• GRETIL
• 1_sanskr
• tei
• transformations
• plaintext
• sa_jayadeva-candrAloka

          Jayadeva: Candrāloka


# Header

  This file is a plain text transformation of http://gretil.sub.uni-goettingen.de/gretil/corpustei/sa_jayadeva-candrAloka.xml
  with a rudimentary header. For a more extensive header please refer to the source file.

## Data entry: Réginald Beyaert
## Contribution: Réginald Beyaert
## Date of this version: 2020-07-31

## Source: 
   - the thesis by Réginald Beyaert (forthcoming).

## Publisher: Göttingen Register of Electronic Texts in Indian Languages (GRETIL), SUB Göttingen

## Licence:
   This e-text was provided to GRETIL in good faith that no copyright rights have been infringed. If anyone wishes to assert copyright over this file, please contact the GRETIL management at gretil(at)sub(dot)uni-goettingen(dot)de. The file will be immediately removed pending resolution of the claim.
   Distributed under a Creative Commons Attribution-NonCommercial-ShareAlike 4.0 International License.

## Structure of references:
   A reference is assembled consisting of
   - a pragmatic abbreviation of the title: Candrāloka = JCand,
   - the number of the  in arabic numerals,
   - the number of the verse in arabic numerals.

## Notes:
   This file has been created by mass conversion of GRETIL's Sanskrit corpus from jaycndau.htm. Due to the heterogeneity of the sources the header markup might be suboptimal. For the sake of transparency the header of the legacy file is documented in the note element below:

   
	 Jayadeva (alias Piyusavarsa): Candraloka
Based on the thesis by Réginald Beyaert (forthcoming)
Input by Réginald Beyaert, revised by Pierre-Sylvain Filliozat
STRUCTURE OF REFERENCES:
JCand_nn.nn = JayadevaCandrāloka_mayūkha.verse
TEXT WITH PADA MARKERS
	


## Revisions:
   - 2020-07-31: TEI encoding by mass conversion of GRETIL's Sanskrit corpus


# Text


pīyuṣavarṣaśrījayadevakavikṛtaḥ candrālokaḥ

uccairasyati mandatāmarasatāṃ jāgratkalaṅkairavadhvaṃsaṃ hastayate ca yā sumanasām ullāsinī mānase 
dhṛṣṭodyanmadanāśanārcir amalā lokatrayīdarśikā sā netratritayīva khaṇḍaparaśor vāgdevatā dīvyatu // JCand_1.1

haṃ ho cinmayacittacandramaṇayaḥ saṃvardhayadhvaṃ rasān re re svairiṇi nirvicārakavite māsmat prakāśībhava 
ullāsāya vicāravīcinicayālaṅkāravārām nidheś candrālokamayaṃ svayaṃ vitanute pīyūṣavarṣaḥ kṛtī // JCand_1.2

yuktyāsvādyalasadrasaikavasatiḥ sāhityasārasvatakṣīrāmbhodhir agādhatām upadadhat sevyaḥ samāśrīyatām 
śrīr asmād upadeśakauśalamayaṃ pīyūṣam asmājjagaj jāgradbhāsurapadmakeśarayaśaḥśītāṃśur asmād budhāḥ // JCand_1.3

taṃ pūrvācāryasūryoktijyotiḥ stomodgamaṃ stumaḥ 
yaṃ prastūya prakāśante madguṇās trasareṇavaḥ // JCand_1.4

nāśaṅkanīyam eteṣāṃ matam etena dūṣyate 
kiṃ tu cakṣur mṛgākṣīṇāṃ kajjaleneva bhūṣyate // JCand_1.5

pratibhaiva śrutābhyāsasahitā kavitāṃ prati 
hetur mṛdambusambaddhā bījamālā latāmiva // JCand_1.6

nirdoṣā lakṣaṇavatī sarītir guṇabhūṣaṇā 
sālaṃkārarasānekavṛttir vāk kāvyanāmabhāk // JCand_1.7

aṅgīkaroti yaḥ kāvyaṃ śabdārthāv analaṃkṛtī 
asau na manyate kasmād anuṣṇam analaṃ kṛtī // JCand_1.8

vibhaktyutpattaye yogyaḥ śāstrīyaḥ śabda iṣyate 
rūḍhayaugikatanmiśraiḥ prabhedaiḥ sa punas tridhā // JCand_1.9

avyaktayoganiryogayogābhāsais tridhādimaḥ 
te ca vṛkṣādibhūvādimaṇḍapādyā yathākramam // JCand_1.10

śuddhatanmūlasaṃbhinnaprabhedair yaugikas tridhā 
te ca bhrāntisphuratkāntikaunteyādisvarūpiṇaḥ // JCand_1.11

tanmiśro 'nyonyasāmānyaviśeṣaparivartanāt 
nīradhiḥ paṅkajaṃ saudhaḥ sāgaro bhūruhaḥ śaśī // JCand_1.12

kṣīranīradhir ākāśapaṅkajaṃ tena siddhayati 
vibhaktyantaṃ padaṃ vākyaṃ tadvyūho 'rthasamāptitaḥ // JCand_1.13

yuktārthatāṃ tāṃ ca vinā khaṇḍavākyaṃ sa iṣyate 
vākyaṃ ca khaṇḍavākyaṃ ca padam ekam api kvacit // JCand_1.14

dhūmavattvād iti yathā devety āmantraṇaṃ yathā 
vākyāny ekārthaviśrāntāny āhur vākyakadambakam // JCand_1.15

mahādevaḥ satrapramukhamakhavidyaikacaturaḥ sumitrā tadbhaktipraṇihitamatir yasya pitarau 
anenāsāv ādyaḥ sukavijayadevena racite ciraṃ candrāloke sukhayatu mayūkhaḥ sumanasaḥ // JCand_1.16

syāc ceto viśatā yena sakṣatā ramaṇīyatā 
śabde 'rthe ca kṛtonmeṣaṃ doṣam udghoṣayanti tam // JCand_2.1

bhavec chrutikaṭur varṇaḥ śravaṇodvejane paṭuḥ 
saṃvidrate vyākaraṇaviruddhaṃ cyutasaṃskṛti // JCand_2.2

aprayuktaṃ daivatādiśabde puṃlliṅgatādikam 
asamarthaṃ tu hantyādeḥ prayogo gamanādiṣu // JCand_2.3

sa hanti hanta kāntāre kāntaḥ kuṭilakuntalaḥ 
nihatārthaṃ lohitādau śoṇitādiprayogataḥ // JCand_2.4

vyanakty anucitārthaṃ yat padam āhus tadeva tat 
iyam adbhutaśākhyagrakelikautukavānarī // JCand_2.5

nirarthakaṃ tuhītyādi pūraṇaikaprayojanam 
arthe vidadhadityādau dadhadādyam avācakam // JCand_2.6

dhatte nabhastalaṃ bhāsvān aruṇaṃ taruṇaiḥ karaiḥ 
ekākṣaraṃ vinā bhūbhrūkṣmādikaṃ khatalādivat // JCand_2.7

aślīlaṃ trividhaṃ vrīḍājugupsāmaṅgalātmanā 
āhlādasādhanaṃ vāyuḥ kāntānāśe bhavet katham // JCand_2.8

syād dvyartham iha sandigdhaṃ nadyāṃ yānti patatriṇaḥ 
syād apratītaṃ śāstraikagamyaṃ vītānumādivat // JCand_2.9

śithilaṃ śayane lilye maccitaṃ te śaśiśriyi 
mastapiṣṭakaṭīloṣṭagallādi grāmyam ucyate // JCand_2.10

neyārthaṃ lakṣaṇātyantaprasarād amanoharam 
himāṃśor hāradhikkārajāgare yāmikāḥ karāḥ // JCand_2.11

kliṣṭam artho yadīyo 'rthaśreṇiniḥśreṇim ṛcchati 
haripriyāpitṛvadhūpravāhapratimaṃ vacaḥ // JCand_2.12

avimṛṣṭavidheyāṃśaḥ samāsapihite vidhau 
viśanti viśikhaprāyāḥ kaṭākṣāḥ kāmināṃ hṛdi // JCand_2.13

aparādhīna ityādi viruddhamatikṛn matam 
anyasaṅgatam uttuṅgahāraśobhipayodharau // JCand_2.14

rasādyanucite varṇe pratikūlākṣaraṃ viduḥ 
na mām aṅgada jānāsi rāvaṇaṃ raṇadāruṇam // JCand_2.15

yasminn upahato lupto visarga iha tat tathā 
kusandhiḥ paṭav āgaccha visandhir nṛpatī imau // JCand_2.16

hatavṛttam anukto 'pi chandodoṣaś cakāsti cet 
viśālalocane! paśyā-mbaraṃ tārātaraṅgitam // JCand_2.17

nyūnaṃ tvatkhaḍgasaṃbhūtayaśaḥpuṣpaṃ nabhastaṭam 
adhikaṃ bhavataḥ śatrūn daśaty asilatāphaṇī // JCand_2.18

kathitaṃ punaruktā vāk śyāmābjaśyāmalocanā 
vikṛtaṃ dūravivṛtair aiyaruḥ kuñjarāḥ puram // JCand_2.19

patatprakarṣaṃ hīnānuprāsāditve yathottaram 
gambhīrārambhadambholipāṇir eṣaḥ samāgataḥ // JCand_2.20

samāptapunarāttaṃ syād eṣa pīyūṣabhājanam 
netrānandī tuṣārāṃśur udety ambudhibāndhavaḥ // JCand_2.21

ardhāntarapadāpekṣi krīḍānṛtyeṣu sasmitam 
moghārambhaṃ stumaḥ śambhum ardharambhoruvigraham // JCand_2.22

abhavanmatayogaḥ syān na ced abhimato 'nvayaḥ 
yena baddho 'mbudhir yasya rāmasyānucarā vayam // JCand_2.23

dviṣāṃ sampadam ācchidya yaḥ śatrūn samapūrayat 
asthānasthasamāsaṃ na vidvajjanamanoramam // JCand_2.24

mithaḥ pṛthagvākyapadaiḥ saṃkīrṇaṃ yat tad eva tat 
vaktreṇa bhrājate rātriḥ kāntā candreṇa rājate // JCand_2.25

brahmāṇḍaṃ tvadyaśaḥpūragarbhitaṃ bhūmibhūṣaṇa 
ākarṇaya payaḥpūrṇasuvarṇakalaśāyate // JCand_2.26

bhagnaprakramam ārabdhaśabdanirvāhahīnatā 
akramaḥ kṛṣṇa pūjyante tvām anabhyarcya devatāḥ // JCand_2.27

amatārthāntaraṃ mukhye 'mukhyenārthe virodhakṛt 
tyaktahāram uraḥkṛtvā śokenāliṅgitāṅganā // JCand_2.28

apuṣṭārtho viśeṣye cen na viśeṣo viśeṣaṇāt 
viśanti hṛdayaṃ kāntākaṭākṣāḥ khañjanatviṣaḥ // JCand_2.29

kaṣṭaḥ spaṣṭāvabodhārtham akṣamo vācyasannibhaḥ 
vyāhataś cedvirodhaḥ syān mithaḥ pūrvāparārthayoḥ // JCand_2.30

sahasrapatramitraṃ te vaktraṃ kenopamīyate 
kutastatropamā yatra punaruktaḥ sudhākaraḥ // JCand_2.31

duṣkramagrāmyasandigdhās trayo doṣāḥ kramād amī 
tvadbhaktaḥ kṛṣṇa! gaccheyaṃ narakaṃ svargam eva vā // JCand_2.32

ekaṃ me cumbanaṃ dehi tava dāsyāmi kañcukam 
brūta kiṃ sevyatāṃ candramukhīcandrakirīṭayoḥ // JCand_2.33

anaucityaṃ kīrtilatāṃ taraṅgayati yaḥ sadā 
prasiddhyā vidyayā vāpi viruddhaṃ dvividhaṃ matam // JCand_2.34

nyasteyaṃ paśya kandarpapratāpadhavaladyutiḥ 
ketakī śekhare śambhor dhatte candrakalātulām // JCand_2.35

sāmānyaparivṛttiḥ syāt kuṇḍalacchavivigrahā 
viśeṣaparivṛttiḥ syād vanitā mama cetasi // JCand_2.36

tathā sahacarācāruviruddhānyonyasaṃgatī 
dhvāṅkṣāḥ santaś ca tanayaṃ svaṃ paraṃ ca na jānate // JCand_2.37

sarojanetra putrasya mukhendum avalokaya 
pālayiṣyati te gotram asau narapurandaraḥ // JCand_2.38

pade tadaṃśe vākyāṃśe vākye vākyakadambake 
yathānusāram abhyūhed doṣān śabdārthasaṃbhavān // JCand_2.39

doṣam āpatitaṃ svānte prasarantaṃ viśṛṅkhalam 
nivārayati yas tredhā doṣāṅkuśam uśanti tam // JCand_2.40

doṣe guṇatvaṃ tanute doṣatvaṃ vā nirasyati 
bhavantam athavā doṣaṃ nayaty atyājyatāmasau // JCand_2.41

mukhaṃ candraśriyaṃ dhatte śvetaśmaśrukarāṅkuraiḥ 
atra hāsyarasoddeśe grāmyatvaṃ guṇatāṃ gatam // JCand_2.42

tava dugdhābdhisaṃbhūteḥ kathaṃ jātā kalāṅkitā 
kavīnāṃ samayād vidyāviruddho 'doṣatāṃ gataḥ // JCand_2.43

dadhāra gaurī hṛdaye devaṃ himakarāṅkitam 
atra śleṣodayān naiva tyājyaṃ hīti nirarthakam // JCand_2.44

mahādevaḥ satrapramukhamakhavidyaikacaturaḥ sumitrā tadbhaktipraṇihitamatir yasya pitarau 
dvitīyas tenāsau sukavijayadevena racite ciraṃ candrāloke sukhayatu mayūkhaḥ sumanasaḥ // JCand_2.45

alpākṣarā vicitrārthakhyātir akṣarasaṃhatiḥ 
uṣākāntenānugataḥ śūraḥ śaurir ayaṃ punaḥ // JCand_3.1

śobhā khyātāpi yaddoṣo guṇakīrtyā niṣidhyate 
mudhā nindanti saṃsāraṃ kaṃsārir yatra pūjyate // JCand_3.2

abhimāno vicāraś ced ūhitārthaniṣedhakṛt 
indur yadi kathaṃ tīvraḥ sūryo yadi kathaṃ niśi // JCand_3.3

hetus tyaktvā bahūn pakṣān yuktyaikasyāvadhāraṇam 
nendur nārko 'yam aurvāgniḥ sāgarād utthito dahan // JCand_3.4

pratiṣedhaḥ prasiddhānāṃ kāraṇānām anādaraḥ 
na yuddhena bhruvoḥ spande-naiva vīrā nipātitāḥ // JCand_3.5

niruktaṃ syān nirvacanaṃ nāmnaḥ satyaṃ tathānṛtam 
īdṛśaiś caritai rājan satyaṃ doṣākaro bhavān // JCand_3.6

syān mithyādhyavasāyaś ced asatī sādhyasādhane 
candrāṃśusūtragrathitāṃ nabhaḥpuṣpasrajaṃ vaha // JCand_3.7

siddhiḥ khyāteṣu cen nāma kīrtyate tulyatoktaye 
yuvām eveha vikhyātau tvaṃ balair jaladhir jalaiḥ // JCand_3.8

yuktir viśeṣasiddhiś ced vicitrārthāntarānvayāt 
navas tvaṃ nīradaḥ ko 'pi svarṇair varṣasi yan muhuḥ // JCand_3.9

kāryaṃ phalopalambhaś ced vyāpārād vastuto 'tha vā 
asāv udeti śītāṃśur mānacchedāya subhruvām // JCand_3.10

ityādi lakṣaṇaṃ bhūri kāvyasyāhur maharṣayaḥ 
svarṇabhrājiṣṇubhālatvaprabhṛtīva mahībhujaḥ // JCand_3.11

mahādevaḥ satrapramukhamakhavidyaikacaturaḥ sumitrā tadbhaktipraṇihitamatir yasya pitarau 
tṛtīyas tenāsau sukavijayadevena racite ciraṃ candrāloke sukhayatu mayūkhaḥ sumanasaḥ // JCand_3.12

śleṣo vighaṭamānārthaghaṭamānatvavarṇanam 
sa tu śābdaḥ sajātīyaiḥ śabdair bandhaḥ sukhāvahaḥ // JCand_4.1

ullasattanutāṃ nīte 'nante pulakakaṇṭakaiḥ 
bhītayā mānavatyaiva śriyāśliṣṭaṃ hariṃ stumaḥ // JCand_4.2

yasmād antaḥsthitaḥ sarvaḥ svayam artho 'vabhāsate 
salilasyeva sūktasya sa prasāda iti smṛtaḥ // JCand_4.3

samatālpasamāsatvaṃ varṇādyais tulyatātha vā 
śyāmalā komalā bālā ramaṇaṃ śaraṇaṃ gatā // JCand_4.4

samādhir arthamahimā lasadghanarasātmanā 
syād antarviśatā yena gātramaṅkuritaṃ satām // JCand_4.5

mādhuryaṃ punaruktasya vaicitryaṃ cārutāvaham 
vayasya paśya paśyāsyāś cañcalaṃ locanāñcalam // JCand_4.6

ojaḥ syāt prauḍhir arthasya saṃkṣepo vātibhūyasaḥ 
ripuṃ hatvā yaśaḥ kṛtvā tvadasiḥ kośam āviśat // JCand_4.7

saukumāryam apāruṣyaṃ paryāyaparivartanāt 
sa kathāśeṣatāṃ yātaḥ samāliṅgya marutsakham // JCand_4.8

udāratā tu vaidagdhyam agrāmyatvāt pṛthaṅmatā 
mānaṃ muñca priye kiṃcil locanāntam udañcaya // JCand_4.9

śṛṅgāre ca prasāde ca kāntyarthavyaktisaṃgrahaḥ 
amī daśa guṇāḥ kāvye puṃsi śauryādayo yathā // JCand_4.10

tilakādyam iva strīṇāṃ vidagdhahṛdayaṅgamam 
vyatiriktam alaṅkāraṃ prakṛter bhūṣaṇaṃ girām // JCand_4.11

vicitralakṣaṇo nyāso nirvāhaḥ prauḍhir aucitī 
śāstrāntararahasyoktiḥ saṃgraho dik pradarśitā // JCand_4.12

mahādevaḥ satrapramukhamakhavidyaikacaturaḥ sumitrā tadbhaktipraṇihitamatir yasya pitarau 
caturthas tenāsau sukavijayadevena racite ciraṃ candrāloke sukhayatu mayūkhaḥ sumanasaḥ // JCand_4.13

śabdārthayoḥ prasiddhyā vā kaveḥ prauḍhivaśena vā 
hārādivad alaṅkāraḥ sanniveśo manoharaḥ // JCand_5.1

svaravyañjanasaṃdohavyūhāmandohadohadā 
gaur jagajjāgradutsekā chekānuprāsabhāsurā // JCand_5.2

āvṛttavarṇasampūrṇaṃ vṛttyanuprāsavad vacaḥ 
amandānandasandohasvacchandāspadamandiram // JCand_5.3

lāṭānuprāsabhūr bhinnā-bhiprāyā punaruktatā 
yatra syān na punaḥ śatror garjitaṃ taj jitaṃ jitam // JCand_5.4

ślokasyārdhe tadardhe vā varṇāvṛttir yadi dhruvā 
tadā matā matimatāṃ sphuṭānuprāsatā satām // JCand_5.5

upameyopamānādāv arthānuprāsa iṣyate 
candanaṃ khalu govindacaraṇadvandvavandanam // JCand_5.6

punaruktapratīkāśaṃ punaruktārthasannibham 
aṃśukāntaṃ śaśī kurvann ambarāntam upaity asau // JCand_5.7

āvṛttavarṇastabakaṃ stavakandāṅkuraṃ kaveḥ 
yamakaṃ prathamā dhuryamādhuryavacaso viduḥ // JCand_5.8

kāvyavitpravaraiścitraṃ khaḍgabandhādi lakṣyate 
teṣv ādyam ucyate ślokadvayīsajjanarañjikā // JCand_5.9

kāminīva bhavet khaḍgalekhā cārukarālikā 
kāśmīrasekā raktāṅgī śatrukaṇṭhāntikāśritā // JCand_5.10

upamā yatra sādṛśyalakṣmīr ullasati dvayoḥ 
hṛdaye khelator uccais tanvaṅgīstanayoriva // JCand_5.11

upamānopameyatve yatraikasyaiva jāgṛtaḥ 
indur indurivetyādau bhaved evam ananvayaḥ // JCand_5.12

paryāyeṇa dvayos tac ced upameyopamā matā 
dharmo 'rtha iva pūrṇaśrīr artho dharma iva tvayi // JCand_5.13

vikhyātasyopamānasya yatra syād upameyatā 
indur mukham ivetyādau syāt pratīpopamā tadā // JCand_5.14

upamāne tu līlādipadāḍhye lalitopamā 
tvannetrayugalaṃ dhatte līlāṃ nīlāmbujanmanoḥ // JCand_5.15

anekasyārthayugmasya sādṛśyaṃ stabakopamā 
śrito 'smi caraṇau viṣṇor bhṛṅgas tāmarasaṃ yathā // JCand_5.16

syāt saṃpūrṇopamā yatra dvayor api vidheyatā 
padmānīva vinidrāṇi netrāṇy āsann aharmukhe // JCand_5.17

yatropamānacitreṇa sarvathāpy uparajyate 
upameyamayī bhittis tatra rūpakam iṣyate // JCand_5.18

samānadharmayuksādhyāropāt sopādhirūpakam 
utsiktakṣitibhṛllakṣyapakṣacchedapurandaraḥ // JCand_5.19

pṛthakkathitasādṛśyaṃ dṛśyaṃ sādṛśyarūpakam 
ullasatpañcaśākhas te rājate bhujabhūruhaḥ // JCand_5.20

syād aṅgayaṣṭirityevaṃvidham ābhāsarūpakam 
aṅgayaṣṭidhanurvallītyādi rūpitarūpakam // JCand_5.21

pariṇāmo 'nayor yasminn abhedaḥ paryavasyati 
kāntena pṛṣṭā rahasi maunam evottaraṃ dadau // JCand_5.22

bahubhirbahudhollekhād ekasyollekhitā matā 
strībhiḥ kāmaḥ priyaiś candraḥ kālaḥ śatrubhir aikṣi saḥ // JCand_5.23

atathyam āropayituṃ tathyāpāstir apahnutiḥ 
nāyaṃ sudhāṃśuḥ kiṃ tarhi vyomagaṅgāsaroruham // JCand_5.24

paryastāpahnutir yatra dharmamātraṃ niṣidhyate 
nāyaṃ sudhāṃśuḥ kiṃ tarhi sudhāṃśuḥ preyasīmukham // JCand_5.25

bhrāntāpahnutir anyasya śaṅkayā tathyanirṇaye 
tāpaṃ tanoti sotkampaṃ jvaraḥ kiṃ na sakhi smaraḥ // JCand_5.26

chekāpahnutir anyasya śaṅkayā tathyanihnave 
prajalpan matpade lagnaḥ kāntaḥ kiṃ na hi nūpuraḥ // JCand_5.27

kaitavāpahnutir vyakte vyājādyair nihnave padaiḥ 
niryānti smaranārācāḥ kāntādṛkpātakaitavāt // JCand_5.28

utprekṣonnīyate yatra hetvādir nihnutiṃ vinā 
tvanmukhaśrīkṛte nūnaṃ padmair vairāyate śaśī // JCand_5.29

ivādikapadābhāve gūḍhotprekṣāṃ pracakṣate 
yatkīrtir vibhramaśrāntā viveśa svarganimnagām // JCand_5.30

syāt smṛtibhrāntisaṃdehais tad evālaṃkṛtitrayam 
paṅkajaṃ paśyatas tasyā mukhaṃ me gāhate manaḥ // JCand_5.31

ayaṃ pramattamadhupas tvanmukhaṃ veda paṅkajam 
paṅkajaṃ vā sudhāṃśur vety asmākaṃ tu na nirṇayaḥ // JCand_5.32

mīlitaṃ bahusādṛśyād bhedavac cen na lakṣyate 
raso nālakṣi lākṣāyāś caraṇe sahajāruṇe // JCand_5.33

sāmānyaṃ yadi sādṛśyād bheda eva na lakṣyate 
padmākarapraviṣṭānāṃ mukhaṃ nālakṣi subhruvām // JCand_5.34

hetoḥ kuto 'pi vaiśiṣṭyāt sphūrtir unmīlitaṃ matam 
lakṣitāny udite candre padmāni ca mukhāni ca // JCand_5.35

anumānaṃ ca kāryādeḥ kāraṇādyavadhāraṇam 
asti kiñcid yadanayā māṃ vilokya smitaṃ manāk // JCand_5.36

arthāpattiḥ svayaṃ sidhyet padārthāntaravarṇanam 
sa jitas tvanmukhenenduḥ kā vārtā sarasīruhām // JCand_5.37

syāt kāvyaliṅgaṃ vāgartho nūtanārthasamarthakaḥ 
jito 'si manda kandarpa maccitte 'sti trilocanaḥ // JCand_5.38

alaṅkāraḥ parikaraḥ sābhiprāye viśeṣaṇe 
sudhāṃśukalitottaṃsas tāpaṃ haratu vaḥ śivaḥ // JCand_5.39

sābhiprāye viśeṣye tu bhavet parikarāṅkuraḥ 
caturṇāṃ puruṣārthānāṃ dātā devaś caturbhujaḥ // JCand_5.40

akramātiśayoktiś ced yugapat kāryakāraṇe 
āliṅganti samaṃ deva jyāṃ śarāś ca parāś ca te // JCand_5.41

atyantātiśayoktis tatpaurvāparyavyatikrame 
agre māno gataḥ paścād anunītā priyeṇa sā // JCand_5.42

capalātiśayoktis tu kārye hetuprasaktije 
yāmīti priyapṛṣṭāyā valayo 'bhavad ūrmikā // JCand_5.43

sambandhātiśayoktiḥ syāt tadabhāve 'pi tadvacaḥ 
paśya saudhāgrasaṃsaktaṃ vibhāti vidhumaṇḍalam // JCand_5.44

bhedakātiśayoktiś ced ekasyaivānyatocyate 
aho anyaiva lāvaṇyalīlā bālākucasthale // JCand_5.45

rūpakātiśayoktiś ced rūpyaṃ rūpakamadhyagam 
paśya nīlotpaladvandvān niḥsaranti śitāḥ śarāḥ // JCand_5.46

prauḍhoktis tadaśaktasya tacchaktatvāvakalpanam 
kalindajātīraruhāḥ śyāmalāḥ saraladrumāḥ // JCand_5.47

sambhāvanaṃ yadītthaṃ syād ity ūhonyaprasiddhaye 
siktaṃ sphaṭikakumbhāntaḥsthitiśvetīkṛtair jalaiḥ 
mauktikaṃ cel latāṃ sūte tatpuṣpais te samaṃ yaśaḥ // JCand_5.48

vāñchitād adhikaprāptir ayatnena praharṣaṇam 
dīpam uddyotayed yāvat tāvad abhyudito raviḥ // JCand_5.49

iṣyamāṇaviruddhārthasamprāptis tu viṣādanam 
dīpam uddyotayed yāvat tāvan nirvāṇa eva saḥ // JCand_5.50

kriyādibhir anekasya tulyatā tulyayogitā 
saṅkucanti sarojāni svairiṇīvadanāni ca 
prācīnācalacūḍāgracumbibimbe sudhākare // JCand_5.51

prastutāprastutānāṃ ca tulyatve dīpakaṃ matam 
medhāṃ budhaḥ sudhām indur bibharti vasudhāṃ bhavān // JCand_5.52

āvṛtte dīpakapade bhaved āvṛttidīpakam 
dīptyāgnir bhāti bhātīnduḥ kāntyā bhāti ravis tviṣā // JCand_5.53

vākyayor arthasāmānye prativastūpamā matā 
tāpena bhrājate sūraḥ śūraś cāpena rājate // JCand_5.54

ced bimbapratibimbatvaṃ dṛṣṭāntas tadalaṃkṛtiḥ 
syān mallapratimallatve saṅgrāmoddhāmahuṃkṛtiḥ // JCand_5.55

dṛṣṭāntaś ced bhavanmūrtis tan mṛṣṭā daivadurlipiḥ 
jātā cet prāk prabhā bhānos tarhi yātā vibhāvarī // JCand_5.56

vākyārthayoḥ sadṛśayor aikyāropo nidarśanā 
yā dātuḥ saumyatā seyaṃ sudhāṃśor akalaṅkatā // JCand_5.57

vyatireko viśeṣaś ced upamānopameyayoḥ 
śailā ivonnatāḥ santaḥ kiṃ tu prakṛtikomalāḥ // JCand_5.58

sahoktiḥ sahabhāvaś ced bhāsate janarañjanaḥ 
digantam agamad yasya kīrtiḥ pratyarthibhiḥ saha // JCand_5.59

vinoktiś ced vinā kiṃcit prastutaṃ hīnam ucyate 
vidyā hṛdyāpi sāvadyā binā vinayasampadam // JCand_5.60

samāsoktiḥ parisphūrtiḥ prastute 'prastutasya cet 
ayam aindrīmukhaṃ paśya raktaś cumbati candramāḥ // JCand_5.61

khaṇḍaśleṣaḥ padānāṃ ced ekaikaṃ pṛthagarthatā 
ucchaladbhūrikīlālaḥ śuśubhe vāhinīpatiḥ // JCand_5.62

bhaṅgaśleṣaḥ padastomasy-aiva cet pṛthagarthatā 
ajarāmaratā kasya nāyodhyeva purī priyā // JCand_5.63

arthaśleṣo 'rthamātrasya yady anekārthasaṃśrayaḥ 
kuṭilāḥ śyāmalā dīrghā kaṭākṣāḥ kuntalāś ca te // JCand_5.64

aprastutapraśaṃsā syāt sā yatra prastutānugā 
kāryakāraṇasāmānyaviśeṣāder asau matā // JCand_5.65

kamalaiḥ kamalāvāsaiḥ kiṃ kiṃ nāsādi sundaram 
apy ambudheḥ paraṃ pāraṃ prayānti vyavasāyinaḥ // JCand_5.66

bhaved arthāntaranyaso 'nuṣaktārthāntarābhidhā 
hanūmān abdhim atarad duṣkaraṃ kiṃ mahātmanām // JCand_5.67

yasmin viśeṣasāmānyaviśeṣāḥ sa vikasvaraḥ 
sa na jigye mahānto hi durdharṣāḥ kṣmādharā iva // JCand_5.68

kāryādyaiḥ prastutair uktaiḥ paryāyoktiṃ pracakṣate 
tṛṇāny aṅkurayāmāsa vipakṣanṛpasadmasu // JCand_5.69

uktir vyājastutir nindāstutibhyāṃ stutinindayoḥ 
kaste viveko nayasi svargaṃ pātakino 'pi yat // JCand_5.70

ākṣepas tu prayuktasya pratiṣedho vicāraṇāt 
candra saṃdarśayātmānam athavāsti priyāmukham // JCand_5.71

gūḍhākṣepo vidhau vyakte niṣedhe cāsphuṭe sati 
hara sītāṃ sukhaṃ, kiṃ tu cintayāntakaḍhaukanam // JCand_5.72

virodho 'nupapattiś ced guṇadravyakriyādiṣu 
amandacandanasyandaḥ svacchandaṃ dandahīti mām // JCand_5.73

śleṣādibhūr virodhaś ced virodhābhāsatā matā 
apy andhakāriṇānena jagad etat prakāśate // JCand_5.74

asaṃbhavo 'rthaniṣpattāv asaṃbhāvyatvavarṇanam 
ko veda gopaśiśukaḥ śailam utpāṭayiṣyati // JCand_5.75

vibhāvanā vināpi syāt kāraṇaṃ kāryajanma cet 
paśya lākṣārasāsiktaṃ raktaṃ tvaccaraṇadvayam // JCand_5.76

viśeṣoktir anutpattiḥ kāryasya sati kāraṇe 
namantam api dhīmantaṃ na laṅghayati kaścana // JCand_5.77

ākhyāte bhinnadeśatve kāryahetvor asaṃgatiḥ 
tvadbhaktānāṃ namaty aṅgaṃ bhaṅgam eti bhavaklamaḥ // JCand_5.78

viṣamaṃ yady anaucityād anekānvayakalpanam 
kvātitīvraviṣāḥ sarpāḥ kvāsau candanabhūruhaḥ // JCand_5.79

samam aucityato 'nekavastusambandhavarṇanam 
anurūpaṃ kṛtaṃ sadma hāreṇa kucamaṇḍalam // JCand_5.80

vicitraṃ cet prayatnaḥ syād viparītaphalapradaḥ 
namanti santas trailokyād api labdhuṃ samunnatim // JCand_5.81

adhikaṃ bodhyam ādhārād ādheyādhikavarṇanam 
yayā vyāptaṃ jagat tasyāṃ vāci mānti na te guṇāḥ // JCand_5.82

anyonyaṃ nāma yatra syād upakāraḥ parasparam 
triyāmā śaśinā bhāti śaśī bhāti triyāmayā // JCand_5.83

viśeṣaḥ khyātam ādhāraṃ vināpy ādheyavarṇanam 
gate 'pi sūrye dīpasthās tamaś chindanti tatkarāḥ // JCand_5.84

syād vyāghāto 'nyathākāri vastv anyakriyam ucyate 
yair jagat prīyate hanti tair eva kusumāyudhaḥ // JCand_5.85

gumphaḥ kāraṇamālā syād yathāprākprāntakāraṇaiḥ 
nayena śrīḥ śriyā tyāgas tyāgena vipulaṃ yaśaḥ // JCand_5.86

gṛhītamuktarītyarthaśreṇir ekāvalī matā 
netre karṇāntaviśrānte karṇau dormūladolinau // JCand_5.87

dīpakaikāvalīyogān mālādīpakam ucyate 
smareṇa hṛdaye tasyās tena tvayi kṛtā sthitiḥ // JCand_5.88

sāro nāma padotkarṣaḥ sāratāyā yathottaram 
sāraṃ sārasvataṃ tatra kāvyaṃ tatra śivastavaḥ // JCand_5.89

udārasāraś ced bhāti bhinno 'bhinnatayā guṇaḥ 
madhuraṃ madhu pīyūṣaṃ tasmāt tasmāt kaver vacaḥ // JCand_5.90

yathāsaṃkhyaṃ dvidhārthāś cet kramādekaikamanvitāḥ 
śatruṃ mitraṃ dviṣatpakṣaṃ jaya rañjaya bhañjaya // JCand_5.91

paryāyaś ced anekatra syād ekasya samanvayaḥ 
padmaṃ muktvā gatā candraṃ kāminīvadanopamā // JCand_5.92

parivṛttir vinimayo nyūnābhyadhikayor mithaḥ 
jagrāhaikaṃ śaraṃ muktvā kaṭākṣān śatruyoṣitām // JCand_5.93

parisaṃkhyā niṣidhyaikam anyasmin vastuyantraṇam 
snehakṣayaḥ pradīpeṣu svānteṣu na natabhruvām // JCand_5.94

vikalpas tulyabalayor virodhaś cāturīyutaḥ 
kāntācitte 'dhare vāpi kuru tvaṃ vītarāgatām // JCand_5.95

bhūyasām ekasambandhabhājāṃ gumphaḥ samuccayaḥ 
naśyanti paścāt paśyanti bhraśyanti ca tava dviṣaḥ // JCand_5.96

samādhiḥ kāryasaukaryaṃ kāraṇāntarasannidheḥ 
utkaṇṭhitāṃ ca kalayan jagāmāstaṃ ca bhānumān // JCand_5.97

pratyanīkaṃ balavataḥ śatroḥ pakṣe parākramaḥ 
jaitranetrānugau karṇāv utpalābhyām adhaḥkṛtau // JCand_5.98

pratīpam upamānasya hīnatvam upameyataḥ 
dṛṣṭaṃ ced vadanaṃ tasyāḥ kiṃ padmena kimindunā // JCand_5.99

ullāso 'nyamahimnā ced doṣo hy anyatra varṇyate 
tad abhāgyaṃ dhanasyaiva yan nāśrayati sajjanam // JCand_5.100

tadguṇaḥ svaguṇatyāgād anyataḥ svaguṇodayaḥ 
padmarāgāruṇaṃ nāsāmauktikaṃ te 'dharaśritam // JCand_5.101

punaḥ svaguṇasamprāptir vijñeyā pūrvarūpatā 
harakaṇṭhāṃśulipto 'pi śeṣas tvadyaśasā sitaḥ // JCand_5.102

yadvastuno 'nyathā rūpaṃ tathā syāt pūrvarūpatā 
dīpe nirvāpite hy āsīt kāñcīratnair aharmahaḥ // JCand_5.103

saṅgatānyaguṇānaṅgīkāram āhur atadguṇam 
viśann api raver madhyaṃ śīta eva sadā śaśī // JCand_5.104

prāksiddhasvaguṇotkarṣo 'nuguṇaḥ parasannidheḥ 
karṇotpalāni dadhate kaṭākṣairapi nīlatām // JCand_5.105

avajñā varṇyate vastu guṇadoṣākṣamaṃ yadi 
mlāyanti yadi padmāni kā hānir amṛtadyuteḥ // JCand_5.106

praśnottaraṃ krameṇoktau syūtam uttaram uttaram 
yatrāsau vetasī pāntha tatrāsau sutarā sarit // JCand_5.107

pihitaṃ paravṛttāntajñātur anyasya ceṣṭitam 
priye gṛhāgate prātaḥ kāntā talpam akalpayat // JCand_5.108

vyājoktiḥ śaṅkamānasya chadmanā vastugopanam 
sakhi paśya gṛhārāmaparāgair asmi dhūsarā // JCand_5.109

vakroktiḥ śleṣakākubhyāṃ vācyārthāntarakalpanam 
muñca mānaṃ dinaṃ prāptaṃ manda nandī harāntike // JCand_5.110

svābhāvoktiḥ svabhāvasya jātyādiṣu ca varṇanam 
kuraṅgair uttaraṅgākṣi stabdhakarṇair udīkṣyate // JCand_5.111

bhāvikaṃ bhūtabhāvyarthasākṣād darśanavarṇanam 
alaṃ vilokayādyāpi yuddhyante 'tra surāsurāḥ // JCand_5.112

deśātmaviprakṛṣṭasya darśanaṃ bhāvikacchaviḥ 
tvaṃ vasan hṛdaye tasyāḥ sākṣāt pañceṣur īkṣyase // JCand_5.113

udāttam ṛddheś caritaṃ ślāghyaṃ cānyopalakṣaṇam 
sānau yasyābhavad yuddhaṃ tad dhūrjaṭikirīṭinoḥ // JCand_5.114

atyuktir adbhutātathyaśauryaudāryādivarṇanam 
tvayi dātari rājendra yācakāḥ kalpaśākhinaḥ // JCand_5.115

rasabhāvatadābhāsabhāvaśāntinibandhanāḥ 
rasavatpreyaūrjasvisamāhitamayābhidhāḥ // JCand_5.116

bhāvānāmudayaḥ sandhiḥ śabalatvam iti trayaḥ 
alaṅkārān imān sapta kecid āhur manīṣiṇaḥ // JCand_5.117

śuddhir ekapradhānatvaṃ tathā saṃsṛṣṭisaṃkarau 
eteṣām eva vinyāsān nālaṅkārāntarāṇy amī // JCand_5.118

sarveṣāṃ ca pratidvandvapraticchandabhidābhṛtām 
upādhiḥ kvacid udbhinnaḥ syād anyatrāpi saṃbhavāt // JCand_5.119

mālā paraṃparā caiṣāṃ bhūyasām anukūlake 
manuṣye bhavataḥ kvāpi hy alaṅkārāṅgatāṃ gate // JCand_5.120

śabde padārthe vākyārthe vākyārthastabake tathā 
ete bhavanti vinyāsāḥ svabhāvātiśayātmakāḥ // JCand_5.121

kasyāpy atiśayasyokter ity anvarthavicāraṇāt 
prāyeṇāmī hy alaṃkārā bhinnā nātiśayoktitaḥ // JCand_5.122

alaṃkārapradhāneṣu dadhāneṣv api sāmyatām 
vailakṣaṇyaṃ prativyakti pratibhāti mukheṣviva // JCand_5.123

alaṃkāreṣu tathyeṣu yady anāsthā manīṣiṇām 
tad arvācīnabhedeṣu nāmnāṃ nāmnāya iṣyatām // JCand_5.124

mahādevaḥ satrapramukhamakhavidyaikacaturaḥ sumitrā tadbhaktipraṇihitamatir yasya pitarau 
caturthaḥ saikoyam sukavijayadevena racite ciraṃ candrāloke sukhayatu mayūkhaḥ sumanasaḥ // JCand_5.125

ālambanoddīpanātmā vibhāvaḥ kāraṇaṃ dvidhā 
kāryo 'nubhāvo bhāvaś ca sahāyo vyabhicāry api // JCand_6.1

galadvedyāntarodbhedo hṛdayeṣv ajaḍātmanām 
milan malayajālepa ivāhlādaṃ vikāsayan // JCand_6.2

kāvye nāṭye ca kārye ca vibhāvādyair vibhāvitaḥ 
āsvādyamānaikatanuḥ sthāyī bhāvo rasaḥ smṛtaḥ // JCand_6.3

ratyākhyasthāyibhāvātmā vallabhādivibhāvitaḥ 
ālasyerṣyājugupsābhyo vinā saṃcāribhir yutaḥ // JCand_6.4

anubhāvaiḥ kaṭākṣādyair unmādādyair yathākramam 
sambhogo vipralambhaś ca śṛṅgāro dvividho mataḥ // JCand_6.5

hāsasthāyī raso hāsyo vibhāvadyair yathākramam 
vairūpyaphullagaṇḍatvā-vahitthādyaiḥ samanvitaḥ // JCand_6.6

abhīṣṭaviprayogāśrupātaglānyādibhiḥ kramāt 
vibhāvādyair yutaḥ śokasthāyī syāt karuṇo rasaḥ // JCand_6.7

krodhasthāyī raso raudro vibhāvādyaiḥ samanvitaḥ 
mātsaryahastaniṣpeṣasaṃmohādyair yathākramam // JCand_6.8

utsāhākhyasthāyibhāvaḥ prabhāvādivibhāvabhūḥ 
vīro 'nubhāvaiḥ sthairyādyair bhāvair garvādibhiryutaḥ // JCand_6.9

vyāghrādibhir vibhāvais tu vepitādyanubhāvabhṛt 
bhāvair mohādibhir yukto bhayasthāyī bhayānakaḥ // JCand_6.10

sthāyī jugupsā bībhatso vibhāvādyā yathākramam 
aniṣṭekṣaṇaniṣṭhīvamohādyā yatra saṃmatāḥ // JCand_6.11

adbhuto vismayasthāyī māyādikavibhāvabhūḥ 
romāñcādyanubhāvo 'yaṃ stambhādivyabhicārikaḥ // JCand_6.12

nirvedasthāyikaḥ śāntaḥ satsaṅgādivibhāvabhūḥ 
kṣamādikānubhāvo 'yaṃ stambhādivyabhicārikaḥ // JCand_6.13

ratir devādiviṣayā santi ca vyabhicāriṇaḥ 
vedyamānā nigadyante bhāvāḥ sāhityavedibhiḥ // JCand_6.14

nirvedaglāniśaṅkākhyās tathāsūyāmadaśramāḥ 
ālasyaṃ caiva dainyaṃ ca cintā mohaḥ smṛtir dhṛtiḥ // JCand_6.15

vrīḍā capalatā harṣa āvego jaḍatā tathā 
garvo viṣāda autsukyaṃ nidrāpasmāra eva ca // JCand_6.16

suptaṃ prabodho 'marṣaś cāpy avahittham athogratā 
matir vyādhis tathonmādas tathā maraṇam eva ca // JCand_6.17

trāsaś caiva vitarkaś ca vijñeyā vyabhicāriṇaḥ 
trayastriṃśad ime bhāvāḥ samākhyātās tu nāmataḥ // JCand_6.18

sarvasādhāraṇapremapraśrayādisvarūpayā 
anaucityā rasābhāsā bhāvābhāsāś ca kīrtitāḥ // JCand_6.19

bhāvasya śāntir udayaḥ sandhiḥ śabalatā tathā 
kāvyasya kāñcanasyeva kuṅkumaṃ kāntisaṃpade // JCand_6.20

āturyam āsaptamaṃ ca yatheṣṭair aṣṭamādibhiḥ 
samāsaḥ syāt padair na syāt samāsaḥ sarvathāpi ca // JCand_6.21

pāñcālikī ca lāṭīyā gauḍīyā ca yathārasam 
vaidarbhī ca yathāsaṃkhyaṃ catasro rītayaḥ smṛtāḥ // JCand_6.22

madhurāyāṃ samākrāntā vargasthāḥ pañcamair nijaiḥ 
lakāraś ca lasaṃyukto hrasvavyavahitau raṇau // JCand_6.23

rephākrāntā vargyayaṇāṣ ṭavargāt pañcamād ṛte 
kapākrāntas tavargaḥ syāt prauḍhāyāṃ ca kamūrdhatā // JCand_6.24

sarvair ūrdhvaiḥ sakārasya sarvai rephasya sarvathā 
rahor dvedhā tu saṃyogaḥ paruṣāyāṃ śaṣau svataḥ // JCand_6.25

lakāro 'nyair asaṃyukto laghavo ghabhadhā rasau 
lalitāyāṃ tathā śeṣā bhadrāyām iti vṛttayaḥ // JCand_6.26

aṅgabhaṅgollasallīlā taruṇī smaratoraṇam 
tarkakarkaśapūrṇoktiprāptotkaṭadhiyāṃ vṛthā // JCand_6.27

vīpsotsarpanmukhāgrārdraṃ barhī jahre kṛśas tṛṣam 
lalanā rabhasaṃ dhatte ghanāṭope mahīyasi // JCand_6.28

mahādevaḥ satrapramukhamakhavidyaikacaturaḥ sumitrā tadbhaktipraṇihitamatir yasya pitarau 
mayūkhastenāsau sukavijayadevena racite ciraṃ candrāloke sukhayatu mahati ṛtusaṃkhyaḥ // JCand_6.29

vṛttibhedais tribhir yuktā srotobhiriva jāhnavī 
bhāratī bhāti gambhīrā kuṭilā saralā kvacit // JCand_7.1

sāṃmukhyaṃ vidadhānāyāḥ sphuṭam arthāntare giraḥ 
kaṭākṣa iva lolākṣyā vyāpāro vyañjanātmakaḥ // JCand_7.2

avivakṣitavācyasya dvau bhedau vācyam eva cet 
arthāntire saṃkramitam atyantaṃ vā tiraskṛtam // JCand_7.3

dvau vivakṣitavācyasya lakṣyālakṣyakramātmakau 
catvāriṃśadyutaikena bhedāḥ ṣaṭ cānayoḥ kramāt // JCand_7.4

tridhā śabdārthatadyugmaśaktijanmā sphuṭakramāt 
rasabhāvatadābhāsapramukhas tv asphuṭakramāt // JCand_7.5

vastvalaṅkārayor vyakter bhedau dvau śabdaśaktijau 
arthaśaktisamutthasya bhedā dvādaśa tad yathā // JCand_7.6

catvāro vastv alaṃkāram alaṃkāras tu vastu yat 
alaṃkāram alaṃkāro vastu vastu vyanakti tat // JCand_7.7

vaktuḥ kavinibaddhasya kaver vā prauḍhinirmitaḥ 
svasiddho vā vyañjako 'rthaś catvāras triguṇās tataḥ // JCand_7.8

śabdārthobhayabhūr ekaḥ sa ca vākyaikasaṃśrayaḥ 
padaikadeśe racanāvarṇavākyapadeṣv api // JCand_7.9

prabandhe ceti ṣoḍhāsau rasādyākhyo 'sphuṭakramaḥ 
eṣu saptadaśasv ekaṃ parityajyāsphuṭakramam // JCand_7.10

ye ṣoḍaśādyā dviguṇās te syur vākyapadāśrayāt 
prabandhe 'pi dvādaśa syur arthaśaktibhuvo bhidaḥ // JCand_7.11

dvātriṃśad dvādaśaikaḥ ṣaṭ sarvasaṃkalitadhvaneḥ 
bhedāḥ syur ekapañcāśat saṃbhinnās tu sahasraśaḥ // JCand_7.12

vaktṛsyūtaṃ bodhayituṃ vyaṅgyaṃ vaktur abhīpsitam 
svāṅkuritam atadrūpaṃ svayam ullasitaṃ giraḥ // JCand_7.13

kaścit sādhāraṇaḥ kaścid āmantrya pratibodhitaḥ 
kaścit taṭasthaḥ kaścic ca bodhitapratibodhitaḥ // JCand_7.14

ityevaṃ boddhṛvaicitryād vaktṛsyūtaṃ caturvidham 
upekṣānihnavābhyāṃ ca dvidhā svāṅkuritaṃ matam // JCand_7.15

bhūtādikālabhedena nihnavaḥ syād anekadhā 
anenāpi prabhedena vyaktivallī vijṛmbhate // JCand_7.16

nānāprabhedā niyatā kvacit prakaraṇādinā 
arthe 'rtham anyaṃ yaṃ vakti tad vācyavyaṅgyam iṣyate // JCand_7.17

mahādevaḥ satrapramukhamakhavidyaikacaturaḥ sumitrā tadbhaktipraṇihitamatir yasya pitarau 
mayūkhastenāsau sukavijayadevena racite ciraṃ candrāloke sukhayatu mahati munisaṃkhyaḥ // JCand_7.18

yad vyajyamānaṃ manasaḥ staimityāya sa no dhvaniḥ 
anyathā tu guṇībhūtavyaṅgyam āpatitaṃ tridhā // JCand_8.1

vyaktir eva kvacid vyaṅgyaḥ kvacid arthasvabhāvataḥ 
kvacic cārutarasyāgre sa vimuñcati cārutām // JCand_8.2

agūḍhaṃ kalayed arthā-ntarasaṃkramitādikam 
vismṛtaḥ kim apāṃnātha sa tvayā kumbhasaṃbhavaḥ // JCand_8.3

aparasya rasādeś ced aṅgamanyad rasādikam 
hā hā! matkucakāśmīraliptaṃ bhinnam uraḥ śaraiḥ // JCand_8.4

tathā vācyasya siddhyaṅgaṃ naur artho vāridher yathā 
saṃśritya taraṇiṃ dhīrās taranti vyādhivāridhīn // JCand_8.5

asphuṭaṃ stanayor atra kokasādṛśyavan matam 
kuṅkumāktaṃ stanadvandvaṃ mānasaṃ mama gāhate // JCand_8.6

saṃdigdhaṃ yadi saṃdeho dairghyādyutpalayoriva 
saṃprāpte nayane tasyāḥ śravaṇottaṃsabhūmikām // JCand_8.7

tulyaprādhānyam indutvam iva vācyena sāmyabhṛt 
kānte tvadānanarucā glānim eti saroruham // JCand_8.8

asundaraṃ yadi vyaṅgyaṃ syād vācyād amanoharam 
sarasyāmīladambhoje cakraḥ kāntāṃ vilokate // JCand_8.9

kākusthaṃ praṇato 'mbhodhir adya mādyatu rāvaṇaḥ 
ity aṣṭadhā guṇībhūtavyaṅgyam aṅgīkṛtaṃ budhaiḥ // JCand_8.10

mahādevaḥ satrapramukhamakhavidyaikacaturaḥ sumitrā tadbhaktipraṇihitamatir yasya pitarau 
mayūkhastenāsau sukavijayadevena racite ciraṃ candrāloke mahati vasusaṃkhyaḥ sukhayatu // JCand_8.11

mukhyārthasyāvivakṣāyāṃ pūrvārvācī ca rūḍhitaḥ 
prayojanāc ca saṃbaddhaṃ vadantī lakṣaṇā matā // JCand_9.1

lakṣaṇīyasvaśabdasya mīlanāmīlanād dvidhā 
lakṣaṇā sā tridhā siddhasādhyasādhyāṅgabhedataḥ // JCand_9.2

sphuṭāsphuṭaprabhedena prayojanam api dvidhā 
viduḥ sphuṭaṃ taṭasthatvād arthagatvād dvidhā budhāḥ // JCand_9.3

asphuṭaṃ cārthaniṣṭhatvāt taṭasthatvād api dvidhā 
lakṣyalakṣakaniṣṭhatvād arthasaṃstham api dvidhā // JCand_9.4

lakṣakasthaṃ sphuṭaṃ yatra sā vicakṣaṇalakṣaṇā 
asphuṭatvaṃ taṭasthatvaṃ lakṣyasthatvam amuṣya ca // JCand_9.5

anyās tisra iti vyaktā śaktitaḥ sā caturvidhā 
indur evaiṣa tadvaktram utkarṣo lakṣyate mukhe // JCand_9.6

pradīpaṃ vardhayetyatra taṭasthaṃ maṅgalodayaḥ 
paṭo 'yaṃ dagdha ityādau sphuṭaṃ nāsti prayojanam // JCand_9.7

amṛtaṃ sūktam ityādau lakṣyastham atihṛdyatā 
ābhimukhyāt saṃnidhānāt tathākārapratītitaḥ // JCand_9.8

kāryakāraṇabhāvāt sā vācyavācakabhāvataḥ 
ityevamādeḥ saṃbandhāt kiṃcānyasmāc catuṣṭayāt // JCand_9.9

sādṛśyāt samavāyāt sā vaiparītyāt kriyānvayāt 
sāropādhyavasānākhye gauṇaśuddhe pṛthak pṛthak // JCand_9.10

gauṇaṃ sāropam uddiṣṭam indur mukham itīdṛśam 
gauṇaṃ sādhyavasānaṃ syād indur evedam īdṛśam // JCand_9.11

śuddhaṃ sāropam uddiṣṭam āyur ghṛtam itīdṛśam 
śuddhaṃ sādhyavasānaṃ syād āyur evedam īdṛśam // JCand_9.12

upādānārpaṇadvāre dve cānye iti ṣaḍvidhā 
kuntā viśanti gaṅgāyāṃ ghoṣo nivasatīti ca // JCand_9.13

lakṣyalakṣakavaiśiṣṭyavaiśiṣṭyād dvividhā punaḥ 
sarasaṃ kāvyam amṛtaṃ vidyā sthirataraṃ dhanam // JCand_9.14

tathā sahetur atathā-bhedabhinnā ca kutracit 
saundaryeṇaiṣa kandarpaḥ sā ca mūrtimatī ratiḥ // JCand_9.15

śabde padārthe vākyārthe saṃkhyāyāṃ kārake tathā 
liṅge ceyam alaṅkārā-ṅkurabījatayā sthitā // JCand_9.16

mahādevaḥ satrapramukhamakhavidyaikacaturaḥ sumitrā tadbhaktipraṇihitamatir yasya pitarau 
mayūkhastenāsau sukavijayadevena racite ciraṃ candrāloke mahati navasaṃkhyaḥ sukhayatu // JCand_9.17

dharmaṃ kaṃcit puraskṛtya prāyaḥ śabdaḥ pravartate 
yayārthaṃ spaṣṭam ācaṣṭe śabdas tām abhidhāṃ viduḥ // JCand_10.1

jātyā guṇena kriyayā vastuyogena saṃjñayā 
nirdeśena tathā prāhuḥ ṣaḍvidhām abhidhāṃ budhāḥ // JCand_10.2

gaur nīlaḥ pācako daṇḍī ḍitthaḥ kaṃsa iti kramāt 
kaṃ saṃhinasti kaṃsārir naraṃ ca kaṃ samāśritam // JCand_10.3

na yogāder āyatanaṃ na saṅketaniketanam 
vṛttyā nirdeśaśabdo 'yaṃ mukhyayā svābhidheyayā // JCand_10.4

pīyūṣavarṣaprabhavaṃ candrālokamanoharam 
sudhānidhānam āsādya śrayadhvaṃ vibudhā mudam // JCand_10.5

jayanti yājñikaśrīmanmahādevāṅgajanmanaḥ 
sūktipīyūṣavarṣasya jayadevakaver giraḥ // JCand_10.6

mahādevaḥ satrapramukhamakhavidyaikacaturaḥ sumitrā tadbhaktipraṇihitamatir yasya pitarau 
mayūkhas tenāsau sukavijayadevena racite ciraṃ candrāloke mahati daśasaṃkhyaḥ sukhayatu // JCand_10.7