sugirā cittahāriṇyā paśyantyā dṛśyamānayā
jayaty ullāsitānandamahimā parameśvaraḥ //
yaḥ sphītaḥ śrīdayābodhaparamānandasampadā
vidyoddyotitamāhātmyaḥ sa jayaty aparājitaḥ //
prasaradbindunādāya śuddhāmṛtamayātmane
namo 'nantaprakāśāya śaṃkarakṣīrasindhave //
dviṣmas tvāṃ tvāṃ stumas tubhyaṃ mantrayāmo 'mbikāpate
ativāllabhyataḥ sādhu viśvaṅ no dhṛtavān asi //
saṃhṛtasparśayogāya sampūrṇāmṛtasūtaye
viyanmāyāsvarūpāya vibhave śambhave namaḥ //
bhinneṣv api na bhinnaṃ yac chinneṣv achinnam eva ca
namāmaḥ sarvasāmānyaṃ rūpaṃ tat pārameśvaram //
praṇavordhvārdhamātrāto 'py aṇave mahate punaḥ
brahmāṇḍād api nairguṇyaguṇāya sthāṇave namaḥ //
brahmāṇḍagarbhiṇīṃ vyomavyāpinaḥ sarvatogateḥ
parameśvarahaṃsasya śaktiṃ haṃsīm iva stumaḥ //
nirupādānasambhāram abhittāv eva tanvate
jagaccitraṃ namas tasmai kalāślāghyāya śūline //
māyājalodarāt samyag uddhṛtya vimalīkṛtam
śivajñānaṃ svato dugdhaṃ dehy ehi harahaṃsa naḥ //
ṣaṭpramāṇīparicchedabhedayoge 'py abhedine
paramārthaikabhāvāya baliṃ yāmo bhavāya te //
api paśyema gambhīrāṃ pareṇa jyotiṣābhitaḥ
unmṛṣṭatamasaṃ ramyām antarbhava bhavadguhām //
namas tebhyo 'pi ye somakalākalitaśekharam
nāthaṃ svapne 'pi paśyanti paramānandadāyinam //
bhagavan bhava bhāvatkaṃ bhāvaṃ bhāvayituṃ ruciḥ
punarbhavabhayocchedadakṣā kasmai na rocate //
yāvajjīvaṃ jagannātha kartavyam idam astu naḥ
tvatprasādāt tvadekāgramanaskatvena yā sthitiḥ //
śākhāsahasravistīrṇavedāgamamayātmane
namo 'nantaphalotpādakalpavṛkṣāya śambhave //
vāṅmanaḥkāyakarmāṇi viniyojya tvayi prabho
tvanmayībhūya nirdvandvāḥ kaccit syāmāpi karhicit //
jagatāṃ sargasaṃhāratattaddhitaniyuktiṣu
ananyāpekṣasāmarthyaśālini śūline namaḥ //
vyatītaguṇayogasya mukhyadhyeyasya dhūrjaṭeḥ
nāmāpi dhyāyatāṃ dhyānaiḥ kim anyālambanaiḥ phalam //
namo namaḥ śivāyeti mantrasāmarthyam āśritāḥ
ślāghyās te śāmbhavīṃ bhūtim upabhoktuṃ ya udyatāḥ //
kaḥ panthā yena na prāpyaḥ kā ca vāṅ nocyase yayā
kiṃ dhyānaṃ yena na dhyeyaḥ kiṃ vā kiṃ nāsi yat prabho //
arcito 'yam ayaṃ dhyāta eṣa toṣita ity ayam
rasaḥ srotaḥsahasreṇa tvayi me bhava vardhatām //
namo niḥśeṣadhīpatrimālālayamayātmane
nāthāya sthāṇave tubhyaṃ nāgayajñopavītine //
ajñānatimirasyaikam auṣadhaṃ saṃsmṛtis tava
bhava tattatpradānena prasādaḥ kriyatāṃ mayi //
nama īśāya niḥśeṣapuruṣārthaprasādhakaḥ
praṇantavyaḥ praṇāmo 'pi yadīya iha dhīmatām //
magnair bhīme bhavāmbhodhau nilaye duḥkhayādasām
bhakticintāmaṇiṃ śārvaṃ tataḥ prāpya na kiṃ jitam //
nirāvaraṇanirdvandvaniścalajñānasampadām
jñeyo 'si kila ke 'py ete ye tvāṃ jānanti dhūrjaṭe //
nirguṇo 'pi guṇajñānāṃ jñeya eko jayaty ajaḥ
niṣkāmo 'pi prakṛtyā yaḥ kāmanānāṃ paraṃ phalam //
śrīratnāmṛtalābhāya kliṣṭaṃ yatra na kaiḥ suraiḥ
tat kṣīrodadam aiśvaryaṃ tavaiva sahajaṃ vibho //
namo bhaktyā nṛṇāṃ muktyai bhavate bhava te 'vate
smṛtyā nutyā ca dadate śambhave śaṃ bhave 'bhave //
sarvajñaḥ sarvakṛt sarvam asīti jñānaśālinām
vedyaṃ kiṃ karma vā nātha nānantyāya tvayārpyate //
icchāyā eva yasyeyat phalaṃ lokatrayātmakam
tasya te nātha kāryāṇāṃ ko vetti kiyatī gatiḥ //
brahmādayo 'pi tad yasya karmasopānamālayā
upary upari dhāvanti labdhuṃ dhāma namāmi tam //
ayaṃ brahmā mahendro 'yaṃ sūryācandramasāv imau
iti śaktilatā yasya puṣpitā pātv asau bhavaḥ //
bhramo na labhyate yasya bhrāntāntaḥkaraṇair api
dūragair api yasyānto durgam astaṃ stumo mṛḍam //
namaḥ stutau smṛtau dhyāne darśane sparśane tathā
prāptau cānandavṛndāya dayitāya kapardine //
kiṃ smayeneti matvāpi manasā parameśvara
smayena tvanmayo 'smīti māmi nātmani kiṃ mudā //
cintayitvāpi kartavyakoṭīś cittasya cāpalāt
viśrāmyan bhava bhāvatkacittānande rame bhṛśam //
sūkṣmo 'pi cet trilokīyaṃ kalāmātraṃ kathaṃ tava
sthūlo 'tha kiṃ sudarśo na brahmādibhir api prabho //
vācya eṣāṃ tvam eveti nābhaviṣyad idaṃ yadi
kaḥ kleśaṃ deva vāgjāleṣv akariṣyat sudhīs tadā //
krameṇa karmaṇā kena kayā vā prajñayā prabho
dṛśyo 'sīty upadeśena prasādaḥ kriyatāṃ mama //
namo nirupakāryāya trailokyaikopakāriṇe
sarvasya spṛhaṇīyāya niḥspṛhāya kapardine //
aho kṣetrajñatā seyaṃ kāryāya mahate satām
yayānantaphalāṃ bhaktiṃ vapanti tvayy amī prabho //
mahatīyam aho māyā tava māyin yayāvṛtaḥ
tvaddhyānanidhilābhe 'pi mugdho lokaḥ ślathāyate //
ārambhe bhava sarvatra karma vā karaṇādi vā
viśvam astu svatantras tu kartā tatraikako bhavān //
triguṇatriparispandadvandvagrastaṃ jagattrayam
uddhartuṃ bhavato 'nyasya kasya śaktiḥ kṛpāthavā //
doṣo 'pideva ko doṣas tvām āptuṃ yaḥ samāsthitaḥ
guṇo 'pi ca guṇaḥ ko nu tvāṃ nāptuṃ yaḥ samāsthitaḥ //
rāgo 'py astu jagannātha mama tvayy eva yaḥ sthitaḥ
lobhāyāpi namas tasmai tvallābhālambanāya me //
aho mahad idaṃ karma deva tvadbhāvanātmakam
ābrahmakrimi yasmin no muktaye 'dhikriyeta kaḥ //
ārambhaḥ sarvakāryāṇāṃ paryantaḥ sarvakarmaṇām
tadantarvṛttayaś citrās tavaiveśo dhiyaḥ pathi //
yāvad uttaram āsvādasahasraguṇavistaraḥ
tvadbhaktirasapīyūṣān nātha nānyatra dṛśyate //
upasaṃhṛtakāmāya kāmāyatim atanvate
avataṃsitasomāya somāya svāmine namaḥ //
kim aśaktaḥ karomīti sarvatrānadhyavasyataḥ
sarvānugrāhikā śaktiḥ śāṃkarī śaraṇaṃ mama //
guṇātītasya nirdiṣṭaniḥśeṣātiśayātmanaḥ
labhyate bhava kutrāṃśe paraḥ pratinidhis tava //
nirdvandve nirupādhau ca tvayy ātmani sati prabho
vayaṃ vañcyāmahe 'dyāpi māyayāmeyayā tava //
aṇimādiguṇāvāptiḥ sadaiśvaryaṃ bhavakṣayaḥ
amī bhava bhavadbhaktikalpapādapapallavāḥ //
yā yā dik tatra na kvāsi sarvaḥ kālo bhavanmayaḥ
iti labdho 'pi karhi tvaṃ lapsyase nātha kathyatām //
namaḥ prasannasadvṛttamānasaikanivāsine
bhūribhūtisitāṅgāya mahāhaṃsāya śambhave //
hṛtoddhatatamastāntiḥ pluṣṭāśeṣabhavendhanā
tvadbodhadīpikā me 'stu nātha tvadbhaktidīpikā //
visṛṣṭānekasadbījagarbhaṃ trailokyanāṭakam
prastāvya hara saṃhartuṃ tvattaḥ ko 'nyaḥ kaviḥ kṣamaḥ //
namaḥ sadasatāṃ kartum asattvaṃ sattvam eva vā
svatantrāyāsvatantrāya vyayaiśvaryaikaśāline //
trailokye 'py atra yo yāvān ānandaḥ kaścid īkṣyate
sa bindur yasya taṃ vande devam ānandasāgaram //
aho brahmādayo dhanyā ye vimuktānyasaṃkatham
namo namaḥ śivāyeti japanty āhlādavihvalāḥ //
niṣkāmāyāpi kāmānām anantānāṃ vidhāyine
anāditve 'pi viśvasya bhoktre bhava namo 'stu te //
stumas tribhuvanārambhamūlaprakṛtim īśvaram
lipseran nopakāraṃ ke yataḥ sampūrṇadharmaṇaḥ //
mahatsv apy arthakṛcchreṣu mohaughamalinīkṛtāḥ
smṛte yasmin prasīdanti matayas taṃ śivaṃ stumaḥ //
prabho bhavata eveha prabhuśaktir abhaṅgurā
yadicchayā pratāyete trailokyasya layodayau //
kukarmāpi yam uddiśya devaṃ syāt sukṛtaṃ param
sukṛtasyāpi saukṛtyaṃ yato 'nyatra na so 'si bhoḥ //
eṣa muṣṭyā gṛhīto 'si dṛṣṭa eṣa kva yāsi naḥ
iti bhaktirasādhmātā dhanyā dhāvanti dhūrjaṭim //
stumas tvām ṛgyajuḥsāmnāṃ śukrataḥ parataḥ param
yasya vedātmikājñeyam aho gambhīrasundarī //
vidhir ādis tathānto 'si viśvasya parameśvara
dharmagrāmaḥ pravṛtto yas tvatto na sa kuto bhavet //
namas te bhavasambhrāntabhrāntim udbhāvya bhindate
jñānānandaṃ ca nirdvandvaṃ deva vṛtvā vivṛṇvate //
yasyāḥ prāpyeta paryantaviśeṣaḥ kair manorathaiḥ
māyām ekanimeṣeṇa muṣṇaṃs tāṃ pātu naḥ śivaḥ //
vairāgyasya gatiṃ gurvīṃ jñānasya paramāṃ śriyam
naiḥspṛhyasya parāṃ koṭiṃ bibhratāṃ tvaṃ prabho prabhuḥ //
brahmaṇo 'pi bhavān brahma kasya neśas tvam īśituḥ
jagatkalyāṇakalyāṇaṃ kiyat tvam iti vetti kaḥ //
kim anyair bandhubhiḥ kiṃ ca suhṛdbhiḥ svāmibhis tathā
sarvasthāne mameśa tvaṃ ya uddhartā bhavārṇavāt //
jayanti mohamāyādimalasaṃkṣālanakṣamāḥ
śaivayogabalākṛṣṭā divyapīyūṣavipruṣaḥ //
gāyatryā gīyate yasya dhiyāṃ tejaḥ pracodakam
codayed api kaccin naḥ sa dhiyaḥ satpathe prabhuḥ //
aṣṭamūrte kim ekasyām api mūrtau na naḥ sthitim
śāśvatīṃ kuruṣe yad vā tuṣṭaḥ sarvaṃ kariṣyasi //
vastutattvaṃ padārthānāṃ prāyeṇārthakriyākaram
bhavatas tv īśa nāmāpi mokṣaparyantasiddhidam //
muhur muhur jagaccitrasy-ānyānyāṃ sthitim ūhitum
śaktir yā te tayā nātha ko manasvī na vismitaḥ //
duṣkaraṃ sukarīkartuṃ duḥkhaṃ sukhayituṃ tathā
ekavīrā smṛtir yasya taṃ smarāmaḥ smaradviṣam //
jayanti gītayo yāsāṃ sa geyaḥ parameśvaraḥ
yannāmnāpi mahātmānaḥ kīryante pulakāṅkuraiḥ //
bhavān iva bhavān eva bhaved yadi paraṃ bhava
svaśaktivyūhasaṃvyūḍhatrailokyārambhasaṃhṛtiḥ //
mantro 'si mantraṇīyo 'si mantrī tvattaḥ kuto 'paraḥ
sa mahyaṃ dehi taṃ mantraṃ tvanmantraḥ syāṃ yathā prabho //
bhārūpaḥ satyasaṃkalpas tvam ātmā yasya so 'py aham
saṃsārīti kim īśaiṣa svapnaḥ so 'pi kutas tvayi //
tad abhaṅgi tad agrāmyaṃ tad ekam upapattimat
tvayi karmaphalanyāsakṛtām aiśvaryam īśa yat //
kṣamaḥ kāṃ nāpadaṃ hantuṃ kāṃ dātuṃ sampadaṃ na vā
yo 'sau sa dayito 'smākaṃ devadevo vṛṣadhvajaḥ //
māyāmayamalāndhasya divyasya jñānacakṣuṣaḥ
nirmalīkaraṇe nātha tvadbhaktiḥ paramāñjanam //
nirbhayaṃ yad yad ānandamayam ekaṃ yad avyayam
padaṃ dehy ehi me deva tūrṇaṃ tat kiṃ pratīkṣase //
aho nisargagambhīro ghoraḥ saṃsārasāgaraḥ
aho tattaraṇopāyaḥ paraḥ ko 'pi maheśvaraḥ //
namaḥ kṛtakṛtāntānta tubhyaṃ madanamardine
mastakanyastagaṅgāya yathāyuktārthakāriṇe //
aiśvaryajñānavairāgyadharmebhyo 'py upari sthitim
nātha prārthayamānānāṃ tvad ṛte kā parā gatiḥ //
tvayy anicchati kaḥ śambho śaktaḥ kubjayituṃ tṛṇam
tvadicchānugṛhītas tu vahed brāhmīṃ dhuraṃ na kaḥ //
harapraṇatimāṇikyamukuṭotkaṭamastakāḥ
nameyuḥ kaṃ paraṃ kaṃ vā namayeyur na dhīdhanāḥ //
sarvavibhramanirmokaniṣkampam amṛtahradam
bhavajjñānāmbudher madhyam adhyāsīyāpi dhūrjaṭe //
citraṃ yac citradṛṣṭo 'pi manorathagato 'pi vā
paramārthaphalaṃ nātha paripūrṇaṃ prayacchasi //
ko guṇair adhikas tvattas tvattaḥ ko nirguṇo 'dhikaḥ
iti nātha numaḥ kiṃ tvāṃ kiṃ nindāmo na manmahe //
kīrtane 'py amṛtaughasya yatprasatteḥ phalaṃ tava
tat pātum api ko 'nyo 'laṃ kim u dātuṃ jagatpate //
niḥśeṣaprārthanīyārthasārthasiddhinidhānataḥ
tvattas tvadbhaktim evāptuṃ prārthaye nātha sarvathā //
namas trailokyanāthāya tubhyaṃ bhava bhavajjuṣām
trilokīnāthatādānanirvināyakaśaktaye //
niḥśeṣakleśahānasya hetuḥ ka iti saṃśaye
svāmin so 'sīti niścitya kas tvāṃ na śaraṇaṃ gataḥ //
bhuktvā bhogān bhavabhrāntiṃ hitvā lapsye paraṃ padam
ity āśaṃseha śobheta śambhau bhaktimataḥ param //
nātha svapne 'pi yat kuryāṃ brūyāṃ vā sādhv asādhu vā
tvadadhīnatvadarpeṇa sarvatrātrāsmi nirvṛtaḥ //
jyotiṣām api yaj jyotis tatra tvaddhāmni dhāvataḥ
cittasyeśa tamaḥsparśo manye vandhyātmajānujaḥ //
manye nyastapadaḥ so 'pi kṣemye mokṣasya vartmani
manorathaḥ sthito yasya seviṣye śivam ity ayam //
sthityutpattilayair lokatrayasyopakriyāsv iha
ekaiveśa bhavacchaktiḥ svatantraṃ tantram īkṣase //
trilokyām iha kas trātas tritāpyā nopatāpitaḥ
tasmai namo 'stu te yas tvaṃ tannirvāṇāmṛtahradaḥ //
kṛtrimāpi bhavadbhaktir akṛtrimaphalodayā
niśchadmā ced bhaved eṣā kiṃphaleti tvayocyatām //
tac cakṣur īkṣyase yena sā gatir gamyase yayā
phalaṃ tad aja jātaṃ yat tvatkathākalpapādapāt //
śreyasā śreya evaitad upari tvayi yā sthitiḥ
tadantarāyahṛtaye tvam īśa śaraṇaṃ mama //
aho svādutamaḥ śarvasevāśaṃsāsudhārasaḥ
kutra kālakalāmātre na yo navanavāyate //
muhur muhur aviśrāntas trailokyaṃ kalpanāśataiḥ
kalpayann api ko 'py eko nirvikalpo jayaty ajaḥ //
malatailāktasaṃsāravāsanāvartidāhinā
jñānadīpena deva tvāṃ kadā nu syām upasthitaḥ //
nimeṣam api yady ekaṃ kṣīṇadoṣe kariṣyasi
padaṃ citte tadā śambho kiṃ na sampādayiṣyasi //
dhanyo 'smi kṛtakṛtyo 'smi mahān asmīti bhāvanā
bhavet sālambanā tasya yas tvadālambanaḥ prabho //
śubhāśubhasya sarvasya svayaṃ kartā bhavān api
bhavadbhaktis tu jananī śubhasyaiveśa kevalam //
prasanne manasi svāmin kiṃ tvaṃ niviśase kim u
tvatpraveśāt prasīdet tad iti dolāyate janaḥ //
niścayaḥ punar eṣo 'tra tvadadhiṣṭhānam eva hi
prasādo manasaḥ svāmin sā siddhis tat paraṃ padam //
vacaś cetaś ca kāryaṃ ca śarīraṃ mama yat prabho
tvatprasādena tad bhūyād bhavadbhāvaikabhūṣaṇam //
stavacintāmaṇiṃ bhūrimanorathaphalapradam
bhaktilakṣmyālayaṃ śambho bhaṭṭanārāyaṇo vyadhāt //
sugirā cittahāriṇyā paśyantyā dṛśyamānayā |
jayati+ullāsitānandamahimā parameśvaraḥ ||
yas+sphītas+śrīdayābodhaparamānandasampadā |
vidyoddyotitamāhātmyas+sa jayati+aparājitaḥ ||
prasaradbindunādāya śuddhāmṛtamayātmane |
namas+anantaprakāśāya śaṃkarakṣīrasindhave ||
dviṣmas+tvām+tvām+stumas+tubhyam+mantrayāmas+ambikāpate |
ativāllabhyatas+sādhu viśvak+no dhṛtavān+asi ||
saṃhṛtasparśayogāya sampūrṇāmṛtasūtaye |
viyanmāyāsvarūpāya vibhave śambhave namaḥ ||
bhinneṣu+api na bhinnam+yat+chinneṣu+achinnam+eva ca |
namāmas+sarvasāmānyam+rūpam+tat+pārameśvaram ||
praṇavordhvārdhamātrātas+api+aṇave mahate punaḥ |
brahmāṇḍāt+api nairguṇyaguṇāya sthāṇave namaḥ ||
brahmāṇḍagarbhiṇīm+vyomavyāpinas+sarvatogateḥ |
parameśvarahaṃsasya śaktim+haṃsīm+iva stumaḥ ||
nirupādānasambhāram+abhittau+eva tanvate |
jagaccitram+namas+tasmai kalāślāghyāya śūline ||
māyājalodarāt+samyak+uddhṛtya vimalīkṛtam |
śivajñānam+svatas+dugdham+dehi+ehi harahaṃsa naḥ ||
ṣaṭpramāṇīparicchedabhedayoge+api+abhedine |
paramārthaikabhāvāya balim+yāmas+bhavāya te ||
api paśyema gambhīrām+pareṇa jyotiṣā+abhitaḥ |
unmṛṣṭatamasam+ramyām+antarbhava bhavadguhām ||
namas+tebhyas+api ye somakalākalitaśekharam |
nātham+svapne+api paśyanti paramānandadāyinam ||
bhagavan+bhava bhāvatkam+bhāvam+bhāvayitum+ruciḥ |
punarbhavabhayocchedadakṣā kasmai na rocate ||
yāvajjīvam+jagannātha kartavyam+idam+astu naḥ |
tvatprasādāt+tvadekāgramanaskatvena yā sthitiḥ ||
śākhāsahasravistīrṇavedāgamamayātmane |
namas+anantaphalotpādakalpavṛkṣāya śambhave ||
vāṅmanaḥkāyakarmāṇi viniyojya tvayi prabho |
tvanmayībhūya nirdvandvās+kaccit+syāma+api karhicit ||
jagatām+sargasaṃhāratattaddhitaniyuktiṣu |
ananyāpekṣasāmarthyaśālini śūline namaḥ ||
vyatītaguṇayogasya mukhyadhyeyasya dhūrjaṭeḥ |
nāma+api dhyāyatām+dhyānais+kim+anyālambanais+phalam ||
namas+namas+śivāya+iti mantrasāmarthyam+āśritāḥ |
ślāghyās+te śāmbhavīm+bhūtim+upabhoktum+ye+udyatāḥ ||
kas+panthās+yena na prāpyas+kā ca vāk+na+ucyase yayā |
kim+dhyānam+yena na dhyeyas+kim+vā kim+na+asi yat+prabho ||
arcitas+ayam+ayam+dhyātas+eṣa toṣitas+iti+ayam |
rasas+srotaḥsahasreṇa tvayi me bhava vardhatām ||
namas+niḥśeṣadhīpatrimālālayamayātmane |
nāthāya sthāṇave tubhyam+nāgayajñopavītine ||
ajñānatimirasya+ekam+auṣadham+saṃsmṛtis+tava |
bhava tattatpradānena prasādas+kriyatām+mayi ||
namas+īśāya niḥśeṣapuruṣārthaprasādhakaḥ |
praṇantavyas+praṇāmas+api yadīyas+iha dhīmatām ||
magnais+bhīme bhavāmbhodhau nilaye duḥkhayādasām |
bhakticintāmaṇim+śārvam+tatas+prāpya na kim+jitam ||
nirāvaraṇanirdvandvaniścalajñānasampadām |
jñeyas+asi kila ke+api+ete ye tvām+jānanti dhūrjaṭe ||
nirguṇas+api guṇajñānām+jñeyas+ekas+jayati+ajaḥ |
niṣkāmas+api prakṛtyā yas+kāmanānām+param+phalam ||
śrīratnāmṛtalābhāya kliṣṭam+yatra na kais+suraiḥ |
tat+kṣīrodadam+aiśvaryam+tava+eva sahajam+vibho ||
namas+bhaktyā nṛṇām+muktyai bhavate bhava te+avate |
smṛtyā nutyā ca dadate śambhave śam+bhave+abhave ||
sarvajñas+sarvakṛt+sarvam+asi+iti jñānaśālinām |
vedyam+kim+karma vā nātha na+ānantyāya tvayā+arpyate ||
icchāyās+eva yasya+iyat+phalam+lokatrayātmakam |
tasya te nātha kāryāṇām+kas+vetti kiyatī gatiḥ ||
brahmādayas+api tat+yasya karmasopānamālayā |
upari+upari dhāvanti labdhum+dhāma namāmi tam ||
ayam+brahmā mahendras+ayam+sūryācandramasau+imau |
iti śaktilatā yasya puṣpitā pātu+asau bhavaḥ ||
bhramas+na labhyate yasya bhrāntāntaḥkaraṇais+api |
dūragais+api yasya+antas+durgam+astam+stumas+mṛḍam ||
namas+stutau smṛtau dhyāne darśane sparśane tathā |
prāptau ca+ānandavṛndāya dayitāya kapardine ||
kim+smayena+iti matvā+api manasā parameśvara |
smayena tvanmayas+asmi+iti māmi na+ātmani kim+mudā ||
cintayitvā+api kartavyakoṭīs+cittasya cāpalāt |
viśrāmyan+bhava bhāvatkacittānande rame bhṛśam ||
sūkṣmas+api cet+trilokī+iyam+kalāmātram+katham+tava |
sthūlas+atha kim+sudarśas+na brahmādibhis+api prabho ||
vācyas+eṣām+tvam+eva+iti na+abhaviṣyat+idam+yadi |
kas+kleśam+deva vāgjāleṣu+akariṣyat+sudhīs+tadā ||
krameṇa karmaṇā kena kayā vā prajñayā prabho |
dṛśyas+asi+iti+upadeśena prasādas+kriyatām+mama ||
namas+nirupakāryāya trailokyaikopakāriṇe |
sarvasya spṛhaṇīyāya niḥspṛhāya kapardine ||
aho kṣetrajñatā sā+iyam+kāryāya mahate satām |
yayā+anantaphalām+bhaktim+vapanti tvayi+amī prabho ||
mahatī+iyam+aho māyā tava māyin+yayā+āvṛtaḥ |
tvaddhyānanidhilābhe+api mugdhas+lokas+ślathāyate ||
ārambhe bhava sarvatra karma vā karaṇādi vā |
viśvam+astu svatantras+tu kartā tatra+ekakas+bhavān ||
triguṇatriparispandadvandvagrastam+jagattrayam |
uddhartum+bhavatas+anyasya kasya śaktis+kṛpā+athavā ||
doṣas+apideva kas+doṣas+tvām+āptum+yas+samāsthitaḥ |
guṇas+api ca guṇas+kas+nu tvām+na+āptum+yas+samāsthitaḥ ||
rāgas+api+astu jagannātha mama tvayi+eva yas+sthitaḥ |
lobhāya+api namas+tasmai tvallābhālambanāya me ||
aho mahat+idam+karma deva tvadbhāvanātmakam |
ābrahmakrimi yasmin+no muktaye+adhikriyeta kaḥ ||
ārambhas+sarvakāryāṇām+paryantas+sarvakarmaṇām |
tadantarvṛttayas+citrās+tava+eva+īśas+dhiyas+pathi ||
yāvat+uttaram+āsvādasahasraguṇavistaraḥ |
tvadbhaktirasapīyūṣāt+nātha na+anyatra dṛśyate ||
upasaṃhṛtakāmāya kāmāyatim+atanvate |
avataṃsitasomāya somāya svāmine namaḥ ||
kim+aśaktas+karomi+iti sarvatra+anadhyavasyataḥ |
sarvānugrāhikā śaktis+śāṃkarī śaraṇam+mama ||
guṇātītasya nirdiṣṭaniḥśeṣātiśayātmanaḥ |
labhyate bhava kutra+aṃśe paras+pratinidhis+tava ||
nirdvandve nirupādhau ca tvayi+ātmani sati prabho |
vayam+vañcyāmahe+adya+api māyayā+ameyayā tava ||
aṇimādiguṇāvāptis+sadā+aiśvaryam+bhavakṣayaḥ |
amī bhava bhavadbhaktikalpapādapapallavāḥ ||
yā yā dik+tatra na kva+asi sarvas+kālas+bhavanmayaḥ |
iti labdhas+api karhi tvam+lapsyase nātha kathyatām ||
namas+prasannasadvṛttamānasaikanivāsine |
bhūribhūtisitāṅgāya mahāhaṃsāya śambhave ||
hṛtoddhatatamastāntis+pluṣṭāśeṣabhavendhanā |
tvadbodhadīpikā me+astu nātha tvadbhaktidīpikā ||
visṛṣṭānekasadbījagarbham+trailokyanāṭakam |
prastāvya hara saṃhartum+tvattas+kas+anyas+kavis+kṣamaḥ ||
namas+sadasatām+kartum+asattvam+sattvam+eva vā |
svatantrāya+asvatantrāya vyayaiśvaryaikaśāline ||
trailokye+api+atra yas+yāvān+ānandas+kaścit+īkṣyate |
sa bindus+yasya tam+vande devam+ānandasāgaram ||
aho brahmādayas+dhanyās+ye vimuktānyasaṃkatham |
namas+namas+śivāya+iti japanti+āhlādavihvalāḥ ||
niṣkāmāya+api kāmānām+anantānām+vidhāyine |
anāditve+api viśvasya bhoktre bhava namas+astu te ||
stumas+tribhuvanārambhamūlaprakṛtim+īśvaram |
lipseran+na+upakāram+ke yatas+sampūrṇadharmaṇaḥ ||
mahatsu+api+arthakṛcchreṣu mohaughamalinīkṛtāḥ |
smṛte yasmin+prasīdanti matayas+tam+śivam+stumaḥ ||
prabho bhavatas+eva+iha prabhuśaktis+abhaṅgurā |
yadicchayā pratāyete trailokyasya layodayau ||
kukarmā+api yam+uddiśya devam+syāt+sukṛtam+param |
sukṛtasya+api saukṛtyam+yatas+anyatra na sas+asi bhoḥ ||
eṣa muṣṭyā gṛhītas+asi dṛṣṭas+eṣa kva yāsi naḥ |
iti bhaktirasādhmātās+dhanyās+dhāvanti dhūrjaṭim ||
stumas+tvām+ṛgyajuḥsāmnām+śukratas+paratas+param |
yasya vedātmikājñeyam+aho gambhīrasundarī ||
vidhis+ādis+tathā+antas+asi viśvasya parameśvara |
dharmagrāmas+pravṛttas+yas+tvattas+na sa kutas+bhavet ||
namas+te bhavasambhrāntabhrāntim+udbhāvya bhindate |
jñānānandam+ca nirdvandvam+deva vṛtvā vivṛṇvate ||
yasyās+prāpyeta paryantaviśeṣas+kais+manorathaiḥ |
māyām+ekanimeṣeṇa muṣṇan+tām+pātu nas+śivaḥ ||
vairāgyasya gatim+gurvīm+jñānasya paramām+śriyam |
naiḥspṛhyasya parām+koṭim+bibhratām+tvam+prabho prabhuḥ ||
brahmaṇas+api bhavān+brahma kasya na+īśas+tvam+īśituḥ |
jagatkalyāṇakalyāṇam+kiyat+tvam+iti vetti kaḥ ||
kim+anyais+bandhubhis+kim+ca suhṛdbhis+svāmibhis+tathā |
sarvasthāne mama+īśa tvam+yas+uddhartā bhavārṇavāt ||
jayanti mohamāyādimalasaṃkṣālanakṣamāḥ |
śaivayogabalākṛṣṭās+divyapīyūṣavipruṣaḥ ||
gāyatryā gīyate yasya dhiyām+tejas+pracodakam |
codayet+api kaccit+nas+sa dhiyas+satpathe prabhuḥ ||
aṣṭamūrte kim+ekasyām+api mūrtau na nas+sthitim |
śāśvatīm+kuruṣe yat+vā tuṣṭas+sarvam+kariṣyasi ||
vastutattvam+padārthānām+prāyeṇa+arthakriyākaram |
bhavatas+tu+īśa nāma+api mokṣaparyantasiddhidam ||
muhus+muhus+jagaccitrasya+anyānyām+sthitim+ūhitum |
śaktis+yā te tayā nātha kas+manasvī na vismitaḥ ||
duṣkaram+sukarīkartum+duḥkham+sukhayitum+tathā |
ekavīrā smṛtis+yasya tam+smarāmas+smaradviṣam ||
jayanti gītayas+yāsām+sa geyas+parameśvaraḥ |
yannāmnā+api mahātmānas+kīryante pulakāṅkuraiḥ ||
bhavān+iva bhavān+eva bhavet+yadi param+bhava |
svaśaktivyūhasaṃvyūḍhatrailokyārambhasaṃhṛtiḥ ||
mantras+asi mantraṇīyas+asi mantrī tvattas+kutas+aparaḥ |
sa mahyam+dehi tam+mantram+tvanmantras+syām+yathā prabho ||
bhārūpas+satyasaṃkalpas+tvam+ātmā yasya sas+api+aham |
saṃsārī+iti kim+īśa+eṣa svapnas+sas+api kutas+tvayi ||
tat+abhaṅgi tat+agrāmyam+tat+ekam+upapattimat |
tvayi karmaphalanyāsakṛtām+aiśvaryam+īśa yat ||
kṣamas+kām+na+āpadam+hantum+kām+dātum+sampadam+na vā |
yas+asau sa dayitas+asmākam+devadevas+vṛṣadhvajaḥ ||
māyāmayamalāndhasya divyasya jñānacakṣuṣaḥ |
nirmalīkaraṇe nātha tvadbhaktis+paramāñjanam ||
nirbhayam+yat+yat+ānandamayam+ekam+yat+avyayam |
padam+dehi+ehi me deva tūrṇam+tat+kim+pratīkṣase ||
aho nisargagambhīras+ghoras+saṃsārasāgaraḥ |
aho tattaraṇopāyas+paras+kas+api maheśvaraḥ ||
namas+kṛtakṛtāntānta tubhyam+madanamardine |
mastakanyastagaṅgāya yathāyuktārthakāriṇe ||
aiśvaryajñānavairāgyadharmebhyas+api+upari sthitim |
nātha prārthayamānānām+tvat+ṛte kā parā gatiḥ ||
tvayi+anicchati kas+śambho śaktas+kubjayitum+tṛṇam |
tvadicchānugṛhītas+tu vahet+brāhmīm+dhuram+na kaḥ ||
harapraṇatimāṇikyamukuṭotkaṭamastakāḥ |
nameyus+kam+param+kam+vā namayeyus+na dhīdhanāḥ ||
sarvavibhramanirmokaniṣkampam+amṛtahradam |
bhavajjñānāmbudhes+madhyam+adhyāsīya+api dhūrjaṭe ||
citram+yat+citradṛṣṭas+api manorathagatas+api vā |
paramārthaphalam+nātha paripūrṇam+prayacchasi ||
kas+guṇais+adhikas+tvattas+tvattas+kas+nirguṇas+adhikaḥ |
iti nātha numas+kim+tvām+kim+nindāmas+na manmahe ||
kīrtane+api+amṛtaughasya yatprasattes+phalam+tava |
tat+pātum+api kas+anyas+alam+kim+u dātum+jagatpate ||
niḥśeṣaprārthanīyārthasārthasiddhinidhānataḥ |
tvattas+tvadbhaktim+eva+āptum+prārthaye nātha sarvathā ||
namas+trailokyanāthāya tubhyam+bhava bhavajjuṣām |
trilokīnāthatādānanirvināyakaśaktaye ||
niḥśeṣakleśahānasya hetus+kas+iti saṃśaye |
svāmin+sas+asi+iti niścitya kas+tvām+na śaraṇam+gataḥ ||
bhuktvā bhogān+bhavabhrāntim+hitvā lapsye param+padam |
iti+āśaṃsā+iha śobheta śambhau bhaktimatas+param ||
nātha svapne+api yat+kuryām+brūyām+vā sādhu+asādhu vā |
tvadadhīnatvadarpeṇa sarvatra+atra+asmi nirvṛtaḥ ||
jyotiṣām+api yat+jyotis+tatra tvaddhāmni dhāvataḥ |
cittasya+īśa tamaḥsparśas+manye vandhyātmajānujaḥ ||
manye nyastapadas+sas+api kṣemye mokṣasya vartmani |
manorathas+sthitas+yasya seviṣye śivam+iti+ayam ||
sthityutpattilayais+lokatrayasya+upakriyāsu+iha |
ekā+eva+īśa bhavacchaktis+svatantram+tantram+īkṣase ||
trilokyām+iha kas+trātas+tritāpyā na+upatāpitaḥ |
tasmai namas+astu te yas+tvam+tannirvāṇāmṛtahradaḥ ||
kṛtrimā+api bhavadbhaktis+akṛtrimaphalodayā |
niśchadmā cet+bhavet+eṣā kiṃphalā+iti tvayā+ucyatām ||
tat+cakṣus+īkṣyase yena sā gatis+gamyase yayā |
phalam+tat+aja jātam+yat+tvatkathākalpapādapāt ||
śreyasā śreyas+eva+etat+upari tvayi yā sthitiḥ |
tadantarāyahṛtaye tvam+īśa śaraṇam+mama ||
aho svādutamas+śarvasevāśaṃsāsudhārasaḥ |
kutra kālakalāmātre na yas+navanavāyate ||
muhus+muhus+aviśrāntas+trailokyam+kalpanāśataiḥ |
kalpayan+api kas+api+ekas+nirvikalpas+jayati+ajaḥ ||
malatailāktasaṃsāravāsanāvartidāhinā |
jñānadīpena deva tvām+kadā nu syām+upasthitaḥ ||
nimeṣam+api yadi+ekam+kṣīṇadoṣe kariṣyasi |
padam+citte tadā śambho kim+na sampādayiṣyasi ||
dhanyas+asmi kṛtakṛtyas+asmi mahān+asmi+iti bhāvanā |
bhavet+sālambanā tasya yas+tvadālambanas+prabho ||
śubhāśubhasya sarvasya svayam+kartā bhavān+api |
bhavadbhaktis+tu jananī śubhasya+eva+īśa kevalam ||
prasanne manasi svāmin+kim+tvam+niviśase kim+u |
tvatpraveśāt+prasīdet+tat+iti dolāyate janaḥ ||
niścayas+punar+eṣas+atra tvadadhiṣṭhānam+eva hi |
prasādas+manasas+svāmin+sā siddhis+tat+param+padam ||
vacas+cetas+ca kāryam+ca śarīram+mama yat+prabho |
tvatprasādena tat+bhūyāt+bhavadbhāvaikabhūṣaṇam ||
stavacintāmaṇim+bhūrimanorathaphalapradam |
bhaktilakṣmyālayam+śambhos+bhaṭṭanārāyaṇas+vyadhāt ||
- Notizen
- Distributed under a Creative Commons Attribution-NonCommercial-ShareAlike 4.0 International License (https://creativecommons.org/licenses/by-nc-sa/4.0/)
- Rechtsinhaber*in
- Göttingen Register of Electronic Texts in Indian Languages (GRETIL), SUB Göttingen
- Zitationsvorschlag für dieses Objekt
- TextGrid Repository (2022). 1_sanskr. tei. sa_bhaTTanArAyaNa-stavacintAmaNi. GRETIL. Göttingen Register of Electronic Texts in Indian Languages (GRETIL), SUB Göttingen. https://hdl.handle.net/21.T11991/0000-001C-930C-F