|| namo ratnatrayāya ||
sarvadoṣavinirmuktaṃ guṇaiḥ sarvair alaṃkṛtaṃ |
praṇamya sarvajñam ahaṃ sarvasattvaikabāndhavaṃ || RATNA_01.01
dharmam ekāntakalyāṇaṃ rāja [ n dha ] rmodayāya te |
vakṣyāmi dharmaḥ siddhiṃ hi yāti saddharmabhājane || RATNA_01.02
prāg dharmābhyudayo yatra paścān naiḥśreyasodayaḥ |
samprāpyābhyudayaṃ yasmād eti naiḥśreyasaṃ kramāt || RATNA_01.03
sukham abhyudaya [ s tatra mokṣo ] naiḥśreyaso mataḥ |
asya sādhanasaṃkṣepaḥ śraddhāprajñe samāsataḥ || RATNA_01.04
śrāddhatvād bhajate dharmaṃ prājñatvād vetti tattvataḥ |
prajñā pradhānaṃ tv anayoḥ śraddhā pūrvaṅgamāsya tu || RATNA_01.05
chandād dveṣād bhayān mohād yo dharmaṃ nātivartate |
sa śrāddha iti vijñeyaḥ śreyaso bhājanaṃ param || RATNA_01.06
kāyavāṅmānasaṃ karma sarvaṃ samyak parīkṣya yaḥ |
parātmahitam ājñāya sadā kuryāt sa paṇḍitaḥ || RATNA_01.07
ahiṃsā cauryaviratiḥ paradāravivarjanam |
mithyāpaiśunyapāruṣyābaddhavādeṣu saṃyamaḥ || RATNA_01.08
lobhavyāpādanāstik [ yadṛṣṭīnāṃ parivarjanaṃ |
ete karmapathā ] śuklā daśa kṛṣṇā viparyayāt || RATNA_01.09
amadyapānaṃ svājīvo 'vihiṃsā dānam ādarāt |
pūjyapūjā ca maitrī ca dharmaś caiṣa samāsataḥ || RATNA_01.10
śarīratāpanād dharmaḥ kevalān [ nāsti tena hi ] |
[ 2,a ] na paradrohaviratir na pareṣām anugrahaḥ || RATNA_01.11
dānaśīlakṣamāspaṣṭaṃ yaḥ saddharmamahāpatham |
anādṛtya vrajet kāyakleśago daṇḍakotpathaiḥ || RATNA_01.12
sa saṃsārāṭavīṃ ghorām anantajanapādapām |
kleśavyālāvalīḍhāṅgaḥ sudīrghaṃ pratipadyate || RATNA_01.13
hiṃsayā jāyate 'lpāyuḥ bahvābādho vihiṃsayā |
cauryeṇa bhogavyasanī saśa [ truḥ ] paradārikaḥ || RATNA_01.14
pratyākhyānaṃ mṛṣāvādāt paiśunyāt mitrabhedanam |
apriyaśravaṇaṃ raukṣyād abāddhād durbhagaṃ vacaḥ || RATNA_01.15
manorathān hanty abhidhyā vyāpādo bhayadaḥ smṛtaḥ |
mithyādṛṣṭiḥ kudṛṣṭitvaṃ madyapānaṃ matibhramaḥ || RATNA_01.16
apradānena dāridryaṃ mithyājivena vañcanā |
stambhena duḥkuḷīnatvam alpaujaskatvam īrṣayā || RATNA_01.17
krodhād durvarṇatā maurkhyam apraśnena vipaścitām |
phalam etan manuṣyatve sarvebhyaḥ prāk ca durgatiḥ || RATNA_01.18
esāṃ akuśalākhyānāṃ vipāko yaḥ prakīrtitaḥ |
kuśalānāṃ ca sarveṣāṃ viparītaḥ phalodayaḥ || RATNA_01.19
lobho dveṣaś ca mohas ca tajjaṃ karmeti cāśubham |
alobhāmohādveṣāś ca tajjaṃ karmetarac chubhaṃ || RATNA_01.20
aśubhāt sarvaduḥkhāni sarvadurgatayas tathā |
śubhāt sugatayaḥ sarvāḥ sarvajanmasukhāni ca || RATNA_01.21
nivṛttir [ 2,b ] aśubhāt kṛtsnāt pravṛttis tu śubhe sadā |
manasā karmaṇā vācā dharmo 'yaṃ dvividhaḥ smṛtaḥ || RATNA_01.22
narakapretatiryagbhyo dharmād asmād vimucyate |
nṛṣu deveṣu cāpnoti sukhaśrīrājyavistarān || RATNA_01.23
dhyānāpramāṇārūpyais tu brahmādyasukham aśnute |
ityabhyudayadharmo 'yaṃ phalaṃ cāsya samāsataḥ || RATNA_01.24
naiḥśreyasaḥ punar dharmaḥ sūkṣmo gambhīradarśanaḥ |
bālānāṃ [ aśrotravatām ] uktas trāsakāro jinaiḥ || RATNA_01.25
nāsmy ahaṃ na bhaviṣyāmi na me 'sti na bhaviṣyati |
iti bālasya santrāsaḥ paṇḍitasya bhayakṣayaḥ || RATNA_01.26
ahaṃkāraprasūteyaṃ mamakāropasaṃhitā |
prajā prajāhitaikāntavādinā 'bhihitā khila || RATNA_01.27
asty ahaṃ mama cāstīti mithyaitat paramārthataḥ |
yathābhūtaparijñānān na bhavaty ubhayam yataḥ || RATNA_01.28
ahaṃkārodbhavāḥ skandhāḥ so 'haṃkāro 'nṛto 'rthataḥ |
bījaṃ yasyānṛtaṃ tasya prarohaḥ satyataḥ kutaḥ || RATNA_01.29
skandhān asatyān dṛṣṭvaivam ahaṃkāraḥ prahīyate |
ahaṃkāraprahāṇāc ca na punaḥ skandhasaṃbhavaḥ || RATNA_01.30
yathādarśam upādāya [ svamukhapratibimbakam |
dṛśya ] te nāma tac caivam na kiṃcid api tattvataḥ || RATNA_01.31
ahaṃkāras tathā skandhān upādāyopalabhyate |
na ca kaścit sa tattvena svamukhapratibimbavat || RATNA_01.32
yathādarśam anādāya svamukhapratibimbakam |
na dṛśyate tathā skandhān [ 3,a ] anādāyāham ity api || RATNA_01.33
evaṃvidhārthaśravaṇād dharmacakṣur avāptavān |
āryānanandaḥ svayaṃ caiva bhikṣubhyo 'bhīkṣṇam uktavān || RATNA_01.34
skandhagrāho yāvad asti tāvad evāham ity api |
ahaṃkāre sati punaḥ karma janma tataḥ punaḥ || RATNA_01.35
trivartmaitad anādyantamadhyaṃ saṃsāramaṇḍalaṃ |
alātamaṇḍalaprakhyaṃ bhramaty anyonyahetukaṃ || RATNA_01.36
svaparobhayatas tasya traikālyato 'py aprāptitaḥ |
ahaṃkāraḥ kṣayaṃ yāti tataḥ karma ca janma ca || RATNA_01.37
evaṃ hetuphalotpādaṃ paśyaṃs tatkṣayaṃ eva ca |
nāstitām astitāṃ caiva naiti lokasya tattvataḥ || RATNA_01.38
sarvaduḥkhakṣayaṃ dharmaṃ śrutvaivam aparīkṣakaḥ |
saṃkampaty aparijñānād abhayasthānakātaraḥ || RATNA_01.39
na bhaviṣyati nirvāṇe sarvam etan na te bhayam |
ucyamāna ihābhāvas tasya te kiṃ bhayaṃkaraḥ || RATNA_01.40
mokṣe nātmā na ca skandhā mokṣaś ced īdṛṣaḥ priyaḥ |
ātmaskandhāpanayanaṃ kim ihaiva tavāpriyaṃ || RATNA_01.41
na cābhāvo 'pi nirvāṇaṃ kuta eva tasya bhāvatā |
bhāvābhāvaparāmarśakṣayo nirvāṇam ucyate || RATNA_01.42
samāsān nāstitādṛṣṭiḥ phalaṃ nāstīti karmaṇaḥ |
apuṇyāpāyikī caiṣā mithyādṛṣṭir iti smṛtā || RATNA_01.43
samāsād astitādṛṣtiḥ phalaṃ cāstīti karmaṇām |
puṇyā sugatiniṣyandā samyagdṛṣṭir iti smṛtā || RATNA_01.44
jñāne [ 3,b ] nāstyastitāśānteḥ pāpapuṇyavyatikramaḥ |
durgateḥ sugateś cāsmāt sa mokṣah sadbhir ucyate || RATNA_01.45
sahetum udayaṃ paśyan nāstitām ativartate |
astitām api nopaiti nirodhaṃ saha hetunā || RATNA_01.46
prāgjātaḥ sahajātaś ca hetur ahetuko 'rthataḥ |
prajñapter apratītatvād utpatteś caiva tattvataḥ || RATNA_01.47
asmin satīdaṃ bhavati dīrghe hrasvaṃ yathā sati |
[ tasyotpādād udetīdaṃ dīpotpādād yathā ] prabhā || RATNA_01.48
hrasve 'sati punar dīrghaṃ na bhavati svabhāvataḥ |
pradīpasyāpy anutpādāt prabhāyā apy asaṃbhavaḥ || RATNA_01.49
evaṃ hetuphalotpādaṃ dṛṣtvā nopaiti nāstikyaṃ |
abhyupetyāsya lokasya yāthābhūtyaṃ prapañcajam || RATNA_01.50
nirodhaṃ ca prapañcotthaṃ yāthābhūtyād upāgataḥ |
nopayāty astitāṃ tasmān mucyate 'dvayaniśritaḥ || RATNA_01.51
durād ālokitaṃ rūpam āsannair dṛśyate sphuṭam |
marīcir yadi vāri syād āsannaiḥ kiṃ na dṛśyate || RATNA_01.52
dūrībhūtair yathābhūto loko 'yaṃ dṛśyate tathā |
na dṛśyate tadāsannair animitto marīcivat || RATNA_01.53
[ marīcis toyasadṛśī yathā nāmbo na ] cārthataḥ |
skandhās tathātmasadṛśā natmāno nāpi te 'rthataḥ || RATNA_01.54
mariciṃ toyam ity etad iti matvāgato 'tra san |
yadi nāstīti tat toyaṃ [ gṛhṇīyān mūḍha eva saḥ || RATNA_01.55
marīcipratimaṃ lo ] kam [ 4,a ] evam astīti gṛhṇataḥ |
nāstīti cāpi moho 'yaṃ sati mohe na mucyate || RATNA_01.56
nāstiko durgatiṃ yāti sugatiṃ yāti cāstikaḥ |
yathābhūtaparijñānān mokṣam advayaniśritaḥ || RATNA_01.57
anicchan nāstitāstitve yathābhūtaparijñayā |
nāstitāṃ labhate mohāt kasmān na labhate 'stitāṃ || RATNA_01.58
syād astidūṣaṇād asya nāstitākṣipyate 'rthataḥ |
nāstitādūṣanād eva kasmān nākṣipyate 'stitā || RATNA_01.59
na pratijñā na caritaṃ na cittaṃ bodhiniśrayāt |
nāstikatve 'rthato yeṣāṃ kathaṃ te nāstikāḥ smṛṭāḥ || RATNA_01.60
sasāṃkhyaulūkyanirgranthapudgalaskandhavādinam |
pṛccha lokaṃ yadi vadaty astināstivyatikramam || RATNA_01.61
dharmayautakam ity asmān nāstyastitvavyatikramam |
viddhi gaṃbhīram ity uktaṃ buddhānāṃ śāsanāmṛtam || RATNA_01.62
vibhavaṃ naiti nāyāti na tiṣṭhaty api cakṣaṇam |
traikālyavyativṛttātmā loka eva kuto 'rthataḥ || RATNA_01.63
dvayor apy āgatigatī prasthitiś ca na tattvataḥ |
lokanirvāṇayos tasmād viśeṣaḥ ka ivārthataḥ || RATNA_01.64
sthiter abhāvād udayo nirodhaś ca na tattvataḥ |
uditaḥ sthitaś ceti niruddhaś ca kuto 'rthataḥ || RATNA_01.65
katham aksaṇiko bhāvaḥ pariṇāmaḥ sadā yadi |
nāsti cet pariṇāmaḥ syād anyathātvaṃ kuto 'rthataḥ || RATNA_01.66
ekadeśe [ 4,b ] kṣayād vā syāt kṣaṇikaṃ sarvaśo 'pi vā |
vaiṣamyānupalabdheś ca dvidhāpy etad ayuktimat || RATNA_01.67
kṣaṇike sarvathā bhāvet kutaḥ kācit purāṇatā |
sthairyād akṣaṇike cāpi kutaḥ kācit purāṇatā || RATNA_01.68
yathānto 'sti kṣaṇasyaivam ādir madhyaṃ ca kalpyatām |
tryātmakatvāt kṣaṇasyaivaṃ na lokasya kṣaṇaṃ sthitiḥ || RATNA_01.69
ādimadhyāvasānāni c [ intyāni kṣaṇavat punaḥ |
ādimadhyā ] vasānatvaṃ na svataḥ parato 'pi vā || RATNA_01.70
naiko 'nekapradeśatvān nāpradeśaś ca kaścana |
vinaikam api nāneko nāstitvam api cāstitām || RATNA_01.71
vināśāt pratipakṣād vā syād astitvasya nāstitā |
vināśaḥ pratipakṣo vā kathaṃ syād astyasaṃbhavāt || RATNA_01.72
nirvṛtes tena lokasya nopaity ūnatvam arthataḥ |
antavān iti lokaś ca pṛṣṭas tuṣṇīṃ jino 'bhavat || RATNA_01.73
sarvajña iti sarvajño budhais tenaiva gamyate |
yenaitad dharmagāmbhīryaṃ novācābhājane loke || RATNA_01.74
iti naiḥśreyaso dharmo gambhīro niṣparigrahaḥ |
anālaya ity proktaḥ saṃbuddhais tattvadarśibhiḥ || RATNA_01.75
asmād anālayād dharmād ālayābhiratā janāḥ |
astināstyavyatikrantā bhītā naśyanty amedhasaḥ || RATNA_01.76
te naṣṭā nāśayanty anyān abhayasthānabhīravaḥ |
tathā kuru yathā rājan naṣṭair na vipranāśyase || RATNA_01.77
[ 6a ] kadalī pāṭitā yadvan niḥśeṣāvayavaiḥ saha |
na kiṃcit puruṣas tadvat pāṭitaḥ saha dhātubhiḥ || RATNA_02.01
sarvadharmā anātmāna ity ato bhāṣitaṃ jinaiḥ |
dhātuṣaṭkaṃ ca taiḥ sarvaṃ nirṇītaṃ tac ca nārthataḥ || RATNA_02.02
naivam ātmā na cānātmā yāthābhūtyena labhyate |
ātmānātmakṛtadṛṣṭī varvārāsmān mahāmuniḥ || RATNA_02.03
dṛṣṭaśruṭādyaṃ muninā na satyaṃ na mṛṣoditaṃ |
pakṣāddhi pratipakṣaḥ syād ubhayaṃ tac ca nārthataḥ || RATNA_02.04
iti satyānṛtātīto loko 'yaṃ paramārthataḥ |
asmād eva ca tattvena nopaity asti ca nāsti ca || RATNA_02.05
yac caivaṃ sarvathā neti sarvajñas tat kathaṃ vadet |
sāntam ity athavānantaṃ dvayaṃ vādvayam eva vā || RATNA_02.06
asaṃkhyeyā gatā buddhās tathaiṣyanty atha sāṃpratāḥ |
koṭyagraśaś ca sattvāntas tebhyas traikālyajo mataḥ || RATNA_02.07
vṛddhihetur na lokasya kṣayas traikālyasambhavaḥ |
sarvajñena kathaṃ tasya pūrvānto 'vyākṛtaḥ kṛtaḥ || RATNA_02.08
etat tu dharmagāmbhīryaṃ yat tad guhyaṃ pṛthagjane |
māyopamatvaṃ lokasya buddhānāṃ śāsanāmṛtaṃ || RATNA_02.09
māyāgajasya dṛśyeta yathā janmānta eva ca |
na ca kaścit sa tattvena janmāntaś caiva vidyate || RATNA_02.10
māyopamasyalokasya tathā janmānta eva ca |
dṛśyate paramārthena na ca janmānta eva ca || RATNA_02.11
yathā māyāgajo naiti kutaścid yāti [ 6b ] na kvacit |
cittamohanamātratvād bhāvatvena na tiṣṭhati || RATNA_02.12
tathā māyopamo loko naiti yāti na kutracit |
cittamohanamātratvād bhāvatvena na tiṣṭhati || RATNA_02.13
traikālyavyativṛttātmā loka evaṃ nu ko 'rthataḥ |
yo 'sti nāsty athavāpi syād anyatra vyavahārataḥ || RATNA_02.14
catuṣprakāram ity asmāt sānto 'nanto dvayo 'dvayaḥ |
buddhena hetor nānyasmād ayam avyākṛtaḥ kṛtaḥ || RATNA_02.15
śarīrāśucitā tāvan sthūlā pratyakṣagocarā |
satataṃ dṛśyamānāpi yadā citte na tiṣṭhati || RATNA_02.16
tadātisūkṣmo gambhīraḥ saddharmo 'yaṃ anālayaḥ |
apratyakṣaḥ kathaṃ citte sukhenāvatariṣyati || RATNA_02.17
sambudhyāsmān nirvṛtto 'bhūd dharmaṃ deśayituṃ muniḥ |
durjñānam atigāmbhiryāj jñātvā dharmam imaṃ janaiḥ || RATNA_02.18
vināśayati durjñāto dharmo 'yam avipaścitaṃ |
nāstitādṛṣṭisamale yasmād asmin nimajjati || RATNA_02.19
aparo 'py asya durjñānān mūrkhaḥ paṇḍitamānikaḥ |
pratikṣepavinaṣṭātmā yāty avīcim adhomukhaḥ || RATNA_02.20
durbhuktena yathānnena vināśam adhigacchati |
subhuktenāyur ārogyaṃ balaṃ saukhyāni cāśnute || RATNA_02.21
durjñātena tathānena vināśam adhigacchati |
samyagjñātenātra sukhaṃ bodhiṃ cāpnoty anuttarāṃ || RATNA_02.22
tasmād atra pratikṣepaṃ dṛṣṭiṃ tyaktvā ca nāstikīṃ |
saṃyagjñānaparaṃ yatnaṃ kuru [ 7a ] sarvārthasiddhaye || RATNA_02.23
dharmasyāsyāparijñānād ahaṃkāro 'nuvartate |
tataḥ śubhāśubhaṃ karma tato janma śubhāśubhaṃ || RATNA_02.24
tasmād yāvad avijñāto dharmo 'haṃkāraśātanaḥ |
dānaśīlakṣamādharme tāvad ādaravān bhava || RATNA_02.25
dharmapūrvāṇi kāryāṇi dharmamadhyāni pārthiva |
sādhayan dharmaniṣṭhāni neha nāmutra sīdati || RATNA_02.26
dharmāt kīrtiḥ sukhaṃ caiva neha bhīr na mumūrṣataḥ |
paralokasukhaṃ sphītaṃ tasmād dharmaṃ sadā bhaja || RATNA_02.27
dharma eva parā nītir dharmāl loko 'nurajyate |
rañjitena hi lokena neha nāmutra vañcyate || RATNA_02.28
adharmeṇa tu yā nītis tayā loko 'parajyate |
lokāparañjanāc caiva neha nāmutra nandati || RATNA_02.29
parātisandhānaparā kaṣṭā durgatipaddhatiḥ |
anarthavidyā duṣprajñair arthavidyā kathaṃ kṛtā || RATNA_02.30
parātisandhānaparo nītimān katham arthataḥ |
yena janmasahasrāṇi bahūny ātmaiva vañcyate || RATNA_02.31
ripor apriyam anvicchan dosāṃs tyaktvā guṇān śraya |
svahitāvāptir eva tu ripos cāpy apriyaṃ bhavet || RATNA_02.32
dānena priyavadyena hitenaikāthacaryayā |
ebhir ācara lokasya dharmasyaiva ca saṅgrahaṃ || RATNA_02.33
viśvāsaṃ janayaty ekaṃ satyaṃ rājñāṃ yathā dṛḍhaṃ |
tathaivābhūtam apy eṣām aviśvāsakaraṃ paraṃ || RATNA_02.34
nāvisaṃvādavat satyaṃ [ sattve ] [ 7b ] odgataṃ arthataḥ |
paraikāntahitaṃ satyam ahitatvān mṛṣetarat || RATNA_02.35
doṣān pracchādayaty ekas tyāgo rājñāṃ yathojjvalaḥ |
tathā kārpaṇyam apy eṣāṃ guṇasarvasvaghātakaṃ || RATNA_02.36
upaśāntasya gāmbhīryaṃ gāmbhīryād gauravaṃ paraṃ |
gauravād dīptir ājñā ca tasmād upaśamaṃ bhaja || RATNA_02.37
ahāryabuddhiḥ prājñatvād aparapratyayaḥ sthiraḥ |
nātisandhīyate rājā tasmāt prajñāparo bhava || RATNA_02.38
satyatyāgaśamaprajño caturbhadro narādhipaḥ |
dharmaś caturbhadra iva stūyate devamānuṣaiḥ || RATNA_02.39
nigṛhyavādibhiḥ śuddhaiḥ prajñākāruṇyanirmalaiḥ |
sahāsīnasya satataṃ prajñā dharmaś ca varddhate || RATNA_02.40
durlabhāḥ pathyavaktāraḥ śrotāras tv atidurlabhāḥ |
tebhyo 'tidurlabhatamā ye pathyasyāśu kāriṇaḥ || RATNA_02.41
pathyam apy apriyaṃ tasmāj jñātvā śīghraṃ samācara |
pibed auṣadham apy ugram ārogyāyātmavān iva || RATNA_02.42
jīvitārogyarājyānāṃ cintayānityatāṃ sadā |
tataḥ saṃvegavān dharmam ekāntena prayāsyase || RATNA_02.43
avaśyaṃ maraṇaṃ paśyan pāpād duḥkhaṃ mṛtasya ca |
aihikena sukhenāpi na pāpaṃ kṣātum arhasi || RATNA_02.44
kasmiṃś ced abhayaṃ dṛṣṭaṃ bhayaṃ dṛṣṭaṃ kvacit kṣaṇe |
yady ekasmin samāśvāsaḥ kim ekasmin na te bhayaṃ || RATNA_02.45
madyāt paribhavo loke kāryahānir dhanakṣayaḥ |
akāryakāraṇam mohāt [ madyam tyaja tataḥ sadā ] || RATNA_02.46
[ 15a ] adharmam anyāyyam api prāyo rājā 'nujīvibhiḥ |
ācaran stūyate tasmāt kṛcchrād vetti kṣamā 'kṣamaṃ || RATNA_04.01
anyo 'pi tāvad yaḥ kaścid durvacaḥ kṣamam apriyam |
kimu rājā mahābhaumas tvaṃ mayā bhikṣuṇā satā || RATNA_04.02
tvatkṛtād eva tu snehāj jagatām anukampayā |
aham eko vadāmi tvāṃ pathyam apy apriyaṃ bhṛśaṃ || RATNA_04.03
satyaṃ ślakṣṇārthavat pathyaṃ śiṣyaḥ kāle 'nukampayā |
vācya ity āha bhagavāṃs tad evam abhidhīyase || RATNA_04.04
akrodhe satyavākye ca ślāghyamāṇo yadi sthitaḥ |
śravyaṃ samparigṛhṇīyāt sattoyaṃ snāpyamānavat || RATNA_04.05
tasya me vadato vākyaṃ tvam ihāmutra ca kṣamaṃ |
jñātvā kuru hitāyedam ātmano jagato 'pi ca || RATNA_04.06
yācakebhyaḥ purā dānāt prāpyārthāṃś cen na dāsyasi |
akṛtajñatvalobhābhyāṃ nārthān punar avāpsyasi || RATNA_04.07
iha pathy adanaṃ loke na vahaty abhṛto bhṛtaḥ |
yācakas tv abhṛto 'mutra hīnaḥ śataguṇadvahaḥ || RATNA_04.08
udāracittaḥ satataṃ bhavodārakriyārataḥ |
udārakarmaṇaḥ sarvam udāraṃ jāyate phalam || RATNA_04.09
manorathair api klībair anālīḍhaṃ narādhipaiḥ |
kuru dharmāspadaṃ śrīmat khyātaṃ ratnatrayāspadam || RATNA_04.10
sāmantarājaromāñcakaraṃ dharmāspadaṃ na yat |
mṛtyasyāpy apraśasyatvād rājaṃs tad akṛtaṃ varam || RATNA_04.11
atyaudāryād [ 15b ] udārāṇāṃ vismayotsāhavardhaṇam |
utsāhaghnaṃ ca mandānāṃ sarvasvenāpi kāraya || RATNA_04.12
utsṛjyāmutra gantavyaṃ sarvasvam avaśena te |
dharme niyuktaṃ yāty eva purastāt sarvam eva tat || RATNA_04.13
sarvasvaṃ pūrvanṛpateḥ nṛpasya vaśam āgataṃ |
kiṃ pūrvakasya dharmāya sukhāya yaśase 'pi vā || RATNA_04.14
bhuktād arthād iha sukhaṃ dattāt pāratrikaṃ sukham |
abhuktādattanaṣṭatvād duḥkham eva kutaḥ sukhaṃ || RATNA_04.15
vinaśyan sacivair dātum asvātantryān na śakyasi |
āpatichedaniḥsnehair navarājapriyaiṣibhiḥ || RATNA_04.16
sarvasvenāpy ataḥ svasthaḥ śīghraṃ dharmāspadaṃ kuru |
mṛtyupratyayamadhyasthaḥ pravātasthapradīpavat || RATNA_04.17
dharmādhikārā ye cānye pūrvarājapravartitāḥ |
devadroṇyādayas te 'pi pravartyantāṃ yathā sthitāḥ || RATNA_04.18
ahiṃsakaiḥ śubhācārair vratasthair atithipriyaiḥ |
sarvakṣamair akalahair bhajyeraṃs taiḥ sado(dya)taiḥ || RATNA_04.19
andhavyādhitahīnāṅgadīnānāthavanīpakāḥ |
te 'py annapānaṃ sāmyena labherann avighaṭṭitāḥ || RATNA_04.20
anarthīnām api satāṃ dhārmikāṇāṃ anugrahān |
apy anyarājyasaṃsthānām anurūpān pravarttaya || RATNA_04.21
sarvadharmādhikāreṣu dharmādhikṛtam utthitaṃ |
alubdhaṃ paṇḍitaṃ dharmyaṃ kuru teṣām abādhakaṃ || RATNA_04.22
nītijñān dhārmikān snigdhān śucīn bhaktān akātarān |
kulinān śīlasampannān [ 16a ] kṛtajñān sacivān kuru || RATNA_04.23
akṣudrāṃs tyāginaḥ śūrān snigdhān sambhoginaḥ sthirān |
kuru nityāpramattāṃs ca dhārmikān daṇḍanāyakān || RATNA_04.24
dharmaśīlān śucīn dakṣān kāryajñān śāstrakovidān |
kṛtavṛttīn samān snigdhān vṛddhān adhikṛtan kuru || RATNA_04.25
pratimāsaṃ ca tebhyas tvaṃ sarvam āyavyayaṃ śṛṇu |
śrutvā dharmādhikārādyaṃ kāryaṃ sarvaṃ svayaṃ vada || RATNA_04.26
dharmārthaṃ yadi te rājyaṃ na kīrtyarthaṃ na kāmataḥ |
tataḥ saphalam atyartham anarthārtham ato 'nyathā || RATNA_04.27
parasparāmiṣībhūte loke 'smin prāyaśo nṛpa |
yathā rājyaṃ ca dharmaś ca bhavet tava tathā śṛṇu || RATNA_04.28
jñānavṛddhā kule jātā nyāyajñāḥ pāpabhīravaḥ |
sametā bahavo nityaṃ santu te kāryadarśinaḥ || RATNA_04.29
daṇḍabandhaprahārādīn kuryus te nyāyato 'pi cet |
kārunyārdraḥ sadā bhūtvā tvam anugrahavān bhava || RATNA_04.30
hitāyaiva tvayā cittam unnāmyaṃ sarvadehinām |
kāruṇyāt satataṃ rājaṃs tīvrapāpakṛtām api || RATNA_04.31
tīvrapāpeṣu hiṃsreṣu kṛpā kāryā viśeṣataḥ |
ta eva hi kṛpāsthānam hatāmāno mahātmanām || RATNA_04.32
pratyahaṃ pañcarātram vā baddhān kṣīnān vimocaya |
śeṣān api yathāyogaṃ mā kāṃścit naiva mocaya || RATNA_04.33
yeṣv amokṣaṇacittaṃ te jāyate teṣv asaṃvaraḥ |
tasmād asaṃvarāt pāpam ajasram upacīyate || RATNA_04.34
[ 16b ] yāvac ca na vimucyeraṃs tāvat syuḥ sukhabandhanāḥ |
nāpitasnānapānānnabhaiṣajyavasanānvitāḥ || RATNA_04.35
apātreṣv iva putreṣu pātrīkaraṇakāṅkṣayā |
kāruṇy [ āt tāḍanam kāryaṃ na dveṣān ] nārthalipsayā || RATNA_04.36
vimṛśya saṃyag vijñāya praduṣṭān ghātakān api |
ahatvā 'pīḍayitvā ca kuru nirviṣayān narān || RATNA_04.37
svatantraḥ paśya sarvaṃ ca viṣayaṃ cāracakṣuṣā |
nityāpramattaḥ smṛtimān kuru kāryaṃ ca dhārmikaṃ || RATNA_04.38
pradānamānasatkārair guṇasthān satataṃ bhaja |
udārair anurūpais tu śeṣān api yathāvidhi || RATNA_04.39
sammānasphītakusumaḥ sampradānamahāphalaḥ |
rājavṛkṣaḥ kṣamācchāyaḥ sevyate bhṛtyaprakṣibhiḥ || RATNA_04.40
tyāgaśīlamayo rājā tejasvī bhavati priyaḥ |
śarkarāmodako yadvad elāmaricakarkaśaḥ || RATNA_04.41
mātsyanyāyaś ca te naivaṃ nyāyād rājyaṃ bhaviṣyati |
na cānyāyo na vā 'dharmo dharmaś caivaṃ bhaviṣyati || RATNA_04.42
paralokāt tvayā rājyaṃ nānītaṃ nāpi neṣyasi |
dharmāt prāptam ato 'syārthe nādharmaṃ kartum arhasi || RATNA_04.43
rājyena bhāṇḍamūlyena duḥkhabhāṇḍaparamparām |
rājan yathā nārjayasi prayatnaḥ kriyatāṃ tathā || RATNA_04.44
rājyena bhāṇḍamūlyena rājyabhāṇḍaparamparāṃ |
rājan yathā nirviśasi prayatnaḥ kriyatāṃ tathā || RATNA_04.45
caturdvīpām api prāpya pṛthivīṃ cakravartinaḥ [ 17a ] |
śārīraṃ mānasaṃ caiva sukhadvayam idaṃ matam || RATNA_04.46
duḥkhapratikriyāmātraṃ śārīraṃ vedanāsukhaṃ |
saṃjñāmayaṃ mānasaṃ tu kevalaṃ kaplpanākṛtaṃ || RATNA_04.47
duḥkhapratikriyāmātraṃ kalpanāmātram eva ca |
lokasya sukhasarvasvaṃ vyartham etad ato 'rthataḥ || RATNA_04.48
dvīpadeśapurāvāsapradeśasānavāsasāṃ |
śayyā 'nnapānahastyastyaśvastrīṇāṃ caikaikabhogyatā || RATNA_04.49
yadā ca yatra cittaṃ syāt tadānena sukhaṃ kila |
śeṣāṇām amanaskārāt teṣāṃ vyarthatvam arthataḥ || RATNA_04.50
viṣayān pañcabhiḥ pañca cakṣurādibhir indriyaiḥ |
na kalpayati yed gṛhṇan nāsmāt teṣu tadā sukhaṃ || RATNA_04.51
jānīte viṣayaṃ yaṃ yaṃ yena yenendriyeṇa ca |
tadā na śeṣaiḥ śeṣāṇi vyarthāny eva yatas tadā || RATNA_04.52
indriyair upalabdhasya viṣayasyākṛtiṃ manaḥ |
upalabhya vyatītasya kalpayan manyate sukhaṃ || RATNA_04.53
ekam arthaṃ vijānāti yady apy ekam ihendriyaṃ |
tad apy arthaṃ vinā vyarthaṃ vyartho 'rtho 'pi ca tad vinā || RATNA_04.54
pratītya mātāpitarau yathoktaḥ putrasambhavaḥ |
cakṣūrūpe pratītyaivam ukto vijñānasaṃbhavah || RATNA_04.55
atītānāgatā vyarthāḥ viṣayāḥ sārdham indriyaiḥ |
taddvayānatiriktatvād vyarthā ye 'pi ca sāmpratāḥ || RATNA_04.56
alātacakraṃ gṛhṇāti yathā cakṣur viparyayāt |
tathendriyāṇi [ 17b ] gṛhṇanti viṣayān sāmpratān iva || RATNA_04.57
indriyāṇīndriyārthāś ca pañcabhūtamayā matāḥ |
pratisvaṃ bhūtavaiyarthyād eṣāṃ vyarthatvam arthataḥ || RATNA_04.58
nirindhano 'gnir bhūtānāṃ vinirbhāge prasajyate |
saṃparke lakṣaṇābhāvaḥ śeṣeṣv apy eṣa nirṇayaḥ || RATNA_04.59
evaṃ dvidhāpi bhūtānāṃ vyarthatvāt saṅgatir vṛthā |
vyarthatvāt saṅgateś caivaṃ rūpaṃ vyartham ato 'rthataḥ || RATNA_04.60
vijñānavedanāsaṃjñāsaṃskārāṇām ca sarvaśaḥ |
pratyekam ātmavaiyarthyād vaiyarthyaṃ paramārthataḥ || RATNA_04.61
sukhābhimāno duḥkhasya pratīkāre yathārthataḥ |
tathā duhkhābhimāno 'pi sukhasya pratighātajaḥ || RATNA_04.62
sukhe saṃyogatṛṣṇaivaṃ naiḥsvābhāvyāt prahīyate |
duḥkhe viyogatṛṣṇā ca paśyatāṃ muktir ity ataḥ || RATNA_04.63
kaḥ paśyatīti cec cittaṃ vyavahāreṇa kathyate |
na hi caittaṃ vinā cittaṃ vyarthatvān na saheṣyate || RATNA_04.64
vyartham evaṃ jagan matvā yāthābhūtyān nirāspadaḥ |
nirvāti nirupādāno nirupādānavahnivat || RATNA_04.65
bodhisattvo 'pi dṛṣṭvaivaṃ sambodhau niyato mataḥ |
kevalaṃ tv asya kāruṇyād ābodher bhavasaṃtatiḥ || RATNA_04.66
bodhisattvasya saṃbhāro mahāyāne tathāgataiḥ |
nirdiṣṭaḥ sa tu sammūḍhaiḥ pradviṣṭaiś caiva nindyate || RATNA_04.67
guṇadoṣānabhijño vā doṣasaṃjñī guṇeṣu vā |
athavāpi guṇadveṣī mahāyānasya nindakaḥ || RATNA_04.68
paropaghātino [ 18a ] doṣān parānugrahiṇo guṇān |
jñātvocyate guṇadveṣī mahāyānasya nindakaḥ || RATNA_04.69
yat svārthanirapekṣatvāt parāthaikarasapriyaṃ |
guṇākaraṃ mahāyānaṃ tad dveṣī tena dahyate || RATNA_04.70
śrāddho 'pi durgṛhītena dviṣyāt kruddho 'thavetaraḥ |
śrāddho 'pi dagdha ity uktaḥ kā cintā dveṣabandhure || RATNA_04.71
viṣeṇāpi viṣaṃ hanyād yathaivoktaṃ cikitsakaiḥ |
duḥkhenāpy ahitaṃ hanyād ity ukte kiṃ virudhyate || RATNA_04.72
manaḥpūrvaṅgamā dharmā manaḥśreṣṭhā iti śruteḥ |
hitaṃ hitamanāḥ kurvan duḥkenāpy ahitaṃ kathaṃ || RATNA_04.73
duḥkham apy āyatīpathyaṃ kāryaṃ kimu sukhaṃ hitaṃ |
ātmanaś ca pareṣāṃ ca dharma eṣa sanātanaḥ || RATNA_04.74
mātrāsukhaparityāgāt paścāc ced vipulaṃ sukhaṃ |
tyajen mātrāsukhaṃ dhīraḥ saṃpaśyan vipulaṃ sukhaṃ || RATNA_04.75
na mṛṣyate ca yady etat kaṭubhaiṣajyadāyinaḥ |
tataś cikitsakādyāś ca hatā naivaṃ ca yujyate || RATNA_04.76
apathyam api yad dṛṣṭaṃ tat pathyaṃ paṇḍitaiḥ kvacit |
utsargaś cāpavādaś ca sarvaśāstreṣu śaṃsyate || RATNA_04.77
karuṇāpūrvakāḥ sarve niṣyandā jñānanirmalāḥ |
uktā yatra mahāyāne kas tan nindet sacetanaḥ || RATNA_04.78
atyaudāryātigāmbhīryād viṣaṇṇair akṛtātmabhiḥ |
nindyate 'dya mahāyānaṃ mohāt svaparavairibhiḥ || RATNA_04.79
dānaśīlakṣamāvīryadhyānaprajñākṛpātmakaṃ [ 18b ] |
mahāyānam atas tasmin kasmād durbhāṣitaṃ vacaḥ || RATNA_04.80
parārtho dānaśīlābhyāṃ kṣāntyā vīryeṇa cātmanaḥ |
dhyānaṃ prajñā ca mokṣāya mahāyānārthasaṃgrahaḥ || RATNA_04.81
parā [ tmahita ] mokṣārthāḥ saṃkṣepād buddhaśāsanaṃ |
te saṭpāramitāgarbhās tasmād bauddham idaṃ vacaḥ || RATNA_04.82
puṇyajñānamayo yatra buddhair bodher mahāpathaḥ |
deśitas tan mahāyānam ajñānād vai na dṛśyate || RATNA_04.83
kham ivācintyaguṇatvād ukto 'cintyaguṇo jinaḥ |
mahāyāne yato buddhamāhātmyaṃ kṣamyatām idam || RATNA_04.84
āryaśāradvatasyāpi śīlamātre 'py agocaraḥ |
yasmāt tad buddhamāhātmyam acintyaṃ kiṃ na mṛṣyate || RATNA_04.85
anutpādo mahāyāne pareṣāṃ śūnyātā kṣayaḥ |
kṣayānutpādāyoś caikyam arthataḥ kṣamyatāṃ yataḥ || RATNA_04.86
śūnyatābuddhamāhātmyam evaṃ yuktyānupaśyatāṃ |
mahāyānetaroktāni na sameyuḥ kathaṃ satāṃ || RATNA_04.87
tathāgatābhisandhyoktāny asukhaṃ jñātum ity ataḥ |
ekayānatriyānoktād ātmā rakṣya upekṣayā || RATNA_04.88
upekṣayā hi nāpuṇyam dveṣāt pāpaṃ kutaḥ śubhaṃ |
mahāyāne yato dveṣo nātmakāmaiḥ kṛto 'rhati || RATNA_04.89
na bodhisattvapraṇidhir na caryāpariṇāmanā |
uktāḥ śrāvakayāne 'smād bodhisattvaḥ kutas tataḥ || RATNA_04.90
adhiṣṭhānāni noktāni [ 19a ] bodhisattvasya bodhaye |
buddhair anyat pramāṇaṃ ca ko 'smin arthe jinādhikaḥ || RATNA_04.91
adhiṣṭānāryasatyārthabodhipakṣopasaṃhitāt |
mārgāc chrāvakasāmānyād bauddhaṃ kenādhikaṃ phalaṃ || RATNA_04.92
bodhicaryāpratiṣṭhārthaṃ na sūtre bhāṣitaṃ vacaḥ |
bhāṣitaṃ ca mahāyāne grāhyam asmād vicakṣaṇaiḥ || RATNA_04.93
yathaiva vaiyākaraṇo mātṛkām api pāṭhayet |
buddho 'vadat tathā dharmaṃ vineyānāṃ yathākṣamaṃ || RATNA_04.94
keṣāṃcid avadad dharmaṃ pāpebhyo vinivṛttaye |
keṣāṃcit puṇyasiddhyarthaṃ keṣāṃcid dvayaniḥśritaṃ || RATNA_04.95
dvayāniśritam ekeṣāṃ gāmbhīraṃ bhīrubhīṣaṇaṃ |
śūnyatākaruṇāgarbham ekeṣāṃ bodhisādhanaṃ || RATNA_04.96
iti sadbhir mahāyāne kartavyaḥ pratighakṣayaḥ |
prasādaś cādhikaḥ kāryaḥ saṃyaksaṃbodhisiddhaye || RATNA_04.97
mahāyānaprasādena taduktācaraneṇa ca |
prāpyate 'nuttarā bodhiḥ sarvasaukhyāni cāntarā || RATNA_04.98
dānaśīlakṣamāsatyaṃ gṛhasthasya viśeṣataḥ |
dharma uktaḥ kṛpāgarbhaḥ sa sātmīkriyatāṃ dṛḍhaṃ || RATNA_04.99
atha lokasya vaidharmyād rājyaṃ dharmeṇa duṣkaraṃ |
tato dharmayaśo 'rthaṃ te prayujyādhigamaḥ kṣamaḥ || RATNA_04.100
ratnāvalyām rājavṛttopadeśe nāma caturthaḥ paricchedaḥ |
