• GRETIL
• 1_sanskr
• tei
• transformations
• plaintext
• sa_zivasaMkalpopaniSad

          Śivasaṃkalpopaniṣad


# Header

  This file is a plain text transformation of http://gretil.sub.uni-goettingen.de/gretil/corpustei/sa_zivasaMkalpopaniSad.xml
  with a rudimentary header. For a more extensive header please refer to the source file.

## Data entry: Maximilian Mehner
## Contribution: Maximilian Mehner
## Date of this version: 2019-11-01

## Source: 
   - Scheftelowitz, Isidor: »Śivasaṅkalpopaniṣad.« In: Zeitschrift der Deutschen Morgenländischen Gesellschaft 75 (1921), pp. 201-212.

## Publisher: Göttingen Register of Electronic Texts in Indian Languages (GRETIL), SUB Göttingen

## Licence:
   This e-text was provided to GRETIL in good faith that no copyright rights have been infringed. If anyone wishes to assert copyright over this file, please contact the GRETIL management at gretil(at)sub(dot)uni-goettingen(dot)de. The file will be immediately removed pending resolution of the claim.
   Distributed under a Creative Commons Attribution-NonCommercial-ShareAlike 4.0 International License.

## Structure of references:
   A reference is assembled consisting of
   - a pragmatic abbreviation of the title: Śivasaṃkalpopaniṣad = ŚSU,
   - the number of the verse in arabic numerals.


# Text

yenedaṃ bhūtaṃ bhuvanaṃ bhaviṣyat parigṛhītam amṛtena sarvam
yena yajñas tāyate saptahotā tan me manaś śivasaṃkalpam astu ŚSU_1

yena karmāṇy apaso manīṣiṇo yajñe kṛṇvanti vidatheṣu dhīrāḥ
yad apūrvaṃ yakṣam antaḥ prajānāṃ tan me manaś śivasaṃkalpam astu ŚSU_2

yat prajñānam uta ceto dhṛtiś ca yaj jyotir antar amṛtaṃ prajāsu
yasmān na ṛte kiṃ cana karma kriyate tan me manaś śivasaṃkalpam astu ŚSU_3

yaj jāgrato dūram udaiti daivaṃ tad u suptasya tathaivaiti
dūraṃgamaṃ jyotiṣāṃ jyotir ekaṃ tan me manaś śivasaṃkalpam astu ŚSU_4

yasmin ṛcas sāma yajūṃṣi yasmin pratiṣṭhitā rathanābhāv ivārāḥ
yasmiṃś cittaṃ sarvam otam prajānāṃ tan me manaś śivasaṃkalpam astu ŚSU_5

suṣārathir aśvān iva yan manuṣyān nenīyatebhīśubhir vājina iva
hṛtpratiṣṭhaṃ yad ajiraṃ javiṣṭhaṃ tan me manaś śivasaṃkalpam astu ŚSU_6

yad atra ṣaṣṭhaṃ triśataṃ śarīraṃ yajñasya guhyaṃ navanābham ādyam
daśa pañcatriṃśataṃ yat paraṃ ca tan me manaś śivasaṃkalpam astu ŚSU_7

ye pañca pañcā daśataṃ śataṃ ca sahasraṃ ca niyutaṃ nyarbudaṃ ca
te yajñacitteṣṭakāttaṃ śarīraṃ tan me manaś śivasaṃkalpam astu ŚSU_8

vedāham etaṃ puruṣaṃ mahāntam ādityavarṇaṃ tamasaḥ parastāt
tasya yoniṃ paripaśyanti dhīrās tan me manaś śivasaṃkalpam astu ŚSU_9

yena karmāṇi pracaranti dhīrā viprā vācā manasā karmaṇā ca
saṃvidam anu saṃyanti prāṇinas tan me manaś śivasaṃkalpam astu ŚSU_10

ye mano hṛdayaṃ ye ca devā ye antarikṣe bahudhā caranti
ye śrotraṃ cakṣuṣī saṃcaranti tan me manaś śivasaṃkalpam astu ŚSU_11

yena dyaur ugrā pṛthivī cāntarikṣaṃ ye parvatāḥ pradiśo diśaś ca
yenedaṃ jagad vyāptaṃ prajānāṃ tan me manaś śivasaṃkalpam astu ŚSU_12

yenedaṃ sarvaṃ jagato babhūvur ye devā api mahato jātavedāḥ
tad evāgnitapaso jyotir ekaṃ tan me manaś śivasaṃkalpam astu ŚSU_13

acintyaṃ cāprameyaṃ ca vyaktāvyaktaparaṃ ca yat
sūkṣmāt sūkṣmataraṃ jñānaṃ tan me manaḥ śivasaṃkalpam astu ŚSU_14

asti vināśayitvā sarvam idaṃ nāsti punas tathaivā dṛṣṭaṃ dhruvaṃ
asti nāsti hitaṃ madhyamaṃ padaṃ tan me manaḥ śivasaṃkalpam astu ŚSU_15

asti nāsti viparīto pravāho 'sti nāsti sarvaṃ vā idaṃ guhyam
asti nāsti parāt paro yat paraṃ tan me manaḥ śivasaṃkalpam astu ŚSU_16

parāt parataraṃ yasya tatparāc caiva tat paraṃ
tatparāt paratojñeyaṃ tan me manaḥ śivasaṃkalpam astu ŚSU_17

parāt parataro brahma tatparāt parato hariḥ
tatparāt parato hy eṣa tan me manaḥ śivasaṃkalpam astu ŚSU_18

gobhir juṣṭo dhanena hy āyuṣā ca balena ca
prajayā paśubhiḥ puṣkalādyaṃ tan me manaḥ śivasaṃkalpam astu ŚSU_19

prayataḥ praṇavo nityaṃ paramaṃ puruṣottamaṃ
oṃkāraṃ param ātmānaṃ tan me manaḥ śivasaṃkalpam astu ŚSU_20

yo vai vedādiṣu gāyatrī sarvavyāpī maheśvaraḥ
yad dviruktaṃ tathādvyaiśyaṃ tan me manaḥ śivasaṃkalpam astu ŚSU_21

yo vai veda mahādevam paramaṃ puruṣottamaṃ
yaḥ sarvaṃ yasya cit sarvaṃ tan me manaḥ śivasaṃkalpam astu ŚSU_22

yo 'sau sarveṣu vedeṣu pathate hy aja īśvaraḥ
akāyo nirguṇo dhyātvā tan me manaḥ śivasaṃkalpam astu ŚSU_23

kailāśaśikhare ramye śaṃkarasya śubhe gṛhe
devatās tatra modyanti tan me manaḥ śivasaṃkalpam astu ŚSU_24

kailāśaśikharābhāsā hi bhavad girisaṃsthitāḥ
nīlakaṇṭhaṃ trinetraṃ ca tan me manaḥ śivasaṃkalpam astu ŚSU_25

ābrahmastambaparyantaṃ trailokyaṃ sacarācaram
utpātitaṃ jagad vyāptaṃ tan me manaḥ śivasaṃkalpam astu ŚSU_26

ya imaṃ śivasaṃkalpam sadā dhyāyanti brāhmaṇāḥ
te paramokṣaṃ gamiṣyanti tan me manaḥ śivasaṃkalpam astu ŚSU_27

tryambakaṃ yajāmahe sugandhiṃ puṣṭivardhanaṃ
urvārukam iva bandhanān mṛtyor mukṣīya māmṛtāt tan me manaḥ śivasaṃkalpam astu ŚSU_28