate vahniḥ, samuccokṣyati sāgaraḥ,

jalaṃ dhakṣyati, tigmāṃśoḥ syantyanti tamasāṃ cayāḥ.

kumbhakarṇo raṇe puṃsā kruddhaḥ paribhaviṣyate

saṃbhāvitāni naitāni kadācit kenacij jane.

kumbhakarṇe hate laṅkā- mārokṣyanti plavaṅgamāḥ,

daṅkṣyanti rākṣasān, dṛptā bhaṅkṣyanti ca mamā ''śramān.

cartsyanti bāla-vṛddhāṃś ca, nartsyanti ca mudā yutāḥ

tena rākṣasa-mukhyena vinā tān ko nirotsyati.

amarṣo me paraḥ, sītāṃ rāghavaḥ kāmayiṣyate,

cyuta-rājyāt sukhaṃ tasmāt kiṃ kilā 'sāvavāpsyati.

mārayiṣyāmi vaidehīṃ, khādayiśyāmi rākṣasaiḥ,

bhūmau vā nikhaniṣyāmi vidhvaṃsasyā 'sya kāraṇam

nā 'nurotsye jagal-lakṣmīṃ, ghaṭiṣye jīvituṃ na vā

na raṃsye viṣayaiḥ śūnye bhavane bāndhavairaham.

modiṣye kasya saukhye 'haṃ, ko me modiṣyate sukhe,

ādeyāḥ kiṃkṛte bhogāḥ kumbhakaṛṇa ! tvayā vinā.

yāḥ suhṛtsu vipanneṣu māmupaiṣyanti saṃpadaḥ,

tāḥ kiṃ manyu-kṣatā''bhogā na vipatsu vipattayaḥ.

"vinaṅkṣyati purī kṣipraṃ, tūrṇameṣyanti vānarāḥ,

a-sandhitsos tave"tyetad vibhīṣaṇa-subhāṣitam.

"arthena saṃbhṛtā rājñā na bhāṣiṣyāmahe vayam,

saṃyotsyāmaha," ityetat prahastena ca bhāṣitam.

mānuṣo nāma patkāṣī rājānaṃ puruṣā'śinām

yodhayiṣyati saṃgrāme divyā'stra-ratha-durjayam.

sannatsyāmyathavā yoddhuṃ, na koṣye sattva-hīna-vat,

adya taprsyanti māṃsā'dā, bhūḥ pāsyatyari-śoṇitam.

ākarkṣyāmi yaśaḥ, śatrūnapaneṣyāmi karmaṇā,

anubhāviṣyate śoko maithilyā 'dya pati-kṣayāt.

mantūyiṣyati yakṣendro, valgūyiṣyati no yamaḥ,

glāsyantya-pati-putrāś ca vane vānara-yoṣitaḥ.

sukhaṃ svapsyanti rakṣāṃsi, bhramiṣyanti ca nirbhayam,

na vikrokṣyanti rākṣasyo, narāṃś cā 'tsyanti harṣitāḥ.

prāṅ muhūrtāt prabhāte'haṃ bhaviṣyāmi dhruvaṃ sukhī

āgāmini, tataḥ kāle yo dvitīyaḥ kṣaṇo'paraḥ

tatra jetuṃ gamiṣyāmi tridaśendraṃ sahā'maram,

tataḥ pareṇa bhūyo 'pi laṅkāmeṣyāmyamatsaraḥ"

tameva-vādinaṃ mūḍhamindrjit samupāgataḥ

"yuyutsiṣye 'hamityevaṃ vadan ripu-bhayaṃkaraḥ.

nā 'bhijñā te mahārāja !, jeṣyāvaḥ śakra-pālitam

dṛpta-deva-guṇā''kīrṇa- māvāṃ saha surā''layam,

nā 'bhijñā te, sa-yakṣendraṃ bhaṅkṣyāvo yad yamaṃ balāt,

ratnāni cā ''hariṣyāvaḥ, prāpsyāvaś ca purīmimām.

eṣa pekṣyāmyarīn bhūyo, na śociṣyasi rāvaṇa !

jagad drakṣyasi nī-rāmamavagāhiṣyase diśaḥ.

saha-bhṛtyaḥ surā''vāse bhayaṃ bhūyo vidhāsyasi

praṇaṃsyatyadya devendras tvāṃ, vakṣyati sa sannatim.

bheṣyate munibhis tvattas tvamadhiṣṭhāsyasi dviṣaḥ,

jñāsye 'hamadya saṃgrāme samastaiḥ śūra-mānibhiḥ.

jñāyiṣyante mayā cā 'dya vīraṃ-manyā dviṣad-gaṇāḥ,

gūhiṣyāmi kṣitiṃ kṛttai- radya gātrair vanākasām.

ārokṣyāmi yugānta-vārida-ghaṭā- saṃghaṭṭa-dhīra-dhvaniṃ niryāsyan rathamacchrita-dhvaja-dhanuḥ- khaḍga-prabhā-bhāsuram.

śroṣyasyadya vikīrṇa-vṛkṇa-vimukha- vyāpanna-śatrau raṇe tṛptāṃś choṇita-śoṇa-bhīṣaṇamukhān kravyā'śinaḥ krośataḥ."

Bhk_17

āśāsata tataḥ śāntimasnuragnīnahāvayan,

viprānavācayan yodhāḥ, prākkurvan maṅgalāni ca.

apūjayan kula-jyeṣṭhānupāgūhanta bālakān.

strīḥ samāvardhayan sā'srāḥ, kāryāṇi prādiśaṃs tathā.

ācchādayan, vyalimpaṃś ca, prāśnannatha surā''miṣam,

prāpiban madhu-mādhvīkaṃ bhakṣyāṃś cā ''dan yathepsitān

nyaśyan śastrāṇyabhīṣṭāni, samanahyaṃś ca varmabhiḥ,

adhyāsata su-yāgāni, dviṣadbhyaś cā 'śapaṃs tathā.

apūjayaṃś catur-vaktraṃ, viprānārcaṃs tathā 'stuvan,

samālipata śakrā'rir yānaṃ cā 'bhyalaṣad varam.

āmuñcad varma ratnā''ḍhyamabadhnāt khaḍgamujjlvalam,

adhyāsta syandanaṃ ghoraṃ, prāvartata tataḥ puraḥ

āghnan bherīr mahā-svānāḥ, kambūṃś cā 'pyadhaman śubhān,

atāḍayan mṛdaṅgāṃś ca, perāś cā 'pūrayan kalāḥ.

astuvan bandinaḥ, śabdānanyonyaṃ codabhāvayan,

anadan siṃhanādāṃś ca, prādrekata haya-dvipam.

a-nimittānyathā 'paśyannasphuṭad ravi-maṇḍalam,

aukṣan śoṇitamambhodā, vāyavo'vānsu-duḥsahāḥ.

ārcchan vāmaṃ mṛgāḥ kṛṣṇāḥ, śastrāṇāṃ vyasmaran bhaṭāḥ,

raktaṃ nyaṣṭhīvadaklāmya- dakhidyad vāji-kuñjaram.

na tānagaṇayan sarvānāskandaṃś ca ripūn, dviṣaḥ

acchindannasibhis tīkṣṇairabhindaṃs tomarais tathā

nyakṛntaṃś cakra-dhārābhiratudan śaktibhir dṛḍham,

bhallairavidhyannugrā'grairatṛṃhaṃs tomarairalam.

āsyan plavaṅgamā vṛkṣānadhunvan bhū-dharair bhṛśam,

ahiṃsan muṣṭibhiḥ kroghādadaśan daśanairapi.

prādunvan jānubhis tūrṇamatudaṃs tala-kūrparaiḥ,

prāhiṇvannari-muktāni śastrāṇi vividhāni ca.

atṛṇeṭ śakra-jic chatrūnabhrāmyac ca samantataḥ,

adhvanac ca mahā-ghoraṃ, na ca kaṃcana nā'dunot.

nā'jānan sandadhānaṃ taṃ, dhanur naikṣanta bibhratam

neṣūnacetannasyantaṃ, hatās tenā 'vidur dviṣaḥ.

aśṛṇvannanyataḥ śabdaṃ, prapalāyanta cā 'nyataḥ,

ākrandamanyato'kurvaṃs tenā 'hanyanta cā'nyataḥ.

prāloṭhanta, vyabhidyanta, parito raktamasravan,

paryaśrāmyannatṛpyaṃś ca kṣatās tenā 'mriyanta ca.

saumitrirākulas tasmin brahmā'straṃ sarva-rakṣasām

nidhanāyā ''juhūṣat taṃ vyṣṭabhnād raghu-nandanaḥ.

tato māyā-mayīṃ sītāṃ ghnan khaḍgena viyad-gataḥ

adṛśyatendrajid, vākyamavadat taṃ marut-sutaḥ.

"mā 'parādhnodiyaṃ kiṃcidabhraśyat patyurantikāt

sītāṃ rākṣasa ! mā smaināṃ nigṛhṇāḥ pāpa ! duḥkhitām"

"pīḍā-karama-mitrāṇāṃ kartavyamiti śakrajit

abravīt, khaḍga-kṛṣṭaś ca tasyā mūrdhānamacchinat.

"yat-kṛte 'rīn vyagṛhṇīma, samudramatarāma ca,

sā hate"ti vadan rāmamupātiṣṭhan marut-sutaḥ.

tataḥ prāmuhyatāṃ vīrau rāghavāvarutāṃ tathā,

uṣṇaṃ ca prāṇatāṃ dīrghamuccair vyākrośatāṃ tathā.

tāvabhāṣata paulastyo "mā sma praruditaṃ yuvām,

dhruvaṃ sa mohayitvā'smān pāpo'gacchannikumbhilām.

mā sma tiṣṭhata, tatra-stho vadhyo 'smāva-hutā'nalaḥ,

astre brahma-śirasyugre syandane cā 'nupārjite.

brahmā 'dadhād vadhaṃ tasya tasmin karmaṇyasaṃsthite"

prāyacchadājñāṃ saumitrer yuthapānāṃ ca rāghavaḥ.

tāṃ pratyaicchan su-saṃpritās tatas te sa-vibhīṣaṇāḥ,

nikumbhilāṃ samabhyāyan, nyarudhyanta ca rākṣasaiḥ

dik-pālaiḥ kadanaṃ tatra sene prākurutāṃ mahat,

aitāṃ rakṣāṃsi nirjitya drutaṃ paulastya-lakṣmaṇau,

tatrendrajitamaikṣetāṃ kṛta-dhiṣṇyaṃ samāhitam.

so 'juhot kṛṣṇavartmānamāmanan mantramuttamam.

adhyāyac chakrajid brahma, samādheracalan na ca.

tamāhvayata saumitriragarjac ca bhayaṃkaram.

akupyadindrajit tatra, pitṛvyaṃ cā'gadad vacaḥ

"tvamatrā 'jāyathā, deha ihā 'puṣyat surā'miṣaiḥ,

ihā 'jīva, ihaiva tvaṃ krūramārabhathāḥ katham,

nā'paśyaḥ pāṇimārdraṃ tvaṃ, bandhu-tvaṃ nā'pyapaikṣathāḥ.

a-dharmān nā 'trasaḥ pāpa ! loka-vādān na cā 'bibheḥ,

dharma-duṣaṇa ! nūnaṃ tvaṃ nā 'jānā, nā 'śṛṇoridam.

nirākṛtya yathā bandhūn laghu-tvaṃ yātya-saṃśayam."

pitṛvyeṇa tato vākyamabhyadhīyata śakrajit

"mithyā mā sma vyatikrāmo, macchīlaṃ mā na badhyathāh

satyaṃ samabhavaṃ vaṃśe pāpānāṃ rakṣasāmaham.

na tvajāyata me śīlaṃ tādṛk, yādṛk pitus tava.

kṣayā''vaheṣu doṣeṣu vāryamāṇo mayā 'ramat

daśa-grīvaṃ 'hametasmādatyajaṃ, na tu vidviṣan.

para-svānyārjayan, nārīranyadīyāḥ parāmṛśat.

vyajighṛkṣat surān nityaṃ, prāmādyad guṇināṃ hite,

āśaṅkata suhṛd-bandhūna-vṛddhān bahvamanyata.

doṣairaramataibhis te pitā 'tyajyata yair mayā.

tato-ruṣyadanardac ca, dvi-viṃśatibhireva ca

śarairatāḍayad bandhuṃ, pañca-viṃśatibhir nṛpam

rāvaṇis tasya saumitriramathnāc caturo hayān.

sāgarathiṃ cā 'lunād bāṇairabhanak syandanaṃ tathā,

saumitrimakirad bāṇaiḥ parito rāvaṇis tataḥ.

tāvasphāvayatāṃ śāktiṃ, bāṇāṃś cā'kiratāṃ muhuḥ.

vāruṇaṃ lakṣmaṇo'kṣipyadakṣipad raudramindrajit.

te parasparamāsādya śastre nāśamagacchatām,

āsuraṃ rākṣasaḥ śastraṃ tato ghoraṃ vyasarjayat,

tasmān nirapatad bhūri śilā-śūleṣṭi-mudgaram.

māheśvareṇa saumitrirastabhnāt tat sudurjayam.

tato raudra-samāyuktaṃ māhendraṃ lakṣmaṇo'smarat,

tenā''gamyata ghoreṇa, śiraś cā 'hriyata dviṣaḥ

atuṣyannamarāḥ sarve, prāhṛṣyan kapi-yūthapāḥ,

paryaṣvajata saumitriṃ, mūrdhnyajighrac ca rāghavaḥ.

arodīd rākṣasā'nīkamarodan nṛ-bhujāṃ patiḥ,

maithilyai cā 'śapaddhantuṃ tāṃ prākramata cā''turaḥ.

"a-yuktamidam" tyanye tamāptāḥ pratyavārayan,

nyarundhaṃś cā 'sya panthānaṃ bandhutā śucamāruṇat.

āsphāyatā 'sya vīratvamamarṣaś cā 'pyatāyata

rāvaṇasya tataḥ sainyaṃ samastamayuyutsayat.

agnīnavarivasyaṃś ca te, 'namasyaṃś ca śaṅkaram,

dvijānaprīṇayan śāntyai yātudhānā bhavad-bhiyaḥ.

paritaḥ paryavād vāyurājya-gandhir mano-ramaḥ,

aśrūyata sa puṇyāhaḥ svasti-ghoṣaḥ samuccaran.

yoddhāro 'bibharuḥ śāntyai sā'kṣataṃ vāri mūrdhabhiḥ,

ratnāni cā 'dadur gāś ca, samavāñchannathā''śiṣaḥ.

adihaṃś candanaiḥ śubhrair, vicitraṃ samavastrayan,

adhārayan srajaḥ kāntā, varma cā 'nye 'dadhur drutam.

samakṣṇuvata śastrāṇi, prāmṛjan khaḍga-saṃhatīḥ,

gajā''dīni samārohan, prātiṣṭhantā ''tha satvarāḥ

apūrayan nabhaḥ śabdo bala-saṃvarta-saṃbhavaḥ

apūryanta ca dig-bhāgās tumulais tūrya-nisvanaiḥ.

āsīd dvāreṣu saṃghaṭṭo rathā'śva-dviparakṣasām

samahāna-nimittaiś ca samabhūyata bhīṣaṇaiḥ

kapayo 'bibhayus tasminnabhañjaṃś ca mahā-drumān

prodakhāyan girīṃs tūrṇamagṛhṇaṃś ca mahā-śilāḥ.

tataḥ samabhavad yuddhaṃ prāharan kapi-rākṣasāḥ,

anyonyenā 'bhyabhūyanta, vimardamasahanta ca.

prāvardhata rajo bhaumaṃ, tad vyāśnuta diśo daśa,

parā''tmīya-vivekaṃ ca prāmuṣṇāt kapi-rakṣasām.

tato 'dviṣur nirāloke svebhyo 'nyebhyaś ca rākṣasāḥ.

adviṣan vānarāś caiva vānarebhyo 'pi nirdayāḥ

aghuraṃs te mahā-ghoramaścyotannatha śoṇitam,

samapadyata raktena samantāt tena kardamaḥ.

gambhīrāḥ prāvahan nadyaḥ, samajāyanta ca hradāḥ,

vṛddhaṃ ca tad rajo 'śāmyat, samavedyanta ca dviṣaḥ.

tato 'citrīyatā 'straughair dhanuś cā 'dhūnayan mahat

rāmaḥ, samīhitaṃ tasya nā'cetan sve na cā 'pare.

chinnānaikṣanta bhinnāṃś ca samantād rāma-sāyukaiḥ.

kruṣṭaṃ hāheti cā 'śṛṇvan na ca rāmaṃ nyarūpayan.

abhinac chatru-saṃghātānakṣuṇad vāji-kuñjaram,

apinaṭ ca rathā'nīkaṃ, na cā 'jñāyata saṃcaran.

daśa danti-sahasrāṇi rathināṃ ca mahā''tmanām

caturdaśa sahasrāṇi sā''rohāṇāṃ ca vājinām

lakṣe ca dve padātīnāṃ rāghaveṇa dhanur-bhṛtā

anīyantāṣṭame bhāge divasasya parikṣayam.

yama-lokamivā'grathnād, rudrā''krīḍamivā 'karot,

śailairivā 'cinod bhūmiṃ bṛhadbhī rākṣasair hataiḥ.

astuvan deva-gandharvā, vyasmayanta plavaṅgamāḥ

kapīndre'tanyata prītiḥ, paulastyo'manyatā'dbhutam.

rākṣasyaḥ prārudannuccaiḥ, prājugupsanta rāvaṇam.

amuhyad bāla-vṛddhaṃ ca, samarauditaro janaḥ.

sarvataś cā'bhayaṃ prāpnon naicchan nṛbhyas tu rāvaṇaḥ,

phalaṃ tasyedamabhyāyād duruktasyeti cā 'bruvan.

tato 'dhāvan mahā-ghoraṃ rathamāsthāya rāvaṇaḥ,

akṣmāyata mahī, gṛdhrāḥ samārāryanta bhīṣaṇāḥ.

meghāḥ sa-vidyuto 'varṣaṃś cela-knopaṃ ca śoṇitam,

avān bhīmā nabhasvantaḥ, prāruvanna-śivāḥ śivāḥ

āṭāṭyatā 'vamatyā 'sau durnimittāni, saṃyuge

adhunod dhanurastraughaiḥ praurṇonūyata vidviṣaḥ

vyanāśayaṃs tataḥ śatrūn sugrīvā'stā mahībhṛtaḥ,

tato vyarasadaglāyadadhyśeta mahī-talam.

āścyotad rudhiraṃ, toyamalasac cā'ti vihvalam,

aśīyata nṛ-māṃsā'dāṃ balaṃ sugrīva-bādhitam.

virūpākṣas tato krīḍat saṃgrāme matta-hastinā,

muṣṭinā'dālayat tasya mūrdhānaṃ vānarā'dhipaḥ.

acūrṇayac ca yūpākṣaṃ śilayā tadanantaram.

saṃkruddho muṣṭinā'tubhnādaṅgado'laṃ mahodaram.

tato 'kuṣṇād daśagrīvaḥ kruddhaḥ prāṇān vanaukasām,

agopāyac ca rakṣāṃsi diśaś cā 'rīnabhājayat.

ālokayat sa kākutsthamadhṛṣṇod, ghoramadhvanat,

dhanurabhramayad bhīmamabhīṣayata vidviṣaḥ.

āskandal lakṣmaṇaṃ bānairatyakrāmac ca taṃ drutam,

rāmamabhyadravaj jiṣṇuraskunāc ceṣu-vṛṣṭibhiḥ.

apauhad bāṇa-varṣaṃ tad bhallai rāmo nirākulaḥ,

pratyaskunod daṣa-grīvaṃ śarairāśī-viṣopamaiḥ.

maṇḍalānyāṭatāṃ citramacchittāṃ śastra-saṃhatīḥ,

jagad vismāpayetāṃ tau, na ca vīrāvasīdatām.

vyoma prācinutāṃ bāṇaiḥ, kṣmāmakṣmāpayatāṃ gataiḥ,

abhittāṃ tūrṇamanyonyaṃ śikṣāś cā 'tanutāṃ muhuḥ.

samādhattā ''suraṃ śastraṃ rākṣasaḥ krūra-vikramaḥ,

tadakṣaran mahāsarpān vyāghra-siṃhāṃś ca bhīṣaṇān.

nyaṣedhat pāvakā'streṇa rāmas tad rākṣasas tataḥ

adīvyad raudramatyugraṃ, musalā''dyagalat tataḥ

gāndharveṇa nyavidyat tat kṣitīndro, 'tha narā'śanaḥ

sarva-marmasu kākutstha- maumbhat tīkṣṇaiḥ śilīmukhaiḥ

tatas triśirasaṃ tasya prāvṛścal lakṣmaṇo dhvajam,

amathnāt sārathiṃ cā''śu, bhūribhiś cā 'tudaccharaiḥ.

aśvān vibhīṣano 'tubhnāt syandanaṃ cā'kṣiṇod drutam,

nā'kṣubhnād rākṣaso, bhrātuḥ śaktiṃ codavṛhad gurum.

tāmāpatantīṃ saumitris tridhā'kṛntacchilīmukhaiḥ,

aśabdāyanta paśyantas tataḥ kruddho niśācaraḥ

aṣṭa-ghaṇṭāṃ mahā-śaktimudayacchan mahattarām,

rāmā'nujaṃ tayā 'vidhyat, sa mahīṃ vyasurāśrayat.

rāghavasyā'bhṛśāyanta sāyakās, tairupadrutaḥ

tatas tūrṇaṃ daśagrīvo raṇa-kṣmā paryaśeṣayat.

sa-sphurasyodakarṣac ca saumitreḥ śaktimagra-jaḥ,

asiñcadoṣadhīs tā yāḥ samānītā hanūmatā.

udajīvat sumitrā-bhūr bhrātā ''śliṣyata tamāyatam,

sanyaṅ mūrdhanyupāśiṅgha- dapṛcchac ca nirāmayam

tataḥ prodasahan sarve yoddhumabhyadravat parān,

akṛcchrāyata ca prāpto rathenā 'nyena 'rāvaṇaḥ.

"bhūmi-ṣṭhasyā 'samaṃ yuddhaṃ ratha-sthene"ti mātaliḥ

āharad rathamatyugraṃ sa-śastraṃ maghavā ''jñayā.

so 'dhyaṣṭhīyata rāmeṇa, śastraṃ pāśupataṃ tataḥ

nirāsyata daśā''syas, tacchakrā'streṇājayan nṛpaḥ.

tataḥ śata-mahasreṇa rāmaḥ praurṇon niśācaram

bāṇānāmakṣiṇod dhuryān, sārathiṃ cā'dunod drutam.

adṛśyantā 'nimittāni, prāhvalat kṣiti-maṇḍalam,

rāvaṇaḥ prāhiṇocchūlaṃ, śaktiṃ caindīṃ mahī-patiḥ.

tābhyāmanyonyamāsādya samavāpyata saṃśamaḥ,

lakṣeṇa patriṇāṃ vakṣaḥ kruddho rāmasya rākṣasaḥ

astṛṇādadhikaṃ rāmas tato 'devata sāyakaiḥ,

aklāmyadrāvaṇas, tasya sūto rathamanāśayat.

rākṣaso'tarjayat sūtaṃ punaś cā'ḍhaukayad ratham,

nirāsyetāmubhaubāṇānubhau dhuryānavidhyatām

ubhāvakṛntatāṃ ketūnāvyathetāmubhau na tau

adīpyetāmubhau dhṛṣṇū, prāyuñjātāṃ ca naipuṇam

ubhau māyāṃ vyatāyetāṃ, vīrau nā 'śrāmyatāmubhau

maṇḍalāni vicitrāṇi kṣipramākrāmatāmubhau

na cobhāvapyalakṣyetāṃ, yantārāvāhatāmubhau

syandanau samapṛcyetāmubhayor dīpta-vājinau.

tato māyāmayān mūrdhno rākṣaso 'prathayadraṇe,

rāmeṇaikaśataṃ teṣāṃ prāvṛścyata śilīmukhaiḥ.

samakṣubhnannudanvantaḥ, prākampanta mahībhṛtaḥ,

santrāsamabibhaḥ śakruḥ, praiṃkhacca, kṣubhitā kṣitiḥ.

tato mātalinā śastramasmaryata mahīpateḥ

vadhāya rāvaṇasyograṃ svayambhūr yadakalpayat.

nabhasvān yasya vājeṣu, phale tigmāṃśu-pāvakau

gurutvaṃ meru-saṅkāśaṃ, dehaḥ sūkṣmo viyanmayaḥ.

rājitaṃ gāruḍaiḥ pakṣair viśveṣāṃ ghāma tejasām

smṛtaṃ tad rāvaṇaṃ bhittvā sughoraṃ bhuvyaśāyayat.

ābadhnan kapi-vadanāni saṃprasādaṃ, prāśaṃsat sura-samitir nṛpaṃ jitā 'rim,

anyeṣāṃ vigata-pariplavā digantāḥ, paulastyo'juṣata śucaṃ vipanna-bandhuḥ

Bhk_18

vyaśnute sma tataḥ śoko nābhi-sambandha-sambhavaḥ

vibhīṣaṇamasāvuccai roditi sma daśā''nanam.

"bhūmau śete daśa-grīvo mahārha-śayanocitaḥ,

nekṣate vihvalaṃ māṃ ca, na me vācaṃ prayacchati.

vipāko'yaṃ daśa-grīva ! saṃdṛṣṭo 'nāgato mayā.

tvaṃ tenā'bhihitaḥ pathyaṃ kiṃ kopaṃ na niyacchasi.

bhajanti vipadas tūrṇamatikrāmanti sampadaḥ

tān, madān nā'vatiṣṭhante ye mate nyāyavādinām.

a-pathyamāyatau lobhādāmanantyanujīvinaḥ

priyaṃ, śṛṇoti yas tebhyas, tamṛcchanti na sampadaḥ.

prājñās tejasvinaḥ samyak paśyanti ca, vadanti ca,

te'vajñātā mahārāja ! klāmyanti, viramanti, ca.

leḍhi bheṣaja-van nityaṃ yaḥ pathyāni kaṭūnyapi,

tadarthaṃ sevate cā ''ptān, kadācin na sa sīdati.

sarvasya jāyate mānaḥ, sva-hitāc ca pramādyati,

vṛddhau bhajati cā 'pathyaṃ naro yena vinaśyati.

dveṣṭi prāyo guṇebhyo yan, na ca snihyati kasyacit,

vairāyate mahadbhiś ca śīyate vṛddhimānapi.

samāśvasimi kenā 'haṃ, kathaṃ prāṇimi dur-gataḥ

loka-traya-patir bhrātā yasya me svapiti kṣitau

aho jāgarti kṛcchreṣu daivaṃ, yad bala-bhijjitaḥ

luṭhyanti bhūmau klidyanti bāndhavā me svapanti ca.

śivāḥ kuṣṇanti māṃsāni, bhūmiḥ pibati śoṇitam,

daśagrīva-sanābhīnāṃ samadantyāmiṣaṃ khagāḥ,

yena pūta-krator mūrdhni sthīyate sma mahā''have,

tasyā'pīndrajito daivād dhvāṃkṣaiḥ śirasi līyate.

svarbhānur bhāskaraṃ grastaṃ niṣṭīvati kṛtā'hnikaḥ,

abhyupaiti punar bhūtiṃ rāma-grasto na kaścana.

tvamajānannidaṃ rājannīḍiṣe sma sva-vikramam,

dātuṃ necchasi sītāṃ sma, viṣayāṇāṃ ca neśiṣe.

mantre jātu vadantyajñās, tvaṃ tānapyanumanyase,

kathaṃ nāma bhavāṃs tatra nā 'vaiti hitamātmanaḥ

a-pṛṣṭo nu bravīti tvāṃ mantre mātāmaho hitam,

"na karomītipaulastya ! tadā mohāt tvamuktavān

tvaṃ sma vettha mahārāja ! yat smā''ha na vibhīṣanaḥ.

purā tyajati yat kruddo māṃ nirākṛtya saṃsadi.

havir jakṣiti niḥśaṅko makheṣu madhavānasau,

pravāti svecchayā vāyurudgacchati ca bhāskaraḥ.

dhanānāmīśate yakṣā, yamo dāmyati rākṣasān,

tanoti varuṇaḥ pāśamindunodīyate 'dhunā.

śāmyatyṛtu-samāhāras, tapasyanti vanaukasaḥ,

no namasyanti te bandhūn, varivasyanti nā 'marāḥ

śrīr niṣkuṣyati laṅkāyāṃ, virajyanti samṛddhayaḥ,

na veda tan, na yasyā'sti mṛte tvayi viparyayaḥ.

śaktiṃ saṃsvajate śakro, gopāyati hariḥ śriyam,

deva-vandyaḥ pramodante, citrīyante, ghanodayāḥ.

bibhratyastrāṇi sā'marṣā raṇa-kāmyanti cā 'marāḥ,

cakāsati ca, māṃsā'dāṃ tathārandhreṣu jāgrati.

cañcūryate 'bhito laṅkāmasmāṃś cā 'pyatiśerate,

bhūmayanti sva-sāmarthyaṃ, kīrtiṃ naḥ kanayanti ca.

diśo vyaṣnuvate dṛptās tvat-kṛtāṃ jahati sthitim,

kṣodayanti ca naḥ kṣudrā, hasanti tvāṃ vipad-gatam.

śamaṃ śamaṃ nabhasvantaḥ punanti parito jagat,

ujjihīṣe mahārāja ! tvaṃ praśānto na kiṃ punaḥ

prorṇoti śokas cittaṃ me, satvaṃ saṃśāmyatīva me

pramārṣṭi duḥkhamālokaṃ, muñcāmyūrjaṃ tvayā vinā.

kena saṃvidrate-nā'nyas tvatto bāndhava-vatsalaḥ,

viraumi śūnye, prorṇaumi kathaṃ manyu-samudbhavam.

rodimyanāthamātmānaṃ bandhunā rahitas tvayā,

pramāṇaṃ nopakārāṇāmavagacchāmi yasya te

nedānīṃ śakra-yakṣendrau bibhīto, na daridritaḥ,

na garvaṃ jahito dṛptau, na kliśnīto daśā''nana !

tvayā 'pi nāma rahitāḥ kāryāṇi tanumo vayam,

kurmaś ca jīvite buddhiṃ, dhik tṛṣṇāṃ kṛta-nāśinīm.

tṛṇehmi dehamātmīyaṃ. tvaṃ vācaṃ na dadāsi cet,

drāghayanti hi me śokaṃ smaryamāṇā guṇās tava.

unmucya srajamātmīyāṃ māṃ srajayati ko hasan,

nedayatyāsanaṃ ko me, ko hi me vadati priyam.

na gacchāmi purā laṅkā- māyur yāvad dadhāmyaham,

kadā bhavati me prītis, tvāṃ paśyāmi na cedaham.

ūrdhvaṃ mriye muhūrtāddhi vihvalaḥ kṣata-bāndhavaḥ,

mantre sma hitamākhyāmi, na karomi tavā 'priyam.

antaḥpurāṇi paulastyaṃ paurāś ca bhṛśa-duḥkhitāḥ

saṃśrutya smā 'bhidhāvanti hataṃ rāmeṇa saṃyuge.

mūrdhajān sma viluñcanti, krośanti smā 'tivihvalam,

adhīyantyupakārāṇāṃ muhur bhartuḥ pramanyu ca.

rāvaṇasya namanti sma paurāḥ sāsrā rudanti ca."

bhāṣate sma tato rāmo vacaḥ paulastyamākulam

"dātuḥ sthātur dviṣāṃ mūrdhni yaṣṭus tarpayituḥ pit n

yuddhā'bhagnā''vipannasya kiṃ daśā''syasya śocasi

bobhavīti na sammoho vyasane sma bhavādṛśām,

kiṃ na paśyasi, sarvo 'yaṃ janas tvāmavalambate.

tvamarhasi bhrāturanantarāṇi kartuṃ, janasyā 'sya ca śoka-bhaṅgam,

dhurye vipanne tvayi rājya-bhāro majjatyanūḍhaḥ kṣaṇadā-carendra !"

Bhk_19

apa-manyus tato vākyaṃ paulastyo rāmamuktavān

"a-śocyo'pi vrajannastaṃ sanābhir dunuyān na kim.

taṃ no devā vidheyāsur yena rāvaṇa-vad vayam

sapatnāṃś ca 'dhijīyāsma, saṃgrāme ca mṛṣīmahi.

kriyeraṃś ca daśā''syena yathā 'nyenā 'pi naḥ kule

devadyañco narā'hārā nyañcaśca dviṣatāṃ gaṇāḥ.

sa eva ghārayet prāṇānīdṛśe bandhu-viplave,

bhavedāśvāsako yasya suhṛcchakto bhavādṛśaḥ.

mriyeyordhvaṃ muhūrtāddhi, na syās tvaṃ yadi me gatiḥ,

āśaṃsā ca hi naḥ, prete jīvema-daśamūrdhani.

prakuryāma vayaṃ deśe garhyāṃ tatra kathaṃ ratim,

yatra viṃśati-hastasya na sodaryasya sambhavaḥ."

āmantrayeta tān prahvān mantriṇo'tha vibhīṣaṇaḥ

"gaccheta tvaritaṃ laṅkāṃ, rāja-veśma viśeta ca.

ādadīdhvaṃ mahā'rhāṇi tatra vāsāṃsi sa-tvarāḥ

uddhunīyāta sat-ketūn, nirharetā'grya-candanam.

muñcetā''kāśa-dhūpāṃśca, grathnīyāta srajaḥ śubhāḥ,

ānayetā 'mitaṃ dāru karpūrā'guru-kuṅkumam.

uhyeran yajña pātrāṇi, hriyeta ca vibhāvasuḥ,

bhriyeta cā''jyamṛtvigbhiḥ, kalpyeta ca samit-kuśam.

snānīyaiḥ snāpayetā''śu, ramyair limpeta varṇakaiḥ,

alaṅkuryāta ratnaiśca rāvaṇā'rhair daśā''nanam.

vāsayeta su-vāsobhyāṃ medhyābhyāṃ rākṣasā''dhipam,

ṛtvik sragviṇamādadhyāt prāṅ-mūrdhānaṃ mṛgā'jine.

yajña-pātrāṇi gotreṣu cinuyāc ca yathā-vidhi,

juhuyāc ca havir vahnau, gāyeyuḥ sāma sāmagāḥ."

gatvā 'tha te purīṃ laṅkāṃ kṛtvā sarvaṃ yathoditam

samīpe'ntyā''huteḥ sā'srāḥ proktavanto vibhīṣaṇam

"kṛtaṃ sarvaṃ yathoddiṣṭaṃ, kartuṃ vahni-jala-kriyām

prayatethā mahārāja ! saha sarvaiḥ sva-bandhubhiḥ.

ajñā-van notsahethās tvaṃ, dheyā dhīra-tvama-cyutam,

stheyāḥ kāryeṣu bandhūnāṃ, heyāḥ śokodbhavaṃ tamaḥ.

nā'vakalpyamidaṃ, glāyed yat kṛcchreṣu bhavānapi

na pṛthag-jana-vaj jātu pramuhyet paṇḍito janaḥ.

yacca yatra bhavāṃs tiṣṭhet, tatrā 'nyo rāvaṇasya na,

yacca yatra bhavān sīden mahadbhis tad vigarhitam.

āścaryaṃ, yacca yatra tvāṃ prabrūyāma vayaṃ hitam,

api sākṣāt praśiṣyās tvaṃ kṛcchreṣvindra-purohitam.

kāmo janasya"jahyās tvaṃ pramādaṃ nairṛtā'dhipa !"

uta dviṣo'nuśoceyur viplave, kimu bāndhavāḥ.

sa bhavān bhrātṛ-vad rakṣed yathāvadakhilaṃ janam,

na bhavān saṃpramuhyec cedāśvasyuś ca niśācarāḥ,

tataḥ sa gatavān kartuṃ bhrāturagni-jala-kriyām.

proktavān kṛta-kartavyaṃ vaco rāmo'tha rākṣasam.

ambhāṃsi rukma-kumbhena siñcan mūrdhi samādhimān

"tvaṃ rājā rakṣasāṃ laṅkā- mavekṣethā vibhīṣana ?

kruddhānanunayeḥ samyak, dhanairlubdhānupārjayeḥ,

mānino mānayeḥ kāle, trastān paulastya ! sāntvayeḥ.

icchā me paramā, nandeḥ kathaṃ tvaṃ vṛtra-śatru-vat,

iccheddhi suhṛdaṃ sarvo vṛddhi-saṃsthaṃ yataḥ suhṛt.

vardhiṣīṣṭāḥ svajāteṣu, vadhyās tvaṃ ripu-saṃhatīḥ,

bhūyās tvaṃ guṇināṃ mānyas, teṣāṃ stheyā vyavasthitau.

dheyās tvaṃ suhṛdāṃ prītiṃ, vandiṣīṣṭhā divaukasaḥ,

somaṃ peyāś ca, heyāś ca hiṃsrā hāni-karīḥ kriyāḥ

avaseyāś ca kāryāṇi dharmeṇa pura-vāsinām,

anurāgaṃ kriyā rājan ! sadā sarva-gataṃ jane.

ghāniṣīṣṭa tvayā manyur, grāhiṣīṣṭa samunnatiḥ,

rakṣobhir darśiṣīṣṭhās tvaṃ, drakṣīran bhavatā ca te.

manyuṃ vadhyā bhaṭa-vadha-kṛtaṃ bāla-vṛddhasya rājan !, śāstrā'bhijñāḥ sadasi su-dhiyaḥ sannidhiṃ te kriyāsuḥ,

saṃraṃsīṣṭhāḥ sura-muni-gate vartmani prājya-dharme, saṃbhutsīṣṭhāḥ su-naya-nayanair vidviṣāmīhitāni."

Bhk_20

samupetya tataḥ sītāmuktavān pavanā''tmajaḥ

diṣṭyā vardhasva vaidehi ! hatas trailokya-kaṇṭakaḥ

anujānīhi hanyantāṃ mayaitāḥ kṣudra-mānasāḥ

rakṣikās tava rākṣasyo, gṛhāṇaitāsu matsaram.

tṛṇhāni durā''cāraghora-rūpā''śaya-kriyāḥ,

hiṃsrā bhavatu te buddhiretās, kuru niṣṭhuram.

paścimaṃ karavāmaitat priyaṃ devi ! vayaṃ tava,"

tataḥ proktavatī sītā vānaraṃ karuṇā''śayā.

"upaśāmyatu, te buddhiḥ piṇḍa-nirveśa-kāriṣu

laghu-satveṣu, doṣo'yaṃ yat-kṛto-nihato 'sakau.

na hi preṣya-vadhaṃ ghoraṃ karavānyastu te matiḥ,

edhi kārya-karas tvaṃ me gatvā pravada rāghavam.

"didṛkṣur maithilī rāma ! paśyatu tvā'vilambitam".

tatheti sa pratijñāya gatvā rāghavamuktavān.

"utsukā''nīyatāṃ devī kākutstha-kula-nandana !"

kṣmāṃ likhitvā viniśvasya svarā''lokya vibhīṣaṇam

uktavān rāghavaḥ-"sītāmānayā 'laṃkṛtāmiti."

gatvā praṇamya tenoktā maithilī madhuraṃ vacaḥ.

"jahīhi śokāṃ vaidehi ! prītaye dhehi mānasam,

rāvaṇe jahihi dveṣāṃ, jahāhi pramadā-vanam.

snāhyanulimpa dhūpāya, nivassvā''vidhya ca srajam,

ratnānyā''muñca, saṃdīpte havir juhudhi pāvake,

addhi tvaṃ pañca-gavyaṃ ca, chindhi saṃrodha-jaṃ tamaḥ,

āroha śibikāṃ haimīṃ, dviṣāṃ jahi mano-rathān.

tṛṇeḍhu tvad-viyogotthāṃ rājanyānāṃ patiḥ śucam,

bhavatādadhiyuktā tvamata ūrdhvaṃ sva-veśmani.

dīkṣasva saha rāmeṇa tvaritaṃ turagā'dhvare,

dṛśyasva patyā prītena prītyā prekṣasva rāghavam.

ayaṃ niyogaḥ patyus te, kāryā nā'tra vicāraṇā,

bhūṣayā 'ṅgaṃ, pramāṇaṃ ced, rāmaṃ gantuṃ yatasva ca

mudā saṃyuhi kākutsthaṃ, svayaṃ cā ''pnūhi sampadam,

upehyūrdhvaṃ muhūrtāt tvaṃ devi ! rāghava-sannidhim.

ūrdhvaṃ muhūrtādahno 'ṅga ! svāminī sma bhava kṣiteḥ

rāja-patnī-niyoga-sthamanuśādhi purī-janam.

uttiṣṭhasva mate patyur, yatasvā 'laṅkṛtau tathā,

pratiṣṭhasva ca taṃ draṣṭuṃ draṣṭavyaṃ tvaṃ mahī-patim."

anuṣṭhāya yathā''diṣṭaṃ niyogaṃ janakā''tmajā

mamārūḍhavatī yānaṃ paṭṭāṃ'śuka-vṛtā''nanā.

lajjā'natā visaṃyoga-duḥkha-smaraṇa-vihvalā

sā'srā gatvā 'ntikaṃ patyur dīnā ruditavatyasau.

prāpta-cāritrya-sandehas tatas tāmuktavān nṛpaḥ

icchāme-"nā ''dade sīte ! tvāmahaṃ gamyatāmataḥ".

rāvaṇā'ṅka-pariśliṣṭā tvaṃ hṛl-lekha-karī mama

matiṃ badhāna sugrīve , rākṣasendraṃ gṛhāṇa vā.

aśāna bharatād bhogān, lakṣmaṇaṃ pravṛṇīṣva vā,

kāmād vā yāhi, mucyantāmāśā rāma-nibandhanāḥ.

kva ca khyāto raghor vaṃśaḥ, kva taṃ para-gṛhoṣitā,

anyasmai hṛdayaṃ dehi, nā 'nabhīṣṭe ghaṭāmahe.

yatheṣṭaṃ cara vaidehi !, panthānaḥ santu te śivāḥ,

kāmās te'nyatra tāyantāṃ viśaṅkāṃ tyaja mad-gatām.

tataḥ pragaditā vākyaṃ maithilā'bhijanā nṛpam

"strīsāmānyena sambhūtā śaṅkā mayi vimucyatām.

daivād bibhīhi kākutstha ! jihrīhi tvaṃ tathā janāt,

mithyā māmabhisaṃkrudhya- nna-vaśāṃ śatruṇā hṛtām.

cetasas tvayi vṛttir me, śarīraṃ rakṣasā hṛtam,

vidāṃkurvantu samyañco devāḥ satyamidaṃ vacaḥ

tvaṃ punīhi punīhīti punan vāyo ! jagattrayam

caran deheṣu bhūtānāṃ viddhi me buddhi-viplavam.

khamaṭa, dyāmaṭā 'ṭorvīmityaṭantyo 'ti-pāvanāḥ

yūyamāpo ! vijānīta mano-vṛttiṃ śubhāṃ mama.

jaganti dhatsva dhatsveti dadhatī tvaṃ vasundhare !

avehi mama cāritraṃ naktaṃ-divama-vicyutam.

rasān saṃhara, dīpyasva, dhvāntaṃ jahi, nabho bhrama,

itīhamānas tigmāṃ'śo ! vṛttaṃ jñātuṃ ghaṭasva me.

svarge vidyasva, bhuvyā''sva, bhujaṅga-nilaye bhava,

evaṃ vasan mamā ''kāśa ! saṃbudhyasva kṛtā'kṛtam.

citāṃ kuru ca saumitre ! vyasanasyā 'sya bheṣajam,

rāmas tuṣyatu me vā 'dya, pāpāṃ pluṣṇātu vā 'nalaḥ

rāghavasya matenā 'tha lakṣmaṇenā''citāṃ citām

dṛṣṭvā pradakṣiṇīkṛtya rāmaṃ pragaditā vacaḥ

pravapāṇi vapur vahnau rāsā 'haṃ śāṅkitā tvayā,

sarve vidantu śṛṇvantu bhavantaḥ sa plavaṅgamāḥ.

māṃ duṣṭāṃ jvalita-vapuḥ pluṣāṇa vahne ! saṃrakṣa kṣata-malināṃ suhṛd yathā vā,

eṣā 'haṃ kratuṣu vasor yathā ''jya-dhārā tvāṃ prāptā vidhi-vadudīrṇa-dīpti-mālam.

Bhk_21

samutkṣipya tato vahnir maithilīṃ rāmamuktavān

"kākutstha ! dayitāṃ sādhvīṃ tvamāśaṅkiṣyathāḥ katham

nā bhaviṣyadiyaṃ śuddhā yadyapāsyamahaṃ tataḥ

na caināṃ, pakṣapāto me dharmādanyatra rāghava !

api tatra-ripuḥ sītāṃ nā 'rthayiṣyata dur-matiḥ,

krūraṃ jātvavadiṣyac ca jātvastoṣyacchriyaṃ svakām.

saṅkalpaṃ nā 'kariṣyac ca tatreyaṃ śuddha-mānasā,

satyā'marṣamavāpsyas tvaṃ rāmaḥ sītā-nibandhanam.

tvayā 'drakṣyata kiṃ nā 'syāḥ śīlaṃ saṃvasatā ciram,

adarśiṣyanta vā ceṣṭāḥ kālena badhunā na kim.

yāvajjivamaśociṣyo, nā 'hāsyaś cedidaṃ tamaḥ,

bhānurapyapatiṣyat kṣmāmakṣobhiṣyata cediyam.

samapatsyata rājendra ! straiṇaṃ yadyatra cāpalam,

loka-pālā ihā ''yāsyaṃs tato nā 'mī kali-druhaḥ.

āścaryaṃ yacca yatra strī kṛcchre 'vartsyan mate tava,

trāsādasyāṃ vinaṣṭāyāṃ kiṃ kimālapsyathāḥ phalam.

yatra yaccā 'mariṣyat strī sādhvasād doṣa-varjitā

tadasūyā-ratau loke tasyā vācyā ''spadaṃ mṛṣā.

amaṃtsya bhavān yadvad tathaiva ca pitā tava

nā ''gamiṣyad vimāna-sthaḥ sākṣād daśaratho nṛpaḥ.

nā 'kalpsyat sannidhiṃ sthānuḥ śūlī vṛṣabha-vāhanaḥ

anvabhāviṣyatā 'nyena maithilī cet pativratā.

ānandayiṣyadāgamya kathaṃ tvāmaravinda-sat

rājendra ! viśva-sūr dhātā cāritrye sītayā kṣate.

praṇaman brahmaṇā prokto rājakā 'dhipatis tataḥ

"nā, śotsyan maithilī loke, nā''cariṣyadidaṃ yadi.

nā'mokṣyāma vayaṃ śaṅkā- mihādhāsyan na ced bhavān,

kiṃ vā citramidaṃ yuktaṃ, bhavān yadakariṣyata.

prāvartiṣyanta ceṣṭāś ced-yāthātathya-vat tava,

anuśāsye tvayā loke rāmā'vartsyaṃstarāṃ tataḥ

prāṇamantam tato rāmamuktavāniti śaṅkaraḥ

"kiṃ nārāyaṇamātmānaṃ nā 'bhotsyata bhavānajam.

ko nyo 'kartsyadiha prāṇān dṛptānāṃ ca sura-dviṣām,

ko vā viśvajanīneṣu karmasu prāghaṭiṣyata

daitya-kṣaye mahā-rāja ! yacca yatrā 'ghaṭiṣyathāḥ

samāptiṃ jātu tatrāpi kiṃ nā 'neṣyas tvamīhitam.

tātaṃ prasādya kaiyeyyā bharatāya prapīḍitam

sahasra-cakṣuṣaṃ rāmo ninaṃsuḥ paridṛṣṭavān.

pretā vareṇa śakrasya prāṇantaḥ kapayas tataḥ

saṃjātāḥ phalinā ''namra-rociṣṇu-druma-sadravaḥ.

bhramara kulā ''kulolbaṇa-sugandhi-puṣpa-tarus taruṇa-madhūka-sambhava-piśaṅgita-tuṅga-śikhaḥ

śikhara-śilā 'ntarāla-parikwxlqqpta-jalā 'vasaraḥ sa-rasa-phala-śriyaṃ sa vitatāna suvela-giriḥ.

saṃvādbhiḥ sa-kusuma-reṇubhiḥ samīrai- rānamrair bahu-phala-dhāribhir vanā 'ntaiḥ

ścyotadbhir madhu-paṭalaiś ca vānarāṇām āpyāno ripu-vadha-sambhavaḥ pramodaḥ

āyāntyaḥ sva-phala-bhareṇa bhaṅguratvaṃ bhṛṅgā''lī-nicaya-citā latās tarūṇām

sā ''modāḥ kṣiti-tala-saṃsthitā'valopyā bhokt ṇāṃ ṣramamadayaṃ na nītavatyaḥ.

Bhk_22

tato rāmo hanūmantamuktavān hṛṣṭa-mānasam

"ayodhyāṃ śvaḥ prayātāsi kape ! bharata-pālitām.

gādhitāse nabho bhūyaḥ sphuṭan-megha-ghaṭā''vali,

īkṣitāse 'mbhasāṃ patyuḥ payaḥ śiśira-śīkaram.

sevitāse plavaṅga ! tvaṃ mahendrā 'dreradhityakāḥ

vyutkrānta-vartmano bhānoḥ saha-jyotsnā-kumudvatīḥ.

candana-druma-saṃcchannā nirākṛta-hima-śrathāḥ

darśitāras tvayā tāś ca malayopatyakāḥ śubhāḥ.

pratanvyaḥ komalā vindhye sahitāraḥ syadaṃ na te

latāḥ stabaka-śālinyo madhulehi-kulā''kulāḥ.

draṣṭāsi prīti-mānārāt sakhibhiḥ saha sevitām

sa-pakṣapātaṃ kiṣkindhāṃ pūrva-krīḍāṃ smaran muhuḥ.

tvayā sandarśitārau te mālyavad-daṇḍakā-vane,

upadrutaś ciraṃ dvandvair yayoḥ kliśitavānaham.

āptārau bhavatā ramyāvāśramau hariṇā ''kulau

puṇyodaka-dvijā''kīrṇau sutīkṣṇa-śarabhaṅgayoḥ

atikrāntā tvayā ramyaṃ duḥkhamatres tapo-vanam,

pavitra-citrakūṭe 'drau tvaṃ sthātāsi kutūhalāt.

tataḥ paraṃ bharadvājo bhavatā darśitā muniḥ,

draṣṭāraś ca janāḥ punyā yāmunā'mbukṣatāṃ'hasaḥ.

syantvā syantvā divaḥ śambhor- mūrdhni skantvā bhuvaṃ gatām

gāhitāse 'tha puṇyasya gaṅgāṃ mūrtimiva drutām.

tamasāyā mahā-nīla-pāṣāṇa-sadṛśa-tviṣaḥ

vanā 'ntāt bahu mantāse nāgarā''krīḍa-śākhinaḥ.

nagara-strī-stana-nyasta-dhauta-kuṅkuma-piñjarām

vilokya sarayūṃ ramyāṃ gantā 'yodhyā tvayā purī.

ānanditāras tvāṃ dṛṣṭvā praṣṭāraś cāvayoḥ śivam

mātaraḥ saha maithilyā, toṣṭā ca bharataḥ param.

ākhyātāsi hataṃ śatrumabhiṣiktaṃ vibhīṣaṇam,

sugrīvaṃ cā 'rjitaṃ mitraṃ, sarvāṃś cā''gāmukān drutam

gantāraḥ paramāṃ prītiṃ paurāḥ ṣrutvā vacas tava,

jñātvaitat sammukhīnaś ca sametā bharato dhruvam.

gate tvayi pathā 'nena vayamapyaṃhitāsmahe,

labdhāhe 'haṃ dhṛtiṃ prāpte bhūyo bhavati sammukhe.

gate tasmin gṛhītā 'rthe rāmaḥ sugrīva-rākṣasau

uktavān śvo 'bhigantāstho yuvāṃ saha mayā puram.

draṣṭāsthas tatra tisro me māt s tuṣṭa'ntarā''tmanaḥ

āntyantīnaṃ sakhi-tvaṃ ca prāptāstho bharatā ''śrayam.

naivaṃ viraha-duḥkhena vayaṃ vyāghānitāsmahe,

śramo nubhavitā naivaṃ bhavadbhyāṃ ca viyoga-jaḥ,

evaṃ yuvāṃ mama prītyai kalptāsthaḥ kapi-rākṣasau !

gantuṃ prayatitāsāthe prātaḥ saha mayā yadi.

utkavantau tato rāmaṃ vacaḥ paulastya-vānarau

anugraho 'yaṃ kākutstha ! gantāsvo yat tvayā saha.

anumantāsvahe nā''vāṃ bhavantaṃ virahaṃ tvayā

api prāpya surendra-tvaṃ, kiṃ nu prattaṃ, tvayā ''spadam.

tataḥ kathābhiḥ samatītya doṣā- māruhya sainyaiḥ saha puṣpakaṃ te

samprasthitā vega-vaśāda-gādhaṃ prakṣobhayantaḥ salilaṃ payodheḥ.

setuṃ, mahendraṃ, malayaṃ sa-vindhyaṃ, sa-mālyavantaṃ girimṛṣyamūkam,

sa-daṇḍakā'raṇya-vātīṃ ca pampāṃ rāmaḥ priyāyāḥ kathayan jagāma.

ete te muni-jana-maṇḍitā digantāḥ, śailo'yaṃ lulita-vanaḥ sa citrakūṭaḥ,

gaṅgeyaṃ su-tanu-! viśāla-tīra-ramyā, maithilyā raghu-tanayo diśan nananda.

śiñjāna-bhramara-kulā''kulā'gra-puṣpāḥ śītā-'mbhaḥ-pravilaya-saṃplavā 'bhilīnāḥ

ete te su-tanu ! purī-janopabhogyā dṛśyante nayana-manoramā vanā 'ntāḥ.

sthānaṃ naḥ pūrva-jānāmiyamadhikamasau preyasī pūrayodhyā, dūrādālokyate yā huta-vividha-haviḥ- prīṇitā 'śeṣa-devā,

so 'yaṃ deśo, rudantaṃ pura-janamakhilaṃ yatra hitvā prayātau āvāṃ sīte ! vanā 'ntaṃ saha dhṛta-dhṛtinā lakṣmaṇena kṣapā'nte.

tūryāṇāmatha niḥsvanena sakalaṃ lokaṃ samāpūrayan vikrāntaiḥ kariṇāṃ girīndra-sadṛśāṃ kṣmāṃ kampayan sarvataḥ

sā ''nandā 'śru-vilocanaḥ prakṛtibhiḥ sārdhaṃ sahā 'ntaḥ puraḥ samprāpto bharataḥ sa-mārutiralaṃ namraḥ samaṃ mātṛbhiḥ

atha sa-sambhrama-paura-janā ''vṛto bharata-pāṇi-dhṛtojjvala-cāmaraḥ

guru-jana-dvija-bandyabhinanditaḥ praviśati sma puraṃ raghu-nandanaḥ.

pravidhāya dhṛtiṃ parāṃ janānāṃ yuva-rājaṃ bharataṃ tato'bhiṣicya

jaghaṭe turagā'dhvareṇa yaṣṭuṃ kṛta-sambhāra-vidhiḥ patiḥ prajānām.

idamadhigata-mukti-mārga-citraṃ vivadiṣatāṃ vadatāṃ ca san-nibandhāt

janayati vijayaṃ sadā janānāṃ yudhi susamāhitamaiśvaraṃ yathā 'stram.

dīpa-tulyaḥ prabandho 'yaṃ śabda-lakṣaṇa-cakṣuṣām

hastā 'marṣa ivā 'ndhānāṃ bhaved vyākaraṇādṛte.

vyākhyā-gamyamidaṃ kāvya- mutsavaḥ su-dhiyāmalam,

hatā dur-meghasaś cā 'smin vidvat-priya-tayā mayā.

kāvyamidaṃ vihitaṃ mayā valabhyāṃ śrīdharasena-nerandra-pālitāyām,

kīrtirato bhavatān nṛpasya, tasya prema-karaḥ kṣiti-po yataḥ prajānām.

This e-text was provided to GRETIL in good faith that no copyright rights have been infringed. If anyone wishes to assert copyright over this file, please contact the GRETIL management at
gretil(at)sub(dot)uni-goettingen(dot)de. The file will be immediately removed pending resolution of the claim.

Distributed under a Creative Commons Attribution-NonCommercial-ShareAlike 4.0 International License.

Notes: Distributed under a Creative Commons Attribution-NonCommercial-ShareAlike 4.0 International License (https://creativecommons.org/licenses/by-nc-sa/4.0/)
Holder of rights: Göttingen Register of Electronic Texts in Indian Languages (GRETIL), SUB Göttingen

Citation Suggestion for this Object: TextGrid Repository (2022). 1_sanskr. tei. sa_bhaTTi-rAvaNavadha. GRETIL. Göttingen Register of Electronic Texts in Indian Languages (GRETIL), SUB Göttingen. https://hdl.handle.net/21.T11991/0000-001C-93B8-C