TextGrid Repository

yénedáṃ bhūtáṃ bhúvanaṃ bhaviṣyát párigṛhītam amṛ́tena sárvam,

yéna yajñás tāyáte saptáhótā tan me mánaś śivásaṃkalpam astu.

yéna kármāṇy apáso manīṣíṇo yajñé kṛṇvánti vidátheṣu dhī́rāḥ,

yád apūrváṃ yyakṣám antáḥ prajānāṃ tán me mánaś śivásaṃkalpam astu,

yát prajñā́nam utá céto dhṛ́tiś ca yaj jyótir antár amṛ́taṃ prajā́su,

yásmān ná ṛté kíṃ caná kárma kriyáte tán me mánaś śivásaṃkalpam astu.

yáj jā́grato dūrám udaíti daívaṃ tád u suptásya táthaivaíti,

dūraṃgamáṃ jyótiṣāṃ jyótir ékaṃ tán me mánaś śivásaṃkalpam astu.

yásmin ṛ́cas sā́ma yájūṃṣi yásmin prátiṣṭhitā rathanābhā́v ivārā́ḥ

yásmiṃś cittáṃ sárvam ótam prajānāṃ tán me mánaś śivásaṃkalpam astu.

suṣārathír áśvān iva yán manuṣyā́n nenīyátebhī́śubhir vājína iva

hṛtprátiṣṭhaṃ yyád ajiráṃ jáviṣṭhaṃ tán me mánaś śivásaṃkalpam astu.

yád átra ṣaṣṭháṃ triśatáṃ śarīráṃ yajñásya gúhyaṃ návanā́bham ā́dyam,

dáśa pañcatriṃśátaṃ yyát paráṃ ca tán me mánaś śivásaṃkalpam astu.

yé páñca pañcā́ daśatáṃ śatáṃ ca sahásraṃ ca niyútaṃ nyárbudaṃ ca,

te yajñacittéṣṭakāttáṃ śárīraṃ tán me mánaś śivásaṃkalpam astu.

védāhám etáṃ púruṣaṃ mahā́ntam ādityávarṇaṃ támasaḥ parástāt,

tásya yóniṃ paripaśyanti dhī́rās tán me mánaś śivásaṃkalpam astu.

yéna kármāṇi prácaranti dhīrā víprā vācā́ mánasā kármaṇā ca,

saṃvvídam ánu sáṃyyanti prāṇínas tán me mánaś śivásaṃkalpam astu.

yé máno hṛ́dayaṃ yyé ca devā́ yé antárikṣe bahudhā́ cáranti,

yé śrotráṃ cakṣúṣī sáṃcaranti tán me mánaś śivásaṃkalpam astu.

yéna dyaúr ugrā́ pṛthivī́ cāntárikṣaṃ yé párvatāḥ pradíśo díśaś ca,

yénedáṃ jágad vyā́ptaṃ prajā́nāṃ tán me mánaś śivásaṃkalpam astu.

yénedáṃ sárvaṃ jágato babhūvúr yé devā́ ápi maható jātávedāḥ,

tád evā́gnitápaso jyotír ékaṃ tán me mánaś śivásaṃkalpam astu.

acintyaṃ cāprameyaṃ ca vyaktāvyaktaparaṃ ca yat,

sūkṣmāt sūkṣmataraṃ jñānaṃ tán me mánaḥ śivasaṃkalpam astu.

asti vināśayitvā sarvam idaṃ nāsti punas tathaivā dṛṣṭaṃ dhruvaṃ,

asti nāsti hitaṃ madhyamaṃ padaṃ tan me manaḥ śivasaṃkalpam astu.

asti nāsti viparīto pravāho'sti nāsti sarvaṃ vā idaṃ guhyam,

asti nāsti parāt paro yat paraṃ tan me manaḥ śivasaṃkalpam astu.

parāt parataraṃ yasya tatparāc caiva tat paraṃ,

tatparāt paratojñeyaṃ tan me manaḥ śivasaṃkalpam astu.

parāt parataro brahma tatparāt parato hariḥ,

tatparāt parato hy eṣa tan me manaḥ śivasaṃkalpam astu.

gobhir juṣṭo dhanena hy āyuṣā ca balena ca,

prajayā paśubhiḥ puṣkalādyaṃ tan me manaḥ śivasaṃkalpam astu.

prayataḥ praṇavo nityaṃ paramaṃ puruṣottamaṃ,

oṃkāraṃ param ātmānaṃ tan me manaḥ śivasaṃkalpam astu.

yo vai vedādiṣu gāyatrī sarvavyāpī maheśvaraḥ,

yad dviruktaṃ tathādvyaiśyaṃ tan me manaḥ śivasaṃkalpam astu.

yo vai veda mahādevam paramaṃ puruṣottamaṃ,

yaḥ sarvaṃ yasya cit sarvaṃ tan me manaḥ śivasaṃkalpam astu.

yo'sau sarveṣu vedeṣu pathate hy aja īśvaraḥ,

akāyo nirguṇo dhyātvā tan me manaḥ śivasaṃkalpam astu.

kailāśaśikhare ramye śaṃkarasya śubhe gṛhe,

devatās tatra modyanti tan me manaḥ śivasaṃkalpam astu.

kailāśaśikharābhāsā hi bhavad girisaṃsthitāḥ,

nīlakaṇṭhaṃ trinetraṃ ca tan me manaḥ śivasaṃkalpam astu.

ābrahmastambaparyantaṃ trailokyaṃ sacarācaram,

utpātitaṃ jagad vyāptaṃ tan me manaḥ śivasaṃkalpam astu.

ya imaṃ śivasaṃkalpam sadā dhyāyanti brāhmaṇāḥ,

te paramokṣaṃ gamiṣyanti tan me manaḥ śivasaṃkalpam astu.

tryambakaṃ yajāmahe sugandhiṃ puṣṭivarddhanaṃ,

urvārukam iva bandhanān mṛtyor mukṣīya māmṛtāt tan me manaḥ śivasaṃkalpam astu.

This e-text was provided to GRETIL in good faith that no copyright rights have been infringed. If anyone wishes to assert copyright over this file, please contact the GRETIL management at
gretil(at)sub(dot)uni-goettingen(dot)de. The file will be immediately removed pending resolution of the claim.

Distributed under a Creative Commons Attribution-NonCommercial-ShareAlike 4.0 International License.

Notizen: Distributed under a Creative Commons Attribution-NonCommercial-ShareAlike 4.0 International License (https://creativecommons.org/licenses/by-nc-sa/4.0/)
Rechtsinhaber*in: Göttingen Register of Electronic Texts in Indian Languages (GRETIL), SUB Göttingen

Zitationsvorschlag für dieses Objekt: TextGrid Repository (2022). 1_sanskr. tei. sa_zivasaMkalpopaniSad. GRETIL. Göttingen Register of Electronic Texts in Indian Languages (GRETIL), SUB Göttingen. https://hdl.handle.net/21.T11991/0000-001C-8C35-9