Note: 1. Gilgit Manuscript Majumder, Prabhas Chandra (1959), Ārya Maitreya-vyākaraṇam, Calcutta (also published in Nalinaksha Dutt, Gilgit Manuscripts, vol. IV, Calcutta 1959, pp. xxix ff. and 185 ff., under P.C. Mazumder). The first folios of the Skt. text containing verses 1-30 are missing. All the sandhis are standardized.
(daśa māsāṃś ca) nikhilān dhārayitvā mahādyutim
supuṣpite 'smin udyāne maitreyajananī tataḥ //
na niṣaṇṇā nipannā vā sthitā sā dharmacāriṇī
drumasya śākhām ālambya maitreyaṃ janayiṣyati //
alipto garbhapaṅkena kuśeśayam ivāmbunā
traidhātukam idaṃ sarvaṃ prabhayā pūrayiṣyati //
prīto 'tha taṃ sahasrākṣo devarājā śacīpatiḥ
jāyamānaṃ grahītā sa maitreyaṃ dvipadottamam //
padāni jātamātraś ca saptāsau prakramiṣyati
pade pade nidhanaṃ ca padmaṃ padmaṃ bhaviṣyati //
diśaś catasraś codvīkṣya vācaṃ pravyāhariṣyati
iyaṃ me paścimā jātir nāsti bhūyaḥ punarbhavaḥ
na punar abhyāgamiṣyāmi nirvāsyāmi nirāsravaḥ //
saṃsārārṇavamagnānāṃ sattvānāṃ duḥkhabhāginām
tṛṣṇābandhanabaddhānāṃ kariṣyāmi vimocanam //
śvetaṃ cāsya surāś chattraṃ dhārayiṣyanti mūrdhani
śītoṣṇavāridhārābhyāṃ nāgendrau snāpayiṣyataḥ //
pratigṛhya ca taṃ dhātrī dvātriṃśadvaralakṣaṇam
śriyā jvalantaṃ maitreyaṃ mātre samupaneṣyati //
manoramāṃ ca śivikāṃ nānāratnavibhuṣitām
ārūḍhāṃ putrasahitāṃ vahiṣyanti ca devatā //
tatas tūryasahasreṣu vādyamāneṣu tatpuram
praviṣṭamātre maitreye puṣpavarṣaṃ patiṣyati //
dṛṣṭvaivaṃ putraṃ subrahmā dvātriṃśadvaralakṣaṇam
pratyavīkṣātha mantreṣu tadā prīto bhaviṣyati //
gatidvayaṃ kumārasya yathā mantreṣu dṛśyate
narādhipaś cakravartī buddho vā dvīpadottamaḥ //
sa ca yauvanasaṃprāpto maitreyāḥ puruṣottamaḥ
cintayiṣyati dharmātmā duḥkhitā khalv iyāṃ prajāḥ //
brahmasvaro mahāghoṣo hemavarṇo mahādyutiḥ
viśālavakṣāḥ pīnāṅsaḥ padmapattranibhekṣaṇaḥ //
hastaḥ pañcāśad ucchrāya tasya kāyo bhaviṣyati
visṛtaś ca tato 'rddhena śubhavarṇasamucchrayaḥ //
aśītibhiś caturbhiś ca sahasraiḥ saṃpuraskṛtaḥ
māṇavānāṃ sa maitreyo mantrān adhyāpayiṣyati //
atha śaṅkho narapatiḥ yūpam ucchrāpayiṣyati
tiryañ ca ṣoḍaśavyāmam ūrdhvaṃ vyāmasahasrakam //
sa taṃ yūpaṃ narapatir nānāratnavibhūṣitam
pradāsyati dvijātibhyo yajñaṃ kṛtvā puraḥsaram
saptaratnamayaṃ yūpaṃ brāhmaṇebhyaḥ pradāsyati //
taṃ ca ratnamayaṃ yūpaṃ dattamātraṃ manoramam
brāhmaṇānāṃ sahasrāṇi vikiriṣyanti tatkṣaṇāt //
yūpasya tasya maitreyo dṛṣṭvā caitām anityatām
kṛtsnaṃ vicintya saṃsāraṃ pravrajyāṃ rocayiṣyati //
yatv ahaṃ pravrajitveha spṛśeyam amṛtaṃ padam
vimocayeyaṃ janatāṃ vyādhimṛtyujarābhayāt //
aśītibhiḥ sahasraiḥ sa caturbhiś ca puraskṛtaḥ
niṣkramiṣyati maitreyaḥ pravrajyām agrapudgalaḥ //
nāgavṛkṣas tadā tasya bodhivṛkṣo bhaviṣyati
pañcāśadyojanāny asya śākhā ūrdhvaṃ samucchritāḥ //
niṣadya tasya cādhastān maitreyo puruṣottamaḥ
anuttarāṃ śivāṃ bodhiṃ samavāpsyati nāyakaḥ //
yasyām eva ca rātrau sa pravrajyāṃ niṣkramiṣyati
tasyām eva ca rātrau hi parāṃ bodhim avāpsyati //
aṣṭāṅgopetayā vācā tataḥ sa puruṣottamaḥ
deśayiṣyati saddharmaṃ sarvaduḥkhāpahaṃ śivam //
prasannāṃ janatāṃ dṛṣṭvā satyāni kathayiṣyati
duḥkhaṃ duḥkhasamutpādaṃ duḥkhasya samatikramam //
āryaṃ cāṣṭāṅgikaṃ mārgaṃ kṣemaṃ nirvāṇagāminam
taṃ cāpi dharmaṃ saṃśrutya pratipatsyanti śāsane //
udyāne puṣpasaṃcchanne sannipāto bhaviṣyati
pūrṇaṃ ca yojanaśataṃ parṣat tasya bhaviṣyati //
śrutvā narapati rājā śaṅkho nāma mahāyaśāḥ
dattvā dānam asaṃkhyeyaṃ pravrajyāṃ niṣkramiṣyati //
aśītibhiś caturbhiś ca sahasraiḥ parivāritaḥ
narādhipo viniṣkramya pravrajyām upayāsyati //
anenaiva pramāṇena mānavānāṃ puraskṛtaḥ
maitreyasya pitā tatra pravrajyām niṣkramiṣyati //
tato gṛhapatis tatra sudhano nāma viśrutaḥ
pravrajiṣyati śuddhātmā maitreyasyānuśasane //
strīratnam atha śaṅkhasya viśākhā nāma viśrutā
aśītibhiś caturbhiś ca sahasraiḥ saṃpuraskṛtā
nārīṇāṃ abhiniṣkramya pravrajyām rocayiṣyati //
prāṇinaḥ tatra samaye sahasrāṇi śatāni ca
pravrajyām upayāsyanti maitreyasyānuśāsane //
supuṣpite 'smin udyāne sannipāto bhaviṣyati
samantato yojanaśataṃ parṣat tasya bhaviṣyati //
tataḥ kāruṇikaḥ śāstā maitreyaḥ puruṣottamaḥ
samitiṃ vyavalokyātha idam arthaṃ pravakṣyati //
sarve te śākyasiṃhena guṇiśreṣṭhena trāyinā
arthato lokanāthena dṛṣṭvā saddharmadhātunā
ropitā mokṣamārgeṇa vikṣiptā mama śāsane //
chattradhvajapatākābhir gandhamālyavilepanaiḥ
kṛtvā stūpeṣu satkāram āgatā hi mamāntikam //
saṅghe dattvā ca dānāni cīvaraṃ pānabhojanam
vividhaṃ glānabhaiṣajyam āgatā hi mamāntikam //
kuṅkumodakasekaṃ ca candanenānulepanam
dattvā śākyamuneḥ stūpeṣv āgatā hi mamāntikam //
śikṣāpadāni cādāya śākyasiṃhasya śāsane
paripālya yathābhūtam āgatā hi mamāntikam //
upoṣadham upoṣyeha āryam aṣṭāṅgikaṃ śubham
caturdaśīṃ pañcadaśīṃ pakṣasyehāṣṭamīṃ tathā
prātihārikapakṣaṃ cāpy aṣṭāṅgaṃ susamāhitam //
śīlāni ca samādāya saṃprāptāni ca śāsanam
buddhaṃ dharmaṃ ca saṅghaṃ ca sattvās te śāsanaṃ gatāḥ
kṛtvā ca kuśalaṃ karma macchāsanam upāgatāḥ //
tenaite preṣitāḥ sattvāḥ pratīṣṭāś ca mayāpy amī
gaṇiśreṣṭheṇa muninā parītā bhūrimedhasā //
prasannāṃ janatāṃ dṛṣṭvā satyāni kathayiṣyati
śrutvā ca te tato dharmaṃ prāpsyanti padam uttamam //
prātihāryatrayeṇāsau śrāvakān vinayiṣyati
sarve te asravās tatra kṣipayiṣyanti suratāḥ //
prathamaḥ sannipāto 'sya śrāvakāṇāṃ bhaviṣyati
pūrṇāḥ ṣaṇnavatikoṭyaḥ śrāvakāṇāṃ bhavacchidām //
dvitīyaḥ sannipāto 'sya śrāvakāṇāṃ bhaviṣyati
pūrṇāś caturnavatiḥ koṭyaḥ śāntānāṃ bhūrimedhasām //
tṛtīyaḥ sannipāto 'sya śrāvakāṇāṃ bhaviṣyati
pūrṇā dvāviṃśatiḥ koṭyaḥ śāntānāṃ śāntacetasām //
dharmacakraṃ pravartyātha vinīya suramānuṣān
sārdhaṃ śrāvakasaṅghena pure piṇḍaṃ cariṣyati //
tataḥ praviśatas tasyāṃ ramyāṃ ketumatīṃ purīm
māndārakāṇi puṣpāni patiṣyanti purottame
devatāḥ prakariṣyanti tasmin puragate munau //
catvāraś ca mahārājāḥ śakraś ca tridaśādhipaḥ
brahmā devagaṇaiḥ sārdhaṃ pūjāṃ tasya kariṣyati //
utpalaṃ kumudaṃ padmaṃ puṇḍarīkaṃ sugandhikam
aguruṃ candanaṃ cāpi divyaṃ mālyaṃ patiṣyati //
cailakṣepaṃ kariṣyanti devaputrā maharddhikāḥ
taṃ lokanātham udvīkṣya praviśantaṃ purottamam //
divyaś ca tūryanirghoṣo divyaṃ mālyaṃ patiṣyati
devatā prakariṣyanti tasmin puragate munau //
ye tu ketumatīṃ ke cid vāsayiṣyanti mānuṣāḥ
te pi taṃ pūjayiṣyanti praviśantaṃ purottamam //
pathi bhūmyāstaraṃ tatra mṛdutūlapicopamam
vicitraṃ ca śubhaṃ mālyaṃ vikiriṣyanti te tadā //
chattradhvajapatākābhir arcayiṣyanti mānuṣāḥ
śubhaiś ca tūryanirghoṣaiḥ prasannamanaso narāḥ //
taṃ ca śakraḥ sahasrākṣo devarājaḥ śacīpatiḥ
prahṛṣṭaḥ prāñjalirbhūtvā maitreyaṃ stoṣyate jinam //
namas te puruṣājanya namas te puruṣottama
anukampasva janatāṃ bhagavann agrapudgala //
maharddhiko devaputras tasya māro bhaviṣyati
sa cāpi prāñjalirbhūtvā stoṣyate lokanāyakam //
śuddhāvāsasahasraiś ca bahubhiḥ parivāritaḥ
pravekṣyate ca maitreyo lokanātho vināyakaḥ //
brāhmaṇaparivāreṇa brahmā cāpi girāsphuṭam
kathayiṣyati saddharmaṃ brahmaṃ ghoṣam udīrayan //
ākīrṇā pṛthivī sarvā arhadbhiś ca bhaviṣyati
kṣīṇāsravair vāntadoṣaiḥ prahīṇabhavabandhanaiḥ //
hṛṣṭā devamanuṣyāś ca gandharvā yakṣarākṣasāḥ
śāstuḥ pūjāṃ kariṣyanti nāgāś cāpi maharddhikāḥ //
te vai nūnaṃ bhaviṣyanti cyānaghāś (?) chinnasaṃcayāḥ
utkṣiptaparikhāḥ dhīrā anādānā nirutsakāḥ
brahmacaryaṃ cariṣyanti maitreyasyānuśasane //
te 'pi nūnaṃ bhaviṣyanti amamā aparigrahāḥ
ajātarūparajatā aniketā asaṃstavāḥ
brahmacaryaṃ cariṣyanti ye maitreyānuśasane //
te vai pānaṃ gamiṣyanti chitvā jālam eva bhujāt
dhyānāni copasaṃpadya prītisaukhyasamanvitāḥ
brahmacaryaṃ cariṣyanti maitreyasyānuśasane //
ṣaṣṭiṃ varṣasahasrāṇi maitreyo dvipadottamaḥ
deśayiṣyati saddharmaṃ śāstā lokānukampayā //
śatāni ca sahasrāṇi prāṇinaṃ sa vināyakaḥ
vinīya dharmakāyena tato nirvāṇam eṣyati //
tasmiṃś ca nirvṛte dhīre maitreye dvipadottame
daśavarṣasahasrāṇi saddharmaḥ sthāsyati kṣitau //
prasādayati cittāni tasmāc chākyamunau jine
tato dṛkṣatha maitreyaṃ saṃbuddhaṃ dvipadottamam //
tasmād dharme ca buddhe ca saṅghe cāpi gaṇottame
prasādayati cittāni bhaviṣyati maharddhikam //
taṃ tādṛśaṃ kāruṇikaṃ maitreyaṃ dvipadottamam
ārādhayitvā kālena tato nirvāṇam eṣyatha //
idam āścaryakaṃ śrutvā dṛṣṭvā ca vibhavānalpikām
ko vidvān na prasīdeta api kṛṣṇāsu jātiṣu //
tasmād ihātmakāmena māhātmyam abhikāṅkṣatāḥ
saddharmo gurukartavyaḥ smaratā buddhaśāsanam //
Maitreyavyākaraṇaṃ samāptam //
Note: 2. Calcutta Manuscript (incomplete), ed. Lévi Sylvain Lévi, "Maitreya le consolateur", Études d'orientalisme publiées par le Musée Guimet a la mémoire de Raymonde Linossier, Paris 1932, pp. 384-389 The first two folios of the Skt. text containing verses 1-25ab are missing. All the sandhis are standardized.
elāpattraś ca gāndhāre śaṅkho vārāṇasīpure //
caturbhir ebhir nidhibhiḥ sa rājā susamanvitaḥ
bhaviṣyati mahāvīraś śatapuṇyabaloditaḥ //
brāhmaṇas tasya rājñaś ca subrāhmaṇaḥ purohitaḥ
bahuśrutaś caturvedas tasyopadhyāyo bhaviṣyati //
adhyāpako mantradharaḥ smṛtimān vedapāragaḥ
kaiṭābhe sa nirghaṇṭe ca padavyākaraṇe tathā //
tadā brahmāvatī nāma tasya bhāryā bhaviṣyati
darśanīyā prāsādikā abhirūpā yaśasvinī //
tuṣitebhyaś cyavitvā tu maitreyo hy agrapudgalaḥ
tasyāḥ kukṣau sa niyataṃ pratisandhiṃ grahīṣyati //
daśa māsāṃś ca nikhilān dhārayitvā mahādyutiḥ
supuṣpite ca udyāne gatvā maitreyamātarā //
na niṣaṇṇā na suptāsau sthitā sā dharmacāriṇī
drumasya śākhām ālambya maitreyaṃ janayiṣyati //
niṣkramiṣyati pārśvena dakṣiṇena narottamaḥ
abhrakūṭād yathā sūryo nirgataś ca prabhāsate //
alipto garbhapaṅkena padmaṃ caiva yathāmbhasā
traidhātukam idaṃ sarvaṃ prabhayā pūrayiṣyati //
atha prītas sahasrākṣo devarājaś śacīpatiḥ
grahīṣyati kumāraṃ taṃ jāyamānaṃ narottamam //
śriyā jvalantaṃ maitreyaṃ dvātriṃśadvaralakṣaṇam
muñca muñca sahasrākṣa jātamātro vadiṣyati //
padāni jātamātras tu saptāsau prakramiṣyati
pade pade nidhanaṃ ca padmaṃ padmaṃ bhaviṣyati //
diśaś catasraś codvīkṣya vācaṃ pravyāhariṣyati
iyaṃ me paścimā jātir nāsti bhūyaḥ punarbhavaḥ //
na punar āgamiṣyāmi nirvāsyāmi nirāśravaḥ
śītoṣṇavāridhārābhis snāpayiṣyanti pannagāḥ //
divyāmbarāṇi puṣpāṇi patiṣyanti nabhastalāt
śvetaṃ tasya surāś chattraṃ dhārayiṣyanti mūrdhani //
hṛṣṭaś caiva sahasrākṣo devarājo śacīpatiḥ
grahīṣyati taṃ kumāraṃ dvātriṃśadvaralakṣaṇam
śriyā jvalantaṃ maitreyaṃ mātur haste pradāsyati //
manoramāṃ ca śivikāṃ nānāratnavibhuṣitām
ārūḍhā putrasahitā vahiṣyate ca devavat //
tatas tūryasahasreṣu vādyamāneṣu tatpuram
praviṣṭamātre maitreye puṣpavarṣaṃ patiṣyati //
tasmiṃś ca divase bhāryā gurviṇyaḥ prasaviṣyanti
sarvās tā janayiṣyanti putrān kṣemeṇa svastinā //
dṛṣṭvā ca putraṃ subrahmā dvātriṃśadvaralakṣaṇam
pratyavekṣya ca mantreṣu tataḥ prīto bhaviṣyati //
gatidvayaṃ kumārasya yathā mantreṣu dṛśyate
narādhipaś cakravartī buddho vā dvīpadottamaḥ //
sa ca yauvanasaṃprāpto maitreyo hy agrapudgalaḥ
cintayiṣyati dharmātmā duḥkhitāh khalv imāḥ prajāḥ //
brahmasvaro mahāghoṣo hemavarṇo mahādyutiḥ
viśālavakṣāḥ pīnāṅgaḥ padmapattranibhekṣaṇaḥ //
samucchrayeṇa hastāśītis tasya kāyo bhaviṣyati
vistāraṃ viṃśahastāni tato 'rdham mukhamaṇḍalam //
aśītibhiś caturbhiś ca sahasraiḥ sa puraskṛtaḥ
māṇavānāṃ ca maitreyo maṃtrān adhyāpayiṣyati //
tataḥ śaṅkho mahārājo yūpam ucchrāpayiṣyati
ṣoḍaśavyāmavistāram ūrdhvaṃ vyāmasahasrakam //
sa taṃ yūpaṃ narapatir nānāratnavibhūṣitam
pradāsyati dvijātibhyo yajñaṃ kṛtvā purassaram
saptaratnamayaṃ yūpaṃ brāhmaṇebhyaḥ pradāsyati //
taṃ ca ratnamayaṃ yūpaṃ dattamātraṃ manoramam
brāhmaṇānāṃ sahasrāṇi vikariṣyanti tatkṣaṇāt //
tasya yūpasya maitreyo dṛṣṭvā cainām anityatām
kṛtsnaṃ vicintya saṃsāraṃ pravrajyāṃ rocayiṣyati //
yatrāhaṃ pravrajitveha spṛśeyam amṛtaṃ padam
vimocayeyaṃ janatāṃ vyādhimṛtyujarābhayāt //
aśītibhiś caturbhiś ca sahasraiḥ sa puraskṛtaḥ
niṣkramiṣyati maitreyaḥ pravrajyām agrapudgalaḥ //
nāgavṛkṣas tadā tasya bodhivṛkṣo bhaviṣyati
pañcāśadyojanās tasya ūrdhvaṃ śākhāḥ samudgatāḥ
ṣaṭkrośaviṭapāṇy asya vivṛtāni samantataḥ //
tasya mūle niṣaṇṇo 'sau maitreyo dvipadottamaḥ
anuttarāṃ ca saṃbodhiṃ prāpsyati nātra saṃśayaḥ //
aṣṭāṅgopetayā vācā tataḥ sa munisattamaḥ
deśayiṣyati saddharmaṃ sarvaduḥkhāpahaṃ śivam //
duḥkhaṃ duḥkhasamutpādaṃ duḥkhasya samatikramam
āryaṃ cāṣṭāṅgikaṃ mārgaṃ kṣemaṃ nirvāṇagāminam //
prasannān janatāṃ dṛṣṭvā satyāni kathayiṣyati
taṃ cāsya dharmaṃ saṃśrutya pratipadyanti śāsane //
supuṣpite ca udyāne sannipāto bhaviṣyati
pūrṇaṃ ca yojanaṃ śataṃ parṣat tasya bhaviṣyati //
tataḥ śrutvā narapatiḥ śaṅkho rājā mahāyaśāḥ
dattvā dānam asaṃkhyeyaṃ pravrajyāṃ rocayiṣyati //
aśītibhiś caturbhiś ca sahasraiḥ sa puraskṛtaḥ
narādhipo viniṣkramya pravrajyām upayāsyati //
tenaiva ca pramāṇena mānavānāṃ puraskṛtaḥ
maitreyasya pitā caiva pravrajyām upayāsyati //
tato gṛhapatiḥ x x sudhano nāma viśrutaḥ
pravrajiṣyati dharmātmā sahasraiḥ parivāritaḥ //
strīratnam atha śaṅkhasya viśākhā nāma viśrutā
aśītibhiś caturbhiś ca sahasraiḥ sā puraskṛtā
nārīṇāṃ saha niṣkramya pravrajyām upayāsyati //
prāṇināṃ tatra samaye sahasrāṇi śatāni ca
pravrajyām upayāsyanti maitreyasyānuśāsane //
tataḥ kāruṇikaḥ śāstā maitreyo dvipadottamaḥ
samitiṃ vyavalokyātha idam arthaṃ pravakṣyati //
sarve te śākyamuninā muniśreṣṭhena tāyinā
arthato lokanāthena dṛṣṭāḥ saddharmadhātunā
ropitā mokṣamārgaṇe vikṣiptā mama śāsane //
chattradhvajapatākābhir gandhamālyānulepanaiḥ
kṛtvā śākyamuneḥ pūjāṃ hy āgatā mama śāsane //
kuṅkumodakarasena candanenānulepanam
dattvā śākyamuneḥ stūpe hy āgatā mama śāsane //
buddhaṃ dharmaṃ ca saṅghaṃ ca gatvā tu śaraṇaṃ sadā
kṛtvā tu kuśalaṃ karma āgatā mama śāsane //
śikṣāpadāni samādāya x śākyamuniśāsane
pratipālya yathābhūtaṃ hy āgatā mama śāsane //
dattvā saṅghe ca dānāni cīvarapānabhojanam
vicitraṃ glānabhaiṣajyaṃ hy āgatā mama śāsane //
caturdaśīṃ pañcadaśīṃ pakṣasyehāṣṭamīṃ tathā
prātihārakapakṣaṃ ca aṣṭāṅgaṃ susamāhitam
upavāsam upoṣitvā hy āgatā mama śāsane //
prātihāryatrayeṇāsau śrāvakān vedayiṣyati
sarve te hy asravān dharmān kṣapayiṣyanti x x x //
prathamaḥ sannipāto 'sya śrāvakāṇāṃ bhaviṣyati
pūrṇāḥ ṣaṇnavatiḥ koṭyaḥ śrāvakāṇāṃ bhavacchidām //
dvitīyaḥ sannipāto 'sya śrāvakāṇāṃ bhaviṣyati
pūrṇāś caturnavatiḥ koṭyo muktānāṃ kleśabandhanāt //
tṛtīyaḥ sannipāto 'sya śrāvakāṇāṃ bhaviṣyati
pūrṇā dvānavatiḥ koṭyo muktānāṃ śāntacetasām //
dharmacakraṃ pravartyātha vinīya suramānuṣān
sārdhaṃ śrāvakasaṅghena pure piṇḍaṃ cariṣyati //
tataḥ praviśatas tasya ramyāṃ ketumatīpurīm
māndāravāṇi puṣpāni patiṣyanti narottame
devatāḥ prakariṣyanti tasmin puragate munau //
catvāraś ca mahārājāḥ śakraś ca tridaśādhipaḥ
brahmadevagaṇaiḥ sārdhaṃ pūjāṃ tasya kariṣyati //
utpalakumudapadmapuṇḍarīkasugandhikam
aguruṃ candanaṃ caiva divyamālās tathaiva ca //
cailakṣepaṃ kariṣyanti devaputrā maharddhikāḥ
taṃ lokanātham udvīkṣya praviśantaṃ purottamam //
pathi bhūmiḥ sthitā tatra mṛdutūlapicūpamā
vicitraṃ ca śrutaṃ mālyaṃ vistariṣyanti te pathi //
chattradhvajapatākāni gandhamālyānulepanaiḥ
śrutaiś ca tūryanirghoṣaiḥ prasannamanaso narāḥ
śāstuḥ pūjāṃ kariṣyanti devaputrā maharddhikāḥ //
sa ca śakraḥ sahasrākṣo devarājo mahādyutiḥ
prahṛṣṭaḥ prāñjaliṃ kṛtvā stoṣyate lokanāyakam //
namas te puruṣājanya namas te puruṣottama
anukampasva janatāṃ bhagavann agrapudgala //
maharddhiko devaputras tasya māro bhaviṣyati
sa caiva prāñjaliṃ kṛtvā stoṣyate lokanāyakam //
brāhmaṇaparivāreṇa brahmā caiva puraskṛtaḥ
kathayiṣyati saddharmaṃ brahmaghoṣam udīrayan //
ākīrṇā pṛthivī sarvā arhadbhiś ca bhaviṣyati
kṣīṇāsravair vāntadoṣaiḥ prahīṇabhavabandhanaiḥ //
hṛṣṭā devā manuṣyāś ca gandharvā yakṣarākṣasāḥ
śāstuḥ pūjāṃ kariṣyanti nāgāś cāpi maharddhikāḥ //
te ca nūnaṃ bhaviṣyanti akhilāś chinnasaṃcayāḥ
chinnasrotā anādīnā uttīrnābhavasāgarāḥ
brahmacaryaṃ cariṣyanti maitreyasyānuśasane //
te vai nūnaṃ bhaviṣyanti amamā aparigrahāḥ
ajātarūparajatā aniketā asaṃstavāḥ
brahmacaryaṃ cariṣyanti maitreyasyānuśasane //
te vai nūnaṃ bhaviṣyanti chinnajālaviśaktikāḥ
dhyānāni copasaṃpadya prītisaukhyasamanvitāḥ
brahmacaryaṃ cariṣyanti maitreyasyānuśasane //
ṣaṣṭivarṣasahasrāṇi maitreyo dvipadottamaḥ
deśayiṣyati saddharmaṃ sarvabhūtānukampakam //
śatalakṣasahasrāṇi prāṇinaṃ sa vināyakaḥ
vinayitvā ca saddharmaṃ tato nirvāṇam eṣyati //
parinirvṛtasya x x tasyaiva x mahāmuneḥ
daśavarṣasahasrāṇi saddharmaḥ sthāsyate tadā //
prasādayitvā cittāni tasmin śākyamunau jine
tato drakṣyatha maitreyaṃ saṃbuddhaṃ dvipadottamam //
idam āścaryakaṃ śrutvā imām ṛddhim anuttamām
ko vidvān na prasīdeta atikṛṣṇābhijātikaḥ //
tasmād ihātmakāmena māhātmyam abhikāṅkṣiṇā
saddharmo gurukartavyaḥ smaratā buddhaśāsanam //
Maitreyavyākaraṇaṃ samāptam // ye dharmā (etc.) // cīnadeśīvinirgataḥ bhikṣu puṇyakīrtir yad atra puṇyaṃ tad bhavatv ācāryopādhyāyamātāpitṛpūrvaṅgamaṃ krtvā sakalasattvarāśer anuttarajñānaphalāptaya iti // śrīmad gopāladevarājyasaṃvat 57 phālguna dine 9 Ghosalīgrāme likhati / oṃ hārītī mahāyakṣiṇī hara hara mama sarvapāpāni svāhā //
Note: 3. Kathmandu Manuscript (complete), ed. Ishigami Ishigami, Zenno (1989), "Nepāru bon 'Maitreyavyākaraṇa'," Fujita Kḥtatsu Hakushi Kanreki Kinen Ronbunshū: Indotetsugaku to Bukkyḥ, Kyoto, 295-310. To facilitate searching, sandhis are standardized, misprints removed, some mistakes corrected.

Oṃ namo maitreyanāthāya //

evaṃ mayā śrutam ekasmiṃ samaye bhagavān rājagṛhe viharati sma / veṇuvane kalandakanivāse mahatā bhikṣusaṃghena sārdham ardhatrayodaśabhir bhikṣuśataiḥ //

atha khalv āyuṣmāñ

chāriputra mahāprajño dharmasenāpatir vibhuḥ
lokasya anukampārthaṃ śāstāraṃ paripṛcchati //
yo 'sāv anāgato buddho nirdiṣṭo lokanāyakaḥ
maitreya iti nāmnā 'sau sūtrapūrvāparāntike //
tasyāhaṃ vistarañ caivaṃ śrotum icchāmi nāyaka
ṛddhiñ cāsyānubhāvañ ca tan me brūhi narottama //
athainam avadac chāstā vyākariṣyāmy ahaṃ tava
vistaran tasya buddhasya maitreyasya śṛṇohi me //
udadhis tena kālena dvātriṃśatśatayojanaḥ
śoṣam āyāsyate yasmāc cakravartī yathā hy asau //
daśayojanasāhasrā jambudvīpo bhavaiṣyati
ālayaḥ sarvabhūtānāṃ vistareṇa samantataḥ //
ṛddhisphītā janapadā adaṇḍā anupadravāḥ
tatra kāle bhaviṣyanti narās te śubhakarminaḥ //
akaṇṭakā vasumatī samāharitaśādvalā
unnamantī namantī ca mṛdutūlapicūpamā //
akṛṣṭotpadyate śālimadhunāś ca sugandhi ca
cailavṛkṣā bhaviṣyanti nānāraṅgopaśobhitāḥ //
puṣpapatraphalotpatā vṛkṣāś ca krośam ucchritāḥ
aśītivarṣasahasrāṇi āyus teṣāṃ bhaviṣyati //
nirāmayāś ca te satvā vītaśokā mahotsavāḥ
varṇavanto mahāśakhyā mahānāgabalāc citāḥ //
trayā rogā bhaviṣyanti icchā anaśanaṃ jarā
pañcavarṣaśatā kanyā svāminam varayiṣyati //
tadā ketumatī nāma rājadhānī bhaviṣyati
āvāsaḥ śuddhasatvānāṃ prāṇināṃ śubhakarmiṇam //
yojanadvādaśāyāmaṃ saptayojanavistaram
nagaraṃ kṛtapuṇyānāṃ bhaviṣyati manoramam //
saptaratnamayāś caiva prakārāḥ krośam uccitāḥ
iṣṭakā dvārakhaṇḍānāṃ nānāratnavibhūṣitāḥ //
pariṣāś ca bhaviṣyanti ratna iṣṭakasaṃcitāḥ
padmotpalasamān kīrṇāś cakravākopaśobhitāḥ //
samantataḥ parivṛtāḥ saptabhis talāpaṅktibhiḥ
catūratnamayās tālāḥ kiṃkiṇī jālaśobhitāḥ //
vāteneritatālebhyas tadā śruti manoharāḥ
bhaviṣyanti śubhā śabdā tūryās pañcāṅgikā iva //
ye ca tasmin pure martyāḥ krīḍāratisukhānvitāḥ
tenaiva tālaśabdena krīḍiṣyanti pramoditāḥ //
puṣkariṇo bhaviṣyanti kumudotpalasaṃcetāḥ
udyānavanasaṃpannaṃ bhaviṣyati ca tat puram //
bhaviṣyati tadā rājā śamkho nāma mahādyutiḥ
mahābalacakravartī caturdvīpeśvaraḥ prabhuḥ //
caturaṅgabalopetaḥ saptaratnasamanvitaḥ
pūrṇasahasraputrāṇāṃ tasya rājño bhaviṣyati //
imāṃ samudraparyantām adaṇḍena vasundharām
pālayiṣyati dharmeṇa samena sa narādhipaḥ //
mahānidhānāś catvāro nayutaśatalakṣitāḥ
bhaviṣyanti tadā tasya rājñaḥ śaṃkhasya bhūpateḥ //
piṅgalaś ca kaliṅgeṣu mithilāyām ca pāṇḍukaḥ
elāpatraś ca gāndhāre śaṃkho vārāṇasīpure //
caturbhir ebhir nidhibhiḥ sa rājā susamanvitaḥ
bhaviṣyati mahāvīraḥ śatapuṇyaphalārpitaḥ //
brāhmaṇas tasya rājño 'tha subrahmā nāmnā purohitaḥ
bahuśrutaś caturvedī upadhyāyo bhaviṣyati //
adhyāpako mantradharaḥ smṛtivān vedapāragaḥ
kaiṭābhe ca sa nirghaṇṭe padavyākaraṇe tathā //
tasya brahmavatī nāma tadā bhāryā bhaviṣyati
darśanīyā prāsādikā abhirūpā yaśasvinī //
tuṣitebhyas tataś cyutvā maitreyo hy agrapudgalaḥ
tasyāḥ kukṣau sa niyataṃ pratisandhiṃ grahiṣyati //
daśa māsāṃś ca nikhilān dhārayitvā mahādyutim
supuṣpite ca udyāne gatvā maitreyamātaraḥ //
na niṣaṇṇā nipannā vā sthitā sā brahmacāriṇī
drumasya śākhām ālambya maitreyaṃ janayiṣyati //
niṣkramiṣyati pārśvena dakṣiṇāṅge narottamaḥ
abhrakūṭād yathā sūryo nirgataś ca prabhāyate //
kariṣyate samālokaṃ sanarāmaravanditaḥ
alipto garbhapaṅkena padmaṃ caiva yathāmbhuvā
traidhātukam idaṃ sarvaṃ prabhayā pūrayiṣyati //
pade pade nidhānaṃ ca padmaṃ padmaṃ bhaviṣyati
diśaś catasro udvīkṣya vācaṃ pravyāhariṣyati
iyaṃ me paścimā jātir nāsti bhūyaḥ punarbhavaḥ //
na punar āgamiṣyāmi nirvāsyāmi nirāśravaḥ
śītoṣṇavāridhārābhiḥ snāpayiṣyanti punnagāḥ //
divyāsurāṇi puṣpāṇi patiṣyanti nabhastalāt
śvetaṃ tasya surāś chattraṃ dhārayiṣyanti mūrdhani //
hṛṣṭaś caiva sahasrākṣo devarājaḥ śacīpatiḥ
pragrahīṣyati kumāraṃ taṃ dvātriṃśalakṣṇānvitam
śriyā jvalantaṃ maitreyaṃ mātur haste pradāsyati //
manoramāṃ ca śivikāṃ nānāratnavibhuṣitām
ārūḍhāṃ putrasahitāṃ vahiṣyanti ca devatāḥ //
tatas tūryasahasreṣu vādyamāneṣu tatpuram
praviṣṭamātre maitreye puṣpavarṣaṃ patiṣyati //
tasmiṃś ca divase nāryo gurviṇyaḥ prasaviṣyanti
sarvās tā janayiṣyanti putrān kṣemeṇa svastinā //
dṛṣṭvaivaṃ putraṃ subrahmā dvātriṃśadvaralakṣaṇam
pratyavekṣya sumantreṇa tataḥ prīto bhaviṣyati //
gatidvayaṃ kumārasya yathā mantreṣu dṛśyate
narādhipaś cakravartī buddho vā dvīpadottamaḥ //
sa ca yauvanasaṃprāpto maitreyo hy agrapudgalaḥ
cintayiṣyati dharmātmā duḥkhitā khalv iyaṃ prajā //
brahmasvaro mahāvego hemavarṇo mahādyutiḥ
viśālacakṣuḥ pīnāṅgaḥ padmapattranibhedekṣaṇaḥ //
ucchrayeṇa hastāśītiḥ kāyas tasya bhaviṣyati
vistāraṃ viṃśatir hastā tato 'rdham mukhamaṇḍalam //
aśītibhiś caturbhiś ca sahasraiḥ sa puraskṛtaḥ
māṇavānāṃ sa maitreyo mantrān adhyāpayiṣyati //
tataḥ śaṅkho mahārājo yūpam ucchrāpayiṣyati
ṣoḍaśavyāmavistāram ūrdhvavyāmasahasrakam //
sa taṃ yūpaṃ narapatir nānāratnavibhūṣitam
saptaratnasamākīrṇaṃ brāhmaṇebhyaḥ pradāsyati //
tac ca ratnamayaṃ yūpaṃ dattamātraṃ manoramam
brāhmaṇānāṃ sahasrāṇi vikariṣyanti tatkṣaṇāt //
tasya yūpasya maitreyo dṛṣṭvā cainām anityatām
kṛtsnaṃ vicintya saṃsāraṃ pravrajyāṃ rocayiṣyati //
yatv ahaṃ pravrajitveha spṛśeyam amṛtaṃ padam
vimocayeyaṃ janatāṃ vyādhimṛtyujarābhayāt //
aśītibhiś caturbhiś ca sahasraiḥ saṃpuraskṛtaḥ
niḥkramiṣyati maitreyaḥ pravrajyārtham agrapudgalaḥ //
nāgavṛkṣas tadā tasya bodhivṛkṣo bhaviṣyati
pañcāśadyojanās tasya ūrdhvaṃ śākhāḥ bhaviṣyanti
ṣaṭkrośaviṭapādyāni vidhūtāni samantataḥ //
tasya mūle niṣaṇṇo 'sau maitreyo dvipadottamaḥ
anuttarāṃ ca saṃbodhiṃ prāpsyate nātra saṃśayaḥ //
aṣṭāṅgopetayā vācā tataḥ sa puruṣottamaḥ
deśayiṣyati saddharmaṃ sarvaduḥkhāpahaṃ śivam //
duḥkhaṃ duḥkhasamutpādaṃ duḥkhasya samatikramam
āryāṣṭāṅgikaṃ mārgaṃ kṣemaṃ nirvāṇagāminam //
prasannāṃ janatāṃ dṛṣṭvā satyāni kathayiṣyati
tathāsya dharmaṃ saṃśrutvā pratipadyanti śāsane //
supuṣpite ca udyāne sannipāto bhaviṣyati
saṃpūrṇaṃ yojanaśataṃ parṣat tasya bhaviṣyati //
tataḥ śrutvā narapatiḥ śaṃkho nāma mahāyaśāḥ
dattvā dānam asaṃkhyeyaṃ pravrajyāṃ rocayiṣyati //
aśītibhiś caturbhiś ca sahasraiḥ sa puraskṛtaḥ
narādhipo 'pi niṣkramya pravrajyām upayāsyati //
tenaiva ca pramāṇena mānavānāṃ puraskṛtaḥ
maitreyasya pitā caiva pravrajyām upayāsyati //
tato gṛhapatis tatra sudhano nāma viśrutaḥ
pravrajiṣyati dharmātmā sahasraiḥ parivāritaḥ //
strīratnam atha śaṃkhasya viśākhā nāma viśrutā
aśītibhiś caturbhiś ca sahasraiḥ sā puraskṛtā
nārīṇāṃ saha niṣkramya pravrajyām upayāsyati //
prāṇināṃ tatra samaye sahasrāṇi śatāni ca
pravrajyām upayāsyanti maitreyasyānuśāsane //
tataḥ kāruṇikaḥ śāstā maitreyo dvipadottamaḥ
samitiṃ vyavalokyātha idam arthaṃ pravakṣyate //
sarve te śākyamuninā muniśreṣṭhena tāyinā
arthato lokanāthena dṛṣṭāḥ saddharmadhātunā
āropitā mokṣamārge nikṣiptā mama śāsane //
chatradhvajapatākābhir gandhamālyānulepanaiḥ
kṛtvā śākyamuneḥ pūjāṃ hy āgatā mama śāsane //
kuṃkumodakasekena candanenānulepanam
dattvā śākyamuneḥ stūpe hy āgatā mama śāsane //
buddhaṃ dharmaṃ ca saṃghaṃ ca gatvā tu śaraṇaṃ sadā
kṛtvā tu kuśalaṃ karma hy āgatā mama śāsane //
śikṣāpadān samādāya śākyasiṃhasya śāsane
pratipādya yathābhūtaṃ hy āgatā mama śāsane //
dattvā saṃghe ca dānāni cīvaraṃ pānabhojanam
vicitraṃ glānabhaiṣajyaṃ hy āgatā mama śāsane //
caturdaśīṃ pañcadaśīṃ pakṣasyehāṣṭamīṃ tathā
prātihārakapakṣaṃ ca aṣṭāṅgaṃ susamāhitaḥ
upavāsam upoṣyeha hy āgatā mama śāsane //
prātihāryatrayeṇāsau śrāvakān vinayiṣyati
sarve te sāsravān dharmān kṣayayiṣyanti suratāḥ //
prathamaḥ sannipāto 'sya śrāvakāṇāṃ bhaviṣyati
pūrṇāḥ ṣaṇnavati koṭyaḥ śrāvakāṇāṃ bhaviṣyati //
dvitīyaḥ sannipāto 'sya śrāvakāṇāṃ bhaviṣyati
pūrṇāś caturnavati koṭyaḥ kleśamuktā kṣaṇāṭ //
tṛtīyaḥ sannipāto 'sya śrāvakāṇāṃ bhaviṣyati
pūrṇā dvānavati koṭyo muktānāṃ śāntacetasām //
dharmacakraṃ pravartyātha vinīya suramānuṣān
sārdhaṃ śrāvakasaṃghena pure piṇḍaṃ cariṣyati //
tataḥ praveśatas tasya ramyāṃ ketumatīpurīm
māndāravāṇi puṣpāni patiṣyanti purottame
devatāḥ prakramiṣyanti tasmin pure gate munau //
catvāraś ca mahārājānaḥ śakraś ca tridaśādhipaḥ
brahma devagaṇaiḥ sārdhaṃ pūjāṃ tasya vidhāsyati //
utpalaṃ kumudaṃ padmaṃ puṇḍarīkaṃ sugandhikam
aguruṃ candanaṃ caiva divyamālyaṃ tathaiva ca //
cailakṣepaṃ vidhāsyanti devaputrā maharddhikāḥ
taṃ lokanātham udvīkṣya praviśantaṃ purottamam //
pathi tatra sthitā bhūmir mṛdus tūlapicūpamā
vicitraṃ ca tato mālyaṃ vikariṣyanti te pathi //
chattradhvajapatākābhir gandhamālyānulepanaiḥ
śubhaiś ca tūryanirghoṣaiḥ prasannamanaso narāḥ
śāstuḥ pūjāṃ kariṣyanti devaputrā maharddhikāḥ //
sa ca śakraḥ sahasrākṣo devarājo mahādyutiḥ
prahṛṣṭaḥ prāñjaliṃ kṛtvā stoṣyate lokanāyakam //
namas te puruṣasiṃha namas te puruṣottama
anukampasva janatāṃ bhagavann agrapudgala //
maharddhiko devaputras tasya māro bhaviṣyati
sa caiva prāñjaliṃ bhūtvā stoṣyate lokanāyakam //
śuddhāvāsasahasraiś ca bahubhiḥ parivāritaḥ
pravekṣate ketumatīṃ maitreyo lokanandanaḥ //
brāhmaṇaparivāreṇa brahmā caiva puraskṛtaḥ
kathayiṣyati saddharmaṃ brahmaghoṣam udīrayan //
ākīrṇā pṛthivī sarvā arhadbhiś ca bhaviṣyati
kṣīṇāsravair vāntadoṣaiḥ prahīṇabhavabandhanaiḥ //
hṛṣṭā devamanuṣyāś ca gandharvā yakṣarākṣasāḥ
śāstuḥ pūjāṃ kariṣyanti nāgāś cāpi maharddhikāḥ //
te vai nūnaṃ bhaviṣyanti akhilāś chinnasaṃśayāḥ
chinnasrotā anādātā uttīrnā bhavasāgarāt
brahmacaryaṃ cariṣyanti maitreyasyānuśasane //
te vai nūnaṃ bhaviṣyanti amamā aparigrahāḥ
ajātarūparajatā aniketā asaṃbhavāḥ
brahmacaryaṃ cariṣyanti maitreyasyānuśasane //
te vai nūnaṃ bhaviṣyanti chinnajālam aśaktikāḥ
dhyānāny upasaṃpādya prītisaukhyasamanvitāḥ
brahmacaryaṃ cariṣyanti maitreyasyānuśasane //
ṣaṣṭivarṣasahasrāṇi maitreyo dvipadottamaḥ
deśayiṣyati saddharmaṃ sarvabhūtānukampakaḥ //
śatalakṣasahasrāṇi prāṇinaṃ sa vināyakaḥ
vinayitvā ca saddharme tato nirvāṇam eṣyati //
parinirvṛtasya tasyaiva maitreyasya mahāmuneḥ
daśavarṣasahasrāṇi saddharmaḥ sthāsyate tadā //
prasādayiṣyatha cittāni tasmiṃ śākyamunau jine
tato drakṣyatha maitreyaṃ saṃbuddhaṃ dvipadottamam //
idam āścaryakaṃ śrutvā imām ṛddhim anuttamām
ko vidvān na prasīdeta api kṛṣṇābhijātikaḥ //
tasmād ihātmakāmena māhātmyam abhikāṃkṣatā
saddharmo gurukartavyaḥ smaratāṃ buddhaśāsanam //
iti maitreyavyākaraṇaṃ nāma mahāyānasūtraṃ samāptam | ye dharmā hetuprabhavā hetu teṣāṃ tathāgato hy avadat | teṣāṃ ca yo nirodha evaṃvādī mahāśramaṇaḥ || śubham astu || abdeglāvagnidvirade śita māghe guhānane | pūṣāyāṃ pūṣṇadivase sarvvānanda samāpta kṛt ||

This e-text was provided to GRETIL in good faith that no copyright rights have been infringed. If anyone wishes to assert copyright over this file, please contact the GRETIL management at
gretil(at)sub(dot)uni-goettingen(dot)de. The file will be immediately removed pending resolution of the claim.

Distributed under a Creative Commons Attribution-NonCommercial-ShareAlike 4.0 International License.
Notizen
Distributed under a Creative Commons Attribution-NonCommercial-ShareAlike 4.0 International License (https://creativecommons.org/licenses/by-nc-sa/4.0/)
Rechtsinhaber*in
Göttingen Register of Electronic Texts in Indian Languages (GRETIL), SUB Göttingen
Zitationsvorschlag für dieses Objekt
TextGrid Repository (2022). 1_sanskr. tei. sa_maitreyavyAkaraNa. GRETIL. Göttingen Register of Electronic Texts in Indian Languages (GRETIL), SUB Göttingen. https://hdl.handle.net/21.T11991/0000-001C-930A-1