TextGrid Repository

          Kālidāsa: Raghuvaṃśa


# Header

  This file is a plain text transformation of http://gretil.sub.uni-goettingen.de/gretil/corpustei/sa_kAlidAsa-raghuvaMza.xml
  with a rudimentary header. For a more extensive header please refer to the source file.

## Data entry: n.n.
## Contribution: n.n.
## Date of this version: 2020-07-31

## Source: 
   - A. Scharpé: Kalidasa Lexicon, Vol. 1, Brugge 1964 (Rijksuniversiteit te Gent, Werken uitgegeven door de Faculteit van de Letteren en Wijsbegeerte, 134).

## Publisher: Göttingen Register of Electronic Texts in Indian Languages (GRETIL), SUB Göttingen

## Licence:
   This e-text was provided to GRETIL in good faith that no copyright rights have been infringed. If anyone wishes to assert copyright over this file, please contact the GRETIL management at gretil(at)sub(dot)uni-goettingen(dot)de. The file will be immediately removed pending resolution of the claim.
   Distributed under a Creative Commons Attribution-NonCommercial-ShareAlike 4.0 International License.

## Structure of references:
   A reference is assembled consisting of
   - a pragmatic abbreviation of the title: Raghuvaṃśa = Ragh,
   - the number of the  in arabic numerals,
   - the number of the verse in arabic numerals.

## Notes:
   This file has been created by mass conversion of GRETIL's Sanskrit corpus from kragh_au.htm. Due to the heterogeneity of the sources the header markup might be suboptimal. For the sake of transparency the header of the legacy file is documented in the note element below:

   
	 Kalidasa: Raghuvamsa
Based on the ed. by A. Scharpé: Kalidasa Lexicon, Vol. 1,
Brugge 1964
(Rijksuniversiteit te Gent, Werken uitgegeven door de
Faculteit van de Letteren en Wijsbegeerte, 134)
Input by N.N.
TEXT WITH VARIANTS AND PADA-MARKERS
	


## Revisions:
   - 2020-07-31: TEI encoding by mass conversion of GRETIL's Sanskrit corpus


# Text

vāgarthāv iva saṃpṛktau vāgarthapratipattaye 
jagataḥ pitarau vande pārvatīparameśvarau // Ragh_1.1

kva sūryaprabhavo vaṃśaḥ kva cālpaviṣayā matiḥ 
titīrṣur dustaram mohād uḍupenāsmi sāgaram // Ragh_1.2

mandaḥ kaviyaśaḥ prārthī gamiṣyāmy upahāsyatām 
prāṃśulabhye phale lobhād udbāhur iva vāmanaḥ // Ragh_1.3

atha vā kṛtavāgdvāre vaṃśe 'smin pūrvasūribhiḥ 
maṇau vajrasamutkīrṇe sūtrasyevāsti me gatiḥ // Ragh_1.4

so 'ham ājanamaśuddhānām āphalodayakarmaṇām 
āsamudrakṣitīśānām ānākarathavartmanām // Ragh_1.5

yathāvidhihutāgnīnāṃ yathākāmārcitārthinām 
yathāparādhadaṇḍānāṃ yathākālaprabhodhinām // Ragh_1.6

tyāgāya saṃbhṛtārthānāṃ satyāya mitabhāṣiṇām 
yaśase vijigīṣuṇāṃ prajāyai gṛhamendhinām // Ragh_1.7

śaiśave 'bhyastavidyānāṃ yauvane viṣayaiṣiṇām 
vārdhhake munivṛttīnāṃ yogenānte tanutyajām // Ragh_1.8

raghūṇām anvayaṃ vakṣye tanuvāgvibhavo 'pi san 
tadguṇaiḥ karṇam āgatya cāpalāya pracoditaḥ // Ragh_1.9

taṃ santaḥ śrotum arhanti sadasadvyaktihetavaḥ 
hemnaḥ saṃlakṣyate hy agnau viśuddhiḥ śyāmikāpi vā // Ragh_1.10

vaivasato manur nāma mānanīyo manīṣiṇām 
āsīn mahīkṣitām ādyaḥ praṇavaś chandasām iva // Ragh_1.11

tadanvaye śuddhimati prasūtaḥ śuddhimattaraḥ 
dilīpa iti rājendur induḥ kṣīranidhāv iva // Ragh_1.12

vyūḍhorasko vṛṣaskandhaḥ śālaprāṃśur mahābhujaḥ 
ātmakarmakṣamaṃ dehaṃ kṣātro dharma ivāśritaḥ // Ragh_1.13

sarvātiritasāreṇa sarvatejo'bhibhāvinā 
sthitaḥ sarvonnatenorvīṃ krāntvā merur ivātmanā // Ragh_1.14

ākārasadṛśaprajñaḥ prajñayā sadṛśāgamaḥ 
āgamaiḥ sadṛśārambha[ḥ] ārambhasadṛśodayaḥ // Ragh_1.15

bhīmakāntair nṛpaguṇaiḥ sa bhabhūvopajīvinām 
adhṛṣyaś cābhi gamyaś ca yādhoratnair ivārṇavaḥ // Ragh_1.16

rekhāmātram api kṣuṇṇād ā manor vartmanaḥ param 
na vyatīyuḥ prajās tasya niyantur nemivṛttayaḥ // Ragh_1.17

prajānām eva bhūty arthaṃ sa tābyho balim agrahīt 
sahasraguṇam utsraṣṭum ādatte hi rasaṃ raviḥ // Ragh_1.18

senā paricchadas tasya dvayam evārthasādhanam 
śāstreṣv akuṇṭhitā buddhir maurvī dhanuṣi cātatā // Ragh_1.19

tasya saṃvṛtamantrasya gūdhākāreṅgitasya ca 
phalānumeyāḥ prārambhāḥ saṃskārāḥ prāktanā iva // Ragh_1.20

jugopātmānam atrasto bheje dharmam anāturaḥ 
agṛdhnur ādade so 'rtham asaktaḥ sukham anvabhūt // Ragh_1.21

jñāne maunaṃ kṣamā śaktau tyāge ślāghāviparyayaḥ 
guṇā guṇānubandhitvāt tasya saprasavā iva // Ragh_1.22

anākṛṣṭasya viṣayair vidyānāṃ pāradṛśvanaḥ 
tasya dharmarater āsīd vṛddhatvaṃ jarasā vinā // Ragh_1.23

prajānāṃ vinayādhānād rakṣaṇād bharaṇād api 
sa pitā pitaras tāsāṃ kevalaṃ janmahetavaḥ // Ragh_1.24

sthityai daṇḍayato daṇḍyān pariṇetuḥ prasūtaye 
apy arthakāmau tasyāstāṃ dharma eva manīṣiṇaḥ // Ragh_1.25

dudhoha gāṃ sa yajñāya sasyāya maghavā divam 
saṃpadvinimayenobhau dadhatur bhuvanadvayam // Ragh_1.26

na kilānuyayus tasya rājāno rakṣitur yaśaḥ 
vyāvṛtta yat parasvebhyaḥ śrutau taskaratā sthitā // Ragh_1.27

dveṣyo 'pi saṃmataḥ śiṣṭas tasyārtasya yathauṣadham 
tvājyo duṣṭaḥ priyo 'py āsīd aṅgulīvoragakṣatā // Ragh_1.28

taṃ vedhā vidadhe nūnaṃ mahābhūtasamādhinā 
tathā hi sarve tasyāsan parārthaikaphalā guṇāḥ // Ragh_1.29

sa velāvapravalayāṃ parikhīkṛtasāgarām 
ananyāśāsanām urvīṃ śaśāsaikapurīm iva // Ragh_1.30

tasya dākṣiṇyaruḍhena nāmnā magadhavaṃśajā 
patnī sudakṣiṇety āsīd adhvarasyeva dakṣiṇā // Ragh_1.31

kalatravantam ātmānam avarodhe mahaty api 
tayā mene manasvinyā lakṣmyā ca vasudhādhipaḥ // Ragh_1.32

tasyām ātmānurūpāyām ātmajanmasamutsukaḥ 
vilambitaphalaiḥ kālaṃ sa nināya manorathaiḥ // Ragh_1.33

saṃtānārthāya vidhaye svabhujād avatāritā 
tena dhūr jagato gurvī saciveṣu nicikṣipe // Ragh_1.34

gaṅgāṃ bhagīratheneva pūrveṣāṃ pāvanakṣamām 
icchatā saṃtatiṃ nyastā tena mantriṣu kosalā // Ragh_1.34*

athābhyarcya vidhātāraṃ prayatau putrakāmyayā 
tau daṃpatī vasiṣṭhasya guror jagmatur āśramam // Ragh_1.35

snigdhagambhīranirghoṣam ekaṃ syandanam āsthitau 
prāvṛṣeṇyaṃ payovāhaṃ vidyudairāvatāv iva // Ragh_1.36

mā bhūd āśramapīḍeti parimeyapuraḥsarau 
anubhāvaviśeṣāt tu senāparivṛtāv iva // Ragh_1.37

sevyamānau sukhasparśaiḥ śālaniryāsagandhibhiḥ 
puṣpareṇūtkirair vātair ādhūtavanarājibhiḥ // Ragh_1.38

mano'bhirāmāḥ śṛṇvantau rathanemisvanonmukhaiḥ 
ṣaḍjasaṃvādinīḥ kekā dvidhā bhinnāḥ śikhaṇḍibhiḥ // Ragh_1.39

paraparākṣisādṛśyam adūrojjhitavartmasu 
mṛgadvandveṣu paśyantau syandanābaddhadṛṣṭiṣu // Ragh_1.40

śreṇībandhād vitanvadbhir astambhāṃ toraṇasrajam 
sārasaiḥ kalanirhrādhaiḥ kvacid unnamitānanau // Ragh_1.41

pavanasyānukūlatvāt prārthanāsiddhiśaṃsinaḥ 
rajobhis turagotkīrṇair aspṛṣṭālaveṣṭanau // Ragh_1.42

sarasīṣv aravindānāṃ vīcivikṣobhaśītalam 
āmodam upajighrantau svaniḥśvāsānukāriṇam // Ragh_1.43

grāmeṣv ātmaviṣṛṭeṣu yūpacihneṣu yajvanām 
amoghāḥ pratigṛhṇantāv arghyānupadam āśiṣaḥ // Ragh_1.44

haiyaṃgavīnam ādāya ghoṣavṛddhān upasthitān 
nāmadheyāni pṛcchantau vanyānāṃ mārgaśākhinām // Ragh_1.45

kāpy abhikhyā tayor āsīd vrajatoḥ śuddhaveṣayoḥ 
himanirmuktayor yoge citrācandramsor iva // Ragh_1.46

tat tad bhūmipatiḥ patnyai darśayan priyadarśanaḥ 
sāyaṃ saṃyaminas tasya maharṣer mahiṣīsakhaḥ // Ragh_1.47

sa duṣprāpayaśāḥ prāpad āśramaṃ śrāntavāhanaḥ 
sāyaṃ saṃyaminas tasya maharṣer mahiṣīsakhaḥ // Ragh_1.48

vanāntarād upāvṛttaiḥ samitkuśaphalaharaiḥ 
pūryamāṇam adṛśyāgni-pratyudyātais tapasvibhiḥ // Ragh_1.49

ākīrṇam ṛṣipatnīnām uṭajadvārarodhibhiḥ 
apatyair iva nīvāra-bhāgadheyocitair mṛgaiḥ // Ragh_1.50

sekānte munikanyābhis tatkṣaṇojjhitavṛkṣakam 
viśvāsāya vihaṃgānām ālavālāmbupāyinām // Ragh_1.51

ātapātayasaṃkśipta-nīvārāsu niṣādibhiḥ 
mṛgair vartitaromantham uṭajāṅganabhūmiṣu // Ragh_1.52

abhyutthitāgnipiśunair atithīn āśramonmukhān 
punānaṃ pavanoddhūtair dhūmair āhutigandhibhiḥ // Ragh_1.53

atha yantāram ādiṣya dhuryān viśramayeti saḥ 
tām avāropayat patnīṃ rathād avatatāra ca // Ragh_1.54

tasmai sabhyāḥ sabhāryāya goptre guptatamendriyāḥ 
arhaṇām arhate cakrur munayo nayacakṣuṣe // Ragh_1.55

vidheḥ sāyantanasyānte sa dadarśa tapondhim 
anvāsitam arundhatyā svāhayeva havirbhujam // Ragh_1.56

tayor jagṛhatuḥ pādān rājā rājñī ca māgadhī 
tau gurur gurupatnī ca prītyā pratinanandatuḥ // Ragh_1.57

tam ātithyakriyāśānta-rathakṣobhapariśramam 
papraccha kuśalaṃ rājye rājyāśramamuniṃ muniḥ // Ragh_1.58

ath'; ātharvanidhes tasya vijitāripuraḥ puraḥ 
arthyām arthapatir vācam ādade vadatāṃ varaḥ // Ragh_1.59

upapannaṃ nanu śivaṃ saptasv aṅgeṣu yasya me 
daivīnāṃ mānuṣīṇāṃ ca pratihartā tvam āpadām // Ragh_1.60

tava mantrakṛto mantrair dūrāt prāsamitāribhiḥ 
pratyādiśyanta iva me dṛṣtalakṣabhidaḥ śarāḥ // Ragh_1.61

havir āvarjitaṃ hotas tvayā vidhivad agniṣu 
vṛṣṭir bhavati sasyānām avagrahaviśoṣiṇām // Ragh_1.62

puruṣāyuṣajīvinyo nirātaṅkā nirītayaḥ 
yan madīyāḥ prajās tasya hetus tvadbrahmavarcasam // Ragh_1.63

tvayaivaṃ cintyamānasya guruṇā brahmayoninā 
sānubandhāḥ kathaṃ na syuḥ saṃpado me nirāpadaḥ // Ragh_1.64

kiṃ tu vadhvāṃ tavaitasyām adṛṣṭasadṛśaprajam 
na mām avati sadvīpā ratnasūr api medinī // Ragh_1.65

nūnaṃ mattaḥ paraṃ vaṃśyāḥ piṇḍavicchedadarśinaḥ 
na prakāmabhujaḥ śrāddhe svadhāsaṃgrahatatparāḥ // Ragh_1.66

matparaṃ durlabham matvā nūnam āvarjitaṃ mayā 
payaḥ pūrvaiḥ svaniḥśvāsaiḥ kavoṣṇam upabhujyate // Ragh_1.67

so 'ham ijyāviśuddhātmā prajālopanimīlitaḥ 
prakāśaś cāprakāśas ca lokāloka ivācalaḥ // Ragh_1.68

lokāntarasukhaṃ puṇyaṃ tapodānasamudbhavam 
saṃtatiḥ śuddhavaṃśyā hi paratreha ca śarmaṇe // Ragh_1.69

tayā hīnaṃ vidhātar māṃ kathaṃ paśyan na dūyase 
siktaṃ svayam iva snehād vandhyam āśramavṛkṣakam // Ragh_1.70

asahyapīḍaṃ bhagavann ṛṇam antyam avehi me 
aruṃtudam ivālānam anirvāṇasya dantinaḥ // Ragh_1.71

tasmān mucye yathā tāta saṃvidhātuṃ tathārhasi 
ikṣvākūṇāṃ durāpe 'rthe tvadadhīnā hi siddhayaḥ // Ragh_1.72

iti vijñāpito rājñā dhyānastimitalocanaḥ 
kṣaṇamātram ṛṣis tasthau suptamīna iva hradaḥ // Ragh_1.73

so 'paśyat praṇidhānena saṃtateḥ stambhakāraṇam 
bhāvitātmā bhuvo bhartur athainaṃ pratyabodhayat // Ragh_1.74

purā śakram upasthāya tavorvīṃ prati yāsyataḥ 
āsīt kalpatarucchāyām āśritā surabhiḥ pathi // Ragh_1.75

dharmalopabhayād rājñīm ṛtusnātām imāṃ smaran 
pradakṣiṇakriyārhāyāṃ tasyāṃ tvaṃ sādhu nācaraḥ // Ragh_1.76

avajānāsi māṃ yasmād atas te na bhaviṣyati 
matprasūtim anārādhya prajeti tvāṃ śaśāpa sā // Ragh_1.77

sa śāpo na tvayā rājan na ca sārathinā śrutaḥ 
nadaty ākāśaṅgāyāḥ srotasy uddāmadiggaje // Ragh_1.78

īpsitaṃ tadavajñānād viddhi sārgalam ātmanaḥ 
pratibadhnāti hi śreyaḥ pūjyapūjāvyatikramaḥ // Ragh_1.79

haviṣe dīrghasattrasya sā cedānīṃ pracetasaḥ 
bhujaṃgapihitadvāraṃ pātālam adhitiṣṭhati // Ragh_1.80

sutāṃ tadīyāṃ surabheḥ kṛtvā pratinidhiṃ śuciḥ 
ārādhaya saptnīkaḥ prītā kāmadughā hi sā // Ragh_1.81

iti vādina evāsya hotur āhutisādhanam 
anindyā nandinī nāma dhenur āvavṛte vanāt // Ragh_1.82

lalāṭodayam ābhugnaṃ pallavasnigdhapāṭalā 
bibhratī śvetaromāṅkaṃ saṃdhyeva śaśinaṃ navam // Ragh_1.83

bhuvaṃ koṣṇena kuṇśodhnī medhyenāvabhṛthād api 
pasraveṇābhivarṣantī vatsālokapravartinā // Ragh_1.84

rajaḥkaṇaiḥ khuroddhūtaiḥ spṛśadbhir gātram antikāt 
tīrthābhiṣekajāṃ śuddhim ādadhānā mahīkṣitaḥ // Ragh_1.85

tāṃ puṇyadarśanāṃ dṛṣtvā nimittajñas taponidhiḥ 
yājyam āśaṃsitāvandhya prārthanaṃ punar abravīt // Ragh_1.86

adūravartinīṃ siddhiṃ rājan vigaṇayātmanaḥ 
upasthiteyaṃ kalyāṇī nāmni kīrtita eva yat // Ragh_1.87

vanyavṛttir imāṃ śaśvad (?) ātmānugamanena gām 
vidyām abhyasaneneva prasādayitum arhasi // Ragh_1.88

prasthitāyāṃ pratiṣṭhethāḥ sthitāyāṃ sthitim ācareḥ 
niṣaṇṇāyāṃ niṣīdāsyāṃ pītāmbhasi piber apaḥ // Ragh_1.89

vadhūr bhaktimatī cainām arcitām ā tapovanāt 
prayatā prātar anvetu piteva dhuri putriṇām // Ragh_1.91

ity ā prasādād asyās tvaṃ paricaryāparo bhava 
avighnam astu te stheyāḥ sāyaṃ pratudvrajed api // Ragh_1.90

tatheti pratijagrāha prītimān saparigrahaḥ 
ādeśaṃ deśakālajñaḥ śiṣyaḥ śāsitur ānataḥ // Ragh_1.92

atha pradoṣe doṣajñaḥ saṃveśāya viśaṃpatim 
sūnuḥ sūnṛtavāk sraṣṭur visasarjodita sriyam // Ragh_1.93

satyām api tapaḥsiddhau niyamāpekṣayā muniḥ 
kalpavit kalpayām āsa vanyām evāsya saṃvidhām // Ragh_1.94

nirdiṣṭāṃ kulapatinā sa parṇaśālām adhyāsya prayataparigrahadvitīyaḥ 
tacchiṣyādhyayananiveditāvasānāṃ saṃviṣṭaḥ kuśaśayane niśāṃ nināya // Ragh_1.95

atha prajānmām adhipaḥ prabhāte jāyāpratigrāhitagandhamālyām 
vanāya pītapratibaddhavatsāṃ yaśodhano dhenum ṛṣer mumoca // Ragh_2.1

tasyāḥ khuranyāsapavitrapāṃsum apāṃsulānāṃ dhuri kīrtanīyā 
mārgaṃ manuṣyeśvaradharmapatnī śruter ivārthaṃ smṛtir anvagacchat // Ragh_2.2

nivartya rājā dayitāṃ dayālus tāṃ saurabheyīṃ surabhir yaśobhiḥ 
payodharībhūtacatuḥsamudrāṃ jugopa gorūpadharām ivorvīm // Ragh_2.3

vratāya tenānucareṇa dhenor nyaṣedhi śeṣo 'py anuyāyivargaḥ 
na cānyatas tasya śarīrarakṣā svavīryaguptā hi manoḥ prasūtiḥ // Ragh_2.4

āsvādavadbhiḥ kavalais tṛṇānaṃ kaṇḍūyanair daṃśanivārṇaiś ca 
avyāhataiḥ svairagataiḥ sa tasyāḥ samrāṭ samārādhantatparo 'bhūt // Ragh_2.5

sthitaḥ sthitām uccalitaḥ prayātāṃ niṣeduṣīm āsanabandha dhīraḥ 
jalābhilāṣī jalam ādadhānāṃ chāveya tāṃ bhūpati anvagacchat // Ragh_2.6

sa nyastacihnām api rājalakṣmīṃ tejoviśeṣānumitāṃ dadhānaḥ 
āsīd anāviṣkṛtadānarājir antarmadāvastha iva dvipendraḥ // Ragh_2.7

latāpratānodgrathitaiḥ sa kiśair adhijaydhanvā vicacāra dāvam 
rakṣāpadeśān munihomadhenor vanyān vineṣyann iva duṣṭasattvān // Ragh_2.8

viṣṛṣṭapārśvānucarasya tasya pārśvadrumāḥ pāśabhṛtā samasya 
udīrayām āsur ivonmadānām ālokaśabdaṃ vayasāṃ virāvaiḥ // Ragh_2.9

marutprayuktāś ca marutsakhābhaṃ tam arcyam ārād abhivartamānam 
avākiran bālalatāḥ prasūnair ālokaśabdaṃ vayasāṃ virāvaiḥ // Ragh_2.10

dhanurbhṛto 'py asya dayārdrabhāvam ākhyātam antaḥkaraṇair viśaṅkaiḥ 
vilokayantyo vapur āpur akṣṇāṃ prakāmavistāraphalaṃ hariṇyaḥ // Ragh_2.11

sa kīcakair mārutapūrṇarandhraiḥ kūjadbhir āpāditavaṃśkṛtyam 
śuśrāva kuñjeṣu yaśaḥ svam uccair udgīyamānaṃ vanadevatābhiḥ // Ragh_2.12

ṛktas tuśārair girinirjharāṇām anokahākamptapuṣpagandhī 
tam ātapaklāntam anātapatram ācārapūtaṃ pavanaḥ siṣeve // Ragh_2.13

śaśāma vṛṣṭyāpi vinā davāgnir āsīd viśeṣā phalapuṣpavṛddhiḥ 
ūnaṃ na sattveṣv adhiko babādhe tasmin vanaṃ gopatri gāhamāne // Ragh_2.14

saṃcārapūtāni digantarāṇi kṛtvā dinānte nilayāya gantum 
pracakrame pallavarāgatāmrā tasmin vanaṃ gopatri gāhamāne // Ragh_2.15

tāṃ devatāpitratithikriyārthām anvag yayau madhyamalokapālaḥ 
babhau ca sā tena satāṃ matena śraddheva sākṣād vidhinopapannā // Ragh_2.16

sa palvalottīrṇavarāhayūthāny āvāsavṛkṣonmukhabarhiṇāni 
yayau mṛgādhyāsitaśādvalāni śyāmāyamānāni vanāni paśyan // Ragh_2.17

āpīnabhārodvahanaprayatnād gṛṣṭir gurutvād vapuṣo narendraḥ 
ubhāv alaṃcakratur añcitābhyāṃ tapovanāvṛttipathaṃ gatābhyām // Ragh_2.18

vasiṣṭhadhenor anuyāninaṃ tam āvartamānaṃ vanitā vanāntāt 
papau nimeṣālasapakṣmapaṅktir upoṣitābhyām iva locanābhyām // Ragh_2.19

puraskṛtā vartmani pārthivena pratyudgatā pārthivadharmpatnyā 
tadantare sā virarāja dhenur dinakṣapāmadhyagateva saṃdhyā // Ragh_2.20

pradakṣiṇīkṛtya payasvinīṃ tāṃ sudakṣiṇā sākṣatapātrahastā 
praṇamya cānarca viśālam asyāḥ śṛṅgāntaraṃ dvāram ivārthasiddheḥ // Ragh_2.21

vatsotsukāpi stimitā saparyāṃ pratyagrahīt seti nanandatus tau 
bhaktyopapanneṣu hi tavidhānāṃ prasādacihnāni puraḥphalāni // Ragh_2.22

guroḥ sadārasya nipīḍya pādau samāpya sāṃdhyaṃ ca vidhiṃ dilīpaḥ 
dohāvasāne punar eva dogdhrīṃ bheje bhujocchinnaripur niṣaṇṇām // Ragh_2.23

tām antikanyastabalipradīpām anvāsya goptā gṛhiṇīsahāyaḥ 
krameṇa suptām anu saṃviveśa suptotthitāṃ prātar an'(?)ūdatiṣṭhat // Ragh_2.24

itthaṃ vrataṃ dhārayataḥ prajārthaṃ samaṃ mahiṣyā mahanīyakīrteḥ 
sapta vyatīyus triguṇāni tasya dināni dīnoddharaṇocitasya // Ragh_2.25

anyedyur ātmānucarasya bhāvaṃ jijñāsamānā munihomadhenuḥ 
gaṅgāprapātāntavirūḍhaśaṣpaṃ gaurīguror gahvaram āviveṣa // Ragh_2.26

ity adriṣobhāprahitekṣaṇena ity adriṣobhāprahitekṣaṇena 
alakṣitābhyutpatano nṛpeṇa prasahya siṃhaḥ kila tāṃ cakarṣa // Ragh_2.27

tadīyam ākranditam ārtasādhor guhānibaddhapratiśabdadīrgham 
raśmiṣv ivādāya nagendrasaktāṃ nivartayām āsa nṛpasya dṛṣṭim // Ragh_2.28

sa pāṭalāyāṃ gavi tasthivāṃsaṃ dhanurdharaḥ kesariṇaṃ dadarśa 
adhityakāyām iva dhātumayyāṃ lodhradrumaṃ sānumataḥ praphullam // Ragh_2.29

tato mṛgendrasya mṛgendragāmī vadhāya vadhyasya śaraṃ śaraṇyaḥ 
jātābhiṣaṅgo nṛpatir niṣaṅgād uddhartum aicchat prasabhoddhṛtāriḥ // Ragh_2.30

vāmetaras tasya karaḥ prahartur nakhaprabhābhūṣitakaṅkapattre 
saktāṅguliḥ sāyakapuṅkha eva citrārpitārambha invāvatasthe // Ragh_2.31

bāhupratiṣṭambhavivṛddhamanyur abhyarṇam āgaskṛtam aspṛśadbhiḥ 
rājā svatejobhir adahyatāntar bhogīva mantrauṣadhiruddhavīryaḥ // Ragh_2.32

tam āryagṛhyaṃ nigṛhītadhenur manuṣyavācā manuvaṃśaketum 
vismāyayan vismitam ātmavṛttau siṃhorusattvaṃ nijagāda siṃhaḥ // Ragh_2.33

alaṃ mahīpāla tava śrameṇa prayuktam apy astram ito vṛthā syāt 
na pādaponmūlanaśakti raṃhaḥ śiloccaye mūrchati mārutasya // Ragh_2.34

kailāsagauraṃ vṛam ārurukṣoḥ pādārpaṇānugrahapūtapṛṣṭam 
avehi māṃ kiṃkaram aṣṭamūrteḥ kumbhodaraṃ nāma nikumbhamitram // Ragh_2.35

amuṃ puraḥ paśyasi devadāruṃ putrīkṛto 'sau vṛṣabhadhvajena 
yo hemakumbhastananiḥsṛtānāṃ skandasya mātuḥ payasāṃ rasajñaḥ // Ragh_2.36

kaṇḍūyamānena kaṭaṃ kadācid vanyadvipenonmathitā tvag asya 
athainam adres tanayā śuśoca senānyam ālīḍham ivāsurāstraiḥ // Ragh_2.37

tadā prabhṛty eva vanadvipānāṃ trāsārtham asminn aham adikukṣau 
vyāpāritaḥ śūlabhṛtā vidhāya siṃhatvam aṅkāgatasattvavṛtti // Ragh_2.38

tasyālam eṣā kṣudhitasya tṛptyai pradiṣṭakālā parameśvareṇa 
upasthitā śoṇitapāraṇā me suradviṣaś cāndramasī sudheva // Ragh_2.39

sa tvaṃ nivartasva vihāya lajjāṃ guror bhavān darśitaśiṣyabhaktiḥ 
śastreṇa rakṣyaṃ yad aśakyarakṣaṃ na tad yaśaḥ śastrabhṛtāṃ kṣiṇoti // Ragh_2.40

iti pragalbhaṃ purusādhirājo mṛgādhirājasya vaco niśamya 
pratyāhatāstro giriśaprabhāvād ātmany avajñāṃ śithilīcakāra // Ragh_2.41

pratyabravīc cainam iṣuprayoge tatpūrvasaṅge vitathaprayatnaḥ 
jaḍīkṛtas tryambakavikṣaṇena vajraṃ mumukṣann iva vajrapāṇiḥ // Ragh_2.42

pratyāha vainaṃ śaramokṣavandhyo mā pattraparvāt svarabhedam āptaḥ 
prahīṇapūrvadhvaninādhirūḍhas tulām asārena śaradghanena // Ragh_2.42*

saṃruddhaceṣṭasya hetuḥ hāsyaṃ vacas tad yad ahaṃ vivakṣuḥ 
antargataṃ prāṇabhṛtāṃ hi veda sarvaṃ bhavān bhāvam ato 'bhidhāsye // Ragh_2.43

mānyaḥ sa me sthāvarajaṅgamānāṃ sargasthitipratyavahārahetuḥ 
guror apīdaṃ dhanam āhitāgner naśyat purastād anupekṣaṇīyam // Ragh_2.44

sa tvaṃ madīyena śarīravṛttiṃ dehena nirvartayituṃ prasīda 
dināvasānotsukabālavatsā visṛjyatāṃ dhenur iyaṃ maharṣeḥ // Ragh_2.45

athāndhakāraṃ girigahvarāṇāṃ daṃṣṭrāmayūkhaiḥ śakalāni kurvan 
bhūyaḥ sa bhūteśvarapārśvavartī kiṃcid vihasyārthapatiṃ babhāṣe // Ragh_2.46

ekātapatraṃ jagataḥ prabhutvaṃ navaṃ yayaḥ kāntam idaṃ vapuś ca 
alpasya hetor bahu hātum icchan vicāramūdhaḥ pratibhāsi me tvam // Ragh_2.47

bhūtānukampā tava ced iyaṃ gaur ekā bhavet svastimatī tvadante 
jīvan punaḥ śaśvad upaplavebhyaḥ prajāḥ prajānātha piteva pāsi // Ragh_2.48

athaikadhenor aparādhacaṇḍād guroḥ kṛṣānupratimād bibheṣi 
śakyo 'sya manyur bhavatā vinetuṃ gāḥ koṭiśaḥ sparśayatā ghaṭodhnīḥ // Ragh_2.49

tad rakṣa kalyāṇaparaṃparāṇāṃ bhoktāram ūrjasvalam ātmadeham 
mahītalasparśanamātrabhinnam ṛddhaṃ hi rājyaṃ padam aindram āhuḥ // Ragh_2.50

etāvad uktvā virate mṛgendre pratisvanenāsya guhāgatena 
śiloccayo 'pi kṣitipālam uccaiḥ prītyā tam evārtham abhāṣateva // Ragh_2.51

niśamya devānucarasya vācaṃ manuṣyadevaḥ punar apy uvāca 
dhenvā tadadhyāsitakātarākṣyā nirīkṣyamāṇaḥ sutarāṃ dayāluḥ // Ragh_2.52

kṣatāt kila trāyata ity udagraḥ kṣatrasya śabdo bhuvaneṣu rūḍhaḥ 
rājyena kiṃ tadviparītavṛtteḥ prāṇair upakrośamalīmasair vā // Ragh_2.53

kathaṃ nu śakyo 'nunayo maharṣer viśrāṇanāc cānyapayasvinīnām 
imām anūnāṃ surabher avehi rudraujasā tu pahṛtaṃ tvayāsyām // Ragh_2.54

seyaṃ svadehārpaṇaniṣkrayeṇa nyāyyā mayā mocayituṃ bhavattaḥ 
na pāraṇā syād vihatā tavaivaṃ bhaved aluptaś ca muneḥ kriyārthaḥ // Ragh_2.55

bhavān apīdaṃ paravān avaiti mahān hi yatnas tava devadārau 
sthātuṃ niyoktur na hi śakyam agre vināśya rakṣyaṃ svayam akṣatena // Ragh_2.56

kim apy ahiṃsyas tava cen mato 'haṃ yaśaḥśarīre bhava me dayāluḥ 
ekāntavidhaṃsiṣu madvidhānāṃ piṇḍeṣv anāsthā khalu bhautikeṣu // Ragh_2.57

saṃbandham ābhāṣaṇapūrvam āhur vṛttaḥ sa nau saṃgatayor vanānte 
tad bhūtanāthānuga nārhasi tvaṃ saṃbandhino me praṇayaṃ vihantum // Ragh_2.58

tatheti gām uktavate dilīpaḥ sadyaḥ pratiṣṭambhavimuktabāhuḥ 
sa nyasta śastro haraye svadeham upānayat piṇḍam ivāmiṣasya // Ragh_2.59

tasmin kṣaṇe pālayituḥ prajānām utpaśyataḥ siṃhanipātam ugram 
avāṅmukhasy'opari puṣpavṛṣṭiḥ papāta vidyādharahastamuktā // Ragh_2.60

uttiṣṭha vatsety amṛtāyamānaṃ vaco niśamyotthitam utthitaḥ san 
dadarśa rājā jananīm iva svāṃ gām agrataḥ prasraviṇīṃ na siṃham // Ragh_2.61

taṃ vismitaṃ dhenur uvāca sādho māyāṃ mayodhbhāvya parīkṣito 'si 
ṛṣiprabhāvān mayi nāntako 'pi prabhuḥ prahartuṃ kim utānyahiṃsrāḥ // Ragh_2.62

bhaktyā gurau mayy anukampāya ca prītāsmi te putra varaṃ vṛṇīṣva 
na kevalānāṃ payasāṃ prasūtim avehi māṃ kāmadughāṃ prasannām // Ragh_2.63

tataḥ samānīya samānitārthī hastau svahastārjitavīraśabdaḥ 
vaṃśasya kartāram anantakīrtiṃ sudakṣiṇāyāṃ tanayaṃ yayāce // Ragh_2.64

saṃtānakāmāya tatheti kāmaṃ rājñe pratiśrutya payasvinī sā 
dugdhvā payaḥ pattrapuṭe madīyaṃ putr'; opabhuṅkṣv' eti tam ādideśa // Ragh_2.65

vatsasya homārthavidheś ca śeṣam ṛṣer anujñām adhigamya mātaḥ 
ūdhasyam icchāmi tavopabhoktumyaṃ ṣaṣṭhāmśam urvyā iva rakṣitāyāḥ // Ragh_2.66

itthaṃ kṣitīśena vasiṣṭhadhenur vijñāpitā prītatarā babhūva 
tadanvitā haimavatāc ca kukṣeḥ pratyāyayāv āśramam aśrameṇa // Ragh_2.67

tasyāḥ prasannendumukhaḥ prasādaṃ gurur nṛpāṇāṃ gurave nivedya 
praharṣacihnānumitaṃ priyāyai śaśaṃsa vācā punaruktayeva // Ragh_2.68

sa nandinīstanyam aninditātmā sadvatsalo vatsahutāvaśeṣam 
papau vasiṣṭhena kṛtābhyanujñaḥ śubhraṃ yaśo mūrtam ivātitṛṣṇaḥ // Ragh_2.69

prātar yathoktavratapāraṇānte prāsthānikaṃ svastyayanaṃ prayuja 
tau daṃpatī svāṃ prati rājadhānīṃ prasthāpayām āsa vaśī vasiṣṭhaḥ // Ragh_2.70

pradakṣiṇīkṛtya hutaṃ hutāśam anantaraṃ bhartur arundhatīṃ ca 
dhenuṃ savatsāṃ ca nṛpaḥ pratasthe sanmaṅgalodagrataraprabhāvaḥ // Ragh_2.71

śrotābhirāmadhvaninā rathena sa dharmapatnīsahitaḥ sahiṣṇuḥ 
yayāv anudghātasukhena mārgaṃ sveneva pūrṇena manorathena // Ragh_2.72

tam āhitautsukyam adarśanena prajāḥ prajārthavratakarśitāṅgam 
netraiḥ papus tṛptim anāpnuvadbhir navodayaṃ nātham ivauṣadhīnām // Ragh_2.73

puraṃdaraśrīḥ puram utpatākaṃ praviśya paurair abhinandyamānaḥ 
bhuje bhuaṃgendrasamānasāre bhūyaḥ sa bhūmer dhuram āsasañja // Ragh_2.74

atha nayanasamutthaṃ jyotir atrer iva dyauḥ surasarid iva tejo vahniniṣṭhyūtam aiśam 
narapatikulabhūtyai garbham ādhatta rājñī gurubhir abhiniviṣṭaṃ lokapālānubhāvaiḥ // Ragh_2.75

athepsitaṃ bhartur upasthitodayaṃ sakhījanodvīkṣaṇakaumudīmukham 
nidānam ikṣvākukulasya saṃtateḥ sudakṣiṇā daurhṛdalakṣaṇaṃ dadhau // Ragh_3.1

śarīrasādād asamagrabhūṣaṇā mukhena sālakṣyata lodhrapāṇḍunā 
tanuprakāśena viceyatārakā prabhātakalpā śaśineva śarvarī // Ragh_3.2

tato viśāṃpatyur ananyasaṃtater manorathaṃ kiṃcid ivodayonmukham 
ananyasauhārdarasasya dohadaṃ priyā prapede prakṛtipriyaṃvadā // Ragh_3.2a

mukhena sā ketakapattrapāṇḍunā kṛśāṅgayaṣṭiḥ parimeyabhūṣaṇā 
sthitālpatārāṃ karuṇendumaṇḍalāṃ vibhātakalpāṃ rajanīṃ vyaḍambayat // Ragh_3.2b

tadānanaṃ mṛtsurabhi kṣitīśvaro rahasy upāghrāya na tṛptim āyayau 
karīva siktaṃ pṛṣataiḥ payomucāṃ śucivyapāye vanarājipalvalam // Ragh_3.3

divaṃ marutvān iva bhokṣyate bhuvaṃ digantaviśrāntaratho hi tat sutaḥ 
ato 'bhilāṣe prathamaṃ tathāvidhe mano babandhānyarasān vilaṅghya sā // Ragh_3.4

na me hriyā śaṃsati kiṃcid īpsitaṃ spṛhāvatī vastuṣu keṣu māgadhī 
na hīṣṭam asya tridive 'pi bhūpater priyāsakhīr uttarakosaleśvaraḥ // Ragh_3.5

upetya sā dohadaduḥkhaśīlatāṃ yad eva vavre tad apaśyad āhṛtam 
na hīṣṭam asya tridive 'pi bhūpater abhūd anāsādyam adhijyadhanvanaḥ // Ragh_3.6

krameṇa nistīrya ca dohadavyathāṃ pracīyamānāvayavā rarāja sā 
purāṇapattrāpagamād anantaraṃ lateva saṃnaddhamanojñapallavā // Ragh_3.7

dineṣu gacchatsu nitāntapīvaraṃ tadīyam ānīlamukhaṃ stanadvayam 
tiraścakāra bhramarābhilīnayoḥ sujātayoḥ paṅkajakośayoḥ śriyam) // Ragh_3.8

nidhānagarbhām iva sāgarāmbarāṃ śamīm ivābhyantaralīnapāvakām 
nadīm ivāntaḥsalilāṃ sarasvatīṃ nṛpaḥ sasattvāṃ mahiṣīm amanyata // Ragh_3.9

priyānurāgasya manaḥsamunnater bhujārjitānāṃ ca digantasaṃpadām 
yathākramaṃ puṃsavanādikāḥ kriyā dhṛteś ca dhīraḥ sadṛśīr vyadhatta saḥ // Ragh_3.10

surendramātrāśritagarbhagauravāt prayatnamuktāsanayā gṛhāgataḥ 
tayopacārāñjalikhinnahastayā nananda pāriplavanetrayā nṛpaḥ // Ragh_3.11

kumārabhṛtyākuśalair anuṣṭhite bhiṣagbhir āptair atha garbhabharmaṇi 
patiḥ pratītaḥ prasavonmukhīm priyāṃ dadarśa kāle divam abhrītam iva // Ragh_3.12

grahais tataḥ pañcabhir uccasaṃśrayair asūryagaiḥ sūcitabhāgyasaṃpadam 
asūta putraṃ samaye śacīsamā trisādhanā śaktir ivārtham akṣayam // Ragh_3.13

diśaḥ prasedur maruto vavuḥ sukhāḥ pradakṣiṇārcir havir agnir ādade 
babhūva sarvaṃ śubhaśaṃsi tatkṣaṇaṃ bhavo hi lokābhyudayāya tādṛśām // Ragh_3.14

ariṣṭaśayyāṃ parito visāriṇā sujanmanas tasya nijena tejasā 
niśīthadīpāḥ sahasā hatatviṣo babhūvur ālekhyasamarpitā iva // Ragh_3.15

janāya śuddhāntacarāya śaṃsate kumārajanmāmṛtasaṃmitākṣaram 
adeyam āsīt trayam eva bhūpateḥ śaśiprabhaṃ chattram ubhe ca cāmare // Ragh_3.16

samīkṣya putrasya cirān mukhaṃ pitā nidhānakumbhasya yuveva durgataḥ 
mudā śarīre prababhūva nātmanaḥ payodhir indūdayamūrchito yathā // Ragh_3.16*

nivātapadmastimitena cakṣuṣā nṛpasya kāntaṃ pibataḥ sutānanam 
mahodadheḥ pūra ivendudarśanād guruḥ praharṣaḥ prababhūva nātmani // Ragh_3.17

sa jātakarmaṇy akhile tapasvinā tapovanād etya purodhasā kṛte 
dilīpasūnur maṇir ākarodbhavaḥ prayuktasaṃskāra ivādhikaṃ babhau // Ragh_3.18

sukhaśravā maṅgalatūryanisvanāḥ pramodanṛtyaiḥ saha vārayoṣitām 
na kevalaṃ sadmani māgadhīpateḥ pathi vyajṛmbhanta divaukasām api // Ragh_3.19

na saṃyatas tasya babhūva rakṣitur visarjayed yaṃ sutajanmaharṣitaḥ 
ṛṇābhidhānāt svayam eva kevalaṃ tadā pitḥṇāṃ mumuce sa bandhanāt // Ragh_3.20

śutasya yāyād ayam antam arbhakas tathā pareṣāṃ yudhi ceti pārthivaḥ 
avekṣya dhātor gamanārtham arthavic cakāra nāmnā raghum ātmasaṃbhavam // Ragh_3.21

pituḥ prayatnāt sa samagrasaṃpadaḥ śubhaiḥ śarīrāvayavair dine dine 
pupoṣa vṛddhiṃ haridaśvadīdhiter anupraveśād iva bālacandramāḥ // Ragh_3.22

umāvṛṣāṅkau śarajanmanā yathā yathā jayantena śacīpuraṃdarau 
tathā nṛpaḥ sā cu sutena māgadhī nanandatus tatsadṛśena tatsamau // Ragh_3.23

rathāṅganāmnor iva bhāvabandhanaṃ babhūva yat prema parasparāśrayam 
vibhaktam apy ekasutena tat tayoḥ parasparasyopari paryacīyata // Ragh_3.24

uvāca dhātryā prathamoditaṃ vaco yayau tadīyām avalambya cāṅgulim 
abhūc ca namraḥ praṇipātaśikṣayā pitur mudaṃ tena tatāna so 'rbhakaḥ // Ragh_3.25

tam aṅkam āropya śarīrayogajaiḥ sukhair niṣiñcantam ivāmṛtaṃ tvaci 
upāntasaṃmīlitalocano nṛpaś cirāt sutasparśarasjñatāṃ yayau // Ragh_3.26

tam aṅkam āropya śarīrayogajaiḥ sthiter abhettā sthitimantam anvayam 
svamūrtibhedena guṇāgryavartinā patiḥ prajānām iva sargam ātmanaḥ // Ragh_3.27

sa vṛttacaulaś calakākapakṣakair amātyaputraiḥ savayobhir anvitaḥ 
liper yathāvadgrahaṇena vāṅmayaṃ nadīmukheneva samudram āviśat // Ragh_3.28

athopanītaṃ vidhivad vipaścito vininyur enaṃ guravo gurupriyam 
avandhyayatnāś ca babhūvur arbhake tatāra vidyāḥ pavanātipātibhir // Ragh_3.29

dhiyaḥ samagraiḥ sa guṇair udāradhīḥ kramāc catasraś caturarṇavopamāḥ 
tatāra vidyāḥ pavanātipātibhir diśo haridbhir haritām iveśvaraḥ // Ragh_3.30

tvacaṃ sa medhyāṃ paridhāya rauravīm aśikṣatāstraṃ pitur eva mantravat 
na kevalaṃ tadgurur ekapārthivaḥ kṣitāv abhūd ekadhanurdharo 'pi saḥ // Ragh_3.31

mahokṣatāṃ vatsataraḥ spṛśann iva dvipendrabhāvaṃ kalabhaḥ śrayann iva 
raghuḥ kramād yauvanabhinnaśaiśavaḥ pupoṣa gāmbhīryamanoharaṃ vapuḥ // Ragh_3.32

athāsya godānavidher anantaraṃ vivāhadīkṣāṃ niravartayad guruḥ 
narendrakanyās tam avāpya satpatiṃ tamonudaṃ dakṣasutā ivābabhuḥ // Ragh_3.33

yuvā yugavyāyatabāhur aṃsalaḥ kapāṭavakṣāḥ pariṇaddhakaṃdharaḥ 
vapuḥprakarṣād ajayad guruṃ raghus tathāpi nīcair vinayād adṛśyata // Ragh_3.34

tataḥ prajānāṃ ciram ātmanā dhṛtāṃ nitāntagurvīṃ laghayiṣyatā dhuram 
nisargasaṃskāravinīta ity asau nṛpeṇa cakre yuvarājaśabdabhāk // Ragh_3.35

narendramūlāyatanād anantaraṃ ghanavyapāyena gabhastimān iva 
agacchad aṃśena guṇābhilāṣiṇī navāvatāraṃ kamalād ivotpalam // Ragh_3.36

vibhāvasuḥ sārathineva vāyunā ghanavyapāyena gabhastimān iva 
babhūva tenātitarāṃ suduḥsahaḥ kaṭaprabhedena karīva pārthivaḥ // Ragh_3.37

niyujya taṃ homaturaṃgarakṣaṇe dhanurdharaṃ rājasutair anudrutam 
apūrṇam ekena śatakratūpamaḥ śataṃ kratūnā apavighnam āpa saḥ // Ragh_3.38

tataḥ paraṃ tena makhāya vajvanā turaṃgam utsṛṣṭam anargalaṃ punaḥ 
dhanurbhṛtām agrata eva rakṣiṇāṃ jahāra śakraḥ kila gūḍhavigrahaḥ // Ragh_3.39

viṣādaluptapratipatti vismitaṃ mamaiva yeneha turaṃgam īkṣase 
dhenvā niśamyeti vacaḥ samīrtaṃ śrutaprabhāvā dadṛśe 'tha nandinī // Ragh_3.40

svedāmbunā mārjaya putra locane mamaiva yeneha turaṃgam īkṣase 
dhenvā niśamyeti vacaḥ samīritaṃ mudaṃ parām āpa dilīpanandanaḥ // Ragh_3.40*

tadaṅganisyandajalena locane pramṛjya puṇyena puraskṛtaḥ satām 
atīndriyeṣv apy upapannadarśano babhūva bhāveṣu dilīpanandanaḥ // Ragh_3.41

sa pūrvataḥ parvatapakṣaśātanaṃ dadarśa devaṃ naradevasaṃbhavaḥ 
punaḥ punaḥ sūtaniṣiddhacāpalaṃ harantam aśvaṃ ratharaśmisaṃyatam // Ragh_3.42

sa pūrvataḥ parvatapakṣaśātanaṃ hariṃ viditvā haribhiś ca vājibhiḥ 
avocad enaṃ gangaspṛśā raghuḥ svareṇa dhīreṇa nivartayann iva // Ragh_3.43

makhāṃśabhājāṃ prathamo manīṣibhis tvam eva devendra sadā nigadyase 
ajasradīkṣāprayatasya madguroḥ kriyāvighātāya kathaṃ pravartase // Ragh_3.44

trilokanāthena sadā makhadviṣas tvayā niyamyā nanu divyacakṣuṣā 
sa cet svayaṃ karamasu dharmacāriṇāṃ tvam antarāyo bhavasi cyuto vidhiḥ // Ragh_3.45

tad aṅgam agryaṃ maghavan mahākrator amuṃ turaṃgaṃ pratimoktum arhasi 
pataḥśruter darśayitāra īśvarā malīmasām ādadate na paddhatim // Ragh_3.46

iti pragalbhaṃ raghuṇā samīritaṃ vaco niśamyādhipatir divaukasām 
nivartayām āsa rathaṃ savismayaḥ pracakrame ca prativaktum uttaram // Ragh_3.47

yad āttha rājanyakumāra tat tathā yaśas tu rakṣyaṃ parato yaśodhanaiḥ 
jagatprakāśaṃ tad aśeṣam ijyayā bhavadgurur laṅghayituṃ mamodyataḥ // Ragh_3.48

harir yathaikaḥ puruśottamaḥ smṛto maheśvaras tryambaka eva nāparaḥ 
tathā vidur māṃ munayaḥ śatakratuṃ dvitīyagāmī na hi śabda eṣa naḥ // Ragh_3.49

ato 'yam aśvaḥ kapilānukāriṇā pitus tvadīyasya mayāpahāritaḥ 
alaṃ prayatnena tavātra mā nidhāḥ padaṃ padavyāṃ sagarasya saṃtateḥ // Ragh_3.50

tataḥ prahasyāpabhayaḥ puraṃdaraṃ punar babhāṣe turagasya rakṣitā 
gṛhāṇa śastraṃ yadi sarga eṣa te na khalv anirjitya raghuṃ kṛtī bhavān // Ragh_3.51

sa evam uktvā maghavantam unmukhaḥ kariṣyamāṇaḥ saśaram śarāsanam 
atiṣṭhad ālīḍhaviśeṣaśobhinā vapuḥprakarṣeṇa viḍambiteśvaraḥ // Ragh_3.52

raghor avaṣṭambhamayena pattriṇā hṛdi kṣato gotrabhid apy amarṣaṇaḥ 
navāmbudānīkamuhūrtalāñchane dhanuṣy amoghaṃ samadhatta sāyakam // Ragh_3.53

dilīpasūnoḥ sa bṛhad (?) bhujāntaraṃ praviśya bhīmāsuraśoṇitocitaḥ 
papāv anāsvāditapūrvam āśugaḥ kutūhaleneva manuṣyaśoṇitam // Ragh_3.54

hareḥ kumāro 'pi kumāravikramaḥ suradvipāsphālanakarkaśāṅgulau 
bhuje śacīpattraviśeṣakāṅkite svanāmacihnaṃ nicakhāna sāyakam // Ragh_3.55

jahāra cānyena mayūrapattriṇā śareṇa śakrasya mahāśanidhvajam 
cukopa tasmai sa bhṛśaṃ suraśriyaḥ prasahaya keśavyaparopaṇād iva // Ragh_3.56

tayor upāntasthitasiddhasainikaṃ garutmadāśīviśabhīmadarśanaiḥ 
babhūva yuddhaṃ tumuulaṃ jayaiṣiṇor adhomukhair ūrdhvamukhaiś ca pattribhiḥ // Ragh_3.57

atiprabandhaprahitāstravṛṣṭibhis tam āśrayaṃ duṣprahasya tejasaḥ 
śaśāka nirvāpayituṃ na vāsavaḥ svataś cyutaṃ vahnim ivādbhir ambudaḥ // Ragh_3.58

tataḥ prakoṣṭhe haricandanāṅkite pramathyamānārṇavadhīra 
raghuḥ śaśāṅkārdhamukhena pattriṇā śarāsanajyām alunād viḍaujasaḥ // Ragh_3.59

sa cāpam utsṛjya vivṛddhamatsaraḥ praṇāśanāya prabalasya vidviṣaḥ 
mahīdhrapakṣavyaparopaṇocitaṃ sphuratprabhāmaṇḍalam astram ādade // Ragh_3.60

raghur bhṛśaṃ vakṣasi tena tāḍitaḥ papāta bhūmau saha sainikāśrubhiḥ 
nimeṣamātrād avadhūya tad vyathāṃ sahotthitaḥ sainikaharṣanisvanaiḥ // Ragh_3.61

tathāpi śastravyavahāraniṣṭhure bipakṣabhāve ciram asya tasthuṣaḥ 
tutoṣa vīryātiśayena vṛtrahā padaṃ hi sarvatra guṇair nidhīyate // Ragh_3.62

asaṅgam adriṣv api sāravattayā na me tvadanyena visoḍham āyudham 
avehi māṃ prītam ṛte turaṃgamāt kim icchasīti sphuṭam āha vāsavaḥ // Ragh_3.63

tato niṣaṅgād asamagram uddhṛtaṃ suvarṇapuṅkhadyutirañjitāṅgulim 
narendrasūnuḥ pratisaṃharann iṣuṃ priyaṃvadaḥ pratyavadat sureśvaram // Ragh_3.64

amocyam aśvaṃ yadi manyase prabho tataḥ samāpte vidhinaiva karmaṇi 
ajasradīkṣāprayataḥ sa madguruḥ krator aśeṣeṇa phalena yujyatām // Ragh_3.65

yathā ca vṛttāntam imaṃ sadogatas trilocanaikāṃśatayā durāsadaḥ 
tavaiva saṃdeṣaharād viśaṃpatiḥ śṛṇoti lokeśa tathā vidhīyatām // Ragh_3.66

tatheti kāmaṃ pratiśuśruvān raghor yathāgataṃ mātalisārathir yayau 
nṛpasya nātipramanāḥ sadogṛhaṃ sudakṣināsūnur api nyavartata // Ragh_3.67

tam abhyanandat prathamaṃ prabodhitaḥ prajeśvaraḥ śāsanahāriṇā hareḥ 
parāmṛśan harṣajaḍena pāṇinā tadīyam aṅgaṃ kuliśavraṇāṅkitam // Ragh_3.68

iti kṣitīśo navatiṃ navādhikāṃ mahākratūnāṃ mahanīyaśāsanaḥ 
samāraurukṣur divam āyuṣaḥ kṣaye tatāna sopānaparaṃparām iva // Ragh_3.69

atha sa viṣavyāvṛttātmā yathāvidhi sūnave nṛpatikakudaṃ dattvā yūne sitātapavāraṇam 
munivanatarucchāyāṃ devyā tayā saha śiśriye galitavayasām ikṣvākūṇā idaṃ hi kulavrtam // Ragh_3.70

sa rājyaṃ guruṇā dattaṃ pratipadyādhikaṃ babhau 
dinānte nihitaṃ tejaḥ savitreva hutāśanaḥ // Ragh_4.1

nyastaśastraṃ dilīpaṃ ca taṃ ca śuśruvuṣāṃ patim 
rājñām uddhṛtanārāce hṛdi śalyam ivārpitam // Ragh_4.1*

dilīpānantaraṃ rājye taṃ niśamya pratiṣṭhitam 
pūrvaṃ pradūmito rājñāṃ hṛdaye 'gnir ivotthitaḥ // Ragh_4.2

puruhūtadhvajasyeva tasyonnayanapaṅktayaḥ 
navābhyutthānadarśinyo nananduḥ sa prajāḥ prajāḥ // Ragh_4.3

samam eva samākrāntaṃ tasyonnayanapaṅktayaḥ 
tena siṃhāsanaṃ pitryam akhilaṃ cārimaṇḍalaṃ // Ragh_4.4

chāyāmaṇḍalalakṣyena tam adṛśyā kila svayam 
padmā padmātapatreṇa bheje sāmrājyadīkṣitam // Ragh_4.5

parikalpitasāṃnidhyā kāle kāle ca bandiṣu 
stutyaṃ stutibhir arthyābhir upatasthe sarasvatī // Ragh_4.6

manuprabhṛtibhir mānyair bhuktā yady api rājabhiḥ 
tathāpy ananyapūrveva tasminn āsīd vasuṃdharā // Ragh_4.7

sa hi sarvasya lokasya yuktadaṇḍatayā manaḥ 
ādade nātiśītoṣṇo nabhasvān iva dakṣiṇaḥ // Ragh_4.8

mandotkaṇṭaḥ kṛtās tena guṇādhikatayā gurau 
phalena sahakārasya phuṣpodgama iva prajāḥ // Ragh_4.9

nayavidbhir nave rājñi sad asac copadarśitam 
pūrva evābhavat pakṣas tasmin nābhavad uttaraḥ // Ragh_4.10

pañcānām api bhūtānām utkarṣaṃ pupuṣur guṇāḥ 
nave tasmin mahīpāle sarvaṃ navam ivābhavat // Ragh_4.11

yathā prahlādanāc candraḥ pratāpāt tapano yathā 
tathaiva so 'bhūd anvartho rājā prakṛtirañjanāt // Ragh_4.12

kāmaṃ karṇāntaviṣrānte viśāle tasya locane 
cakṣuṣmattā tu śāstreṇa sūkṣmakāryārthadarśinā // Ragh_4.13

labdhapraśamanasvastham athainaṃ samupasthitā 
pārthivaśrīr dvitīyeva śarat paṅkajalakṣaṇā // Ragh_4.14

nirvṛṣṭalaghubhir meghair muktavartmā suduḥsahaḥ 
svaṃ dhanuḥ śaṅkiteneva yugapad vyānaśe diśaḥ // Ragh_4.15

adhijyam āyudhaṃ kartuṃ muktavartmā suduḥsahaḥ 
svaṃ dhanuḥ śaṅkiteneva saṃjahre śatamanyunā // Ragh_4.15*

vārṣikaṃ saṃjahārendro dhanur jaitraṃ raghur dadhau 
prajārthasādhane tau hi paryāyodyatakārmukau // Ragh_4.16

puṇḍarīkātapatras taṃ vikasatkāśacāmaraḥ 
ṛtur viḍambayām āsa āsīt samarasā dvayoḥ // Ragh_4.17

prasādarīkātapatras taṃ candre ca viśadaprabhe 
tadā cakṣuṣmatāṃ prītir āsīt samarasā dvayoḥ // Ragh_4.18

haṃsaśreṇīṣu tārāsu kumudvatsu ca vāriṣu 
vibhūtayays tadīyānāṃ paryastā yaśasām iva // Ragh_4.19

ikṣucchāyaniṣādinyas tasya goptur guṇodayam 
ākumārakathodghātaṃ śāligopyo jagur yaśaḥ // Ragh_4.20

prasasādodayād ambhaḥ kumbhayoner mahaujasaḥ 
raghor abhibhavāśaṅki cukṣubhe dviṣatāṃ manaḥ // Ragh_4.21

madodagrāḥ kakudmantaḥ saritāṃ kūlamudrujāḥ 
līlākhelam anuprāpur mohakṣās tasya vikramam // Ragh_4.22

prasavaiḥ saptaparṇānāṃ madagandhibhir āhatāḥ 
asūyayeva tannāgāḥ saptadhaiva prasusruvuḥ // Ragh_4.23

saritaḥ kurvatī gādhāḥ pathaś cāśyānakardamān 
yātrāyai codayām āsa taṃ śakteḥ prathamaṃ śarat // Ragh_4.24

samyak tasmai ghuto vahnir vājinīrājanāvidhau 
pradakṣiṇārcir vyājena hasteneva jayaṃ dadau // Ragh_4.25

sa guptamūlapratyantaḥ śuddhapārṣṇir ayānvitaḥ 
ṣaḍvidhaṃ balam ādāya pratasthe digjigīṣayā // Ragh_4.26

avākiran vayovṛddhās taṃ lājaiḥ paurayoṣitaḥ 
pṛṣatair mandaroddhūtaiḥ kṣīrormaya ivācyutam // Ragh_4.27

sa yayau prathamaṃ prācīṃ tulyaḥ prācīnabarhiṣā 
ahitān aniloddhūtais tarjayann iva ketubhiḥ // Ragh_4.28

rajobhiḥ syandanoddhūtair gajaiś ca ghanasaṃnibhaiḥ 
bhuvas talam iva vyoma kurvan vyomeva bhūtalam // Ragh_4.29

pratāpo 'gre tataḥ śabdaḥ parāgas tadantaram 
yayau paścād rathādīti catuḥskandheva sā camūḥ // Ragh_4.30

marupṛṣṭhāny udambhāṃsi nāvyāḥ supratarā nadīḥ 
vipināni prakāśāni śaktimattvāc cakāra saḥ // Ragh_4.31

purogaiḥ kaluṣās tasya sahaprasthāyibhiḥ kṛśāḥ 
paścātprayāyibhiḥ paṅkāś cakrire mārganimnagāḥ // Ragh_4.31*

sa senāṃ mahatīṃ karṣan pūrvasāgaragāminīm 
babhau harajaṭābhraṣṭāṃ gaṅgām iva bhagīrathaḥ // Ragh_4.32

tyājitaiḥ phalam utkhātair bhagnaiś ca bahudhā nṛpaiḥ 
tasyāsīd ulbaṇo mārgaḥ pādapair iva dantinaḥ // Ragh_4.33

paurastyān evam ākrāmaṃs tāṃs tāñ janapadāñ jayī 
prāpa tālīvanśyāmam upakañṭhaṃ mahodadheḥ // Ragh_4.34

anamrāṇāṃ samuddhartus tasmāt sindhurayād iva 
ātmā saṃrakṣitaḥ suhmair vṛttim āśritya vaitasīm // Ragh_4.35

vaṅgān utkhāya tarasā netā nausādhanoddhatān 
nicakhāna jayastambhān gaṅgāsroto'ntareṣu saḥ // Ragh_4.36

āpādapadmapraṇatāḥ kalamā iva te raghum 
phalaiḥ saṃvardhayām āsur utkhātapratirpitāḥ // Ragh_4.37

sa tīrtvā kapiṣāṃ sainyair baddhadviradasetubhiḥ 
utkalādarśitapathaḥ kaliṅgābhimukho yayau // Ragh_4.38

sa pratāpaṃ mahendrasya mūrdhni tīkṣṇaṃ nyaveśayat 
aṅkuśaṃ dviradasyeva yantā gambhīravedinaḥ // Ragh_4.39

pratijagrāha kāliṅgas tam astrair gajasādhanaḥ 
pakṣacchedodyataṃ śakraṃ śilāvarṣīva parvataḥ // Ragh_4.40

dviṣāṃ viṣahya kākutsthas tatra nārācadurdinam 
sanmaṅgalasnāta iva pratipede jayaśriyam // Ragh_4.41

vāyavyāstravinirdhūtāt pakṣāviddhān mahodadheḥ 
gajānīkāt sa kāliṅgaṃ tārkṣyaḥ sarpam ivādade // Ragh_4.41*

tāmbūlīnāṃ dalais tatra racitāpānabhūmayaḥ 
nalikerāsavaṃ yodhāḥ śātravaṃ ca papur yaśaḥ // Ragh_4.42

gṛhītapratimuktasya sa dharmavijayī nṛpaḥ 
śriyaṃ mahendranāthasya jahāra na tu medinīm // Ragh_4.43

tato velātaṭenaiva phalavatpūgamālinā 
agastyācaritām āśām anāśāsyajayo yayau // Ragh_4.44

sa sainyaparibhogeṇa gajadānasugandhinā 
kāverīṃ saritāṃ patyuḥ śaṅkanīyām ivākarot // Ragh_4.45

balair adhuṣitās tasya vijigīṣor gatādhvanaḥ 
maricodbhrāntahārītā malayādrer upatyakāḥ // Ragh_4.46

sasañjur aśvakṣuṇṇānām elānām utpatiṣṇavaḥ 
tulyagandhiṣu mattebha-kaṭeṣu phalareṇavaḥ // Ragh_4.47

ājāneyakhurakṣuṇṇa-pakvailākṣetrasaṃbhavam 
vyānaśe sapadi vyoma tripadīchedinām api // Ragh_4.47*

bhogiveṣṭanamārgeṣu candanānāṃ samarpitam 
n'āsrasat kariṇāṃ graivaṃ tripadīchedinām api // Ragh_4.48

diśi mandāyate tejo dakṣiṇasyāṃ raver api 
tasyām eva raghoḥ pāṇḍyāḥ pratāpaṃ na viṣehire // Ragh_4.49

tāmraparṇīsametasya muktāsāraṃ mahodadheḥ 
te nipatya dadus tasmai yaśaḥ svam iva saṃcitam // Ragh_4.50

sa nirviśya yathākāmaṃ taṭeṣv ālīnacandanau 
stanāv iva diśas tasyāḥ śailau malayadardurau // Ragh_4.51

tasyānīkair visarpadbhir aparāntajayodyataiḥ 
rāmāstrotsārito 'py āsīt sahyalagna ivārṇavaḥ // Ragh_4.53

bhayotsṛṣṭavibhūṣāṇāṃ tena keralayoṣitām 
alakeṣu camūreṇuś cūrṇapratinidhīkṛtaḥ // Ragh_4.54

muralāmārutoddhūtam agamat kaitakaṃ rajaḥ 
tadyodhavārabāṇānām ayatnapaṭavāsatām // Ragh_4.55

abhyabhūyata vāhānāṃ caratāṃ gātraśiñjitaiḥ 
varmabhiḥ pavanoddhūta-rājatālīvanadvhvanaiḥ // Ragh_4.56

kharjūrīskandhanaddhānāṃ madodgārtasugandhiṣu 
kaṭeṣu kariṇāṃ petuḥ puṃnāgebhyaḥ śilīmukhāḥ // Ragh_4.57

avakāśaṃ kilodanvān rāmāyābhyarthito dadau 
aparāntamahīpāla-vyājena raghave karam // Ragh_4.58

mattebharadanotkīrṇa-vyaktavikramalakṣaṇam 
trikūṭam eva tatroccair jayastambhaṃ cakāra saḥ // Ragh_4.59

pārasīkāṃs tato jetuṃ pratasthe sthalavartmanā 
indriyākhyān iva ripūṃs tattvajñānena saṃyamī // Ragh_4.60

yavanīmukhapadmānāṃ sehe madhumadaṃ na saḥ 
bālātapam ivābjānām akālajaladodayaḥ // Ragh_4.61

saṃgrāmas tumulas tasya pāścātyair aśvasādhanaiḥ 
śārṅgakūjitavijñeya-pratiyodhe rajasy abhūt // Ragh_4.62

bhallāpavarjitais teṣāṃ śirobhiḥ śmaśrulair mahīm 
tastāra saraghāvyāptaiḥ sa kṣaudrapaṭalair iva // Ragh_4.63

apanītaśirastrāṇāḥ śeṣās taṃ śaraṇaṃ yayuḥ 
praṇipātapratīkāraḥ saṃrambho hi mahātmanām // Ragh_4.64

vinayante sma tadyodhā madhubhir vijayaśramam 
āstīrṇājinaratnāsu drākṣāvalayabhūmiṣu // Ragh_4.65

tataḥ pratasthe kauberīṃ bhāsvān iva raghur diśam 
śarair usrair ivodīcyān uddhariṣyam rasān iva // Ragh_4.66

jitān ajayyas tān eva kṛtvā rathapuraḥsarān 
mahārṇavam ivaurāgniḥ praviveśottarāpatham // Ragh_4.66*

vinītādhvaśramās tasya sindhutīraveceṣṭanaiḥ 
dudhuvur vājinaḥ skandhāṃl lagnakuṅkumakesarān // Ragh_4.67

tatra hūṇāvarodhānāṃ bhartṛśu vyaktavikramam 
kapolapāṭalādeśi babhūva raghuceṣṭitam // Ragh_4.68

kāmbojāḥ samare soḍhuṃ tasya vīryam anīśvarāḥ 
gajālānaparikliṣṭair akṣoṭaiḥ sārdham ānatāḥ // Ragh_4.69

teṣāṃ sadaśvabhūyiṣṭhās tuṅgā draviṇarāśayaḥ 
upadā viviśuḥ śaśvan notsekāḥ kosaleśvaram // Ragh_4.70

tato gaurīguruṃ śailam ārurohāśvasādhanaḥ 
vardhayann iva tatkūṭān uddhūtair dhātureṇubhiḥ // Ragh_4.71

śaśaṃsa tulyasattvānāṃ sainyaghoṣe 'py asaṃbhramam 
guhāśayānāṃ siṃhānāṃ parivṛtyāvalokitam // Ragh_4.72

bhūrjeṣu marmarībhūtāḥ kīcakadhvanihetavaḥ 
gaṅgāśīkariṇo mārge marutas taṃ siṣevire // Ragh_4.73

viśaśramur namerūṇāṃ chāyāsv adhyāsya sainikāḥ 
dṛṣado vāsitotsaṅgā niṣaṇṇamṛganābhibhiḥ // Ragh_4.74

saralāsaktamātaṅga-graiveyasphuritatviṣaḥ 
āsannoṣadhayo netur naktam asnehadīpikāḥ // Ragh_4.75

tasyotsṛṣṭanivāseṣu kaṇṭharajjukṣata tvacaḥ 
gajavarṣma kirātebhyaḥ śaśaṃsur devadāravaḥ // Ragh_4.76

tatra janyaṃ raghor ghoraṃ pārvatīyair gaṇair abhūt 
nārācakṣepaṇīyāśma-niṣpeṣotpatitānalam // Ragh_4.77

śarair utsavasaṃketān sa kṛtvā viratotsavān 
jayodāharaṇaṃ bāhvor gāpayām āsa kiṃnarān // Ragh_4.78

paraspareṇa vijñātas teṣūpāyanapāṇiṣu 
rājñā himavataḥ sāro rājñaḥ sāro himādriṇā // Ragh_4.79

tatrākṣobhyaṃ yaśorāśiṃ niveśyāvarurobha saḥ 
paulastyatulitasyādrer ādadhāna iva hriyam // Ragh_4.80

cakampe tīrṇalauhitye tasmin prāgjyotiṣeśvaraḥ 
tadgālānatāṃ prāptaiḥ saha kālāgurudruamaiḥ // Ragh_4.81

na prasehe sa ruddhārkam adhārāvarṣadurdinam 
rathavartma rajo 'py asya kuta eva patākinīm // Ragh_4.82

tam īśaḥ kāmarūpāṇām atyākhaṇḍalavikramam 
bheje bhinnakaṭair nāgair anyān uparurodha yaiḥ // Ragh_4.83

kāmarūpeśvaras tasya hemapīṭhādhidevatām 
ratnapuṣpopahāreṇa cchāyām ānarca pādayoḥ // Ragh_4.84

iti jitvā diṣo jiṣṇur nyavartata rathoddhatam 
rajo viśrāmayan rājñāṃ chattraśūnyeṣu mauliṣu // Ragh_4.85

sa viśvajitam ājahre yajñaṃ sarvasvadakṣiṇam 
ādānaṃ hi visargāya sataṃ vārimucām iva // Ragh_4.86

sattrānte sacivasakhaḥ puraskriyābhir gurvībhiḥ śamitaparājayavyalīkān 
kākutsthaś ciravirahotsukāvarodhān rājanyān svapuranivṛttaye 'numene // Ragh_4.87

yajñānte tam avabhṛthābiṣekapūtaṃ satkāraiḥ śamitaparājayavyalīkān 
āmantryotsukavanitātpatadvisṛṣṭāḥ svāni svāny avanibhujaḥ purāṇi jagmuḥ // Ragh_4.87*

te rekādhvajakuliśātapatraicihnaṃ samrājaś caraṇayugaṃ prasādalabhyam 
prasthānapraṇatibhir aṅgulīṣu cakrur maulisrakcyutamakarandareṇugauram // Ragh_4.88

tam adhvare viśvajiti kṣitīśaṃ niḥśeṣaviśrāṇitakośajātam 
upāttavidyo gurudakṣinārthī kautsaḥ prapede varatantuśiṣyaḥ // Ragh_5.1

sa mṛnmaye vītahiraṇmayatvāt pātre nidhāyārgahyam anarghyaśīlaḥ 
śrutaprakāśaṃ yaśasā prakāśaḥ pratyujjagāmātithim ātitheyaḥ // Ragh_5.2

tam arcayitvā vidhivad vidhijñas tapodhanaṃ mānadhanāgrayāyī 
viśāṃpatir viṣṭarabhājam ārāt kṛtāñjaliḥ kṛtyavid ita uvāca // Ragh_5.3

apy agraṇīr mantrakṛtām ṛṣīṇāṃ kuśāgrabuddhe kuśalī gurus te 
yatas tvayā jñānam aśeṣam āptam lokena caitanyam ivoṣṇaraśmeḥ // Ragh_5.4

kāyena vācā manasāpi śaśvad yat saṃbhṛtaṃ vāsavadhairyalopi 
āpādyate na vyayam antarāyaiḥ kaccin maharṣes trividhaṃ tapas tat // Ragh_5.5

ādhārabandhapramukhaiḥ prayatnaiḥ saṃvardhitānāṃ sutanirviśeṣam 
kaccin na vāyvādir upaplavo vaḥ śramacchidaṃ āśramapādapānām // Ragh_5.6

kriyānimitteṣv api vatsalatvād abhagnakāmā munibhiḥ kuśeṣu 
tadaṅkaśayyācyutanābhinālā kaccin mṛgīṇām anaghā prasūtiḥ // Ragh_5.7

nirvartyate yair niyamābhiṣeko yebhyo nivāpāñjalayaḥ pitḥṇām 
tāny uñchaṣaṣṭhāṅkitasaikatāni śivāni vas tīrthajalāni kaccit // Ragh_5.8

nīvārapākādi kaḍamgarīyair āmṛśyate jānapadair na kaccit 
kālopapannātithikalpabhāgaṃ vanyaṃ śarīrasthitisādhanaṃ vaḥ // Ragh_5.9

api prasannena maharṣiṇā tvaṃ samyag vinīyānumato gṛhāya 
kālo hy ayaṃ saṃkramituṃ dvitīyaṃ sarvopakārakṣamam āśramaṃ te // Ragh_5.10

tavārhato nābhigamena tṛptaṃ mano niyogakriyayotsukaṃ me 
apy ājñayā śāsitur ātmanā vā prāpto 'si saṃbhāvayituṃ vanān mām // Ragh_5.11

ity arghyapātrānumitavyayasya raghor udārām api gāṃ niśamya 
svārthopapattiṃ prati durbalāśas tam ity avocad varatantuśiṣyaḥ // Ragh_5.12

sarvatra no vārttam avehi rājan nāthe kutas tvavy aśubhaṃ prajānām 
sūrye tapaty āvaraṇāya dṛṣṭeḥ kalpeta lokasya kathaṃ tamisrā // Ragh_5.13

bhaktiḥ pratīkṣyeṣu kulocitā te pūrvān mahābhāga tayā 'tiśeṣe 
vyatītakālas tv aham abhyupetas tvām arthibhāvād iti me viṣādaḥ // Ragh_5.14

śarīramātreṇa narendra tiṣṭhann ābhāsi tīrthapratipāditarddhiḥ 
āraṇyakopāttaphalaprasūtiḥ stambena nīvāra ivāvaśiṣṭaḥ // Ragh_5.15

sthāne bhavān ekanarādhipaḥ sann akiṃcanatvaṃ makhajaṃ vyanakti 
paryāyapītasya surair himāṃśoḥ kalākṣayaḥ ślāghyataro hi vṛddheḥ // Ragh_5.16

tadanyatas tāvad ananyakāryo gurvartham āhartum ahaṃ yatiṣye 
svasty astu te nirgalitāmbugarbhaṃ śaradghanaṃ nārdati cātako 'pi // Ragh_5.17

etāvad uktvā pratiyātukāmaṃ śiṣyaṃ maharṣer nṛpatir niṣidhya 
kiṃ vastu vidvan gurave pradeyaṃ tvayā kiyad veti tam anvayuṅkta // Ragh_5.18

tato yathāvadvihitādhvarāya tasmai smayāveśavivarjitāya 
varṇāśramāṇāṃ gurave sa varṇī vicakṣaṇaḥ prastutam ācacakṣe // Ragh_5.19

samāptavidyena mayā maharṣir vijñāpito 'bhūd gurudakṣiṇāyai 
sa me cirāyāskhalitopacārāṃ tāṃ bhaktim evāgaṇayat purastāt // Ragh_5.20

nirbandhasaṃjātaruṣārthakārśyam acintayitvā guruṇāham uktaḥ 
vittasya vidyāparisaṃkhyayā me koṭīṣ catasro daśa cāhareti // Ragh_5.21

so 'haṃ saparyāvidhibhājanena matvā bahvantaṃ prabhuśabdaśeṣam 
abhyutsahe saṃprati noparoddhum alpetaratvāc chrutaniṣkrayasya // Ragh_5.22

itthaṃ dvijena dvijarākāntir āvedito vedavidāṃ vareṇa 
enonivṛttendriyavṛttir enaṃ jagāda bhūyo jagadekanāthaḥ // Ragh_5.23

gurvartham arthī śrutapāradṛśvā raghoḥ sakāśād anavāpya kāmam 
gato vadāyāntaram ity ayaṃ me mā bhūt parīvādanavāvatāraḥ // Ragh_5.24

sa tvaṃ praśaste mahite madīye vasaṃś caturtho 'gnir ivāgnyagāre 
dvitrāṇy ahāny arhasi soḍhum arhan yāvad yate sādhayituṃ tvadartham // Ragh_5.25

tatheti tasy'; āvitathaṃ pratītaḥ pratyagrahīt saṃgaram agrajanmā 
gām āttasārāṃ raghur apy avekṣya niṣkaṣṭum arthaṃ cakame kuberāt // Ragh_5.26

vasiṣṭhamantrokṣaṇajāt prabhāvād udanvadākāśamahīdhareṣu 
marutsakhasyeva balāhakasya gatir vijaghne na hi tadrathasya // Ragh_5.27

athādhiśiśye prayathaḥ pradoṣe rathaṃ raghuḥ kalpitaśastragarbham 
sāmantasaṃbhāvanayaiva dhīraḥ kailāsanāthaṃ tarasā jigīṣuḥ // Ragh_5.28

prātaḥ prayāṇābhimukhāya tasmai savismayāḥ kośagṛhe niyuktāḥ 
hiraṇmayīṃ kośagṛhasya madhye vṛṣṭiṃ śaśaṃsuḥ patitāṃ nabhastaḥ // Ragh_5.29

taṃ bhūpatir bhāsurahemarāśiṃ labdhaṃ kuberād abhiyāsyamānāt 
dideśa kautasya samastam eva pādaṃ sumeror iva vajrabhinnam // Ragh_5.30

janasya sāketanivāsinas tau dvāv apy abhūtām abhinandyasattvau 
gurupradeyādhikanīḥspṛho 'rthī nṛpo 'rthikāmād adhikapradaś ca // Ragh_5.31

athoṣṭravāmīśatavāhitārthaṃ prajeṣvaraṃ prītamanā maharṣiḥ 
spṛṣan kareṇānatapūrvakāyaṃ saṃprasthito vācam uvāca kautsaḥ // Ragh_5.32

kim atra citraṃ yadi kāmasūr bhūr vṛtte sthitasyādhipateḥ prajānām 
acintanīyas tu tava prabhāvo manīṣitaṃ dyaur api yena dugdhā // Ragh_5.33

āśāsyam anyat punaruktabhūtaṃ śreyāṃsi sarvāṇy adhijagmuṣas te 
putraṃ labhasvātmaguṇānurūpaṃ bhavantam īḍaṃ bhavataḥ piteva // Ragh_5.34

itthaṃ prayujyāśiṣam agrajanmā rājñe pratīyāya guroḥ sakāśam 
rājāpi lebhe sutam āśu tasmād ālokam arkād iva jīvalokaḥ // Ragh_5.35

brāhme muhūrte kila tasya devī kumārakalpaṃ suṣuve kumāram 
ataḥ pitā brahmaṇa eva nāmnā tam ātmajanmānam ajaṃ cakāra // Ragh_5.36

rūpaṃ tad ojasvi tad eva vīryaṃ tadaiva naisargikam unnatatvam 
na kāraṇāt svād bibhide kumāraḥ pravartito dīpa iva pradīpāt // Ragh_5.37

upāttavidyaṃ vidhivad gurubhyas taṃ yauvanodbhedaviśeṣakāntam 
śrīr gantukāmāpi guror anujñāṃ dhīreva kanyā pitur ācakāṅkṣa // Ragh_5.38

atheśvareṇa krathakaiśikānāṃ svayaṃvarārthaṃ svasur indumatyāḥ 
āptaḥ kumārānayanotsukena bhojena dūto raghave visṛṣṭaḥ // Ragh_5.39

taṃ ślāghyasaṃbandham asau vicintya dārakriyāyogyadaśaṃ ca putram 
prasthāpayām āsa sasainyam enam ṛddhāṃ vidarbhādhiparājadhānīm // Ragh_5.40

tasyopakāryāracitopakārā vanyetarā jānapadopadābhiḥ 
mārge nivāsā manujendrasūnor babhūvur udyānavihārakalpāḥ // Ragh_5.41

sa narmadārodhasi śīkarārdrair marudbhir ānartitanaktamāle 
niveśayām āsa vilaṅghitādhvā klāntaṃ rajodhūsaraketu sainyam // Ragh_5.42

athopariṣṭād bhramarair bhramadbhiḥ prāk sūcitāntaḥsalilapraveśaḥ 
nirdhauta dānāmalagaṇḍabhittir yanyaḥ saritto gaja unmamajja // Ragh_5.43

niḥśeṣavikṣālitadhātunāpi vaprakriyām ṛkṣavatas taṭeṣu 
nīlordhvarekhāśabalena śaṃsan dantadvayenāśmavikuṇṭhitena // Ragh_5.44

saṃhāravikṣepalaghukriyeṇa hastena tīrābhimukhaḥ saśabdam 
babhau sa bhindan bṛhatas taraṅgān vāryargalābhaṅga iva pravṛttaḥ // Ragh_5.45

sa bhogibhogādhikapīvareṇa hastena tīrābhimukhaḥ saśabdam 
saṃvardhitārtdhaprahitena dīrghān cikṣepa vārīparighān ivormīn // Ragh_5.45*

śailopamaḥ śaivalamañjarīṇāṃ jālāni karṣann urasā sa paścāt 
pūrvaṃ tadutpīḍitavārirāśiḥ saritpravāhas taṭam utsasarpa // Ragh_5.46

kāraṇḍavotsṛṣṭamṛdupratnānāḥ pulindayoṣāmbuvihārakāñcīḥ 
karṣan sa śaivālalatā nadīṣaḥ skandhāvalagnās taṭam utsasarpa // Ragh_5.46*

tasyaikanāgasya kapolabhittyor jalāvagāhakṣaṇamātraśāntā 
vanyetarānekapadarśanena punar didīpe madadurdinaśrīḥ // Ragh_5.47

saptacchadakṣīrakaṭupravāham asahyam āghrāya madaṃ tadīyam 
vilaṅghitādhoraṇatīvrayatnāḥ senāgajendrā vimukhā babhūvuḥ // Ragh_5.48

sa cchinnabandhadrutayugyaśūnyaṃ bhagnākṣaparyastarathaṃ kṣaṇena 
rāmāparitāṇavihastayodhaṃ senāniveśaṃ tumulaṃ cakāra // Ragh_5.49

tam āpatantaṃ nṛpater avadhyo vanyaḥ karīti śrutavān kumāraḥ 
nivartayiṣyan viśikhena kumbhe jaghāna nātyāyatakṛṣṭaśārṅgaḥ // Ragh_5.50

sa viddhamātraḥ kila nāgarūpam utsṛjya tadvismitasainyadṛṣṭaḥ 
sphuratprabhāmaṇḍalamadhyavarti kāntaṃ vapur vyomacaraṃ prapede // Ragh_5.51

atha prabhāvopanataiḥ kumāraṃ kalpadrumotthair avakīrya puṣpaiḥ 
uvāca vāgmī daśanaprabhābhiḥ saṃvardhitoraḥsthalatārahāraḥ // Ragh_5.52

mataṅgaśāpād avalepamūlād avāptavān asmi mataṅgajatvam 
avehi gandharvapates tanūjaṃ priyaṃvadaṃ māṃ priyadarśanasya // Ragh_5.53

sa cānunītaḥ praṇatena paścān mayā maharṣir mṛdutām agacchat 
uṣṇatvam agnyātapasaṃprayogāc chaityaṃ hi yat sā prakṛtir jalasya // Ragh_5.54

ikṣvākuvaṃśaprabhavo yadā te bhetsyaty ajaḥ kumbham ayomukhena 
saṃyokṣyase svena vapurmahimnā tadety avocat sa taponidhir mām // Ragh_5.55

saṃmocitaḥ sattvavatā tvayāhaṃ śāpāc ciraprārthitadarśanena 
pratipriyaṃ ced bhavato na kuryāṃ vṛthā hi me syāt svapadopalabdhiḥ // Ragh_5.56

saṃmohanaṃ nāma sakhe mamāstraṃ prayogasaṃhāravibhaktamantram 
gāndharvam ādhatsva yataḥ prayoktur na cārihiṃsā vijayaś ca haste // Ragh_5.57

alaṃ hriyā māṃ prati yan muhūrtaṃ dayāparo 'bhuḥ praharann api tvam 
tasmād upacchandayati prayojaṃ mayi tvayā na pratiśedharaukṣyam // Ragh_5.58

tathety upaspṛśya payaḥ pavitraṃ somodhbavāyāḥ sarito nṛsomaḥ 
udaṅmukhaḥ so 'stravid astramantraṃ jagrāha tasmān nigṛhītaśāpāt // Ragh_5.59

evaṃ tayor adhvani daivayogād āseduṣoḥ sakhyam acintyahetu 
eko yayau caitrarathapadeśān saurājyaramyān aparo vidarbhān // Ragh_5.60

taṃ tasthivāṃsaṃ nagaropakaṇṭhe tadāgamārūḍhagurupraharṣaḥ 
pratyujjagāma krathakaiśikendraś candraṃ pravṛddhormir ivormimālī // Ragh_5.61

praveśya cainaṃ puram agrayāyī nīcais tathopācarad arpitaśrīḥ 
mene yathā tatra janaḥ sameto vaidarbham āgantum ajaṃ gṛheśam // Ragh_5.62

tasy'; ādhikārapuruṣaiḥ praṇataiḥ pradiṣṭāṃ prāgdvāravediviniveśitapūrṇa kumbhām 
mene yathā tatra janaḥ sameto bālyāt parām iva daśāṃ madano 'dhyuvāsa // Ragh_5.63

tatra svayaṃvarasamāhṛtarājalokaṃ kanyālalāma kamanīyam ajasya lipsoḥ 
bhāvāvabodhakaluṣā dayiteva rātrau nidrā cireṇa nayanābhimukhī babhūva // Ragh_5.64

taṃ karṇabhūṣaṇanipīḍitapīvarāṃsaṃ śayyottaracchadavimardakṛśāṅgarāgam 
sūtātmajāḥ savayasaḥ prathitaprabodhaṃ) prābodhayann uṣasi vāgbhir udāravācaḥ // Ragh_5.65

rātrir gatā matimatāṃ vara muñca śayyāṃ dhātrā dvidhaiva nanu dhūr jagato vibhaktā 
tām ekatas tava bibharti gurur vinidras tasyā bhavān aparadhuryapadāvalambī // Ragh_5.66

nidrāvaśena bhavatāpy anapekṣamāṇā paryutsukatvam abalā niśi khaṇḍiteva 
lakṣmīr vinodayati yena digantalambī so 'pi tvadānanaruciṃ vijahāti candraḥ // Ragh_5.67

tad valgunā yugapadunmiṣitena tāvat sadyaḥ paraparatulām adhirohatāṃ dve 
praspandamānaparuṣetaratāram antaś cakṣus tava pracalitabhramaraṃ ca padmam // Ragh_5.68

vṛntāc chlathaṃ harati puṣpam anokahānāṃ saṃsṛjyate sarasijair aruṇāmśubhinnaiḥ 
svābhāvikaṃ paraguṇena vibhātavāyuḥ saurabhyam īpsur iva te mukhamārutasya // Ragh_5.69

tāmrodareṣu paitaṃ tarupallaveṣu nirdhauta hāragulikāviśadaṃ himāmbhaḥ 
ābhāti labdhaparabhāgatayādharoṣṭhe līlāsmitaṃ sadaśanārcir iva tvadīyam // Ragh_5.70

yāvat pratāpanidhir ākramate na bhānur ahnāya tāvad aruṇena tamo nirastam 
āyodhanāgrasaratāṃ tvayi vīra yāte kiṃ vā ripūṃs tava guruḥ svayam ucchinatti // Ragh_5.71

śayyāṃ jahaty ubhayapakṣavinītanidrāḥ stamberamā mukharaśṛṅkhalakarṣiṇas te 
yeṣāṃ vibhānti taruṇāruṇarāgayogād bhinnādrigairikataṭā iva dantakoṣāḥ // Ragh_5.72

dīrgheṣv amī niyamitāḥ paṭamaṇḍapeṣu nidrāṃ vihāya vanajākṣa vanāyudeśyāḥ 
vaktroṣmaṇā malinayanti purogatāni lehyāni saindhavaśilāśakalāni vāhāḥ // Ragh_5.73

bhavati viralabhaktir mlānapuṣpopahāraḥ svakiraṇpariveṣodhbedaśūnyāḥ pradīpāḥ 
ayam api ca giraṃ nas tvatprabodhaprayuktām anuvadati śukas te mañjuvāk pañjarasthaḥ // Ragh_5.74

iti viracitavāgbhir bandiputraiḥ kumāraḥ sapadi vigatanidras talpam ujjhāṃ cakāra 
madapaṭu ninadadbhir bodhito rājahaṃsaiḥ suragaja iva gāṅgaṃ saikataṃ supratīkaḥ // Ragh_5.75

atha vidhim avasāyya śāstradṛṣṭaṃ divasamukhocitam añcitākṣipakṣmā 
kuśalaviracitānukūlaveṣaḥ kṣitipasamājam agāt svayaṃvarastham // Ragh_5.76

sa tatra mañceṣu manojñaveṣān siṃhāsanasthān upacāravastu 
vaimānikānāṃ marutām apaśyad ākṛṣṭalīlān naralokapālān // Ragh_6.1

rater gṛhītānunayena kāmaṃ pratyarpitasvāṅgam iveśvareṇa 
kākutstham ālokayatāṃ nṛpāṇāṃ mano babhūvendumatīnirāśam // Ragh_6.2

vaidarbhanirdiṣṭam asau kumāraḥ kḷptena sopānapathena mañcam 
śilāvibhaṅgair mṛgarājaśāvas tuṅgaṃ nagotsaṅgam ivāruroha // Ragh_6.3

parārdhyavarṇāstaraṇopapannam āsedivān ratnavad (?) āsanaṃ saḥ 
bhūyiṣṭham āsīd upameyakāntir mayūrapṛṣṭhāśrayiṇā guhena // Ragh_6.4

tāsu śriyā rājaparaṃparāsu prabhāviśeṣodayadurnirīkṣyaḥ 
sahasradhātmā vyarucad vibhaktaḥ payomucāṃ paṅktiṣu vidyuteva // Ragh_6.5

teṣāṃ mahārhāsanasaṃsthitānām udāranepathyabhṛtāṃ sa madhye 
rarāja dhāmnā raghusūnur eva kalpadrumāṇām iva pārijātaḥ // Ragh_6.6

netravrajāḥ paurajanasya tasmin vihāya sarvān nṛpatīn nipetuḥ 
madotkaṭe recitapuṣpavṛkṣā gandhadvipe vanya iva dvirephāḥ // Ragh_6.7

atha stute bandibhir anvayajñaiḥ somārkavaṃśye naradevaloke 
saṃcārite c'; āgārusārayonau dhūpe samutsarpati vaijayantīḥ // Ragh_6.8

puropakaṇṭhopavanāśrayāṇāṃ kalāpinām uddhatanṛtyahetau 
pradhmātaśaṅkhe parito digantāṃs tūryasvane mūrchati maṅgalārthe // Ragh_6.9

manuṣyavāhyaṃ caturaśrayānam adhyāsya kanyā parivāraśobhi 
viveśa mañcāntararājamārgaṃ patiṃvarā kḷptavivāhaveṣā // Ragh_6.10

tasmin vidhānātiśaye vidhātuḥ kanyāmaye netraśataikalakṣye 
nipetur antaḥkaraṇair narendrā dehaiḥ sthitāḥ kevalam āsaneṣu // Ragh_6.11

tāṃ praty abhivyaktamanorathānāṃ mahīpatīnāṃ praṇayāgradūtyaḥ 
pravālośobhā iva pādapānāṃ śṛṅgāraceṣṭa vividhā babhūvuḥ // Ragh_6.12

kaścit karābhyām upagūḍhanālam ālolapattrābhihatadvirepham 
rajobhir antaḥ pariveṣabandhi līlāravindaṃ bhramayāṃ cakāra // Ragh_6.13

visrastam aṃsād aparo vilāsī ratnānuviddhāṅgadakoṭilagnam 
prālambam utkṛṣya yathāvakaśaṃ nināya sācīkṛtacāruvaktraḥ // Ragh_6.14

ākuñcitāgrāṅgulinā tato 'nyaḥ kiṃcitsamāvarjitanetraśobhaḥ 
tiryagvisaṃsarpinakhaprabheṇa pādena haimaṃ vililekha pīṭham // Ragh_6.15

niveśya vāmaṃ bhujam āsanārdhe tatasaṃniveśād adhikonnatāṃsaḥ 
kaścid vivṛttatrikabhinnahāraḥ suhṛtsamābhāṣaṇatatparo 'bhūt // Ragh_6.16

vilāsinīvibhramadantapattram āpāṇḍu raṃ ketakabarham anyaḥ 
priyāitambocitasaṃniveśair vipāṭayām āsa yuvā nakhāgraiḥ // Ragh_6.17

kuśeśayātāmratalena kaścit kareṇa rekhādhvajalāñchanena 
ratnāṅgulīyaprabhayānuviddhān udīrayām āsa salīlam akṣān // Ragh_6.18

kaścid yathābhāgam avasthite 'pi svasaṃniveśād vyatilaṅghinīva 
vajrāṃśugarbhāṅgulirandhram ekaṃ vyāpārayām āsa karaṃ kirīṭe // Ragh_6.19

tato nṛpāṇāṃ śrutavṛttavaṃśā puṃvat pragalbhā pratihārarakṣī 
prāk saṃnikarṣaṃ magadheśvarasya nītvā kumārīm avadat sunandā // Ragh_6.20

asau śaraṇyaḥ śaraṇonmukhānām agādhasattvo magadhapratiṣṭhaḥ 
rājā prajārañjanalabdhavarṇaḥ paraṃtapo nāma yathārthanāmā // Ragh_6.21

kāmaṃ ṇrpāḥ santu saharaśo 'nye rājanvatīm āhur anena bhūmim 
nakṣatratārāgrahasaṃkulāpi jyotiṣmatī candramasaiva rātriḥ // Ragh_6.22

kriyāprabandhād ayam adhvarāṇām ajasram āhūtasahasranetraḥ 
śacyāś ciraṃ pāṇdukapolalambān mandāraśūnyān alakāṃś cakāra // Ragh_6.23

anena ced icchasi gṛhyamāṇaṃ pāṇiṃ vareṇyena kuru praveśe 
prāsādavātāyanasaṃśritānāṃ netrotsatvaṃ puṣpapurāṅganānām // Ragh_6.24

evaṃ tayokte tam avekṣya kiṃcid (?) visraṃsidūrvāṅkamadhūkamālā 
ṛjupraṇāmakriyayaiva tanvī pratyādideśainam abhāṣamāṇā // Ragh_6.25

tāṃ saiva vetragrahaṇe niyuktā rājāntaraṃ rājasutāṃ nināya 
samīraṇottheva taraṅgalekhā padmāntaraṃ mānasarājahaṃsīm // Ragh_6.26

jagāda cainām ayam aṅganāthaḥ surāṅganāprārthitayauvanaśrīḥ 
vinītanāgaḥ kila sūtrakārair aindraṃ padaṃ bhūmigato 'pi bhuṅkte // Ragh_6.27

anena paryāsayatāsrabindūn muktāphalsthūlatamān staneṣu 
pratyarpitāḥ śatruvilāsinīnām unmucya sūtreṇa vinaiva hārāḥ // Ragh_6.28

nisargabhinnāspadam ekasaṃstham asmin dvayaṃ śrīś ca sarasvatī ca 
kāntyā girā sūnṛtayā ca yogyā tvam eva kalyāṇi tayos tṛtīyā // Ragh_6.29

athāṅgarājād avatārya cakṣur yāh janyām avadat kumārī 
nāsau na kāmyo na ca veda samyag draṣṭuṃ na sā bhinnarucir hi lokaḥ // Ragh_6.30

tataḥ paraṃ duṣprasahaṃ dviṣadbhir nṛpaṃ niyuktā pratihārabhūmau 
nidarśayām āsa viśeṣadṛśyam induṃ navotthānam ivendumatyai // Ragh_6.31

avantinātho 'yam udagrabāhur viśālavakṣās tanuvṛttamadhyaḥ 
āropya cakrabhrahmam uṣṇatejās tvaṣṭreva yatnollikhito vibhāti // Ragh_6.32

asya prayāṇeṣu samagraśakter agresarair vājibhir utthitāni 
kurvanti sāmantaśikhāmaṇīnāṃ prabhāprarohāstamayaṃ rajāṃsi // Ragh_6.33

asau mahākālaniketanasya vasann adūre kila candramauleḥ 
tamisrapakṣe 'pi saha priyābhir jyotsnāvato nirviśati pradoṣān // Ragh_6.34

anena yūnā saha pārthivena rambhoru kaccin manaso rucis te 
siprātaraṅgānilakampitāsu vihartum udyānaparaṃparāsu // Ragh_6.35

tasminn abhidyotitabandhupadme pratāpasaṃśoṣitaśatrupaṅke 
babandha sā nottamasaukumāryā kumudvatī bhānumatīva bhāvam // Ragh_6.36

tām agratas tāmarasāntarābhām anūparājasya guṇair anūnām 
vidhāya sṛṣṭiṃ lalitām vidhātur jagāda bhūyaḥ sudatīṃ sunandā // Ragh_6.37

saṃgrāmanirviṣṭasahasrabāhur aṣṭadāsadvīpanikhātayūpaḥ 
ananyasādhāraṇarājaśabdo babhūva yogī kila kārtavīryaḥ // Ragh_6.38

akāryacintāsamakālam eva prādurbhavaṃś cāpadharaḥ purastāt 
antaḥśarīreṣv api yaḥ prajānāṃ pratyādideśāvinayaṃ vinetā // Ragh_6.39

jyābandhaniṣpandabhujena yasya viniśvasadvaktraparaṃpareṇa 
kārāgṛhe nirjitavāsavena laṅkeśvareṇoṣitam ā prasādāt // Ragh_6.40

tasyānvaye bhūpatir eṣa jātaḥ pratīpa ity āgamavṛddhasevī 
yena śriyaḥ saṃśrayadoṣarūḍhaṃ svabhāvalolety ayaśaḥ pramṛśṭam // Ragh_6.41

āyodhane kṛṣṇagatiṃ sahāyam avāpya yaḥ kṣatriyakālarātrim 
dhārāṃ śitāṃ rāmaparaśvadhasya saṃbhāvayaty utpalapattrasārām // Ragh_6.42

asyāṅkalakṣmīr bhava dīrghabāhor māhiṣmatīvapranitambakāñcīm 
prāsādajālair jalveṇiramyāṃ revāṃ yadi prekṣitum asti kāmaḥ // Ragh_6.43

tasyāḥ prakāmaṃ priyadarśano 'pi na sa kṣitīśo rucaye babhūva 
śaratpramṛṣṭāmbudharoparodhaḥ śaśīva paryāptakalo nalinyāḥ // Ragh_6.44

sā śūrasendādhipatiṃ suṣeṇam uddiśya lokāntaragītakīrtim 
ācāraśuddhobhayavaṃśadīpaṃ śuddhāntarakṣyā jagade kumārī // Ragh_6.45

nīpānvayaḥ pārthiva eṣa vajvā guṇair yam āśritya paraspareṇa 
siddhāśramaṃ śāntam ivaitya sattvair naisargiko 'py utsasṛje virodhaḥ // Ragh_6.46

yasy'; ātmagehe nayanābhirāmā kāntir himāṃśor iva saṃniviṣṭa 
harmyāgrasaṃrūḍhatṛṇāṅkureṣu tejo 'viśahyaṃ ripumandireṣu // Ragh_6.47

yasyāvarodhastanacandanānāṃ prakṣālanād vārivihārakāle 
kalindakanyā mathurāṃ gatā 'pi gaṅgormisaṃsakta jaleva bhāti // Ragh_6.48

trastena tākrṣyāt kila kāliyena maṇiṃ visṛṣṭaṃ yamunaukasā yaḥ 
vakṣaḥsthalavyāpirucaṃ dadhānaḥ sakaustubhaṃ hrepayatīva kṛṣnam // Ragh_6.49

saṃbhāvya bhartāram amuṃ yuvānaṃ mṛdupravālottarapuṣpaśayye 
vṛndāvane caitrarathād anūne nirviśyatāṃ sundari yuvanaśrīḥ // Ragh_6.50

adhyāsya cāmbhaḥpṛṣatokṣitāni śaileyagandhīni śilātalāni 
kalāpināṃ prāvṛṣi paśya nṛtyaṃ kāntāsu govardhanakandarāsu // Ragh_6.51

nṛpaṃ tam āvartamanojñanābhiḥ sā vyatyagād anyavadhūr bhavitrī 
mahīdharaṃ mārgavaśād upetaṃ srotovahā sāgaragāminīva // Ragh_6.52

athāṅgadāśliṣṭabhujaṃ bhujiṣyā hemāṅgadaṃ nāma kaliṅganātham 
āseduṣīṃ sāditaśatrupakṣaṃ bālām abālendumukhīṃ babhāṣe // Ragh_6.53

asau mahendrādrisamānasāraḥ patir mahendrasya mahodadheś ca 
yasya kṣaratsainyagajacchalena yātrāsu yātīva puro mahendraḥ // Ragh_6.54

jyāghātarekhe subhujo bhujābhyāṃ bibharti yaś cāpabhṛtāṃ purogaḥ 
ripuśriyāṃ sāñjanabhāṣpaseke bandīkṛṭānām iva paddhatī dve // Ragh_6.55

raṇe 'mitatrīṇatayā prakāśaḥ śarāsanajyānikaṣau bhujābhyām 
viśiṣṭarekhau ripuvikramāgner nirvāṇamārgāv iva yo bibharti // Ragh_6.55*

yam ātmanaḥ sadmani saṃnikṛṣṭo mandradhvanityājitayāmatūryaḥ 
prāsādavātāyanadṛṣyavīciḥ prabodhayaty arṇava eva suptam // Ragh_6.56

anena sārdhaṃ viharāmburāśes tīreṣu tālīvanamarmareṣu 
dvīpānatarānītalavaṅgapuṣpair apākṛtasvedalavā marudbhiḥ // Ragh_6.57

pralobhitāpy ākṛtilobhanīyā patiṃ purasyorugapūrvanāmnaḥ 
tasmād apāvartata dūrakṛṣṭā nītyeva lakṣmīḥ pratikūladaivāt // Ragh_6.58

athādhigamyābhuvarājakalpaṃ patiṃ purasyorugapūrvanāmnaḥ 
ācārapūtobhayavaṃśadīpaṃ śuddhāntarakṣyā jagade kumārī // Ragh_6.58*

athorākhyasya purasya nāthaṃ dauvārikī devasarūpam 
itaś cakorākṣi vilokayeti pūrvānuśiṣṭāṃ nijagāda bhojyām // Ragh_6.59

pāṇḍyo 'yam aṃsārpitalambahāraḥ kḷptāṅgarāgo haricandanena 
ābhāti bālātaparaktasānuḥ sanirjharodgāra ivādrirājaḥ // Ragh_6.60

vindhyasya saṃstambhayitā mahādrer niḥśeṣapītojjhitasindhurājaḥ 
prītyāśvamedhāvabhṛthārdramūrteḥ sausnātiko yasya bhavaty agastyaḥ // Ragh_6.61

astraṃ harād āptavatā durāpaṃ yenendralokāva jayāya dṛptaḥ 
purā janasthānavimardaśaṅkī saṃdhāya laḥkādhipatiḥ pratasthe // Ragh_6.62

anena pāṇau vidhivad (?) gṛhīte mahākulīnena mahīva gurvī 
ratnānuviddhārṇavamekhalāyā diśaḥ sapatnī bhava dakṣiṇasyāḥ // Ragh_6.63

tāmbūlavallīpariṇaddhapūgāsv elālatāliṅgitacandanāsu 
tamālapattrāstaraṇāsu rantuṃ prasīda śaśvan malayasthalīṣu // Ragh_6.64

indīvaraśyāmatanaur nṛpo 'sau tvaṃ rocanāgauraśarīrayaṣṭiḥ 
anyonyaśobhāparivṛddhaye vāṃ yogas taḍittoyadayor ivāstu // Ragh_6.65

svasur vidarbhādhipates tadīyo lebhe 'ntaraṃ cetasi nopadeśaḥ 
divākarādarśanabaddhakośe nakśatranāthāṃśur ivāravinde // Ragh_6.66

saṃcāriṇī dīpaśikheva rātrau yaṃ yaṃ vyatīyāya patiṃvarā sā 
narendramārgāṭṭa iva prapede vivarṇabhāvaṃ sa sa bhūmipālaḥ // Ragh_6.67

tasyāṃ raghoḥ sūnur upasthitāyāṃ vṛṇīta māṃ neti samākulo 'bhūt 
vāmetaraḥ saṃśayam asya bāhuḥ keyūrabandhocchavasitair nunoda // Ragh_6.68

taṃ prāpya sarvāvayavānavadyaṃ vyāvartatānyopagamāt kumārī 
na hi praphullaṃ sahakāram etya vṛksāntaraṃ kāṅkṣati ṣaṭpadālī // Ragh_6.69

tasmin samāveśitacittavṛttim induprabhām indumatīm avekṣya 
pracakrame vaktum anukramajñā savistaraṃ vākyam idaṃ sunandā // Ragh_6.70

ikṣvākuvaṃśyaḥ kakudaṃ nṛpāṇāṃ kakutstha ity āhitalakṣaṇo 'bhūt 
kākutsthaśabdaṃ yata unnatecchāḥ ślāghyaṃ dadhaty uttarakosalendrāḥ // Ragh_6.71

mahendram āsthāya mahokṣarūpaṃ yaḥ saṃyati prāptapināki līlaḥ 
cakāra bāṇair asurāṅganānāṃ gaṇḍasthalīḥ proṣitapattralekhāḥ // Ragh_6.72

airāvatāsphālanaviślathaṃ yaḥ saṃghaṭṭayann aṅgadam aṅgadena 
upeyuśaḥ svām api mūrtim agryām ardhāsanaṃ gotrabhido 'dhitaṣṭhau // Ragh_6.73

jātaḥ kule tasya kilorukīrtiḥ kulapradīpo nṛpatir dilīpaḥ 
atiṣṭhad ekonaśatakratutve śakrābhyasūyāvinivṛttaye yaḥ // Ragh_6.74

yasmin mahīṃ śāsati vāṇinīnāṃ nidrāṃ vihārārdhapathe gatānām 
vāto 'pi nāsaraṃsayad aṃśukāni ko lambayed āharaṇāya hastam // Ragh_6.75

putro raghus tasya padaṃ praśāsti mahākrator viśvajitaḥ prayoktā 
caturdigāvarjitasaṃbhṛtāṃ yo mṛtpātraśeṣām akarod vibhūtim // Ragh_6.76

ārūḍham adrīn udadhīn vitīrṇaṃ bhujaṃgamānāṃ vasatiṃ praviṣṭam 
ūrdhvaṃ gataṃ yasya na cānubandhi yaśaḥ paricchettum iyattayālam // Ragh_6.77

asau kumāras tam ajo 'nujātas triviṣṭapasyeva patiṃ jayantaḥ 
gurvīṃ dhuraṃ yo bhuvanasya pitrā dhuryeṇa damyaḥ sadṛśaṃ bibharti // Ragh_6.78

kulena kāntyā vayasā navena guṇaiś ca tais tair vinayapradhānaiḥ 
tvam ātmanas tulyam amuṃ vṛṇīṣva ratnaṃ samāgacchatu kāñcanena // Ragh_6.79

tataḥ sunandāvacanāvasāne lajjāṃ tanū kṛtya narendrakanyā 
dṛṣṭyā prasādāmalayā kumāraṃ pratyagrahīt saṃvaraṇasrajeva // Ragh_6.80

sā yūni tasminn abhilāṣabandhaṃ śaśāka śālīnatayā na vaktum 
romāñcalakṣyeṇa sa gātrayaṣṭiṃ bhittvā nirākrāmad arālakeśyāḥ // Ragh_6.81

tathāgatāyāṃ parihāsapūrvaṃ sakhyāṃ sakhī vetradharā babhāṣe 
ārye vrajāmo 'nyata ity athaināṃ vadhūr asūyākuṭilaṃ dadarśa // Ragh_6.82

sā cūrṇagauraṃ raghunandanasya dhātrīkarābhyāṃ karabhopamorūḥ 
āsañjayām āsa yathāpradeśaṃ kaṇṭhe guṇaṃ mūrtam ivānurāgam // Ragh_6.83

tayā srajā maṅgalapuṣpamayyā viśālavakṣaḥsthalalambayā saḥ 
amaṃsta kaṇṭhārpitabāhupāśāṃ vidarbharājāvarajāṃ vareṇyaḥ // Ragh_6.84

śaśinam upagateyaṃ kaumudī meghamuktaṃ jalanidhim anurūpaṃ 
iti samaguṇayogaprītayas tatra paurāḥ śravaṇakaṭu nṛpāṇām ekavākyaṃ vivavruḥ // Ragh_6.85

pramuditavarapakṣam ekatas tat (?) kṣitipatimaṇḍalam anyato vitānam 
uṣasi sara iva praphullapadmaṃ kumudavanapratipannanidram āsīt // Ragh_6.86

athopayantrā sadṛśena yuktāṃ skandena sākṣād iva devasenām 
svasāram ādāya vidarbhanāthaḥ purapraveśābhimukho babhūva // Ragh_7.1

senāniveśān pṛthivīkṣito 'pi jagmur vibhātagrahamandabhāsaḥ 
bhojyāṃ prati vyarthamanorathatvād rūpeṣu veṣeṣu ca sābhyasūyāḥ // Ragh_7.2

sāṃnidhyayogāt kila tatra śacyāḥ svayaṃvarakṣobhakṛtām abhāvaḥ 
kākutstham uddiśya samatsaro 'pi śaśāma tena kṣitipālalokaḥ // Ragh_7.3

tāvat prakīrṇābhinavopacāram indrāyudhadyotitatoraṇāṅkam 
varaḥ sa vadhvā saha rājamārgaṃ prāpa dhvajacchāyanivāritoṣṇam // Ragh_7.4

tatas tadālokanatatparāṇāṃ saudheṣu cāmīkarajālavatsu 
babhūvur itthaṃ purasundarīṇāṃ tyaktānyakāryāṇi viceṣṭitāni // Ragh_7.5

ālokamārgaṃ sahasā vrajantyā kayācid udveṣṭanavāntamālyaḥ 
baddhuṃ na saṃbhāvita eva tāvat kareṇa ruddho 'pi hi keśapāśaḥ // Ragh_7.6

prasādhikālambitam agrapādam ākṣipya kācid dravarāgam eva 
utṣṛṣṛalīlāgatir ā gavākṣād yayau śalākām aparā vahantī // Ragh_7.7

vilocanaṃ dakṣiṇam añjanena saṃbhāvya tadvañcitavāmanetrā 
tathaiva vātāyanasaṃnikarṣaṃ yayau śalākām aparā vahantī // Ragh_7.8

jālāntarapreṣitadṛṣṭir anyā prasthānabhinnāṃ na babandha nīvīm 
nābhipraviṣṭābharaṇaprabheṇa hastena tasthāv avalambya vāsaḥ // Ragh_7.9

ardhācitā satvaram utthitāyāḥ pade pade durnimite galantī 
kasyāścid āsīd raśanā tadānīm aṅguṣṭhamāulārpitasūtraśeṣā // Ragh_7.10

stanaṃdhayantaṃ tanayaṃ vihāya vilokanāya tvarayā vrajantī 
saṃprasnutābhyāṃ padavīṃ stanābhyāṃ siṣeca kācit payas''; ā gavākṣāt // Ragh_7.10*

tāsāṃ mukhair āsavagandhagarbhair vyāptāntarāḥ sāndrakutūhalānām 
vilolanetrabhramarair gavākṣāḥ sahasrapattrābharaṇā ivāsan // Ragh_7.11

tā rāghavaṃ dṛṣṭibhir āpibantyo nāryo na jagmur viṣayāntarāṇi 
tathā hi śeṣendriyavṛttir āsāṃ sarvātmanā cakṣur iva praviṣṭā // Ragh_7.12

sthāne vṛtā bhūpatibhiḥ parokṣaiḥ svayaṃvaraṃ sādhum amaṃsta bhojyā 
padmeva nārāyaṇam anyathāsau labheta kāntaṃ katham ātmatulyam // Ragh_7.13

paraspareṇa spṛhaṇīyaśobhaṃ na ced idaṃ dvandvam ayojayiṣyat 
asmin dvaye rūpavidhānayatnaḥ patyuḥ prajānāṃ vitatho 'bhaviṣyat // Ragh_7.14

ratismarau nūnam imāv abhūtāṃ rājñāṃ sahareṣu tathā hi bālā 
gateyam ātmapratirūpam eva mano hi janmāntarasaṃgatijñam // Ragh_7.15

ity udgatāḥ pauravadhūmukhebhyaḥ śṛṇvan kathāḥ śrotasukhāḥ kumāraḥ 
udbhāsitaṃ maṅgalasaṃvidhābhiḥ saṃbandhinaḥ sadma samāsasāda // Ragh_7.16

tato 'vatīryāśu kareṇukāyāḥ sa kāmarūpeśvaradattahastaḥ 
vaidarbhanirdiṣṭam atho viveśa nārīmanāṃsīva catuṣkam antaḥ // Ragh_7.17

mahārhasiṃhāsanasaṃsthito 'sau saratnam arghyaṃ madhuparkamiśram 
bhojopanītaṃ ca dukūlayugmaṃ jagrāha sārdhaṃ vanitākaṭākṣaiḥ // Ragh_7.18

dukūlavāsāḥ sa vadhūsamīpaṃ ninye vinītair avarodharakṣaiḥ 
velāsākśaṃ sphuṭapeharājir navair udanvān iva candrapādaiḥ // Ragh_7.19

tatrārcito bhojapateḥ purodhā hutvāgnim ājyādibhir agnikalpaḥ 
tam eva cādhāya vivāhasākṣye vadhūvarau saṃgamayāṃ cakāra // Ragh_7.20

hastena hastaṃ parigṛhya vadhvāḥ sa rājasūnuḥ sutarāṃ cakāśe 
anantarāśokalatāpravālaṃ prāpyeva cūtaḥ pratipallavena // Ragh_7.21

āsīd varaḥ kaṇṭakitaprakoṣṭaḥ svinnāṅguliḥ saṃvavṛte kumārī 
vṛttis tayoḥ pāṇisamāgamena samaṃ vibhakteva maobhavasya // Ragh_7.22

tayor apāṅga-pratisāritāni kriyāsamāpattivartitāni 
hrīyantraṇām ānaśire manojñām anyonyalolāni vilocanāni // Ragh_7.23

pradakṣiṇaprakramaṇāt kṛṣānor udarciṣas tan (?) mithunaṃ cakāśe 
meror upānteṣv iva vartamānam anyonyasaṃsaktam ahastriyāmam // Ragh_7.24

nitambagurvī guruṇā prayuktā vadhūr vidhātṛpratimena tena 
cakāra sā mattacakoranetrā lajjāvatī lājavisargam agnau // Ragh_7.25

haviḥśamīpallavalājagandhiḥ puṇyaḥ kṛśānor udiyāya dhūmaḥ 
kapolasaṃsarpiśikhaḥ sa tasyā muhūrtakarṇotpalatāṃ prapede // Ragh_7.26

tad añjanakledasamākulākṣaṃ pramlānabhījāṅkurakarṇapūram 
vadhūmukhaṃ pāṭalagaṇḍalekham ācāradhūmagrahaṇād babhūva // Ragh_7.27

tau snātakair bandhumatā ca rājñā puraṃdhribhiś ca kramaśaḥ prayuktam 
kanyākumārau kanakāsanasthāv ārdrākṣatāropaṇam anvabhūtām // Ragh_7.28

iti svasur bhojakulapradīpaḥ saṃpādya pāṇigrahaṇaṃ sa rājā 
mahīpatīnāṃ pṛthagarhaṇārthaṃ samādideśādhikṛtān adhiśrīḥ // Ragh_7.29

liṅgair mudaḥ saṃvṛtavikriyās te hradāḥ prasannā iva gūḍhanakrāḥ 
vaidarbham āmantrya yayus tadīyāṃ pratyarpya pūjām aupdāchalena // Ragh_7.30

sa rājalokaḥ kṛtapūrvasaṃvid ārambhasiddhau samayopalabhyam) 
ādāsyamānaḥ pramdāmiṣaṃ tad āvṛtya panthānam ajasya tasthau // Ragh_7.31

bhartāpi tāvat krathakaiṣikānām anuṣṭhitānantarajāvivāhaḥ 
sattvānurūpāharaṇī kṛtaśrīḥ prāsthāpayad rāghavam anvagāc ca // Ragh_7.32

tisras trilokī prathitena sārdham ajena mārge vasatīr uṣitvā 
tasmād apāvartata kuṇḍineśaḥ parvātyaye soma ivoṣṇaraśmeḥ // Ragh_7.33

pramanyavaḥ prāg api kosalendre pratyekam āttasvatayā babhūvuḥ 
ato nṛpāś cakṣamire sametāḥ strīratnalābhaṃ na tadātmajasya // Ragh_7.34

tam udvahantaṃ pathi bhojakanyāṃ rurodha rājanyagaṇaḥ sa dṛptaḥ 
balipradiṣṭaṃ śriyam ādadānaṃ traivikramaṃ pādam ivendraśatruḥ // Ragh_7.35

tasyaḥ sa rakṣārtham analpayodham ādiṣya pitryaṃ sacivaṃ kumāraḥ 
pratyagrahīt pārthivavāhinīṃ tāṃ jyotīrathāṃ śoṇa ivottaraṅgaḥ // Ragh_7.36

pattiḥ padātiṃ rathinaṃ ratheśas turaṃgasādī turagādhirūḍham 
yantā gajasyābhyapatad gajasthaṃ tulyapratidvandvi babhūva yuddham // Ragh_7.37

nadatsu tūryeṣv avibhāvyavāco nodīrayanti sma kulopadeśān 
bāṇākṣarair eva parasparasya nāmorjitaṃ cāpabhṛtaḥ śaśaṃsuḥ // Ragh_7.38

utthāpitaḥ saṃyati reṇur aśvaiḥ sāndrīkṛtaḥ syandanavaṃśacakraiḥ 
cistāritaḥ kuñjarakarṇatālair netrakrameṇoparurodha sūryam // Ragh_7.39

matsyadhvajā vāyuvaśād vidīrṇair mukhaiḥ pravṛddhadvajinīrajāṃsi 
babhuḥ pibantaḥ paramārthamatsyāḥ paryāvilānīva navodakāni // Ragh_7.40

ratho rathāṅgadhvaninā vijajñe vilolaghaṇṭākvaṇitena nāgaḥ 
svabhartṛnāmagrahaṇād babhūva sāndre rajasy ātmaparāvabodhaḥ // Ragh_7.41

āvṛṇvato locanamārgam ājau rajo'ndhakārasya vijṛmbhitasya 
śastrakṣatāśvadvipavīrajanmā bālāruṇo 'bhūd rudhirapravāhaḥ // Ragh_7.42

sa cchinnamūlaḥ kṣatajena reṇus tasyopariṣṭāt pavanāvadhūtaḥ 
aṅgāraśeṣasya hutāśanasya pūrvotthito dhūma ivābabhāse // Ragh_7.43

prahāramūrchāpagame rathasthān yantḥn upālabhya nivartitāśvāḥ 
yaiḥ sāditā lakṣitapūrvaketūṃs tān eva sāmarṣatayā nijaghnuḥ // Ragh_7.44

apy ardhamārge parabāṇalūnā dhanurbhṛtāṃ hastavatāṃ pṛṣatkāḥ 
saṃprāpur evātmajavānuvṛttyā pūrvārdhabhāgaiḥ phalibhiḥ śaravyam // Ragh_7.45

ādhoraṇānāṃ gajasaṃnipāte śirāṃsi cakrair niśitaiḥ kṣurāgraiḥ 
hatāny api āyenanakhāgrakoṭi-vyāsaktakeśāni cireṇa petuḥ // Ragh_7.46

pūrvaṃ prahartā na jaghāna bhūyaḥ pratiprahārākṣamam aśvasādī 
turaṃgamaskandhaniṣaṇṇadehaṃ pratyāśvasantaṃ ripum ācakāṅkṣa // Ragh_7.47

tanutyajāṃ varmabhṛtāṃ vikośair bṛhatsu danteṣv asibhiḥ patadbhiḥ 
raṇakṣitiḥ śoṇitamadyakulyā gajā vivignāḥ karaśīkareṇa // Ragh_7.48

śilīmukhotkṛttaśiraḥphalāḍhyā cyutaiḥ śiratraiś caṣakottareva 
raṇakṣitiḥ śoṇitamadyakulyā rarāja mṛtyor iva pānabhūmiḥ // Ragh_7.49

upāntayor niṣkuṣitaṃ vihaṃgair ākṣipya tebhyaḥ piśitapriyāpi 
keyūrakoṭikṣatatāludeśā śivā bhujacchedam apācakāra // Ragh_7.50

kaścid dviṣatkhaḍgahṛtottamāṅgaḥ sadyo vimānaprabhutām upetya 
vāmāṅgasaṃsaktasurāṅganaḥ svaṃ nṛtyat kabandhaṃ samare dadarśa // Ragh_7.51

anyonyasūtonmathanād abhūtāṃ tāv eva sūtau rathinau ca kaucit 
vyaśvau gadāvyāyatasaṃprahārau bagnāyudhau bāhuvimardaniṣṭhau // Ragh_7.52

paraspareṇa kṣatayoḥ prahartror utkrāntavāyvoḥ samakālam eva 
amartyabhāve 'pi kayościd āsīd ekāsaraḥprārthitayor vivādaḥ // Ragh_7.53

vyūhāv ubhau tāv itaretarasmād bhaṅgaṃ jayaṃ cāpatur avyavastham 
paścātpuromārutayoḥ pravṛddhau paryāyavṛttyeva mahārṇavormī // Ragh_7.54

pareṇa bhagne 'pi bale mahaujā yayāv ajaḥ praty arisainyam eva 
dhūmo nivarteta samīraṇena yato hi kakṣas tata eva vahniḥ // Ragh_7.55

rathī niṣaṅgī kavacī dhanuṣmān dṛptaḥ sa rājanyakam ekavīraḥ 
nivārayām āsa mahāvarāhaḥ kalpakṣayoddhūtam ivārṇavāmbhaḥ // Ragh_7.56

sa dakṣiṇaṃ tūṇa-mukhena vāmaṃ vyāpārayan hastam alakṣyatājau 
ākarṇakṛṣṭā sakṛd asya yoddhur maurvīva bāṇān suṣuve riguphnān // Ragh_7.57

sa roṣadaṣṭādhikalohitoṣṭhair vyaktordhvarekā bhṛkuṭīr vahadbhiḥ 
tastāra gāṃ bhallanikṛttakaṇṭhair huṃkāragarbhair dviṣatāṃ śirobhiḥ // Ragh_7.58

sarvair balāṅgair dviradapradhānaiḥ sarvāyudhaiḥ kaṅkaṭabhedibhiś ca 
sarvaprayatnene ca bhūmipālās tasmin prajahrur yudhi sarva eva // Ragh_7.59

so 'stravrajaiś channarathaḥ pareṣāṃ dhvajāgramātreṇa babhūva lakṣyaḥ 
nīhāramagno dinapūrvabhāgaḥ kiṃcitprakāśena vivasvateva // Ragh_7.60

priyaṃvadāt prāpam asau kumāraḥ prāyuṅkta rājasv adhirājasūnuḥ 
gāndharvam astraṃ kusumāstrakāntaḥ prasvāpanaṃ svapanivṛttalaulyaḥ // Ragh_7.61

tato dhanuṣkarṣaṇamūḍhahastam ekāṃsaparyastaśirastrajālam 
tasthau dhvajastambhaniṣaṇṇadehaṃ nidrāvidheyaṃ naradevasainyam // Ragh_7.62

tataḥ priyopāttarase 'dharoṣṭhe niveśya dadhmau jalaṃ kumāraḥ 
yena svahastārjitam ekavīraḥ piban yaśo mūrtam ivābhāse // Ragh_7.63

śaṅkhasvanābhijñatayā nivṛttās taṃ sannaśatruṃ dadṛśuḥ svayodhāḥ 
nimīlitānām iva paṅkajānāṃ madhye sphurantaṃ pratimāśaśāṅkam // Ragh_7.64

saśoṇitais tena śilīmukhāgrair nikṣepitāḥ ketuṣu pārthivānām 
yaśo hṛtam saṃprati rāghaveṇa na jīvitaṃ vaḥ kṛpayeti varṇāḥ // Ragh_7.65

sa cāpakoṭīnihitaikabāhuḥ śirastaniṣkarṣaṇabhinnamuliḥ 
lalāṭabaddhaśramavāribindur bhītāṃ priyām etya vaco babhāṣe // Ragh_7.66

itaḥ parān arbhakahāryaśastrān vaidarbhi paśyānumatā mayāsi 
evaṃvidhenāhavaceṣṭitena tvaṃ prārthyase hastagatā mamabhiḥ // Ragh_7.67

tasyāḥ pratidvandvibhavād viṣādāt sadyo vimuktaṃ mukham ābabhāse 
niśvāsabāṣpāpagamāt prapannaḥ prasādam ātmīyam ivātmadarṣāḥ // Ragh_7.68

hṛṣṭāpi sā hrīvijitā na sākṣād vāgbhiḥ sakhīnāṃ priyam abhyanandat 
sthalī navāmbhaḥpṛṣatābhivṛṣṭā mayūrakekābhir ivābhravṛndam // Ragh_7.69

iti śirasi sa vāmaṃ pādam ādhāya rājñām udavahad anavadyāṃ tām avadyād apetah 
rathaturagarajobhis tasya rūkṣālakāgrā samaravijayalaṣmīḥ saiva mūrtā babhūva // Ragh_7.70

prathamaparigatārthas taṃ raghuḥ saṃnivṛttaṃ vijayinam abhinandya ślāghyajāyāsametam 
tadupahitakuṭumbaḥ śāntimārgotusko 'bhūn na hi sati kuladhurye sūryavaṃśyā gṛhāya // Ragh_7.71

atha tasya vivāhakautukaṃ lalitaṃ bibhrata eva pārthivaḥ 
vasudhām api hastagāminīm akarod indumatīm ivāparām // Ragh_8.1

duritair api kartum ātmasāt prayatante nṛpasūnavo hi yat 
tad upasthitam agrahīd ajaḥ pitur ājñeti na bhogatṛṣṇayā // Ragh_8.2

anubhūya vasiṣṭhasaṃbhṛtaiḥ salilais tena sahābhiṣecanam 
viśadocchavasitena medinī kathayām āsa kṛtārthatām iva // Ragh_8.3

sa babhūva durāsadaḥ parair guruṇātharvavidā kṛtakriyaḥ 
pavanāgnisamāgamo hy ayaṃ sahitaṃ brahma yad astratejasā // Ragh_8.4

raghum eva nivṛttayauvanaṃ tam amanyanta naveśvaraṃ prajāḥ 
sa hi tasya na kevalāṃ śriyaṃ pratipede sakalān guṇān api // Ragh_8.5

adhikaṃ śuśubhe śubhaṃyunā dvitayena dvayam eva saṃgatam 
padam ṛddham ajena paitṛkaṃ vinayenāsya navaṃ ca yauvanam // Ragh_8.6

sadayaṃ bubhuje mahābhujaḥ sahasodvegam iyaṃ vrajed iti 
aciropanatāṃ sa medinīṃ navapāṇigrahaṇāṃ vadhūm iva // Ragh_8.7

aham eva mato mahīpater iti sarvaḥ prakṛtiṣv acintayat 
udadher iva nimagāśateṣv abhavan nāsya vimānanā kvacit // Ragh_8.8

na kharo na ca bhūyasā mṛduḥ pavamānaḥ pṛthivīruhān iva 
sa puraskṛtamadhyamakramo namayām āsa nṛpān anuddharan // Ragh_8.9

atha vīksya raghuḥ pratiṣṭhitaṃ prakṛtiṣv ātmajam ātmavat tayā 
viṣayeṣu vināśadharmasu tridivasteṣv api niḥspṛho 'bhavat // Ragh_8.10

guṇavatsutaropitaśriyaḥ pariṇāme hi dilīpavaṃśajāḥ 
padavīṃ taruvalkavāsasāṃ prayatāḥ saṃyamināṃ prapedire // Ragh_8.11

tam araṇyasamāśrayonmukhaṃ śirasā veṣṭanaśobhinā sutaḥ 
pitaraṃ praṇipatya pādayor aparityāgam ayācatātmanaḥ // Ragh_8.12

raghur aśrumukhasya tasya tat kṛtavān īpsitam ātmajapriyaḥ 
na tu sarpa iva tvacaṃ punaḥ pratipede vyapavarjitāṃ śriyam // Ragh_8.13

sa kīlaśramam antyam āśrito nivasann āvasathe purād bahiḥ 
samupāsyata putrabhogyayā snūṣayevāvikṛtendriyaḥ śriyā // Ragh_8.14

praśamasthitapūrvapārthivaṃ kulam abhyudyata nūtaneśvaram 
nabhasā nibhṛtendunā tulām uditārkeṇa samāruroha tat // Ragh_8.15

yatipārthivaliṅgadhāriṇau dadṛśate raghurāghavau janaiḥ 
apavargamahodayārthayor bhuvam aṃśāv iva dharmayor gatau // Ragh_8.16

ajitādhigamāya mantribhir yuyuje nītiviśaradair ajaḥ 
anapāyipadopalabdhaye raghur āptaiḥ samiyāya yogibhiḥ // Ragh_8.17

samayujayta bhūpatir yuvā sacivaiḥ pratyaham arthasiddhaye 
apunarjananopattaye prayayāḥ saṃyamibhir manīṣibhiḥ // Ragh_8.17*

nṛpatiḥ prakṛtīr avekṣitum vyavahārāsanam ādade yuvā 
paricetum upāṃśu dhāraṇāṃ kuśapūtaṃ pravayās tu viṣṭaram // Ragh_8.18

anuraṇjayituṃ prajāḥ prabhur vyahārāsanam ādade navaḥ 
aparaḥ śuciviṣṭarasthitaḥ paricetuṃ yatate sma dhāraṇāḥ // Ragh_8.18*

anayat prabhuśaktisaṃpadā vaśam eko nṛpatīn anantarān 
aparaḥ praṇidhānayogyayā marutaḥ pañca śarīragocarān // Ragh_8.19

nayacakṣur ajo didṛkṣayā pararandhrasya tatāna maṇḍale 
hṛdaye samaropayan manaḥ paramaṃ jyotir avekṣituṃ raghuḥ // Ragh_8.19*

akarod acireśvaraḥ kṣitau dviṣadārambhaphalāni bhasmasāt 
aparo dahane svakarmaṇāṃ vavṛte jñānamayena vahninā // Ragh_8.20

paṇabandhamukhān guṇān ajaḥ ṣaḍ upāyuṅkta samīkṣya tatphalam 
raghur apy ajayad guṇatrayaṃ prakṛtisthaṃ samaloṣṭakāñcanaḥ // Ragh_8.21

na navaḥ prabhur ā phalodayāt sthirakarmā virarāma karmaṇaḥ 
na ca yogavidher navetaraḥ sthiradhīr ā paramātmadarśanāt // Ragh_8.22

iti śatruṣu cendriyeṣu ca pratiṣiddhaprasareṣu jāgratau 
prasitāv udayāpavargayor ubhayīṃ siddhim ubhāv avāpatuḥ // Ragh_8.23

atha kāścid ajavyapekṣayā gamayitvā samdarśanaḥ samāḥ 
tamasaḥ param āpad avyayaṃ puruṣaṃ yogasamādhinā raghuḥ // Ragh_8.24

śutadehavisarjanaḥ pituś ciram aśrūṇi vimucya rāghavaḥ 
vidadhe vidhim asya naiṣṭhikaṃ yatibhiḥ sārdham anagnim agnicit // Ragh_8.25

akarot sa tadaurdhvadaihikaṃ pitṛbhaktyā pitṛkāryakalpavit 
na hi tena pathā tanutyajas tanayāvarjitapiṇḍakāṅkṣiṇaḥ // Ragh_8.26

sa parārdhyagater aśocyatāṃ pitur uddiśya sadarthavedibhiḥ 
śamitādhir adhijyakārmukaḥ kṛtavān apratiśāsanaṃ jagat // Ragh_8.27

kṣitir indumatī ca bhāminī patim āsādya tam agryapauruṣam 
prathamā bahuratnasūr abhūd aparā vīram ajījanat sutam // Ragh_8.28

daśarāsmiśatopamadyutiṃ yaśasā dikṣu daśav api śrutam 
daśapūrvarathaṃ yam ākhyayā daśakaṇṭhāriguruṃ vidur budhāḥ // Ragh_8.29

ṛṣidevagaṇasvadhābhujāṃ śrutayāgaprasvaiḥ sa pārthivaḥ 
anṛṇatvam upeyivān babhau paridher mukta ivoṣṇadīdhitiḥ // Ragh_8.30

balam ārtabhayopaśāntaye viduṣāṃ saṃnataye bahu śrutam 
vasu tasya na kevalaṃ guṇavattāpi paraprayojanā // Ragh_8.31

sa kadācid aveṣitaprajaḥ saha devyā vijahāra suprajāḥ 
nagaropavane śacīsakho marutāṃ pālayiteva nandane // Ragh_8.32

atha rodhasi dakṣiṇodadheḥ śrita gokarṇaniketam īśvaram 
upavīṇayituṃ yayau raver udagāvṛttipathena nāradaḥ // Ragh_8.33

kusumair grathitām apārthivaiḥ srajam ātodyaśironiveśitām 
aharat kila tasya vegavān adhivāsaspṛhayeva mārutaḥ // Ragh_8.34

bhramaraiḥ kusumānusāribhiḥ parikīrṇā parivādinī muneḥ 
dadṛśe pavanāvalepajaṃ sṛjatī bāṣpam ivāñjanāvilam // Ragh_8.35

abhibhūya vibhūtim ārtavīṃ madhugandhātiśayena vīrudhām 
nṛpater amarasrag āpa sā dayitorustanakoṭisusthitim // Ragh_8.36

kṣaṇamātrasakhīṃ sujātayoḥ stanayos tām avalokya vihalā 
nimimīla narottamapriyā hṛtacandrā tamaseva kaumudī // Ragh_8.37

vapuṣā karaṇojjhitena sā nipatantī patim apy apātayat 
nanu tailaniṣekabindunā saha dīpārcir upaiti medinīm // Ragh_8.38

samam eva narādhipena sā gurusaṃmohaviluptacetanā 
gurusaṃmohaviluptacetanā navadīpārcir iva kṣites talam // Ragh_8.38*

ubhayor api pārśvavartināṃ tumu lenārtaraveṇa vejitāḥ 
vihagāḥ kamalākarālayāḥ samaduḥkhā iva tatra cukruśuḥ // Ragh_8.39

nṛpater vyajanādibhis tamo nunude sā tu tathaiva saṃsthitā 
pratikāravidhānam āyuṣaḥ sati śeṣe hi phalāya kalpate // Ragh_8.40

pratiyojayitavyavallakī-samavasthām atha sattvaviplavāt 
sa nināya nitāntavatsalaḥ parigṛhyocitam aṅkam aṅganām // Ragh_8.41

sa nināya nitāntavatsalaḥ parivṛttaprathamacchaviṃ kṣaṇāt 
saliloddhṛtapadminīnibhāṃ dayitām aṅkam udaśulocanaḥ // Ragh_8.41*

sa nināya nitāntavatsalaḥ karaṇāpāyavibhinnavarṇayā 
samalakṣyata bibhrad āvilāṃ mṛgalekhām uṣasīva candramāḥ // Ragh_8.42

vilalāpa sa bāṣpagadgadaṃ sahajām apy apahāya dhīratām 
abhitaptam ayo 'pi mārdavaṃ bhajate kaiva kathā śarīriṣu // Ragh_8.43

kusumāny api gātrasaṃgamāt prabhavanty āyur apohituṃ yadi 
na bhaviṣyati hanta sādhanaṃ kim ivānayat prahariṣyato vidheḥ // Ragh_8.44

atha vā mṛdu vastu hiṃsituṃ mṛdunaivārabhate prajāntakaḥ 
himasekavipattir atra me nalinī pūrvanidarśanaṃ matā // Ragh_8.45

srag iyaṃ yadi jīvitāpahā hṛdaye kiṃ nihitā na hanti mām 
viṣam apy amṛtaṃ kvacid bhaved amṛtaṃ vā viṣam īśvarecchayā // Ragh_8.46

atha vā mama bhāgyaviplavād aśaniḥ kalpita eṣa vedhasā 
yad anena tarur na pātitas kṣapitā tadviṭapāśritalatā // Ragh_8.47

kṛtavaty asi nāvadhīraṇām aparādhhe 'pi yadā ciraṃ mayi 
katham ekapade nirāgasaṃ janam ābhāṣyam imaṃ na manyase // Ragh_8.48

dhruvam asmi śaṭhaḥ śucismite vidhitaḥ kaitavavatsalas tava 
paralokam asaṃnivṛttaye yad anāpṛcchya gatāsi mām itaḥ // Ragh_8.49

dayitāṃ yadi tāvad anvagād vinivṛttaṃ kim idaṃ tayā vinā 
sahatāṃ hatajīvitaṃ mama prabalām ātmakṛtena vedanām // Ragh_8.50

surataśramasaṃbhṛto mukhe dhriyate svedalavodgamo 'pi te 
atha cāstamitā 'sy aho bata dhig imāṃ dehabhṛtām asāratām // Ragh_8.51

surataśramavāribindavo na hi tāvad viramanti te mukhe 
katham astamitā 'sy aho bata dhig imām dehavatām asāratām // Ragh_8.51*

manasāpi na vipriyaṃ mayā kṛtapūrvaṃ tava kiṃ jahāsi mām 
nanu śabdapatiḥ kṣiter ahaṃ tvayi me bhāvanibandhanā ratiḥ // Ragh_8.52

kusumotkacitān valīmataś calayan bhṛṅgarucas tavālakān 
karabhoru karoti mārutas tvadupāvartanśaṅki me manaḥ // Ragh_8.53

tad apohitum arhasi priye pratibodhena viṣādam āṣu me 
jvalitena guhāgataṃ tamas tuhinādrer iva natam oṣadhiḥ // Ragh_8.54

idam ucchvasitālakaṃ mukhaṃ viśrāntakathaṃ dunoti mām 
niśi suptam ivaikapaṅkajaṃ viratābhyantaraṣaṭpadasvanam // Ragh_8.55

śaśinaṃ punar eti śārvarī dayitā dvandvacaraṃ patatriṇam 
iti tau virhāntarakṣamau katham atyantagatā na māṃ daheḥ // Ragh_8.56

navapallavasaṃstare 'pi te mṛdu dūyeta yad aṅgam arpitam 
tad idaṃ viṣahiṣyate kathaṃ vada vāmoru citādhirohaṇam // Ragh_8.57

iyam apratibodhaśāyinīṃ raśanā tvāṃ prathamā rahaḥsakhī 
gativibhramasāda nīravā na śucā nānumṛteva lakṣyte // Ragh_8.58

kalam anyabhṛtāsu bhāṣitaṃ kalahaṃsīṣu gataṃ madālasaṃ 
pṛṭatīṣu vilolam īkṣitaṃ pavanādhūtalatāsu vibhramaḥ // Ragh_8.59

tridivotsukayāpy avekṣya māṃ nihitāḥ satyam amī guṇās tvayā 
virahe tava me guruvyathaṃ hṛdayaṃ na tv avalambituṃ kṣamāḥ // Ragh_8.60

mithunaṃ parikalpitaṃ tvayā sahakāraḥ phalinī ca nanv imau 
avidhāya vivāhasatkriyām anayor gamyata ivy asāṃpratam // Ragh_8.61

kusumaṃ kṛtadohadas tvayā yad aśoko 'yam udīrayiṣyati 
alakābharaṇaṃ kathaṃ nu tat tava neṣyāmi nivāpalālyatām // Ragh_8.62

smarateva saśabdanūpuraṃ caraṇānugraham anyadurlabham 
amunā kusumāśruvarṣiṇā tvam aśokena sugātri śocyase // Ragh_8.63

tava niḥśvasitānukāribhir bakulair ardhacitāṃ samaṃ mayā 
asamāpya vilāsamekhalāṃ kim idaṃ kiṃnarakaṇṭhi supyate // Ragh_8.64

samaduḥkhasukhaḥ sakhījanaḥ pratipaccandranibho 'yam ātmajaḥ 
aham ekarasas tathāpi te vyavasāyaḥ pratipattiniṣṭhuraḥ // Ragh_8.65

dhṛtir astamitā ratiś cyutā virataṃ geyam ṛtur nirutsavaḥ 
gatam ābharaṇaprayojanaṃ pariśūnyaṃ śayanīyam adya me // Ragh_8.66

gṛhiṇī sacivaḥ sakhī mithaḥ priyaśiṣyā lalite kalāvidhau 
karuṇāvimukhena mṛtyunā haratā tvāṃ vada kiṃ na me hṛtam // Ragh_8.67

madirākṣi madānanārpitaṃ madhu pītvā rasavat kathaṃ nu me 
anupāsyasi bāṣpadūṣitaṃ paralokopanataṃ jalāñjalim // Ragh_8.68

vibhave 'pi sati tvayā vinā sukham etāvad ajasya gaṇyatām 
ahṛtasya vilobhanāntarair mama sarve viṣayās tadāśrayāḥ // Ragh_8.69

vilapann iti kosalādhipaḥ karuṇārthagrathitaṃ priyāṃ prati 
akarot pṛthivīruhān api srutaśākhārasabhāṣpadurdinān // Ragh_8.70

atha tasya kathaṃcid aṅkataḥ svajanas tām apanīya sundarīṃ 
visasarja kṛtāntyamaṇḍanām analāy'; āgurucandanadihase // Ragh_8.71

pramadām anu saṃsthitaḥ śucā nṛpatiḥ sann iti vācyadarśanāt 
na cakāra śarīram agnisāt saha devyā na tu jīvitāśayā // Ragh_8.72

atha tena daśāhataḥ pare guṇaśeṣāṃ upadiṣya gehinīm 
viduṣā vidhayo maharddhayaḥ pura evopavane samāpitāḥ // Ragh_8.73

sa viveśa purīṃ tayā vinā kṣaṇadāpāyaśaśāṅkadarśanaḥ 
parivāham ivāvalokayan svaśucaḥ pauravadhūmukhāśruṣu // Ragh_8.74

atha taṃ savanāya diṣitaḥ praṇidhānād gurur āśramasthitaḥ 
abhiṣaṅgajaḍaṃ vijajñivān iti śiṣyeṇa kilānvabodhayat // Ragh_8.75

asamāptavidhir yato munis tava vidvān api tāpakāraṇam 
na bhavantam upasthitaḥ svayaṃ prakṛtau sthāpayituṃ kṛtasthitiḥ // Ragh_8.76

mayi tasya suvṛtta vartate laghusaṃdeśapadā sarasvatī 
śṛṇu viśrutasattvasāra tāṃ hṛdi cainām upadhātum arhasi // Ragh_8.77

puruṣasya padeṣv ajanmanaḥ samatītaṃ ca bhavac ca bhāvi ca 
sa hi niṣpratighena cakṣuṣā tritayaṃ jñānamayena paśyati // Ragh_8.78

carataḥ kila duścaraṃ tapas tṛṇabindoḥ pariśaṅkitaḥ purā 
prajighāya samādhibedinīṃ harir asmai hariṇīṃ surāṅganām // Ragh_8.79

sa tapaḥpratibandhamanyunā pramukhāviṣkṛtacāruvibhramām 
aśapad bhava mānuṣīti tāṃ śamavelāpralayormiṇā muniḥ // Ragh_8.80

bhagavan paravān ayaṃ janaḥ pratikūlācaritaṃ kṣamasva me 
iti copanatāṃ kṣitipṛśaṃ vivaśā śāpanivṛttikāraṇam // Ragh_8.81

krathakaiśikavaṃśasaṃbhavā tava bhūtvā mahiṣī cirāya sā 
upalabdhavatī divaś cyutaṃ vivaśā śāpanivṛttikāraṇam // Ragh_8.82

tad alaṃ tadapāyacintayā vipad utpattimatām upasthitā 
vasudheyam avekṣyatāṃ tvayā vasumatyā hi nṛpāḥ kalatriṇaḥ // Ragh_8.83

udaye madavācyam ujjhatā śrutam āviṣkṛtam ātmavattayā 
manasas tad upasthite jvare punar aklībatayā prakāśyatāṃ // Ragh_8.84

rudatā kuta eva sā punar bhavatā nānumṛtāpi labhyate 
paralokajuṣāṃ svakarmabhir gatayo bhinnapathā hi dehinām // Ragh_8.85

ruditena na sā nivartate nṛpa tat tāvad anrthakaṃ tava 
na bhavān anusaṃsthito 'pi tāṃ labhate karmavaśā hi dehinaḥ // Ragh_8.85*

apaśokamanāḥ kuṭumbinīm anugṛhṇīṣva nivāpadattibhiḥ 
svajanāśru kilātrisaṃtataṃ dahati pretam iti pracakṣate // Ragh_8.86

maraṇaṃ prakṛtiḥ śarīriṇāṃ vikṛtir jīvitam ucyate budhaiḥ 
kṣaṇam apy avatiṣṭhate śvasan yadi jantur nanu lābhavān asau // Ragh_8.87

avagacchati mūḍhacetanaḥ priyanāśaṃ hṛdi śalyam arpitam 
sthiradhīs tu tad eva manyate kuśaladvāratayā samuddhṛtam // Ragh_8.88

avagacchati mūḍhacetanaḥ śruta dhṛtasaṃyogaviparyayau yadā 
virahaḥ kim ivānutāpayed vada bāhyair viṣayair vipaścitam // Ragh_8.89

na pṛthagjanavac chuco vaśaṃ vaśinām uttama gantum arhasi 
drumasānumatāṃ kim antaraṃ yadi vāyau dvitaye 'pi te calāḥ // Ragh_8.90

sa tatheti vinetur udāramateḥ pratigṛhya vaco visasarja munim 
tad alabdhapadaṃ hṛdi śokaghane pratiyātam ivāntikam asya guroḥ // Ragh_8.91

tenāṣṭau parigamitāḥ samāḥ kathaṃcid bālatvād avitathasūnṛtena sūnoḥ 
sādṛśyapratikṛtidarśanaiḥ priyāyāḥ svapneṣu kṣaṇikasamāgamtosavaiś ca // Ragh_8.92

tasya prasahya hṛdayaṃ kila śokaśaṅkuḥ plakṣapraroha iva saudhatalaṃ bibheda 
prāṇāntahetum api taṃ bhiṣajām asādhyaṃ lābhaṃ priyānugamane tvarayā sa mene // Ragh_8.93

samyagvinītam atha varmaharaṃ kumāram ādiśya rakṣaṇavidhau vidhivat prajānām 
rogopasṛṣṭatanudurvasatiṃ mumukṣuḥ prāyopaveśanamatir nṛpatir babhūva // Ragh_8.94

tīrthe toyavyatikarabhave jahnukanyāsaryvor dehatyāgād amaragaṇanālekhyam āsādya sadyaḥ 
pūrvākārādhikatararucā saṃgataḥ kāntayāsau līlāgāreṣv aramata punar nandanābhyantareṣu // Ragh_8.95

pitur anantaram uttarkosalān samadhigamya samādhijitendriyaḥ 
daśarathaḥ praśaśāsa mahāratho yamavatām avatāṃ ca dhuri sthitaḥ // Ragh_9.1

adhigataṃ vidhivad yad apālayat prakṛtimaṇḍalam ātmakulocitam 
abhavad asya tato guṇavattaraṃ sanagaraṃ nagarandhrakaraujasaḥ // Ragh_9.2

ubhayam eva vadanti manīṣiṇaḥ samayavarṣitayā kṛtakarmaṇām 
valaniṣūdanam arthpatiṃ ca taṃ śramanudaṃ manudaṇḍaharānvayam // Ragh_9.3

janapade na gadaḥ padam ādadhāv abhibhavaḥ kuta eva sapatnajaḥ 
kṣitir abhūt phalavaty ajanandane śamarate 'maratejasi pārthive // Ragh_9.4

daśadigantajitā raghuṇā yathā śriyam apuṣyad ajena tataḥ param 
tam adhigamya tathaiva punar babhau na na mahī 'nam ahīnaparākramam // Ragh_9.5

samatayā vasuvṛṭivisarjanair niyamanād asatāṃ ca narādhipaḥ 
anuyayau yamapuṇyajaneśvarau savaruṇāv aruṇāgrasaraṃ rucā // Ragh_9.6

na mṛgayābhiratir na durodaraṃ na ca śaśipratimābharaṇaṃ madhu 
tam udayāya na vā navayauvanā priyatamā yatamānam apāharā // Ragh_9.7

na kṛpaṇā prabhavaty api vāsave na vitathā parihāsakathāsv api 
na ca sapatnajaneṣv api tena vāg aparuṣā paruṣākṣaram īritā // Ragh_9.8

udayam astamayaṃ ca raghūdvahād ubhayam ānaśire vasudhādhipāḥ 
sa hi nideśam alaṅghayatām abhūt suhṛd ayohṛdayaḥ pratigarjatām // Ragh_9.9

ajayad ekarathena sa medinīm udadhinemim adhijyaśarāsanaḥ 
jayam aghoṣayad asya tu kevalaṃ gajavatī javatīrahayā camūḥ // Ragh_9.10

jaghananirviṣayīkṛtamekhalān anucitāśruviluptaviśeṣakān 
sa ripudāragaṇān akarod balād analakān alakādhipavikramaḥ // Ragh_9.10*

avanim ekarathena varūthinā jitavataḥ kila tasya dhanurbhṛtaḥ 
vijayadundubhitāṃ yayur arṇavā ghanaravā naravāhanasaṃpadaḥ // Ragh_9.11

śamitapakṣabalaḥ śitakoṭinā śikhariṇāṃ kuliśena puraṃdaraḥ 
sa sāravṛṣṭimucā dhanuṣā dviṣāṃ svanavatā navatāmarasānanaḥ // Ragh_9.12

sphuritakoṭisahasramarīcinā samacinot kuliśena harir yaśaḥ 
sa dhanuṣā yudhi sāyakavarṣiṇā svanavatā navatāmarasānanaḥ // Ragh_9.12*

caraṇayor nakharāgasamṛddhibhir mukuṭaratnamarīcibhir aspṛśan 
sa dhanuṣā yudhi sāyakavarṣiṇā śatamakhaṃ tam akhaṇḍitapauruṣam // Ragh_9.13

nivavṛte sa mahārṇavarodhasaḥ sacivakāritabālasutāñjalīn 
samanukampya sapatnaparigrahān analakān alakānavamāṃ purīm // Ragh_9.14

upagato 'pi ca maṇḍalanābhitām anuditānyasitātapavāraṇaḥ 
ajitam asti nṛpāspadam ity abhūd analaso 'nalasomasamadyutiḥ // Ragh_9.15

kratuṣu tena visarjitamaulinā bhujasamāhṛtadigvasunā kṛtāḥ 
kanakayūpasamucchrayaśobhino vitamasā tamasārasyūtaṭāḥ // Ragh_9.16

ajinadaṇḍabhṛtaṃ kuśamekhalāṃ yatagiraṃ mṛgaśṛṅgaparigrahām 
adhivasaṃs tanum adhvaradīkṣitām asambhāsam abhāsayad īśvaraḥ // Ragh_9.17

avabhṛtaprayato niyatendriyaḥ surasamājasamākramaṇocitaḥ 
namayati sma sa kevalam unnataṃ vanamuce namucer araye śiraḥ // Ragh_9.18

tam apahāya kakutsthakulodbhavaṃ puruṣam ātmabhuvaṃ ca pativratā 
nṛpatim anyam asevata devatā sakamalā kam alāghavam arthiṣu // Ragh_9.19

sa kila saṃyugamūrdhni sahāyatāṃ maghavataḥ pratipadya mahārathaḥ 
svabhujavīryam agāpayad ucchritaṃ suravadhūr avadhūtabhayāḥ śaraiḥ // Ragh_9.20

asakṛd ekarathena tarasvinā harihayāgrasareṇa dhanurbhṛtā 
dinakarābhimukhā raṇareṇavo rurudhire rudhireṇa suradviṣām // Ragh_9.21

tam alabhanta patiṃ patidevatāḥ śikhariṇāṃ iva sāgaram āpagāḥ 
magadhakosalakekayaśasināṃ duhitaro 'hitaropitamārgaṇam // Ragh_9.22

priyatamābhir asau tiṛbhir babhau tisṛbhir eva bhuvaṃ saha śaktibhiḥ 
upagato vininīṣur iva prajā harihayo 'rihayogavicakṣaṇaḥ // Ragh_9.23

atha samāvavṛte kusumair navais tam iva sevitum ekanarādhipam 
yamakuberjaleśvaravajriṇāṃ samadhuraṃ madhur añcitavikramam // Ragh_9.24

jigamiṣur dhanadādhyuṣitāṃ diśaṃ rathayujā parivartitavāhanaḥ 
dinamukhāni ravir himanirgrahair vimalayan malayaṃ nagam atyajat // Ragh_9.25

himavivarṇitacandanapallavaṃ virahayan malayādrim udaṅmukhaḥ 
vihagayoḥ kṛpayeva śanair yayau ravir aharvirahadhruvabhedayoḥ // Ragh_9.25*

kusumajanma tato navapallavās tadanu ṣaṭpadakokilakūjitam 
iti yathākramam āvirabhūn madhur drumavatīm avatīrya vanasthalīm // Ragh_9.26

surabhisaṃgamajaṃ vanamālayā navapalāśam adhāryata bhaṅguram 
ramaṇadattam ivārdranakhakṣataṃ pramadayā madayāpitalajjayā // Ragh_9.26*

upahitaṃ śiśirāpagamaśriyā mukulajālam aśobhata kiṃśuke 
praṇayinīva nakhakṣatamaṇḍanaṃ pramadayā madayāpitalajjayā // Ragh_9.27

parabhṛtā madanakṣatacetasāṃ priyasakhī laghuvāg iva yoṣitām 
priyatamān akarot kalahāntare mṛduravā duravāpasamāgamān // Ragh_9.27*

vraṇagurupramadādharaduḥsahaṃ jaghananirviṣayīkṛtamekhalam 
na khalu tāvad aśeṣam apohituṃ ravir alaṃ viralaṃ kṛtavān himam // Ragh_9.28

viśadacandrakaraṃ sukhamārutaṃ kusumitadrumam unmadakokilam 
tad upabhogarasaṃ himavarṣiṇaḥ param ṛtor viralaṃ kṛtavān himam // Ragh_9.28*

abhinayān paricetum ivodyatā malayamārutakampitapallavā 
amadayat sahakāralatā manaḥ sakalikā kalikāmajitām api // Ragh_9.29

nayaguṇopacitām iva bhūpateḥ sadupakāraphalāṃ śriyam arthinaḥ 
abhiyayuḥ saraso madhusaṃbhṛtāṃ kamalinīm alinīrapatriṇaḥ // Ragh_9.30

daśanacandrikayā vyabhāsitaṃ hasitam āsavagandhi madhor iva 
bakulapuṣpam asevyata ṣaṭpadaiḥ śucirasaṃ cirasaṃcitam īpsubhiḥ // Ragh_9.30*

kusumam eva na kevalam ārtavaṃ navam aśokataroḥ smaradīpanam 
kisalayaprasavo 'pi vilāsināṃ madayitā dayitāśravaṇārpitaḥ // Ragh_9.31

viracitā madhunopavanśriyām abhinavā iva pattraviśeṣakāḥ 
madhulihāṃ madhudānaviśāradāḥ kurabakā ravakāraṇatāṃ yayuḥ // Ragh_9.32

suvadanāvadanāsavasaṃbhṛtas tadanuvādiguṇaḥ kusumodgamaḥ 
madhukarair akaron madhulolupair bakulam ākulam āyatapaṅktibhiḥ // Ragh_9.33

suvadanāvadanāsavasaṃbhṛtas tadanuvādiguṇaḥ kusumodgamaḥ 
iti dayāta ivābhavad āyatā na rajanī rajanīśavatī madhau // Ragh_9.33*

prathamam anyabhṛtābhir udīritāḥ praviralā iva mugdhavadhūkathāḥ 
surabhigandhiṣu śuśruvire giraḥ kusumitāsu mitā vanarājiṣu // Ragh_9.34

śrutisukhabhramarasvanagītayaḥ kusumakomaladantaruco babhuḥ 
upavanāntalatāḥ pavanāhataiḥ kisalayaiḥ salayair iva pāṇibhiḥ // Ragh_9.35

lalitavibhramabandhavicakṣaṇaṃ surabhigandhaparājitakesaram 
patiṣu nirviviśur madhum aṅganāḥ smarasakhaṃ rasakhaṇḍanavarjitam // Ragh_9.36

tilakamastakaharmyakṛtāspadaiḥ kusumamadhvanuṣaṅgasugandhibhiḥ 
kalam agīyata bhṛṅgavilāsināṃ smarayutair ayutair abalāsakhaiḥ // Ragh_9.36*

śuśubhire smitacārutarānanāḥ striya iva ślathaśiñjitamekhalāḥ 
vikacatāmarasā gṛhadīrghikā madakalodakalolavihaṃgamāḥ // Ragh_9.37

laghayati sma na patyaparādhajaṃ na sahakāratarus taruṇīdhṛtam 
kusumito namito 'libhir unmadaiḥ smarasamādhisamādhikaroṣitam // Ragh_9.37*

upayayau tanutāṃ madhukhaṇḍitā himakarodayapāṇḍumukhacchaviḥ 
sadṛśam iṣṭasamāgamanirvṛtiṃ vanitayā 'nitayā rajanīvadhūḥ // Ragh_9.38

apatuṣāratayā viśadaprabhaiḥ suratarāga pariśramanodibhiḥ 
kusumacāpam atejayad aṃśubhir himakaro makarojitaketanam // Ragh_9.39

hutahutāśanadīpti vanśriyaḥ pratinidhiḥ kanakābharaṇasya yat 
yuvatayaḥ kusumaṃ dadhur āhitaṃ tad (?) alake dalakesarapeśalam // Ragh_9.40

alibhir añjanabindumaoharaiḥ kusumapaṅktinipātibhir aṅkitaḥ 
na khalu śobahayit sma vanasthalīṃ na tilakas tilakaḥ pramadām iva // Ragh_9.41

amadayan madghugandhasanāthayā kisalayādharasaṃgatayā manaḥ 
kusumasaṃbhṭtayā navamallikā smitarucā tarucāruvilāsinī // Ragh_9.42

analasānyabhṛtā 'nalasān manaḥ kamaladhūlibhṛtā maruteritā 
kusumabhāranatādhvagayoṣitām asamaśokam aśokalatā 'karot // Ragh_9.42*

aruṇarāganiṣedhibhir aṃśukaiḥ śravaṇalabdhapadaiś ca yavāṅkuraiḥ 
parabhṛtāvirutaiś ca vilāsinaḥ smarabalair abalaikarasāḥ kṛtāḥ // Ragh_9.43

upacitāvayavā śucibhiḥ kaṇair alikadambakayogam upeyuṣī 
sadṛśakāntir alakṣyata mañjarī tilakajā 'lakajālakamauktikaiḥ // Ragh_9.44

dhvajapaṭaṃ madanasya dhanurbhṛtaś chavikaraṃ mukhacūrṇam ṛtuśriyaḥ 
kusumakesarareṇum alivrajāḥ sapavanopavanotthitam anvayuḥ // Ragh_9.45

anubhavan navadolam ṛtūtsavaṃ paṭur pai priyakaṇṭhajigṛkṣayā 
anayad āsanarajjuparigrahe bhujalatāṃ jaḍatām abalājanaḥ // Ragh_9.46

tyajata mānam alaṃ bata bigrahair na punar eti gataṃ caturaṃ vayaḥ 
parabhṛtābhir itīva nivedite smaramate ramate sma vadhūjanaḥ // Ragh_9.47

atha yathāsukham ārtavam utsavaṃ samanubhūya vilāsavatīsakhaḥ 
narapatiś cakame mṛgayāratiṃ sa madhumanmadhumanmathasaṃnibhaḥ // Ragh_9.48

paricayaṃ calakṣyanipātane bhayaruṣoś ca tadiṅgitabodhanam 
śramajayāt praguṇāṃ ca karoty asau tanum ato 'numataḥ sacivair yayau // Ragh_9.49

mṛgavanopagamakṣamaveṣabhṛd vipulakaṇṭhaniṣaktaśarāsanaḥ 
gaganam aśvakhuroddhuta reṇubhir nṛsavitā savitānam ivākarot // Ragh_9.50

grathitamaulir asau vanamālayā taru palāśasavarṇatanucchadaḥ 
turagavalganacaṇcalakuṇḍalo viruruce ruruceṣṭitabhūmiṣu // Ragh_9.51

tanulatāviniveśitavigrahā bhramarasaṃkramitekṣaṇavṛttayaḥ 
dadṛṣur adhvani taṃ vanadevatāḥ sunayanaṃ nayananditakosalam // Ragh_9.52

śvagaṇvāgurikaiḥ prathamāsthitaṃ vyapagatānaladasyu viveśa saḥ 
sthiraturaṃgamabhūmi nipānavan mṛgavayogavayopacitaṃ vanam // Ragh_9.53

atha nabhasya iva tridaśāyudhaṃ kanakapiṅgataḍidguṇasaṃyutam 
dhanur radhijyam anādhir upādade naravaro ravaroṣitakesarī // Ragh_9.54

tasya stanapraṇayibhir muhur eṇaśāvair vyāhanyamānahariṇīgamanaṃ purastāt 
āvirbabhūva kuśagarbhamukhaṃ mṛgāṇāṃ yūthaṃ tadagrasaragarvitakṛṣnasāram // Ragh_9.55

tat prārthitaṃ javanvājigatena rājñā tūṇīmukhoddhṛtaśareṇa viśīrṇapaṅkti 
śyāmīcakāra vanam ākuladṛśṭipātair vateritotpaladalaprakarair ivāmbhaḥ // Ragh_9.56

lakṣyīkṛtasya hariṇasya hariprabhāvaḥ prekṣya sthitāṃ sahacarīṃ vyavadhāya deham 
ākarṇakṛṣṭam api kāmitayā sa dhanvī bāṇaṃ kṛpāmṛdhumanāḥ pratisaṃjahāra // Ragh_9.57

tasyāpareṣv api mṛgeṣu śarān mumukṣoḥ karṇāntam etya bibhide nibiḍo 'pi muṣṭiḥ 
trāsātimātracaṭulaiḥ smarayatsu netraiḥ prauḍhapriyānayanavibhramaceṣṭitāni // Ragh_9.58

uttasthuṣaḥ śiśirapalvalapaṅkamadhyān mustāprarohakavalāvayavānukīrṇam 
jagrāha sa drutavarāhakulasya mārgaṃ suvyaktam ārdrapadapaṅktibhir āyatābhiḥ // Ragh_9.59

taṃ vāhanād avanatottarakāyam īṣad vidhyantam uddhatasaṭāḥ pratihantum īṣuḥ 
nātmānam asya vividuḥ sahasā varāhā vṛkeṣu viddham iṣubhir jaghanāśrayeṣu // Ragh_9.60

tenābhighātarabhasasya vikṛṣya pattrī vanyasya netravivare mahiṣasya muktaḥ 
nirbhidya vigraham aśoṇitaliptapuṅkhas taṃ pātayāṃ prathamam āsa papāta paścāt // Ragh_9.61

prāyo viṣāṇaparimoṣalaghūttamāṅgān khaḍgāṃś cakāra nṛpatir niśitaiḥ kṣurapraiḥ 
śṛṇgaṃ sa dṛptavinayādhikṛtaḥ pareṣām abhyucchritaṃ na mamṛṣe na tu dīrgham āyuḥ // Ragh_9.62

vyāghrān abhīr abhimukhopatitān guhābhyaḥ phullāsanāgraviṭapān iva vāyurugṇān 
śikṣāviśeṣalaghuhastatayā nimeṣāt tūṇīcakāra śarapūritavaktrarandhrān // Ragh_9.63

nirghātograiḥ kuñjalīnāñ jighāṃsur jyānirghoṣaiḥ kṣobhayām āsa siṃhān 
nūnaṃ teṣām abhyasūyāparo 'bhūd vīryodagre rājaśabde mṛgeṣu // Ragh_9.64

tān hatvā gajakulabaddhatīvravairān kākutsthaḥ kuṭilanakhāgralagnamuktān 
ātmānaṃ raṇakṛtakarmaṇāṃ gajānām ānṛṇyaṃ gatam iva mārgaṇair amaṃsta // Ragh_9.65

tān hatvā gajakulabaddhatīvravairān kākutsthaḥ kuṭilanakhāgralagnamuktān 
ātmānaṃ raṇakṛtakarmaṇāṃ gajānām ānṛṇyaṃ gatam iva mārgaṇair amaṃsta // Ragh_9.65

camarān paritaḥ pravartitāśvaḥ kvacid ākarṇavikṛṣṭabhallavarṣī 
nṛpatīn iva tān viyojya sadyaḥ sitavālavyajanair jagāma śāntim // Ragh_9.66

api turagasamīpād utpatantaṃ mayūraṃ na sa rucirakalāpaṃ bāṇalakṣyī cakāra 
sapadi gatamanaskaś citramālyānukīrṇe rativigalitabandhe keśapāśe priyāyāḥ // Ragh_9.67

tasya karkaśavihārsaṃbhavaṃ svedam ānanavilagnajālakam 
ācacāma satuṣāraśīkaro bhinnapallavapuṭo vanānilaḥ // Ragh_9.68

iti vismṛtānyakaraṇīyam ātmanaḥ sacivāvalambitadhuraṃ narādhipam 
parivṛddharāgam anubhandhasevayā mṛgayā jahāra catureva kāminī // Ragh_9.69

sa lalitakusumapravālaśayyāṃ jvalitamahauṣadhidīpikāsanāthām 
narapatir ativāhayāṃ babhūva kvacid asametaparicchadas triyāmām // Ragh_9.70

uṣasi sa gajayūthakarṇatālaiḥ paṭupaṭadhavanibhir vinītanidraḥ 
aramata madhurāṇi tatra śṛṇvan vihagavikūjitabandimaṅgalāni // Ragh_9.71

atha jātu ruror gṛhītavartmā vipine pārśvacarair alakṣyamāṇaḥ 
śramaphenamucā tapasvigāḍhāṃ tamasāṃ prāpa nadīṃ turaṃgameṇa // Ragh_9.72

kumbhapūraṇabhavaḥ paṭur uccair uccacāra nando 'mbhasi tasyāḥ 
tatra sa dviradabṛṃhitaśaṅkī śabdapātinam iṣuṃ visasarja // Ragh_9.73

nṛpateḥ pratiṣiddham eva tat kṛtavān paṅktiratho vilaṅghya yat 
apathe padam arpayanti hi śrutavanto 'pi rajonimīlitāḥ // Ragh_9.74

hā tāteti kranditam ākarṇya viṣaṇṇas tasyānviṣyan vetasagūḍhaṃ prabhavaṃ saḥ 
śalyaprotaṃ prekṣya sakumbhaṃ muniputraṃ tāpād antaḥśalya ivāsīt kśitipo 'pi // Ragh_9.75

tenāvatīrya turagāt prathitāngvayena pṛṣṭānvayaḥ sa jalakumbhaniṣaṇṇadehaḥ 
tasmai dvijetaratapasvisutaṃ skhaladbhir ātmānam akṣarapadaiḥ kathayāṃ babhūva // Ragh_9.76

taccoditaḥ ca tam anuddhrṛtaśalyam eva pitroḥ sakāśam avasannadṛśor nināya 
tābhyāṃ tathāgatam upetya tam ekaputram ajñānataḥ svacaritaṃ nṛpatiḥ śaśaṃsa // Ragh_9.77

tau daṃpatī bahu vilapya śiśoḥ prahartrā śalyaṃ nikhātam udahārayatām urastaḥ 
so 'bhūt parāsur atha bhūmipatiṃ śaśāpa hastārpitair nayanvāribhir eva vṛddhaḥ // Ragh_9.78

diṣṭāntam āpsyati bhavān api putraśokād ante vayasy aham iveti tam uktavantam 
ākrāntapūrvam iva muktaviṣaṃ bhujaṃgaṃ provāca kosalapatiḥ prathamāparāddhaḥ // Ragh_9.79

śāpo 'py adṛṣṭatanayānanapadmaśobhe sānugraho bhagavatā mayi pātito 'yam 
kṛṣyāṃ dahann api khalu kṣitim indhaneddho bījaprarohajananīṃ jvalanaḥ karoti // Ragh_9.80

itthaṃ gate gataghṛṇaḥ kim ayaṃ vidhattāṃ vadhyas tavety abhitite vasudhādhipena 
edhān hutāśanavataḥ sa munir yayāce putraṃ parāsum anugantumanāḥ sadāraḥ // Ragh_9.81

prātānugaḥ sapadi śāsanam asya rājā saṃpādya pātakaviluptadhṛtir nivṛttaḥ 
antarniviṣṭapadam ātmavināśahetuṃ śāpaṃ dadhaj jvalanam aurvam ivāmburāśiḥ // Ragh_9.82

tadartham arthajñagate gatatrapaḥ kim eṣa te vadhyajano 'nusiṣṭhatu 
sa vahnisaṃskāram ayācatātmanaḥ sadārasūnor vidadhe ca tan nṛpaḥ // Ragh_9.82a

sameyivān raghuvṛṣabhaḥ svasainikaiḥ svamandiraṃ śithiladhṛtir nivartitaḥ 
manogataṃ guruṃ ṛṣiśāpam udvahan kṣayānalaṃ jaladhir ivāntakāspadam // Ragh_9.82b

pṛthivīṃ śāsatas tasya pākaśāsanatejasaḥ 
kiṃcidūnam anūnarddheḥ śaradām ayutaṃ yayau // Ragh_10.1

na copalebhe pūrveṣām ṛṇanirmokṣasādhanam 
sutābhidhānaṃ sa jyotiḥ śaradām ayutaṃ yayau // Ragh_10.2

manor vaṃśaś ciraṃ tasminn anabhivyaktasaṃtatiḥ 
nimajjya punar utthāsyan nadaḥ śoṇa ivābhavat // Ragh_10.2*

atiṣṭhat pratyayāpekṣa-saṃtatiḥ sa ciraṃ nṛpaḥ 
prāṅ manthād anabhivyakta-ratnotpattir ivārṇavaḥ // Ragh_10.3

ṛṣyaśṛṅgādayas tasya santaḥ saṃtānakāṅkṣiṇaḥ 
ārebhire jitātmānaḥ putrīyām iṣṭim ṛtvijaḥ // Ragh_10.4

tasminn avasare devāḥ paulastyopaplutā harim 
abhijagmur nidāghārtāś chāyāvṛkṣam ivādhvagāḥ // Ragh_10.5

te ca prāpur udanvataṃ bubudhe cādipūruṣaḥ 
avyākṣepo bhaviṣyantyāḥ kāryasiddher hi lakṣaṇam // Ragh_10.6

bhogibhogādanāsīnaṃ dadṛśus taṃ divaukasaḥ 
tatphaṇāmaṇḍalodarcir-maṇidyotitavigraham // Ragh_10.7

śriyaḥ padmaniṣaṇṇāyāḥ kṣaumāntaritamekhale 
aṅke nikṣiptacaraṇam āstīrṇakarapallave // Ragh_10.8

prabuddhapuṇḍarīkākṣaṃ bālātapanibhāṃśukam 
divasaṃ śāradam iva prārambhasukhadarśanam // Ragh_10.9

prabhānuliptaśrīvatsaṃ lakṣmīvibhramadarpaṇam 
kautsubhākhyam apāṃ sāraṃ bibhrāṇaṃ bṛhatorasā // Ragh_10.10

bāhubhir viṭapākārair divyābharaṇabhūṣitaiḥ 
āvirbhūtam apāṃ madhye pārijātam ivāparam // Ragh_10.11

daityastrīgaṇḍalekhānāṃ madarāgavilopibhiḥ 
hetibhiś cetanāvadbhir udīritajayasvanam // Ragh_10.12

muktaśeṣavirodhena kuliśavraṇalakṣmaṇā 
upasthitaṃ prāñjalinā vinītena garutmatā // Ragh_10.13

yoganidrāntaviśadaiḥ pāvanair avalokanaiḥ 
bhṛgvādīn anugṛhṇantaṃ saukha śāyanikān ṛṣīn // Ragh_10.14

praṇipatya surās tasmai śamayitre suradviṣām 
athainaṃ tuṣṭuvuḥ stutyam avāṅmanasagocaram // Ragh_10.15

namo viśvasṛje pūrvaṃ viśvaṃ tadanu bibhrate 
atha viśvasya saṃhartre tubhyaṃ tredhāsthitātmane // Ragh_10.16

rasāntarāṇy ekarasaṃ yathā divyaṃ payo 'śnute 
deśe deśe guṇeṣv evam avasthās tvam avikriyaḥ // Ragh_10.17

ameyo mitalokas tvam anarthī prārthanāvahaḥ 
ajito jiṣṇur atyantam avyakto vyaktakāraṇam // Ragh_10.18

ekaḥ kāraṇatas tāṃ tām avasthāṃ pratipadyase 
nānātvaṃ rāgasaṃyogāt sphaṭikasy'eva te smṛtam // Ragh_10.19

hṛdayastham anāsannam akāmaṃ tvāṃ tapasvinam 
dayālum anaghaspṛṣṭaṃ purāṇam ajaraṃ viduḥ // Ragh_10.20

sarvajñas tvam avijñātaḥ sarvayonis tvam ātmabhūḥ 
sarvaprabhur anīśas tvam ekas tvaṃ sarvarūpabhāk // Ragh_10.21

saptasāmopagītaṃ tvāṃ saptārṇavajaleśayam 
saptārcirmukham ācakhyuḥ saptalokaikasaṃśrayam // Ragh_10.22

caturvargaphalaṃ jñānaṃ kālāvasthā caturyugā 
caturvarṇamayo lokas tvattaḥ sarvaṃ caturmukhāt // Ragh_10.23

abhyāsanigṛhītena manasā hṛdayāśrayam 
jyotirmayaṃ vicinvanti yoginas tvāṃ vimuktaye // Ragh_10.24

ajasya gṛhṇato janma nirīhasya hatadviṣaḥ 
svapato jāgarūkasya yāthātmyaṃ veda kas tava // Ragh_10.25

śabdādīn viṣayān bhoktuṃ carituṃ duścaraṃ tapaḥ 
paryāpto 'si prajāḥ pātum audāsīnyena vartitum // Ragh_10.26

bahudhāpy āgamair bhinnāḥ panthānaḥ siddhihetavaḥ 
tvayy eva nipatanty oghā jāhnavīyā ivārṇave // Ragh_10.27

tvayy āveśitacittānāṃ tvatsamarpitakarmaṇām 
gatis tvaṃ vītarāgāṇām abhūyaḥsaṃnivṛttaye // Ragh_10.28

pratyakṣo 'py aparicchedyo mahyādir mahimā tava 
āptavāganumānābhyāṃ sādhyaṃ tvāṃ prati kā kathā // Ragh_10.29

kevalaṃ smaraṇenaiva punāsi puruṣaṃ yataḥ 
anena vṛttayaḥ śeṣā niveditaphalās tvayi // Ragh_10.30

udadher iva ratnāni tejāṃsīva vivasvataḥ 
stutibhyo vyatiricyante dūreṇa caritāni te // Ragh_10.31

anavāptam avāptavyaṃ na te kiṃcana vidyate 
lokānugraha evaiko hetus te janmakaramaṇoḥ // Ragh_10.32

mahimānaṃ yad utkīrtya tava saṃhriyate vacaḥ 
śrameṇa tad aśaktyā vā na guṇānām iyattayā // Ragh_10.33

iti prasādayām āsus tava saṃhriyate vacaḥ 
bhūtārthavyāhṛtiḥ sā hi na stutiḥ parameṣṭhinaḥ // Ragh_10.34

tasmai kuśalasaṃpraśna-vyañjitaprītaye surāḥ 
bhayam apralayodvelād ācakhyur nairṛtodadheḥ // Ragh_10.35

atha velāsamāsanna-śailarandhrānunādinā 
svareṇovāca bhagavān paribhūtārṇavadhvaniḥ // Ragh_10.36

purāṇasya kaves tasya varṇasthānasamīritā 
babhūva kṛtasaṃskārā caritārthaiva bhāratī // Ragh_10.37

babhau sa daśanajyotsnā sā vibhor vadanodgatā 
niryātaśeṣā caraṇād gaṅgevordhvapravartinī // Ragh_10.38

jāne vo rakṣasākrāntāv anubhāvaparākramau 
aṅgināṃ tamasevobhau guṇau prathmamadhyamau // Ragh_10.39

viditaṃ tapyamānaṃ ca tena me bhuvantrayam 
akāmopanateneva sādhor hṛdayam enasā // Ragh_10.40

kāryeṣu caikakāryatvād abhyarthyo 'smi na vajriṇā 
svayam eva hi vāto 'gneḥ sārathyaṃ pratipadyate // Ragh_10.41

svāsidhārāparihṛtaḥ kāmaṃ cakrasya tena me 
sthāpito daśamo mūrdhā lavyāṃśa iva rakṣasā // Ragh_10.42

sraṣṭur varātisargāt tu mayā tasya durātmanaḥ 
atyārūḍhaṃ ripoḥ soḍhaṃ candaneva bhoginaḥ // Ragh_10.43

dhātāraṃ tapasā prītaṃ yayāce sa hi rākṣasaḥ 
daivāt sargād avadhyatvaṃ martyeṣv āsthāparāṅmukhaḥ // Ragh_10.44

so 'haṃ dāśarathir bhūtvā raṇabhūmer balikṣamam 
kariṣyāmi śarais tīkṣṇais tacchiraḥkamaloccayam // Ragh_10.45

acirād vajvabhir bhāgaṃ kalpitaṃ vidhivat punaḥ 
māyāvibhir anālīḍham ādāsyadhve miśācaraiḥ // Ragh_10.46

vaimānikāḥ puṇyakṛtas tyajantu marutāṃ pathi 
puṣpakālokasaṃkṣobhaṃ meghāvaraṇatatparāḥ // Ragh_10.47

moṣyadhve svargabandīnāṃ veṇībandhān adūṣitān 
śāpayantritapaulastya-balātkārakacagrahaiḥ // Ragh_10.48

rāvaṇāvagrahaklāntam iti vāgamṛtena saḥ 
abhivṛṣya marutsasyaṃ kṛṣṇameghas tirodadhe // Ragh_10.49

puruhūtaprabhṛtayaḥ surakāryodyataṃ surāḥ 
aṃśair anuyayur viṣṇuṃ puṣpair vāyum iva drumāḥ // Ragh_10.50

atha tasya viśāṃpatyur ante kāmyasya karmaṇaḥ 
puruṣaḥ prababhūvāgner vismayena sahartvijām // Ragh_10.51

hemapātragataṃ dorbhyām ādadhānaḥ payaścarum 
anupraveśād ādyasya puṃsas tenāpi durvaham // Ragh_10.52

prājāpatyopanītaṃ tad (?) annaṃ pratyagrahīn nṛpaḥ 
vṛṣeva payasāṃ sāram āviṣkṛtam udanvatā // Ragh_10.53

anena kathitā rājño guṇās tasyānyadurlabhāḥ 
prasūtiṃ cakame tasmiṃs trailokyaprabhavo 'pi yat // Ragh_10.54

sa tejo vaiśnavaṃ patnyor vibheje carusaṃjñitam 
dyāvāpṛthivyoḥ pratyagram aharpatir ivātapam // Ragh_10.55

arcitā tasya kausalyā priyā kekayavaṃśajā 
ataḥ saṃbhāvitāṃ tābhyāṃ sumitrām aicchad īśvaraḥ // Ragh_10.56

te bahujñasya cittajñe patnyau patyur mahīṣitaḥ 
caror ardhārdhabhāgābhyāṃ tām ayojayatām ubhe // Ragh_10.57

sāpi praṇayavaty āsīt sapatnyor ubhayor api 
bhramarī vāraṇasyeva madanisyandalekhayoḥ // Ragh_10.58

tābhir garbhaḥ prajābhūtyai dadhre devāṃśasambhavaḥ 
saurībhir iva nāḍībhir amṛtākhyābhir ammayaḥ // Ragh_10.59

samam āpannasattvās tā rejur āpāṇḍuratviṣaḥ 
antargataphalārambhāḥ sasyānām iva saṃpadaḥ // Ragh_10.60

guptaṃ dadṛśur ātmānaṃ sarvāḥ svapneṣu vāmanaiḥ 
jalajāsigadāśārṅga-cakralāñchitamūrtibhiḥ // Ragh_10.61

hemapakṣaprabhājālaṃ gagane ca vitanvatā 
uhyante sma suparṇena vegākṛṣṭapayomucā // Ragh_10.62

bibhratyā kaustubhaṃ nyāsaṃ stanāntaravilambinam 
paryupāsyanta lakṣmyā ca padmavyajanahastayā // Ragh_10.63

kṛtābhiṣekair divyāyāṃ trisrotasi ca saptabhiḥ 
brahma rṣibhiḥ paraṃ brahma gṛṇadhbir upatasthire // Ragh_10.64

tābhyas tathāvidhān svapnāñ chrutvā prīto hi pārthivaḥ 
mene parārdhyam ātmānaṃ gurutvena jagdguroḥ // Ragh_10.65

vibhaktātmā vibhus tāsām ekaḥ kuṣiṣv anekadhā 
uvāsa pratimācandraḥ prasannānām apām iva // Ragh_10.66

athāgramahiṣī rājñaḥ prasūtisamaye satī 
putraṃ tamo'pahaṃ lebhe naktaṃ jyotir ivauṣadhiḥ // Ragh_10.67

rāma ity abhirāmeṇa tenāpratima tejasā 
nāmadheyaṃ guruś cakre jagatprathamamaṅgalam // Ragh_10.68

raghuvaṃśapradīpena tenāpratima tejasā 
rakṣāgṛhagatā dīpāḥ pratyādiṣṭa ivābhavan // Ragh_10.69

śayyāgatena rāmeṇa mātā śātodarī babhau 
saikatāmbhojabalinā jāhnavīva śaratkṛśā // Ragh_10.70

kaikeyyās tanayo jajñe bharato nāma śīlavān 
janayitrīm alaṃcakre yaḥ praśraya iva śriyam // Ragh_10.71

sutau lakṣmaṇaśatrughnau sumitrā suṣuve yamau 
samyagāgamitā vidyā prabodhavinayāv iva // Ragh_10.72

nirdoṣam abhavat sarvam āviṣkṛtaguṇaṃ jagat 
anvagād iva hi svargo gāṃ gataṃ puruṣottamam // Ragh_10.73

tasyodaye caturmūrteḥ paulastyacakiteśvarāḥ 
virajaskair nabhasvadbhir diśa ucchvasitā iva // Ragh_10.74

kṛśānur apadhūmatvāt prasannatvāt prabhākaraḥ 
rakṣiviprakṛtāv āstām apaviddhaśucāv iva // Ragh_10.75

daśānanakirīṭebhyas tatkṣaṇaṃ rākṣasaśriyaḥ 
maṇivyājena paryastāḥ pṛthivyām aśrubindavaḥ // Ragh_10.76

putrajanmapraveśyānāṃ tūryāṇām tasya putriṇaḥ 
ārambhaṃ prathamaṃ cakrur devadhundubhayo divi // Ragh_10.77

saṃtānakamayī vṛṣṭir bhavane cāsya petuṣī 
samaṅgalopacārāṇāṃ saivādiracanābhavat // Ragh_10.78

kumārāḥ kṛtasaṃskārās te dhātristanya pāyinaḥ 
ānandenāgrajeneva samaṃ vavṛdhire pituḥ // Ragh_10.79

svābhāvikaṃ vinītatvaṃ teṣaṃ vinayakarmaṇā 
mumūrcha sahajaṃ tejo haviṣeva havirbhujām // Ragh_10.80

parasparāviruddhās te tad raghor anaghaṃ kulam 
alam uddyotayām āsur devāraṇyam ivartavaḥ // Ragh_10.81

samāne 'pi hi saubhrātre yathobhau rāmalakṣmaṇau 
tathā bharataśatrughnau prītyā dvandvaṃ babhūvatuḥ // Ragh_10.82

teṣāṃ dvayor dvayor aikyaṃ bibhide na kadācana 
yathā vāyuvibhāvasvor yathā candrasamudrayoḥ // Ragh_10.83

te prajānāṃ prajānāthās tejasā praśrayeṇa ca 
mano jahrur nidāghānte śyāmābhrā divasā iva // Ragh_10.84

sa caturdhā babhau vyastaḥ prasavaḥ pṛthivīpateḥ 
dharmārthakāmamokṣāṇām avatāra ivāṅgabhāk // Ragh_10.85

guṇair ārādhayām āsus te guruṃ guruvatsalāḥ 
tam eva caturnateśaṃ ratnair iva mahārṇavāḥ // Ragh_10.86

suragaja iva dantair bhagnadaityāsidhārair naya iva paṇabandhavyaktayogair upāyaiḥ 
harir iva yugadīrghair dorbhir aṃṣais tadīyaiḥ patir avanipatīnāṃ taiś cakāśe // Ragh_10.87

kauśikena sa kila kṣitīśvaro rāmam adhvaravighātaśāntaye 
kākapakṣadharam etya yācitas tejasāṃ hi na vayaḥ samīkṣyate // Ragh_11.1

kṛcchralabdham api labdhavarṇabhāk taṃ dideśa munaye salakṣmaṇam 
apy asupraṇayināṃ raghoḥ kule na vyahanyata kadācid arthitā // Ragh_11.2

yāvad ādiśati pārthivas tayor nirgamāya puramārgasatkriyām 
tāvad āśu vidadhe marutsakhaiḥ sā sapuṣpajalavarṣibhir ghanaiḥ // Ragh_11.3

tau nideśakaraṇodyatau pitur dhanvinau caraṇayor nipetatuḥ 
bhūpater api tayoḥ pravatsyator namrayor upari bāṣpabindavaḥ // Ragh_11.4

tau pitur nayanajena vāriṇā kiṃcidukṣitaśikhaṇḍakāv ubhau 
dhanvinau tam ṛṣim anvagacchatāṃ pauradṛṣṭikṛtamārgatoraṇau // Ragh_11.5

lakṣmaṇānucaram eva rāghavaṃ netum aicchad ṛṣir ity asau nṛpaḥ 
āśiṣaṃ prayuyuje na vāhinīṃ sā hi rakṣaṇavidhau tayoḥ kṣamā // Ragh_11.6

rejatuś ca sutarāṃ mahaujasaḥ kauśikasya padavīm anudrutau 
uttarāṃ prati diśaṃ vivasvataḥ prasthitasya madhumādhavāv iva // Ragh_11.6*

mātṛvargacaraṇaspṛṣau munes tau prapadya padavīṃ mahaujasaḥ 
rejatur gativaśāt pravartinau bhāskarasya madhumādhavāv iva // Ragh_11.7

vīcilolabhujayos tayor gataṃ śaiśavāc capalam apy aśobhata 
toyadāgama ivoddhyabhidyayor nāmadheyasadṛśaṃ viceṣṭitam // Ragh_11.8

tau balātibalayoḥ prabhāvato vidyayoḥ pathi munipradiṣṭayoḥ 
mamlatur na maṇikuṭṭimocitau mātṛpārśvaparivartināv iva // Ragh_11.9

pūrvavṛttakathitaiḥ purāvidaḥ sānujaḥ pitṛsakhasya rāghavaḥ 
uhyamāna iva vāhanocitaḥ pādacāram api na vyabhāvayat // Ragh_11.10

tau sarāṃsi rasavadbhir ambubhiḥ kūjitaiḥ śrutisukhaiḥ patatriṇaḥ 
vāyavaḥ surabhipuṣpareṇubhiś chāyayā ca jaladāḥ siṣevire // Ragh_11.11

nāmbhasāṃ kamalaśobhināṃ tathā śākhināṃ na ca pariśramacchidām 
darśanena laghunā yathā tayoḥ prītim āpur ubhayos tapasvinaḥ // Ragh_11.12

sthāṇudagdhavapuṣas tapovanaṃ prāpya dāśarathir āttakārmukaḥ 
vigraheṇa madanasya cāruṇā so 'bhavat pratinidhir na karmaṇā // Ragh_11.13

tau suketusutayā khilīkṛte kauśikād viditaśāpayā pathi 
ninyatuḥ sthalaniveśitātaṭanī līlayaiva dhanuṣī adhijyatām // Ragh_11.14

jyāniniādam atha gṛhṇatī tayoḥ prādurāsa bahūlakṣapā chaviḥ 
tāḍakā calakapālakuṇḍalā kālikeva nibiḍā balākinī // Ragh_11.15

tīvravegadhutamārgavṛkṣayā pretacīvaravasā svanograyā 
abhyabhāvi bharatāgrajas tayā vātyayeva pitṛkānanotthayā // Ragh_11.16

udyataikabhujayaṣṭim āyatīṃ śroṇilambipuruṣāntramekhalām 
tāṃ vilokya vanitāvadhe ghṛṇāṃ pattriṇā saha mumoca rāghavaḥ // Ragh_11.17

yac cakāra vivaraṃ śilāghane tāḍakorasi sa rāmasāyakaḥ 
apraviṣṭaviṣayasya rakṣasāṃ dvāratām agamad antakasya tat // Ragh_11.18

bāṇabhinnahṛdayā nipetuṣī sā svakānabhuvaṃ na kevalām 
viṣṭapatrayaparājayasthirāṃ rāvaṇaśriyam api vyakampayat // Ragh_11.19

rāmamanmathaśareṇa tāḍitā duḥsahena dṛdaye niśācarī 
gandhavadrudhiracandanokṣitā jīviteśavasatiṃ jagāma sā // Ragh_11.20

nairṛtaghnam atha mantravan muneḥ prāpad astram avadānatoṣitāt 
jyotir indhanaipāti bhāskarāt sūryakānta iva tāḍakāntakaḥ // Ragh_11.21

vāmanāśramapadaṃ tataḥ paraṃ pāvanaṃ śruam ṛṣer upeyivān 
unmanāḥ prathamajanmaceṣṭitāny asmarann api babhūva rāghavaḥ // Ragh_11.22

āsasāda munir ātmanas tataḥ śiṣyavargaparikalpitārhaṇam 
baddhapallavapuṭāñjalidrumaṃ darśanonmukha mṛgaṃ tapovanam // Ragh_11.23

tatra dīkṣitam ṛṣiṃ rakaṣatur vighnato daśarathātmajau śaraiḥ 
lokam andhatamasāt kramoditau raśāmibhiḥ śaśidivākarāv iva // Ragh_11.24

vīkṣya vedim atha raktabindubhir bandhujīvapṛthubhiḥ pradūṣitām 
saṃbhramo 'bhavad apoḍhakarmaṇām ṛtvijāṃ cyutavikaṅkatasrucām // Ragh_11.25

unmukhaḥ sapadi lakṣmaṇāgrajo bāṇam āśrayamukhāt samuddharan 
rakṣasāṃ balam apaśyad ambare gṛdhrapakṣapavaneritadhvajam // Ragh_11.26

tatra yāv adhipatī makhadviṣāṃ tau śaravyam akarot sa netarān 
kiṃ mahoragavisarpivikramo rājileṣu garuḍaḥ pravartate // Ragh_11.27

so 'stram ugrajavam astrakovidaḥ saṃdadhe dhanuṣi vāyudaivatam 
tena śailagurum apy apātayat pāṇḍupattram iva tāḍakāsutam // Ragh_11.28

yaḥ subāhur iti rākṣaso 'paras tatra tatra visasarpa māyayā 
taṃ kṣurapraśakalīkṛtām kṛtī pattriṇāṃ vyabhajad āśramād bahiḥ // Ragh_11.29

ity apāstamakhavighnayos tayoḥ sāṃyugīnam abhinandya vikramam 
ṛtvijaḥ kulapater yathākramaṃ vāgyatasya niravartayan kriyāḥ // Ragh_11.30

tau praṇāmacalakākapakṣakau bhrātarāv abhṛthāpluto muniḥ 
āśiṣām anupadaṃ samaspṛśad darbhapāṭitatalena pāṇinā // Ragh_11.31

taṃ nyamantrayata saṃbhṛtakratur maithilaḥ sa mighilāṃ vrajan vaśī 
rāghavāv api nināya bibhratau taddhanuḥśravaṇajaṃ kutūhalam // Ragh_11.32

taiḥ śiveṣu vasatir gatādhvabhiḥ sāyam āśramataruṣv agṛhyata 
yeṣu dīrghatapasaḥ parigraho vāsavakṣaṇakalatratāṃ yayau // Ragh_11.33

pratyapadyata cirāya yat punaś cāru gautamavadhūḥ śilāmayī 
svaṃ vapuḥ sa kila kilibiṣacchidāṃ rāmapādarajasām anugrahaḥ // Ragh_11.34

rāghavānvitam upasthitaṃ muniṃ taṃ niśamya janako janeśvaraḥ 
arthakāmasahitaṃ saparyayā dehabaddham iva dharmam abhyagāt // Ragh_11.35

tau videhanagarīnivāsināṃ gāṃ gatāv iva divaḥ punarvasū 
manyate sma pibatāṃ vilocanaiḥ pakṣmapātam api vañcanāṃ manaḥ // Ragh_11.36

yūpavaty avasite kiryāvidhau kālavit kuśikavaṃśavardhanaḥ 
rāmam iṣvasanadarśanotsukaṃ maithilāya kathayāṃ bvabhūva saḥ // Ragh_11.37

tasya vīkṣya lalitaṃ vapuḥ śiśoḥ pārthivaḥ prathitavaṃśajanmanaḥ 
svaṃ vicintya ca dhanur durānamaṃ pīḍito duhiṭśulkasaṃsthayā // Ragh_11.38

abravīc ca bhagavan mataṅgajair yad bṛhadbhir api karma duṣkaram 
tatra nāham anumantum utsahe moghavṛtti kalabhasya ceṣṭitam // Ragh_11.39

hrepitā hi bahavo nareśvarās tena tāta dhanuṣā dhanurbhṛtaḥ 
jyānighātakaṭhinatvaco bhujān svān vidhūya dhig iti pratasthire // Ragh_11.40

pratyuvāca tam ṛṣir niśamyatāṃ sārato 'yam atha vā kṛtaṃ girā 
cāpa eva bhavato bhaviṣyati vyaktaśaktir aśanir girāv iva // Ragh_11.41

evam āptavacanāt sa pauruṣaṃ kākapakṣakadhare 'pi rāghave 
śraddadhe tridaśagopamātrake dāhaśaktim iva kṛṣṇavartmani // Ragh_11.42

vyādideśa gaṇaḥ sapārśvagān karmukābharaṇāya maithilaḥ 
taijasaya dhanuṣaḥ pravṛttaye toyadān iva sahasralocanaḥ // Ragh_11.43

tat prasuptabhujagendrabhīṣaṇaṃ vīkṣya dāśarathir ādade dhanuḥ 
vidrutakratumṛgānausāriṇaṃ yena bāṇam asṛjad vṛṣadhvajaḥ // Ragh_11.44

ātatajyam akarot sa saṃsadā vismayastimitanetram īkṣitaḥ 
śailasāram api nātiyatnataḥ puṣpacāpam iva peśalaṃ smaraḥ // Ragh_11.45

bhajyamānam atimātrakarṣaṇāt tena vajraparuṣasvanaṃ dhanuḥ 
bhārgavāya dṛḍhamanyave punaḥ kṣatram udyatam iti nyavedayat // Ragh_11.46

dṛṣṭasāram atha rudrakārmuke vīryaśulkam abhinandya maithilaḥ 
rāghavāya tanayām ayonijāṃ rūpiṇīṃ śriyam iva nyavedayat // Ragh_11.47

maithilaḥ sapadi satyasaṃgaro rāghavāya tanayām ayonijāṃ 
saṃnidhau dyutimatas taponidher agnisākṣika ivātisṛṣṭavān // Ragh_11.48

prāhiṇoc ca mahitaṃ mahādyutiḥ kosalādhipataye purodhasam 
bhṛtyabhāvi duhituḥ parigrahād diśyatāṃ kulam idaṃ nimer iti // Ragh_11.49

utsukaś ca sutadārakarmaṇā so 'bhavad gurur upāgataś ca tam 
gautamasya tanayo 'nukūlavāk prārthitaṃ hi sukṛtām akālahṛt // Ragh_11.49*

anviyeṣa sadṛśīṃ sa ca snuṣāṃ prāpa cainam anukūlavāg dvijaḥ 
sadya eva sukṛtāṃ hi pacyate kalpavṛkṣaphala dharmi kāṅkṣitam // Ragh_11.50

tasya kalpitapuraskriyāvidheḥ śuśruvān vacanam agrajanmanaḥ 
uccacāla valabhitasakho vaśī sainyareṇumuṣitārkadīdhitiḥ // Ragh_11.51

āsasāda mithilāṃ sa veṣṭayan piḍitopavanapādapāṃ balaiḥ 
prītirodham asahiṣṭa sā purī strīva kāntaparibhogam āyatam // Ragh_11.52

tau sametya samayasthitāv ubhau bhūpatī varuṇavāsavopamau 
kanyakātanayakautukakriyāṃ svaprabhāvasadṛśīṃ vitenatuḥ // Ragh_11.53

pārthivīm udavahad raghūdvaho lakṣmaṇas tadanujām athormilām 
yau tayor avarajau varaujasau tau kuśadhvajasute sumadhyame // Ragh_11.54

te caturthasahitās trayo babhuḥ sūnavo navavadhūparigrahāḥ 
sāmadānavidhibhedavigrahāḥ siddhimanta iva tasya bhūpateḥ // Ragh_11.55

tā narādhipasutā nṛpātmajais te ca tābhir agaman kṛtārthatām 
so 'bhavad varavadhūsamāgamaḥ pratyayaprakṛtiyogsaṃnibhaḥ // Ragh_11.56

evam āttaratir ātmasaṃbhavāṃs tān niveśya caturo 'pi tatra saḥ 
adhvasu triṣu visṛṣṭamaithilaḥ svāṃ purīṃ daśaratho nyavartata // Ragh_11.57

tasya jātu marutaḥ pratīpagā vartmasu dhavjatarupramāthinaḥ 
cikliśur bhṛśatayā varūthinīm uttaṭā iva nadīrayāḥ sthalīm // Ragh_11.58

lakṣyate sma tadanantaraṃ ravir baddhabhīmapairveṣamaṇḍalaḥ 
vainateyaśamitasya bhogino bhogaveṣṭita iva cyuto maṇiḥ // Ragh_11.59

śyenapakṣaparidhūsarālakāḥ sāṃdhyamegharudhirārdravāsasaḥ 
aṅganā iva rajasvalā diśo no babhūvur avalokanakṣamāḥ // Ragh_11.60

bhāskaraś ca diśam adhyuvāsa yāṃ tāṃ śritāḥ pratibhayaṃ vavāśire 
kṣatraśoṇitapitṛkriyocitaṃ codayantya iva bhārgavaṃ śivāḥ // Ragh_11.61

tat pratīpapavanādi vaikṛtaṃ prekṣya śāntim adhikṛtya kṛtyavit 
anvayuṅkta gurum īśvaraḥ kṣiteḥ svantam ity alaghayat sa tadvyathām // Ragh_11.62

tejasaḥ sapadi rāśir utthitaḥ prādurāsa kila vāhinīmukhe 
yaḥ pramṛjya nayanāni sainikair lakṣaṇīyapuruṣākṛtiś cirāt // Ragh_11.63

pitryam aṃśam upavītalakṣaṇaṃ mātṛkaṃ ca dhanur ūrjitaṃ dadhat 
yaḥ sasoma iva gharmadīdhitiḥ sadvijihva iva candanadrumaḥ // Ragh_11.64

yena roṣaparuṣātmanaḥ pituḥ śāsane sthibhido 'pi tasthuṣā 
vepamānajananīśiraśchidā prāg ajīyata ghṛṇā tato mahī // Ragh_11.65

akṣabhījavalayena nibabhau dakṣiṇaśravaṇasaṃsthitena yaḥ 
kṣatriyāntakaraṇaikaviṃśater vyājapūrvagaṇanām ivodvahan // Ragh_11.66

taṃ pitur vadhabhavena manyunā rājavaṃśanidhanāya dīkṣitam 
bālasūnur avalokya bhārgavaṃ svāṃ daśāṃ ca viṣasāda pārthivaḥ // Ragh_11.67

rāmanāma iti tulyam ātmaje vartamānam ahite ca dāruṇe 
hṛdyam asya bhayadāyi cābhavad ratnajātam iva hārasarpayoḥ // Ragh_11.68

arghyam arghyam iti vādinaṃ nṛpaṃ so 'navekṣya bharatāgrajo yataḥ 
kṣatrakopadahanārciṣaṃ tataḥ saṃdadhe dṛśam udagratārakām // Ragh_11.69

tena kārmukaniṣaktamuṣṭinā rāghavo vigatabhīḥ purogataḥ 
aṅgulīvivaracāriṇaṃ śaraṃ kurvatā nijagade yuyutsunā // Ragh_11.70

kṣatrajātam apakāri vairi me tan nihatya bahuśaḥ śamaṃ gataḥ 
suptasarpa iva daṇḍaghaṭṭanād roṣito 'smi tava vikramaśravāt // Ragh_11.71

maithilasya dhanur anyapārthivais tvaṃ kilānamitapūrvam akṣaṇoḥ 
tan niśamya bahavatā samarthaye vīryaśṛṅgam iva bhagnam ātmanaḥ // Ragh_11.72

anyadā jagati rāma ity ayaṃ śabda uccarita eva mām agāt 
vrīḍam āvahati me sa saṃprati vyastavṛttir udayonmukhe tvayi // Ragh_11.73

bibhrato 'stram acale 'py akuṇṭhitaṃ dvau matau mama ripū samāgasau 
homa-dhenu-haraṇāc ca haihayas tvaṃ ca irtim apahartum udyataḥ // Ragh_11.74

kṣatriyāntakaraṇo 'pi vikramas tena mām avati nājite tvayi 
pāvakasya mahimā sa gaṇyate kakṣavaj jvalati sāgare 'pi yaḥ // Ragh_11.75

viddhi cāttabalam ojasā harer aiśvaraṃ dhanur abhāji yat tvayā 
khātamūlam anilo nadīrayaiḥ pātayaty api mṛdus taṭadrumam // Ragh_11.76

tan madīyam idam āyudhaṃ jyayā saṃgamayya saśaraṃ vikṛṣyatām 
tiṣṭhatu pradhanam evam apy ahaṃ tulyabāhutarasā jitas tvayā // Ragh_11.77

kātaro 'si yadi vodgatārciṣā tarjitaḥ paraśudhārayā mama 
jyānighātakaṭhināṅgulir vṛthā badhyatām abhayayācanāñjaliḥ // Ragh_11.78

evam uktavati bhīmadarśane bhārgave smitavikampitādharaḥ 
taddhanurgrahaṇam eva rāghavaḥ pratyapadyata samartham uttaram // Ragh_11.79

pūrvajanmadhanuṣā samāgataḥ so 'timātralaghudarśano 'bhavat 
kevalo 'pi subhago navāmbudaḥ kiṃ punas tridaśacāpalāñchitaḥ // Ragh_11.80

tena bhūminihitaikakoṭi tat kārmukaṃ ca balinādhiropitam 
niṣprabhaś ca ripur āsa bhūbhṛtāṃ dhūmaśeṣa iva dhūmaketanaḥ // Ragh_11.81

tāv ubhāv api paraspara-sthitau vardhamānaparihīnatejasau 
paśyati sma janatā dinātyaye pārvaṇau śaśidivākarāv iva // Ragh_11.82

taṃ kṛpāmṛdur avekṣya bhārgavaṃ rāghavaḥ skhalitavīryam ātmani 
svaṃ ca saṃhitam amogham āśugaṃ vyājahāra harasūnasaṃnibhaḥ // Ragh_11.83

na prahartum alam asmi nidayaṃ vipra ity abhibhavaty api tvayi 
śaṃṣa kiṃ gatim anena pattriṇā hanmi lokam uta te makhārjitam // Ragh_11.84

pratyuvāca tam ṛṣir na tattvatas tvāṃ na vedmi puruṣaṃ purātanam 
gāṃ gatasya tava dhāma vaiṣṇavaṃ kopito hy asi mayā didṛkṣuṇā // Ragh_11.85

bhasmasāt kṛtavataḥ pitṛdviṣaḥ pātrasāc ca vasudhāṃ sasāgarām 
āhito jayaviparyayo 'pi me ślāghya eva parameṣṭhinā tvayā // Ragh_11.86

tad gatiṃ matimatāṃ varepsitāṃ puṇyatīrthagamanāya rakṣa me 
pīḍayiṣyati na māṃ khilīkṛtā svargapaddhatir abhogalolupam // Ragh_11.87

pratyapadyata tatheti rāghavaḥ prāṅmukhaś ca visasarja sāyakam 
bhārgavasya sukṛto 'pi so 'bhavat svargamārgaparigho duratyayaḥ // Ragh_11.88

rāghavo 'pi caraṇau taponidheḥ kṣamyatām iti vadan samaspṛṣat 
nirjiteṣu tarasā tarasvināṃ śatruṣu praṇatir eva kīrtaye // Ragh_11.89

rājasatvam avadhūya mātṛkaṃ pitryam asmi gamitaḥ śamaṃ yadā 
nanv aninditaphalo mama tvayā nigraho 'py ayam anugrahīkṛtaḥ // Ragh_11.90

sādhu yāmy aham avighnam astu te devakāryam upapādayiṣyataḥ 
ūcivān iti vacaḥ salakṣmaṇaṃ lakṣmaṇāgrajam ṛṣis tirodadhe // Ragh_11.91

svaṃ niveśya kila dhāma rāghave vaiṣṇavaṃ viditaviṣṇutejasi 
svastidānam adhikṛtya cākṣayaṃ bhārgavo 'tha nijam āśramaṃ yayau // Ragh_11.91*

tasmin gate vijayinaṃ parirabhya rāmaṃ snehād amanyata pitā punar eva jātam 
tasyābhavat kṣaṇaśucaḥ paritoṣalābhaḥ kakṣāgnilaṅghitataror iva vṛṣṭipātaḥ // Ragh_11.92

atha pathi gamayitvā kḷparamyopakārye katicid avanipālaḥ śarvarīḥ śarvakalpah 
puram aviśad ayodhyāṃ maithilīdarśanīnāṃ kuvalayitagavākṣāṃ locanair aṅganānām // Ragh_11.93

nirviṣṭaviṣayasnehaḥ sa daśāntam upeyivān 
āsīd āsannanirvāṇaḥ pradīpārcir ivoṣasi // Ragh_12.1

taṃ karṇamūlam āgatya rāme śrīr nasyatām iti 
kaikeyīśaṅkayevāha palitacchadmanā jarā // Ragh_12.2

sā paurān paurakāntasya rāmasyābhyudayaśrutiḥ 
pratyekaṃ hlādayāṃ cakre kulyevodyānapādapān // Ragh_12.3

tasyābhiṣekasaṃbhāraṃ kalpitaṃ krūraniścayā 
dūṣayām āsa kaikeyī śokoṣṇaiḥ pārthivāśrubhiḥ // Ragh_12.4

sā kilāśvāsitā caṇḍī bhartrā tatsaṃśrutau varau 
udvavāmendrasiktā bhūr bilamagnāv ivoragau // Ragh_12.5

tayoś caturdaśaikena rāmaṃ prāvrājayat samāḥ 
dvitīyena sutasyaicchad vaidhavyaikaphalāṃ śriyam // Ragh_12.6

pitrā dattāṃ rudan rāmaḥ prāṅ mahīṃ pratyapadyata 
paścād vanāya gaccheti tadājñāṃ mudito 'grahīt // Ragh_12.7

dadhato maṅgalakṣaume vasānasya ca valkale 
dadṛśur vismitās tasya mukharāgaṃ samaṃ janāḥ // Ragh_12.8

sa sītālakṣmaṇasakhaḥ satyād gurum alopayan 
viveśa daṇḍakāraṇyaṃ pratyekaṃ ca satāṃ manaḥ // Ragh_12.9

rājāpi tadviyogārtaḥ smṛtvā śāpaṃ svakarmajam 
śarīratyāgamātreṇa śuddhilābham amanyata // Ragh_12.10

viproṣitakumāraṃ tad (?) rājyam astamiteśvaram 
randhrānveṣaṇadakṣāṇāṃ dviṣām āmiṣatāṃ yayau // Ragh_12.11

athānāthāḥ prakṛtayo mātṛbandhunivāsinam 
maulair ānāyayām āsur bhartaṃ stambhitāśrubhiḥ // Ragh_12.12

śrutvā tathāvidhaṃ mṛtyuṃ kaikeyītanayaḥ pituḥ 
mātur na kevalaṃ svasyāḥ śriyo 'py āsīt parāṅmukhaḥ // Ragh_12.13

sasainyaś cānvagād rāmaṃ darśitān āśramālayaiḥ 
tasya paśyan sasaumitrer udaśrur vasatidrumān // Ragh_12.14

citrakūṭavanasthaṃ ca kathitasvargatir guroḥ 
lakṣmyā nimantrayāṃ cakre tam anucchiṣṭasaṃpadā // Ragh_12.15

sa hi prathamaje tasminn akṛtaśrīparigrahe 
parivettāram ātmānaṃ mene svīkaraṇād bhuvaḥ // Ragh_12.16

tam aśakyam apākraṣṭuṃ nirdeśāt svargiṇaḥ pituḥ 
yayāce pāduke paścāt kartuṃ rājyādhidevate // Ragh_12.17

sa visṛṣṭas tathety uktvā bhrātrā naivāviśat purīm 
nandigrāmagatas tasya rājyaṃ nyāsam ivābhunak // Ragh_12.18

dṛḍhabhaktir iti jyeṣṭhe rājyatṛṣṇāparāṅmukhaḥ 
mātuḥ pāpasya śuddhyarthaṃ prāyaścittam ivākarot // Ragh_12.19

rāmo 'pi saha vaidehyā vane vanyena vartayan 
cacāra sānujaḥ śānto vṛddhekṣvākuvrataṃ yuvā // Ragh_12.20

prabhāvastambhitacchāyam āśritaḥ sa vanaspatim 
kadācid aṅke sītāyāḥ śiśye kiṃcid iva śramāt // Ragh_12.21

aindriḥ kila nakhais tasyā vidadāra stanau dvijaḥ 
priyopabhogacihneṣu paurobhāgyam ivācaran // Ragh_12.22

mṛgamāṃsaṃ tataḥ sītāṃ rakṣantīm ātape dhṛtam 
pakṣatuṇḍanakhāghātair babādhe vāyaso balāt // Ragh_12.22*

tasminn āsthad iṣīkāstraṃ rāmo rāmāvabhodhitaḥ 
ātmānaṃ mumuce tasmād ekanetravyayena saḥ // Ragh_12.23

rāmas tv āsannadeśatvād bharatāgamanaṃ punaḥ 
āśaṅkyotsukasāraṅgāṃ citrakūṭasthalīṃ jahau // Ragh_12.24

prayayāv ātitheyeṣu vasann ṛṣikuleṣu saḥ 
dakṣiṇāṃ diśam ṛkṣeṣu vārṣikeṣv iva bhāskaraḥ // Ragh_12.25

babhau tam anugacchantī videhādhipateḥ sutā 
pratiṣiddhāpi kaikeyyā lakṣmīr iva guṇonmukhī // Ragh_12.26

anusūyātisṛṣṭena puṇyagandhena kānanam 
sā cakārāṅgarāgeṇa puṣpoccalita ṣaṭpadam // Ragh_12.27

saṃdhyābhrakapiṣas tatra virādho nāma rākṣasaḥ 
atiṣṭhan mārgam āvṛtya rāmasyendor iva grahaḥ // Ragh_12.28

sa jaharā tayor madhye maithilīṃ lokaśoṣaṇaḥ 
nabhonabhasyayor vṛṣṭim avagraha ivāntare // Ragh_12.29

taṃ viniṣpiṣya kākutsthau purā dūṣayati shtalīm 
gandhenāśucinā ceti vasudhāyāṃ nicakhnatuḥ // Ragh_12.30

pañcavaṭyāṃ tato rāmaḥ śāsanāt kumbhajanmanaḥ 
anapoṣhasthitis tasthau vindhyādriḥ prakṛtāv iva // Ragh_12.31

rāvaṇāvarajā tatra rāghavaṃ madanāturā 
abhipede nidāghārtā vyālīva malayadrumam // Ragh_12.32

sā sītāsaṃnidhāv eva taṃ vavre kathitānvayā 
atyārūḍho hi nārīṇām akālajño maobhavaḥ // Ragh_12.33

kalatravān ahaṃ bāle kanīyāṃsaṃ bhajasva me 
iti rāmo vṛṣasyantīṃ vṛṣaskandhaḥ śaśāsa tām // Ragh_12.34

jyeṣṭhābhigamanāt pūrvaṃ tenāpy anabhinanditā 
sābhūd rāmāśrayā bhūyo nadīvobhayakūlabhāk // Ragh_12.35

saṃrambhaṃ maithilīhāsaḥ kṣaṇaṃ saumyāṃ nināya tām 
nivātastimitāṃ velāṃ candrodaya ivodadheḥ // Ragh_12.36

phalam asyopahāsasya sadyaḥ prāpsyasi paśya mām 
mṛgyaḥ paribhavo vyāghryām ity avehi tvayā kṛtam // Ragh_12.37

ity uktvā maithilīṃ bhartur aṅke nirviśatīṃ bhayāt 
rūpaṃ śūrpaṇakhā-nāmnaḥ sadṛśaṃ pratyapadyata // Ragh_12.38

lakṣmaṇaḥ prathamaṃ śrutvā kokilāmañjubhāṣiṇīm 
śivāghorasvanāṃ paścād bubudhe vikṛteti tām // Ragh_12.39

parṇaśālām atha kṣipraṃ vidhṛtāsiḥ praviśya saḥ 
vairūpyapaunaruktyena bhīṣaṇāṃ tām ayojayat // Ragh_12.40

sā vakranakhadhāriṇyā veṇukarkaśaparvayā 
aṅkuśākārayāṅgulyā tāv atarjayad ambare // Ragh_12.41

prāpya cāśu jansthānaṃ kharādibhyas tathāvidham 
rāmopakramam ācakhyau rakṣaḥparibhavaṃ navam // Ragh_12.42

mukhāvayavalūṇāṃ tāṃ nairṛtā yat purodadhuḥ 
rāmābhiyāyināṃ teṣāṃ tad evābhūd amaṅgalam // Ragh_12.43

udāyudhān āpatatas tān dṛptān prekṣya rāghavaḥ 
nidadhe vijayāśaṃsāṃ cāpe sītāṃ ca lakṣmaṇe // Ragh_12.44

eko dāśarathī rāmo yātudhānāḥ sahasraśaḥ 
te tu yāvanta evājau tāvāṃś ca dadṛśe sa taiḥ // Ragh_12.45

asajjanena kākutsthaḥ prayuktam atha dūṣaṇam 
na cakṣame śubhācāraḥ sa dūṣaṇam ivātmanaḥ // Ragh_12.46

taṃ śaraiḥ pratijagrāha kharatiśirasau ca saḥ 
khramaśas te punas tasya cāpāt samam ivodyayuḥ // Ragh_12.47

tais trayāṇāṃ śitair bāṇair yathāpūrvaviśuddhibhiḥ 
āyur dehātigaiḥ pītaṃ rudhiraṃ tu patatribhiḥ // Ragh_12.48

tasmin rāmaśarotkṛtte bale mahati rakṣasām 
utthitaṃ dadṛśe 'nyac ca kabandhebhyo na kiṃcana // Ragh_12.49

sā bāṇavarṣiṇaṃ rāmaṃ yodhayitvā suradviṣām 
aprabodhāya suṣvāpa gṛdhracchāye varūthinī // Ragh_12.50

rāghavāstravidīrṇānāṃ rāvaṇaṃ prati rakṣasām 
teṣāṃ śūrpaṇakhaivaikā duṣpratvṛttiharābhavat // Ragh_12.51

nigrahāt svasur āptānāṃ vadhāc ca dhanadānujaḥ 
rāmeṇa nihataṃ mene padaṃ daśasu mūrdhasu // Ragh_12.52

rakṣasā mṛgarūpeṇa vañcayitvā sa rāghavau 
jaharā sītāṃ pakṣīndra-prayāsakṣaṇavighnitaḥ // Ragh_12.53

tau sītānveṣiṇau gṛdhraṃ lūnapakṣam apaśyatām 
prāṇair daśarathaprīter anṛṇaṃ kaṇṭhavartibhiḥ // Ragh_12.54

sa rāvaṇahṛtāṃ tābhyāṃ vacasācaṣṭa maithilīm 
ātmanaḥ sumahat karma vraṇair āvedya saṃsthitaḥ // Ragh_12.55

tayos rāvaṇahṛtāṃ tābhyāṃ pitṛvyāpattiśokayoḥ 
pitarīvāgnisaṃskārāt parā vavṛtire kriyāḥ // Ragh_12.56

vadhanirdhūtaśāpasya kabandhasyopadeśataḥ 
mumūrcha sakhyaṃ rāmasya samānavyasane harau // Ragh_12.57

sa hatvā vālinaṃ vīras tatpade cirakāṅkṣite 
dhātoḥ sthāna ivādeśaṃ sugrīvaṃ saṃnyaveśayat // Ragh_12.58

itas tataś ca vaidehīm anveṣṭuṃ bhartṛcoditāḥ 
kapayaś cerur ārtasya rāmasyeva manorathāḥ // Ragh_12.59

pravṛttāv upalabdhāyāṃ tasyāḥ saṃpātidarśanāt 
mārutiḥ sāgaraṃ tīrṇaḥ saṃsāram iva nirmamaḥ // Ragh_12.60

dṛṣṭā vicinvatā tena laṅkāyāṃ rākṣasīvṛtā 
jānakī viṣavallībhiḥ parīteva mahauṣadhiḥ // Ragh_12.61

tasyai bhartur abhijñāmam aṅgulīyaṃ dadau kapiḥ 
pratyudgatam ivānuṣṇais tadānandāśrubhindubhiḥ // Ragh_12.62

nirvāpya priyasaṃdeśaiḥ sītām akṣavadhoddhataḥ 
sa dadāha purīṃ laṅkāṃ kṣaṇasoḍhārinigrahaḥ // Ragh_12.63

pratyabhijñānaratnaṃ ca rāmāyādarśayat kṛtī 
hṛdayaṃ svayam āyātaṃ vaidehyā iva mūrtimat // Ragh_12.64

sa prāpa hṛdayanyasta-maṇiparśanimīlitaḥ 
apayodharasaṃsargaṃ priyāliṅgananirvṛtim // Ragh_12.65

śrutvā rāmaḥ priyodantaṃ mene tatsaṃgamotsukaḥ 
mahārṇavaparikṣepaṃ laṅkāyāḥ parikhālaghum // Ragh_12.66

sa pratasthe 'rināśāya harisainyair anudrutaḥ 
na kevalaṃ dharā-pṛṣṭhe vyomni saṃbādhavartibhiḥ // Ragh_12.67

nirviṣṭam udadheḥ kūle taṃ prapede vibhīṣaṇaḥ 
snehād rākṣasalakṣmyeva buddhim ādiśya coditaḥ // Ragh_12.68

tasmai niśācaraiśvaryaṃ pratiśuśrāva rāghavaḥ 
kāle khalu samārabdhāḥ phalaṃ badhnanti nītayaḥ // Ragh_12.69

sa setuṃ bandhayām āsa plavagair lavaṇāmbhasi 
rasātalād ivonmagnaṃ śeṣaṃ svapnāya śārṅgiṇaḥ // Ragh_12.70

tenottīrya pathā laṅkāṃ rodhayām āsa piṅgalaiḥ 
dvitīyaṃ hemaprākāraṃ kurvadbhir iva vānaraiḥ // Ragh_12.71

raṇaḥ pravavṛte tatra bhīmaḥ plavagarakṣasām 
digvijṛmbhitakākutstha-paulastyajayaghoṣaṇaḥ // Ragh_12.72

pādapāviddhaparighaḥ śilāniṣpiṣṭamudgaraḥ 
atiśastranakhanyāsaḥ śailarugṇa mataṅgajaḥ // Ragh_12.73

atha rāmaśiraścheda-darśanodbhrāntacetanām 
sītāṃ māyeti śaṃsantī trijaṭā samajīvayat // Ragh_12.74

kāmaṃ jīvati me nātha iti sā vijahau śucam 
prāṅ matvā satyam asyāntaṃ jīvitāsmīti lajjitā // Ragh_12.75

garuḍāpātaviśliṣṭa- -meghanādāstrabandhanaḥ 
dāśarathyoḥ kṣaṇakleśaḥ svapnavṛtta ivābhavat // Ragh_12.76

tato bibheda paulastyaḥ śaktyā vakṣasi lakṣmaṇam 
rāmas tv anāhato 'py āsīd vidīrṇahṛdayaḥ śucā // Ragh_12.77

sa mārutisamānīta-mahauṣadhihatavyathaḥ 
laṅkāstrīṇāṃ punaś cakre vilāpācāryakaṃ śaraiḥ // Ragh_12.78

sa nādaṃ meghanādasya dhanuś cendrāyudhaprabham 
meghasyeva śaratkālo na kiṃcit paryaśeṣayat // Ragh_12.79

kleśena mahatā nidrāṃ tyājitaṃ raṇadurjayam 
rāvaṇaḥ preṣayām āsa yuddhāyānujam ātmanaḥ // Ragh_12.79a

jaghāna sa tadādeśāt kapīn ugrān anekaśaḥ 
viveśa ca purīṃ laṅkāṃ samādāya harīśvaram // Ragh_12.79b

kumbhakarṇaḥ kapīndreṇa tulyāvasthaḥ svasuḥ kṛtaḥ 
rurodha rāmaṃ śṛṅgīva ṭaṅkacchinnamanaḥśilaḥ // Ragh_12.80

akāle bodhito bhrātrā priyasvapno vṛthā bhavān 
rāmeṣubhir itīvāsau dīrghanidrāṃ praveśitaḥ // Ragh_12.81

itarāṇy api rakṣāṃsi petur vānarakoṭiṣu 
rajāṃsi samarotthāni racchoṇitanandīṣv iva // Ragh_12.82

niryayāv atha paulasthyaḥ punar yuddhāya mandirāt 
arāvaṇam arāmaṃ vā jagad adyeti niścitaḥ // Ragh_12.83

rāmaṃ padātim ālokya laṅkeṣaṃ ca varūthinam 
hariyugyaṃ rathaṃ tasmai parjighāya puraṃdaraḥ // Ragh_12.84

tam ādhūtadvajapaṭaṃ vyomagaṅgormivāyubhiḥ 
devasūtabhujālambī jaitram adhyāsta rāghavaḥ // Ragh_12.85

mātalis tasya māhendram āmumoca tanucchadam 
yatrotpaladadalaklaibyam astrāṇy āpuḥ suradviṣām // Ragh_12.86

anyonyadarśanaprāpta-vikramāvasaraṃ cirāt 
rāmarāvaṇayor yuddhaṃ caritārtham ivābhavat // Ragh_12.87

bhujamūrdhorubāhulyād eko 'pi dhandānujaḥ 
dadṛśe so 'yathāpūrvo mātṛvaṃśa iva sthitaḥ // Ragh_12.88

jetāraṃ lokapālānāṃ svamukhair arciteśvaram 
rāmas tulitakailāsam arātiṃ bahv amanyata // Ragh_12.89

tasya sphurati paulastyah sītāsaṃgamaśaṃsini 
nicakhānādhikakrodhaḥ śaraṃ savyetare bhuje // Ragh_12.90

rāvaṇasyāpi rāmāsto bhittvā hṛdayam āśugaḥ 
viveśa bhuvam ākhyātum uragebhya iva priyam // Ragh_12.91

vacasaiva tayor vākyam astram astreṇa nighnatoḥ 
anyonyajayasaṃrambho vavṛdhe vādinor iva // Ragh_12.92

vikramavyatihāreṇa astram astreṇa nighnatoḥ 
jayaśrīr antarā vedir mattavāraṇayor iva // Ragh_12.93

kṛtapratikṛtaprītais tayor muktāṃ surāsuraiḥ 
parasparaṃ śaravrātāḥ puṣpavṛṣṭiṃ na sehire // Ragh_12.94

ayaḥśaṅkucitāṃ rakṣaḥ śataghnīm atha śatrave 
hṛtāṃ vaivasvatasyeva kūṭaśālmalim akṣipat // Ragh_12.95

rāghavo ratham aprāptāṃ tām āśāṃ ca suradviṣām 
ardhacandramukhair bāṇaiś ciccheda kadalīsukham // Ragh_12.96

amoghaṃ saṃdadhe cāsmai dhanuṣy akeadhnurdharaḥ 
brāhmam astraṃ priyāśoka-śalyaniṣkarṣaṇauṣadham // Ragh_12.97

tad vyomni daśadhā bhinnaṃ dadṛśe dīptimanmukham 
vapur mahoragasyeva karālaphaṇamaṇḍalam // Ragh_12.98

tena mantraprayuktena nimeṣārdhād apātayat 
sa rāvaṇaśiraḥpaṅktim ajñātavraṇavedanām // Ragh_12.99

bālārkapratimevāpsu vīcibhinnā patiṣyataḥ 
rarāja rakṣaḥkāyasya kaṇṭhacchedapraṃparā // Ragh_12.100

marutāṃ paśyatāṃ tasya śirāṃsi patitāny api 
mano nātiviśaśvāsa punaḥ saṃdhānaśaṅkinām // Ragh_12.101

atha madagurupakṣair lokapāladvipānām anugatam alivṛndair gaṇḍabhittīr vihāya 
upanatamaṇibandhe mūrdhni paulastyaśatroḥ surabhi suravimuktaṃ puṣpavarṣaṃ papāta // Ragh_12.102

yantā hareḥ sapadi saṃhṛtakārmukajyam āpṛcchya rāghavam anuṣṭhitadevakāryam 
nāmāṅkarāvaṇaśarāṅkitaketuyaṣṭim ūrdhvaṃ rathaṃ harisahasrayujaṃ nināya // Ragh_12.103

raghupatir api jātavedoviśuddhāṃ pragṛhya priyāṃ priyasuhṛdi vibhīṣaṇe saṃgamayya śriyaṃ vairiṇaḥ 
ravisutasahitena tenānuyātaḥ sasaumitriṇā bhujavijitavimānaratnādhirūḍhaḥ pratasthe purīm // Ragh_12.104

athāmanaḥ śabdaguṇaṃ guṇajñaḥ padaṃ vimānena vigāhamānaḥ 
ratnākaraṃ vīkṣya mithaḥ sa jāyāṃ rāmābhidhāno harir ity uvāca // Ragh_13.1

vaidehi paśy'; ā malayād vibhaktaṃ matsetunā phenilam amburāśim 
chāyāpatheneva śaratprasannam ākāśam āviṣkṛtacārutāram // Ragh_13.2

guror yiyakṣoḥ kapilena medhye rasātalaṃ saṃkramite turaṃge 
tadartham urvīm avadārayadbhiḥ pūrvaiḥ kilāyaṃ parivardhito naḥ // Ragh_13.3

garbhaṃ dadhaty arkamarīcayo 'smād vivṛddhim atrāśnuvate vasūni 
abindhanaṃ vahnim asau bibharti prahlādanaṃ jyotir ajany anena // Ragh_13.4

tāṃ tām avasthāṃ pratipadyamānaṃ sthitaṃ daśa vyāpya diśo mahimnā 
viṣṇor ivāsyānavadhāraṇīyam īdṛktayā rūpam iyattayā vā // Ragh_13.5

nābhiprarūḍhāmburuhāsanena saṃstūyamānaḥ prathamena dhātrā 
amuṃ yugāntocitayogandiraḥ saṃhṛtya lokān puruṣo 'dhiśete // Ragh_13.6

pakṣacchidā gotrabhidāttagandhāḥ śaraṇyam enaṃ śataśo mahīdhrāḥ 
nṛpā ivopaplavinaḥ parebhyo dharmottaraṃ madhyamam āśrayante // Ragh_13.7

rasātalād ādibhavena puṃsā bhuvaḥ prayuktodvahanakriyāyāḥ 
asyāccham ambhaḥ pralayapravṛddhaṃ muhūrtavaktrāvaraṇaṃ babhūva // Ragh_13.8

mukhārpaṇeṣu prakṛtipragalbhāḥ svayaṃ taraṅgādharadānadakṣaḥ 
ananyasāmānyakalatravṛttiḥ pibaty asau pāyayate ca sindhūḥ // Ragh_13.9

sasattvam ādāya nadīmukhāmbhaḥ saṃmīlayanto vivṛtānanatvāt 
amī śirobhis timayaḥ sarandhrair ūrdhvaṃ vitanvanti jalapravāhān // Ragh_13.10

mātaṅganakraiḥ sahasotpatadbhir bhinnān dvidhā paśya samudraphenān 
kapolasaṃsarpitayā ya eṣāṃ vrajanti karṇa kṣaṇacāmaratvam // Ragh_13.11

velānilāya prasṛtā bhujaṃgā mahormivisphūrjathunirviśeṣāḥ 
sūryāṃśusaṃparkasamṛddharāgair vyajyanta ete maṇibhiḥ phaṇasthaiḥ // Ragh_13.12

tavādharasparadhiṣu vidrumeṣu paryastam etat sahasormivegāt 
ūrdhvāṅkuraprotamukhaṃ kathaṃcit kleśad apakrāmati śaṅkhayūtham // Ragh_13.13

pravṛttamātreṇa payāṃsi pātum āvartavegād bhramatā ghanena 
ābhāti bhūyiṣṭham ayaṃ samudraḥ pramathyamāno giriṇeva bhūyaḥ // Ragh_13.14

dūrād ayaścakranibhasya tanvī tamālatālīvanarājinīlā 
ābhāti velā lavaṇāmburāśer dhārānibaddheva kalaṅkalekhā // Ragh_13.15

velānilaḥ ketakareṇubhis te saṃbhāvayaty ānanam āyatākṣi 
mām akṣamaṃ maṇḍanakālahāner vettīva bimbādharabaddhatṛṣṇam // Ragh_13.16

ete vayaṃ saikatabhinnaśukti-paryastamuktāpaṭalaṃ payodheḥ 
prāptā muhūrtena vimānavegāt kūlaṃ phalāvarjitapūgamālam // Ragh_13.17

kuruṣva tāvat karabhoru paścān-mārge mṛgaprekṣiṇi dṛṣtipātam 
eṣā vidūrībhavataḥ samudrāt sakānanā niṣpatatīva bhūmiḥ // Ragh_13.18

kvacit pathā saṃcarate surāṇāṃ kvacid ghanānāṃ patatāṃ kvacic ca 
yathāvidho me manso 'bhilāṣaḥ pravartate paśya tathā vimānam // Ragh_13.19

asau mahendradvipadānagandhī trimārgagāvīcivimardaśītaḥ 
ākāśavāyur dinayauvanotthān ācāmati svedalavān mukhe te // Ragh_13.20

kareṇa vātāyanalambitena spṛṣṭas tvayā caṇḍi kutūhalinyā 
āmuñcatīvābharaṇaṃ dvitīyam udbhinnavidyudvalayo ghanas te // Ragh_13.21

amī janasthānam apoḍhavighnaṃ matvā samārabdhanavoṭajāni 
adhyāsate cīrabhṛto yathāsvaṃ cirojjhitāny āśramamaṇḍalāni // Ragh_13.22

saiṣā sthalī yatra vicinvatā tvāṃ bhraṣṭaṃ mayā nūpuram ekam urvyām 
adṛśyata tvaccaraṇāravinda-viśleṣaduḥkhād iva baddhamaunam // Ragh_13.23

tvaṃ rakṣasā bhīru yato 'panītā taṃ mārgam etāḥ kṛpayā latā me 
adarśayan vaktum aśaknuvatyaḥ śākhābhir āvarjitapallavābhiḥ // Ragh_13.24

mṛgyaś ca darbhāṅkuranirvyapekṣās tavāgatijñaṃ samabodhayan mām 
vyāpārayantyo diśi dakṣiṇasyām utpakṣmarājīni vilocanāni // Ragh_13.25

etad girer mālayavataḥ purastād āvirbhavaty ambarlekhi śṛṅgam 
navaṃ yatra ghanair mayā ca tvadviprayogāśru samaṃ visṛṣṭam // Ragh_13.26

gandhaś ca dhārāhatapalvalānāṃ kādambam ardhodgatakesaraṃ ca 
snigdhāś ca kekāḥ śikhināṃ babhūvur yasmin asahyāni vinā tvayā me // Ragh_13.27

pūrvānubhūtaṃ smaratā ca yatra kampottaraṃ bhīru tavopagūḍham 
guhāvisārīṇy ativāhitāni mayā kathaṃcid ghanagarjitāni // Ragh_13.28

āsārasiktakṣitibāṣpayogān mām akṣiṇod yatra vibhinnakośaiḥ 
viḍambyamānā navakandalais te vivāhadhūmāruṇalocanaśrīḥ // Ragh_13.29

upāntavānīravanopagūdhāny ālakṣyapāriplavasārasāni 
dūrāvatīrṇā pibatīva khedād amūni pampāsalilāni dṛṣṭiḥ // Ragh_13.30

atrāviyuktāni rathāṅganāmnām anyonyadattotpalakesarāṇi 
dvandvāni dūrāntaravartinā te mayā priye saspṛham īkṣitāni // Ragh_13.31

imāṃ tatāśokalatāṃ ca tanvīṃ stanābhirāmastabakābhinamrām 
tvatprāptibuddhyā pariripsamānaḥ saumitriṇā sāsram ahaṃ niṣiddhaḥ // Ragh_13.32

amūr vimānāntaralambinīnāṃ śrutvā svanaṃ kāñcanakiṅkiṇīnām 
pratyudvrajantīva kham utpatantyo godāvarīsārasapaṅktayas tvām // Ragh_13.33

eṣā tvayā peśalamadhyayāpi ghaṭāmbusaṃvardhitabālacūtā 
āhlādayaty unmukhakṛṣṇasārā dṛṣṭa cirāt pañcavaṭī mano me // Ragh_13.34

atrānugodaṃ mṛgayānivṛttas taraṅgavātema vinītakhedaḥ 
rahas tvadutsaṅganiṣaṇṇamūrdhā smarāmi vānīragṛheṣu suptaḥ // Ragh_13.35

bhrūbheda mātreṇa padān maghonaḥ prabhraṃśayāṃ yo nahuṣaṃ cakāra 
tasyāvilāmbhaḥpariśuddhihetor bhaumo muneḥ sthānaparigraho 'yam // Ragh_13.36

tretāgnidhūmāgram anindyakīrtes tasyedam ākrāntavimānamārgam 
ghrātvā havirgandhi rajovimuktaḥ samaśnute me laghimānam ātmā // Ragh_13.37

etan muner mānini śātakarṇeḥ pañcāpsaro nāma vihāravāri 
ābhāti paryantavanaṃ vidūrān meghāntarālakṣyam ivendubimbam // Ragh_13.38

purā sa darbhāṅkuramātravṛttiś caran mṛgaiḥ sārdham ṛṣir maghonā 
samādhibhītena kilopanītaḥ pañcāpsaroyauvanakūṭabhandham // Ragh_13.39

tasyāyam antarhitasaudhabhājaḥ prasaktasaṃgītamṛdaṅgaghoṣaḥ 
viyadgataḥ puṣpakacandraśālāḥ kṣaṇaṃ pratiṣrunmukharāḥ karoti // Ragh_13.40

havirbhujām edhavatāṃ caturṇāṃ madhye lalāṭaṃtapasaptasaptiḥ 
asau tapasyaty aparas tapasvī nāmnā sutīkṣṇaś caritena dāntaḥ // Ragh_13.41

amuṃ sahāsaprahitekṣaṇāni vyājārdhasaṃdarśitamekhalāni 
nālaṃ vikartuṃ janitendraśaṅkaṃ surāṅganāvibhramaceṣṭitāni // Ragh_13.42

eṣo 'kṣamālāvalayaṃ mṛgāṇāṃ kaṇḍūyitāraṃ kuśasūcilāvam 
sabhājane me bhujam ūrdhvabāhuḥ savyetaraṃ prādhvam itaḥ prayuṅkte // Ragh_13.43

vācaṃyamatvāt praṇatiṃ mamaiṣa kampena kiṃcit pratigṛhya mūrdhnaḥ 
dṛṣṭiṃ vimānavyavadhānamuktāṃ punaḥ sahasrāciṣi saṃnidhatte // Ragh_13.44

adaḥ śaraṇyaṃ śarabhaṅganāmnas tapovanaṃ pāvanam āhitāgneḥ 
cirāya saṃtarpya samidhir agniṃ yo mantrapūtāṃ tanum apy ahauṣīt // Ragh_13.45

chāyāvinītādhvapariśrameṣu bhūyiṣṭhasaṃbhāvyaphaleṣv amīṣu 
tasyātithīnām adhunā saparyā sthitā suputreṣv iva pādapeṣu // Ragh_13.46

dhārāsvanodgāridarīmukho 'sau śṛṅgāgralagnāmbudavaprapaṅkaḥ 
badhnāti me bandhuragātri cakṣur dṛptaḥ kakudmān iva citrakūṭaḥ // Ragh_13.47

eṣā prasannastimitapravāhā sarid vidūrāntarabhāvatanvī 
mandākinī bhāti nagopakaṇṭhe muktāvalī kaṇṭhagateva bhūmeḥ // Ragh_13.48

ayaṃ sujāto 'nugiraṃ tamālaḥ pravālam ādāya sugandhi yasya 
karṇārpiten' t ākaravaṃ kapolam apārthyakālāgurupattralekham v // Ragh_13.49

anigrahatrāsavinītasattvam apuṣpaliṅgāt phalabandhivṛkṣam 
vanaṃ tapaḥsādhanam etad atrer āviṣkṛtodagrataraprabhāvam // Ragh_13.50

atrābhiṣekāya tapodhanānāṃ saptarśihastoddhṛtahemapadmām 
pravartayām āsa kil'; ānusūyā trisrotasaṃ tryambakamaulimālām // Ragh_13.51

vīrāsanair dhyānajuṣām ṛṣīnām amī samādhyāsitavedimadhyāḥ 
nivātaniṣkampatayā vibhānti yogādhirūḍhā iva śākhino 'pi // Ragh_13.52

tvayā purastād upayācito yaḥ so 'yaṃ vaṭaḥ śyāma iti pratītaḥ 
rāśir maṇīnām iva gāruḍānāṃ sapadmarāgaḥ phalito vibhāti // Ragh_13.53

kvacit prabhā cāndramasī tamobhiś muktāmayī yaṣṭir ivānuviddhā 
anyatra mālā sitapaṅkajānām indīvarair utkhacitāntareva // Ragh_13.54

kvacit khagānāṃ priyamānasānāṃ kādambasaṃsargavatīva 
anyatra śubhrā śaradabhralekhā bhaktir bhuvaś candanakalpiteva // Ragh_13.55

kvacit prabhā cāndramasī tamobhiś chāyāvilīnaiḥ śabalīkṛteva 
anyatra śubhrā śaradabhralekhā randhreṣv ivālakṣyanabhaḥpradeśā // Ragh_13.56

kvacic ca kṛṣṇoragabhūṣaṇeva bhasmāṅgarāgā tanur īśvarasya 
paśyānavadyāṅgi vibhāti gaṅgā bhinnapravāhā yamunātaraṅgaiḥ // Ragh_13.57

tamisrayā śubhraniśeva bhinnā kundasrag indīvaramālayeva 
kṛttir hareḥ kṛṣṇamṛgatvaceva bhūtiḥ smarārer iva kaṇṭhabhāsā // Ragh_13.57a

dṛśyārdhayā śāradameghalekhā nirdhūtanistriṃśarucā viśeva 
gavākṣakālāgurudhūmarājyā harmyasthalīlepasudhā naveva // Ragh_13.57b

tuṣārasaṃghātaśilā himādrer jātyāñjanaprastaraśobhayeva 
patatriṇāṃ manasagocarāṇāṃ t śreṇīva kādambavihaṃgapaṅktyā // Ragh_13.57c

nitāntaśuddhasphuṭikāśayogād vaiḍūryakāntyā raśanāvalīva 
gaṅgā raver ātmajayā sametā puṣpyaty udāraṃ parabhāgalekhā // Ragh_13.57d

samudrapatnyor jalasaṃnipāte pūtātmanām atra kilābhiṣekāt 
tattvāvabodhena vināpi bhūyas tanutyajāṃ nāsti śarīrabandhaḥ // Ragh_13.58

puraṃ niṣādādhipater idaṃ tad yasmin mayā maulimaṇiṃ vihāya 
jaṭāsu baddhāsv arudat sumantraḥ kaikeyi kāmāḥ phalitās taveti // Ragh_13.59

payodharaiḥ puṇyajanāṅganānāṃ nirviṣṭahemāmbujareṇu yasyāḥ 
brāhmaṃ saraḥ kāraṇam āptavāco buddher ivāvyaktam udāharanti // Ragh_13.60

jalāni yā tīranikhātayūpā vahaty ayodhyām anu rājadhānīm 
turaṃgamedhāvabhṛtavatīrṇair ikṣvākubhiḥ puṇyatarīkṛtāni // Ragh_13.61

yāṃ saikatotsaṅgasukhocitānāṃ prājyaiḥ payobhiḥ parivardhitānām 
sāmānyadhātrīm iva mānasaṃ me saṃbhāvayaty uttarakosalānām // Ragh_13.62

seyaṃ madīyā jananīva tena mānyena rājñā sarayūr viyuktā 
dūre vasantaṃ śiśirānilair māṃ taraṅgahastair upagūhatīva // Ragh_13.63

viraktasaṃdhyākapiśaṃ purastād yato rajaḥ pārthivam ujjihīte 
śaṅke hanūmatkathitapravṛttiḥ pratyudgato māṃ bharataḥ sasainyaḥ // Ragh_13.64

addhā śriyaṃ pālitasaṃgarāya pratyarpayiṣyaty anaghāṃ sa sādhuḥ 
hatvā nivṛttāya mṛdhe kharādīn saṃrakṣitāṃ tvām iva lakṣmaṇo me // Ragh_13.65

asau puraskṛtya guruṃ padātiḥ paścādavasthāpitavāhinīkaḥ 
vṛddhair amātyaiḥ saha cīravāsā mām arghyapāṇir bharato 'bhyupaiti // Ragh_13.66

pitrā nisṛṣṭāṃ madapekṣayā yaḥ śriyaṃ yuvāpy aṅkagatām abhoktā 
iyanti varṣāṇi tayā sahogram abhyasyatīva vratam āsidhāram // Ragh_13.67

etāvad uktavati dāśarathau tadīyām icchāṃ vimānam adhidevatayā viditvā 
dyotiṣpathād avatatāra savismayābhir udvīkṣitaṃ prakṛtibhir bharatānugābhiḥ // Ragh_13.68

tasmāt puraḥsaravibhīṣaṇadarśitena sevāvicakṣaṇaharīśvaradattahastaḥ 
yānād avātarad adūramahītalena mārgeṇa bhaṅgiracitasphaṭikena rāmaḥ // Ragh_13.69

ikṣvākuvaṃśagurave prayataḥ praṇamya sa bhrātaraṃ bharatam arghyaparigrahānte 
paryaśrur asvajata mūrdhani copajaghrau tadbhaktyapoḍhapitṛrāhyamahābhiṣeke // Ragh_13.70

śmaśrupravṛddhijanitānanavikriyāṃś ca plakṣān prarohajaṭilān iva mantrivṛddhān 
anvagrahīt praṇamataḥ śubhadṛṣṭipātair vārttānuyogamadhurākṣarayā ca vācā // Ragh_13.71

durjātabandhur ayam ṛkṣaharīśvaro me paulastya eṣa samareṣu puraḥ prahartā 
ity ādṛtena kathitau raghunandanena vyutkramya lakṣmaṇam ubhau bharato vavande // Ragh_13.72

saumitriṇā tadanu saṃsasṛje sa cainam utthāpya namraśirasaṃ bhṛśam āliniṅga 
rūḍhendrajitpraharaṇavraṇakarkaśena kliśyann ivāsya bhujamadhyam uraḥsthalena // Ragh_13.73

rāmājñayā haricamūpatayas tadānīṃ kṛtvā manuṣyavapur āruruhur gajendrān 
teṣu kṣaratsu bahudhā madavāridhārāḥ śailādhirohaṇasukhāny upalebhire te // Ragh_13.74

sānuplavaḥ prabhur api kṣaṇadācarāṇāṃ bheje rathān daśarathaprabhavānuśiṣṭaḥ 
māyāvikalparacitair api ye tadīyair na syandanais tulitakṛtrimabhaktiśobhāḥ // Ragh_13.75

bhūyas tato raghupatir vilasatpatākam adhyāsta kāmagati sāvarajo vimānam 
doṣātanaṃ budhabṛhaspatiyogadṛśyas tārāpatis taralavidyud iv'ābhravṛndam // Ragh_13.76

tatreśvareṇa jagatāṃ pralayād ivorvīṃ varṣātyayena rucam abhraghanād ivendoḥ 
rāmeṇa maithilasutāṃ daśakaṇṭhakṛcchrāt pratyuddhṛtāṃ dhṛtimatīṃ bharato vavande // Ragh_13.77

laṅkeśvarapraṇatibhaṅgadṛḍhavrataṃ tad (?) vandyaṃ yugaṃ caraṇayor janakātmajāyāḥ 
jyeṣṭhānuvṛttijaṭilaṃ ca śiro 'sya sādhor anyonyapāvanam abhūd ubhayaṃ sametya // Ragh_13.78

krośārdhaṃ prakṛtipuraḥsareṇa gatvā kākutsthaḥ stimitajavena puṣpakeṇa 
śatrughnaprativihitopakāryam āryaḥ sāketopavanam udāram adhyuvāsa // Ragh_13.79

uttiṣṭha vatse nanu sānujo 'sau daśāntaraṃ tatra samaṃ prapanne 
apaśyatāṃ dāśarathī jananyau chedād ivopaghnataror vratatyau // Ragh_14.1

ubhāv ubhābhyāṃ praṇatau hatārī yathākramaṃ vikramaśobhinau tau 
vispaṣṭam asrāndhatayā na dṛṣṭau jñātau sutasparśasukhopalambhāt // Ragh_14.2

ānandajaḥ śokajam aśru bāṣpas tayor aśītaṃ śiśiro bibheda 
gaṅgāsarayvor jalam uṣṇatpataṃ himādrinisyanda ivāvatīrṇaḥ // Ragh_14.3

te putrayor nairṛtaśastramārgān ārdrān ivāṅge sadayaṃ spṛśantyau 
apīpsitaṃ kṣatrakulāṅganānāṃ na vīrasūśabdam akāmayetām // Ragh_14.4

kleśāvahā bhartur alakṣaṇāhaṃ sīteti nāma svam udīrayantī 
svargapratiṣṭhasya guror mahiṣyāv abhaktibhedena vadhūr vavande // Ragh_14.5

uttiṣṭha vatse nanu sānujo 'sau vṛttena bhartā śucinā tavaiva 
kṛcchraṃ mahat tīrṇa iti priyārhāṃ tām ūcatus te priyam apy amithyā // Ragh_14.6

athābhiṣekaṃ raghuvaṃśaketoḥ prārabdham ānandajalair jananyoḥ 
nirvartayām āsur amātyavṛddhās tīrthāhṛtaiḥ kāñcanakumbhatoyaiḥ // Ragh_14.7

saritsamudrān sarasīś ca gatvā rakṣaḥkapīndrair upapāditāni 
tasyāpatan mūrdhni jalāni jiṣṇor vindhyasya meghaprabhavā ivāpaḥ // Ragh_14.8

tapasviveṣakriyayāpi tāvad yaḥ prekṣaṇīyaḥ sutarāṃ babhūva 
rājendranepathyavidhānaśobhā rasyoditāsīt punaruktadoṣā // Ragh_14.9

sa maularakṣoharimiśrasainyas tūryasvanānanditapauravargaḥ 
viveṣa saudhodgatalājavarṣām uttoraṇām anvayarājadhānīm // Ragh_14.10

saumitriṇā sāvarajena mandam ādhūtavālavyajano rathasthaḥ 
dhṛtātapatro bharatena sākṣād upāyasaṃghāta iva pravṛddhaḥ // Ragh_14.11

prāsādakālāgurudhūmarājis tasyāḥ puro vāyuvaśena bhinnā 
vanān nivṛttena raghūdvahena muktā svayaṃ veṇir ivābhāse // Ragh_14.12

śvaśrūjanānuṣṭhitacāruveṣāṃ karṇīrathasthāṃ raghuvīrapatnīm 
prāsādavātāyanadṛśyabandhaiḥ sāketanāryo 'ñjalibhiḥ praṇemuḥ // Ragh_14.13

sphuratprabhāmaṇḍalam ānusūyaṃ sā bibhratī śāśvatam aṅgarāgam 
rarāja śuddheti punaḥ svapuryai saṃdarśita vahnigateva bhartrā // Ragh_14.14

veśmāni rāmaḥ paribarhavanti viśrāṇya sauhārdhanidhiḥ suhṛdbyaḥ 
bāṣpāyamāṇo balimanniketam ālekhyaśeṣasya pitur viveśa // Ragh_14.15

kṛtāñjalis tatra yad amba satyān nābhraśyata svargaphalād gurur naḥ 
tac cintyamānaṃ sukṛtaṃ taveti jahāra lajjāṃ bharatasya mātuḥ // Ragh_14.16

tathā ca sugrīvavibhīśaṇādīn upācarat kṛtrimasaṃvidhābhiḥ 
saṃkalpamātroditasiddhayas te krāntā yathā cetasi vismayena // Ragh_14.17

sabhājanāyopagatān sa divyān munīn puraskṛtya hatasya śatroḥ 
śuśrāva tebhyaḥ prabhavādi vṛttaṃ svavikrame gauravam ādadhānam // Ragh_14.18

pratiprayāteṣu tapodhaneṣu sukhād avijñātagatārdhamāsān 
sītāsvahastopahṛtāgryapūjān rakṣaḥkapīndrān visasarja rāmaḥ // Ragh_14.19

tac cātmacintāsulabhaṃ vimānaṃ hṛtaṃ surāreḥ saha jīvitena 
kailāsanāthodvahanāya bhūyaḥ puṣpaṃ divaḥ puṣpakam anvamaṃsta // Ragh_14.20

pitur niyogād vanavāsam evaṃ nistīrya rāmaḥ pratipannarājyaḥ 
dharmārthakāmeṣu samāṃ prapede yathā tathaivāvarajeṣu vṛttim // Ragh_14.21

sarvāsu mātṛṣv api vatsalatvāt sa nirviśeṣapratipattir āsīt 
ṣaḍānanāpītapayodharāsu netā camūnām iva kṛttikāsu // Ragh_14.22

tenārthavāṃl lobhaparāṅmukhena tena ghnatā vighnabhayaṃ kriyāvān 
tenāsa lokaḥ pitṛmān vinetrā tenaiva śokāpanudena putrī // Ragh_14.23

sa paurakāryāṇi samīkṣya kāle reme videhādhipater duhitrā 
upasthitaś cāru vapus tadīyaṃ kṛtvopabhogotsukayeva lakṣmyā // Ragh_14.24

tayor yathāprārthitam indriyārthān āseduṣoḥ sadmasu citravatsu 
prāptāni duḥkhāny api daṇḍakeṣu saṃcintyamānāni sukhāny abhūvan // Ragh_14.25

athādhikasnigdhavilocanena mukhena sītā śarapāṇḍureṇa 
ānandayitrī pariṇetur āsīd anakṣaravyañjitadohadena // Ragh_14.26

tām aṅkam āropya kṛśāṅgayaṣṭiṃ varṇāntarākrāntapayodharāgrām 
vilajjamānāṃ rahasi pratītaḥ prapraccha rāmāṃ ramaṇo 'bhilāṣam // Ragh_14.27

sā daṣṭanīvārabalīnihiṃsraiḥ saṃbaddha vaikhānasakanyakāni 
iyeṣa bhūyaḥ kuśavanti gantuṃ bhāgīrathītīratapovanāni // Ragh_14.28

tasyai pratiśrutya raghupravīras tad (?) īpsitaṃ pārśvacarānuyātaḥ 
ālokayiṣyan muditām ayodhyāṃ prāsādam abhraṃliham āruroha // Ragh_14.29

ṛddhāpaṇaṃ rājapathaṃ sa paśyan vigāhyamānāṃ sarayūṃ ca naubhiḥ 
vilāsibhiś cādhyuṣitāni pauraiḥ puropakaṇṭhopavanāni reme // Ragh_14.30

sa kiṃvadantīṃ vadatāṃ purogaḥ svaṛttam uddiśya viśuddhavṛttaḥ 
sarpādhirājorubhujo 'pasarpaṃ papraccha bhadraṃ vijitāribhadraḥ // Ragh_14.31

nirbandhapṛṣṭaḥ sa jagāda sarvaṃ stuvanti paurāś caritaṃ tvadīyam 
anyatra rakṣobhavanoṣitāyāḥ parigrahān mānavadeva devyāḥ // Ragh_14.32

kalatranindāguruṇā kilaivam abhyāhataṃ kīrtiviparyayeṇa 
ayoghanenāya ivābhitaptaṃ vaidehibandhor hṛdayaṃ vidadre // Ragh_14.33

kim ātmanirvādakathām upekṣe jāyām adoṣām uta saṃtyajāmi 
ity ekapakṣāśrayaviklavatvād āsīt sa dolācalacittavṛttiḥ // Ragh_14.34

niścitya cānanyanivṛtti vācyaṃ tyāgena patnyāḥ parimārṣṭum aicchat 
api svadehāt kim utendriyārthād yaśodhanānāṃ hi yaśo garīyaḥ // Ragh_14.35

sa saṃnipātyāvarajān hataujās tadvikriyādarśanaluptaharṣān 
kaulīnam ātmāśrayam ācacakṣe tebhyaḥ punaś cedam uvāca vākyam // Ragh_14.36

rājarṣivaṃśasya raviprasūter upasthitaḥ paśyata kīdṛśo 'yam 
mattaḥ sadācāraśuceḥ kalaṅkaḥ payodavātād iva darpaṇasya // Ragh_14.37

paureṣu so 'haṃ vahulībhavantam apāṃ taraṅgeṣv iva tailabindum 
soḍhuṃ na tatpūrvam avarṇam īśe ālānikaṃ sthāṇum iva dviependraḥ // Ragh_14.38

tasyāpanodāya phalapravṛttāv upasthitāyām api nirvyapekṣaḥ 
tyakṣyāmi vaidehasutāṃ purastāt samudranemiṃ pitur ājñayeva // Ragh_14.39

avaimi cainām anagheti kiṃ tu lokāpavādo balavān mato me 
chāyā hi bhūmeḥ śaśino malatven- -āropitā śuddhimataḥ prajābhiḥ // Ragh_14.40

rakṣovadhānto na ca me prayāso vyarthaḥ sa vairapratimocanāya 
amarṣaṇaḥ śoṇitakāṅkṣayā kiṃ padā spṛśantaṃ daśati dvijihvaḥ // Ragh_14.41

tad eṣa sargaḥ karuṇārdracittair na me bhavadbhiḥ pratiṣedhanīyaḥ 
yady arthitā nirhṛtavācyaśalyān prāṇān mayā dhārayituṃ ciraṃ vaḥ // Ragh_14.42

ity uktavantaṃ janakātmajāyāṃ nitāntarūkṣābhiniveśam īśam 
na kaścana bhrātṛṣu teṣu śakto niṣeddhum āsīd anuvartituṃ vā // Ragh_14.43

sa lakṣmaṇaṃ lakṣmaṇapūrvajanmā vilokya lokatrayagītakīrtiḥ 
saumyeti cābhāṣya yathārthabhāṣī sthitaṃ nideśe pṛthag ādideśa // Ragh_14.44

prajāvatī dohadaśaṃsinī te tapovaneṣu spṛhayālur eva 
saumyeti cābhāṣya yathārthabhāṣī prāpayya vālmīkipadaṃ tyajainām // Ragh_14.45

sa śuśruvān mātari bhārgaveṇa pitur niyogāt prahṛtam dviṣadvat 
pratyagrahīd agrajaśāsanaṃ tad ājñā gurūṇāṃ hy avicāraṇīyā // Ragh_14.46

athānukūlaśravaṇapratītām atrasnubhir yuktadhuraṃ turaṃgaiḥ 
rathaṃ sumantra pratipannaraśmim āropya vaidehasutāṃ pratasthe // Ragh_14.47

sā nīyamānā rucirān pradeśān priyaṃkaro me priya ity anandat 
nābuddha kalpadrumatāṃ vihāya jātaṃ tam ātmany asipattravṛkṣam // Ragh_14.48

jugūha tasyāḥ pathi lakṣmaṇo yat savyetareṇa sphuratā tad akṣṇā 
ākhyātam asyai guru bhāvi duḥkham atyantaluptapriyadarśanena // Ragh_14.49

sā durnimittopagatād viṣādāt sadyaḥ parimlānamukhāravindā 
rājñaḥ śivaṃ sāvarajasya bhūyād ity āśaśaṃse karaṇair abāhyaiḥ // Ragh_14.50

guror niyogād vanitāṃ vanānte sādhvīṃ sumitrātanayo vihāsyan 
avāryatevotthitavīcihastair jahnor duhitrā shitayā purastāt // Ragh_14.51

rathāt sa yantrā nigṛhītavāhāt tāṃ bhrātṛhyāyāṃ puline 'vatārya 
gaṅgāṃ niṣādāhṛtanauviśeṣas tatāra saṃdhām iva satyasaṃdhaḥ // Ragh_14.52

atha vyavasthāpitavāk kathaṃcit saumitrir antargatabāṣpakaṇṭhaḥ 
autpātiko megha ivāśmavarṣaṃ mahīpateḥ śāsanam ujjagāra // Ragh_14.53

tato 'bhiṣaṅgānilavipraviddhā prabhraśyamānābharaṇasprasūnā 
svamūrtilābhaprakṛtiṃ dharitrīṃ lateva sītā sahasā jagāma // Ragh_14.54

ikṣvākuvaṃśaprabhavaḥ kathaṃ tvāṃ tyajed akasmāt patir āryavṛttaḥ 
iti kṣitiḥ saṃśayiteva tasyai dadau praveśaṃ jananī na tāvat // Ragh_14.55

sā luptasaṃjñā na viveda duḥkhaṃ pratyāgatāsuḥ samatapyatāntaḥ 
tasyāḥ sumitrātmajayatnalabdho mohād abhūt kaṣṭataraḥ prabodhaḥ // Ragh_14.56

na cāvadad bhartur avarṇam āryā nirākariṣṇor vṛjinād ṛte 'pi 
ātmānam eva sthiraduḥkhabājaṃ punaḥ punar duṣkṛtinaṃ nininda // Ragh_14.57

āśvāsya rāmāvarajaḥ satīṃ tām ākhyātavālmīkiniketamārgaḥ 
nighnasya me bhartṛnideśaraukṣyaṃ devi kṣamasveti babhūva namraḥ // Ragh_14.58

sītā samutthāpya jagāda vākyaṃ prītāsmi te saumyacirāya jīva 
viḍaujasā viṣṇur ivāgrajena bhrātrā yad itthaṃ paravān asi tvam // Ragh_14.59

śvaśrūjanaṃ sarvam anukrameṇa vijñāpaya prāpitamatpraṇāmaḥ 
prajāniśekaṃ mayi vartamānaṃ sūnor anudhyāyata cetaseti // Ragh_14.60

vācyas tvayā madvacanāt sa rājā vahnau viśuddhām api yat samakṣam 
māṃ lokavādaśravaṇād ahāsīḥ śrutasya kiṃ tat sadṛśaṃ kulasya // Ragh_14.61

kalyāṇabuddher atha vā tavāyaṃ na kāmacāro mayi śaṅkanīyaḥ 
mamaiva janmāntarapātakānāṃ vipākavisphūrjathur aprasahyaḥ // Ragh_14.62

upasthitāṃ pūrvam apāsya lakṣmīṃ vanaṃ mayā sārdham asi prapannaḥ 
tad āspadaṃ prāpya tayātiroṣāt soḍhāsmi na tvadbhavane vasantī // Ragh_14.63

niśācaropaplutabhartṛkāṇāṃ tapasvinīnāṃ bhavataḥ prasādāt 
bhūtvā śaraṇyā śaraṇārtham anyāṃ kathaṃ prapatsye tvayi dīpyamāne // Ragh_14.64

kiṃ vā tavātyantaviyogamoghe kuryām upekṣāṃ hatajīvite 'smin 
syād rakṣaṇīyaṃ yadi me na tejas tvadīyam antargatam antarāyaḥ // Ragh_14.65

sāhaṃ tapaḥ sūryaniviṣṭadṛṣṭir ūrdhvaṃ prasūtes caritum yatiṣye 
tathā yathā me jananāntare 'pi tvam eva bhartā na ca viprayogaḥ // Ragh_14.66

nṛpasya varṇāśramarakṣaṇaṃ yat sa eva dharmo manunā praṇītaḥ 
nirvāsitāpy evam atas tvayāhaṃ tapasvisāmānyam avekṣaṇīyā // Ragh_14.67

tatheti tasyāḥ pratigṛhya vācaṃ rāmānuje dṛśṭipathaṃ vyatīte 
sā muktakaṇṭhaṃ vyasanātibhārāc cakranda vignā kurarīva bhūyaḥ // Ragh_14.68

nṛtyaṃ mayūrāḥ kusumāni vṛkṣā darbhān upāttān vijahur hariṇyaḥ 
tasyāḥ prapanne samaduḥkhabhāvam atyantam āsīd ruditaṃ vane 'pi // Ragh_14.69

tām abhyagacchad ruditānusārī kaviḥ kuśedhmāharaṇāya yātaḥ 
niṣādaviddhāṇḍajadarśanotthaḥ ślokatvam āpadyata yasya śokaḥ // Ragh_14.70

tam aśru netrāvaraṇaṃ pramṛjya sītā vilāpād viratā vavande 
tasyai munir dohadaliṅgadarśī dāśvān supurtrāśiṣam ity uvāca // Ragh_14.71

jāne viṣṛśṭāṃ praṇidhānatas tvāṃ mithyāpavādakṣubhitena bhartrā 
tan mā vyathiṣṭhā viṣayāntarasthaṃ prāptāsi vaidehi pitur niketam // Ragh_14.72

uthkātalokatrayakaṇṭake 'pi satyapratijñe 'py avikatthane 'pi 
tvāṃ praty akasmāt kaluṣapravṛttāv asty eva manyur bharatāgraje me // Ragh_14.73

tavendukīrtiḥ śvaśuraḥ sakhā me satāṃ bhavocchedakaraḥ pitā te 
dhuri sthitā tvaṃ patidevatānāṃ kiṃ tan na yenāsi mamānukampyā // Ragh_14.74

tapasvisaṃsargavinitatsattve tapovane vītabhayā vasāsmin 
ito bhaviṣyaty anaghaprasūter apatyasaṃskāramayo vidhis te // Ragh_14.75

aśūnyatīrāṃ munisaṃniveśais tamo'pahantrīṃ tamasāṃ vigāhya 
tatsaikatotsaṅgabalikriyābhiḥ saṃpatsyate te manasaḥ prasādaḥ // Ragh_14.76

puṣpaṃ phalaṃ cārtavam āharantyo bījaṃ ca bāleyam akṛṣṭarohi 
vinodayiṣyanti navābhiṣaṅgām udāravāco munikanyakās tvām // Ragh_14.77

payoghaṭair āśramabālavṛkṣān saṃvardhayantī svabalānurūpaiḥ 
asaṃśayaṃ prāk tanayopapatteḥ stanaṃdhayaprītim avāpsyasi tvam // Ragh_14.78

anugrahapratyabhinandinīṃ tāṃ vālmīkir ādāya dayārdracetāḥ 
sāyaṃ mṛgādhyāsitavedipārśvaṃ svam āśramaṃ śāntamṛgaṃ nināya // Ragh_14.79

tām arpayām āsa ca śokadīnāṃ tadāgamaprītiṣu tāpasīṣu 
nirviṣṭasārāṃ pitṛbhir himāṃśor antyāṃ kalāṃ darśa ivauṣadhīṣu // Ragh_14.80

tā iṅgudīsnehakṛtapradīpam āstīrṇamedhyājinatalpam antaḥ 
tasyai saparyānupadaṃ dinānte nivāsahetor uṭajaṃ viteruḥ // Ragh_14.81

tatrābhiṣekaprayatā vasantī prayuktapūjā vidhinātithibhyaḥ 
vanyena sā valkalinī śarīraṃ patyuḥ prajāsaṃtataye babhāra // Ragh_14.82

api prabhuḥ sānuśayo 'dhunā syāt kim utsukaḥ śakrajito 'pi hantā 
śaśaṃsa sītāparidevanāntam anuṣṭhitaṃ śāsanam agrajāya // Ragh_14.83

babhūva rāmaḥ sahasā sabāṣpas tuṣāravarṣīva sahasyacandraḥ 
kaulīnabhītena gṛhān nirastā na tena vaidehasutā manastaḥ // Ragh_14.84

nigṛhya śokaṃ svayam eva dhīmān varṇāśramāvekṣaṇajāgarūkaḥ 
sa bhrātṛsādhāraṇabhogam ṛddhaṃ rājyaṃ rajoriktamanāḥ śaśāsa // Ragh_14.85

tām ekabhāryāṃ parivādabhīroḥ sādhvīm api tyaktavato nṛpasya 
vakṣasy asaṃghaṭṭasukhaṃ vasantī reje sapatnīrahiteva lakṣmīḥ // Ragh_14.86

sītāṃ hitvā daśamukharipur nopayema yad anyāṃ tasyā eva pratikṛtisakho yat kratūn ājahāra 
vṛttāntena śravaṇaviṣayaprāpiṇā tena bhartuḥ sā durvāraṃ katham api parityāgaduḥkhaṃ viṣehe // Ragh_14.87

kṛtasītāparityāgaḥ sa ratnākaramekhalām 
bubhūje pṛthivīpālaḥ pṛthivīm eva kevalām // Ragh_15.1

lavaṇena viluptejyās tāmisreṇa tam abhyayuḥ 
munayo yamunābhājaḥ śaraṇyaṃ śaraṇārthinaḥ // Ragh_15.2

avekṣya rāmaṃ te tasmin na prajahruḥ svatejasā 
trāṇābhāve hi śāpāstrāḥ kurvanti tapaso vyayam // Ragh_15.3

pratiśuśrāva kākutsthas tebhyo vighnapratikriyām 
dharmasaṃrakṣaṇāyaiva pravṛttir bhuvi śārṅgiṇaḥ // Ragh_15.4

te rāmāya vadhopāyam ācakhyur vibudhaviṣaḥ 
durjayo lavaṇaḥ śūlī viśūlaḥ prārthyatām iti // Ragh_15.5

ādideśātha śatrughnaṃ teṣāṃ kṣemāya rāghavaḥ 
kariṣyann iva nāmāsya yathārtham arinigrahāt // Ragh_15.6

yaḥ kaścana raghūṇāṃ hi param ekaḥ paraṃtapaḥ 
apavāda ivotsargaṃ vyāvartayitum īśvaraḥ // Ragh_15.7

agrajena prayuktāśīs tadā dāśarathī rathī 
yayau vanstahliḥ paśyan puṣpitāḥ surabhīr abhīḥ // Ragh_15.8

rāmādeśād anupadaṃ senāṅgaṃ tasya siddhaye 
paścād adhyayanārthasya dhātor adhir ivābhavat // Ragh_15.9

ādiṣṭavartmā munibhiḥ sa gacchaṃs tapatāṃ varaḥ 
virarāja rathapṛṣṭhair vālakhilyair ivāṃśumān // Ragh_15.10

tasya mārgavaśād ekā babhūva vasatir yataḥ 
rathasvanotkaṇṭhamṛge vālmīkīye tapovane // Ragh_15.11

tam ṛṣiḥ pūjayām āsa kumāraṃ klāntavāhanam 
tapaḥprabhāvasiddhābhir viśeṣapratipattibhiḥ // Ragh_15.12

tasyām evāsya yāminyām antarvatnī prajāvatī 
sutāv asūta saṃpannau kośadaṇḍāv iva kṣitiḥ // Ragh_15.13

saṃtānaśravaṇād bhrātuḥ saumitriḥ saumanasyavān 
prāñjalir munim āmantrya prātar yuktaratho yayau // Ragh_15.14

sa ca prāpa madhūpaghnaṃ kumbhīnasyāś ca kukṣijaḥ 
vanāt karam ivādāya sattvarāśim upasthitaḥ // Ragh_15.15

dhūmadhūmro vasāghandhī jvālābabhruśiroruhaḥ 
kravyādgaṇaparīvāraś citāgnir iva jaṅgamaḥ // Ragh_15.16

apaśulaṃ tam āsādya lavaṇaṃ lakṣmaṇānujaḥ 
rurodha saṃmukhīno hi jayo randhraprahāriṇām // Ragh_15.17

nātiparyāptam ālakṣya matkukṣer adya bhojanam 
diṣṭyā tvam asi me dhātrā bhīgtenevopapāditaḥ // Ragh_15.18

iti saṃtarjya śatrughnaṃ rākṣasas tajjighāṃsayā 
prāṃśum utpāṭayām āsa mustāstambam iva drumam // Ragh_15.19

saumitrer niśitair bāṇair antarā śakalīkṛtaḥ 
gātraṃ puṣparajaḥ prāpa na śākhī nairṛteritaḥ // Ragh_15.20

vināśāt tasya vṛkṣasya rakṣas tasmai mahopalam 
prajighāya kṛtāntasya muṣṭiṃ pṛthag iva sthitam // Ragh_15.21

aindram astram upādāya śatrughnena sa tāḍitaḥ 
sikatābhyo 'pi hi parāṃ prapede paramāṇutām // Ragh_15.22

dakṣiṇaṃ doṣam udyamya rākṣasas tam upādravat 
ekatāla ivopāta-pavanaprerito giriḥ // Ragh_15.23

kārṣnena pattrinā śatruḥ sa bhinnarhṛdayaḥ patan 
ānināya bhuvaḥ kampaṃ jahārāśramavāsinām // Ragh_15.24

vayasāṃ paṅktayaḥ petur hatasyopari rakṣasaḥ 
tatpratidvandino mūrdhni divyāḥ kusumavṛṣṭayaḥ // Ragh_15.25

sa hatvā lavaṇaṃ vīras tadā mene mahaujasaḥ 
bhrātuḥ sodaryam ātmānam indrajidvadhaśobhinaḥ // Ragh_15.26

tasya saṃstūyamānasya caritārthais tapasvibhiḥ 
śuśubhe vikramodagraṃ vrīḍayāvanataṃ śiraḥ // Ragh_15.27

upakūlaṃ sa kālindyāḥ purīṃ pauruṣabhūṣaṇaḥ 
nirmame nirmamo 'rtheṣu mathurāṃ madhurākṛtiḥ // Ragh_15.28

yā saurājyaprakāśābhir babhau pauravibhūtibhiḥ 
svargābhiṣyandavamanaṃ kṛtvevopaniveśitā // Ragh_15.29

tatra saudhagataḥ paśyan yamunāṃ cakravākinīm 
hema bhaktimatīṃ bhūmeḥ praveṇīm iva pripiye // Ragh_15.30

sakhā daśarathasyātha janakasya ca mantrakṛt 
saṃcaskārobhayaprītyā maithileyau yathāvidhi // Ragh_15.31

sa tau kuśalavonmṛṣṭa-garbhakledau tadākhyayā 
kaviḥ kuśalavāv eva cakāra kila nāmataḥ // Ragh_15.32

sāṅgaṃ ca vedam adhyāpya kiṃcidutkrāntaśaiśavau 
svakṛtiṃ gāpayām āsa kaviprathamapaddhatim // Ragh_15.33

rāmasya madhuraṃ vṛttaṃ gāyantau mātur agrataḥ 
tadviyogavyathāṃ kiṃcic chithilīcakratuḥ sutau // Ragh_15.34

itare 'pi raghor vaṃśyās trayas tretāgnitejasaḥ 
tadyogāt pativatnīṣu patnīṣv āsan dvisūnavaḥ // Ragh_15.35

śatrughātini śatrughnaḥ subāhau ca bahuśrute 
mathurāvidiśe sūnvor nidadhe pūrvajotsukaḥ // Ragh_15.36

bhūyas tapovyayo mā bhūd vālmīker iti so 'tyagāt 
maithilītanayodgīta-niṣpandamṛgam āśramam // Ragh_15.37

vaśī viveśa cāyodhyāṃ rathyāsaṃskāraśobhinīm 
lavaṇasya vadhāt paurair atigauravam īkṣitaḥ // Ragh_15.38

sa dadarśa sabhāmadhye sabhāsadbhir upasthitam 
rāmaṃ sītāparityāgād asāmaṇyapatiṃ bhuvaḥ // Ragh_15.39

tam abhyanandat praṇataṃ lavaṇāntakam agrajaḥ 
kālanemivadhāt prītas turāṣāḍ iva śārṅgiṇam // Ragh_15.40

sa pṛṣṭaḥ sarvato vārttām ākhyād rājñe na saṃtatim 
pratyarpayiṣyataḥ kāle kaver ādyasya śāsanāt // Ragh_15.41

atha jānapado vipraḥ śiśum aprāptayauvanam 
avatāry'; āṅkaśayyāsthaṃ dvāri cakranda bhūpateḥ // Ragh_15.42

śocanīyāsi vasudhe yā tvaṃ daśarathāc cyutā 
rāmahastam anuprāpya kaṣṭāt kaṣṭataraṃ gatā // Ragh_15.43

śrutvā tasya śuco hetuṃ goptā jihrāya rāghavaḥ 
na hy akālabhavo mṛtyur ikṣvākupadam aspṛśat // Ragh_15.44

sa muhūrtaṃ sahasveti dvijam āśvāsya duḥkhitam 
yānaṃ sasmāra kauberaṃ vaivasvatajigīṣayā // Ragh_15.45

āttaśastras tad adhyāsya pratisthaḥ sa raghūdvahaḥ 
uccacāra puras tasya gūḍharūpā sarasvatī // Ragh_15.46

rājan prajāsu te kaścid apacāraḥ pravartate 
tam anviṣya praśamayer bhavitāsi tataḥ kṛtī // Ragh_15.47

ity āptavacanād rāmo vineṣyan varṇavikriyām 
diśaḥ papāta pattreṇa veganiṣkampaketunā // Ragh_15.48

atha dhūmābhitāmrākṣaṃ vṛkṣākhāvalambinam 
dadarśa kaṃcid aikśvākas tapasyantam adhomukham // Ragh_15.49

pṛṣṭanāmānvayo rājñā sa kilācaṣṭa dhūmapaḥ 
ātmānaṃ śambukaṃ nāma śūdraṃ surapadārthinam // Ragh_15.50

tapasy anadhikāritvāt prajānāṃ tam aghāvaham 
śīrṣacchedyaṃ paricchidya niyantā śastram ādade // Ragh_15.51

sa tadvaktraṃ himakliṣṭa-kiñjalkam iva paṅkajam 
jyotiṣkaṇāhataśmaśru kaṇṭhanālād apāharat // Ragh_15.52

kṛtaṇḍaḥ svayam rājñā lebhe śūdraḥ satāṃ gatim 
tapasā duścareṇāpi na svamārgavilaṅghinā // Ragh_15.53

raghunātho 'py agastyena mārgasaṃdarśitātmanā 
mahaujasā saṃyuyuje śaratkāla ivendunā // Ragh_15.54

kumbhayonir alaṃkāraṃ tasmai divyaparigraham 
dadau dattaṃ samudreṇa pītenevātmaniṣkrayam // Ragh_15.55

taṃ dadhan maithilīkaṇṭha-nirvyāpāreṇa bāhunā 
paścān nivavṛte rāmaḥ prāk parāsur dvijātmajaḥ // Ragh_15.56

tasya pūrvoditāṃ nindāṃ dvijaḥ putrasamāgataḥ 
stutyā nivartayām āsa trātur vaivasvatād api // Ragh_15.57

tam adhvarāya muktāśvaṃ rakṣaḥkapinareśvarāḥ 
meghāḥ sasyam ivāmbhobhir abhyavarṣann upāyanaiḥ // Ragh_15.58

digbhyo nimantritāś cainam abhijagmur maharṣayaḥ 
na bhaumāny eva dhiṣṇyāni hitvā jyotirmayāny api // Ragh_15.59

upaśalyaniviṣṭais taiś caturdvāramukhī babhau 
ayodhyā sṛṣṭalokeva sadyaḥ paitāmahī tanuḥ // Ragh_15.60

ślāghyas tyāgo 'pi vaidehyāḥ patyuḥ prāgvaṃśavāsinaḥ 
ananyahāneḥ tasyāsīt saiva jāyā hiraṇmayī // Ragh_15.61

vidher adhikasaṃbhāras tataḥ pravavṛte makhaḥ 
āsan yatra kriyāvighnā rākṣasā eva rakṣiṇaḥ // Ragh_15.62

atha prācetasopajñaṃ rāmāyaṇam itas tataḥ 
maithileyau kuśalavau jagatur gurucoditau // Ragh_15.63

vṛttaṃ rāmasya vālmīkeḥ kṛtis tau kiṃnarasvanau 
kiṃ tad yena mano hartum alaṃ syātāṃ na śṛṇvatām // Ragh_15.64

rūpe gīte ca mādhuryam tayos tajjñair niveditam 
dadarśa sānujo rāmaḥ śuśrāva ca kutūhalī // Ragh_15.65

tadgītaśravaṇaikāgrā saṃsad aśrumukhī babhau 
himanisyandinī prātar nivāgteva vanasthalī // Ragh_15.66

vayoveṣavisaṃvādi rāmasya ca tayoś ca sā 
janatā prekṣya sādṛśyaṃ nākśikampaṃ vyatiṣṭhata // Ragh_15.67

ubhayor na tathā lokaḥ prāvīṇyena visiṣmiye 
nṛpateḥ prītidāneṣu vītaspṛhatayā yathā // Ragh_15.68

geye kena vinītau vāṃ kasya ceyaṃ kaveḥ kṛtiḥ 
iti rājñā svayaṃ pṛṣṭau tau vālmīkim aśaṃsatām // Ragh_15.69

atha sāvarajo rāmaḥ prācetasam upeyivān 
urikrtyātmano dehaṃ rājyam asmai nyavedayat // Ragh_15.70

sa tāv ākhyāya rāmāya maithileyau tad ātmajau 
kaviḥ kāruṇiko vavre sītāyāḥ saṃparigraham // Ragh_15.71

tāta śuddhā samakṣaṃ naḥ snuṣā te jātavedasi 
daurātmyād rakṣasas tāṃ tu nātratyāḥ śraddadhuḥ prajāḥ // Ragh_15.72

tāḥ svacāritram uddiśya pratyāyayatu maithilī 
tataḥ putravatīm enāṃ pratipatsye tadājñayā // Ragh_15.73

iti pratiśrute rājñā jānakīm āsramān muniḥ 
śiṣyair ānāyayām āsa svasiddhiṃ niyamair iva // Ragh_15.74

anyedyur atha kākutsthaḥ saṃnipātya puraukasaḥ 
kavim āhvāyayām āsa prastutapratipattaye // Ragh_15.75

svarasaṃskāravatyeva putrābhyāṃ saha sītayā 
ṛcevodarciṣaṃ sūryaṃ rāmaṃ munir upasthitaḥ // Ragh_15.76

kāṣāyaparivītena svapadārpitacakṣuṣā 
kavim āhvāyayām āsa śāntena vapuṣaiva sā // Ragh_15.77

janās tadālokapathāt pratisaṃhṛtacakṣuṣaḥ 
tasthus te 'vāṅmukhāḥ sarve phalitā iva sālayaḥ // Ragh_15.78

tāṃ dṛṣṭiviṣaye bhartur munir āsthitaviṣṭaraḥ 
kuru niḥsaṃśayaṃ vatse svavṛtte lokam ity aśāt // Ragh_15.79

atha vālmīkśiṣyeṇa puṇyam āvarjitaṃ payaḥ 
ācamyodīrayām āsa sītā satyāṃ sarasvatīm // Ragh_15.80

vāṅmanaḥkarmabhiḥ patyau vyabhicāro yathā na me 
tathā viśvaṃbhare devi mām antardhātum arhasi // Ragh_15.81

evam ukte tayā sādhvyā randhrāt sadyobhavād bhuvaḥ 
śātahradam iva jyotiḥ prabhāmaṇḍalam udyayau // Ragh_15.82

tatra nāgaphaṇotkṣipta-siṃhāsananiṣeduṣī 
samudraraśanā sākṣāt prādurāsīd vasuṃdharā // Ragh_15.83

sā sītām aṅkam āropya bhartari prahitekṣaṇām 
mā meti vyāharaty eva tasmin pātālam abhyagāt // Ragh_15.84

dharāyāṃ tasya saṃrambhaṃ sītāpratyarpaṇaiṣiṇaiḥ 
gurur vidhibalāpekṣī śamayāṃ āsa dhanvinaḥ // Ragh_15.85

ṛṣīn visṛjya yajñānte suhṛdaś ca puraskṛtān 
rāmaḥ sītāgataṃ snehaṃ nidadhe tadapatyayoḥ // Ragh_15.86

yudhājitas tu saṃdeśāt sa deśa sindhunāmakam 
dadau dattaprabhāvāya bharatāya dhṛtaprajaḥ // Ragh_15.87

bharatas tatra gandharvān yudhi nijitya kevalam 
ātodyaṃ grāhayām āsa samatyājayad āyudham // Ragh_15.88

sa takṣapuṣkalau putrau rājadhānyos tadākhyayoḥ 
abhiṣicyābhiṣekārhau rāmāntikam agāt punaḥ // Ragh_15.89

aṅgadaṃ candraketuṃ ca lakṣmaṇo 'py ātmasaṃbhavau 
śāsanād raghunāthasya cakre kārāpatheśāvarau // Ragh_15.90

ity āropitaputrās te jananīnāṃ janeśvarāḥ 
bhartṛlokaprapannānāṃ nivāpān vidadhuḥ kramāt // Ragh_15.91

upetya muniveṣo 'tha kālaḥ provāca rāghavam 
rahaḥsaṃvādinau pāsyed āvāṃ yas taṃ tyajer iti // Ragh_15.92

tatheti pratipannāya vivṛtātmā nṛpāya saḥ 
ācakhyau divam adhyāsva śāsanāt parameṣṭhinaḥ // Ragh_15.93

vidvān api tayor dvāḥstahaḥ samayaṃ lakṣmaṇo 'bhinat 
bhīto durvāsasaḥ śāpād rāmasaṃdarśanārthinaḥ // Ragh_15.94

sa gatvā sarayūtīraṃ dehatyāgena yogavit 
cakāra vitathāṃ bhrātuḥ pratijñāṃ pūrvajanmanaḥ // Ragh_15.95

tasminn ātmacaturbhāge prāṅ nākam adhitasthuṣi 
rāghavaḥ śithilaṃ tasthau bhuvi dharmas tripād iva // Ragh_15.96

sa niveśya kuśāvatyāṃ ripunāgāṅkuṣaṃ kuśam 
śarāvatyāṃ satāṃ sūktair janitāśrulavaṃ lavam // Ragh_15.97

udak pratasthe sthiradhīḥ sānujo 'gnipuraḥsaraḥ 
anvitaḥ pativātsalyād gṛhavarjam ayodhyayā // Ragh_15.98

jagṛhus tasya cittajñāḥ padavīṃ harirākṣasāḥ 
kadambamukulasthūlair abhivṛṣṭaṃ prajāśrubhiḥ // Ragh_15.99

upasthitavimānena tena bhaktānukampinā 
cakre tridivaniḥṣreṇiḥ sarayūr anuyāyinām // Ragh_15.100

yad gopratarakalpo 'bhut saṃmardas tatra majjatām 
atas tadākhyayā tīrthaṃ pāvanaṃ bhuvi paprathe // Ragh_15.101

sa vibhur vibudhāṃśeṣu pratipannātmamūrtiṣu 
tridaśībhūtapaurāṇāṃ svargāntaram akalpayat // Ragh_15.102

nirvartyaivaṃ daśamukhaśiraśchedakāryaṃ surāṇāṃ viṣvaksenaḥ svatanum aviśat sarvalokapratiṣṭhām 
laṅkānāthaṃ pavanatanayaṃ cobhayaṃ sthāpayitvā kīrtistambhadvayam iva girau dakṣiṇe cottare ca // Ragh_15.103

athetare sapta raghupravīrā jyeṣṭhaṃ purojanmatayā juṇaiś ca 
cakruḥ kuśaṃ ratnaviśeṣabhājaṃ saubhrātram eṣāṃ hi kulānusāri // Ragh_16.1

te setuvārttāgajabandhamukhyair abhyucchritāḥ karmabhir apy avandhyaiḥ 
anyonyadeśapravibhāgasīmāṃ velāṃ samudrā iva na vyatīyuḥ // Ragh_16.2

caturbhujāṃśaprabhavaḥ sa teṣāṃ dānapravṛtter anupāratānām 
suradvipānām iva sāmayonir bhinno 'ṣṭhadā viprasasāra vaṃśaḥ // Ragh_16.3

athārdharātre stimitapradīpe śayyāgṛhe suptajane prabuddhaḥ 
kuśaḥ pravāsasthakalatraveṣām adṛṣṭapūrvāṃ vanitām apaśyat // Ragh_16.4

sā sādhusādhāraṇapārthivarddheḥ sthitvā purastāt puruhūtabhāsaḥ 
jetuḥ pareṣāṃ jayaśabdapūrvaṃ tasyāñjaliṃ bandhumato babandha // Ragh_16.5

athānupoḍhārgalam apy agāraṃ chāyām ivādarśatalaṃ praviṣṭām 
savismayo dāśarathes tanūjaḥ provāca pūrvārdhaviṣṛṭatalpaḥ // Ragh_16.6

labhdāntarā sāvaraṇe 'pi gehe yogaprabhāvo na ca lakṣyate te 
bibharṣi cākāram anirvṛtānāṃ mṛṇālinī haimam ivoparāgam // Ragh_16.7

kā tvaṃ śubhe kasya parigraho vā kiṃ vā madabhyāgamakāraṇaṃ te 
ācakṣva matvā vaśināṃ raghūṇāṃ manaḥ parastrīvimukhapravṛtti // Ragh_16.8

tam abravīt sā guruṇā navadyā yā nītapaurā svapadonmukhena 
tasyāḥ puraḥ saṃprati vītanāthāṃ jānīhi rājann adhidevatāṃ mām // Ragh_16.9

vasaukasārām abhibhūya sāhaṃ saurājyabaddhotsavayā vibhūtyā 
samagraśaktau tvayi sūryavaṃṣye sati prapannā karuṇām avasthām // Ragh_16.10

viśīrṇatalpāṭṭaśato niveśaḥ paryastaśālaḥ prabhuṇā vinā me 
viḍambayaty astanimagnasūryaṃ dināntam ugrānilabhinnamegham // Ragh_16.11

niśāsu bhāsvatkalanūpurāṇāṃ yaḥ saṃcaro 'bhūd abhisārikāṇām 
nadanmukholkāvicitāmiṣābhiḥ sa vāhyate rājapathaḥ śivābhiḥ // Ragh_16.12

āsphālitaṃ yat pramadākarāgrair mṛdaṅgadhīradhvanim anvagacchat 
vanyair idānīṃ mahiṣais tad ambhaḥ śṛṅgāhataṃ krośati dīrghikāṇām // Ragh_16.13

citradvipāḥ padmavanāvatīrṇāḥ kareṇubhir dattamṛṇālabhaṅgāḥ 
nakhāṅkuśāghātavibhinnakumbhāḥ saṃrabdhasiṃhaprahṛtaṃ vahanti // Ragh_16.16

stambheṣu yoṣitpratiyātanānām utkrāntavarṇakramadhūsarāṇām 
stanottarīyāṇi bhavanti saṅgān nirmokapaṭṭāḥ phaṇibhir vimuktāḥ // Ragh_16.17

kālāntaraśyāmasudheṣu naktam itas tato rūḍhatṛṇāṅkureṣu 
ta eva muktāguṇaśuddhayo 'pi harmyeṣu mūrchanti na candrapādāḥ // Ragh_16.18

āvarjya śākhāḥ sadayaṃ ca yāsāṃ puṣpāṇy upāttāni vilāsinībhiḥ 
vanyaiḥ pulindair iva vānarais tāḥ kliśyanta udyānalatā madīyāḥ // Ragh_16.19

rātrāv anāviṣkṛtadīpabhāsaḥ kāntāmukhaśrīviyutā divāpi 
tiraskriyante kṛmitantujālair vicchinnadhūmaprasarā gavākṣāḥ // Ragh_16.20

balikriyāvarjitasaikatāni snānīyasaṃsargam anāpanuvanti 
upāntavānīragṛhāṇi dṛṣṭvā śūnyāni dūye sarayūjalāni // Ragh_16.21

tad arhasīmāṃ vasatiṃ visṛjya mām abhyupaituṃ kularājadhānīm 
hitvā tanuṃ kāraṇamānuṣīṃ tāṃ yathā gurus te paramātmamūrtim // Ragh_16.22

tatheti tasyāḥ praṇayaṃ pratītaḥ pratyagrahīt prāgraharo raghūṇām 
pūr apy abhivyaktamukhaprasādā śarīrabandhena tirobabhūva // Ragh_16.23

tad adbhutaṃ saṃsadi rārtrivṛttaṃ prātar dvijebhyo nṛpatiḥ śaśaṃsa 
śrutvā ta enaṃ kularājadhānyā sākṣāt patitve vṛtam abhayanandan // Ragh_16.24

kuśāvatīṃ śrotriyasāt sa kṛtvā yātrānukūle 'hani sāvarodhaḥ 
anudruto vāyur ivābhravṛndaiḥ sainyair ayodhyābhimukhaḥ pratasthe // Ragh_16.25

sā ketumālopavanā bṛhadbhir vihāraśailānugateva nāgaiḥ 
senā rathodāragṛhā prayāṇe tasyābhavaj jaṅgamarājadhānī // Ragh_16.26

tenātapatrāmalamaṇḍalena prasthāpitaḥ pūrvanivāsabhūmim 
babhau balaughaḥ śaśinoditena velām udanvān iva nīyamānaḥ // Ragh_16.27

tasya prayātasya varūthinīnāṃ pīḍām aparyāptavatīva soḍhum 
vasuṃdharā viṣṇupadaṃ dvitīyam adhyāruroheva rajaśchalena // Ragh_16.28

udyacchamānā gamanāya paścāt puro niveśe pathi ca vrajantī 
sā yatra senā dadṛṣe nṛpasya tatraiva sāmagryamatiṃ cakāra // Ragh_16.29

tasya dvipānāṃ madavārisekāt khurābhighātāc ca turaṃgamāṇām 
reṇuḥ prapede pathi paṅkabhāvaṃ paṅko 'pi reṇutvam iyāya netuḥ // Ragh_16.30

mārgaiṣiṇī sā kaṭakāntareṣu vaindhyeṣu senā bahudhā vibhinnā 
cakāra reveva mahāvirāvā baddhapratiśrunti guhāmukhāni // Ragh_16.31

sa dhātubhedāruṇayānanemiḥ prabhuḥ prayāṇadhvanimiśratūryaḥ 
vyalaṅghayad vindhyam upāyanāni paśyan pulindair upapāditāni // Ragh_16.32

tīrthe tadīye gajasetubandhāt pratīpagām uttarato 'sya gaṅgām 
ayatnavālagvyajanībabhūvur haṃsā nabholaṅghanalolakpakṣāḥ // Ragh_16.33

sa pūrvajānāṃ kapilena roṣād bhasmāvaśeṣīkṛtavigrahāṇām 
surālayaprāptinimittam ambhas traisrotasaṃ naululitaṃ vavande // Ragh_16.34

ity adhvanaḥ kaiścid ahobhir ante kūlaṃ samāsādya kuśaḥ sarayvāḥ 
vedipratiṣṭhān vitatādhvarāṇāṃ yūpān apaśyac chataśo raghūṇām // Ragh_16.35

ādhūya śākhāḥ kusumadrumāṇāṃ spṛṣṭvā ca śītān sarayūtaraṅgān 
taṃ klāntasainyaṃ kularājadhānyāḥ pratyujjagāmopavanāntavāyuḥ // Ragh_16.36

athopaśalye ripumagnaśalyas tasyāḥ puraḥ paursakhaḥ sa rājā 
kuladhvajas tāni caladhvajāni niveśayām āsa balī balāni // Ragh_16.37

tāṃ śilpisaṃghāḥ prabhuṇā niyuktās tathāgatāṃ saṃbhṛtasādhanatvāt 
puraṃ navīcakrur apāṃ visargān meghā nidāghaglapitām ivorvīm // Ragh_16.38

tataḥ saparyāṃ sapaśūpahārāṃ puraḥ parārdhyapratimāgṛhāyāḥ 
upoṣitair vāstuvidhānavidbhir nirvartayām āsa raghupavīraḥ // Ragh_16.39

tasyāḥ sa rājopapadaṃ niśāntaṃ kāmīva kāntāhṛdayaṃ praviśya 
yathārham anyair anujīvilokaṃ saṃbhāvayām āsa gṛhais tadīyaiḥ // Ragh_16.40

sā mandurāsaṃśrayibhis turaṃgaiḥ śālāvidhistambhagataiś ca nāgaiḥ 
pūr ābabhāse vipaṇisthapaṇyā sarvāṅganaddhābharaṇeva nārī // Ragh_16.41

vasan sa tasyāṃ vasatau raghūṇāṃ purāṇaśobhām adhiropitāyām 
na maithileyaḥ spṛhayāṃ babhūva bhartre divo nāpy alakeśvarāya // Ragh_16.42

athāsya ratnagrathitottarīyam ekāntapāṇḍustanalambihāram 
niḥśvāsahāryāṃśukam ājagāma gharmaḥ priyā veṣam ivopadeṣṭum // Ragh_16.43

agastyacihnād ayanāt samīpaṃ dig uttarā bhāsvati saṃnivṛtte 
ānandaśītam iva bhāṣpavṛṣṭiṃ himasrutiṃ haimavatīṃ sasarja // Ragh_16.44

pravṛddhatāpo divaso 'timātram atyartham eva kṣaṇadā ca tanvī 
ubhau virodhakriyayā vibhinnau jāyāpatī sānuśayāv ivāstām // Ragh_16.45

dine dine śaivalavanty adhastāt sopānaparvāṇi vimuñcad ambhaḥ 
uddaṇḍapadmaṃ gṛhadīrghikāṇāṃ nārīnitambadvayasaṃ babhūva // Ragh_16.46

vaneṣu sāyanatanamallikānāṃ vijṛmbhaṇodgandhiṣu kuḍ maleṣu 
pratyekanikṣiptapadaḥ saśabdaṃ saṃkhyām ivaiṣāṃ bhramaraś cakāra // Ragh_16.47

svedānuviddhārdranakhakṣatāṅke saṃdaṣṭabhūyiṣṭhaśikhaṃ kapole 
cyutaṃ na karṇād api kāminīnāṃ śirīṣapuṣpaṃ sahasā papāta // Ragh_16.48

yantrapravāhaiḥ śiśiraiḥ parītān rasena dhautān malayodbhavasya 
śilāviśeṣān adhiśayya ninyur dhārāgṛheṣv ātapam ṛddhimantaḥ // Ragh_16.49

snānārdramukteṣv anudhūpavāsaṃ vinyastasāyantanamallikeṣu 
kāmo vasantātyayamandavīryaḥ keśeṣu lebhe balam aṅganānām // Ragh_16.50

āpiñjarā baddharajaḥkaṇatvān mañjary udārāśuśubhe 'rjunasya 
dagdhvāpi dehaṃ giriśena roṣāt khaṇḍīkṛtā jyeva manobhvasya // Ragh_16.51

manojñagandhaṃ sahakārabhaṅgaṃ purāṇasīdhuṃ navapāṭalaṃ ca 
saṃbadhnatā kāijaneṣu doṣāḥ sarve nidāghāvadhinā pramṛṣṭāḥ // Ragh_16.52

janasya tasmin samaye vigāḍhe babhūvatur dvau saviśeṣakāntau 
tāpāpanodakṣamapāda sa codayastho nṛpatiḥ śaśī ca // Ragh_16.53

athormilolonmadarājahaṃse rodholatāpuṣpavahe sarayvāḥ 
vihartum icchā vanitāsakhasya tasyāmbhasi grīṣmasukhe babhūva // Ragh_16.54

sa tīrabhūmau vihitopakāryām ānāyibhis tām apakṛṣṭanakrām 
vigāhituṃ śrīmahimānurūpaṃ pracakrame cakradharaprabhāvaḥ // Ragh_16.55

sā tīrasopānapathāvatārād anyonyakeyūravighaṭṭinībhiḥ 
sanūpurakṣobhapadābhir āsīd udvignahaṃsā sarid aṅganābhiḥ // Ragh_16.56

parasparābhyukṣaṇatatparāṇāṃ tāsāṃ nṛpo majjanarāgadarśī 
nausaṃśrayaḥ pārśvagatāṃ kirātīm upāttavālavyajanāṃ babhāṣe // Ragh_16.57

paśyāvarodhaiḥ śataśo madīyair vigāhyamāno galitāṅgarāgaiḥ 
saṃdhyodayaḥ sābhra ivaiṣa varṇaṃ puṣyaty anekaṃ sarayūpravāhaḥ // Ragh_16.58

viluptam antaḥpurasundarīṇāṃ yad añjanaṃ naululitābhir adbhiḥ 
tad badhnatībhir madarāgaśobhāṃ vilocaneṣu pratimuktam āsām // Ragh_16.59

etā guruśroṇipayodharatvād ātmānam udvohuḍhum aśaknuvantyaḥ 
gāḍhāṅgadair bāhubhir aspu bālāḥ kleśottaraṃ rāgavaśāt plavante // Ragh_16.60

amī śirīṣaprasavāvataṃsāḥ prabhraṃśino vārivihāriṇīnām 
pāriplavāḥ srotasi nimnagāyāḥ śaivālalolāṃś chalayanti mīnān // Ragh_16.61

āsāṃ jalāsphālanatatparāṇāṃ muktāphalaspardhiṣu śīkareṣu 
payodharotsarpiṣu śīryamāṇāḥ saṃlakṣyate na cchiduro 'pi hāraḥ // Ragh_16.62

āvartaśobhā natanābhikānter bhaṅgyo bhruvāṃ dvandvacarāḥstanānām 
jātāni rūpāvayavopamānāny adūravartīni vilāsinīnām // Ragh_16.63

tīrasthalībarhibhir utkalāpaiḥ prasnigdhakekair abhinandyamānam 
śrotreṣu saṃmūrchati raktam āsāṃ gītānugaṃ vārimṛdaṅgavādyam // Ragh_16.64

saṃdaṣṭavastreṣv abalānitambeṣv induprakāśāntaritoḍukalpāḥ 
amī jalāpūritasūtramārgā maunaṃ bhajante raśanākalāpāḥ // Ragh_16.65

etāḥ karotpīḍitavāridhārā darpāt sakhībhir vadaneṣu siktāḥ 
vakretarāgrair alakais taruṇyaś cūrṇāruṇān vārilavān vamanti // Ragh_16.66

udbaddhakeśaś cyutapattrarekho viśleṣimuktāphalapattraveṣṭaḥ 
manojña eva pramadāmukhānām ambhovihārākulito 'pi veṣaḥ // Ragh_16.67

sa nauvimānād avatīrya reme vilolahāraḥ saha tābhir apsu 
skandhāvalagnoddhṛtapadminīkaḥ kareṇubhir vanya iva dvipendraḥ // Ragh_16.68

tato nṛpenānugatāḥ striyas tā bhrājiṣṇunā sātiśayaṃ virejuḥ 
prāg eva muktā nayanābhirāmāḥ prāpyendranīlaṃ kim utonmayūkham // Ragh_16.69

varṇodakaiḥ kāñcanaśṛṅgamuktais tam āyatākṣyaḥ praṇayād asiñcan 
tathāgataḥ so 'tirarāṃ babhāse sadhātunisyanda ivādrirājaḥ // Ragh_16.70

tenāvarodhapramadāsakhena vigāhanānena saridvarāṃ tām 
ākāśagaṅgāratir apsarobhir vṛto marutvān anuyātalīlaḥ // Ragh_16.71

yat kumbhayoner adigamya rāmaḥ kuśāya rājyena samaṃ dideśa 
tad asya jaitrābharaṇaṃ vihartur ajñātapātaṃ salile mamajja // Ragh_16.72

snātvā yathākāmam asau sadāras tīropakāryāṃ gatamātra eva 
divyena śūnyaṃ valayena bāhum upoḍhanepathyavidhir dadarśa // Ragh_16.73

jayaśriyaḥ saṃvananaṃ yatas tad āmuktapūrvaṃ guruṇā ca yasmāt 
sehe 'sya na bhraṃśam ato na lobhāt sa tulyapuṣpābharaṇo hi dhīraḥ // Ragh_16.74

tataḥ samājñāpayad āśu sarvān ānāyinas tadvicaye nadīṣṇān 
vandhyaśramās te sarayūṃ vigāhya tam ūcur āmlānamukhaprasādāḥ // Ragh_16.75

kṛtaḥ prayatno na ca deva labdhaṃ magnaṃ payasy ābharaṇottamaṃ te 
nāgena laulyāt kumudena nūnam upāttam antarhradavāsinā tat // Ragh_16.76

tataḥ sa kṛtvā dhanur ātatajyaṃ dhanurdharaḥ kopavilohitākṣaḥ 
gārutmataṃ tīragatas tarasvī bhujaṃganāśāya samādade 'stram // Ragh_16.77

tasmin hradaḥ saṃhitamātra eva kṣobhāt samāviddhataraṅgahastaḥ 
rodhāṃsy abhighnann avapātamagnaḥ karīva vanyaḥ paruṣaṃ rarāsa // Ragh_16.78

tasmāt samudrād iva mathyamānād udvṛttanakrāt sahasonmamajja 
lakṣmyeva sārdhaṃ surarājavṛkṣaḥ kanyāṃ puraskṛtya bhujaṃgarājaḥ // Ragh_16.79

vibhūṣaṇapratyupahārahastam upasthitaṃ vīkṣya viśāṃpatis tam 
sauparṇam astraṃ pratisaṃjahāra praheṣv anirbandharuṣo hi santaḥ // Ragh_16.80

trailokyanāthaprabhavaṃ prabhāvāt kuśaṃ dviṣām aṅkuśam astravidvān 
mānonantenāpy abhivandya mūrdhnā mūrdhābhiṣiktaṃ kumudo babhāṣe // Ragh_16.81

avaimi kāryāntaramānuṣasya viṣṇoḥ sutākhyām aparāṃ tanuṃ tvām 
so 'haṃ kathaṃ nāma tavācareyam ārādhanīyasya dhṛter vibhātam // Ragh_16.82

karābhighātotthitakandukeyam ālokya bālātikutūhalena 
javāt pataj jyotir ivāntarikṣād ādatta jatrābharaṇaṃ tvadīyam // Ragh_16.83

tad etad ājānuvilambinā te jyāghātarekhākiṇa lāñchanena 
bhujena rakṣāparigheṇa bhūmer upaitu yogaṃ punar aṃsalena // Ragh_16.84

imāṃ svasāraṃ ca yavīyasīṃ me kumudvatīṃ nārhasi nānumantum 
ātmāparādhaṃ nudatīṃ cirāya śuśrūṣayā pārthiva pādayos te // Ragh_16.85

ity ūcivān upahṛtābharaṇaḥ kṣitīśaṃ ślāghyo bhavān svajana ity anubhāṣitāram 
saṃyojayāṃ vidhivad āsa sametabandhuḥ kanyāmayena kumudaḥ kulabhūṣaṇena // Ragh_16.86

tasyāḥ spṛṣṭe manujapatinā sāhacaryāya haste māṅgalyorṇāvalayini puraḥ pāvakasyocchikhasya 
divyas tūryadhvanir udacarad vyaśnuvāno digantān gandhodagraṃ tadanau vavṛṣuḥ puṣpam āścaryameghāḥ // Ragh_16.87

itthaṃ nāgas tribhuvanaguror aurasaṃ maithileyaṃ labdhvā bandhuṃ tam api ca kuśaḥ pañcamaṃ takṣakasya 
ekaḥ śaṅkāṃ pitṛvadharipor atyajad vainateyāc chāntavyālām avanim aparaḥ paurakāntaḥ śaśāsa // Ragh_16.88

aithiṃ nāma kākutsthāt putraṃ āpakumudvatī 
paścimād yāminīyāmāt prasādam iva cetanā // Ragh_17.1

sa pituḥ pitṛmān vaṃśaṃ putraṃ āpakumudvatī 
apunāt savitevobhau mārgāv uttaradakṣiṇau // Ragh_17.2

tam ādau kulavidyānām artham arthavidāṃ varaḥ 
paścāt pārthivakanyānāṃ pāṇim agrāhayat pitā // Ragh_17.3

jātyas tenābhijātena śūraḥ śauryavatā kuśaḥ 
amanyataikam ātmānam anekaṃ vaśinā vaśī // Ragh_17.4

sa kulocitam indrasya sāhāyakam upeyivān 
jaghāna samare daityaṃ durjayaṃ tena so 'vadhi // Ragh_17.5

taṃ svasā nāgarājasya kumudasya kumudvatī 
anvagāt kumudānandaṃ śaśāṅkam iva kaumudī // Ragh_17.6

tayor divaspater āsīd ekaḥ siṃhāsanārdhabāk 
dvitīyāpi sakhī śacyāḥ pārijātāṃśabhāginī // Ragh_17.7

tadātmasaṃbhavaṃ rājye mantrivṛddāḥ samādadhuḥ 
smarantaḥ paścimām ājñāṃ bhartuḥ saṃgrāmayāyinaḥ // Ragh_17.8

te tasya kalpayām āsur abhiṣekāya śilpibhiḥ 
vimānaṃ navam udvedi catuḥstambhapratiṣṭam // Ragh_17.9

tatrainaṃ hemakumbheṣu saṃbhṛtais tīrthavāribhiḥ 
upatasthuḥ prakṛtayo bhadrapīṭhopaveśitam // Ragh_17.10

nadadhbiḥ snigdhagambhīraṃ tūryair āhatapuṣkaraiḥ 
anvamīyata kalyāṇaṃ tasyāvicchinnasaṃtati // Ragh_17.11

dūrvāyavāṅkuraplakṣa-tvagabhinnapuṭottarān 
jñātivṛddhaiḥ prayuktān sa bheje nīrājanāvidhīn // Ragh_17.12

purohitapurogās taṃ jiṣṇuṃ jaitrair atharvabhiḥ 
upacakramire pūrvam abhiṣektuṃ dvijātayaḥ // Ragh_17.13

tasyaughamahatī mūrdhni nipatantī vyarocata 
saśabdam abhiṣekaśrīr gaṅgeva tripuradviṣaḥ // Ragh_17.14

stūyamānaḥ kṣaṇe tasminn alakṣyata sa bandibhiḥ 
pravṛddha iva prajanyaḥ cātakair abhinanditaḥ // Ragh_17.15

tasya san mantrapūtābhiḥ snānam adbhiḥ pratīcchataḥ 
vavṛdhe vaidyutasyāgner vṛṣṭisekād iva dyutiḥ // Ragh_17.16

sa tāvad abhiṣekānte snātakebhyo dadau vasu 
yāvat teṣāṃ samāpyeran yajñāḥ paryāptadakṣiṇāḥ // Ragh_17.17

te prītamanasas tasmai yām āśiṣam udīrayan 
sā tasya karmanirvṛttair dūraṃ paścātkṛtā phalaiḥ // Ragh_17.18

bandhacchedaṃ sa baddhānāṃ vadhārhāṇām avadhyatām 
dhuryāṇāṃ ca dhuro mokṣam adohaṃ cādiṣad gavām // Ragh_17.19

krīḍāpatatriṇo 'py asya pañjarasthāḥ śukādayaḥ 
labdhamokṣās tadādeśād yatheṣṭagatayo 'bhavan // Ragh_17.20

tataḥ kakṣāntaranyastaṃ gajadantāsanaṃ śuci 
sottaracchadam adhyāsta nepathyagrahaṇāya saḥ // Ragh_17.21

taṃ dhūpāśyānakeśāntaṃ toyanirṇiktapāṇayaḥ 
ākalpasādhanais tais tair upaseduḥ prasādhakāḥ // Ragh_17.22

te'; sya muktāguṇonnaddhaṃ maulim antargatasrajam 
pratyūpuḥ padmarāgeṇa prabhāmaṇḍalaśobhinā // Ragh_17.23

candanenāṅgarāgaṃ ca mṛganābhisugandhinā 
samāpayya tataś cakruḥ pattraṃ vinyastarocanam // Ragh_17.24

āmuktābharaṇaḥ sragvī haṃsacihnadukūlavān 
āsīd atiśayaprekṣyaḥ sa rājyaśrīvadhūvaraḥ // Ragh_17.25

nepathyadarśinaś chāyā tasyādarśe hiraṇmaye 
virarājodite sūrye merau kalpataror iva // Ragh_17.26

sa rājakakudavyagra-pāṇibhiḥ pārśvavaribhiḥ 
yayāv udīritālokaḥ sudharmānavamāṃ sabhām // Ragh_17.27

vitānasahitaṃ tatra bheje paitṛkam āsanam 
cūḍāmaṇibhir udghṛṣṭa-pādapīṭhaṃ mahīkṣitām // Ragh_17.28

śuśubhe tena cākrāntaṃ maṅgalāyatanaṃ mahat 
śrīvatsalakṣaṇaṃ vakṣaḥ kaustubheneva kaiśavam // Ragh_17.29

babhau bhūyaḥ kumāratvād ādhirājyam avāpya saḥ 
rekhā bhāvād upārūḍhaḥ sāmagryam iva candramāḥ // Ragh_17.30

prasannamukharāgaṃ taṃ smitapūrvābhibhāṣiṇam 
mūrtimantam amanyanta viśvāsam anujīvinaḥ // Ragh_17.31

sa puraṃ puruhūtaśrīḥ kalpadrumanibhadhvajām 
kramamāṇaś cakāra dyāṃ nāgenairāvataujasā // Ragh_17.32

tasyaikasyocchritaṃ chattraṃ mūrdhni tenāmalatviṣā 
pūrvarājaviyogauṣmyaṃ kṛtsnasya jagato hṛtam // Ragh_17.33

dhūmād agneḥ śikhāḥ paścād udayād aṃśavo raveḥ 
so 'tītya tejasāṃ vṛttiṃ samam evotthito guṇaiḥ // Ragh_17.34

taṃ prītiviśadair netrair anvayuḥ paurayoṣitaḥ 
śaratprasannair jyotirbhir vibhāvarya iva dhruvam // Ragh_17.35

ayodhyādevatāś cainaṃ praśastāyatanārcitāḥ 
anudadhyur anudhyeyaṃ sāṃnidhyaiḥ pratimāgataiḥ // Ragh_17.36

yāvan nāśyāyate vedir abhiṣekajalāplutā 
tāvad evāsya velāntaṃ pratāpaḥ prāpa duḥsahaḥ // Ragh_17.37

vasiṣṭhasya guror mantrāḥ sāyakās tasya dhanvinaḥ 
kiṃ tat sādhyaṃ yad ubhaye sādhayeyur na saṃgatāḥ // Ragh_17.38

sa dharmasthasakhaḥ śaśvad arthipratyarthināṃ svayam 
dadarśa saṃśayacchedyān vyavahārān atandritaḥ // Ragh_17.39

tataḥ param abhivyaktā-saumanasyaniveditaiḥ 
yuyoja pākābhimukhair bhṛtyān vijñāpanāphalaiḥ // Ragh_17.40

prajās tadguruṇā nadyo nabhaseva vivardhitāḥ 
tasmiṃs tu bhūyasīṃ vṛddhiṃ nabhasye tā ivāyayuḥ // Ragh_17.41

yad uvāca na tan mithyā yad dadau na jahāra tat 
so 'bhūd bhagnavrataḥ śatrūn uddhṛtya pratiropayan // Ragh_17.42

vayorūpavibhūtīnām ekaikaṃ madakāraṇam 
tāni tasmin samastāni na tasyotsiṣice manaḥ // Ragh_17.43

itthaṃ janitarāgāsu prakṛtiṣv anuvāsaram 
akṣobhyaḥ sa navo 'py āsīd dṛḍhamūla iva drumaḥ // Ragh_17.44

anityāḥ śatravo bāhyā viprakṛṣṭāś ca te yataḥ 
ataḥ so 'bhyantarān nityān ṣaṭ pūrvam ajayad ripūn // Ragh_17.45

prasādābhimukhe tasmiṃś capalāpi svabhāvataḥ 
nikaṣe hemarekheva śrīr āsīd anapāyinī // Ragh_17.46

kātaryaṃ kevalā nītiḥ śauryaṃ śvāpadaceṣṭitam 
ataḥ siddhiṃ sametābhyām ubhābhyām anviyeṣa saḥ // Ragh_17.47

na tasya maṇḍale rājño nyastapraṇidhidīdhiteḥ 
adṛṣṭam abhavat kiṃcid vyabhrasyeva vivasvataḥ // Ragh_17.48

rātriṃdivavibhāgeṣu yad ādiṣṭaṃ mahīkṣitām 
tat siṣeve niyogena sa vikalpaparāṅmukhaḥ // Ragh_17.49

mantraḥ pratidinaṃ tasya babhūva saha mantribhiḥ 
sa jātu sevyamāno 'pi guptadvāro na sūcyate // Ragh_17.50

pareṣu sveṣu ca kṣiptair avijñātaparasparaiḥ 
so 'pasarpair jajāgāra yathākālaṃ svapann api // Ragh_17.51

durgāṇi durgrhāṇy āsaṃs tasya roddhur api dviṣām 
na hi siṃho gajāskandī bhayād giriguhāśayaḥ // Ragh_17.52

bahvyamukhyāḥ samārambhāḥ pratyavekṣyā niratyayāḥ 
garbhaśālisadharmāṇas tasya gūḍhaṃ vipecire // Ragh_17.53

apathena pravavṛte na jātūpacito 'pi saḥ 
vṛddhau nadīmukhenaiva prasthānaṃ lavaṇāmbhasaḥ // Ragh_17.54

kāmaṃ pratkṛtivairāgyaṃ sadyaḥ śamayituṃ kṣamaḥ 
yasya kāryaḥ pratīkāraḥ sa tan naivodapādayat // Ragh_17.55

śakeṣv evābhavad yātrā tasya śaktimataḥ sataḥ 
samīraṇasahāyo 'pi nāmbhaḥprārthī davānalaḥ // Ragh_17.56

na dharmam arthakāmābhyāṃ babādhe na ca tena tau 
nārthaṃ kāmena kāmaṃ vā so 'rthena sadṛśas triṣu // Ragh_17.57

hīnāny anupakartḥṇi pravṛddhāni vikurvate 
tena madhyamaśaktīni mitrāṇi shtāpitāny ataḥ // Ragh_17.58

parātmanoḥ paricchidya śaktyādīnāṃ balābalam 
yayāv ebhir baliṣṭhaś cet parasmād āsta so 'nyathā // Ragh_17.59

kośenāśrayaṇīyatvam iti tasyārthasaṃgrahaḥ 
ambugarbho hi jīmūtaś cātakair abhinandyate // Ragh_17.60

parakarmāpahaḥ so 'bhūd udyataḥ sveṣu karmasu 
āvṛṇod ātmano randhraṃ randhreṣu praharan ripūn // Ragh_17.61

pitrā saṃvardhito nityaṃ kṛtāstraḥ sāṃparāyikaḥ 
tasya daṇḍavato daṇḍaḥ svadehān na vyaśiṣyata // Ragh_17.62

sarpasyeva śiroratnaṃ nāsya śaktitrayaṃ paraḥ 
sa cakarṣa parasmāt tad ayaskānta ivāyasam // Ragh_17.63

vāpīṣv iva sravantīṣu vaneṣūpavaneṣv iva 
sārthāḥ svairaṃ svakīyeṣu cerur veśmasv ivādriṣu // Ragh_17.64

tapo rakṣan sa vighnebhyas taskarebhyaś ca saṃpadaḥ 
yathāsvam āśramaiś cakre varṇair api ṣaḍsaṃśabhāk // Ragh_17.65

khanibhiḥ suṣuve ratnaṃ kṣetraiḥ sasyaṃ vanair gajān 
dideśa vetanaṃ tasmai rakṣāsadṛśam eva bhūḥ // Ragh_17.66

sa guṇānāṃ balānāṃ ca ṣaṇṇāṃ ṣaṇmukhavikramaḥ 
babhūva viniyogajñaḥ sādhanīyeṣu vastuṣu // Ragh_17.67

iti kramāt prayuñjāno rāja nītiṃ caturvidhām 
ā tīrthād apratīghātaṃ sa tasyāḥ phalam ānaśe // Ragh_17.68

kūṭayuddhavidhijñe 'pi tasmin sanmārgayodhini 
bheje 'bhisārikāvṛttiṃ jayaśrīr vīragāminī // Ragh_17.69

prāyaḥ pratāpabhagnatvād arīṇāṃ tasya durlabhaḥ 
raṇo gandhavipasyeva gandhabhinnānyadantinaḥ // Ragh_17.70

pravṛddhau hīyate candraḥ samudro 'pi tathāvidhaḥ 
sa tu tasamavṛddhiś ca na cābhūt tāv iva kṣayī // Ragh_17.71

santas tasyābhigamanād atyarthaṃ mahataḥ kṛṣāḥ 
udadher iva jīmūtāḥ prāpur dātṛtvam arthinaḥ // Ragh_17.72

stūyamānaḥ sa jihrāya stutyam eva samācaran 
tathāpi vavṛdhe tasya tatkāridveṣino yaśaḥ // Ragh_17.73

duritaṃ darśanena ghnaṃs tattvārthena nudaṃs tamaḥ 
prajāḥ svatantrayāṃ cakre śaśvat sūrya ivoditaḥ // Ragh_17.74

indor agatayaḥ padme sūryasya kumude 'ṃśavaḥ 
guṇās tasya vipakṣe 'pi guṇino lebhire 'ntaram // Ragh_17.75

parābhisaṃdhānaparaṃ yady apy asya viceṣṭitam 
jigīṣor aśvamedhāya dharmyam eva babhūva tat // Ragh_17.76

evam udyan prabhāveṇa śāstgranirdiṣṭavartmanā 
vṛṣeva devo devānāṃ rājñāṃ rājā babhūva saḥ // Ragh_17.77

pañcamaṃ lokapālānāṃ tam ūcuḥ sāmyayogataḥ 
bhūtānāṃ mahatām ṣaṣṭham aṣṭamaṃ kulabhūbhṛtām // Ragh_17.78

dūrāpavarjitacchattrais tasyājñāṃ śāsanārpitām 
dadhuḥ śirobhir bhūpālā devaḥ pauraṃdarīm iva // Ragh_17.79

ṛtvijaḥ sa tathānarca dakṣiṇābhir mahākratau 
yathā sādhāraṇībhūtaṃ nāmāsya dhanadasya ca // Ragh_17.80

indrād vṛṣṭir niyamitagadodrekavṛttir yamo 'bhūd yādonāthaḥ śivajalapathaḥ karmaṇe naucarāṇām 
pūrvāpekṣī tadanu vidadhe kośavṛddhiṃ kuberas tasmin daṇḍopanatacaritaṃ bhejire lokapālāḥ // Ragh_17.81

sa naiṣadhasyārthapateḥ sutāyām utpādayām āsa niṣiddhaśatruḥ 
anūnasāraṃ niṣadhān nagendrāt putraṃ yam āhur niṣadhākhyam eva // Ragh_18.1

tenoruvīryeṇa pitā prajāyai kalpiṣyamāṇena nananda yūnā 
suvṛṣtiyogād iva jīvalokaḥ sasyena saṃpattiphalātmakena // Ragh_18.2

śabdādi nirviśya sukhaṃ cirāya tasmin pratiṣṭhāpitarājaśabdaḥ 
kaumudvateyaḥ kumudāvadātair dyām arjitāṃ karmabhir āruroha // Ragh_18.3

pautraḥ kuśasyāpi kuśeśayākṣaḥ sasāgarāṃ sāgaradhīracetāḥ 
ekātapoatrāṃ bhuvam ekavīraḥ purārgalādīrghabhujo bubhoja // Ragh_18.4

tasyānalaujās tanayas tadante vaṃśaśriyaṃ prāpa nalābhidhānaḥ 
yo naḍvalānīva gajaḥ pareṣāṃ balāny amṛdnān nalinābhavaktraḥ // Ragh_18.5

nabhaścarair gītayaśyāmatanuṃ tanūjam nabhastalaśyāmatanuṃ tanūjam 
khyātaṃ nabhaḥśabdamayena nāmnā kāntaṃ nabhomāsam iva prajānām // Ragh_18.6

tasmai viṣrjyottarakosalānāṃ dharmottaras tat prabhave prabhutvam 
mṛgair ajaryaṃ jaraspodaiṣṭam adehabandhāya punar babandha // Ragh_18.7

tena dvipānām iva puṇḍarīko rājñām ajayyo 'jani puṇḍarīkaḥ 
śānte pitary āhṛtapuṇḍarīkā yaṃ puṇḍarīkākṣam ivāśritā śrīḥ // Ragh_18.8

sa kṣemadhanvānam amoghadhanvā putraṃ prajākṣemavidhānadakṣam 
kṣmāṃ lambhayitvā kṣamayopapannaṃ vane tapaḥ kṣāntataraś cacāra // Ragh_18.9

anīkinīnāṃ samare 'grayāyī tasyāpi devapratimaḥ suto 'bhūt 
vyaśrūyatānīkapadāvasānaṃ devādi nāma tridive 'pi yasya // Ragh_18.10

pitā samārādhanatatpareṇa putreṇa putrī sa yathaiva tena 
putras tathaivādhikavatsalena sa tena pitrā pitṛmān babhūva // Ragh_18.11

pūrvas tayor ātmasame ciroḍhām ātmodbhave varṇacatuṣṭayasya 
dhuraṃ nidhāyaikanidhir guṇānām jagāma yajvā yajamānalokam // Ragh_18.12

vaśī sutas tasya vaśaṃvadatvāt sveṣām ivāsīd dviṣatām apīṣṭaḥ 
sakṛd (?) vivignān api hi prayuktaṃ mādhuryam īṣṭe hariṇān grahītum // Ragh_18.13

ahīnagur nāma sa gāṃ samagrām ahīnabāhudraviṇaḥ śaśāsa 
yo hīna saṃsargaparāṅmukhatvād mādhuryam īṣṭe hariṇān grahītum // Ragh_18.14

guroḥ sa cānantaram antarjñaḥ puṃsāṃ pumān ādya ivāvatīrṇaḥ 
upakramair askhalitaiś caturbhiś caturdigīśaś caturo babhūva // Ragh_18.15

tasmin prayāte paralokayātrāṃ jetary arīṇāṃ tanayaṃ tadīyam 
uccaiḥśirastvāj jitapāriyātraṃ lakṣmīḥ siṣeve kila pāriyātram // Ragh_18.16

tasyābhavat sūnur udāraśīlaḥ śilaḥ śilāpaṭṭaviśālavakṣāḥ 
jitāripakṣo 'pi śilīmukhair yaḥ śālīnatām avrajad īḍyamānaḥ // Ragh_18.17

tam ātmasaṃpannam aninditātmā kṛtvā yuvānaṃ yuvarājam eva 
sukhāni so 'bhuṅkta sukhoparodhi vṛttaṃ hi rājñām uparuddhavṛttam // Ragh_18.18

taṃ rāgabandhiṣv avitṛptam eva bhogeṣu saubhāgyaviśeṣabhogyam 
vilāsinīnām aratikṣamāpi jarā vṛthā matsariṇī jahāra // Ragh_18.19

unnābha ity udagtasnāmadheyas tasyāyathārthonnatanābhhirandhraḥ 
suto 'bhavat paṅkajanābhakalpaḥ kṛtsnasya nābhir nṛpamaṇḍalasya // Ragh_18.20

tataḥ paraṃ vajradharaprabhāvas tadātmajaḥ saṃyati vajraghoṣaḥ 
babhūva vajrākarabhuṣaṇāyāḥ patiḥ pṛthivyāḥ kila vajranābhaḥ // Ragh_18.21

tasmin gate dyāṃ sukṛtopalabdhāṃ tatsaṃbhavaṃ śaṅkhaṇam arṇavāntā 
utkhātaśatruṃ vasudhopatasthe ratnopahārair uditaiḥ khanibhyaḥ // Ragh_18.22

tasyāvasāne haridaśvadhāmā pitryaṃ prapede padam aśvirūpaḥ 
velātaṭeṣūṣitasainikāśvaṃ purāvido yaṃ dhyuṣitāśvam āhuḥ // Ragh_18.23

ārādhya viśveśvaram īśvareṇa tena kṣiter viśvasaho 'dhijajñe 
pātuṃ saho viśvasakhaḥ samagrāṃ viśvaṃbharām ātmajamūrtir ātmā // Ragh_18.24

aṃśe hiraṇyākśaripoḥ sa jāte hiraṇyanābhe tanaye nayajñaḥ 
dviṣām asahyaḥ sutarāṃ tarūṇāṃ hiraṇyaretā sānilo 'bhūt // Ragh_18.25

pitā pitḥṇām anṛṇas tam ante vayasy anantāni sukhāni lipsuḥ 
rājānam ājānuvilambibāhuṃ kṛtvā kṛtī valkalavān babhūva // Ragh_18.26

kausalya ity uttarakosalānāṃ patyuḥ pataṃgānvayabhūṣaṇasya 
tasyaurasaḥ somasutaḥ suto 'bhūn netrotsavaḥ soma iva dvitīyaḥ // Ragh_18.27

kausalya ity uttarakosalānāṃ sa brahmabhūyaṃ gatim ājagāma 
brahmiṣṭham ādhāya nije 'dhikāre brahmiṣṭham eva svatanuprasūtam // Ragh_18.28

yaśobhir ābrahmasabhaṃ prakāśaḥ samyag mahīṃ śāsati śāsanāṅkām 
prajāś ciraṃ suprajasi prajeśe nanandur ānandajalāvilākṣyaḥ // Ragh_18.29

pātrīkṛtātmā gurusevanena spṛṣṭākṛtiḥ pattrarathendraketoḥ 
taṃ putriṇāṃ puṣkarapattranetraḥ putraḥ samāropayad agrasaṃkhyām // Ragh_18.30

vaṃśasthitiṃ vaṃśakareṇa tena saṃbhāvya bhāvī sa sakhā maghonaḥ 
upaspṛṣan sparśanivṛttalaulyas tripuṣkareṣu tridaśatvam āpa // Ragh_18.31

tasya prabhānirjitapuṣpa-rāgaṃ pauṣyaṃ tithau puṣyam asūta patnī 
yasminn apuṣyann udite samagrāṃ puṣṭiṃ janāḥ puṣya iva dvitīye // Ragh_18.32

mahīṃ mahecchaḥ parikīrya sūnau manīṣiṇe jaiminaye 'rpitātmā 
tasmāt sayogād adhigamya yogam ajanmane 'kalpata janmabhīruḥ // Ragh_18.33

tataḥ paraṃ tatprabhavaḥ prapede dhruvopameyo dhruvasaṃdhir urvīm 
yasminn abhūj jyāyasi satyasaṃdhe saṃdhir dhruvaḥ saṃnamatām arīṇām // Ragh_18.34

sute śiśāv eva sudarśanākhye darśātyayendupriyadarśane saḥ 
mṛgāyatākṣo mṛgayāvihārī siṃhād avāpad vipadaṃ nṛsiṃhaḥ // Ragh_18.35

svargāminas tasya tam aikamatyād amātyavargaḥ kulatantum ekam 
anāthadīnāḥ prakṛtīr avekṣya sāketanāthaṃ vidhivac cakāra // Ragh_18.36

vavendunā tan nabhasopameyaṃ śāvaikasiṃhena ca kānanena 
raghoḥ kulaṃ kuḍmalapaṅkajena toyena cāprauṣhanarendram āsīt // Ragh_18.37

lokena bhāvī pitur eva tulyaḥ saṃbhāvito mauliparigrahāt saḥ 
dṛṣṭo hi vṛṇvan kalabhapramāṇo 'py āśāḥ purovātam avāpya meghaḥ // Ragh_18.38

taṃ rājavīthyām adhihasti yāntam ādhoraṇālambitam agryaveṣam 
ṣaḍvarṣadeśiyam api prabhutvāt praikṣanta paurāḥ pitṛgauraveṇa // Ragh_18.39

kāmaṃ na so 'kalpata paitṛkasya siṃhāsanasya pratipūraṇāya 
tejomahimnā punar āvṛtātmā tad vyāpa cāmīkarapiñjareṇa // Ragh_18.40

tasmād adhaḥ kiṃcid ivāvatīrṇāv asaṃspṛśantau tapanīyapīṭham 
sālaktakau bhūpatayaḥ prasiddhair vavandire maulibhir asya pādau // Ragh_18.41

maṇau mahānīla iti prabhāvād alpapramāṇe 'pi yathā na mithyā 
śabdo mahārāja iti pratītas tathaiva tasmin yuyuje 'rbhake 'pi // Ragh_18.42

paryantasaṃcāritacāmarasya kapolalolobhayakākapakṣat 
tasyānanād uccarito vivādaś cakshāla velāsv api nārṇavānām // Ragh_18.43

nirvṛttajāmbūnadapaṭṭaśobhe nyastaṃ lalāṭe tilakaṃ dadhānaḥ 
tenaiva śūnyāny arisundarīṇāṃ mukhāni sa smeramukhaś cakāra // Ragh_18.44

śirīṣapuṣpādhikasaukumāryaḥ khedaṃ sa yāyād api śrutavṛddhayogāt 
nitāntagurvīm api cānubhāvād dhuraṃ dharitryā bibharāṃ babhūva // Ragh_18.45

nyastākṣarām akṣarabhūmikāyāṃ kārtsnyena gṛhṇāti lipiṃ na yāvat 
sarvāṇi tāvac chrutavṛddhayogāt phalāny upāyuṅkta sa daṇḍanīteḥ // Ragh_18.46

urasy aparyāptabhāgā prauḍhībhaviṣyantam udīkṣamāṇā 
saṃjātalajjeva tam ātapatra-chhāyāchalenopajugūha lakṣmīḥ // Ragh_18.47

anaśnuvānena yugopamānam abaddhamaurvīkiṇalāñchanena 
aspṛṣṭakhaḍgatsaruṇāpi cāsīd rakṣāvatī tasya bhujena bhūmiḥ // Ragh_18.48

na kevalaṃ gacchati tasya kāle yayuḥ śarīrāvayavā vivṛddhim 
vaṃśyā guṇāḥ khalv api lokakāntāḥ prārambhasūkṣmāḥ prathimānam āpuḥ // Ragh_18.49

sa pūrvajanmāntaradṛṣṭapārāḥ smarann ivākleśakaro gurūṇām 
tisras trivargādhigamasya mūlaṃ jagrāha vidyāḥ prakṛtīś ca pitryāḥ // Ragh_18.50

vyūhya sthitaḥ kiṃcid ivottarārdham unnaddhacūḍo 'ñcitasvyajānuḥ 
ākarṇam ākṛṣṭasabānadhanvā vyarocat'; āste sa vinīyamānaḥ // Ragh_18.51

atha madhu vanitāṃ netranirveśanīyaṃ manasijatarupuṣpam rāgabandhapravālam 
akṛtakavidhi sarvāṅgīṇam ākalpajātaṃ vilasitapadam ādyaṃ yauvanaṃ sa prapede // Ragh_18.52

pratikṛtiracanābhayo dūtisaṃdarśitābhyaḥ samadhikatararūpāḥ śuddhasaṃtānakāmaiḥ 
adhivividur amātyair āhṛtās tasya yūnaḥ prathamaparigṛhīte śrībhuvau rājakanyāḥ // Ragh_18.53

agnivarṇam abhiṣicya rāghavaḥ sve pade tanayam agnitejasam 
śiśriye śrutavatām apaścimaḥ paścime vayasi naimiṣaṃ vaśī // Ragh_19.1

tatra tīrthasalilena dīrghikās talpam antaritabhūmibhiḥ kuśaiḥ 
saudhavāsam uṭajena vismṛtaḥ saṃcikāya phalaniḥspṛhas tapaḥ // Ragh_19.2

labdhapālanavidhau na tatsutaḥ khedam āpa guruṇā hi medinī 
bhoktum eva bhujanirjitadviṣā na prasādhayitum asya kalpitā // Ragh_19.3

so 'dhikāram abhikaḥ kulocitaṃ kāścana svayam avartayat samāḥ 
taṃ niveśya saciveṣv ataḥ paraṃ strīvidheyanavayauvano 'bhavat // Ragh_19.4

kāminīsahacarasya kāminas tasya veśmasu mṛdaṅganādiṣu 
ṛddhimantam adhikarddhir uttaraḥ pūrvam utsavam apohad utsavaḥ // Ragh_19.5

indriyārthapariśūnyam akṣarmaḥ soḍhum ekam api sa kṣaṇātaram 
antare ca viharan divāniśaṃ na vyapaikṣata samutsukāḥ prajāḥ // Ragh_19.6

gauravād yad api jātu mantriṇāṃ darśanaṃ prakṛtikāṅkṣitaṃ dadau 
tad gavākṣavivarāvalambinā kevalena caraṇena kalpitam // Ragh_19.7

taṃ kṛtapraṇatayo 'nujīvinaḥ komalātmanakharāgarūṣitam 
bhejire navadivākarātapa-spṛṣṭapaṅkajatulādhirohaṇam // Ragh_19.8

yuvanonnatavilāsinīstana-kṣobhalolakamalāś ca dīrghikāḥ 
gūḍhamohanagṛhās tadambubhiḥ sa vyagāhata vigāḍhamanmathaḥ // Ragh_19.9

tatra sekahṛtalocanāñjanair dhautarāgaparipāṭalādharaiḥ 
aṅganās tam adhikaṃ vyalobhayann arpitaprakṛtikāntibhir mukhaiḥ // Ragh_19.10

ghrāṇakāntamadhugandhakarṣiṇīḥ pānabhūmiracanāḥ priyāsakhaḥ 
abhyapadyata sa vāsitāsakhaḥ puṣpitāḥ kamalinīr iva dvipaḥ // Ragh_19.11

sātirekamadakāraṇaṃ rahas tena dattam abhileṣur aṅganāḥ 
tābhir apy upahṛtaṃ mukhāsavaṃ so 'pibad bakulatulyadohadaḥ // Ragh_19.12

aṅkam aṅkaparivartanocite tasya ninyatur aśūnyatām ubhe 
vallakī ca hṛdayaṃgamasvanā valguvāg api ca vāmalocanā // Ragh_19.13

sa svayaṃ prahatapuṣkaraḥ kṛtī lolamālyavalayo haran manaḥ 
nartakīr abhinayātilaṅghinīḥ pārśvavartiṣu guruṣv alajjavat // Ragh_19.14

cāru nṛtyavigame ca tanmukhaṃ svedabhinnatilakaṃ pariśramāt 
premadattavadanāniaḥ manaḥ so 'nvajīvad amarālakeśvarau // Ragh_19.15

tasya sāvaraṇadṛṣṭasaṃdhayaḥ kāmyavastuṣu naveṣu saṅginaḥ 
vallabhābhir upasṛtya cakrire sāmibhuktaviṣayāḥ samāgamāḥ // Ragh_19.16

aṅgulīkisalayāgratarjanaṃ bhrūvibhaṅgakuṭilaṃ ca vīkṣitam 
mekhalābhir asakṛc ca bandhanaṃ vañcayan praṇayinīr avāpa saḥ // Ragh_19.17

tena dūtividitaṃ niṣeduṣā pṛṣṭhataḥ suratavārarātriṣu 
śuśruve priyajanasya kātaraṃ vipralambhapariśaṅkino vacaḥ // Ragh_19.18

laulyam etya gṛhiṇīparigrahān nartakīṣv asulabhāsu tadvapuḥ 
vartate sma sa kathaṃcid ālikhann aṅgulīkṣaraṇasannavartikaḥ // Ragh_19.19

premagarvitavipakṣamatsarād āyatāc ca madanān mahīkṣitam 
ninyur utsavavidhicchalena taṃ devya ujjitaruṣaḥ kṛtārthatām // Ragh_19.20

prātar etya paribhogaśobhinā darśanena kṛtakhaṇḍanavyathāḥ 
prāñjaliḥ praṇayinīḥ prasādayan so 'dunot praṇayamantharaḥ punaḥ // Ragh_19.21

svapnakīrtitavipakṣam aṅganāḥ darśanena kṛtakhaṇḍanavyathāḥ 
pracchadāntagalitāśrubindubhiḥ krodhabhinnavalayair vivartanaiḥ // Ragh_19.22

kḷptapuṣpaśayanāṃl latāgṛhān etya dūtikṛtamārgadarśanaḥ 
anvabhūt parijanāṅganārataṃ so 'varodhabhayavepathūttaram // Ragh_19.23

nāma vallabhajanasya te mayā prāpya bhāgyam api tasya kāṅkṣyate 
lolupaṃ bata mano mameti taṃ gotraviskhalitam ūcur aṅganāḥ // Ragh_19.24

cūrṇababhru lulitasragākulaṃ chinnamekhalam alaktakāṅkitam 
utthitasya śayanaṃ vilāsinas tasya vibhramartatāny apāvṛṇot // Ragh_19.25

sa svayaṃ caraṇarāgam ādadhe yoṣitaṃ na ca tathā samāhitaḥ 
lobhyamānanayanaḥ ślathāṃśukair mekhalāguṇapadair nitambibhiḥ // Ragh_19.26

cumbane viparivartitādharaṃ hastarodhi raśanāvighaṭṭane 
vighniteccham api tasya sarvato manmathendhanam abhūd vadhūratam // Ragh_19.27

darpaṇeṣu paribhogadarśinīr narmapūrvam anupṛṣṭhasaṃsthitaḥ 
chāyayā smitamanojñayā vadhūr hrīnimīlitamukhīś cakāra saḥ // Ragh_19.28

kaṇṭhasaktamṛdubāhubandhanaṃ nyastapādatalam agrapādayoḥ 
prārthayanta śayanotthitaṃ priyās taṃ niśātyayavisargacumbanam // Ragh_19.29

prekṣya darpaṇatalstham ātmano rājaveṣam atiśakraśobhinam 
pipriye sa na tathā yathā yuvā vyaktalakṣma paribhogamaṇḍanam // Ragh_19.30

mitrakṛtyam apadiśya pārśvataḥ prasthitaṃ tam anavasthitaṃ priyāḥ 
vidma he śaṭha palāyanacchalāny añjaseti rurudhuḥ kacagrahaiḥ // Ragh_19.31

tasya nirdayaratiśramālasāḥ kaṇṭhasūtram apadiśyayoṣitaḥ 
adhyaśerata bṛhad (?) bhujāntaraṃ pīvarastanaviluptacandanam // Ragh_19.32

saṃgamāya niśi gūḍhacāriṇaṃ cāradūtikathitaṃ puro gatāḥ 
vañcayiṣyasi kutas tamovṛtaḥ kāmuketi cakṛṣus tam aṅganāḥ // Ragh_19.33

yoṣitām uḍupater ivāciṣāṃ sparśanirvṛtim asāv anāpnuvan 
āruroha kumudākaropamāṃ rātrijāgaraparo divāśayaḥ // Ragh_19.34

veṇunā daśanapīḍitādharā vīṇayā nakhapadāṅkitoravaḥ 
śilapakārya ubhayena vejitās taṃ vijihmanayanā vyalobhayan // Ragh_19.35

aṅgasattvavacanāśrayaṃ mithaḥ strīṣu nṛtyam upadhāya darśayan 
sa prayoganipuṇaiḥ prayoktṛbhiḥ saṃjagharṣa saha mitrasaṃnidhau // Ragh_19.36

aṃsalambikuṭajārjunasrajas tasya nīparajasāṅgarāgiṇaḥ 
prāvṛṣi pramadabarhiṇeṣv abhūt kṛtimādriṣu vihāravibhramaḥ // Ragh_19.37

vigrahāc ca śayane parāṅmukhīr nānunetum abalāḥ sa tatvare 
ācakāṅkṣa ghanaśabdaviklavās tā vivṛtya viśatīr bhujāntaram // Ragh_19.38

kārttikīṣu savitānaharmyabhāg yāminīṣu lalitāṅganāsakhaḥ 
anvabhuṅkta surataśramāpahāṃ meghamuktaviśadāṃ sa candrikām // Ragh_19.39

saikataṃ ca sarayūṃ vivṛṇvatīṃ śroṇibimbam iva haṃsamekhalam 
svapriyāvilasitānukāriṇīṃ saudhajālvivarair vyalokayat // Ragh_19.40

marmarair agurudhūpagandhibhir vyaktahemarśanais tam ekataḥ 
jahrur āgrathanamokṣalolupaṃ haimanair nivsanaiḥ sumadhyamāḥ // Ragh_19.41

arpitastimitadīpadṛṣṭayo garbhaveśmasu nivātakukṣiṣu 
tasya sarvasuratāntarakṣamāḥ sākṣitāṃ śiśirarātrayo yayuḥ // Ragh_19.42

dakṣiṇena pavanena saṃbhṛtaṃ prekṣya cūtakusumaṃ sapallavam 
anvanaiṣur avadhūtavigrahās taṃ durutsahaviyogam aṅganāḥ // Ragh_19.43

tāḥ svam aṅkam adhiropya dolayā preṅkhayan parijanāpaviddhayā 
muktarajju nibiḍaṃ bhayacchalāt kaṇṭhabandhanam avāpa bāhubhiḥ // Ragh_19.44

taṃ payodharaniṣaktacandanair mauktikagrathitacārubhūṣaṇaiḥ 
grīṣmaveṣavidhibhiḥ siṣevire śroṇilambimaṇimekhalāḥ priyāḥ // Ragh_19.45

yat sa bhagnasahakāram āsavaṃ raktapāṭalasamāgamaṃ papau 
tena tasya madhunirgamāt kṛśaś cittayonir abhavat punarnavaḥ // Ragh_19.46

evam indriyasukhāni nirviśann anyakāryavimukhaḥ sa pārthivaḥ 
ātmalakṣaṇaniveditān ṛtūn atyavāhayad anaṅgavāhitaḥ // Ragh_19.47

taṃ pramattam api na prabhāvataḥ śekur ākramitum anyapārthivāḥ 
āmayas tu ratirāgasaṃbhavo dakṣaśāpa iva candram akṣiṇot // Ragh_19.48

dṛṣṭadoṣam api tan na so 'tyajat saṅgavastu bhiṣajām anāśravaḥ 
svādubhis tu viṣayair hṛtas tato duḥkham indriyagaṇo nivāryate // Ragh_19.49

tasya pāṇḍuvadanālpabhūṣaṇā sāvalambagamanā mṛdusvanā 
yakṣmaṇāpi parihānir āyayau kāmayānasamavasthayā tulām // Ragh_19.50

vyoma paścimakalāsthitendu vā paṅkaśeṣam iva gharmapalvalam 
rājñi tatkulam abhūt kṣayāture vāmanārcir iva dīpabhājanam // Ragh_19.51

bāḍham eṣu divaseṣu karma sādhayati putrajanmane 
ity adarśitarujo 'sya mantriṇaḥ śaśvad ūcur aghaśaṅkinīḥ prajāḥ // Ragh_19.52

sa tv anekavanitāsakho 'pi san pāvanīm anavalokya saṃtatim 
vaidyayatnaparibhāvinaṃ gadaṃ na pradīpa iva vāyum atyagāt // Ragh_19.53

taṃ gṛhopavana eva saṃgatāḥ paścimakratuvidā purodhasā 
rogaśāntim apadiśya mantriṇaḥ saṃbhṛte śikhini gūḍham ādadhuḥ // Ragh_19.54

taiḥ kṛtaprakṛtimukhyasaṃgrahair āśu tasya sahadharmacāriṇī 
sādhu dṛṣṭaśubhagarbhalakṣaṇā pratyapadyata narādhipaśriyam // Ragh_19.55

tasyās tathāvidhanarendravipattiśokād uṣṇair vilocanajalaiḥ prathamābhitaptaḥ 
nirvāpitaḥ kanakakumbhamukhojjhitena vaṃśābhiṣekavidhinā śiśireṇa garbhaḥ // Ragh_19.56

taṃ bhāvāya prasavasamayākāṅkṣiṇīnāṃ prajānām antargūḍhaṃ kṣitir iva babhau bījamuṣṭiṃ dadhānā 
maulaiḥ sārdhaṃ sthavirasacivair hemasiṃhāsanasthā rājñī rājyaṃ vidhivad aśiṣad bhartur avyāhatājñā // Ragh_19.57
 additional verses (kṣepaka) 
ākīryamāṇam āsanna-vidhibhiḥ samidāharaiḥ 
vaikhānasair adṛśyāgni-pratyudgamanavṛttibhiḥ // Ragh_1.49*

imāṃ devīm ṛtusnātāṃ smṛtvā sapadi satvaraḥ 
pradakṣiṇakriyātītas tasyāḥ kopam ajījanaḥ // Ragh_1.75*

tāmralalāṭajāṃ rekhāṃ bibhratī sāsitetarām 
saṃdhyā prātipadeneva pratibhinnā himāṃśunā // Ragh_1.82*

gāndharvam astraṃ tad itaḥ pratīccha prayogasaṃhāravibhaktamantram 
saṃdhyā prātipadeneva na cārihiṃsā vijayaḥ svahaste // Ragh_5.57*

nidrāvaśaṃ tvayi gate śaśinā kathaṃcid ātmānam ānanarucā bhavato viyujya 
lakṣmīr vibhātasamaye 'pi hi darśanena paryutsukā praṇayinī niśi khaṇḍiteva // Ragh_5.67*

mandaṃ vivāti himasaṃbhṛtaśītabhāvaḥ saṃsṛjyate sarasijair aruṇāṃśubhinnaiḥ 
saurabhyam īpsur iva te mukhamārutasya yan no guṇān prati niśāpariṇāmavāyuḥ // Ragh_5.69*

iti sa vihatanidras talpam alpetarāṃśaḥ suragaja iva gaṅgāsaikataṃ supratīkaḥ 
parijanavanitānāṃ pādayor vyāpṛtānāṃ valayamaṇividiṣṭaṃ pracchadāntaṃ mumoca // Ragh_5.75*

sa tatra mañceṣu vimānakalpeṣv ākalpasaṃmūrchitarūpaśobhān 
siṃhāsanasthān nṛpatīn apaśyat yūpān praśastān iva haimavedīn // Ragh_6.1*

yadā yadā rājakumārikāsau na pūrvapūrvaṃ ganayāṃ cakāra 
tadā tadā nāmitarepharekhām āśālatā pallavinī babhūva // Ragh_6.67*

lalāṭabaddhabhṛkuṭītaraṅgais tanutyajāṃ dantanipīḍitoṣṭhaiḥ 
ātastare bhallanikṛttakaṇṭhair huṃkāragarbhair dviṣatāṃ śirobhiḥ // Ragh_7.38*

atha vīkṣya guṇaiḥ pratiṣṭhitaṃ prakṛtiṣv ātmajam ābhigamikaiḥ 
padavīṃ pariṇāmadeśinīṃ raghur ādatta vanāntagāminīm // Ragh_8.9*

namas trimūrtaye tubhyaṃ guṇatrayavibhāgāya 
prāk sṛṣṭe[ḥ] kevalātmane paścād bhad[r]am upeyuṣe // Ragh_10.19*

te 'pi tūrṇam avagamya śāmbhavam āsamāharaṇakarmatatparāḥ 
svāṃ sakṣiptatikarkaśaṃ hi tac cikṣipur daśāarathātmajāgrataḥ // Ragh_11.43*

nistriṃśakalpasya nidher jalānām eṣā tamāladrumarāja nīlā 
dūrād arālabhru vibhāti velā kalaṅkarekhā malineva dhārā // Ragh_13.15*

pratyāgatau tatra cirapravāsād apaśyatāṃ dāśarathī jananyau 
kumudvatī śītamarīcilekhe diveva rūpāntaradurvibhāvye // Ragh_14.1*

keyaṃ vane lakṣmaṇa lakṣmaṇeti dīnākṣaraṃ roditi yoṣid uccaiḥ 
āṃ jñātam eṣā janakātmajeti kavir vicintyāntikam ājagāma // Ragh_14.69*

tad ākarṇya muner vākyaṃ rāmo rājīvalocanaḥ 
samaṃ harṣaviṣādābhyāṃ yuyuje nītikovidaḥ // Ragh_15.71*

gaccha lakṣmaṇa śīghraṃ tvaṃ mā bhūd dharmaviparyayaḥ 
tyāgo vāpi vadho vāpi sādhūnām ubhayaṃ samam // Ragh_15.94*

tasmād babhūvātha dalābhidhāno dalānvitaḥ padmadalābhadṛṣṭiḥ 
kundāgra danto ripudantisiṃhaḥ patiḥ pṛthivyāḥ kulakair ivenduḥ // Ragh_18.16*

hitvātha bhogāṃs tapasottamena triviṣṭapaṃ prāptavati kṣitīśe 
tadātmajaḥ sāgaradhīracetāḥ śaśāsa pṛthvīṃ sakalāṃ nṛsomaḥ // Ragh_18.19*
Notes: Distributed under a Creative Commons Attribution-NonCommercial-ShareAlike 4.0 International License (https://creativecommons.org/licenses/by-nc-sa/4.0/)
Holder of rights: Göttingen Register of Electronic Texts in Indian Languages (GRETIL), SUB Göttingen
Citation Suggestion for this Object: TextGrid Repository (2022). 1_sanskr. tei. transformations. plaintext. sa_kAlidAsa-raghuvaMza. GRETIL. Göttingen Register of Electronic Texts in Indian Languages (GRETIL), SUB Göttingen. https://hdl.handle.net/21.T11991/0000-001C-8D5F-A