pratītyajānāṃ bhāvānāṃ naiḥsvābhāvyaṃ jagāda yaḥ |
taṃ namāmy asamajñānam acintyam anidarśanam || NagAst_01
yathā tvayā mahāyāne dharmanairātmyam ātmanā |
viditaṃ deśitaṃ tadvad dhīmadbhyaḥ karuṇāvaśāt || NagAst_02
pratyayebhyaḥ samutpannam anutpannaṃ tvayoditam |
svabhāvena na taj jātam iti śūnyaṃ prakāśitam || NagAst_03
yadvac chabdaṃ pratītyeha pratiśabdasamudbhavaḥ |
māyāmarīcivac cāpi tathā bhavasamudbhavaḥ || NagAst_04
māyāmarīcigandharvanagarapratibimbakāḥ |
yady ajātāḥ saha svapnair na syāt taddarśanādikam || NagAst_05
hetupratyayasaṃbhūtā yathaite kṛtakāḥ smṛtāḥ |
tadvat pratyayajaṃ viśvaṃ tvayoktaṃ nātha sāṃvṛtam || NagAst_06
asty etat kṛtakaṃ sarvaṃ yat kiṃcid bālalāpanam |
riktamuṣṭipratīkāśam ayathārthaprakāśitam || NagAst_07
kṛtakaṃ vastu no jātaṃ tadā kiṃ vārtamānikam |
kasya nāśād atītaṃ syād utpitsuḥ kim apekṣate || NagAst_08
svasmān na jāyate bhāvaḥ parasmān nobhayād api |
na san nāsan na sadasan kutaḥ kasyodayas tadā || NagAst_09
ajāte na svabhāvo 'sti kutaḥ svasmāt samudbhavaḥ |
svabhāvābhāvasiddhyaiva parasmād apy asaṃbhavah || NagAst_10
svatve sati paratvaṃ syāt paratve svatvam iṣyate |
āpekṣikī tayoḥ siddhiḥ pārāvāram ivoditā || NagAst_11
yadā nāpekṣate kiṃ cit kutaḥ kiṃ cit tadā bhavet |
yadā nāpekṣate dīrghaṃ kuto hrasvādikaṃ tadā || NagAst_12
astitve sati nāstitvaṃ dīrghe hrasvaṃ tathā sati |
nāstitve sati cāstitvaṃ yat tasmād ubhayaṃ na sat || NagAst_13
ekatvaṃ ca tathānekam atītānāgatādi ca |
saṃkleśo vyavadānaṃ ca samyaṅmithyā svataḥ kutaḥ || NagAst_14
svata eva hi yo nāsti bhāvaḥ sarvo 'sti kas tadā |
para ity ucyate yo 'yaṃ na vinā svasvabhāvataḥ || NagAst_15
na svabhāvo 'sti bhāvānāṃ parabhāvo 'sti no yadā |
bhāvagrahagrahāveśaḥ paratantro 'sti kas tadā || NagAst_16
ādāv eva samaṃ jātāḥ svabhāvena ca nirvṛtāḥ |
anutpannāś ca tattvena tasmād dharmās tvayoditāḥ || NagAst_17
niḥsvabhāvās tvayā dhīman rūpādyāḥ saṃprakāśitāḥ |
phenabudbudamāyābhramarīcikadalīsamāḥ || NagAst_18
indriyair upalabdhaṃ yat tat tattvena bhaved yadi |
jātās tattvavido bālās tattvajñānena kiṃ tadā || NagAst_19
jaḍatvam apramāṇatvam athāvyākṛtatām api |
viparītaparijñānam indriyānāṃ tvam ūcivān || NagAst_20
ajñānenāvṛto yena yathāvan na prapadyate |
lokas tena yathābhūtam iti matvā tvayoditam || NagAst_21
astīti śāśvatī dṛṣtir nāstīty ucchedadarśanam |
tenāntadvayanirmukto dharmo 'yaṃ deśitas tvayā || NagAst_22
catuṣkoṭivinirmuktās tena dharmās tvayoditāḥ |
vijñānasyāpy avijñeyā vācāṃ kim uta gocarāḥ || NagAst_23
svapnendrajālikodbhūtaṃ dvicandrodvīkṣaṇaṃ yathā |
bhūtaṃ tadvastu no bhūtaṃ tathā dṛṣṭaṃ jagat tvayā || NagAst_24
utpannaś ca sthito naṣṭaḥ svapne yadvat sutas tathā |
na cotpannaḥ sthito naṣṭa ukto loko 'rthatas tvayā || NagAst_25
kāraṇāt saṃbhavo dṛṣṭo yathā svapne tathetaraḥ |
saṃbhavaḥ sarvabhāvānāṃ vibhavo 'pi matas tathā || NagAst_26
rāgādijaṃ yathā duḥkhaṃ saṃkleśasaṃsṛtī tathā |
saṃbhārapūraṇān muktiḥ svapnavad bhāṣitā tvayā || NagAst_27
jātaṃ tathaiva no jātam āgataṃ gatam ity api |
baddho muktas tathā jñānī dvayam icchen na tattvavit || NagAst_28
utpattir yasya naivāsti tasya kā nirvṛtir bhavet |
māyāgajaprakāśatvād ādiśāntatvam arthataḥ || NagAst_29
utpanno 'pi na cotpanno yadvan māyāgajo mataḥ |
utpannaṃ ca tathā viśvam anutpannaṃ ca tattvataḥ || NagAst_30
ameyair aprameyānāṃ pratyekaṃ nirvṛtiḥ kṛtā |
lokanāthair hi sattvānāṃ na kaś cin mocitaś ca taiḥ || NagAst_31
te ca sattvāś ca no jātā ye nirvānti na te sphuṭam |
na kaś cin mocitaḥ kaiś cid iti proktaṃ mahāmune || NagAst_32
māyākārakṛtaṃ yadvad vastuśūnyaṃ tathetarat |
vastuśūnyaṃ jagat sarvaṃ tvayoktaṃ kārakas tathā || NagAst_33
kārako 'pi kṛto 'nyena kṛtatvaṃ nātivartate |
atha vā tatkriyākartṛ kārakasya prasajyate || NagAst_34
nāmamātraṃ jagat sarvam ity uccair bhāṣitaṃ tvayā |
abhidhānāt pṛthagbhūtam abhidheyaṃ na vidyate || NagAst_35
kalpanāmātram ity asmāt sarvadharmāḥ prakāśitāḥ |
kalpanāpy asatī proktā yayā śūnyaṃ vikalpyate || NagAst_36
bhāvābhāvadvayātītam anatītaṃ ca kutra cit |
na ca jñānaṃ na ca jñeyaṃ na cāsti na ca nāsti yat || NagAst_37
yan na caikaṃ na cānekaṃ nobhayaṃ na ca nobhayam |
anālayam athāvyaktam acintyam anidarśanam || NagAst_38
yan nodeti na ca vyeti nocchedi na ca śāśvatam |
tad ākāśapratīkāśaṃ nākṣarajñānagocaram || NagAst_39
yaḥ pratītyasamutpādaḥ śūnyatā saiva te matā |
tathāvidhaś ca saddharmas tatsamaś ca tathāgataḥ || NagAst_40
tat tattvaṃ paramārtho 'pi tathatā dravyam iṣyate |
bhūtaṃ tad avisaṃvādi tadbodhād buddha ucyate || NagAst_41
buddhānāṃ sattvadhātoś ca tenābhinnatvam arthataḥ |
ātmanaś ca pareṣāṃ ca samatā tena te matā || NagAst_42
bhāvebhyaḥ śūnyatā nānyā na ca bhāvo 'sti tāṃ vinā |
tasmāt pratītyajā bhāvās tvayā śūnyāḥ prakāśitāḥ || NagAst_43
hetupratyayasaṃbhūtā paratantrā ca saṃvṛtiḥ |
paratantra iti proktaḥ paramārthas tv akṛtrimaḥ || NagAst_44
svabhāvaḥ prakṛtis tattvaṃ dravyaṃ vastu sad ity api |
nāsti vai kapito bhāvo paratantras tu vidyate || NagAst_45
astīti kalpite bhāve samāropas tvayoditaḥ |
nāstīti kṛtakocchedād ucchedaś ca prakāśitaḥ || NagAst_46
tattvajñānena nocchedo na ca śāśvatatā matā |
vastuśūnyaṃ jagat sarvaṃ marīcipratimaṃ matam || NagAst_47
mṛgatṛṣṇājalaṃ yadvan nocchedi na ca śāśvatam |
tadvat sarvaṃ jagat proktaṃ nocchedi na ca śāśvatam || NagAst_48
dravyam utpadyate yasya tasyocchedādikaṃ bhavet |
antavān nāntavāṃś cāpi lokas tasya prasajyate || NagAst_49
jñāne sati yathā jñeyaṃ jñeye jñānaṃ tathā sati |
yatrobhayam anutpannam iti buddhaṃ tadāsti kim || NagAst_50
iti māyādidṛṣtāntaiḥ sphuṭam uktvā bhiṣagvaraḥ |
deśayām āsa saddharmaṃ sarvadṛṣṭicikitsakam || NagAst_51
etat tat paramaṃ tattvaṃ niḥsvabhāvārthadeśanā |
bhāvagrahagṛhītānāṃ cikitseyam anuttarā || NagAst_52
dharmayājñika tenaiva dharmayajño niruttaraḥ |
abhīkṣṇam iṣṭas trailokye niṣkapāṭo nirargalaḥ || NagAst_53
vastugrāhabhayocchedī kutīrthyamṛgabhīkaraḥ |
nairātmyasiṃhanādo 'yam adbhuto naditas tvayā || NagAst_54
śūnyatādharmagambhīrā dharmabherī parāhatā |
naiḥsvābhāvyamahānādo dharmaśaṅkhaḥ prapūritaḥ || NagAst_55
dharmayautukam ākhyātaṃ buddhānāṃ śāsanāmṛtam |
nītārtham iti nirdiṣṭaṃ dharmāṇāṃ śūnyataiva hi || NagAst_56
yā tūtpādanirodhādisattvajīvādideśanā |
neyārthā ca tvayā nātha bhāṣitā saṃvṛtiś ca sā || NagAst_57
prajñāpāramitāmbhodher yo 'tyantam pāram āgataḥ |
sa puṇyaguṇaratnāḍhyas tvadguṇārṇavapāragaḥ || NagAst_58
iti stutvā jagannātham acintyam anidarśanam |
yad avāptaṃ mayā puṇyaṃ tenāstu tvatsamaṃ jagat || NagAst_59

|| ity acintyastavaḥ samāptaḥ ||

%%%%%%%%%%%%%%%%%%%%%%%%%%%%%%%%%%%%%%%%%%%%%%

Copyright (C) 2003 by Chr. Lindtner - Denmark

%%%%%%%%%%%%%%%%%%%%%%%%%%%%%%%%%%%%%%%%%%%%%%

This e-text was provided to GRETIL in good faith that no copyright rights have been infringed. If anyone wishes to assert copyright over this file, please contact the GRETIL management at
gretil(at)sub(dot)uni-goettingen(dot)de. The file will be immediately removed pending resolution of the claim.

Distributed under a Creative Commons Attribution-NonCommercial-ShareAlike 4.0 International License.
Notizen
Distributed under a Creative Commons Attribution-NonCommercial-ShareAlike 4.0 International License (https://creativecommons.org/licenses/by-nc-sa/4.0/)
Rechtsinhaber*in
Göttingen Register of Electronic Texts in Indian Languages (GRETIL), SUB Göttingen
Zitationsvorschlag für dieses Objekt
TextGrid Repository (2022). 1_sanskr. tei. sa_nAgArjuna-acintyastava. GRETIL. Göttingen Register of Electronic Texts in Indian Languages (GRETIL), SUB Göttingen. https://hdl.handle.net/21.T11991/0000-001C-946D-1