• GRETIL
• 1_sanskr
• tei
• transformations
• plaintext
• sa_gheraNDasaMhitA

          Gheraṇḍasaṃhitā


# Header

  This file is a plain text transformation of http://gretil.sub.uni-goettingen.de/gretil/corpustei/sa_gheraNDasaMhitA.xml
  with a rudimentary header. For a more extensive header please refer to the source file.

## Data entry: Peter Thomi
## Contribution: Peter Thomi
## Date of this version: 2020-07-31

## Source: 
   - Gherandasamhita : Sanskrit-deutsch. Ed. Peter Thomi. Wichtrach: Institut fuer Indologie, 1993 (ISBN 3 7187 0013 1).

## Publisher: Göttingen Register of Electronic Texts in Indian Languages (GRETIL), SUB Göttingen

## Licence:
   This e-text was provided to GRETIL in good faith that no copyright rights have been infringed. If anyone wishes to assert copyright over this file, please contact the GRETIL management at gretil(at)sub(dot)uni-goettingen(dot)de. The file will be immediately removed pending resolution of the claim.
   Distributed under a Creative Commons Attribution-NonCommercial-ShareAlike 4.0 International License.

## Structure of references:
   A reference is assembled consisting of
   - a pragmatic abbreviation of the title: Gheraṇḍasaṃhitā = GhS,
   - the number of the  in arabic numerals,
   - the number of the verse in arabic numerals.

## Notes:
   This file has been created by mass conversion of GRETIL's Sanskrit corpus from ghers_bu.htm. Due to the heterogeneity of the sources the header markup might be suboptimal. For the sake of transparency the header of the legacy file is documented in the note element below:

   
	 Gheranda-Samhita
Electronic text based on the edition:
Gherandasamhita : Sanskrit-deutsch. Ed. Peter Thomi.
Wichtrach: Institut fuer Indologie, 1993 (ISBN 3 7187 0013 1).
Input by Peter Thomi, edited by Peter Schreiner
Analytic text, BHELA conventions
	


## Revisions:
   - 2020-07-31: TEI encoding by mass conversion of GRETIL's Sanskrit corpus


# Text

ādīśvarāya praṇanāmi tasmai $
yenopadiṣṭā haṭhayogavidyā &
virājate pronnatarājayogam %
āroḍhum icchor adhirohiṇīva // GhS_1.0

ekadā caṇḍakāpālir gatvā gheraṇḍakuṭṭiram 
praṇamya vinayād bhaktyā gheraṇḍaṃ paripṛcchhati // GhS_1.1

ghaṭasthayogaṃ yogeśa tattvajñānasya kāraṇam 
idānīṃ śrotum icchāmi yogeśvara vada prabho // GhS_1.2

sādhu sādhu mahābāho yan māṃ tvaṃ paripṛcchasi 
kathayāmi hi te tattvaṃ sāvadhāno 'vadhāraya // GhS_1.3

nāsti māyāsamaḥ pāśo nāsti yogāt paraṃ balam 
na hi jñānāt paro bandhur nāhaṃkārāt paro ripuḥ // GhS_1.4

abhyāsāt kādivarṇāder yathā śāstrāṇi bodhayet 
tathā yogaṃ samāsādya tattvajñānaṃ ca labhyate // GhS_1.5

sukṛtair duṣkṛtaiḥ kāryair jāyate prāṇināṃ ghaṭaḥ 
ghaṭād utpadyate karma ghaṭayantraṃ yathā bhramet // GhS_1.6

ūrdhvādho bhramate yadvad ghaṭayantraṃ gavāṃ vaśāt 
tadvat karmavaśāj jīvo bhramate janmamṛtyunā // GhS_1.7

āmakumbha ivāmbhaḥstho jīryamāṇaḥ sadā ghaṭaḥ 
yogānalena saṃdahya ghaṭaśuddhiṃ samācaret // GhS_1.8

śodhanaṃ dṛḍhatā caiva sthairyaṃ dhairyaṃ ca lāghavam 
pratyakṣaṃ ca nirliptaṃ ca ghatasthaṃ saptasādhanam // GhS_1.9

ṣaṭkarmaṇā śodhanaṃ ca āsanena bhaved dṛḍham 
mudrayā sthiratā caiva pratyāhāreṇa dhairyatā // GhS_1.10

prāṇāyāmāl lāghavaṃ ca dhyānāt pratyakṣam ātmani 
samādhinā nirliptaṃ ca muktir eva na saṃśayaḥ // GhS_1.11

dhautir vastis tathā netir laulikī trāṭakaṃ tathā 
kapālabhātiś caitāni ṣaṭkarmāṇi samācaret // GhS_1.12

antardhautir dantadhautir hṛddhautir mūlaśodhanam 
dhautyaś caturvidhā proktā ghaṭaṃ kurvanti nirmalam // GhS_1.13

vātasāraṃ vārisāraṃ vahnisāraṃ bahiṣkṛtam 
ghaṭasya nirmalārthāya hy antardhautiś caturvidhā // GhS_1.14

kākacañcūvad āsyena pibed vāyuṃ śanaiḥ śanaiḥ 
cālayed udaraṃ paścād vartmanā recayec chanaiḥ // GhS_1.15

vātasāraṃ paraṃ gopyaṃ dehanirmalakārakam 
sarvarogakṣayakaraṃ dehānalavivardhakam // GhS_1.16

ākaṇṭhaṃ pūrayed vāri vaktreṇa ca pibec chanaiḥ 
cālayed udareṇaiva codarād recayed adhaḥ // GhS_1.17

vārisāraṃ paraṃ gopyaṃ dehanirmalakārakam 
sādhayed yaḥ prayatnena devadehaṃ prapadyate // GhS_1.18

vārisāraṃ parāṃ dhautiṃ sādhayed yaḥ prayatnataḥ 
maladehaṃ śodhayitvā devadehaṃ prapadyate // GhS_1.19

nābhigranthiṃ merupṛṣṭhe śatavāraṃ ca kārayet 
udarāmayajaṃ tyaktvā jāṭharāgniṃ vivardhayet 
vahnisāram iyaṃ dhautir yogināṃ yogasiddhidā // GhS_1.20

eṣā dhautiḥ parā gopyā na prakāśyā kadācana 
kevalaṃ dhautimātreṇa devadeho bhaved dhruvam // GhS_1.21

kākīmudrāṃ sādhayitvā pūrayed udaraṃ mahat 
dhārayed ardhayāmaṃ tu cālayed adhavartmanā 
eṣā dhautiḥ parā gopyā na prakāśyā kadācana // GhS_1.22

nābhimagnajale sthitvā śaktināḍīṃ vimarjayet 
kārābhyāṃ kṣālayen nāḍīṃ yāvan malavisarjanam // GhS_1.23

tāvat prakṣālya nāḍīṃ ca udare veśayet punaḥ 
idaṃ prakṣālanaṃ gopyaṃ devānām api durlabham 
kevalaṃ dhautimātreṇa devadeho bhaved dhruvam // GhS_1.24

yām ārdhadhāraṇāśaktiṃ yāvan na sādhayen naraḥ 
bahiṣkṛtaṃ mahādhautī tāvan naiva tu jāyate // GhS_1.25

dantamūlaṃ jihvāmūlaṃ randhraṃ ca karṇayugmayoḥ 
kapālarandhraṃ pañceti dantadhautirvidhīyate // GhS_1.26

khadireṇa rasenātha mṛttikayā ca śuddhayā 
mārjayed dantamūlaṃ ca yāvat kilbiṣam āharet // GhS_1.27

dantamūlaṃ parā dhautir yogināṃ yogasādhane 
nityaṃ kuryāt prabhāte ca dantarakṣāya yogavit 
dantamūlaṃ dhāraṇādikāryeṣu yogināṃ yataḥ // GhS_1.28

athātaḥ saṃpravakṣyāmi jihvāśodhanakāraṇam 
jarāmaraṇarogādīn nāśayed dīrghalambikā // GhS_1.29

tarjanīmadhyamānāmā aṅgulitrayayogataḥ 
veśayed galamadhye tu mārjayel lambikāmalam 
śanaiḥ śanair mārjayitvā kaphadoṣaṃ nivārayet // GhS_1.30

mārjayen navanītena dohayec ca punaḥ punaḥ 
tadagraṃ lauhayantreṇa karṣayitvā punaḥ punaḥ // GhS_1.31

nityaṃ kuryāt prayatnena raver udayake 'stake 
evaṃ kṛte tu nitye ca lambikā dīrghatāṃ gatā // GhS_1.32

tarjanyaṅgulyagrayogān mārjayet karṇarandhrayoḥ 
nityam abhyāsayogena nādāntaraṃ prakāśanam // GhS_1.33

vṛddhāṅguṣṭhena dakṣeṇa mardayed bhālarandhrakam 
evam abhyāsayogena kaphadoṣaṃ nivārayet // GhS_1.34

nāḍī nirmalatāṃ yāti divyadṛṣṭiḥ prajāyate 
nidrānte bhojanānte ca divānte ca dine dine // GhS_1.35

hṛddhautiṃ trividhāṃ kuryād daṇḍavamanavāsasā // GhS_1.36

rambhādaṇḍaṃ hariddaṇḍaṃ vetradaṇḍaṃ tathaiva ca 
hṛnmadhye cālayitvā tu punaḥ pratyāharec chanaiḥ // GhS_1.37

kaphapittaṃ tathā kledaṃ recayed ūrdhvavartmanā 
daṇḍadhautividhānena hṛdrogaṃ nāśayed dhruvam // GhS_1.38

bhojanānte pibed vāri ākarṇapūritaṃ sudhīḥ 
ūrdhvadṛṣṭiṃ kṣaṇaṃ kṛtvā taj jalaṃ vamayet punaḥ 
nityam abhyāsayogena kaphapittaṃ nivārayet // GhS_1.39

ekonaviṃśatiḥ hastaḥ pañcaviṃśati vai tathā 
caturaṅgulavistāraṃ sūkṣmavastraṃ śanair graset 
punaḥ pratyāhared etat procyate dhautikarmakam // GhS_1.40

gulmajvaraplīhākuṣṭhakaphapittaṃ vinaśyati 
ārogyaṃ balapuṣṭiś ca bhavet tasya dine dine // GhS_1.41

apānakrūratā tāvad yāvanmūlaṃ na śodhayet 
tasmāt sarvaprayatnena mūlaśodhanam ācaret // GhS_1.42

pītamūlasya daṇḍena madhyamāṅgulināpi vā 
yatnena kṣālayed guhyaṃ vāriṇā ca punaḥ punaḥ // GhS_1.43

vārayet koṣṭhakāṭhinyam āmājīrṇaṃ nivārayet 
kāraṇaṃ kāntipuṣṭyoś ca dīpanaṃ vahnimaṇḍalam // GhS_1.44

jalavastiḥ śuṣkavastir vastī ca dvividhau smṛtau 
jalavastiṃ jale kuryāc chuṣkavastiṃ kṣitau sadā // GhS_1.45

nābhimagnajale pāyunyastanālotkaṭāsanaḥ 
ākuñcanaṃ prakāśaṃ ca jalavastiṃ samācaret // GhS_1.46

pramehaṃ ca gudāvartaṃ krūravāyuṃ nivārayet 
bhavet svacchandadehaś ca kāmadevasamo bhavet // GhS_1.47

vastiṃ paścimatānena cālayitvā śanaiḥ śanaiḥ 
aśvinīmudrayā pāyum ākuñcayet prakāśayet // GhS_1.48

evam abhyāsayogena koṣṭhadoṣo na vidyate 
vivardhayej jāṭharāgnim āmavātaṃ vināśayet // GhS_1.49

vitastimānaṃ sūkṣmasūtraṃ nāsānāle praveśayet 
mukhān nirgamayet paścāt procyate netikarmakam // GhS_1.50

sādhanān netikarmāpi khecarīsiddhim āpnuyāt 
kaphadoṣā vinaśyanti divyadṛṣṭiḥ prajāyate // GhS_1.51

amandavegaṃ tundaṃ ca bhrāmayed ubhapārśvayoḥ 
sarvarogān nihantīha dehānalavivardhanam // GhS_1.52

nimeṣonmeṣakaṃ tyaktvā sūkṣmalakṣyaṃ nirīkṣayet 
yāvad aśrū nipatate trāṭakaṃ procyate budhaiḥ // GhS_1.53

evam abhyāsayogena śāṃbhavī jāyate dhruvam 
na jāyate netrarogaḥ divyadṛṣṭipradāyakam // GhS_1.54

vāmakrameṇa vyutkrameṇa śītkrameṇa viśeṣataḥ 
bhālabhātiṃ tridhā kuryāt kaphadoṣaṃ nivārayet // GhS_1.55

iḍayā pūrayed vāyuṃ recayet piṅgalā punaḥ 
piṅgalayā pūrayitvā punaś candreṇa recayet // GhS_1.56

pūrakaṃ recakaṃ kṛtvā vegena na tu cālayet 
evam abhyāsayogena kaphadoṣaṃ nivārayet // GhS_1.57

nāsābhyāṃ jalam ākṛṣya punar vaktreṇa recayet 
pāyaṃ pāyaṃ prakurvaṃś cec chleṣmadoṣaṃ nivārayet // GhS_1.58

śītkṛtya pītvā vaktreṇa nāsānalair virecayet 
evam abhyāsayogena kāmadevasamo bhavet // GhS_1.59

na jāyate vārddhakaṃ ca jvaro naiva prajāyate 
bhavet svacchandadehaś ca kaphadoṣaṃ nivārayet // GhS_1.60

[[iti śrī-gheraṇḍa-saṃhitāyāṃ gheraṇḍa-caṇḍa-saṃvāde ghaṭa-stha-yoge ṣaṭ-karma-sādhanaṃ nāma prathamo1padeśaḥ //1// ]]

āsanāni samastāni yāvanto jīvajantavaḥ 
caturaśīti lakṣāṇi śivena kathitaṃ purā // GhS_2.1

teṣāṃ madhye viśiṣṭāni ṣoḍaśonaṃ śataṃ kṛtam 
teṣāṃ madhye martyaloke dvātriṃśad āsanaṃ śubham // GhS_2.2

siddhaṃ padmaṃ tathā bhadraṃ muktaṃ vajraṃ ca svastikam 
siṃhaṃ ca gomukhaṃ vīraṃ dhanurāsanam eva ca // GhS_2.3

mṛtaṃ guptaṃ tathā mātsyaṃ matsyendrāsanam eva ca 
gorakṣaṃ paścimottānam utkaṭaṃ saṃkaṭaṃ tathā // GhS_2.4

mayūraṃ kukkuṭaṃ kūrmaṃ tathā uttānakūrmakam 
uttānamaṇḍukaṃ vṛkṣaṃ maṇḍūkaṃ garuḍaṃ vṛṣam // GhS_2.5

śalabhaṃ makaraṃ coṣṭraṃ bhujaṃgaṃ ca yogāsanam 
dvātriṃśad āsanāny eva martyaloke ca siddhidā // GhS_2.6

yonisthānakam aṅghrimūlaghaṭitaṃ saṃpīḍya gulphetaraṃ $
meḍhropary atha saṃnidhāya cibukaṃ kṛtvā hṛdi sthāpitam &
sthāṇuḥ saṃyamitendriyo 'caladṛśā paśyan bhruvor antare %
etan mokṣakapāṭabhedanakaraṃ siddhāsanaṃ procyate // GhS_2.7

vāmor ūpari dakṣiṇaṃ hi caraṇaṃ saṃsthāpya vāmaṃ tathā $
dakṣor ūpari paścimena vidhinā kṛtvā karābhyāṃ dṛḍham &
aṅguṣṭhau hṛdaye nidhāya cibukaṃ nāsāgram ālokayed %
etad vyādhivikāranāśanakaraṃ padmāsanaṃ procyate // GhS_2.8

gulphau ca vṛṣaṇasyādho vyutkrameṇa samāhitau 
pādāṅguṣṭhau karābhyāṃ ca dhṛtvā ca pṛṣṭhadeśataḥ // GhS_2.9

jālaṃdharaṃ samāsādya nāsāgram avalokayet 
bhadrāsanaṃ bhaved etat sarvavyādhivināśakam // GhS_2.10

pāyumūle vāmagulphaṃ dakṣagulphaṃ tathopari 
śirogrīvāsame kāye muktāsanaṃ tu siddhidam // GhS_2.11

jaṅghayor vajravat kṛtvā gudapārśve padāv ubhau 
vajrāsanaṃ bhaved etad yogināṃ siddhidāyakam // GhS_2.12

jānūrvor antare kṛtvā yogī pādatale ubhe 
ṛjukāyaḥ samāsīnaḥ svastikaṃ tat pracakṣate // GhS_2.13

gulphau ca vṛṣaṇasyādho vyutkrameṇordhvatāṃ gatau 
citimūlau bhūmisaṃsthau karau ca jānunopari // GhS_2.14

vyāttavaktro jalaṃdhreṇa nāsāgram avalokayet 
siṃhāsanaṃ bhaved etat sarvavyādhivināśakam // GhS_2.15

pādau bhūmau ca saṃsthāpya pṛṣṭhapārśve niveśayet 
sthirakāyaṃ samāsādya gomukhaṃ gomukhākṛti // GhS_2.16

ekapādam athaikasmin vinyased ūrusaṃsthitam 
itarasmiṃs tathā paścād vīrāsanam itīritam // GhS_2.17

prasārya pādau bhuvi daṇḍarūpau $
karau ca pṛṣṭhaṃ dhṛtapādayugmam &
kṛtvā dhanustulyavivartitāṅgaṃ %
nigadyate vai dhanurāsanaṃ tat // GhS_2.18

uttānaṃ śavavad bhūmau śayānaṃ tu śavāsanam 
śavāsanaṃ śramaharaṃ cittaviśrāntikāraṇam // GhS_2.19

jānūrvor antare pādau kṛtvā pādau ca gopayet 
pādaupari ca saṃsthāpya gudaṃ guptāsanaṃ viduḥ // GhS_2.20

muktapadmāsanaṃ kṛtvā uttānaśayanaṃ caret 
kūrparābhyāṃ śiro veṣṭya matsyāsanaṃ tu rogahā // GhS_2.21

udare paścimaṃ tānaṃ kṛtvā tiṣṭhati yatnataḥ 
namrāṅgaṃ vāmapadaṃ hi dakṣajānūpari nyaset // GhS_2.22

tatra yāmyaṃ kūrparaṃ ca yāmyakare ca vaktrakam 
bhruvor madhye gatā dṛṣṭiḥ pīṭhaṃ matsyendram ucyate // GhS_2.23

jānūrvor antare pādau uttānau vyaktasaṃsthitau 
gulphau cācchādya hastābhyām uttānābhyaṃ prayatnataḥ // GhS_2.24

kaṇṭhasaṃkocanaṃ kṛtvā nāsāgram avalokayet 
gorakṣāsanam ity āhur yogināṃ siddhikāraṇam // GhS_2.25

prasārya pādau bhuvi daṇḍarūpau $
saṃnyastabhālaṃ citiyugmamadhye &
yatnena pādau ca dhṛtau karābhyāṃ %
yogendrapīṭhaṃ paścimatānam āhuḥ // GhS_2.26

aṅguṣṭhābhyām avaṣṭabhya dharāṃ gulphau ca khe gatau 
tatropari gudaṃ nyased vijñeyam utkaṭāsanam // GhS_2.27

vāmapādaciter mūlaṃ saṃnyasya dharaṇītale 
pādadaṇḍena yāmyena veṣṭayed vāmapādakam 
jānuyugme karayugmam etat saṃkaṭam āsanam // GhS_2.28

dharām avaṣṭabhya karadvayābhyāṃ $
tat kūrpare sthāpitanābhipārśvam &
uccāsane daṇḍavad utthitaḥ khe %
mayūram etat pravadanti pīṭham // GhS_2.29

bahukadaśanabhuktaṃ bhasma kuryād aśeṣaṃ $
janayati jaṭharāgniṃ jārayet kālakūṭam &
harati sakalarogān āśu gulmajvarādīn %
bhavati vigatadoṣaṃ hy āsanaṃ śrīmayūram // GhS_2.30

padmāsanaṃ samāsādya jānūrvor antare karau 
kūrparābhyāṃ samāsīno mañcasthaḥ kukkuṭāsanam // GhS_2.31

gulphau ca vṛṣaṇasyādho vyutkrameṇa samāhitau 
ṛjukāyaśirogrīvaṃ kūrmāsanam itīritam // GhS_2.32

kukkuṭāsanabandhasthaṃ karābhyāṃ dhṛtakandharam 
khagakūrmavad uttānam etad uttānakūrmakam // GhS_2.33

pādatalau pṛṣṭhadeśe aṅguṣṭhau dvau ca saṃspṛśet 
jānuyugmaṃ puraskṛtya sādhayen maṇḍukāsanam // GhS_2.34

maṇḍūkāsanabandhasthaṃ kūrparābhyāṃ dhṛtaṃ śiraḥ 
etad bhekavad uttānam etad uttānamaṇḍukam // GhS_2.35

vāmorumūladeśe ca yāmyaṃ pādaṃ nidhāya tu 
tiṣṭhati vṛkṣavad bhūmau vṛkṣāsanam idaṃ viduḥ // GhS_2.36

jaṅghorubhyāṃ dharāṃ pīḍya sthirakāyo dvijānunā 
jānūpari karayugmaṃ garuḍāsanam ucyate // GhS_2.37

yāmyagulphe pāyumūlaṃ vāmabhāge padetaram 
viparītaṃ spṛśed bhūmiṃ vṛṣāsanam idaṃ bhavet // GhS_2.38

adhyāsya śete padayugmavakṣe $
bhūmim avaṣṭabhya karadvayābhyām &
pādau ca śūnye ca vitasti cordhvaṃ %
vadanti pīṭhaṃ śalabhaṃ munīndrāḥ // GhS_2.39

adhyāsya śete hṛdayaṃ nidhāya $
bhūmau ca pādau pravisāryamāṇau &
śiraś ca dhṛtvā karadaṇḍayugme %
dehāgnikāraṃ makarāsanaṃ tat // GhS_2.40

adhyāsya śete padayugmam astaṃ $
pṛṣṭhe nidhāyāpi dhṛtaṃ karābhyām &
ākuñcya samyag ghy udarāsyagaṇḍam %
uṣṭraṃ ca pīṭhaṃ yatayo vadanti // GhS_2.41

aṅguṣṭhanābhiparyantam adho bhūmau ca vinyaset 
karatalābhyāṃ dharāṃ dhṛtvā ūrdhvaṃ śīrṣaṃ phaṇīva hi // GhS_2.42

dehāgnir vardhate nityaṃ sarvarogavināśanam 
jāgarti bhujagī devī sādhanād bhujaṃgāsanam // GhS_2.43

uttānau caraṇau kṛtvā saṃsthāpya jānunopari 
āsanopari saṃsthāpya uttānaṃ karayugmakam // GhS_2.44

pūrakair vāyum ākṛṣya nāsāgram avalokayet 
yogāsanaṃ bhaved etad yogināṃ yogasādhane // GhS_2.45

[[iti śrī-gheraṇḍa-saṃhitāyāṃ gheraṇḍa-caṇḍa-saṃvāde ghata-stha-yogae āsana-prayogo nāma dvitīyo1padeśaḥ //2// ]]

mahāmudrā nabhomudrā uḍḍīyānaṃ jalaṃdharam 
mūlabandhaṃ mahābandhaṃ mahāvedhaś ca khecarī // GhS_3.1

viparītakaraṇī yonir vajrolī śakticālanī 
taḍāgī māṇḍukī mudrā śāṃbhavī pañcadhāraṇā // GhS_3.2

aśvinī pāśinī kākī mātaṅgī ca bhujaṃginī 
pañcaviṃśatimudrāś ca siddhidā iha yoginām // GhS_3.3

mudrāṇāṃ paṭalaṃ devi kathitaṃ tava saṃnidhau 
yena vijñātamātreṇa sarvasiddhiḥ prajāyate // GhS_3.4

gopanīyaṃ prayatnena na deyaṃ yasya kasyacit 
prītidaṃ yogināṃ caiva durlabhaṃ marutām api // GhS_3.5

pāyumūlaṃ vāmagulphe saṃpīḍya dṛḍhayatnataḥ 
yāmyapādaṃ prasāryātha karābhyāṃ dhṛtapadāṅguliḥ // GhS_3.6

kaṇṭhasaṃkocanaṃ kṛtvā bhruvor madhye nirīkṣayet 
pūrakair vāyuṃ saṃpūrya mahāmudrā nigadyate // GhS_3.7

valitaṃ palitaṃ caiva jarāṃ mṛtyuṃ nivārayet 
kṣayakāsaṃ gudāvartaṃ plīhājīrṇaṃ jvaraṃ tathā 
nāśayet sarvarogāṃś ca mahāmudrābhisevanāt // GhS_3.8

yatra yatra sthito yogī sarvakāryeṣu sarvadā 
ūrdhvajihvaḥ sthiro bhūtvā dhārayet pavanaṃ sadā 
nabhomudrā bhaved eṣā yogināṃ roganāśinī // GhS_3.9

udare paścimaṃ tānaṃ nābher ūrdhvaṃ tu kārayet 
uḍḍīnaṃ kurute yasmād aviśrāntaṃ mahākhagaḥ 
uḍḍīyānaṃ tv asau bandho mṛtyumātaṃgakesarī // GhS_3.10

samagrād bandhanād dhy etad uḍḍīyānaṃ viśiṣyate 
uḍḍīyāne samabhyaste muktiḥ svābhāvikī bhavet // GhS_3.11

kaṇṭhasaṃkocanaṃ kṛtvā cibukaṃ hṛdaye nyaset 
jālaṃdhare kṛte bandhe ṣoḍaśādhārabandhanam 
jālaṃdharamahāmudrā mṛtyoś ca kṣayakāriṇī // GhS_3.12

siddhaṃ jālaṃdharaṃ bandhaṃ yogināṃ siddhidāyakam 
ṣaṇmāsam abhyased yo hi sa siddho nātra saṃśayaḥ // GhS_3.13

pārṣṇinā vāmapādasya yonim ākuñcayet tataḥ 
nābhigranthiṃ merudaṇḍe saṃpīḍya yatnataḥ sudhīḥ // GhS_3.14

meḍhraṃ dakṣiṇagulphena dṛḍhabandhaṃ samācaret 
nābher ūrdhvam adhaś cāpi tānaṃ kuryāt prayatnataḥ 
jarāvināśinī mudrā mūlabandho nigadyate // GhS_3.15

saṃsārasāgaraṃ tartum abhilaṣati yaḥ pumān 
virale sugupto bhūtvā mudrām etāṃ samabhyaset // GhS_3.16

abhyāsād bandhanasyāsya marutsiddhir bhaved dhruvam 
sādhayed yatnatas tarhi maunī tu vijitālasaḥ // GhS_3.17

vāmapādasya gulphena pāyumūlaṃ nirodhayet 
dakṣapādena tad gulphaṃ saṃpīḍya yatnataḥ sudhīḥ // GhS_3.18

śanaiḥ śanaiś cālayet pārṣṇiṃ yonim ākuñcayec chanaiḥ 
jālaṃdhare dhārayet prāṇaṃ mahābandho nigadyate // GhS_3.19

mahābandhaḥ paro bandho jarāmaraṇanāśanaḥ 
prasādād asya bandhasya sādhayet sarvavāñchitam // GhS_3.20

rūpayauvanalāvaṇyaṃ nārīṇāṃ puruṣaṃ vinā 
mūlabandhamahābandhau mahāvedhaṃ vinā tathā // GhS_3.21

mahābandhaṃ samāsādya uḍḍānakumbhakaṃ caret 
mahāvedhaḥ samākhyāto yogināṃ siddhidāyakaḥ // GhS_3.22

mahābandhamūlabandhau mahāvedhasamanvitau 
pratyahaṃ kurute yas tu sa yogī yogavittamaḥ // GhS_3.23

na mṛtyuto bhayaṃ tasya na jarā tasya vidyate 
gopanīyaḥ prayatnena vedho yaṃ yogipuṃgavaiḥ // GhS_3.24

jihvādho nāḍīṃ saṃchitya rasanāṃ cālayet sadā 
dohayen navanītena lauhayantreṇa karṣayet // GhS_3.25

evaṃ nityaṃ samabhyāsāl lambikā dīrghatāṃ vrajet 
yāvad gacched bhruvor madhye tadā sidhyati khecarī // GhS_3.26

rasanāṃ tālumadhye tu śanaiḥ śanaiḥ praveśayet 
kapālakuhare jihvā praviṣṭā viparītagā 
bhruvor madhye gatā dṛṣṭir mudrā bhavati khecarī // GhS_3.27

na ca mūrcchā kṣudhā tṛṣṇā naivālasyaṃ prajāyate 
na ca rogo jarā mṛtyur devadehaṃ prapadyate // GhS_3.28

na cāgnir dahate gātraṃ na śoṣayati mārutaḥ 
na dehaṃ kledayanty āpo daṃśayen na bhujaṃgamaḥ // GhS_3.29

lāvaṇyaṃ ca bhaved gātre samādhir jāyate dhruvam 
kapālavaktrasaṃyoge rasanā rasam āpnuyāt // GhS_3.30

nānāvidhisamudbhūtam ānandaṃ ca dine dine 
ādau lavaṇakṣāraṃ ca tatas tiktakaṣāyakam // GhS_3.31

navanītaṃ ghṛtaṃ kṣīraṃ dadhitakramadhūni ca 
drākṣārasaṃ ca pīyūṣaṃ jāyate rasanodakam // GhS_3.32

nābhimūle vaset sūryas tālumūle ca candramāḥ 
amṛtaṃ grasate sūryas tato mṛtyuvaśo naraḥ // GhS_3.33

ūrdhvaṃ ca yojayet sūryaṃ candraṃ ca adha ānayet 
viparītakarī mudrā sarvatantreṣu gopitā // GhS_3.34

bhūmau śiraś ca saṃsthāpya karayugmaṃ samāhitaḥ 
ūrdhvapādaḥ sthiro bhūtvā viparītakarī matā // GhS_3.35

mudreyaṃ sādhayen nityaṃ jarāṃ mṛtyuṃ ca nāśayet 
sa siddhaḥ sarvalokeṣu pralaye 'pi na sīdati // GhS_3.36

siddhāsanaṃ samāsādya karṇākṣināsikāmukham 
aṅguṣṭhatarjanīmadhyānāmādibhiś ca dhārayet // GhS_3.37

kākībhiḥ prāṇaṃ saṃkṛṣya apāne yojayet tataḥ 
ṣaṭ cakrāṇi kramād dhṛtvā huṃhaṃsamanunā sudhīḥ // GhS_3.38

caitanyam ānayed devīṃ nidritā yā bhujaṃginī 
jīvena sahitāṃ śaktiṃ samutthāpya parāmbuje // GhS_3.39

śaktimayaṃ svayaṃ bhūtvā paraṃ śivena saṃgamam 
nānāsukhaṃ vihāraṃ ca cintayet paramaṃ sukham // GhS_3.40

śivaśaktisamāyogād ekāntaṃ bhuvi bhāvayet 
ānandamānaso bhūtvā ahaṃ brahmeti saṃbhavet // GhS_3.41

yonimudrā parā gopyā devānām api durlabhā 
sakṛttadbhāvasaṃsiddhaḥ samādhisthaḥ sa eva hi // GhS_3.42

brahmahā bhrūṇahā caiva surāpo gurutalpagaḥ 
etaiḥ pāpair na lipyate yonimudrānibandhanāt // GhS_3.43

yāni pāpāni ghorāṇi upapāpāni yāni ca 
tāni sarvāṇi naśyanti yonimudrānibandhanāt 
tasmād abhyasanaṃ kuryād yadi muktiṃ samicchati // GhS_3.44

dharām avaṣṭabhya karadvayābhyām $
ūrdhvaṃ kṣipet pādayugaṃ śiraḥ khe &
śaktiprabodhāya cirajīvanāya %
vajrolimudrāṃ munayo vadanti // GhS_3.45

ayaṃ yogo yogaśreṣṭho yogināṃ muktikāraṇam 
ayaṃ hitaprado yogo yogināṃ siddhidāyakaḥ // GhS_3.46

etad yogaprasādena bindusiddhir bhaved dhruvam 
siddhe bindau mahāyatne kiṃ na sidhyati bhūtale // GhS_3.47

bhogena mahatā yukto yadi mudrāṃ samācaret 
tathāpi sakalā siddhis tasya bhavati niścitam // GhS_3.48

mūlādhāre ātmaśaktiḥ kuṇḍalī paradevatā 
śayitā bhujagākārā sārdhatrivalayānvitā // GhS_3.49

yāvat sā nidritā dehe tāvaj jīvaḥ paśur yathā 
jñānaṃ na jāyate tāvat koṭiyogaṃ samabhyaset // GhS_3.50

udghāṭayet kavāṭaṃ ca yathā kuñcikayā haṭhāt 
kuṇḍalinyāḥ prabodhena brahmadvāraṃ vibhedayet // GhS_3.51

nābhiṃ bṛhadveṣṭanaṃ ca na ca nagnaṃ bahiḥ sthitam 
gopanīyagṛhe sthitvā śakticālanam abhyaset // GhS_3.52

vitastipramitaṃ dīrghaṃ vistāre caturaṅgulam 
mṛdulaṃ dhavalaṃ sūkṣmaveṣṭanāmbaralakṣaṇam 
evam ambaram uktaṃ ca kaṭisūtreṇa yojayet // GhS_3.53

bhāsmanā gātrasaṃliptaṃ siddhāsanaṃ samācaret 
nāsābhyāṃ prāṇam ākṛṣya apāne yojayed balāt // GhS_3.54

tāvad ākuñcayed guhyaṃ śanair aśvinimudrayā 
yāvad gacchet suṣumṇāyāṃ vāyuḥ prakāśayed dhaṭhāt // GhS_3.55

tāvad vāyuprabhedena kumbhikā ca bhujaṃginī 
baddhaśvāsas tato bhūtvā ca ūrdhvamātraṃ prapadyate 
śabdadvayaṃ phalaikaṃ tu yonimudrāṃ ca cālayet // GhS_3.56

vinā śakticālanena yonimudrā na sidhyati 
ādau cālanam abhyasya yonimudrāṃ samabhyaset // GhS_3.57

iti te kathitaṃ caṇḍa prakāraṃ śakticālanam 
gopanīyaṃ prayatnena dine dine samabhyaset // GhS_3.58

mudreyaṃ paramā gopyā jarāmaraṇanāśinī 
tasmād abhyasanaṃ kāryaṃ yogibhiḥ siddhikāṅkṣibhiḥ // GhS_3.59

nityaṃ yo 'bhyasate yogī siddhis tasya kare sthitā 
tasya vigrahasiddhiḥ syād rogāṇāṃ saṃkṣayo bhavet // GhS_3.60

udare paścimaṃ tānaṃ kṛtvā ca taḍāgākṛti 
taḍāgī sā parā mudrā jarāmṛtyuvināśinī // GhS_3.61

mukhaṃ saṃmudritaṃ kṛtvā jihvāmūlaṃ pracālayet 
śanair grased amṛtaṃ tan māṇḍukīṃ mudrikāṃ viduḥ // GhS_3.62

valitaṃ palitaṃ naiva jāyate nityayauvanam 
na keśe jāyate pāko yaḥ kuryān nitya māṇḍukīm // GhS_3.63

netrāñjanaṃ samālokya ātmārāmaṃ nirīkṣayet 
sā bhavec chāṃbhavī mudrā sarvatantreṣu gopitā // GhS_3.64

vedaśāstrapurāṇāni sāmānyagaṇikā iva 
iyaṃ tu śāṃbhavī mudrā guptā kulavadhūr iva // GhS_3.65

sa eva ādināthaś ca sa ca nārāyaṇaḥ svayam 
sa ca brahmā sṛṣṭikārī yo mudrāṃ vetti śāṃbhavīm // GhS_3.66

satyaṃ satyaṃ punaḥ satyaṃ satyam uktaṃ maheśvara 
śāṃbhavīṃ yo vijānīyāt sa ca brahma na cānyathā // GhS_3.67

kathitā śāṃbhavī mudrā śṛṇuṣva pañcadhāraṇām 
dhāraṇāni samāsādya kiṃ na sidhyati bhūtale // GhS_3.68

anena naradehena svargeṣu gamanāgamam 
manogatir bhavet tasya khecaratvaṃ na cānyathā // GhS_3.69

yat tattvaṃ haritāladeśaracitaṃ bhaumaṃ lakārānvitaṃ $
vedāsraṃ kamalāsanena sahitaṃ kṛtvā hṛdi sthāyinam &
prāṇaṃ tatra vinīya pañcaghaṭikāś cittānvitaṃ dhārayed %
eṣā stambhakarī sadā kṣitijayaṃ kuryād adhodhāraṇā // GhS_3.70

pārthivīdhāraṇāmudrāṃ yaḥ karoti ca nityaśaḥ 
mṛtyuṃjayaḥ svayaṃ so 'pi sa siddho vicared bhuvi // GhS_3.71

śaṅkhendupratimaṃ ca kundadhavalaṃ tattvaṃ kilālaṃ śubhaṃ $
tat pīyūṣavakārabījasahitaṃ yuktaṃ sadā viṣṇunā &
prāṇaṃ tatra vinīya pañcaghaṭikāś cittānvitaṃ dhārayed %
eṣā duḥsahatāpapāpahariṇī syād āmbhasī dhāraṇā // GhS_3.72

āmbhasīṃ paramāṃ mudrāṃ yo jānāti sa yogavit 
jale ca gabhīre ghore maraṇaṃ tasya no bhavet // GhS_3.73

iyaṃ tu paramā mudrā gopanīyā prayatnataḥ 
prakāśāt siddhihāniḥ syāt satyaṃ vacmi ca tattvataḥ // GhS_3.74

yan nābhisthitam indra=gopasadṛśaṃ bījatrikoṇānvitaṃ $
tattvaṃ tejamayaṃ pradīptam aruṇaṃ rudreṇa yat siddhidam &
prāṇaṃ tatra vinīya pañcaghaṭikāś cittānvitaṃ dhārayed %
eṣā kālagabhīrabhītiharaṇī vaiśvānarī dhāraṇā // GhS_3.75

pradīpte jvalite vahnau yadi patati sādhakaḥ 
etanmudrāprasādena sa jīvati na mṛtyubhāk // GhS_3.76

yad bhinnāñjanapuñjasaṃnibham idaṃ dhūmrāvabhāsaṃ paraṃ $
tattvaṃ sattvamayaṃ yakārasahitaṃ yatreśvaro devatā &
prāṇaṃ tatra vinīya pañcaghaṭikāś cittānvitaṃ dhārayed %
eṣā khe gamanaṃ karoti yamināṃ syād vāyavī dhāraṇā // GhS_3.77

iyaṃ tu paramā mudrā jarāmṛtyuvināśinī 
vāyunā mriyate nāpi khe ca gatipradāyinī // GhS_3.78

śaṭhāya bhaktihīnāya na deyā yasya kasyacit 
datte ca siddhihāniḥ syāt satyaṃ vacmi ca caṇḍa te // GhS_3.79

yat sindhau varaśuddhavārisadṛśaṃ vyomaṃ paraṃ bhāsitaṃ $
tattvaṃ devasadāśivena sahitaṃ bījaṃ hakārānvitam &
prāṇaṃ tatra vinīya pañcaghaṭikāś cittānvitaṃ dhārayed %
eṣā mokṣakavāṭabhedanakarī tu syān nabhodhāraṇā // GhS_3.80

ākāśīdhāraṇāṃ mudrāṃ yo vetti sa ca yogavit 
na mṛtyur jāyate tasya pralaye nāvasīdati // GhS_3.81

ākuñcayed gudadvāraṃ prakāśayet punaḥ punaḥ 
sā bhaved aśvinī mudrā śaktiprabodhakāriṇī // GhS_3.82

aśvinī paramā mudrā guhyarogavināśinī 
balapuṣṭikarī caiva akālamaraṇaṃ haret // GhS_3.83

kaṇṭhapṛṣṭe kṣipet pādau pāśavad dṛḍhabandhanam 
sā eva pāśinī mudrā śaktiprabodhakāriṇī // GhS_3.84

pāśinī mahatī mudrā balapuṣṭividhāyinī 
sādhanīyā prayatnena sādhakaiḥ siddhikāṅkṣibhiḥ // GhS_3.85

kākacañcuvad āsyena pibed vāyuṃ śanaiḥ śanaiḥ 
kākī mudrā bhaved eṣā sarvarogavināśinī // GhS_3.86

kākīmudrā parā mudrā sarvatantreṣu gopitā 
asyāḥ prasādamātreṇa na rogī kākavad bhavet // GhS_3.87

kaṇṭhamagnajale sthitvā nāsābhyāṃ jalam āharet 
mukhān nirgamayet paścāt punar vaktreṇa cāharet // GhS_3.88

nāsābhyāṃ recayet paścāt kuryād evaṃ punaḥ punaḥ 
mātaṅginī parā mudrā jarāmṛtyuvināśinī // GhS_3.89

virale nirjane deśe sthitvā caikāgramānasaḥ 
kuryān mātaṅginīṃ mudrāṃ mātaṅga iva jāyate // GhS_3.90

yatra yatra sthito yogī sukham atyantam aśnute 
tasmāt sarvaprayatnena sādhayen mudrikāṃ parām // GhS_3.91

vaktraṃ kiṃcitsuprasārya cālinaṃ galayā pibet 
sā bhaved bhujagī mudrā jarāmṛtyuvināśinī // GhS_3.92

yāvac ca udare rogam ajīrṇādi viśeṣataḥ 
tat sarvaṃ nāśayed āśu yatra mudrā bhujaṃginī // GhS_3.93

idaṃ tu mudrāpaṭalaṃ kathitaṃ caṇḍa te śubham 
vallabhaṃ sarvasiddhānāṃ jarāmaraṇanāśanam // GhS_3.94

śaṭhāya bhaktihīnāya na deyaṃ yasya kasyacit 
gopanīyaṃ prayatnena durlabhaṃ marutām api // GhS_3.95

ṛjave śāntacittāya gurubhaktiparāya ca 
kulīnāya pradātavyaṃ bhogamuktipradāyakam // GhS_3.96

mudrāṇāṃ paṭalaṃ hy etat sarvavyādhivināśanam 
nityam abhyāsaśīlasya jaṭharāgnivivardhanam // GhS_3.97

na tasya jāyate mṛtyur nāsya jarādikaṃ tathā 
nāgnijalabhayaṃ tasya vāyor api kuto bhayam // GhS_3.98

kāsaḥ śvāsaḥ plīhā kuṣṭhaṃ śleṣmarogāś ca viṃśatiḥ 
mudrāṇāṃ sādhanāc caiva vinaśyanti na saṃśayaḥ // GhS_3.99

bahunā kim ihoktena sāraṃ vacmi ca caṇḍa te 
nāsti mudrāsamaṃ kiṃcit siddhidaṃ kṣitimaṇḍale // GhS_3.100

[[iti śrī-gheraṇḍa-saṃhitāyāṃ gheraṇḍa-caṇḍa-saṃvāde ghaṭa-stha-yoga-prakaraṇe mudrā-prayogo nāma tṛtīyo1padeśaḥ //3// ]]

athātaḥ saṃpravakṣyāmi pratyāhārakam uttamam 
yasya vijñānamātreṇa kāmādiripunāśanam // GhS_4.1

yato yato niścarati manaś cañcalam asthiram 
tatas tato niyamyaitad ātmany eva vaśaṃ nayet // GhS_4.2

yatra yatra gatā dṛṣṭir manas tatra pragacchati 
tataḥ pratyāhared etad ātmany eva vaśaṃ nayet // GhS_4.3

puraskāraṃ tiraskāraṃ suśrāvyaṃ vā bhayānakam 
manas tasmān niyamyaitad ātmany eva vaśaṃ nayet // GhS_4.4

śītaṃ vāpi tathā coṣṇaṃ yan manaḥsparśayogataḥ 
tasmāt pratyāhared etad ātmany eva vaśaṃ nayet // GhS_4.5

sugandhe vāpi durgandhe ghrāṇeṣu jāyate manaḥ 
tasmāt pratyāhared etad ātmany eva vaśaṃ nayet // GhS_4.6

madhurāmlakatiktādirasaṃ gataṃ yadā manaḥ 
tasmāt pratyāhared etad ātmany eva vaśaṃ nayet // GhS_4.7

śabdādiṣv anuraktāni nigṛhyākṣāṇi yogavit 
kuryāc cittānucārīṇi pratyāhāraparāyaṇaḥ // GhS_4.8

vaśyatā paramā tena jāyate 'ticalātmanām 
indriyāṇām avaśyais tair na yogī yogasādhakaḥ // GhS_4.9

prāṇāyāmair dahed doṣān dhāraṇābhiś ca kilbiṣam 
pratyāhāreṇa viṣayān dhyānenānīśvarān guṇān // GhS_4.10

yathā parvatadhātūnāṃ doṣā dahyanti dhāmyatām 
tathendriyakṛtā doṣā dahyante prāṇanigrahāt // GhS_4.11

samaḥ samāsano bhūtvā saṃhṛtya caraṇāv ubhau 
saṃvṛtāsyas tathaivorū samyag viṣṭabhya cāgrataḥ // GhS_4.12

pārṣṇibhyāṃ liṅgavṛṣaṇāv aspṛśan prayataḥ sthitaḥ 
kiṃcidunnāmitaśirā dantair dantān na saṃspṛśet 
saṃpaśyan nāsikāgraṃ svaṃ diśaś cānavalokayan // GhS_4.13

rajasā tamaso vṛttiṃ sattvena rajasas tathā 
saṃchādya nirmale sattve sthito yuñjīta yogavit // GhS_4.14

indriyāṇīndriyārthebhyaḥ prāṇādīn mana eva ca 
nigṛhya samavāyena pratyāhāram upakramet // GhS_4.15

yas tu pratyāharet kāmān sarvāṅgān īva kacchapaḥ 
sadātmaratir ekasthaḥ paśyaty ātmānam ātmani // GhS_4.16

sa bāhyābhyantaraṃ śaucaṃ niṣpādyākaṇṭhanābhitaḥ 
pūrayitvā budho dehaṃ pratyāhāram upakramet // GhS_4.17

tathā vai yogayuktasya yogino niyatātmanaḥ 
(sarve doṣāḥ praṇaśyanti svasthaś caivopajāyate) // GhS_4.18

[[iti śrī-gheraṇḍa-saṃhitāyāṃ gheraṇḍa-caṇḍa-saṃvāde ghaṭa-stha-yoge pratyāhāra-prayogo nāma caturtho1padeśaḥ //4// ]]

athātaḥ saṃpravakṣyāmi prāṇāyāmasya yadvidhim 
yasya sādhanamātreṇa devatulyo bhaven naraḥ // GhS_5.1

ādau sthānaṃ tathā kālaṃ mitāhāraṃ tathāparam 
nāḍīśuddhiṃ tataḥ paścāt prāṇāyāmaṃ ca sādhayet // GhS_5.2

dūradeśe tathāraṇye rājadhānyāṃ janāntike 
yogārambhaṃ na kurvīta kṛtaś cet siddhihā bhavet // GhS_5.3

aviśvāsaṃ dūradeśe araṇye bhakṣavarjitam 
lokāraṇye prakāśaś ca tasmāt trīṇi vivarjayet // GhS_5.4

sudeśe dhārmike rājye subhikṣe nirupadrave 
tatraikaṃ kuṭiraṃ kṛtvā prācīraiḥ pariveṣṭayet // GhS_5.5

vāpīkūpataḍāgaṃ ca prācīramadhyavarti ca 
nātyuccaṃ nātinīcaṃ vā kuṭiraṃ kīṭavarjitam // GhS_5.6

samyaggomayaliptaṃ ca kuṭiraṃ randhravarjitam 
evaṃ sthāne hi gupte ca prāṇāyāmaṃ samabhyaset // GhS_5.7

hemante śiśire grīṣme varṣāyāṃ ca ṛtau tathā 
yogārambhaṃ na kurvīta kṛte yogo hi rogadaḥ // GhS_5.8

vasante śaradi proktaṃ yogārambhaṃ samācaret 
tadā yogo bhavet siddho rogān mukto bhaved dhruvam // GhS_5.9

caitrādiphālgunānte ca māghādiphālgunāntike 
dvau dvau māsau ṛtubhāgau anubhāvaś catuś catuḥ // GhS_5.10

vasantaś caitravaiśākhau jyeṣṭhāṣāḍhau ca grīṣmakau 
varṣā śrāvaṇabhādrābhyāṃ śarad āśvinakārtikau 
mārgapauṣau ca hemantaḥ śiśiro māghaphālgunau // GhS_5.11

anubhāvaṃ pravakṣyāmi ṛtūnāṃ ca yathoditam 
māghādimādhavānte hi vasantānubhavaś catuḥ // GhS_5.12

caitrādi cāṣāḍhāntaṃ ca grīṣmaś cānubhavaś catuḥ 
āṣāḍhādi cāśvināntaṃ varṣā cānubhavaś catuḥ // GhS_5.13

bhādrādi mārgaśīrṣāntaṃ śarado 'nubhavaś catuḥ 
kārtikādimāghamāsāntaṃ hemantānubhavaś catuḥ 
mārgādīṃś caturo māsāñ śiśirānubhavaṃ viduḥ // GhS_5.14

vasante vāpi śaradi yogārambhaṃ tu samācaret 
tadā yogo bhavet siddho vināyāsena kathyate // GhS_5.15

mitāhāraṃ vinā yas tu yogārambhaṃ tu kārayet 
nānārogo bhavet tasya kiṃcid yogo na sidhyati // GhS_5.16

śālyannaṃ yavapiṇḍaṃ vā godhūmapiṇḍakaṃ tathā 
mudgaṃ māṣacaṇakādi śubhraṃ ca tuṣavarjitam // GhS_5.17

paṭolaṃ panasaṃ mānaṃ kakkolaṃ ca śukāśakam 
drāḍhikāṃ karkaṭīṃ rambhāṃ ḍumbarīṃ kaṇṭakaṇṭakam // GhS_5.18

āmarambhāṃ bālarambhāṃ rambhādaṇḍaṃ ca mūlakam 
vārtākīṃ mūlakam ṛddhiṃ yogī bhakṣaṇam ācaret // GhS_5.19

bālaśākaṃ kāla śākaṃ tathā paṭolapatrakam 
pañcaśākaṃ praśaṃsīyād vāstūkaṃ hilamocikāṃ // GhS_5.20

śuddhaṃ sumadhuraṃ snigdham udarārdhavivarjitam 
bhujyate surasaṃprītyā [surasaṃ prityā] mitāhāram imaṃ viduḥ // GhS_5.21

annena pūrayed ardhaṃ toyena tu tṛtīyakam 
udarasya turīyāṃśaṃ saṃrakṣed vāyucāraṇe // GhS_5.22

kaṭv amlaṃ lavaṇaṃ tiktaṃ bhṛṣṭaṃ ca dadhi takrakam 
śākotkaṭaṃ tathā madyaṃ tālaṃ ca panasaṃ tathā // GhS_5.23

kulatthaṃ masūraṃ pāṇḍuṃ kūṣmāṇḍaṃ śākadaṇḍakam 
tumbīkolakapitthaṃ ca kaṇṭabilvaṃ palāśakam // GhS_5.24

kadambaṃ jambīraṃ bimbaṃ lakucaṃ laśunaṃ viṣam 
kāmaraṅgaṃ piyālaṃ ca hiṅguśālmalikemukam // GhS_5.25

yogārambhe varjayec ca pathastrīvahnisevanam // GhS_5.26

navanītaṃ ghṛtaṃ kṣīraṃ guḍaṃ śarkarādi cekṣavaṃ 
pakvarambhāṃ nārikelaṃ dāḍimbam aśivāsavam 
drākṣāṃ tu lavalīṃ dhātrīṃ rasam amlavivarjitam // GhS_5.27

elājātilavaṅgaṃ ca pauruṣaṃ jambujāmbalam 
harītakīṃ kharjūraṃ ca yogī bhakṣaṇam ācaret // GhS_5.28

laghupākaṃ priyaṃ snigdhaṃ tathā dhātuprapoṣaṇam 
manoabhilaṣitaṃ yogyaṃ yogī bhojanam ācaret // GhS_5.29

kāṭhinyaṃ duritaṃ pūtim uṣṇaṃ paryuṣitaṃ tathā 
atiśītaṃ cāti coṣṇaṃ bhakṣyaṃ yogī vivarjayet // GhS_5.30

prātaḥsnānopavāsādikāyakleśavidhiṃ tathā 
ekāhāraṃ nirāhāraṃ yāmānte ca na kārayet // GhS_5.31

evaṃvidhividhānena prāṇāyāmaṃ samācaret 
ārambhe prathame kuryāt kṣīrādyaṃ nityabhojanam 
madhyāhne caiva sāyāhne bhojanadvayam ācaret // GhS_5.32

kuśāsane mṛgājine vyāghrājine ca kambale 
sthūlāsane samāsīnaḥ prāṅmukho vāpyudaṅmukhaḥ 
nāḍīśuddhiṃ samāsādya prāṇāyāmaṃ samabhyaset // GhS_5.33

nāḍīśuddhiṃ kathaṃ kuryān nāḍīśuddhis tu kīdṛśī 
tat sarvaṃ śrotum icchāmi tad vadasva dayānidhe // GhS_5.34

malākulāsu nāḍīṣu māruto naiva gacchati 
prāṇāyāmaḥ kathaṃ sidhyet tattvajñānaṃ kathaṃ bhavet 
tasmād ādau naḍīśuddhiṃ prāṇāyāmaṃ tato 'bhyaset // GhS_5.35

nāḍīśuddhir dvidhā proktā samanur nirmanus tathā 
bījena samanuṃ kuryān nirmanuṃ dhautikarmaṇi // GhS_5.36

dhautikarma purā proktaṃ ṣaṭkarmasādhane yathā 
śṛṇuṣva samanuṃ caṇḍa nāḍīśuddhir yathā bhavet // GhS_5.37

upaviśyāsane yogī padmāsanaṃ samācaret 
gurvādinyāsanaṃ kṛtvā yathaiva gurubhāṣitam 
nāḍīśuddhiṃ prakurvīta prāṇāyāmaviśuddhaye // GhS_5.38

vāyubījaṃ tato dhyātvā dhūmravarṇaṃ satejasam 
candreṇa pūrayed vāyuṃ bījaṃ ṣoḍaśakaiḥ sudhīḥ // GhS_5.39

catuḥṣaṣṭyā mātrayā ca kumbhakenaiva dhārayet 
dvātriṃśanmātrayā vāyuṃ sūryanāḍyā ca recayet // GhS_5.40

nābhimūlād vahnim utthāpya dhyāyet tejo vanīyutam 
vahnibījaṃ ṣoḍaśena sūryanāḍyā ca pūrayet // GhS_5.41

catuḥṣaṣṭyā mātrayā ca kumbhakenaiva dhārayet 
dvātriṃśanmātrayā vāyuṃ śaśināḍyā ca recayet // GhS_5.42

nāsāgre śaśadhṛg bimbaṃ dhyātvā jyotsnāsamanvitam 
ṭhaṃ bījaṃ ṣoḍaśenaiva iḍayā pūrayen marut // GhS_5.43

catuḥṣaṣṭyā mātrayā ca [kumbhakenaiva] dhārayet 
amṛtaplāvitaṃ dhyātvā prāṇāyāmaṃ samabhyaset // GhS_5.44

[vaṃ bījaṃ śoḍaśenaiva sūryanāḍyā ca pūrayet] 
dvātriṃśena lakāreṇa dṛḍhaṃ bhāvyaṃ virecayet // GhS_5.45

evaṃvidhāṃ nāḍīśuddhiṃ kṛtvā nāḍīṃ viśodhayet 
dṛḍho bhūtvāsanaṃ kṛtvā prāṇāyāmaṃ samācaret // GhS_5.46

sahitaḥ sūryabhedaś ca ujjāyī śītalī tathā 
bhastrikā bhrāmarī mūrcchā kevalī cāṣṭa kumbhikāḥ // GhS_5.47

sahitau dvividhau proktau prāṇāyāmaṃ samācaret 
sagarbho bījam uccārya nirgarbho bījavarjitaḥ 
prāṇāyāmaṃ sagarbhaṃ ca prathamaṃ kathayāmi te // GhS_5.48

sukhāsane copaviśya prāṅmukho vāpy udaṅmukhaḥ 
dhyāyed vidhiṃ rajoguṇaṃ raktavarṇam avarṇakam // GhS_5.49

iḍayā pūrayed vāyuṃ mātrayā ṣoḍaśaiḥ sudhīḥ 
pūrakānte kumbhakādye kartavyas tūḍḍiyānakaḥ // GhS_5.50

sattvamayaṃ hariṃ dhyātvā ukāraiḥ śuklavarṇakaiḥ 
catuḥṣaṣṭyā ca mātrayā anilaṃ kumbhakaṃ caret 
kumbhakānte recakādye kartavyaṃ ca jālaṃdharam // GhS_5.51

rudraṃ tamoguṇaṃ dhyātvā makāraiḥ kṛṣṇavarṇakaiḥ 
dvātriṃśanmātrayā caiva recayed vidhinā punaḥ // GhS_5.52

punaḥ piṅgalayāpūrya kumbhakenaiva dhārayet 
iḍayā recayet paścāt tadbījena krameṇa tu // GhS_5.53

anulomavilomena vāraṃ vāraṃ ca sādhayet 
pūrakānte kumbhakādye dhṛtaṃ nāsāpuṭadvayam 
kaniṣṭhānāmikāṅguṣṭhais tarjanīmadhyame vinā // GhS_5.54

prāṇāyāmaṃ nigarbhaṃ tu vinā bījena jāyate 
vāmajānūpari nyastavāmapāṇitalaṃ bhramet 
mātrādiśataparyantaṃ pūrakumbhakarecanam // GhS_5.55

uttamā viṃśatir mātrā madhyamā ṣoḍaśī smṛtā 
adhamā dvādaśī mātrā prāṇāyāmās tridhā smṛtāḥ // GhS_5.56

adhamāj jāyate gharmo merukampaś ca madhyamāt 
uttamāc ca bhūmityāgas trividhaṃ siddhilakṣaṇam // GhS_5.57

prāṇāyāmāt khecaratvaṃ prāṇāyāmād roganāśanam 
prāṇāyāmād bodhayec chaktiṃ prāṇāyāmān manonmanī 
ānando jāyate citte prāṇāyāmī sukhī bhavet // GhS_5.58

kathitaṃ sahitaṃ kumbhaṃ sūryabhedanakaṃ śṛṇu 
pūrayet sūryanāḍyā ca yathāśakti bahirmarut // GhS_5.59

dhārayed bahuyatnena kumbhakena jalaṃdharaiḥ 
yāvat svedaṃ nakhakeśābhyāṃ tāvat kurvantu kumbhakam // GhS_5.60

prāṇo 'pānaḥ samānaś caudānavyānau ca vāyavaḥ 
nāgaḥ kūrmaś ca kṛkaro devadatto dhanaṃjayaḥ // GhS_5.61

hṛdi prāṇo vahen nityam apāno gudamaṇḍale 
samāno nābhideśe tu udānaḥ kaṇṭhamadhyagaḥ 
vyāno vyāpya śarīre tu pradhānāḥ pañca vāyavaḥ // GhS_5.62

prāṇādyāḥ pañca vikhyātā nāgādyāḥ pañca vāyavaḥ 
teṣām api ca pañcānāṃ sthānāni ca vadāmy aham // GhS_5.63

udgāre nāga ākhyātaḥ kūrmas tūnmīlane smṛtaḥ 
kṛkaraḥ kṣuttṛṣe jñeyo devadatto vijṛmbhaṇe 
na jahāti mṛte kvāpi sarvavyāpī dhanaṃjayaḥ // GhS_5.64

nāgo gṛhṇāti caitanyaṃ kūrmaś caiva nimeṣaṇam 
kṣuttṛṣaṃ kṛkaraś caiva jṛmbhaṇaṃ caturthena tu 
bhaved dhanaṃjayāc chabdaṃ kṣaṇamātraṃ na niḥsaret // GhS_5.65

sarvaṃ ca sūryakaṃ bhitvā nābhimūlāt samuddharet // GhS_5.66

iḍayā recayet paścād dhairyeṇākhaṇḍavegataḥ 
punaḥ sūryeṇa cākṛṣya kumbhayitvā yathāvidhi // GhS_5.67

recayitvā sādhayet tu krameṇa ca punaḥ punaḥ 
kumbhakaḥ sūryabhedas tu jarāmṛtyuvināśakaḥ // GhS_5.68

bodhayet kuṇḍalīṃ śaktiṃ dehānalavivardhanam 
iti te kathitaṃ caṇḍa sūryabhedanam uttamam // GhS_5.69

nāsābhyāṃ vāyum ākṛṣya mukhamadhye ca dhārayet 
hṛdgalābhyāṃ samākṛṣya vāyuṃ vaktreṇa dhārayet // GhS_5.70

mukhaṃ praphullaṃ saṃrakṣya kuryāj jālaṃdharaṃ tataḥ 
āśakti kumbhakaṃ kṛtvā dhārayed avirodhataḥ // GhS_5.71

ujjāyīkumbhakaṃ kṛtvā sarvakāryāṇi sādhayet 
na bhavet kapharogaś ca krūravāyur ajīrṇakam // GhS_5.72

āmavātaḥ kṣayaḥ kāso jvaraplīhā na jāyate 
jarāmṛtyuvināśāya cojjāyīṃ sādhayen naraḥ // GhS_5.73

jihvayā vāyum ākṛṣya udare pūrayec chanaiḥ 
kṣaṇaṃ ca kumbhakaṃ kṛtvā nāsābhyāṃ recayet punaḥ // GhS_5.74

sarvadā sādhayed yogī śītalīkumbhakaṃ śubham 
ajīrṇaṃ kaphapittaṃ ca naiva tasya prajāyate // GhS_5.75

bhastreva lohakārāṇāṃ yathākrameṇa saṃbhramet 
tato vāyuṃ ca nāsābhyām ubhābhyāṃ cālayec chanaiḥ // GhS_5.76

evaṃ viṃśativāraṃ ca kṛtvā kuryāc ca kumbhakam 
tadante cālayed vāyuṃ pūrvoktaṃ ca yathāvidhi // GhS_5.77

trivāraṃ sādhayed enaṃ bhastrikākumbhakaṃ sudhīḥ 
na ca rogo na ca kleśa ārogyaṃ ca dine dine // GhS_5.78

ardharātre gate yogī jantūnāṃ śabdavarjite 
karṇau nidhāya hastābhyāṃ kuryāt pūrakam uttamam // GhS_5.79

śṛṇuyād dakṣiṇe karṇe nādam antargataṃ sudhīḥ 
prathamaṃ jhiṃjhīnādaṃ ca vaṃśīnādaṃ tataḥ param 
meghaghargharabhrāmarī ca ghaṇṭākāṃsyaṃ tataḥ param // GhS_5.80

turībherīmṛdaṅgādivīṇānādakadundubhiḥ 
evaṃ nānāvidho nādo jāyate nityam abhyasāt // GhS_5.81

anāhatasya śabdasya tasya śabdasya yo dhvaniḥ 
dhvaner antargataṃ jyotir jyotir antargataṃ manaḥ // GhS_5.82

tasmiṃs tu vilayaṃ yāti tad viṣṇoḥ paramaṃ padam 
evaṃ bhrāmarīsaṃsiddhiḥ samādhisiddhim āpnuyāt // GhS_5.83

mukhe ca kumbhakaṃ kṛtvā bhruvor antargataṃ manaḥ 
saṃtyajya viṣayān sarvān manomūrcchā sukhapradā // GhS_5.84

ātmani manasaṃyogād ānandaṃ jāyate dhruvam 
evaṃ nānāvidhānando jāyate nityam abhyasāt 
evam abhyāsayogena samādhisiddhim āpnuyāt // GhS_5.85

bhujaṃginyāḥ śvāsavaśād ajapā jāyate nanu 
haṃkāreṇa bahir yāti saḥkāreṇa viśet punaḥ // GhS_5.86

ṣaṭ śatāni divārātrau sahasrāṇy ekaviṃśatiḥ 
ajapāṃ nāma gāyatrīṃ jīvo japati sarvadā // GhS_5.87

mūlādhāre yathā haṃsas tathā hi hṛdi paṅkaje 
tathā nāsāpuṭadvandve triveṇīsaṃgamāgamam // GhS_5.88

ṣaṇṇavatyaṅgulīmānaṃ śarīraṃ karmarūpakam 
dehād bahirgato vāyuḥ svabhāvād dvādaśāṅguliḥ // GhS_5.89

śayane ṣoḍaśāṅgulyo bhojane viṃśatis tathā 
caturviṃśāṅguliḥ panthe nidrāyāṃ triṃśadaṅguliḥ 
maithune ṣaṭtriṃśad uktaṃ vyāyāme ca tato 'dhikam // GhS_5.90

svabhāve 'sya gater nyūne param āyuḥ pravardhate 
āyuḥkṣayo 'dhike prokto mārute cāntarād gate // GhS_5.91

tasmāt prāṇe sthite dehe maraṇaṃ naiva jāyate 
vāyunā ghaṭasaṃbandhe bhavet kevalakumbhakaḥ // GhS_5.92

yāvajjīvaṃ japen mantram ajapāsaṃkhyakevalam 
adyāvadhi dhṛtaṃ saṃkhyāvibhramaṃ kevalīkṛte // GhS_5.93

ata eva hi kartavyaḥ kevalīkumbhako naraiḥ 
kevalī cājapāsaṃkhyā dviguṇā ca manonmanī // GhS_5.94

nāsābhyāṃ vāyum ākṛṣya kevalaṃ kumbhakaṃ caret 
ekādikacatuḥṣaṣṭiṃ dhārayet prathame dine // GhS_5.95

kevalīm aṣṭadhā kuryād yāme yāme dine dine 
atha vā pañcadhā kuryād yathā tat kathayāmi te // GhS_5.96

prātar madhyāhnasāyāhne madhyarātre caturthake 
trisaṃdhyam atha vā kuryāt samamāne dine dine // GhS_5.97

pañcavāraṃ dine vṛddhir vāraikaṃ ca dine tathā 
ajapāparimāṇe ca yāvat siddhiḥ prajāyate // GhS_5.98

prāṇāyāmaṃ kevalīṃ nāma tadā vadati yogavit 
kumbhake kevale siddhe kiṃ na sidhyati bhūtale // GhS_5.99

[[iti śrī-gheraṇḍa-saṃhitāyāṃ gheraṇḍa-caṇḍa-saṃvāde ghata-stha-yoga-prakaraṇe prāṇā3yāma-prayogo nāma pañcamo1padeśaḥ //5// ]]

sthūlaṃ jyotis tathā sūkṣmaṃ dhyānasya trividhaṃ viduḥ 
sthūlaṃ mūrtimayaṃ proktaṃ jyotis tejomayaṃ tathā 
sūkṣmaṃ bindumayaṃ brahma kuṇḍalī paradevatā // GhS_6.1

svakīyahṛdaye dhyāyet sudhāsāgaram uttamam 
tanmadhye ratnadvīpaṃ tu suratnavālukāmayam // GhS_6.2

caturdikṣu nīpataruṃ bahupuṣpasamanvitam 
nīpopavanasaṃkulair veṣṭitaṃ paritā iva // GhS_6.3

mālatīmallikājātī$kesaraiś campakais tathā &
pārijātaiḥ sthalapadmair gandhāmoditadiṅmukhaiḥ // GhS_6.4

tanmadhye saṃsmared yogī kalpavṛkṣaṃ manoramam 
catuḥśākhācaturvedaṃ nityapuṣpaphalānvitam // GhS_6.5

bhramarāḥ kokilās tatra guñjanti nigadanti ca 
dhyāyettatra sthiro bhūtvā mahāmāṇikyamaṇḍapam // GhS_6.6

tanmadhye tu smared yogī paryaṅkaṃ sumanoharam 
tatreṣṭadevatāṃ dhyāyed yaddhyānaṃ gurubhāṣitam // GhS_6.7

yasya devasya yad rūpaṃ yathā bhūṣaṇavāhanam 
tad rūpaṃ dhyāyate nityaṃ sthūladhyānam idaṃ viduḥ // GhS_6.8

sahasrāramahāpadme karṇikāyāṃ vicintayet 
vilagnasahitaṃ padmaṃ dvādaśair dalasaṃyutam // GhS_6.9

śubhravarṇaṃ mahātejo dvādaśair bījabhāṣitam 
sahakṣamavalariyuṃ haṃsaśaktiṃ yathākramam // GhS_6.10

tanmadhye karṇikāyāṃ tu akathādirekhātrayam 
halakṣakoṇasaṃyuktaṃ praṇavaṃ tatra vartate // GhS_6.11

nādabindumayaṃ pīṭhaṃ dhyāyet tatra manoharam 
tatropari haṃsayugmaṃ pādukā tatra vartate // GhS_6.12

dhyāyettatra guruṃ devaṃ vibhujaṃ ca trilocanam 
śvetāmbaradharaṃ devaṃ śuklagandhānulepanam // GhS_6.13

śuklapuṣpamayaṃ mālyaṃ raktaśaktisamanvitam 
evaṃvidhagurudhyānāt sthūladhyānaṃ prasidhyati // GhS_6.14

kathitaṃ sthūladhyānaṃ tu tejodhyānaṃ śṛṇuṣva me 
yaddhyānena yogasiddhir ātmapratyakṣam eva ca 
mūlādhāre kuṇḍalinī bhujagākārarūpiṇī // GhS_6.15

jīvātmā tiṣṭhati tatra pradīpakalikākṛtiḥ 
dhyāyet tejomayaṃ brahma tejodhyānaṃ tad eva hi // GhS_6.16

nābhimūle sthitaṃ sūryamaṇḍalaṃ vahnisaṃyutam 
dhyāyet tejo mahad vyāptaṃ tejodhyānaṃ tad eva hi // GhS_6.17

bhruvor madhye manordhve ca yat tejaḥ praṇavātmakam 
dhyāyej jvālāvalīyuktaṃ tejodhyānaṃ tad eva hi // GhS_6.18

tejodhyānaṃ śrutaṃ caṇḍa sūkṣmadhyānaṃ vadāmy aham 
bahubhāgyavaśād yasya kuṇḍalī jāgratī bhavet // GhS_6.19

ātmanā saha yogena netrarandhrād vinirgatā 
vihared rājamārge ca cañcalatvān na dṛśyate // GhS_6.20

śāṃbhavīmudrayā yogī dhyānayogena sidhyati 
sūkṣmadhyānam idaṃ gopyaṃ devānām api durlabham // GhS_6.21

sthūladhyānāc chataguṇaṃ tejodhyānaṃ pracakṣate 
tejodhyānāl lakṣaguṇaṃ sūkṣmadhyānaṃ parātparam // GhS_6.22

iti te kathitaṃ caṇḍa dhyānayogaṃ sudurlabham 
ātmā sākṣād bhaved yasmāt tasmād dhyānaṃ viśiṣyate // GhS_6.23

[[iti śrī-gheraṇḍa-saṃhitāyāṃ gheraṇḍa-caṇḍa-saṃvāde ghata-stha-yoge sapta-sādhane dhyāna-yogo nāma ṣaṣṭho1padeśaḥ //6// ]]

samādhiś ca paraṃ tattvaṃ bahubhāgyena labhyate 
guroḥ kṛpāprasādena prāpyate gurubhaktitaḥ // GhS_7.1

vidyāpratītiḥ svagurupratītir $
ātmapratītir manasaḥ prabodhaḥ &
dine dine yasya bhavet sa yogī %
suśobhanābhyāsam upaiti sadyaḥ // GhS_7.2

ghaṭād bhinnaṃ manaḥ kṛtvā aikyaṃ kuryāt parātmani 
samādhiṃ taṃ vijānīyān muktasaṃjño daśādibhiḥ // GhS_7.3

ahaṃ brahma na cānyo 'smi brahmaivāhaṃ na śokabhāk 
saccidānandarūpo 'haṃ nityamuktaḥ svabhāvavān // GhS_7.4

śāṃbhavyā caiva khecaryā bhrāmaryā yonimudrayā 
dhyānaṃ nādaṃ rasānandaṃ layasiddhiś caturvidhā // GhS_7.5

pañcadhā bhaktiyogena manomūrcchā ca ṣaḍvidhā 
ṣaḍvidho 'yaṃ rājayogaḥ pratyekam avadhārayet // GhS_7.6

śāṃbhavīṃ mudrikāṃ kṛtvā ātmapratyakṣam ānayet 
bindu brahmamayaṃ dṛṣṭvā manas tatra niyojayet // GhS_7.7

khamadhye kuru cātmānam ātmamadhye ca khaṃ kuru 
ātmānaṃ khamayaṃ dṛṣṭvā na kiṃcid api bādhyate 
sadānandamayo bhūtvā samādhistho bhaven naraḥ // GhS_7.8

khecarīmudrāsādhanād rasanā ūrdhvagatā yadā 
tadā samādhisiddhiḥ syād dhitvā sādhāraṇakriyām // GhS_7.9

anilaṃ mandavegena bhrāmarīkumbhakaṃ caret 
mandaṃ mandaṃ recayed vāyuṃ bhṛṅganādaṃ tato bhavet // GhS_7.10

antaḥsthaṃ bhramarīnādaṃ śrutvā tatra mano nayet 
samādhir jāyate tatra ānandaḥ so 'ham ity ataḥ // GhS_7.11

yonimudrāṃ samāsādya svayaṃ śaktimayo bhavet 
suśṛṅgārarasenaiva viharet paramātmani // GhS_7.12

ānandamayaḥ saṃbhūtvā aikyaṃ brahmaṇi saṃbhavet 
ahaṃ brahmeti cādvaitaṃ samādhis tena jāyate // GhS_7.13

svakīyahṛdaye dhyāyed iṣṭadevasvarūpakam 
cintayed bhaktiyogena paramāhlādapūrvakam // GhS_7.14

ānandāśrupulakena daśābhāvaḥ prajāyate 
samādhiḥ saṃbhavet tena saṃbhavec ca manonmanī // GhS_7.15

manomūrcchāṃ samāsādya mana ātmani yojayet 
parātmanaḥ samāyogāt samādhiṃ samavāpnuyāt // GhS_7.16

iti te kathitaṃ caṇḍa samādhir muktilakṣaṇam 
rājayogaḥ samādhiḥ syād ekātmany eva sādhanam 
unmanī sahajāvasthā sarve caikātmavācakāḥ // GhS_7.17

jale viṣṇuḥ sthale viṣṇur viṣṇuḥ parvatamastake 
jvālāmālākule viṣṇuḥ sarvaṃ viṣṇumayaṃ jagat // GhS_7.18

bhūcarāḥ khecarāś cāmī yāvanto jīvajantavaḥ 
vṛkṣagulmalatāvallītṛṇādyā vāri parvatāḥ 
sarvaṃ brahma vijānīyāt sarvaṃ paśyati cātmani // GhS_7.19

ātmā ghatasthacaitanyam advaitaṃ śāśvataṃ param 
ghaṭād bhinnataraṃ jñānaṃ vītarāgaṃ vivāsanam // GhS_7.20

evaṃvidhiḥ samādhiḥ syāt sarvasaṃkalpavarjitaḥ 
svadehe putradārādibāndhaveṣu dhanādiṣu 
sarveṣu nirmamo bhūtvā samādhiṃ samavāpnuyāt // GhS_7.21

layāmṛtaṃ paraṃ tattvaṃ śivoktaṃ vividhāni ca 
teṣāṃ saṃkṣepam ādāya kathitaṃ muktilakṣaṇam // GhS_7.22

iti te kathitaś caṇḍa samādhir durlabhaḥ paraḥ 
yaṃ jñātvā na punarjanma jāyate bhūmimaṇḍale // GhS_7.23

[[iti śrī-gheraṇḍa-saṃhitāyāṃ gheraṇḍa-caṇḍa-saṃvāde ghata-stha-yoga-sādhane yogasya sapta-sāre samādhi-yogo nāma saptamo1padeśaḥ samāptaḥ //7// ]]