// namo mañjuśriye kumārabhūtāya //
ācāryavasubandhupraṇītaḥ
Trisvabhāvanirdeśaḥ (Tsn)
kalpitaḥ paratantraśca pariniṣpanna eva ca /
trayaḥ svabhāvā dhīrāṇāṃ gambhīrajñeyamiṣyate // Tsn_1 //
yat khyāti paratantro 'sau yathā khyāti sa kalpitaḥ /
pratyayādhīnavṛttitvāt kalpanāmātrabhāvataḥ // Tsn_2 //
tasya khyāturyathākhyānaṃ yā sadāvidyamānatā /
jñeyaḥ sa pariniṣpannasvabhāvo 'nanyathātvataḥ // Tsn_3 //
tatra kiṃ khyātyasatkalpaḥ kathaṃ khyāti dvayātmanā /
tasya kā nāstitā tena yā tatrādvayadharmatā // Tsn_4 //
asatkalpo 'tra kaścittaṃ yatastena hi kalpyate /
yathā ca kalpayatyartha tathātyantaṃ na vidyate // Tsn_5 //
taddhetuphalabhāvena cittaṃ dvividhamiṣyate /
yadālayākhyaṃ vijñānaṃ pravṛttyākhyaṃ ca saptadhā // Tsn_6 //
saṃkleśavāsanābījaiścitatvāccittamucyate /
cittamādyaṃ dvitīyaṃ tu citrākārapravṛttitaḥ // Tsn_7 //
samāsato 'bhūtakalpaḥ sa caiṣa trividho mataḥ /
vaipākikastathā naimittiko 'nyaḥ prātibhāsikaḥ // Tsn_8 //
prathamo mūlavijñānaṃ tadvipākātmakaṃ yataḥ /
anyaḥ pravṛttivijñānaṃ dṛśyadṛgvittivṛttitaḥ // Tsn_9 //
sadasattvād dvayaikatvāt saṃkleśavyavadānayoḥ /
lakṣaṇābhedataśceṣṭā svabhāvānāṃ gaṃbhīratā // Tsn_10 //
sattvena gṛhyate yasmādatyantābhāva eva ca /
svabhāvaḥ kalpitastena sadasallakṣaṇo mataḥ // Tsn_11 //
vidyate bhrāntibhāvena yathākhyānaṃ na vidyate /
paratantro yatastena sadasallakṣaṇo mataḥ // Tsn_12 //
advayatvena yaccāsti dvayasyābhāva eva ca /
svabhāvastena niṣpannaḥ sadasallakṣaṇo mataḥ // Tsn_13 //
dvaividhyāt kalpitārthasya tadasattvaikabhāvataḥ /
svabhāvaḥ kalpito bālairdvayaikatvātmako mataḥ // Tsn_14 //
prakhyānād dvayabhāvena bhrāntimātraikabhāvataḥ /
svabhāvaḥ paratantrākhyo dvayaikatvātmako mataḥ // Tsn_15 //
dvayābhāvasvabhāvatvādadvayaikasvabhāvataḥ /
svabhāvaḥ pariniṣpanno dvayaikatvātmako mataḥ // Tsn_16 //
kalpitaḥ paratantraśca jñeyaṃ saṃkleśalakṣaṇam /
pariniṣpanna iṣṭastu vyavadānasya lakṣaṇam // Tsn_17 //
asaddvayasvabhāvatvāt tadabhāvasvabhāvataḥ /
svabhāvāt kalpitājjñeyo niṣpanno 'bhinnalakṣaṇaḥ // Tsn_18 //
advayatvasvabhāvatvād dvayābhāvasvabhāvataḥ /
niṣpannāt kalpitaścaiva vijñeyo 'bhinnalakṣaṇaḥ // Tsn_19 //
yathākhyānamasadbhāvāt tathāsattvasvabhāvataḥ /
svabhāvāt paratantrākhyānniṣpanno 'bhinnalakṣaṇaḥ // Tsn_20 //
asaddvayasvabhāvatvād yathākhyānāsvabhāvataḥ /
niṣpannāt paratantro 'pi vijñeyo 'bhinnalakṣaṇaḥ // Tsn_21 //
kramabhedaḥ svabhāvānāṃ vyavahārādhikārataḥ /
tatpraveśādhikārācca vyutpattyarthaṃ vidhīyate // Tsn_22 //
kalpito vyavahārātmā vyavahartrātmako 'paraḥ /
vyavahārasamucchedasvabhāvaścānya iṣyate // Tsn_23 //
dvayābhāvātmakaḥ pūrvaṃ paratantraḥ praviśyate /
tataḥ praviśyate tatra kalpamātramasaddvayam // Tsn_24 //
tato dvayābhāvabhāvo niṣpanno 'tra praviśyate /
tathā hyasāveva tadā astināstīti cocyate // Tsn_25 //
trayo 'pyete svabhāvā hi advayālambalakṣaṇāḥ /
abhāvādatathābhāvāt tadabhāvasvabhāvataḥ // Tsn_26 //
māyākṛtaṃ mantravaśāt khyāti hastyātmanā yathā /
ākāramātraṃ tatrāsti hastī nāsti tu sarvathā // Tsn_27 //
svabhāvaḥ kalpito hastī paratantrastadākṛtiḥ /
yastatra hastyabhāvo 'sau pariniṣpanna iṣyate // Tsn_28 //
asatkalpastathā khyāti mūlacittād dvayātmanā /
dvayamatyantato nāsti tatrāstyākṛtimātrakam // Tsn_29 //
mantravanmūlavijñānaṃ kāṣṭhavattathatā matā /
hastyākāravadeṣṭavyo vikalpo hastivad dvayam // Tsn_30 //
arthatattvaprativedhe yugapallakṣaṇatrayam /
parijñā ca prahāṇaṃ ca prāptiśceṣṭā yathākramam // Tsn_31 //
parijñānupalambho 'tra hānirakhyānamiṣyate /
upalambhanimittā tu prāptiḥ sākṣātkriyāpi sā // Tsn_32 //
dvayasyānupalambhena dvayākāro vigacchati /
vigamāt tasya niṣpanno dvayābhāvo 'dhigamyate // Tsn_33 //
hastino 'nupalambhaśca vigamaśca tadākṛteḥ /
upalambhaśca kāṣṭhasya māyāyāṃ yugapad yathā // Tsn_34 //
viruddhadhīvāraṇatvād buddhyā vaiyarthyadarśanāt /
jñānatrayānuvṛtteśca mokṣāpattirayatnataḥ // Tsn_35 //
cittamātropalambhena jñeyārthānupalambhatā /
jñeyārthānupalambhena syāccittānupalambhatā // Tsn_36 //
dvayoranupalambhena dharmadhātūpalabhbhatā /
dharmadhātūpalambhena syād vibhutvopalambhatā // Tsn_37 //
upalabdhavibhutvaśca svaparārthaprasiddhitaḥ /
prāpnotyanuttarāṃ bodhiṃ dhīmān kāyatrayātmikām // Tsn_38 //
iti trisvabhāvanirdeśaḥ samāptaḥ //
kṛtirācāryavasubandhupādānāmiti //
- Notizen
- Distributed under a Creative Commons Attribution-NonCommercial-ShareAlike 4.0 International License (https://creativecommons.org/licenses/by-nc-sa/4.0/)
- Rechtsinhaber*in
- Göttingen Register of Electronic Texts in Indian Languages (GRETIL), SUB Göttingen
- Zitationsvorschlag für dieses Objekt
- TextGrid Repository (2022). 1_sanskr. tei. sa_vasubandhu-trisvabhAvanirdeza. GRETIL. Göttingen Register of Electronic Texts in Indian Languages (GRETIL), SUB Göttingen. https://hdl.handle.net/21.T11991/0000-001C-8C3E-0