• GRETIL
• 1_sanskr
• tei
• transformations
• plaintext
• sa_zvetAzvataropaniSad

          Śvetāśvataropaniṣad


# Header

  This file is a plain text transformation of http://gretil.sub.uni-goettingen.de/gretil/corpustei/sa_zvetAzvataropaniSad.xml
  with a rudimentary header. For a more extensive header please refer to the source file.

## Data entry: S. H.
## Contribution: S. H.
## Date of this version: 2020-07-31

## Source: 
   - the electronic text available from Sanskrit Documents (https://sanskritdocuments.org).

## Publisher: Göttingen Register of Electronic Texts in Indian Languages (GRETIL), SUB Göttingen

## Licence:
   This e-text was provided to GRETIL in good faith that no copyright rights have been infringed. If anyone wishes to assert copyright over this file, please contact the GRETIL management at gretil(at)sub(dot)uni-goettingen(dot)de. The file will be immediately removed pending resolution of the claim.
   Distributed under a Creative Commons Attribution-NonCommercial-ShareAlike 4.0 International License.

## Structure of references:
   A reference is assembled consisting of
   - a pragmatic abbreviation of the title: Śvetāśvataropaniṣad = SvetUp,
   - the number of the  in arabic numerals,
   - the number of the verse in arabic numerals.

## Notes:
   This file has been created by mass conversion of GRETIL's Sanskrit corpus from svetu_au.htm. Due to the heterogeneity of the sources the header markup might be suboptimal. For the sake of transparency the header of the legacy file is documented in the note element below:

   
	 Svetasvatara-Upanisad (Svetasvataropanisad)
Based on the electronic text available from "Sanskrit Documents" (http://sanskrit.gde.to).
Input by S. H., proofread by John Manetta
This GRETIL version has been checked against the edition
by V.P. Limaye and R.D. Vadekar (Eighteen Principal Upanisads, vol. 1,
Poona 1958), and the electronic version available on TITUS.
In cases of divergence, preference has usually been given to the printed
edition.
TEXT WITH PADA MARKERS
	


## Revisions:
   - 2020-07-31: TEI encoding by mass conversion of GRETIL's Sanskrit corpus


# Text


śvetāśvatara-upaniṣad (śvetāśvataropaniṣad)

oṃ brahmavādino vadanti


prathamo 'dhyāyaḥ

kiṃkāraṇaṃ brahma kutaḥ sma jātā jīvāmaḥ kena kva ca saṃpratiṣṭhāḥ 
adhiṣṭhitāḥ kena sukhetareṣu vartāmahe brahmavido vyavasthām // SvetUp_1.1

kālaḥ svabhāvo niyatir yadṛcchā bhūtāni yoniḥ puruṣeti cintyam 
saṃyoga eṣāṃ na tv ātmabhāvād ātmā hy anīśaḥ sukhaduḥkhahetoḥ // SvetUp_1.2

te dhyānayogānugatā apaśyan devātmaśaktiṃ svaguṇair nigūḍhām 
yaḥ kāraṇāni nikhilāni tāni kālātmayuktāny adhitiṣṭhaty ekaḥ // SvetUp_1.3

tam ekanemiṃ trivṛtaṃ ṣoḍaśāntaṃ śatārdhāraṃ viṃśatipratyarābhiḥ 
aṣṭakaiḥ ṣaḍbhir viśvarūpaikapāśaṃ trimārgabhedaṃ dvinimittaikamoham // SvetUp_1.4

pañcasroto'mbuṃ pañcayonyugravaktrāṃ pañcaprāṇormiṃ pañcabuddhyādimūlāṃ 
pañcāvartāṃ pañcaduḥkhaughavegāṃ pañcāśadbhedāṃ pañcaparvām adhīmaḥ // SvetUp_1.5

sarvājīve sarvasaṃsthe bṛhante tasmin haṃso bhrāmyate brahmacakre 
pṛthag ātmānaṃ preritāraṃ ca matvā juṣṭas tatas tenāmṛtatvam eti // SvetUp_1.6

udgītam etat paramaṃ tu brahma tasmiṃs trayaṃ svapratiṣṭhākṣaraṃ ca 
atrāntaraṃ brahmavido viditvā līnā brahmaṇi tatparā yonimuktāḥ // SvetUp_1.7

saṃyuktam etat kṣaram akṣaraṃ ca vyaktāvyaktaṃ bharate viśvam īśaḥ 
anīśaś cātmā badhyate bhoktṛbhāvāj jñātvā devaṃ mucyate sarvapāśaiḥ // SvetUp_1.8

jñājñau dvāv ajāv īśanīśāv ajā hy ekā bhoktṛbhogārthayuktā 
anantaś cātmā viśvarūpo hy akartā trayaṃ yadā vindate brahmam etat // SvetUp_1.9

kṣaraṃ pradhānam amṛtākṣaraṃ haraḥ kṣarātmānāv īśate deva ekaḥ 
tasyābhidhyānād yojanāt tattvabhāvād bhūyaś cānte viśvamāyānivṛttiḥ // SvetUp_1.10

jñātvā devaṃ sarvapāśāpahāniḥ kṣīnaiḥ kleśair janmamṛtyuprahāṇiḥ 
tasyābhidhyānāt tṛtīyaṃ dehabhede viśvaiśvaryaṃ kevala āptakāmaḥ // SvetUp_1.11

etaj jñeyaṃ nityam evātmasaṃsthaṃ nātaḥ paraṃ veditavyaṃ hi kiṃcit 
bhoktā bhogyaṃ preritāraṃ ca matvā sarvaṃ proktaṃ trividhaṃ brahmam etat // SvetUp_1.12

vahner yathā yonigatasya mūrtir na dṛśyate naiva ca liṅganāśaḥ 
sa bhūya evendhanayonigṛhyas tadvobhayaṃ vai praṇavena dehe // SvetUp_1.13

svadeham araṇiṃ kṛtvā praṇavaṃ cottarāraṇiṃ 
dhyānanirmathanābhyāsād devaṃ paśyen nigūḍhavat // SvetUp_1.14

tileṣu tailaṃ dadhanīva sarpir āpaḥ srotaḥsv araṇīṣu cāgniḥ 
evam ātmā ātmani gṛhyate 'sau satyenainaṃ tapasā yo 'nupaśyati // SvetUp_1.15

sarvavyāpinam ātmānaṃ kṣīre sarpir ivārpitam 
ātmavidyātapomūlaṃ tad brahmopaniṣatparaṃ tad brahmopaniṣatparam // SvetUp_1.16


dvitīyo 'dhyāyaḥ

yuñjānaḥ prathamaṃ manas tatvāya savitā dhiyaḥ 
agner jyotir nicāyya pṛthivyā adhy ābharat // SvetUp_2.1

yuktena manasā vayaṃ devasya savituḥ save 
suvargeyāya śaktyā % // SvetUp_2.2

yuktvāya manasā devān suvar yato dhiyā divaṃ 
bṛhaj jyotiḥ kariṣyataḥ savitā prasuvāti tān // SvetUp_2.3

yuñjate mana uta yuñjate dhiyo viprā viprasya bṛhato vipaścitaḥ 
vi hotrā dadhe vayunāvid eka in mahī devasya savituḥ pariṣṭutiḥ // SvetUp_2.4

yuje vāṃ brahma pūrvyaṃ namobhir vi śloka etu pathyeva sūreḥ 
śṛṇvanti viśve amṛtasya putrā ā ye dhāmāni diviyāni tasthuḥ // SvetUp_2.5

agnir yatrābhimathyate vāyur yatrādhirudhyate 
somo yatrātiricyate tatra saṃjāyate manaḥ // SvetUp_2.6

savitrā prasavena juṣeta brahma pūrvyam 
tatra yoniṃ kṛṇavase nahi te pūrtam akṣipat // SvetUp_2.7

trirunnataṃ sthāpya samaṃ śarīraṃ hṛdīndriyāṇi manasā saṃniveśya 
brahmoḍupena pratareta vidvān srotāṃsi sarvāṇi bhayāvahāni // SvetUp_2.8

prāṇān prapīḍyeha sa yuktaceṣṭaḥ kṣīne prāṇe nāsikayocchvasīta 
duṣṭāśvayuktam iva vāham enaṃ vidvān mano dhārayetāpramattaḥ // SvetUp_2.9

same śucau śarkarāvahnivālukāvivarjite śabdajalāśrayādibhiḥ 
mano'nukūle na tu cakṣupīḍane guhānivātāśrayaṇe prayojayet // SvetUp_2.10

nīhāradhūmārkānalānilānāṃ khadyotavidyutsphaṭikāśaśīnām 
etāni rūpāṇi puraḥsarāṇi brahmaṇy abhivyaktikarāṇi yoge // SvetUp_2.11

pṛthvyaptejo'nilakhe samutthite pañcātmake yogaguṇe pravṛtte 
na tasya rogo na jarā na mṛtyuḥ prāptasya yogāgnimayaṃ śarīram // SvetUp_2.12

laghutvam ārogyam alolupatvaṃ varṇaprasādaḥ svarasauṣṭhavaṃ ca 
gandhaḥ śubho mūtrapurīṣam alpaṃ yogapravṛttiṃ prathamāṃ vadanti // SvetUp_2.13

yathaiva bimbaṃ mṛdayopaliptaṃ tejomayaṃ bhrājate tat sudhāntam 
tad vātmatattvaṃ prasamīkṣya dehī ekaḥ kṛtārtho bhavate vītaśokaḥ // SvetUp_2.14

yad ātmatattvena tu brahmatattvaṃ dīpopameneha yuktaḥ prapaśyet 
ajaṃ dhruvaṃ sarvatattvair viśuddhaṃ jñātvā devaṃ mucyate sarvapāśaiḥ // SvetUp_2.15

eṣa ha devaḥ pradiśo 'nu sarvāḥ pūrvo ha jātaḥ sa u garbhe antaḥ 
sa eva jātaḥ sa janiṣyamānaḥ pratyaṅ janās tiṣṭhati sarvatomukhaḥ // SvetUp_2.16

yo devo agnau yo apsu yo viśvaṃ bhuvanam āviveśa 
ya oṣadhīṣu yo vanaspatīṣu tasmai devāya namo namaḥ // SvetUp_2.17


tṛtīyo 'dhyāyaḥ

ya eko jālavān īśata īśanībhiḥ sarvāṃl lokān īśata īśanībhiḥ 
ya evaika udbhave saṃbhave ca ya etad vidur amṛtās te bhavanti // SvetUp_3.1

eko hi rudro na dvitīyāya tasthe ya imāṃl lokān īśata īśanībhiḥ 
pratyaṅ janās tiṣṭhati saṃcukocāntakāle saṃsṛjya viśvā bhuvanāni gopāḥ // SvetUp_3.2

viśvataścakṣur uta viśvatomukho viśvatobāhur uta viśvataspāt 
saṃ bāhubhyāṃ dhamati saṃ patatrair dyāvābhūmī janayan deva ekaḥ // SvetUp_3.3

yo devānāṃ prabhavaś codbhavaś ca viśvādhipo rudro maharṣiḥ 
hiraṇyagarbhaṃ janayāmāsa pūrvaṃ sa no buddhyā śubhayā saṃyunaktu // SvetUp_3.4

yā te rudra śivā tanūr aghorāpāpakāśinī 
tayā nas tanuvā śaṃtamayā giriśantābhicākaśīhi // SvetUp_3.5

yām iṣuṃ giriśanta haste bibharṣy astave 
śivāṃ giritra tāṃ kuru mā hiṃsīḥ puruṣaṃ jagat // SvetUp_3.6

tataḥ paraṃ brahma paraṃ bṛhantaṃ yathānikāyaṃ sarvabhūteṣu gūḍhaṃ 
viśvasyaikaṃ pariveṣṭitāram īśaṃ taṃ jñātvāmṛtā bhavanti // SvetUp_3.7

vedāham etaṃ puruṣaṃ mahāntam ādityavarṇaṃ tamasaḥ parastāt 
tam eva viditvāti mṛtyum eti nānyaḥ panthā vidyate 'yanāya // SvetUp_3.8

yasmāt paraṃ nāparam asti kiṃcid yasmān nāṇīyo na jyāyo 'sti kiṃcit 
vṛkṣa iva stabdho divi tiṣṭhaty ekas tenedaṃ pūrṇaṃ puruṣeṇa sarvam // SvetUp_3.9

tato yad uttarataraṃ yad arūpam anāmayam 
ya etad vidur amṛtās te bhavanti athetare duḥkham evāpiyanti // SvetUp_3.10

sarvānanaśirogrīvaḥ sarvabhūtaguhāśayaḥ 
sarvavyāpī sa bhagavāṃs tasmāt sarvagataḥ śivaḥ // SvetUp_3.11

mahān prabhur vai puruṣaḥ sattvasyaiṣa pravartakaḥ 
sunirmalām imāṃ prāptim īśāno jyotir avyayaḥ // SvetUp_3.12

aṅguṣṭhamātraḥ puruṣo 'ntarātmā sadā janānāṃ hṛdaye saṃniviṣṭaḥ 
hṛdā manīṣā manasābhikḷpto ya etad vidur amṛtās te bhavanti // SvetUp_3.13

sahasraśīrṣā puruṣaḥ sahasrākṣaḥ sahasrapāt 
sa bhūmiṃ viśvato vṛtvā atyatiṣṭhad daśāṅgulam // SvetUp_3.14

puruṣa evedaṃ sarvaṃ yad bhūtaṃ yac ca bhavyam 
utāmṛtatvasyeśāno yad annenātirohati // SvetUp_3.15

sarvataḥpāṇipādaṃ tat sarvato'kṣiśiromukhaṃ 
sarvataḥśrutimal loke sarvam āvṛtya tiṣṭhati // SvetUp_3.16

sarvendriyaguṇābhāsaṃ sarvendriyavivarjitaṃ 
sarvasya prabhum īśānaṃ sarvasya śaraṇaṃ suhṛt // SvetUp_3.17

navadvāre pure dehī haṃso lelāyate bahiḥ 
vaśī sarvasya lokasya sthāvarasya carasya ca // SvetUp_3.18

apāṇipādo javano grahītā paśyaty acakṣuḥ sa śṛṇoty akarṇaḥ 
sa vetti vedyaṃ na ca tasyāsti vettā tam āhur agryaṃ puruṣaṃ mahāntam // SvetUp_3.19

aṇor aṇīyān mahato mahīyān ātmā guhāyāṃ nihito 'sya jantoḥ 
tam akratuṃ paśyati vītaśoko dhātuprasādān mahimānam īśam // SvetUp_3.20

vedāham etam ajaraṃ purāṇaṃ sarvātmānaṃ sarvagataṃ vibhutvāt 
janmanirodhaṃ pravadanti yasya brahmavādino hi pravadanti nityam // SvetUp_3.21


caturtho 'dhyāyaḥ

ya eko 'varṇo bahudhā śaktiyogād varṇān anekān nihitārtho dadhāti 
vi caiti cānte viśvam ādau sa devaḥ sa no buddhyā śubhayā saṃyunaktu // SvetUp_4.1

tad evāgnis tad ādityas tad vāyus tad u candramāḥ 
tad eva śukraṃ tad brahma tad āpas tat prajāpatiḥ // SvetUp_4.2

tvaṃ strī tvaṃ pumān asi tvaṃ kumāra uta vā kumārī 
tvaṃ jīrṇo daṇḍena vañcasi tvaṃ jāto bhavasi viśvatomukhaḥ // SvetUp_4.3

nīlaḥ pataṅgo harito lohitākṣas taḍidgarbha ṛtavaḥ samudrāḥ 
anādimāṃs tvaṃ vibhutvena vartase yato jātāni bhuvanāni viśvā // SvetUp_4.4

ajām ekāṃ lohitaśuklakṛṣṇāṃ bahvīḥ prajāḥ sṛjamānāṃ sarūpāḥ 
ajo hy eko juṣamāṇo 'nuśete jahāty enāṃ bhuktabhogām ajo 'nyaḥ // SvetUp_4.5

dvā suparṇā sayujā sakhāyā samānaṃ vṛkṣaṃ pariṣasvajāte 
tayor anyaḥ pippalaṃ svādv atty anaśnann anyo abhicākaśīti // SvetUp_4.6

samāne vṛkṣe puruṣo nimagno anīśayā śocati muhyamānaḥ 
juṣṭaṃ yadā paśyaty anyam īśaṃ asya mahimānam iti vītaśokaḥ // SvetUp_4.7

ṛco akṣare parame vyoman yasmin devā adhi viśve niṣedhuḥ 
yas tan na veda kim ṛcā kariṣyati ya it tad vidus ta ime samāsate // SvetUp_4.8

chandāṃsi yajñāḥ kratavo vratāni bhūtaṃ bhavyaṃ yac ca vedā vadanti 
asmān māyī sṛjate viśvam etat tasmiṃś cānyo māyayā saṃniruddhaḥ // SvetUp_4.9

māyāṃ tu prakṛtiṃ vidyān māyinaṃ tu maheśvaraṃ 
tasyāvayavabhūtais tu vyāptaṃ sarvaṃ idaṃ jagat // SvetUp_4.10

yo yoniṃ-yonim adhitiṣṭhaty eko yasminn idaṃ saṃ ca vi caiti sarvam 
tam īśānaṃ varadaṃ devam īḍyaṃ nicāyyemāṃ śāntim atyantam eti // SvetUp_4.11

yo devānāṃ prabhavaś codbhavaś ca viśvādhiko rudro maharṣiḥ 
hiraṇyagarbhaṃ paśyata jāyamānaṃ sa no buddhyā śubhayā saṃyunaktu // SvetUp_4.12

yo devānām adhipo yasmiṃl lokā adhiśritāḥ 
ya īśe asya dvipadaś catuṣpadaḥ kasmai devāya haviṣā vidhema // SvetUp_4.13

sūkṣmātisūkṣmaṃ kalilasya madhye viśvasya sraṣṭāram anekarūpaṃ 
viśvasyaikaṃ pariveṣṭitāraṃ jñātvā śivaṃ śāntim atyantam eti // SvetUp_4.14

sa eva kāle bhuvanasya goptā viśvādhipaḥ sarvabhūteṣu gūḍhaḥ 
yasmin yuktā brahmarṣayo devatāś ca tam evaṃ jñātvā mṛtyupāśāṃś chinatti // SvetUp_4.15

ghṛtāt paraṃ maṇḍam ivātisūkṣmaṃ jñātvā śivaṃ sarvabhūteṣu gūḍhaṃ 
viśvasyaikaṃ pariveṣṭitāraṃ jñātvā devaṃ mucyate sarvapāśaiḥ // SvetUp_4.16

eṣa devo viśvakarmā mahātmā sadā janānāṃ hṛdaye saṃniviṣṭaḥ 
hṛdā manīṣā manasābhikḷpto ya etad vidur amṛtās te bhavanti // SvetUp_4.17

yadātamas tan na divā na rātrir na san na cāsac chiva eva kevalaḥ 
tad akṣaraṃ tat savitur vareṇyaṃ prajñā ca tasmāt prasṛtā purāṇī // SvetUp_4.18

nainam ūrdhvaṃ na tiryañcaṃ na madhye parijagrabhat 
na tasya pratimā asti yasya nāma mahad yaśaḥ // SvetUp_4.19

na saṃdṛśe tiṣṭhati rūpam asya na cakṣuṣā paśyati kaścanainaṃ 
hṛdā hṛdisthaṃ manasā ya enam evaṃ vidur amṛtās te bhavanti // SvetUp_4.20

ajāta ity evaṃ kaścid bhīruḥ prapadyate 
rudra yat dakṣiṇaṃ mukham tena māṃ pāhi nityam // SvetUp_4.21

mā nas toke tanaye mā na āyuṣi mā no goṣu mā no aśveṣu rīriṣaḥ 
vīrān mā no rudra bhāmito vadhīr haviṣmantaḥ sadam it tvā havāmahe // SvetUp_4.22


pañcamo 'dhyāyaḥ

dve akṣare brahmapare tv anante vidyāvidye nihite yatra gūḍhe 
kṣaraṃ tv avidyā hy amṛtaṃ tu vidyā vidyāvidye īśate yas tu so 'nyaḥ // SvetUp_5.1

yo yoniṃ yonim adhitiṣṭhaty eko viśvāni rūpāṇi yonīś ca sarvāḥ 
ṛṣiṃ prasūtaṃ kapilaṃ yas tam agre jñānair bibharti jāyamānaṃ ca paśyet // SvetUp_5.2

ekaikaṃ jālaṃ bahudhā vikurvann asmin kṣetre saṃharaty eṣa devaḥ 
bhūyaḥ sṛṣṭvā patayas tatheśaḥ sarvādhipatyaṃ kurute mahātmā // SvetUp_5.3

sarvā diśa ūrdhvam adhaś ca tiryak prakāśayan bhrājate yad vānaḍvān 
evaṃ sa devo bhagavān vareṇyo yonisvabhāvān adhitiṣṭhaty ekaḥ // SvetUp_5.4

yac ca svabhāvaṃ pacati viśvayoniḥ pācyāṃś ca sarvān pariṇāmayed yaḥ 
sarvam etad viśvam adhitiṣṭhaty eko guṇāṃś ca sarvān viniyojayed yaḥ // SvetUp_5.5

tad vedaguhyopaniṣatsu gūḍhaṃ tad brahmā vedate brahmayoniṃ 
ye pūrvaṃ devā ṛṣayaś ca tad vidus te tanmayā amṛtā vai babhūvuḥ // SvetUp_5.6

guṇānvayo yaḥ phalakarmakartā kṛtasya tasyaiva sa copabhoktā 
sa viśvarūpas triguṇas trivartmā prāṇādhipaḥ saṃcarati svakarmabhiḥ // SvetUp_5.7

aṅguṣṭhamātro ravitulyarūpaḥ saṃkalpāhaṃkārasamanvito yaḥ 
buddher guṇenātmaguṇena caiva ārāgramātro hy avaro 'pi dṛṣṭaḥ // SvetUp_5.8

vālāgraśatabhāgasya śatadhā kalpitasya ca 
bhāgo jīvaḥ sa vijñeyaḥ sa cānantyāya kalpate // SvetUp_5.9

naiva strī na pumān eṣa na caivāyaṃ napuṃsakaḥ 
yad yac charīram ādatte tena tena sa yujyate // SvetUp_5.10

saṃkalpanasparśanadṛṣṭimohair grāsāmbuvṛṣṭyā cātmavivṛddhijanma 
karmānugāny anukramena dehī sthāneṣu rūpāṇy abhisaṃprapadyate // SvetUp_5.11

sthūlāni sūkṣmāṇi bahūni caiva rūpāṇi dehī svaguṇair vṛṇoti 
kriyāguṇair ātmaguṇaiś ca teṣāṃ saṃyogahetur aparo 'pi dṛṣṭaḥ // SvetUp_5.12

anādyanantaṃ kalilasya madhye viśvasya sraṣṭāram anekarūpaṃ 
viśvasyaikaṃ pariveṣṭitāraṃ jñātvā devaṃ mucyate sarvapāśaiḥ // SvetUp_5.13

bhāvagrāhyam anīḍākhyaṃ bhāvābhāvakaraṃ śivaṃ 
kalāsargakaraṃ devaṃ ye vidus te jahus tanum // SvetUp_5.14


ṣaṣṭho 'dhyāyaḥ

svabhāvam eke kavayo vadanti kālaṃ tathānye parimuhyamānāḥ 
devasyaiṣa mahimā tu loke yenedaṃ bhrāmyate brahmacakram // SvetUp_6.1

yenāvṛtaṃ nityam idaṃ hi sarvaṃ jñaḥ kālakālo guṇī sarvavidyaḥ 
teneśitaṃ karma vivartate ha pṛthivyāptejo'nilakhāni cintyam // SvetUp_6.2

tat karma kṛtvā vinivartya bhūyas tattvasya tattvena sametya yogam 
ekena dvābhyāṃ tribhir aṣṭabhir vā kālena caivātmaguṇaiś ca sūkṣmaiḥ // SvetUp_6.3

ārabhya karmāṇi guṇānvitāni bhāvāṃś ca sarvān viniyojayed yaḥ 
teṣām abhāve kṛtakarmanāśaḥ karmakṣaye yāti sa tattvato 'nyaḥ // SvetUp_6.4

ādiḥ sa saṃyoganimittahetuḥ paras trikālād akalo 'pi dṛṣṭaḥ 
taṃ viśvarūpaṃ bhavabhūtam īḍyaṃ devaṃ svacittastham upāsya pūrvam // SvetUp_6.5

sa vṛkṣakālākṛtibhiḥ paro 'nyo yasmāt prapañcaḥ parivartate 'yaṃ 
dharmāvahaṃ pāpanudaṃ bhageśaṃ jñātvātmastham amṛtaṃ viśvadhāma // SvetUp_6.6

tam īśvarāṇāṃ paramaṃ maheśvaraṃ taṃ devatānāṃ paramaṃ ca daivataṃ 
patiṃ patīnāṃ paramaṃ parastād vidāma devaṃ bhuvaneśam īḍyam // SvetUp_6.7

na tasya kāryaṃ karaṇaṃ ca vidyate na tatsamaś cābhyadhikaś ca dṛśyate 
parāsya śaktir vividhaiva śrūyate svābhāvikī jñānabalakriyā ca // SvetUp_6.8

na tasya kaścit patir asti loke na ceśitā naiva ca tasya liṅgaṃ 
sa kāraṇaṃ karaṇādhipādhipo na cāsya kaścij janitā na cādhipaḥ // SvetUp_6.9

yas tantunābha iva tantubhiḥ pradhānajaiḥ svabhāvataḥ 
deva ekaḥ svam āvṛṇoti sa no dadhād brahmāpyayam // SvetUp_6.10

eko devaḥ sarvabhūteṣu gūḍhaḥ sarvavyāpī sarvabhūtāntarātmā 
karmādhyakṣaḥ sarvabhūtādhivāsaḥ sākṣī cetā kevalo nirguṇaś ca // SvetUp_6.11

eko vaśī niṣkriyāṇāṃ bahūṇām ekaṃ bījaṃ bahudhā yaḥ karoti 
tam ātmasthaṃ ye 'nupaśyanti dhīrās teṣāṃ sukhaṃ śāśvataṃ netareṣāṃ // SvetUp_6.12

nityo nityānāṃ cetanaś cetanānām eko bahūnāṃ yo vidadhāti kāmān 
tat kāraṇaṃ sāṃkhyayogādhigamyaṃ jñātvā devaṃ mucyate sarvapāśaiḥ // SvetUp_6.13

na tatra sūryo bhāti na candratārakaṃ nemā vidyuto bhānti kuto 'yam agniḥ 
tam eva bhāntam anubhāti sarvaṃ tasya bhāsā sarvam idaṃ vibhāti // SvetUp_6.14

eko haṃso bhuvanasyāsya madhye sa evāgniḥ salile saṃniviṣṭaḥ 
tam eva viditvāti mṛtyum eti nānyaḥ panthā vidyate 'yanāya // SvetUp_6.15

sa viśvakṛd viśvavid ātmayonir jñaḥ kālakālo guṇī sarvavidyaḥ 
pradhānakṣetrajñapatir guṇeśaḥ saṃsāramokṣasthitibandhahetuḥ // SvetUp_6.16

sa tanmayo hy amṛta īśasaṃstho jñaḥ sarvago bhuvanasyāsya goptā 
sa īśe asya jagato nityam eva nānyo hetur vidyata īśanāya // SvetUp_6.17

yo brahmāṇaṃ vidadhāti pūrvaṃ yo vai vedāṃś ca prahiṇoti tasmai 
taṃ ha devam ātmabuddhiprakāśaṃ mumukṣur vai śaraṇam ahaṃ prapadye // SvetUp_6.18

niṣkalaṃ niṣkriyaṃ śāntaṃ niravadyaṃ nirañjanam 
amṛtasya paraṃ setuṃ dagdhendhanam ivānalam // SvetUp_6.19

yadā carmavad ākāśaṃ veṣṭayiṣyanti mānavāḥ 
tadā devam avijñāya duḥkhasyānto bhaviṣyati // SvetUp_6.20

tapaḥprabhāvād devaprasādāt brahma ha śvetāśvataro 'tha vidvān 
atyāśramibhyaḥ paramaṃ pavitraṃ provāca samyag ṛṣisaṅghajuṣṭam // SvetUp_6.21

vedānte paramaṃ guhyaṃ purākalpe pracoditam 
nāpraśāntāya dātavyaṃ nāputrāyāśiṣyāya vā punaḥ // SvetUp_6.22

yasya deve parā bhaktir yathā deve tathā gurau 
tasyaite kathitā hy arthāḥ prakāśante mahātmanaḥ prakāśante mahātmanaḥ // SvetUp_6.23